ཐར་མ་མཚོ ཨ་མའི་ངུ་ངག་གིས་དབྱངས་རྟའི་ཁྱེད་ལ་བོས
ཨ་ཕའི་སྒོ་འགྲམ་ནས་ཁྱེད་ལ་སྒུག
ཨ་མའི་ཟུག་རྔུའི་རེ་རེ་ཡིས་ངུ་སྐད་ཕྲ་མོ་ཞིག་རྒྱག་ཞོར་ཏུ
ཉལ་ཁྲིའི་སྟེང་ནས་འཕག་འཚག་བྱེད་ཀྱིན་ཁྱེད་ལ་སྒུག
ཨག་སྐད་དེ ཕྱི་རོལ་ནས ཨ་ཕའི་རྣ་ལམ་ཏུ་འབྱོར་དུས
ངས་སྙན་ངག་འབྲི་ཞོར་ཏུ་ཁྱེད་ལ་བོས
ཐར་མ་མཚོ ཤ་ཁྲག་གི་གསེང་ནས་ཐོན་ཤོག
ཨ་ཕའི་གྲ་སྒྲིག་བྱས་དེ་སྒུག་ཡོད
ཨ་མའི་ན་ཟུག་ལ་བསམ་ཤེས་གནོངས་ཤིག
ཨ་མ་ལ་སྙིང་རྗེ་ཞིག་བསྒོམ་ནས
ན་ཟུག་མེད་པར་ཕེབས་ཤོག་དང་
འཇིག་རྟེན་འདི་ན་ཉིད་རང་ལ་ཐར་བ་ཡོད་ངེས
ཐར་མ་མཚོ འཇིག་རྟེན་འདི་ན
ཁྱེད་རང་གི་གཞིས་ཁྱིམ་ཡོད
ཁྱེད་རང་གི་ཕ་མ་གཉིས་ཡོད
ཁྱེད་རང་གི་ཉེ་མི་ཡོད
ཁྱེད་རང་གི་རྩེད་རོགས་ཡོད
ཁྱེད་རང་གི་འཚར་ལོངས་བྱེད་ས་ཡོད
ཡིན་ཡང་ ཁྱེད་རང་གི་ཕ་རྒན་འདི་ནས་མིན་ལ
ཁྱེད་རང་གི་ཕ་རྒན་ལ་རྒྱལ་ཁབ་མེད
ཐར་མ་མཚོ ཁྱེད་འཇིག་རྟེན་ཏུ་སླེབས་པར
ཁྱེད་ལ་༧བླ་མས་གཟིགས་རོགས
ཁྱེད་ལ་བདེ་སྐྱིད་ལྡན་པར་སྨོན
ཁྱེད་ཀྱི་བསམ་དོན་འགྲུབ་པར་ཤོག
ཁྱེད་རང་ཕ་མ་ལ་བརྩེ་བའི་བུ་མོ་ཁྲེལ་ཡོད་ཅིག་ཆགས་པར་ཤོག
ངའི་དགའ་རོགས་གངས་དཀར་ལྷ་སྒྲོན་གྱིས་སྨན་ཁང་དུ་ཐར་མ་མཚོ་སྐྱེ་བར་ཉལ་ཁྲིའི་སྟེང་ནས་ཨག་སྐད་རྒྱག་ཞོར་ཏུ་བསྡད་ཡོད་ལ། ང་རང་གི་ལས་ཀ་གྲོལ་ནས་སྨན་ཁང་དུ་འབྱོར་ནས་ཁོ་མོ་དྲགས་སྐྱེད་ཡོང་བར་སྒུག་ནས་བསྡད་ཡོད་སྐབས་སུ་གོང་གི་སྙན་ངག་འདི་རང་གི་བུ་མོ་ཐར་མ་མཚོ་མི་ཡུལ་ཏུ་ཡོང་རྒྱུར་རེ་སྐུལ་བྱས་པ་དང་ཁ་གཡང་བོས་པ་ཞིག་ཡིན།
༢།༨།༠༩ཞོགས་པ་ཆུ་ཚོད་གཉིས་དང་སྐར་མ་ལྔ་བཅུ་ལྔ་ལྔའི་སྟེང་དུ་ཐར་མ་མཚོ་ཨག་རིང་ཞིག་དང་ལྷན་ཏུ་མི་ཡུལ་འདིར་སླེབས་སོང་ལ། ངས་ཀྱང་རང་ཉིད་ནི་འཇིག་རྟེན་འདི་ནས་བུ་མོ་ཐར་མ་མཚོའི་ཕ་རྒན་ཆགས་པ་ཤེས་སོང་ལ་རང་གི་དགའ་མས་ཀྱང་ན་ཟུག་ཡོད་ཚད་སྐད་ཅིག་དུ་བརྗེད་དེ་བུ་མོ་ཁྲག་དང་གཤང་ཆུའི་འདྲེས་མའི་ཁྲོད་ནས་ཡར་བླངས་པ་དེ་རང་གི་བྲང་ཁར་སྤྱར་ནས་སྙིང་རྗེ་བ་ལ་ང་ཡི་བུ་མོ་ཆུང་ཆུང་ཟེར་ནས་འཛུམ་མདངས་ལྷད་མེད་ཅིག་སྟོན་བཞིན་འདུག