བོད་པ་ཚང་མར་འགན་དེ་ཡོད། འབྲོག་རུ་ཆོས་གྲགས།

         
                                              ་་་་་་༢༠༡༡ལོའི་བཀའ་བློན་ཁྲི་པ་ག་འདྲ་ཞིག་གདམ་པའི་འགན་དེའི་ཆ་ཤས་བོད་པ་ཚང་མར་ཡོད།

༢༠༡༡ ལོའི་བཀའ་ཁྲི་དེ་མི་ག་འདྲ་ཞིག་གདམ་མིན་གྱི་འགན་དེའི་ཆ་ཤས་བོད་པ་ཚར་མར་ཡོད་སྟབས། ཚང་མས་འདི་ལ་འགན་འཁུར་དགོས་པ་མ་ཟད། འཚོལ་ཞིབ་དང་དཔྱད་བསྡུར་ཡང་གང་མང་མང་བྱ་དགོས་པར་འདོད།

ང་རང་བོད་པ་ཞིག་ཡིན་པའི་ཆ་ནས ༢༠༡༡ ལོའི་བཀའ་བློན་ཁྲི་པ་ག་འདྲ་ཞིག་གདམ་མིན་གྱི་སྐོར་ནས་སྐད་ཆ་ཞིག་མི་བཤད་རང་བཤད་དང༌། བསམ་བློ་ཞིག་མི་གཏོང་རང་གཏོང་ཆགས་སོང༌། ངས་དེའི་སྐོར་ལ་བསམ་བློ་བཏང་བཏང་བའི་མཐའ་མར་དྲི་བ་ཞིག་གིས་ང་ལ་ཡང་བསྐོར་བསྐྱར་བསྐོར་རྒྱག་གི་འདུག ༢༠༡༡ ལོའི་བཀའ་བློན་ཁྲི་པ་སུ་ཞིག་ཡིན་ཡང་དེས་བོད་ཕྱི་ནང་གཉིས་ཐབས་བརྒྱ་ཇུས་སྟོང་གིས་ལྷན་འཛོམས་ཀྱི་ཉིན་མོ་ཞིག་བསྐྲུན་མི་ཐུབ་ཀྱང༌། ཕྱི་ལོགས་ན་ཡོད་པའི་བོད་ཀྱི་སྤྱི་ཚོགས་འདི་བོད་སྐད་ཡིག་གི་ཕ་ཡུལ་ལྟ་བུ་ཞིག་ཏུ་བསྒྱུར་རྒྱུ་དང་བཙན་བྱོལ་གྱི་གནས་བབ་སྲ་བརྟན། དུས་དང་བསྟུན་ནས་ཡར་རྒྱས་དང་གསར་བཏོད་ཀྱི་ལས་ལ་འབད་བརྩོན་བྱ་ཐུབ་མཁན་ཞིག་ངེས་པར་དུ་ཡིན་དགོས་ཞེས་པའི་དྲི་བ་འདི་རེད། ད་དུང་དྲི་བ་འདིས་ང་ལ་བོད་མིའི་སྐྱིད་སྡུག་གི་གཏམ་རྒྱུད་བཤད་བྱུང༌། གཞིས་བྱེས་ལྷན་འཛོམས་ཀྱི་རེ་སྨོན་སོགས་མང་བོ་མང་བོ་ཞིག་བཤད་བྱུང༌།

གང་ལྟར་ཡང༌། ༢༠༡༡ ལོའི་བཀའ་བློན་ཁྲི་པ་ནི་བོད་ཕྱི་ནང་གཉིས་ཀྱི་མིག་གིས་ལྟ་ས་དང༌། རྣ་བས་ཉན་ས། སེམས་པ་ཁེན་ས་སོགས་མང་བོ་ཞིག་ཆགས་ཡོད་པས། སེམས་བསམ་པའི་གཏིང་ནས་བོད་ཀྱི་ཡུལ་ལ་ཤ་ཚ་ཞིང་བོད་ཀྱི་མི་ལ་སྙིང་ཉེ་བའི་བོད་མི་ལྷག་བསམ་དང་སྙིང་སྟོབས་ཅན་ཞིག་ཡིན་དགོས། ངའི་བསམ་པར། ཁོང་ལ་དགོས་ངེས་ཀྱི་རྨང་གཞིའི་ཆ་རྐྱེན་ཞིག་དགོས་པ་ནི། སྒམ་དཀྱེལ་ཡངས་བའི་བསམ་བློ་དང༌། ལངས་ཕྱོགས་བརྟན་པའི་རང་ཚུགས་ཤིག་ཡོད་དགོས་པ་དེ་ཡིན། ད་དུང་རང་གི་མི་རིགས་ཀྱི་སྤྱི་ཚོགས་ལ་རྒྱང་གཟིགས་རིང་ཞིང་མི་མང་གི་ཆེད་དུ་ཡོད་ཚད་དབུལ་ཐུབ་མཁན་ཞིག་བཅས་ཡིན་དགོས་པར་འདོད།

