ད་ལོའི་ལོ་མགོར་ཀྲུང་གོའི་རྒྱལ་སྲིད་སྤྱི་ཁྱབ་གསར་འགྱུར་གཞུང་སྒྲུབ་ཁང་གིས་ ༢༠༠༩ དང་ ༢༠༡༠ གཉིས་ནང་ཀྲུང་གོའི་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་། མི་རིགས་ས་ཁོངས་རང་སྐྱོང་གི་གནས་བབ་ཡར་རྒྱས་དང་ལེགས་བཅོས་བྱ་རྒྱུའི་འཆར་ཟིན་ཞིག་བསྒྲགས་ཡོད་པ་དང་། འཆར་ཟིན་དེའི་ནང་ཕྱོགས་བདུན་ནས་མི་རིགས་ཀྱི་ཁེ་དབང་དང་ཐོབ་ཐང་ལ་སྲུང་སྐྱོབ་ལ་ཤུགས་སྣོན་བྱ་རྒྱུ་ཡིན་སྐོར་བརྗོད་འདུག
ད་ལོའི་སྤྱི་ཟླ་ ༤ ཚེས་ ༡༣ ཉིན་ཀྲུང་གོའི་རྒྱལ་སྲིད་སྤྱི་ཁྱབ་ཁང་གིས་༼ རྒྱལ་ཁབ་ཀྱི་འགྲོ་བ་མིའི་ཐོབ་ཐང་བྱ་འགུལ་འཆར་གཞི། ༽ ཞེས་པ་ཞིག་གཏན་འབེབས་བྱས་ཡོད་པ་དང་། ཟླ་འདིའི་ཕྱི་ཚེས་ ༡ ནས་བཟུང་བོད་ཡིག་སོགས་སྐད་ཡིག་འདྲ་མིན་ནང་ཕབ་སྒྱུར་གྱིས་རྒྱ་ནག་གི་གསར་ལམ་ཁག་ཏུ་སྤེལ་དོན། སྤྱི་ལོ་ ༢༠༠༩ ནས་ ༢༠༡༠ བར་གྱི་༼ རྒྱལ་ཁབ་ཀྱི་འགྲོ་བ་མིའི་ཐོབ་ཐང་བྱ་འགུལ་འཆར་གཞི། ༽ ཞེས་པ་འདི་ནི། ཀྲུང་གོས་ཐེངས་དང་པོར་འགྲོ་བ་མིའི་ཐོབ་ཐང་སྐོར་ལ་གཏན་འབེབས་བྱས་པའི་རྒྱལ་ཁབ་ཀྱི་འཆར་འགོད་ཞིག་ཡིན་ལ། འཆར་འགོད་འདིར་མ་འོངས་པའི་ལོ་གཉིས་ནང་འགྲོ་བ་མིའི་ཐོབ་ཐང་སྲུང་སྐྱོབ་དང་ཡར་རྒྱས་གཏོང་རྒྱུ་གལ་ཆེན་དུ་བཟུང་ཡོད། ཅེས་བཀོད་འདུག
དོན་ཚན་བདུན་ཅན་གྱི་འཆར་གཞི་དེའི་ནང་བཀོད་དོན། དང་པོ། གྲངས་ཉུང་མི་རིགས་དང་འབྲེལ་བ་ཡོད་པའི་བཅའ་ཁྲིམས་འཛུགས་པར་སྐུལ་འདེད་གཏོང་རྒྱུ་དང་། མི་རིགས་ས་ཁོངས་རང་སྐྱོང་བཅའ་ཁྲིམས་སྐོར་གྱི་གཏན་འབེབས་ཆ་ཚང་ལག་ལེན་མཐར་ཕྱིན་ཡོང་བྱ་རྒྱུ། གྲོང་ཁྱེར་གྱི་མི་རིགས་བྱ་བའི་སྲོལ་ཡིག་དང་གྲོང་རྡལ་མི་རིགས་བྱ་བའི་སྲོལ་ཡིག་གཉིས་བཟོ་བཅོས་བྱ་རྒྱུ།
