དྲ་ཐོག་ལ་སྒོར་མོ་ཁྱེར་ཤོག

ལོ་གཅིག་གི་ནང་དུ་གསར་འགྱུར་དྲ་རྒྱ་ཚང་མས་དྲ་ཐོག་གི་རྒྱུ་ཆ་ཚང་མར་རིན་འབབ་ལེན་རྒྱུ་རེད་ཟེར།

མདང་དགོང་དཔལ་འབྱོར་དུས་བབ་ཀྱི་རྩོམ་སྒྲིག་པ་སྐུ་ཞབས་ལིའོ་ནེལ་ བྷར་བྷེར་ ལགས་ཀྱིས་དབྱིན་ཡུལ་གྱི་གསར་འགྱུར་གླེང་སྟེགས་ཤིག་ཏུ་གཏམ་བཤད་གནད་སྐབས་སྔོན་དཔག་བྱས་དོན། འབྱུང་འགྱུར་གྱི་ཟླ་བ་བཅུ་གཉིས་ཀྱི་ནང་དུ་གསར་འགྱུར་དྲ་རྒྱ་ཐམས་ཅད་ཀྱིས་དྲ་ཐོག་གི་གསར་འགྱུར་དང་རྩོམ་ཡིག་གང་ཡིན་ཡང་རིན་འབབ་ལེན་རྒྱུ་རེད་ཟེར་ལ། ཁོང་གིས་བཤད་དོན། རིན་འབབ་དེའང་གསར་འགྱུར་གྱི་རྩོམ་ཡིག་རེ་རེ་ལ་རིན་གོང་རྒྱག་པའམ། ཡང་ན། དྲ་ཐོག་ལ་དེབ་སྐྱེལ་བྱེད་སྐབས་མངགས་ཉོའི་རིན་གོང་ལེན་པ་གང་རུང་བྱ་སྲིད་པ་རེད། འདི་ལ་ཕན་ནུས་ག་ཚོད་ཅིག་ཡོད་མེད་དང་། ཡོང་འབབ་ག་ཚོད་ཅིག་གསོག་ཐུབ་མིན་ནི་ད་དུང་བཤད་ཁག་པོ་རེད། ཡིན་ཡང་། ངས་གདེང་ཚོད་དང་བཅས་བཤད་ཐུབ་པ་ཞིག་ནི། འབྱུང་འགྱུར་གྱི་ཟླ་བ་ ༡༢ ཀྱི་རིང་འདིར་གསར་འགྱུར་ལས་ཁུངས་དག་གིས་དྲ་ཐོག་གི་རྒྱུ་ཆ་ལ་རིན་འབབ་ལེན་རྒྱུ་ཡིན་པ་ནི་སྔོན་དཔག་བྱེད་ཐུབ་པ་ཞིག་རེད་ཟེར།

ལོ་འདིའི་ཕྱི་ཟླ་ ༥ པའི་ནང་དུ། གསར་ཤོག་གི་གསར་འགྱུར་མཉམ་ལས་ཞེས་པའི་དྲ་རྒྱའི་བདག་པོ་སྐུ་ཞབས་ རུ་བྷེར་ཊི་ མུར་རྡོ་ཆུ་ ཡིས་བཤད་དོན། ཁོང་གི་དྲ་རྒྱས་ལོ་གཅིག་གི་རྗེས་ནས་དྲ་ཐོག་གི་རྒྱུ་ཆར་རིན་འབབ་ལེན་རྒྱུ་ཡིན་ཟེར།

མུར་རྡོ་ཆུ་ཁ་གཏད་དུ་གྱུར་ཡོད་པ་ནེའུ་ཡོག་དུས་བབ་ཀྱིས་འབྱུང་འགྱུར་གྱི་བདུན་ཕྲག་ ༣ ནས་ ༤ ནང་དུ་དྲ་ཐོག་གི་རྒྱུ་ཆ་ལ་རིན་འབབ་ལེན་རྒྱུ་ཡིན་ཚུལ་འདུག

བྷར་བྷེར་གྱིས་བཤད་དོན། ཁོང་གི་དཔལ་འབྱོར་དུས་བབ་ཀྱིས་དྲ་བ་རྣམས་ཀྱིས་མངགས་ཉོ་མ་བྱས་པའི་སྔོན་ལ་རྩོམ་ཡིག་གང་འཚམ་རེ་ཚད་བཀག་ཡོད་པའི་ཐོག་ནས་ལྟ་ཀློག་ཐུབ་པ་བཟོ་གི་ཡིན་ཟེར།

ཁོང་གིས་བཤད་དོན། དེང་གི་ཌེ་ཇེ་ཊལ་གྱི་དུས་སྐབས་འདིས་གསར་འགྱུར་ལས་ཁུངས་ཁག་ལ་ཇི་འདྲའི་ཉེན་ཁ་ཡོད་པ་བཞིན། གོ་སྐབས་ཀྱང་ཚད་མེད་པ་ཞིག་སྤྲད་ཡོད་པ་རེད་ཟེར།

ཁོང་གིས་ད་དུང་བཤད་དོན། གསར་འགོད་རིག་པ་དང་ཟིན་བྲིས་ཀྱི་དབྱེ་བ་ཕྱེ་ཡོད་ལ། ཚད་ལྡན་གྱི་གསར་འགོད་རིག་པ་ནི་བདེན་པ་དང་དོ་མཉམ་གྱི་གསར་འགྱུར་རམ་གནས་ཚུལ་གྱི་རྨང་གཞིའི་སྟེང་ནས་ཡོང་དགོས་ལ། ཟིན་བྲིས་ནི་གཙོ་ཆེ་བར་བསམ་ཚུལ་གྱི་ཕྱོགས་ནས་ཡོང་གི་རེད། ཟིན་བྲིས་ཀྱིས་སྐབས་རེར་གསར་འགྱུར་གྱི་སྒྲུང་གལ་ཆེན་དེ་འདྲ་སྒྲོག་གི་རེད་ལ། དེ་ནི་མུ་མཐུད་ནས་ཡོང་བར་འདོད།