སྤྱི་ཚོགས་ཐོག ༢༠༡༡ ལོའི་བཀའ་ཁྲིའི་དགོས་འདུན་གླེང་སློང་བྱས་པ་དེས་ང་དང་གྲོགས་པོ་ཚོའང་འགུལ་དུ་བཅུག་སོང༌། བཤད་ཡམས་ཀྱི་འགུལ་བསྐྱོད་དེའི་ཁྲོད་ནས་ང་དང་གྲོགས་པོ་ཚོས་ཀྱང་བཀའ་བློན་ཁྲི་པར་དཔྱད་བསྡུར་བྱེད་ཁུལ་བྱས་པ་ཡིན། ང་ཚོས་དཔྱད་བསྡུར་གྱི་ཁྲོད་ནས་ཁོང་ཚོའི་ལོ་རྒྱུས་ཀྱི་རྒྱབ་ལྗོངས་སྔོགས་ཏེ། ངའི་སེམས་སུ་བཀའ་བློན་ཁྲི་པར་འོས་པའི་མི་འགའ་ལྷུང་བ་ནི་གཤམ་གྱི་འདི་དག་ཡིན།
ཁོང་ཚོ་ནི་ད་སྔ་བར་དུ་བོད་ཀྱི་སྤྱི་ཚོགས་ནང་གང་འཚམ་མཐོང་ཡོད་མཁན་དང༌། ད་སྐབས་མི་མང་ནང་བཀའ་ཁྲིར་འོས་གཞིར་གླེང་བའི་མི་སྣ་དག་ནི་འདི་ལྟར།

བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང༌།

བདེ་སྲུང་བཀའ་བློན་འབྲོང་ཆུང་དངོས་གྲུབ་ལགས།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས།

རང་བཙན་རྩོད་ལེན་པ་འཇམ་དབྱངས་ནོར་བུ་ལགས།

སྐུ་སྒེར་དྲུང་ཆེ་རྔ་བ་ཚེ་རྒྱམ། བཅས་ཡིན།

ངས་ཁོང་ཚོའི་ལོ་རྒྱུས་ཀྱི་རྒྱབ་ལྗོངས་གང་འཚམ་ཞིབ་བཤེར་བྱས་པ་ཡིན། ཁོང་ཚོ་སུ་ཡིན་ཡང་མི་རིགས་ཀྱི་འདུ་ཤེས་བརྟན་པོ་ཞིག་གི་ཐོག་ན་ལངས་འདུག ལྷག་བསམ་དྲོད་མོ་ཞིག་གི་ནང་ན་འགྲོ་འདུག
ང་ཚོས་གཟབ་དགོས་ས་གཅིག་ནི་ད་དུང་ང་ཚོར་དམངས་གཙོའི་སྤྱི་ཚོགས་ཤིག་སྨིན་ཐག་ཆོད་མེད་པ་དེ་རེད། སྤྱིར་བཏང་དམངས་གཙོའི་སྤྱི་ཚོགས་ཤིག་ཡིན་ན། སྟོད་ན་རྟ་རྒྱུག་ས་དང༌། སྨད་ན་མཛོ་འཁོར་ས་ཡོད་༼མི་སྒེར་ཞིག་ལ་དཔེར་བླངས་ན།༽དགོས་རབས་འདུག དམངས་གཙོའི་སྤྱི་ཚོགས་ལ་ཆ་རྐྱེན་འདི་མ་ཚང་ན་དམངས་གཙོ་ནི་རྙོག་འཛིང་གི་དྲ་བ་ཞིག་རེད། དམངས་གཙོ་ནི་ཕྱོགས་རིས་ཀྱི་འཐེན་ཤུགས་ཤིག་རེད། འདི་ནི་མཐར་དེད་ན་གང་ཟག་སྒེར་ངོས་ནས་ཡོང་བ་ཞིག་རེད། སྤྱི་ཚོགས་དེའི་བློ་ཁོག་ཆེ་རུ་གཏོང་དགོས་ན། དང་པོ་རང་ཉིད་ནས་བློ་ཁོག་ཆེ་རུ་གཏོང་དགོས་པ་དེ་ཐབས་ལམ་ཡག་ཤོས་རེད། འདི་ནི་རང་ཉིད་སྒེར་ངོས་ནས་འགན་འཁུར་དགོས་པ་ཞིག་ཡིན་པས། བོད་པ་ཚང་མས་གནད་དོན་འདི་ལ་ཐུགས་གཟབ་གནང་རོགས་ཞུ།

མཇུག་མཐར་ང་ལ་རེ་བ་ཞིག་ཡོད། མི་རིགས་འདིའི་ཁ་ལ་བྱང་ཡང་སེམས་ན་མེད་པའི་རེ་བ་ཞིག་ཡོད། ད་སྐབས་མི་མང་གི་སེམས་བསམ་པའི་གཏིང་ན་རེ་བའི་བཀའ་ཁྲི་དང་བཀའ་ཁྲིའི་འོས་གཞི་རྣམ་པ། ཁྱེད་ཅག་གིས་ཀྱང་མི་མང་འདི་སེམས་ལ་བཟུང་ནས་ཕྱག་ལས་གནང་རོགས་གནོངས། བོད་པ་འདི་སྙིང་ལ་བཅངས་ནས་ལས་དོན་བསྒྲུབ་རོགས་གནོངས། མདོར་བསྡུས་ན། ཁ་བཤད་དེ་ལག་ལེན་ལ་འདེབས་རོགས་གནོངས། ལག་ལེན་དེ་འཕེལ་རྒྱས་ལ་བརྩོན་རོགས་གནོངས། ཞེས་སེམས་བསམ་པའི་གཏིང་ནས་ཞུ་འདོད་བྱུང༌། སྙིང་རུས་པའི་མཐིལ་ནས་བརྗོད་འདོད་བྱུང༌།

འབྲོག་རུ་ཆོས་གྲགས་ཀྱིས།