ང་ནི་རང་གི་དགའ་མའི་ན་ཟུག་ལ་བསམ་བློ་གཏོང་ཞོར་དང་རང་གི་བུ་མོ་ཐར་མ་མཚོའི་ལུས་སྟེང་གི་ཁྲག་དང་གཤང་ཆུ་དེ་ཚོ་ལ་བལྟ་ཞོར་ཏུ་རང་དབང་མེད་པར་སེམས་ནང་དུ་སྐྱོ་སྣང་ཅིག་རང་དབང་མེད་པར་སྐྱེ་སོང་། དེ་ནི་མི་ཟེར་བ་འདིས་སྐྱེ་རྒ་ན་འཆིའི་བརྒྱུད་རིམ་ལ་བསམ་བློ་ཞིག་བཏང་བས་ཡིན་པ་འདྲ། གང་ལྟར། རང་གི་བུ་མོ་ཐར་མ་མཚོ། མི་ཡུལ་འདིར་སླེབས་པ་ལ་རྟེན་འབྲེལ་མཚོན་བྱེད་དུ་སྙན་ངག་འདི་བྲིས་དེ་སྤུན་ཟླ་དག་ལ་ཕུལ་བ་ཡིན།
དུས་་བབ་དྲ་ཚིགས་ཀྱི་སྐུ་མགྲོན་རྙིང་པ་བོད་ཤ་ཁྲག་རུས་གསུམ་ལགས་སུ།
ཉིད་ཀྱི་བུ་མོ་ཐར་མ་མཚོ་འཇིག་རྟེན་མི་ཡུལ་དུ་སླེབས་པར་བཀྲ་ཤིས་བདེ་ལེགས་ཞུ་རྒྱུ་དང་། ཁྱེད་བཟའ་མི་ཚང་མ་ཚེ་རིང་ལོ་བརྒྱ་ཡོང་བར་ཤོག
བོན་རྒྱ་རིན་པོ་ཆེ་ཚང་གི་ཐུགས་སྨོན་ལྟར་བུ་མོ་ཐར་མ་མཚོ་བུ་མོ་ཡ་རབས་ཤིག་དང་མི་ལ་ཕན་ཐོག་བྱེད་མཁན་གྱི་རླབས་ཆེན་གྱི་མ་ཡུམ་ཞིག་ཉན་རྒྱུར་བདག་གིས་ཀྱང་རེ་བ་རྒྱག་གི་ཡོད། ཁྱེད་ཚང་འདི་རུ་རྟེན་འབྲེལ་ཞུ་རུ་ཕེབས་པ་ཐུགས་རྗེ་ཆེ།
བུ་མོ་ཐར་མ་འཚོ་ལ་ཨ་ཁུ་བོན་རྒྱས་རྟེན་འབྲེལ་ཞུ་བཞིན་ཡོད། ཁྱོད་ཀྱང་ཨ་ཁུ་བོན་རྒྱ་སྙིང་ནས་དགའ་བའི་ཨ་ཅེ་འཇམ་དབྱངས་སྐྱིད་ལྟ་བུའི་བུ་མོ་རུས་པ་ཅན་ཞིག་དང་། མྱངས་ཚ་དཀར་རྒྱན་ལྟ་བུའི་བུ་མོ་མཛངས་མ་ཞིག ཡང་ན་རྒྱལ་ཡུམ་ཆེན་མོ་ལྟ་བུའི་བུ་མོ་བྱང་སེམས་ཅན་ཞིག་གི་སྨོན་འདུན་ཞུ་རྒྱུ་ཡིན།
ཇིང་སྲས་མིག་གསུམ་ལགས། ཐུགས་རྗེ་ཆེ་རྟེན་འབྲེལ་ཞུས་པ་ལ།
ཨ་རིག་འགྱུར་མེད་ལགས། ཉིད་ཀྱིས་ཀྱང་རྟེན་འབྲེལ་ཞུས་པ་དང་ཞོར་དུ་ང་རང་ལ་སེམས་གཏམ་ཞིག་བཤད་གནང་བ་དེར་ཐུགས་རྗེ་ཆེ་ལགས། དགའ་མ་ནས་ཆུང་མར་འགྱུར་རྒྱུར་དེ་ཡང་ཉིད་ཀྱིས་གསུང་བ་དེ་ཡང་བདེན་པ་ཞིག་མ་རེད་ཟེར་ག་ལ་འཕོད། ངས་ཀྱང་ག་ལེར་བསམ་བློ་གཏོང་ངེས་ཡིན་ལ། རང་གིས་ཀྱང་ཁོ་མོ་ཆུང་མའི་རྟེན་འབྲེལ་དེ་མ་བྱས་ཀྱང་སྐྱིད་སྡུག་གི་ཁུར་རོ་མཉམ་ཁུར་ལོས་བྱེད།
