སྐུད་མེད་གློག་ལམ།

ད་ནི་ཁྱིམ་གྱི་གློག་ལའང་སྐུད་པ་མི་དགོས་པའི་དུས་རབས་ཤིག་ལ་བསླེབས་པ་རེད་ཟེར།

ཟླ་འདིའི་ཚེས་ ༢༡ ནས་ ༢༤ བར་དབྱིན་ཡུལ་གྱི་ཨོ་གི་སི་ཧློར་ཌི་ལ་འཚོགས་པའི་ TED Global Conference ཊེ་ཌི་འཛམ་གླིང་ཚོགས་འདུའི་སྟེང་དུ་ཨ་རིའི་བཟོ་གྲྭ་ Witricity ཝི་ཊི་རི་སི་ཊེ་ ཞེས་པའི་གཙོ་འཛིན་ Eric Giler ཨེ་རི་ཁི་ གྷེ་ལེར་ གྱིས་སྐུད་པ་མི་དགོས་པའི་གློག་ལམ་གྱི་འཕྲུལ་ཆས་ཤིག་བསྟན་ཡོད་པ་བྷི་བྷི་སི་ཡིས་གནས་ཚུལ་སྤེལ་འདུག

འཕྲུལ་ཆས་འདི་བརྒྱུད་ནས་ལག་འཁྱེར་ཁ་པར་དང་གློག་མེ་ཡིས་འགྲོ་བའི་རླངས་འཁོར་སོགས་ཀྱི་གློག་མེ་གསོག་ཐུབ་པ་མ་ཟད། ཁྱིམ་ཚང་གི་གློག་ཆས་ཐམས་ཅད་སྐུད་པ་མི་དགོས་པར་བེད་སྤྱོད་ཐུབ་ཀྱི་ཡོད་འདུག

འཕྲུལ་ཆས་འདིའི་ལས་ཀ་བྱེད་ཕྱོགས་ནི་དངོས་ཁམས་རིག་པ་བ་ Marin Soljacic མ་རིན་ སོལ་ཇ་སི་ཁི་ ཡི་ལས་ཀར་གཞི་བཅོལ་བ་ཞིག་ཡིན་ཞིང་། སྒོར་སྒོར་བྱས་པའི་སྐུད་པ་གཅིག་གློག་ལ་མཐུད་ཡོད་པ་དང་། གཞན་གཅིག་སྤྱད་བྱའི་འཕྲུལ་ཆས་ལ་མཐུད་ཡོད་པ་རེད། སྒོར་སྒོར་བྱས་པའི་སྐུད་པ་འདི་གཉིས་ཀྱི་བར་འཐེན་ཤུགས་རྦ་རླབས་བརྒྱུད་གློག་འགྲོ་གི་ཡོད་འདུག སྒོར་སྒོར་བྱས་པའི་སྐུད་པ་འདི་ནི་བརྡ་རྟགས་ཀྱི་གནམ་སྐུད་དང་འདྲ་མཚུངས་ཡིན་འདུག བརྡ་རྟགས་གནམ་སྐུད་དང་པོ་རྩིག་པ་དང་ཁང་ངོ་གང་རུང་དུ་འཇོག་ཆོག་ཅིང་། བརྡ་རྟགས་གནམ་སྐུད་གཉིས་པ་སྤྱད་བྱའི་འཕྲུལ་ཆས་ཀྱི་ནང་དུ་བཞག་པ་ཡིན་ན། དེའི་གཉིས་ཀྱི་རྦ་རླབས་ཀྱི་རྟགས་མཚུངས་པའི་སྒོ་ནས་གློག་ཤུགས་འདྲེན་གྱི་ཡོད་འདུག གལ་ཏེ་ལག་འཁྱེར་ཁ་པར་ཞིག་གི་ནང་དུ་བརྡ་རྟགས་གནམ་སྐུད་བླུགས་པ་ཡིན་ན། ལག་འཁྱེར་ཁ་པར་དེ་བརྡ་རྟགས་གནམ་སྐུད་དང་པོའི་འཐེན་ཤུགས་རྦ་རླབས་ཀྱིས་རྙོབས་པའི་ཡུལ་དུ་བསླེབས་པ་དང་རང་ཤུགས་ཀྱིས་གློག་མེ་གསོག་གི་ཡོད་འདུག རླངས་འཁོར་གློག་མེ་ཅན་ཡང་དེ་ལྟར་ཡིན་འདུག བརྙན་འཕྲིན་ལྟ་བུའི་འཕྲུལ་ཆས་ཀྱི་སྟེང་དུ་བྱ་ཐབས་འདི་བཀོལ་ན་ཐད་ཀར་གློག་འདྲེན་ཐུབ་ཀྱི་ཡོད་འདུག

བྱ་ཐབས་འདི་བཀོལ་ན་གློག་འཕྲོ་བརླག་ཏུ་མི་འགྲོ་བ་མ་ཟད། གློག་ཤུགས་ཀྱང་ཆེན་པོ་ཡོད་འདུག ཡིན་ན་ཡང་། འཐེན་ཤུགས་རྦ་རླབས་ཀྱི་གློག་གིས་མི་དང་སྲོག་ཆགས་ལ་གནོད་པ་བྱེད་ཀྱིན་ཡོད་མི་འདུག རྒྱུ་མཚན་ནི་མི་དང་སྲོག་ཆགས་ཀྱི་ལུས་ལ་གློག་གི་འཐེན་ཤུགས་རྦ་རླབས་དེ་མེད་པས་ཡིན་འདུག

ཚན་རིག་ལག་རྩལ་འདི་ནི་ད་ལྟ་གསར་གཏོད་བྱས་པ་ཞིག་ཡིན་མི་འདུག དུས་རབས་བཅུ་དགུ་བའི་ནང་དུ་ཨ་རིའི་གསར་གཏོད་པ་ Thomas Edison ཐོ་མ་སི་ ཨེ་ཌི་སོན་ དང་དངོས་ཁམས་རིག་པ་བ་ Nikola Tesla ནི་ཁོ་ལ་ ཊེ་སི་ལ་ གཉིས་ཀྱིས་རིག་པ་འདི་རྙེད་ཡོད་འདུག ཐོག་དང་པོ་གློག་སྐུད་མ་འཐེན་པའི་སྔོན་དུ་ཁོང་ཚོས་འཐེན་ཤུགས་རྦ་རླབས་བརྒྱུད་ནས་རྒྱང་ཐག་རིང་བོར་གློག་གཏང་རྒྱུའི་བསམ་བློ་བཏང་ཡོད་ན་ཡང་། སྐབས་དེ་དུས་དཔལ་འབྱོར་གྱི་དབང་གིས་རིག་པ་འདི་ལག་འགྲུབ་བྱུང་མི་འདུག