བོད་ཡིག་གི་མེ་རོ་ག་ནས་གསོ་གིན་འདུག འཇམ་དབྱངས་བསྟན་འཛིན་ཤཱསྟྲི།

བོད་ཡིག་གི་བསྟན་པའི་མེ་རོ་ག་ནས་གསོ་བཞིན་འདུག

                     
                            འཇམ་དབྱངས་བསྟན་འཛིན་ཤཱསྟྲི། ཨ་རི་སན་ཀྲ་ཕི།

སྔ་ལོ་ཕྱི་ཟླ་ ༡༢ ཚེས་ ༧ ཉིན་ངས་དྷ་ཤོད་ཉེ་འགྲམ་དུ་ཆགས་པའི་མེས་དབོན་སློབ་གྲྭ་ཞེས་པ་ལྟ་འདོད་ཀྱིས་གངས་སྐྱིད་ནས་རྐང་ཐང་དུ་ཕྱིན་པ་ཡིན། ལམ་དུ་སློབ་གྲྭ་འདི་ལྟ་བུ་ཞིག་ཡུལ་ལུང་མེད་པའི་བོད་མི་ན་གཞོན་ཚོའི་མ་འོངས་པའི་མི་ཚེའི་མདུན་ལམ་ཇི་ལྟར་ཆགས་ཡོང་ངམ་བསམ་པའི་བློ་འཚབ་ཡང་ངང་གིས་སྐྱེས། དེ་ནས་རང་ཉིད་ཁ་སྐོམ་གྱི་གདུང་བ་སེལ་བའི་ཆེད་ལམ་ཁའི་ཟུར་དུ་བོད་པའི་ཟ་ཁང་ཞིག་འདུག་པས་དེར་འཛུལ་ཏེ་གསོལ་ཇ་ཞིག་གནང་རོགས་ཞེས་ཞུས་པ་ཡིན། ཇ་མངགས་རྗེས་ཟ་ཁང་དེའི་ནང་བུ་མོ་ཕལ་ཆེར་ལོ་བདུན་བརྒྱད་ལ་སོན་པ་ཞིག་གི་ལག་ཏུ་གཏོང་ཡིག་ཞིག་བྲིས་འདུག་པ་དེ་ང་ལ་བསྟན་རོགས་ཞེས་བཤད་པས་བུ་མོ་དེས་ཁོང་མོའི་བོད་ཡིག་གི་འཕྲིན་ཡིག་དེ་ང་ལ་བསྟན་བྱུང༌། ངས་བུ་མོ་དེར། ཁྱེད་རང་སློབ་གྲྭ་གང་ནས་ཡིན་ནམ། ཞེས་དྲིས་པར། བུ་མོ་དེས། ང་དཔེ་སྟོན་སློབ་གྲྭ་ནས་ཡིན། ཞེས་ལབ་བྱུང༌།    ངས་གཏོང་ཡིག་དེ་མགོ་ནས་མཇུག་བར་ཐེངས་གཅིག་བཀླགས་པས་ཁོང་གི་ལོ་ཚོད་ལ་དཔག་པའི་བོད་ཡིག་གི་ཡིག་གཟུགས་ལེགས་པ་དང་གཅིག གཉིས་ནས་ཚིག་གི་གཅོད་མཚམས་ལེགས་པས་མ་ཚད་གོ་དོན་གསལ་ལ་སུས་ཀྱང་ཀློག་ཐུབ་པ་ཞིག་བྲིས་འདུག དེ་ལྟའི་གཏོང་ཡིག་དེ་མཐོང་མ་ཐག་ངའི་ཇ་འཐུང་རྒྱུ་དེ་ཡང་བརྗེད་དེ་བུ་མོ་དེའི་གདོང་ལ་བལྟས་ནས་ཐོན་མི་སམ་བྷོ་ཌ་ང་དང་མཉམ་དུ་འདིར་ཕེབས་ཡོད་ན་ཁོང་དགྱེས་ཚོར་གྱིས་ཐུགས་ཡོངས་སུ་ཚིམས་ཡོད་ངེས་རེད་བསམ་པ་དང༌། ཆབས་ཅིག་ངོས་ནས་དེ་སྔ་བོད་ཡིག་གི་བསྟན་པ་ཉམས་སོང་བསམ་པ་དེ་ཡང་ད་བསྟན་པའི་མེ་རོ་མེས་དབོན་སློབ་གྲྭ་ནས་གསོ་བཞིན་འདུག་བསམ་བྱུང༌། མ་ཟད་བུ་མོ་དེའི་སྐད་ཆ་ཤོད་སྟངས་དང་བོད་ཡིག་བྲིས་སྟངས་དེས། རང་གི་རིག་གཞུང་ལ་སྣང་ཆུང་དང་མཐོང་ཆུང་གཏོང་བཞིན་པའི་བོད་ཕྲུག་གཞན་ཚོར་དེ་ལྟར་བྱ་མི་འོས་པའི་དཔེ་སྟོན་ཞིག་ངང་གིས་སྟོན། དཔེ་སྟོན་སློབ་གྲྭའི་མིང་དོན་མཚུངས་འདུག་བསམ་པའི་དགའ་ཚོར་ངང་གིས་སྐྱེས། ཇ་གྲང་མོར་གྱུར་འདུག་པ་ཧུབ་གཅིག་གིས་བཏུང་སྟེ་བུ་མོ་དེར། མེས་དབོན་སློབ་གྲྭ་གང་དུ་ཡོད་དམ། ཞེས་དྲིས་པས་ཁོང་མོས་ང་ལ། ཇོ་ལགས། འདི་ནས་མར་ཕེབས་ཏེ་ལག་པ་གཡོན་གྱི་ཕྱོགས་སུ་ཕེབས་དགོས། དེ་ནས་ཁ་ཐུག་ཕེབས་ན་བོད་བཟོའི་དབྱིབས་ཅན་གྱི་རྒྱལ་སྒོ་ཞིག་གི་སྟེང་དུ་མེས་དབོན་སློབ་གྲྭ་ཞེས་བྲིས་ཡོད་པ་གཟིགས་ན་ནང་ལོག་ལ་ཕེབས་དགོས། ཞེས་ལམ་སྟོན་བྱས་བྱུང༌། བུ་མོ་དེའི་སྐད་ཆའི་ནང་དབྱིན་ཇི་དང་ཧིན་སྐད་གང་གི་ཡང་ལྷད་མེད་པར་བོད་སྐད་གཙང་མ་གཙང་རྐྱང་ཞིག་བརྒྱབས་པ་དེས། དེང་སང་ང་ཚོའི་སྤྱི་ཚོགས་ནང་ར་མ་ལུག་གི་བོད་སྐད་རྒྱག་མཁན་དེ་ཚོར་སྙིང་རྗེ་སྐྱེ་བ་དང་ཆབས་ཅིག་ཁོང་ཁྲོའང་ངང་གིས་སྐྱེས་བྱུང༌། སློབ་གྲྭའི་རྒྱལ་སྒོའི་ནང་དུ་འཛུལ་རྗེས་རྒྱལ་སྒོའི་ནང་དེར་རང་གི་ཕ་སྐད་བརྗེད་ན་ངོ་ཡང་ཚ་ཞེས་པའི་ཚིག་བཅད་གཅིག་འདུག་པས་ང་རང་ཕ་སྐད་མ་བརྗེད་པའི་ཐོག་ནས་བོད་ཡིག་བྲི་ཀློག་ཤེས་པ་དེའང་དགའ་སྤོབས་ངང་གིས་སྐྱེས་བྱུང༌། མ་ཟད་སློབ་གྲྭའི་རྩིག་གྱང་སྟེང་དེང་སང་རིགས་གཅིག་རྐང་འཛིན་གྱི་ཚ་རླབས་འཕྱུར་བཞིན་པ་ཚོར་ཡང༌།
༡ ཚེ་འདི་ཡུན་ཐུང་ཤེས་བྱའི་རྣམ་པ་མང༌། ཚེ་ཡི་ཚད་ཀྱང་ཇི་ཙམ་མི་ཤེས་པས།
 ངང་པས་ཆུ་ལས་འོ་མ་ལེན་པ་ལྟར། རང་གི་འདོད་པ་དང་པོ་བླང་བར་བྱ།
ཞེས་པའི་ཚིགས་བཅད་ཞིག་འདུག  དེ་ནས་རང་གི་ཕ་མ་དང་རྒན་རབས་ལ་གུས་ཞབས་དང༌། ཤེས་བྱའི་གནས་ལ་བརྩོན་དགོས་པ་དང་སོ་སོའི་རིགས་རྒྱུད་གཙང་མ་སྤེལ་དགོས་པ་སོགས་ཀྱི་ཆེད་དུ།
༢ ཕ་མ་བཤེས་ལ་ཉི་མ་བཞིན་དུ་བལྟ། ཤེས་བྱའི་གནས་ལ་བུང་བ་རྩི་བཅུད་བཞིན། བླང་དོར་གནས་ལ་ངང་པའི་མཆུ་རྩལ་ལྟར། མདོར་ན་གངས་རིའི་བུ་རྒྱུད་དྭངས་མ་མཛོད།
ཅེས་པའི་ཚིགས་བཅད་གཅིག་བཀོད་འདུག དེའི་འོག་ཏུ།
རང་གི་ཀུན་སྤྱོད་གལ་ཆེ་ལ་སོ་སོའི་མི་རིགས་ཀྱི་སྐད་ཡིག་ལ་དོ་སྣང་གནང་དགོས་པའི་ཆེད་དུ།
༣ ཀུན་དང་མཐུན་པ་རྩ་བ་ཡིན་མོད་ཀྱང༌། མཐོང་ཚད་ལད་མོ་བྱས་ན་ཀླད་མེད་ཡིན། སྐད་རིགས་སྣ་ཚོགས་ཤེས་ན་བཟང་མོད་ཀྱང༌། རང་གི་ཕ་སྐད་བརྗེད་ན་ངོ་ཚ་ཡིན།
ཞེས་པ་མདོར་ན། ཚིགས་བཅད་བཞི་ཡི་ནང་བོད་མི་ཚད་ལྡན་ཞིག་ཆགས་འདོད་ན་དེའི་ས་ལམ་གྱི་རྣམ་བཞག་མདོར་བསྡུས་ཞིག་གོ་བདེའི་ངང་ཤོ་ལོ་ཀ་གསུམ་གྱི་ནང་བཀོད་འདུག ངས་ཚིག་བཅད་དེ་དག་ལམ་སེང་རང་ཉིད་ཀྱི་ཉིན་དེབ་སྟེང་བཀོད་དེ་དུས་དུས་སུ་བློ་སྦྱོང་བཞིན་གཞོན་སྐྱེས་ཚོར་སློབ་འཁྲིད་བྱེད་ཀྱིན་ཡོད། གལ་སྲིད་ཁྱེད་རང་བོད་མི་ཚད་ལྡན་ཞིག་ཆགས་འདོད་ན་འདི་ལ་བསམ་གཞིགས་ཞིག་གནང་བའི་ཆེད་དུ་བཤུ་བར་མཛོད།