གྲོགས་པོ་ལགས། ཡུན་རིང་ཞིག་ལ་ལས་བྲེལ་གྱི་དབང་གིས་ཟིན་བྲིས་འབྲི་ཁོམ་དང་ཀློག་ཁོམ་མེད་པར་གྱུར་ཡོད་ཀྱང་། དེ་རིང་འདིར་སླེབས་དུས་ཁྱེད་རང་འཇིག་རྟེན་གྱི་ཨ་ཕ་རུ་གྱུར་ཞིང་། སྙིང་ནས་བརྩེ་བའི་བུ་མོ་ཆུང་ཆུང་ཞིག་ཀྱང་འཇིག་རྟེན་མི་ཡུལ་འདིར་སྐྱེས་བྱུང་བ་རྟོགས་པས་རྟེན་འབྲེལ་ཞུ་བ་ཡིན།
ཐར་མ་མཚོ། ཁྱེད་རང་དངོས་གནས་དྲིན་མ་ཟུང་གི་ཚེ་འདིའི་བདེ་སྐྱིད་དང་རེ་སྨོན་ཡིན་པར་སྨོན། ཁྱེད་ལ་ནད་མེད་ཚེ་རིང་ལོ་བརྒྱ་ཡོང་བར་སྨོན།
ཡིན་ནའང་། དྲ་གྲོགས་ལགས། ཉིད་ཀྱིས་ཐར་མ་མཚོའི་ཨ་མར་དགའ་མ་ཞེས་འབོད་པ་ལས་ཆུང་མ་ཞེས་མི་འབོད་པའི་རྒྱུ་མཚན་ཅི། ཁྱེད་ཟུང་ལ་སྙིང་ནས་བརྩེ་བའི་བུ་མོ་ཆུང་ཆུང་ཞིག་ཀྱང་བཙས་ཟིན་པས་ད་ནི་ཅིས་ཀྱང་མྱུར་ཏུ་ཆང་ས་བརྒྱབས་ཏེ། སྐྱིད་ཀྱི་རྟ་ཕོ་མཉམ་ཞོན་དང་སྡུག་གི་ཁུར་བོ་མཉམ་འཁུར་བྱས་ན་རེད། དེ་མིན་དགའ་མ་ཟེར་བའི་ཚིག་འདིའི་ཤུགས་སུ་ནམ་ཞིག་འཇིགས་ཡེར་བའི་བགྲོད་ལམ་ཞིག་ཀྱང་ཡོད་པ་སྟོན་གྱི་ཡོད། དེར་བརྟེན་དུས་འདི་ནས་བཟུང་དགའ་མ་ཟེར་བ་འདི་ཆུང་མ་ཞེས་པར་བསྒྱུར་རོགས། དེ་རེད་དམ།
གྲོགས་པོ་རྟེན་འབྲེལ་ཞུ། ཐར་མ་མཚོ་ནད་མེད་ཚེ་རིང་ལོ་བརྒྱ།
སྤུན་ཟླ་ཚོ། མདོ་ལའུ་འཁྱམས་པོ། བསེ་རུ། འཁྱམས་པོ། སྨྱུག་རྒོད། གཉན་འདང་ཕོ་ཉ། ཁྱེད་ཅག་འདི་རུ་ཕེབས་ནས་ངའི་བུ་མོ་ཐར་མ་མཚོ་མི་ཡུལ་འདིར་འབྱོར་བ་ལ་རྟེན་འབྲེལ་ཞུས་པ་དེར་ཐུགས་རྗེ་ཆེ་ལགས། ཚང་མས་ཁ་གཡང་དེའི་བདག་གི་བུ་མོའི་མ་འོངས་པ་འོད་སྟོང་ལྡན་པ་ཞིག་ཡོང་རྒྱུར་ཡིད་ཆེས་ཡོད།
ཤ་ཁྲག་རུས་གསུམ་གྱི་ཀློང་ནས་ཐར་ཞིང་།
ཕ་མའི་དུང་སེམས་ཀྱི་དབུས་སུ་མཚོ་བའི་
དམར་ལུག་ལུག་གི་བུ་མོ།
འཇམ་ཤིག་ཤིག་གི་བུ་མོ།
ཐར་མ་མཚོ།
ཐར་མ་མཚོ་་་་་་་་་
ངས་ཁྱོད་འཇིག་རྟེན་འདིར་ཕེབས་པར་རྟེན་འབྲེལ་ཞུ་བཞིན།
ངས་ཁྱོད་འཇིག་རྟེན་འདིར་ཡོང་བར་མཚམས་འདྲི་ཞུ།
བུ་མོ་ལགས། ཐར་པ་མཚོ། དགོངས་དག
ཁྱོད་འཇིག་རྟེན་འདིར་ཡོང་དུས་ནས་ས་མཐའ་ཞིག་ཏུ་གནས་ཚང་གཡར་དགོས་པ་འདི་ང་ཚོས་བྱས་པ་མ་རེད་དེ། ང་ཚོ་ལ་ལེ་ལན་ཡོད།
