མི་རིགས་དབྱེ་འབྱེད།

རྒྱ་ནག་སྤྱི་བདེ་ཚན་པའི་གསལ་བསྒྲགས་བྱས་དོན་ལྟར། ཉེ་ལམ་རྒྱ་ནག་ཧི་པེ་ཞིང་ཆེན་ཧྲི་ཅ་ཀྲོང་གྲོང་ཁྱེར་དུ་ཆང་གསོལ་ཁང་དང་མགྲོན་ཁང་སོགས་སུ་བོད་དང་ཡུ་གུར་མི་རིགས་ཀྱི་མགྲོན་པོར་སྣེ་ལེན་བྱེད་ཀྱིན་མི་འདུག་ཟེར།
ཧྥ་རན་སིའི་གསར་སྤེལ་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ཉེན་རྟོག་ཚན་པས་ཧྲི་ཅ་ཀྲོང་གྲོང་ཁྱེར་གྱི་ཆང་གསོལ་ཁང་དང་གསོལ་མགྲོན་ཁང་སོགས་སུ་བོད་དང་ཡུ་གུར་མི་རིགས་གྱི་མགྲོན་པོ་སྣེ་ལེན་བྱེད་མི་ཆོག་པའི་གསལ་བསྒྲགས་བྱས་པར་བརྟེན། ད་ལྟ་ས་ཁུལ་དེར་བོད་དང་ཡུ་གུར་མི་རིགས་ཡིན་པའི་མགྲོན་པོ་རྣམས་ལ་སྣེ་ལེན་བྱེད་ཀྱིན་མེད་པ་རེད། གསར་འགོད་པས་ས་གནས་དེ་གའི་ཉེན་རྟོག་པར་ཁ་པར་བརྒྱུད་གནས་ཚུལ་དེའི་ཐད་སྐད་ཆ་དྲིས་པར། མིང་བརྗོད་མི་འདོད་པའི་ཉེན་རྟོག་པ་ཞིག་གིས། ཁྲིམས་མཐུན་སྤྱི་དམངས་ཡིན་ཞིང་མི་སེར་ཐོབ་ཐང་ལག་ཁྱེར་ཡོད་ན་བསྡད་ཆོག་གི་རེད། དམིགས་བསལ་གྱི་རེ་བ་ནན་མོ་བཏོན་མེད་ལུགས་བརྗོད་ཡོད་པ་རེད།
ཡིན་ནའང་། ཆང་གསོལ་ཁང་དང་མགྲོན་ཁང་གི་བདག་གཉེར་མི་སྣ་དག་གིས་གསར་འགོད་པའི་དྲི་བར་ལན་འདེབས་སྐབས། ཉེ་སྔོན་ཉེན་རྟོག་པ་ཡོང་ནས་བོད་དང་ཡུ་གུར་མི་རིགས་ལ་སྣེ་ལེན་བྱེད་མི་ཆོག་པའི་གསལ་བསྒྲགས་དངོས་སུ་བྱས་བྱུང་ཞེས་བརྗོད་ཡོད་འདུག 
གཞན་ཡང་། ན་ནིང་པེ་ཅིན་ཨོ་རྩེད་ཀྱི་སྐབས་སུའང་། དེ་མཚུངས་ཀྱི་གསལ་བསྒྲགས་བརྡ་སྦྱོར་སྤེལ་པར་བརྟེན། པེ་ཅིན་ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་དཔོན་ཆེན་མོ་གཞོན་པ་ཡེས་ལིས་ཧཱ་མའོ་སོགས་འགྲོ་བ་མིའི་ཐོབ་ཐང་དོན་གཉེར་ཅན་དག་གིས་ངོ་རྒོལ་བྱས་ཡོད་པ་རེད། ད་ལྟ་སློབ་དཔོན་ཆེན་མོ་ཡེས་ལིས་ཧཱ་མའོ་མཆོག་ཉེ་སྔོན་གྱི་ ༧་༥ ཤིན་ཅང་གི་ཞི་བའི་གྱེན་ཡངས་དང་འབྲེལ་བ་ཡོད་ཚུལ་བརྗོད་དེ་ད་ལྟ་བཙོན་འཇུག་བཀག་སྡོམ་བྱས་ཡོད་པ་རེད།