གཉིས་པ། གྲངས་ཉུང་མི་རིགས་ཁག་གིས་ཁྲིམས་ལྟར་མི་རིགས་རང་སྐྱོང་ས་ཁུལ་གྱི་ལས་དོན་བདག་སྐྱོང་དང་། རྒྱལ་ཁབ་ཀྱི་ལས་དོན་བདག་སྐྱོང་བྱེད་པའི་ཁེ་དབང་འགན་སྲུང་བྱ་རྒྱུ། གྲངས་ཉུང་མི་རིགས་ང་ལྔ་ཚང་མར་རྒྱལ་ཡོངས་དམངས་འཐུས་ཚོགས་ཆེན་གྱི་འཐུས་མི་ཡོད་པར་བྱ་རྒྱུ་དང་། མི་གྲངས་ཧ་ཅང་ཉུང་བའི་མི་རིགས་ཡིན་ཡང་འཐུས་མི་གཅིག་རེ་ངེས་པར་དུ་ཡོང་ཐུབ་པ་ཁག་ཐེག་བྱ་རྒྱུ། མི་གྲངས་ས་ཡ་གཅིག་ལས་བརྒལ་བའི་མི་རིགས་ཚང་མར་རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ལས་འཛིན་པའི་འཐུས་མི་ཡོད་པར་ཁག་ཐེག་བྱ་རྒྱུ།
གསུམ་པ། གྲངས་ཉུང་མི་རིགས་ཀྱི་སློབ་གསོའི་ལས་དོན་གོང་དུ་སྤེལ་བར་འབད་བརྩོན་བྱ་རྒྱུ་དང་། མུ་མཐུད་རིགས་མི་འདྲ་བའི་མི་རིགས་སློབ་གྲྭ་གསར་འཛུགས་དང་གོང་སྤེལ། མི་རིགས་གྲ་སྒྲིག་འཛིན་གྲྭ་སྒྲུབ་པ། སྐད་གཉིས་སློབ་ཁྲིད་ལག་ལེན་བསྟར་བ། གྲངས་ཉུང་མི་རིགས་ཁག་གི་རྒྱུགས་སྤྲོད་སློབ་མར་དམིགས་བསལ་སྤྲོད་རྒྱུ། རོང་འབྲོག་ས་ཁུལ་དུ་བཅའ་སྡོད་ལམ་ལུགས་ཀྱི་སློབ་གསོ་ཁྱབ་སྤེལ་དུ་གཏོང་བ་དང་། ནང་ལོགས་ས་ཁུལ་གྱི་སློབ་གྲྭ་ཁག་ཅིག་ཏུ་བོད་ལྗོངས་སློབ་འབྲིང་དང་། ཞིན་ཅང་མཐོ་རིམ་སློབ་འབྲིང་གི་འཛིན་གྲྭ་བསྒྲུབ་རྒྱུ་མ་ཟད། ༢༠༡༠ བར་མི་རིགས་རང་སྐྱོང་ས་ཁུལ་དུ་ལོ་དགུའི་འོས་འགན་སློབ་གསོ་ཐོབ་པའི་མི་གྲངས་བརྒྱ་ཆ་ ༩༥ ལྷག་ལ་སླེབས་སུ་འཇུག་རྒྱུ།
བཞི་བ། གྲངས་ཉུང་མི་རིགས་ནང་མི་སྣ་འཇོན་ཐང་ཅན་སྐྱེད་སྲིང་ལ་ཤུགས་བརྒྱག་རྒྱུ་མ་ཟད། གྲངས་ཉུང་མི་རིགས་སོ་སོའི་ལས་ཞུགས་བསྡུར་ཚད་དེ། གྲངས་ཉུང་མི་རིགས་གང་དེའི་མི་གྲངས་ཀྱིས་རྒྱལ་ཡོངས་སྤྱིའི་མི་གྲངས་ནང་ཟིན་པའི་བསྡུར་ཚད་དང་མཉམ་པ་བྱ་རྒྱུ། ས་ཁུལ་དང་རྫོང་རིམ་པའི་གྲངས་ཉུང་མི་རིགས་ཀྱི་ལས་བྱེད་པར་རེས་མོས་ཀྱིས་གསོ་སྐྱོང་བྱ་རྒྱུ་དང་། མི་རིགས་བྱ་བའི་ཁོངས་གཏོགས་ཀྱི་ལས