ཁྱོད་འཇིག་རྟེན་འདིར་སླེབས་དུས་ཕ་ས་མཐོང་རྒྱུ་མེད་ཅིང་ཕ་ཟས་སྤྱོད་རྒྱུ་མེད་པ་འདི་ང་ཚོས་བྱས་པ་མ་རེད་དེ། ང་ཚོ་ལ་འགན་ཁུར་ཡོད།
འོན་ཀྱང་ཁྱེད་ངོ་མ་གནོངས་དང་།
ཁ་བའི་ཟུངས་ཁྲག་སྐོམ་མེད་ལ།
གངས་རིའི་བླ་སྲོག་ཆད་མེད།
བུ་མོ་ལགས། ཁྱེད་ཀྱིས་ཕ་མའི་ངོ་གདོང་གི་གཉེར་མ་ལ་རྩིས་ཁྲ་ཐེབས་པར་སྨོན།
དྲ་གྲོགས་ཤ་ཕྲག་རུས་གསུམ་ལགས།
འདིར་འང་ཁྱེད་ལ་བཀྲ་ཤིས་རྟེན་འབྲེལ་གྲང་མེད་ཞུ་པ་ཡིན།
ཡ་ ད་ཡག་པོ་རེད།
བུ་མོ་ཐར་མ་མཚོ
ཨ་ཞང་ཚང་གི་ཁྱིམ་ཆེན་ལ་ཕེབས་པ་དེ་ ཏག་ཏག་རན་འདུག
ཨ་ཁུ་ཚོས་ཁྱོད་ལ་བསུ་ཆང་དང་ཁ་གཡང་འཐེན་
ཨ་སྲུ་ཚོས་སྤྲང་དཀར་རྩམ་པས་མཆོད
ཡ་ཁྱིམ་ན་ཤ་མར་ཐུད་གསུམ་གྱི་གསོལ་སྟོན་ཡོད
ཁྱོད་ཡང་གངས་རི་ཚང་གི་ལས་དབང་རྩོད་མཁན་ནས་ལེན་མཁན་ཞིག་ཡིན་པར
ཨ་ཁུ་ ཡིད་ཆས་ཡོད
རྙིང་རྗེ་པའི་བུ་མོ་ཆུང་ཆུང ཐར་མ་མཚོ
ནད་མེད་ཚེ་རིང་ལོ་བརྒྱ
བརྟེན་འབྲེལ་ཞུ དྲ་གྲོགས་ཤ་ཁྲག་རུས་གསུམ་ལག
སྙིང་ཉེ་བའི་དྲ་གྲོགས་ཤ་ཁྲག་རུས་གསུམ་ལགས།
ང་རང་ཁྱེད་ཉིད་འཚམས་འདྲི་ཞུ་རྒྱུ་ཅུང་རྗེས་ལུས་ཐེབས་འདུག དགོངས་འགལ་མེད་པ་ཞུ།
ཐར་མ་མཚོ། ཤ་ཁྲག་རུས་གསུམ་གྱི་སྲས་མོར།
ས་མཐའི་ས་མཐའ་ཞིག་ཏུ་འཁྲུངས་སྐབས།
ངས་མི་ཡུལ་གྱི་སྐྱིད་སྡུག་གི་ལོ་ཟླའི་དཀར་ནག་གི་རི་མོ་དེ་དག་མཐོང་བྱུང་།
ངས་གདོང་དམར་བོད་པའི་རིགས་རྒྱུད་ས་མཐའ་ནས་ས་མཐར་གྱར་བའི་གཏམ་རྒྱུད་དེ་དག་དྲན་བྱུང་།
འདི་ལྟར་རང་དབང་མེད་པའི་མི་རིགས་ཤིག་གི་སྐྱོ་གར་འདིར་བསམ་སྐབས།
ཐར་མ་མཚོ། སྐྱེས་པ་སྔ་དྲགས་སོང་། ཁྱེད་ཀྱིས་རང་དབང་དང་ཞི་བདེའི་བདེ་སྐྱིད་ཀྱི་འཚོ་བ་ཞིག་ལོངས་སྤྱོད་འདོད་ན་ད་དུང་མི་ལོ་དུ་མ་ཞིག་རྣམ་ཤེས་དེ་འཇིག་རྟེན་འདིར་མ་ཡོང་ན་བསམ་བྱུང་།
ཐར་མ་མཚོ། འདི་ལྟར་འཇིག་རྟེན་གྱི་གྲུ་ཟུང་ཞིག་ན་ལས་དབང་ཞིག་གིས་གདོང་དམར་གྱི་རིགས་སུ་སྐྱེས་པ་དགའ་འོས་པ་ཞིག་རེད་ལ་སྐྱོ་དགོས་པ་ཞིག་ཀྱང་རེད།
གང་ལྟར། ངའི་མི་རིགས་འདིར་ལ་རྒྱ་དང་ལྷག་བསམ། སྙིང་སྟོབས་དང་ཤེས་འཇོན་གྱིས་ཕྱག་པའི་མི་སྲས་མོ་ངོ་མ་ཞིག་ཏུ་འགྱུར་བའི་རེ་སྒུག་བྱེད་ཀྱིན་ཡོད་ལ། དེ་ཡང་ཡོང་བའི་སྨོན་ལམ་ཡང་འདེབས་བཞིན་ཡོད།
ཤ་ཁྲག་རུས་གསུམ་ལགས། ཨ་ཨ་ད་ནི་འཇིག་རྟེན་གྱི་ཕ་རྒན་ངོ་མ་ཞིག་ཏུ་གྱུར་ཟིན་པ་རེད། ཁྱེད་ཀྱི་ཕྲག་ཏུ་བབས་པའི་ལས་འགན་ཡང་ལྕི་རུ་སོང་ཡོད་ཀྱང་། ཁྱེད་ཀྱི་སེམས་ཁོང་ན་བདེ་སྐྱིད་ཀྱི་མེ་ཏོག་ཅིག་ཀྱང་འཛུམ་མེར་བཞད་པ་ད་གཟོད་རྟོགས་བྱུང་། ཐར་མ་མཚོ། ངའི་རིགས་རྒྱུད་གཅིག་པའི་གདོང་དམར་བོད་པ། བོད་ལ་དགའ་ཞིང་། བོད་ལ་གཅེས། བོད་ནི་ཁྱེད་ཀྱི་ཡོད་ཚད་ཀྱི་ཡོད་ཚད་ཡིན་སྟབས། ང་ཚོས་ཁྱེད་ལ་སྤྲད་པའི་བོད་ནི་གཤིན་རྗེའི་མཆེ་བར་གནས་པའི་བོད་ཡུལ་ཞིག ཟུངས་ཁྲག་དང་མིག་ཆུའི་བཞུར་རྒྱུན་གྱིས་ཚོས་པའི་བོད་ཡུལ་ཞིག ངུ་འབོད་དང་སྨྲེ་ངག་གི་སྐད་ངན་གོ་བའི་བོད་ཡུལ་ཞིག མནར་གཅོད་དང་གདུག་རྩུབ་ཀྱིས་མནར་བའི་བོད་ཡུལ་ཞིག
དཔའ་བོ་དང་དཔའ་མོའི་བླ་སྲོག་རྒུད་བཞིན་པའི་བོད་ཡུལ་ཞིག
ཨ་ཁ་ཁ་ཐར་མ་མཚོ། ཁྱེད་ཀྱི་སྐྱེས་པ་སྔ་དྲགས་སོང་། ཨ་ཁ་ཁ་ཁྱེད་སྐྱེས་པ་ཕྱིས་དྲགས་སོང་།
ཨ་ཁ་ཁ་བོད་ཤ་ཁྲག་རུས་གསུམ།
ཡང་གཅིག་བཤད་ན།
ཐར་མ་མཚོ། ཁྱེད་ནི་ཚངས་སྲས་མའི་བྱིན་གྱིས་རླབས་པའི་མི་རིགས་འདིའི་སྲས་མོ་ཞིག་མིན་ནམ།
སྐྱེས་མ་ཐག་པའི་བུ་མོར་དབྱངས་ཅན་མའི་རྒྱུད་མངས་ལས་སྙན་པའི་སྙན་ངག་དག་འདི་ལྟར་བཞུར་ཡོང་སྐབས།
ཁྱེད་ནི་དབྱངས་ཅན་མའི་སྤྲུལ་པ་ཞིག་མིིན་ནམ་སྙམ།
ཡང་གཅིག་བཤད་ན། བྱིས་པ་སྐྱེས་མ་ཐག་པར་རང་གི་ཕ་རྒན་གྱིས་རང་ལ་སྙན་ངག་སྦྱར་བ་འཇིག་རྟེན་འདིར་ཆེས་ཐོག་མ་ཡིན་ཡང་སྲིད། བོད་ཤ་ཁྲག་རུས་གསུམ་ལགས། འདི་ལྟར་ཨེ་རེད།
ཁྱེད་ཕ་རྒན་དྲན་རྒྱུ་ཅན་ཞིག་རེད་ཨང་།།
བུ་མོ་ཐར་མ་མཚོ་ལ་སྙིང་ནས་བཀྲ་ཤིས་བདེ་ལེགས་ཞུ། ཕ་རྒན་ཤ་ཁྲག་ལའང་བཀྲ་ཤིས་བདེ་ལེགས་ཡོད། ཐར་མ་མཚོའི་ཨ་མ་ལའང་བཀྲ་ཤིས་བདེ་ལེགས་ཞུ།
ངའི་སྤུན་ཟླ་ཁྱེད་ཅག་ལ་ང་རང་གི་བུ་མོའི་འདྲ་དཔར་ཞིག་ཁྱེད་ཅག་ལ་སྤྱན་འབུལ་ཞུས་ཡོད།