་བྱེད་པར་དེང་རབས་དོ་དམ་གྱི་ཤེས་བྱ་དང་། ཕྱོགས་བསྡུས་ནུས་པས་གསོ་སྐྱོང་བྱ་རྒྱུ། རྫོང་དང་གྲོང་རྡལ། གྲོང་སྡེ་བཅས་ཀྱི་གྲངས་ཉུང་མི་རིགས་ཁག་གི་གཞོན་སྐྱེས་ལས་བྱེད་པ་འདེམ་སླད། རྣམ་པ་མི་འདྲ་བའི་ཆེད་སྦྱོང་ཡན་གྱི་སློབ་གསོ་སྤྲོད་རྒྱུ་དང་། དེའི་ཁྲོད་ཕུལ་བྱུང་ན་གཞོན་ཆེད་ལས་ལག་རྩལ་བ་ཕྱི་རྒྱལ་དུ་བཏང་སྟེ་གསོ་སྐྱོང་བྱ་རྒྱུ།
ལྔ་བ། གྲངས་ཉུང་མི་རིགས་ཁག་ལ་སོ་སོའི་སྐད་ཡིག་སློབ་སྦྱོང་དང་བེད་སྤྱོད། གོང་འཕེལ་ཏུ་གཏོང་རྒྱུའི་དབང་ཆ་ཡོད་པར་འགན་སྲུང་བྱེད་རྒྱུ་དང་། གྲངས་ཉུང་མི་རིགས་ཀྱི་སྐད་ཡིག་ཆེད་མཁས་པ་གསོ་སྐྱོང་བྱས་ཏེ། གྲངས་ཉུང་མི་རིགས་ཀྱི་སྐད་ཡིག་དེ་སྲིད་འཛིན་དང་ཁྲིམས་འཛིན། སློབ་གསོའི་ཁྱབ་ཁོངས་སུ་བེད་སྤྱོད་བྱ་ཐུབ་པ་བྱ་རྒྱུ་དང་། གྲངས་ཉུང་མི་རིགས་ཀྱི་སྐད་ཡིག་དཔེ་དེབ་དང་ཚགས་པར་རིགས་དཔར་བསྐྲུན་ཐད་མི་རྒྱུ་གཉིས་ཀས་རོགས་སྐྱོར་དང་། གྲངས་ཉུང་མི་རིགས་ཀྱི་སྐད་ཐོག་ནས་རླུང་འཕྲིན་དང་བརྙན་འཕྲིན། གློག་བརྙན་རིགས་བསྒྱུར་བསྐྲུན་དང་སྒྲིག་སྦྱོར་བཟོ་གོང་མཐོར་གཏོང་རྒྱུ། མཐའ་མཚམས་ས་ཁུལ་གྱི་གྲངས་ཉུང་མི་རིགས་ཁག་གི་སྐད་ནང་། རླུང་འཕྲིན་དང་བརྙན་འཕྲིན་ཁྱབ་ཚད་ལ་ཤུགས་སྣོན་བྱས་ཏེ། གྲངས་ཉུང་མི་རིགས་ཀྱི་སྐད་ཡིག་ཚད་གཞི་ཅན་དང་ཚད་ལྡན་ཅན། ཆ་འཕྲིན་ཅན་བཅས་སུ་གཏོང་རྒྱུར་རོགས་འདེགས་བྱ་རྒྱུ།
དྲུག་པ། གྲངས་ཉུང་མི་རིགས་ཀྱི་རིག་གནས་གོང་སྤེལ་དང་སྦྲགས་ཏེ། རྒྱལ་ཁབ་ཕྱི་ནང་ལ་ཅུང་སྙན་གྲགས་ཡོད་པའི་གྲངས་ཉུང་མི་རིགས་ཀྱི་རྩོམ་རིག་དང་ཟློས་གར། རོལ་དབྱངས། ཞབས་བྲོ། མཛེས་རྩལ། བཟོ་བཀོད། ཡུལ་སྲོལ། རྒྱན་གོས། བཟའ་བཏུང་སོགས་རིག་གནས་སྒྱུ་རྩལ་འདོན་སྤེལ་དང་སྲུང་སྐྱོང་། གྲངས་ཉུང་མི་རིགས་ཀྱི་བརྗོད་དོན་མཚོན་པའི་ཕུལ་བྱུང་རླུང་འཕྲིན་དང་། བརྙན་འཕྲིན་སྒྲིག་བཟོ་བྱ་རྒྱུ་དང་གྲངས་ཉུང་མི་རིགས་ཀྱི་རིག་གནས་གོང་སྤེལ་ཐད། ཤུགས་རྐྱེན་ཅུང་ཆེ་བའི་མི་རིགས་དཔར་སྐྲུན་ལས་གཞི་འཛུགས་སྐྲུན་བྱེད་པར་རོགས་སྐྱོར་བྱ་རྒྱུ།
བདུན་པ། སྤྱི་ལོ་ ༢༠༠༩ ནས་ ༢༠༡༠ བར་རྒྱལ་ཁབ་ཀྱིས་གྲངས་ཉུང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་དར་རྒྱས་ལས་དོན་ཐད། མ་དངུལ་སྒོར་མོ་དུང་ཕྱིར་ཉི་ཤུ་ ༢༠༠༠༠༠༠༠༠༠ ལྷག་བཏང་སྟེ། དཔལ་འབྱོར་དང་སྤྱི་ཚོགས་མགྱོགས་མྱུར་ངང་གོང་འཕེལ་དུ་འགྲོ་བར་རོགས་འདེགས་བྱ་རྒྱུ་ཡིན། ཞེས་བཀོད་འདུག
གསར་གནས་འདི་ཕྱི་ལོ ༢༠༠༩ལོའི་ཟླ ༤ཚེས ༡༥ཉིན་ཐོན་འདུག་མོད། ད་ལྟའི་བར་ག་རེ་བྱས་ནས་མ་སྤེལ་བ་ཡིན་ནམ།
རྒྱ་ནག་གིས་ལག་ལེན་བསྟར་མིན་གང་ལྟར་ཡང་། འདི་ཡོངས་ཁྱབ་ཏུ་བསྒྲགས་པ་ཙམ་གྱིས་མ་མཐར་ཡང་གྲངས་ཉུང་མི་རིགས་རྣམས་ཀྱིས་སོ་སོར་རྒྱལ་ཁབ་ཀྱིས་སྤྲད་པའི་ཁེ་དབང་གང་དང་གང་ཡོད་ཤེས་གི་རེད། དེ་ནས་ཁེ་དབང་འདི་དག་ཁྲིམས་མཐུན་གྱི་ཐོག་ནས་དངོས་སུ་ལག་ལེན་དུ་འདེབས་པ་དང་། འཐོབ་འོས་ཤིང་སྤྲོད་རྒྱུར་ཁས་ལེན་བྱས་པའི་ཐོབ་ཐང་གང་ཞིག་མུ་མཐུད་ནས་ཡང་དག་པ་ཞིག་མ་ཐོབ་པ་རྣམས་ལ་རྩོད་ལེན་བྱ་ཐུབ་པའི་ལམ་ཁ་ཞིག་རེད་སྙམ།
གྲངས་ཉུང་མི་རིགས་ཀྱི་ཐོབ་ཐང་གླེང་དོན་ཅི་ཡིན་ནམ། འདི་ནི་དོན་གྱི་དྲི་བ་ཞིག་རེད། རྒྱ་ནག་གིས་འགྲོ་བ་མིའི་ཐོབ་ཐང་ཡར་རྒྱས་གཏོང་འདོད་ཡོད་ཚུལ་བརྗོད་པར་མ་ཟད། འགྲོ་བ་མིའི་ཐོབ་ཐང་གི་སྐོར་ལ་ཁྲིམས་གཞི་གཏན་འབེབ་བྱས་ཏེ་ཡོངས་བསྒྲགས་བྱེད་ཀྱི་ཡོད་པ་རེད། འགྲོ་བ་མིའི་ཐོབ་ཐང་གི་སྐོར་ལ་རྒྱལ་ཚོགས་ནས་ཁྲིམས་གཞི་གཏན་འབེབ་ཟིན་པ་དེས་མི་འགྲིག་པར་ཁྲིམས་གཞི་གསར་པ་ཞིག་བཟོ་དགོས་དོན་ཅི་ཡིན་ནམ། དྲི་བ་འདིས་ང་ཚོ་ལ་རེ་བ་གང་བརྗོད་ཀྱི་འདུག