སྤུན་ཟླ་ཁྱེད་ཅག་ཚང་མ་འདི་རུ་ཕེབས་པ་སྙིང་ཐག་པ་ནས་བཀའ་དྲིན་ཆེ་ཞུ། སྐར་མ། སྦྲ་ནག་པ་རོལ་དབྱངས། ཁ་བ་དཀར་པོ། གནམ་ལྕགས། འབྲོག་རུ་ཆོས་གྲགས། ཨརྱ། འཇམ་མགོན། ཆུ་ཐིགས་སྔོན་མོ། ལྕགས་རྒྱ་འགྲམ་ནག ལྷ་ཆབ་སྦྱིན་པ། དམིགས་བསལ་ཁྱེད་ཅག་གིས་བདག་གི་བུ་མོ་ཐར་མ་མཚོ་འཇིག་རྟེན་འདིར་ཕེབས་པར་རྟེན་འབྲེལ་ཞུས་པ་དེར་ལྷག་ཏུ་དགའ་ནི་ཡིན།
ངའི་བུ་མོ་འདི་ད་ལྟ་མི་ཡུལ་འདིར་སླེབས་ནས་ཉིན་གསུམ་ལས་འགོར་མེད་ཀྱང་། སེམས་བསམ་པའི་གཏིང་ནས་ཁྱེད་ཅག་གི་ཁ་གཡང་དང་རེ་འབོད་དེ་དག་གསན་ཡོད་པར་ང་རང་ཡིད་ཆེས་ཡོད།
སྙིང་ཉེ་བའི་གྲོགས་ཤ་ཁྲག་རུས་གསུམ་གྱི་སྲས་མོར་ཕུལ།
ཁྱོད་འདི་ལྟར་མི་ཡུལ་ལ་སླེབས་པའི་ཐོག་མ་ནི་ཨ་ཕས་བསྩལ་སོང
ཁྱོད་འདི་ལྟར་བྲག་སྲིན་གྱི་རྒྱུད་པར་འཁྲུངས་པའི་རྟེན་འབྲེལ་ཡང་ཨ་ཕས་གནང་སོང
ཐར་མ་འཚོ ཁྱོད་ཀྱི་མིང་ཡང་ཨ་ཕས་བཏགས་ཀྱང
ད་དུང་ཁྱོད་ལ་མེས་པོ་ཡོད གཤིས་རྒྱུད་འཇམ་པའི་མེས་པོ་ཡོད
སྙིང་སྟོབས་ལྡན་ལ་གཟི་བརྗིད་ཆེ་བའི་མེས་པོ་ཡོད
ཐར་མ་འཚོ ཁྱོད་རང་སྐྱེས་ས་དེ་ས་མཐའ་ཡིན
ཁྱོད་དང་ཁྱོད་ཀྱི་ཨ་ཕ་གཉིས་ས་མཐའ་ལ་ལྷུང་ཡོད
ས་མཐའ་ལ་ལྷུང་བའི་གངས་རིའི་སྲས་མོ
ཁྱོད་ཀྱི་ལྟེ་ཁྲག་ས་མཐའ་ནས་གཏོར་ཡང
ཁྱོད་ཀྱི་རྐང་རྗེས་གངས་གསེང་ལ་སྤར་དགོས སྙིང་ཉེ་བའི་བདག་གི་ཚ་མོ
ཕ་ཡུལ་ནས་ས་མཐར་འཁྱམས་ཤིང ས་མཐའ་ནས་ཀྱང་ས་མཐར་འཁྱམས་པའི
ཁྱོད་ཀྱི་ཨ་ཕ་ནི་འཇིག་རྟེན་གྱི་མཐོ་ས་ནས་སླེབས་པའི་སྲོག་ཆགས་ཤིག་སྟེ
ས་སྒང་ན་སྟོངས་ལ་ཉེ་བའི་བོད་པ་ཟེར་བ་དེ་ཡིན
ཁྱོད་ཀྱིས་མཐོང་བྱུང་ངམ གཡག་རྔ་བཞིན་འཛིང་བའི
ཁྱོད་ཀྱི་ཨ་ཕའི་སྐྲ་ལོའི་གསེང་ན
ནམ་ཡང་འགྱུར་བ་མེད་པའི་རང་གཤིས་ཤིག་གྲུབ་ཡོད
ཐར་མ་འཚོ ཨ་ཁུ་ང་ཡང་ས་མཐའ་ན་ཡོད
འཇམ་ནེམ་ནེམ་གྱི་ཁྱོད་ཀྱི་འཁུར་ཚོས་གཉིས་ལ
སྙིང་ཉེ་ཉེ་ངང་འོ་ཞིག་བྱེད་འདོད་ཡོད་ཀྱང
ལས་དབང་བཙན་པོ་འདིས་ཁྱོད་ཉིད་ང་དང་ཧ་ཅང་རིང་བའི་ས་ལ་གཡུགས
གང་ལྟར་ཁྱོད་ལ་མེས་པོ་ཡོད ཁྱོད་ཀྱི་མེས་པོ་ནི་གངས་ལ་གནས་ཡོད
ཁྱོད་ཀྱི་མེས་པོའི་བྲང་གཞུང་ན་དཔའ་ངར་དང་སྙིང་སྟོབས་ཀྱིས་བལྟམས་ཡོད
ཐར་མ་འཚོ བདག་གི་སྙིང་ཉེ་བའི་འཇིག་རྟེན་གྱི་མགྲོན་པོ་གསར་བ
མ་མཐོང་རྒྱང་རིང་གི་ཨ་ཁུའི་བརྩེ་བ་གསོན་པོ
༢༠༠༩ ༨ ༥ ལ་བྲིས།
དྲ་གྲོགས་ལགས།
ཐར་མ་མཚོའི་འདྲ་པར་མཐོང་སྐབས་བུ་མོའི་ཨ་ཕ་ཁྱེད་རང་ཡིན་པ་ཤེས་མ་སོང་། མ་བུ་གཉིས་བདེ་མོ་འཚམས་པོ་ཡིན་པ་འདི་ཅི་འདྲའི་སྤྲོ། ཁ་ཐག་ཉེ་ས་ཞིག་ན་ཡོད་ཚེ། དྲ་གྲོགས་བཟའ་མི་ལྷན་རྒྱས་ལ་འཚམས་འདྲིར་ཡོང་སྟེ། ཞོར་དུ་དྲ་ཐོག་གི་གནས་ཚུལ་རེ་གླེང་རྒྱུ་བྱུང་ན་ཅི་མ་རུང་། ཁྱེད་བཟའ་མི་ལྷན་རྒྱས་ལ་བཀྲ་ཤིས་བདེ་ལེགས་ཞུ། ལྕགས་རྒྱ་ཡིས།
ཐར་མ་མཚོ་ ཁྱེད་རང་མི་ཡུལ་འདིར་སླེབས་པར་རྟེན་འབྲེལ་ཞུ།
ཁྱེད་ཀྱི་ཨ་ཕས་ཁྱེད་ལ་སྙན་ངག་གི་མཆོད་ཆང་བཤམས་ནས་མི་ཡུལ་ནས་ཁྱེད་ཉིད་རེ་བསྒུགས་བྱས། ཐར་མ་མཚོ་མི་ཡུལ་ནས་མི་ཡུལ་དུ་འཁྱམས་པའི་ཁྱེད་ཀྱི་ཨ་ཕ་དང་ཕུ་ནུ་ཚོར་རྒྱལ་ཁབ་མེད། འོན་ཀྱང་ང་ཚོས་རེ་བཞག་ཡོད་ཚད་ཁྱོད་ཚོར་བཅོལ་ཡོད། ཐར་མ་མཚོ་མི་ཡུལ་ནས་འཚར་ལོངས་བྱུང་སྟེ་རང་སྐད་གཙང་མ་ཞིག་སྨྲ་བའི་གཞོན་སྐྱེས་རིག་བཟང་ཞིག་ཡོང་རྒྱུའི་སྨོན་འདུན་ཡོད། ཁྱེད་ཀྱི་ཨ་ཕས་མི་རིགས་ལ་བཅངས་པའི་བརྩེ་བ་བརྗོད་པའི་ཡུལ་ལས་འདས་པས་ཁྱེད་རང་ཡང་ཕ་བཟང་གི་བུ་མོ་ཡིན་པས་དེ་བཞིན་ཡོང་རྒྱུའི་རེ་བ་ཡོད། ཐར་མ་མཚོ་ཨ་ཕའི་མ་འོངས་པའི་སེམས་རྟེན་དང་ཚེ་མཇུག་གི་གློ་སྙིང་བཅོལ་ས། མི་རིགས་ཤིག་གི་ལས་དོན་དང་བདེ་སྡུག་བཅོལ་ས། ཐར་མ་མཚོ་ཁྱེད་ཀྱི་མི་ཚེ་དོན་དང་ལྡན་པར་སྨོན། ཨ་ཁུས་ཆེས་ཐག་རིང་གི་མི་ཡུལ་ཞིག་ནས་ཁྱེད་ཉིད་གཉོམ་ལག་རྒྱས་པ་བསྒུགས་ནས་བསྡད་ཡོད། ཐར་མ་མཚོ་མི་རིགས་ཤིག་གི་མ་འོངས་པའི་སོན་རྩ། ལ་རྒྱ་དང་སྤོབས་པའི་ངང་གཉོམ་ལག་རྒྱས་པར་སྨོན།
ངས་ཀྱང་ཁྱེད་ལ་ཤ་དང་རུས་པའི་གཏིང་ནས་བཀྲ་ཤིས་བདེ་ལེགས་ཞུས་པ་ཡིན། འབྱུངའགྱུར་གཅེས་ཕྲུག་མ་དེའང་ཕ་ལོ་ཁྱེད་དང་འདྲ་བར་རང་ཉིད་ཀྱི་རིག་གཞུང་ལ་དགའ་མཁན་ཞིག་དང་། འབྱུང་འགྱུར་ཁོ་མོའི་བྱ་བ་ཡོད་ཚད་ལྷུན་གྱིས་འགྲུབ་པ་དང་ཚེ་རིང་ནད་མེད་ཤོག ཁྱེད་ཀྱི་མཛའ་ནཱ་མོ་ལའང་དེ་བཞིན་འཚམས་ཞུ།
གཅེས་ཕྲུག་མའི་མཚན་དེ་ལ་གསང་བ་ཞིག་ཡོད་པ་འདྲ་བཤད་ཆོག་དམ།
ཐར་མ་མཚོ། ཨ་ཕའི་སྙིང་སྟོབས་ཀྱི་རུས་པ་དཀར་པོ་ལ།
ཨ་མའི་བྱམས་བརྩེ་ཡི་ཁྲག་རྒྱུན་བྱུགས་ཏེ་
བདེ་སྐྱིད་ཅིག་སྙེག་ནས་ཨག་སྐད་ཅིག་སྒྲོགས་པར་རྟེན་འབྲེལ་ཞུ།
ཐར་མ་མཚོ་མི་ཡུལ་ཕེབས་པར་དགའ་བསུ་དང་རྟེན་འབྲེལ་ཞུ།
ཐར་མ་མཚོ། ཁྱེད་ཀྱི་ཨ་ཕ་བོད་ཀྱི་ཤ་ཁྲག་རུས་གསུམ།
ཁྱེད་རང་བོད་ཀྱི་གློ་སྙིང་མཆིན་གསུམ་ཡིན་དགོས།
ང་ཚོས་ཁྱེད་ལ་རེ་བ་བཅོལ་ཡོད།
ང་ཚོས་ཁྱེད་ལ་སྨོན་འདུན་ཞུས་ཡོད།
སྙིང་ཉེ་བའི་གྲོགས་པོ་ཤ་ཁྲག་ལགས། ཁྱོད་རང་འཇིག་རྟེན་གྱི་ཨ་ཕ་རུ་ཆགས་པར་རྟེན་འབྲེལ་གྲངས་མེད་ཞུ། ཁ་སང་པར་ཡང་མཐོང་སོང༌། དངོས་གནས་དགའ་ཡོད། རྒྱང་རིང་གི་གྲོགས་པོ་ཁྱོད་ལ་སྙིང་ཉེ་བའི་བུ་མོ་ཞིག་སྐྱེས་པ་ལ་དགའ་ཡོད། ཡིན་ནའང་མིང་དེའི་ནང་དོན་རྟོགས་མ་སོང༌། རྗེས་མ་ཞིག་ལ་ཆེད་དུ་རང་གི་བུ་མོའི་མིང་ལ་འགྲེལ་བཤད་ཅིག་རྒྱག་རྒྱུ་ངའི་རེ་བ་ཡིན།
ཐར་མ་འཚོ།
གངས་ཅན་པའི་རིགས་རྒྱུད་ཕྱི་མ།
མ་འོངས་པའི་བོད་ལྗོངས་ཤིག་གི་བདག་མོ།
གསེར་མདོག་གི་འཇིག་རྟེན་ཞིག་གི་ལྷ་མོ།
ཁྱོད་ཀྱི་ལུས་ལ་ན་ཚ་མེད་པར་གཉོམ་ལག་རྒྱས་ཤིང་།
ཁྱོད་ཀྱི་སེམས་ལ་སྐྱོ་གདུང་མེད་པར་རྣམ་རིག་རྒྱས་པའི་སྨོན་ལམ་འདེབས།
དེ་བཞིན།
ཁྱོད་ཀྱི་ཕ་མ་གཉིས་ཀ་ཡང་།
ཁྱོད་ཡོད་པས་འཇིག་རྟེན་ལ་བདེ་སྐྱིད་ལྡན་ལ།
ཁྱོད་ཡོད་པས་བརྩེ་དུང་ལ་མདུད་རྒྱ་དམ་ཞིང་།
ཁྱོད་སྐྱེས་པས་གཞི་ཁྱིམ་ལ་དྲོད་ཁོལ་འབར་བའི་སྨོན་ལམ་འདེབས།
དྲ་གྲོགས་ཤ་ཁྲག་རུས་གསུམ་ལ་ཕུལ།
ཐར་མ་མཚོ
བོད་ཤ་ཁྲག་རུས་གསུམ་གྱི་ལྷད་མེད་པའི་ཁྲག་རྒྱུན་དྭངས་མ
ཨ་མ་གངས་དཀར་ལྷ་སྒྲོན་གྱི་སྙིང་གི་གཅེས་ཕྲུག
གྲིབ་ནག་དང་མཉམ་དུ་ཁེར་རྐྱང་གིས་འཚོ་བའི་འཁྱམས་པོ་སྦྲ་ནག་པ་རོལ་དབྱངས་གིས་ཁྱོད་འཇིག་རྟེན་འདིར་ཕེབས་པར་རྟེན་འབྲེལ་ཞུ