ཟློས་གར་ཁང་འདི་རིག་གཞུང་གི་བསྟི་གནས་ཤིག་ཏུ་བསྒྱུར་འདོད་ཡོད།

བོད་གཞུང་ཟློས་གར་ཚོགས་པ་བཙུགས་ནས་ལོ་ ༥༠ འཁོར་བའི་དུས་དང་བསྟུན་འདི་གའི་གསར་ཁང་གིས་བོད་གཞུང་ཟློས་གར་ཚོགས་པའི་འགན་འཛིན་ཕ་ཟུར་དབང་ཕྱུགས་ལགས་སུ་བོད་གཞུང་ཟློས་གར་ཁང་གི་ལི་ ༥༠ གྲུབ་འབྲས་དང་། འཆར་སྣང་། མདུན་སྐྱོད་ཀྱི་ལས་གཞི་གསར་པ་ཅི་ཡོད་སོགས་ཀྱི་ཐད་བཅར་འདྲི་བྱས་པ་ཡིན་ལ། གཤམ་དུ་ཁོང་གི་དྲི་ལན་དག་ཞིབ་པར་བཀོད་ཡོད།

དྲི་བ། བོད་གཞུང་ཟློས་གར་ཁང་འདི་བོད་མིའི་སྒྱུ་རྩལ་རིག་གཞུང་རྒྱུད་འཛིན་དང་སོར་ཆུད་ལྟ་བུ་ཞིག་ལ་དམིགས་ནས་དབུ་བཙུགས་པ་རེད། མི་ལོ་ ༥༠ རྗེས་ལ་དེའི་གྲུབ་འབྲས་དང་ཡང་ན་ཉམས་མྱོང་གང་འདྲ་གསུང་རྒྱུ་ཡོད་དམ།
ལན། འདས་པའི་མི་ལོ་ ༥༠ རིང་ང་ཚོ་ཟློས་གར་ཚོགས་པའི་ངོས་ནས་ལྷ་མོའི་འཁྲབ་གཞུང་གསུམ་གསར་རྩོམ་གནང་སྟེ་གྲུབ་འབྲས་གང་འཚམ་ཐོན་ཡོད་པ་རེད། ཡིན་ནའང། དེ་དང་དེའི་རིགས་ཀྱི་བྱེད་སྒོ་མང་པོ་ཞིག་ཡོད་ཀྱང་ང་རང་འདིར་སླེབས་ནས་ལོ་གཉིས་མ་གཏོགས་ཕྱིན་མེད་སྟབས། ལས་གཞི་གང་མང་ཞིག་ད་ལྟ་ནས་མགོ་རྩོམ་རྒྱུ་ལྷག་བསྡད་སྟབས། ང་ཚོས་དབྱར་སྐྱིད་ཟེར་བ་འདི་འདྲའི་ལས་གཞི་ཞིག་མགོ་འཛུགས་བྱས་ཏེ། ལོ་ན་གཞོན་པའི་ཚོགས་མི་དེ་དག་སྤྱི་ཚོགས་ཁྲོད་དངོས་སུ་འཛུལ་ཞུགས་གྱིས་རྒན་པ་རྣམས་ལ་སྐད་ཆ་དྲིས་རྗེས་གཞས་དེ་དག་བོད་ཀྱི་ས་ཁུལ་དང་ཡུལ་ལུང་གང་གི་གཞས་ཡིན་པ། ཁུངས་དང་བྱེད་སྒོ་གང་འདྲ་ཡིན་མིན་སོགས་གསལ་བོར་དྲིས་རྗེས་ཞིབ་འཇུག་བྱས་པ་དང་དེ་ནས་ཞོ་སྟོན་གྱི་དུས་སྐབས་དང་བསྟུན་ཏེ་འགྲན་བསྡུར་བྱེད་ཀྱིན་ཡོད་པ་རེད། དེ་དག་ང་ཚོའི་བོད་མི་རིགས་ཀྱི་རིག་གཞུང་སླར་གསོའི་ལས་གཞི་ཞིག་ལ་ངོས་འཛིན་བྱེད་ཀྱིན་ཡོད་ལ། ད་ལྟའི་བར་ཟློས་གར་རང་ནས་སྐྱེད་སྲིང་བྱས་པའི་མཐར་ཕྱིན་པའི་སློ་མ་ ༤༨༣ སྤྱི་ཚོགས་ནང་ཕྱིན་ཡོད་པ་དང་། དགེ་རྒན་ ༡༡༠ ལྷག་སྐྱེད་སྲིང་བྱས་པ་ཡོད་རེད།  བོད་གཞུང་གི་སློབ་གྲྭ་ཁག་ ༨༡ ནང་ཡོད་པའི་ཟློས་གར་དགེ་རྒན་མང་ཆེ་བ་ང་ཚོ་བོད་གཞུང་ཟློས་གར་ནས་ཐོན་པའི་སློབ་མ་རེད། དེ་དག་ཀྱང་ང་ཚོའི་འདས་པའི་མི་ལོ་དེ་དག་གི་གྲུབ་འབྲས་ཤིག་ཏུ་ངོས་འཛིན་བྱེད་ཀྱིན་ཡོད། དེ་ལས་ཀྱང་གལ་ཆེ་བ་ཞིག་ནི། འདས་པའི་དུས་ནས་ཟློས་གར་ཚོགས་པའི་གཞས་སྣ་སྟོང་ཕྲག་མང་པོ་འཁྲབ་སྟོན་བྱས་ཡོད་པ་དང་མི་སྣ་མང་པོ་ཟློས་གར་ཚོགས་པ་དང་ཁ་བྲལ་ཏེ་འགྲོ་བཞིན་ཡོད་སྟབས། མ་འོངས་པའི་ལོ་ངོ་བརྒྱ་ཕྲག་ཆས་ཀྱང་བོད་གཞུང་ཟློས་གར་ཚོགས་པའི་ངོས་ནས་རིག་གཞུང་སྒྱུ་རྩལ་རྒྱུན་འཛིན་བྱ་ཆེད་ཉར་ཚགས་ཀྱི་ལས་གཞི་ཞིག་ད་ལོ་ནས་མགོ་འཛུགས་བྱས་ཡོད། དེ་དག་མང་ཆེ་བ་ཟློས་གར་ཚོགས་པའི་འགན་འཛིན་ཟུར་པ་རྣམ་པས་རྩོམ་གནང་མཛད་པའི་འཁྲབ་གཞུང་དང་གཞས་ཚིག་རྙིང་པའི་རིགས་དང་། ཁྲི་བྱང་རིན་པོ་ཆེ་དང་བསྡུས་འཇོམས་རིན་པོ་ཆེ་སོགས་ཀྱིས་རྩོམ་གནང་མཛད་པའི་དོན་ཟབ་པའི་གཞས་ཚིག་དེ་དག་སྒྲར་ཕབ་རྗེས་ཉར་ཚགས་བྱེད་ཀྱིན་ཡོད་པ་རེད་ལ། རྣམ་ཐར་གྱི་རིགས་དེ་དག་ཀྱང་གལ་ཆེན་དུ་བཟུང་སྟེ་དར་སྤེལ་དང་རྒྱུན་འཛིན་བྱེད་བཞིན་ཡོད་པ་རེད། ད་ལོ་ཡིན་ནའང། གཞིས་ལུས་བོད་མི་ཚོརགདུང་སེམས་མཉམ་སྐྱེད་ཆེད་འོད་སྡེར་གསར་བཟོ་དང་། བོད་གཞུང་མང་བཙན་བྱོལ་དུ་འབྱོར་བའི་མི་ལོ་ལྔ་བཅུ་དང་སྟབས་བསྟུན་གྱིས་ང་ཚོས་རྒྱ་གར་གཞུང་མང་ལ་ཐུགས་རྗེ་ལེགས་གསོལ་ཞུ་བའི་དབྱངས་དང་ཚིག་འོད་སྡེར་གྱི་ལམ་ནས་གཟིགས་རྒྱུ་ཡོད་པ་དེ་འདྲའི་ལས་དོན་སྒྲུབ་ཡོད། འཛིན་སྐྱོང་གི་ཕྱོགས་ནས་ཀྱང་ད་ལྟའི་བར་མ་འོངས་ཟློས་གར་སྲ་བརྟན་ལ་དམིགས་ཏེ་དགོས་དངུལ་ཐབས་ཤེས་ཀྱིས་འཛུགས་སྐྲུན་དང་སྔར་མེད་ཀྱི་མཐུན་རྐྱེན་ཇེ་ལེགས་སུ་གཏོང་བ་སོགས་ཀྱི་ཐད་འབད་བརྩོན་བྱེད་ཀྱིན་ཡོད་པ་མ་ཟད། འགན་འཛིན་ལྷན་ཚོགས་ཀྱི་སྔོན་རྩིས་གཏན་འབེབས་བཞིན་འགྲོ་གྲོན་གཏོང་བ་དང་མི་སྣ་བསྡུ་རུབ་སོགས་འགན་འཛིན་ལྷན་ཚོགས་ཀྱི་སྒྲིག་གཞི་གཞིར་བཟུང་ཐོག་འགྲོ་གིན་ཡོད།

དྲི་བ། བོད་ཀྱི་དེང་རབས་གླུ་གཞས་དང་བྲོ་གཞས་གསར་གཏོད། སྒྱུ་རྩལ་གྱི་འཁྲབ་གཞུང་གསར་གཏོད་བྱེད་པའི་ཕྱོགས་ནས་བོད་གཞུང་ཟློས་གར་ཚོགས་པའི་ངོས་ནས་སྤྱི་ཚོགས་ཁྲོད་སྣེ་འཁྲིད་ཀྱི་འགན་འཁྱེར་ཐུབ་གིན་མེད་པའི་བསམ་ཚུལ་འདུག  འདིའི་ཕྱོགས་ལ་དགོངས་ཚུལ་གང་ཡོད་དམ།
ལན། ང་ཚོ་བོད་གཞུང་ཟློས་གར་ཚོགས་པ་འདི་སྲོལ་རྒྱུན་ཉམས་གསོ་བྱེད་པའི་སྡེ་ཚན་ཞིག་ཡིན་སྟབས། དེང་དུས་ཀྱི་གཞས་སྣ་དེ་ཟློས་གར་དང་མཉམ་དུ་འདྲེས་བསྡད་པ་ཡིན་ན་བསམ་འཆར་འདོན་མཁན་རིགས་ཀྱིས་མིང་ཆད་བཟོ་སྲིད་པ་ཞིག་དང་། བོད་པའི་རིག་གཞུང་ལ་དགྲ་བྱེད་ཀྱིན་འདུག་ཅེས་ཀྱང་ལབ་སྲིད་པ་ཞིག་རེད། ཡིན་ནའང། ང་ཚོའི་ངོས་ནས་དེང་དུས་དང་མཐུན་པའི་གཞས་སྣ་འཁྲབ་སྟོན་གྱི་དགོས་མཁོ་སྐོང་ཆེད་ཨ་ཀ་མ་ཅེས་པའི་འཁྲབ་སྟོན་སྡེ་ཚན་ཞིག་ཟུར་དུ་བཙུགས་ཡོད་ལ། དེ་དམིགས་བསལ་གྱི་རིག་གཞུང་སྡེ་ཚན་ཞིག་ཆགས་ཡོད་པ་རེད། གཞན་ལ་ལད་མོ་བྱས་ན་ཡག་པོ་ཡོད་པ་མ་རེད། དེ་ང་ཚོ་རིག་གཞུང་སྲུང་སྐྱོབ་ཀྱི་སྡེ་ཚན་ཞིག་ཆགས་ཀྱི་ཡོད་པ་མ་རེད། ང་ཚོས་གསར་གཏོད་ཅེས་བཤད་མི་ཐུབ་ཀྱང་ང་ཚོའི་ལྷ་མོའི་གཞུང་དེ་བོད་ནང་གི་ལྷ་མོ་འཁྲབ་སྟོན་དང་མི་འདྲ་བར་ཕལ་སྐད་ནང་བསྒྱུར་ཡོད་པ་དང་། དངོས་སུ་དོ་སྣང་བྱས་པ་ཡིན་ན་ང་ཚོ་སྔོན་མ་ལས་ཡར་རྒྱས་ཕྱིན་ཡོད་པ་ཁྱེད་རང་ཚོས་མཐོང་གི་རེད། དེང་རབས་ཀྱི་ཕྱོགས་ལ་སྣེ་འཁྲིད་པའི་འདོད་པ་ང་ཚོ་ཟློས་གར་ཚོགས་པར་མེད། དེང་རབས་ཀྱི་གཞས་སྣ་འཁྲབ་སྟོན་བྱེད་མཁན་ང་ཚོ་མ་ཡིན་པའི་ཚོགས་པ་འདྲ་མིན་མང་པོ་ཡོད་པ་རེད། ང་ཚོས་གཞས་ཀྱི་ཚིག་ཡན་ནས་ཟློས་གར་རང་ནས་བརྩམས་པ་དང་བསམ་བློ་བཏང་སྟེ་འཁྲབ་སྟོན་བྱེད་ཀྱིན་ཡོད་པ་རེད། མི་མང་ལ་བསམ་ཚུལ་མི་འདྲ་བ་མང་པོ་ཡོད་པ་རེེད། ཡིན་ནའང། དེང་དུས་དང་མཐུན་པའི་གཞས་དེ་དུས་ཚོད་ཐུང་ངུའི་ནང་ཡལ་འགྲོ་བ་དེ་འདྲ་ཞིག་རེད། ང་ཚོས་བོད་མི་རིགས་ཀྱི་སྲོལ་རྒྱུན་གྱི་གཞས་སྣ་འཁྲབ་སྟོན་དེ་དུས་ཡུན་རིང་བོ་ཞིག་ལ་གནས་ཐུབ་པའི་བསམ་བློ་གཏོང་གི་ཡོད་སྟབས། བོད་རང་གི་གཞས་དང་ཞབས་བྲོའི་ནང་ཕྱིའི་རྒྱལ་ཁབ་ཁག་གི་རིག་གཞུང་འདྲ་མིན་བསྲེས་སླད་བྱས་ཚེ་ང་ཚོའི་རིག་གཞུང་དེ་ཏག་ཏག་ཅིག་སྡོད་ཀྱིན་ཡོད་པ་མ་རེད།

དྲི་བ། ལོ་ཤས་གོང་ནས་སྤྱི་ཚོགས་ཐོག་གི་མི་སྒེར་བ་དང་ཚོགས་པ་དེ་འདྲས་བཙན་བྱོལ་ནང་གི་གཞས་པ་དང་གཞས་མ་དག་བསྡུས་ནས་ཁོང་ཚོར་གར་སྟེགས་རེ་བསྐྲུན་གྱི་ཡོད་པ་རེད། བོད་གཞུང་ཟློས་གར་ཁང་གི་ངོས་ནས་ད་བར་དུ་དེ་འདྲི་བྱ་འགུལ་ཅི་ཡང་སྤེལ་མེད་པ་འདི་ལ་གསལ་བཤད་འདྲ་ཡོད་དམ།
ལན། ང་ཚོ་ཟློས་གར་ཚོགས་པ་དེ་ཚོགས་པ་ཞིག་ཡིན་པ་དང་རང་ཁ་རང་གསོ་བྱེད་ཐུབ་ཀྱིན་ཡོད་པ་རེད། ཡིན་ནའང། མི་ཚང་མར་གོ་སྐབས་སྐྲུན་པའི་ཆེད་ང་ཚོས་དཔལ་འབྱོར་འགྲོ་སོང་གཏོང་ཐུབ་གི་མ་རེད། ཡིན་ནའང། ང་ཚོས་ད་ལྟ་བོད་གཞུང་ཟློས་གར་གཙོས་པའི་གླུ་བ་གླུ་མ་དེ་དག་འདི་ནས་བལ་ཡུལ་དང་ལྡི་ལིར་སྒྲ་ཕབ་དང་འོད་སྡེར་གསར་བཟོའི་ཆེད་འགྲོ་བར་དམིགས་ཏེ་ཟློས་གར་ཚོགས་པ་རང་དུ་སྒྲ་ཕབ་དང་འོད་སྡེར་གསར་བཟོའི་ལས་ཀ་ཞིག་མགོ་རྩོམ་གྱིན་ཡོད། དེ་འདྲའི་གོ་སྐབས་ཤིག་སྐྲུན་པ་ལས་ང་ཚོས་དངུལ་གྱི་འགྲོ་གྲོན་བཏང་སྟེ་སྐྱེད་སྲིང་དང་སྡིངས་ཆ་སྐྲུན་རྒྱུ་ཁག་པོ་རེད།  ངས་ནམ་རྒྱུན་འདི་ལྟར་དྲན་གྱིན་ཡོད། ང་ཚོ་བོད་པའི་གཞོན་སྐྱེས་ཁྲོད་སྐད་ངག་ཡག་པོ་ཡོད་པ་དེའི་རིགས་ཀྱིས་རྒྱ་གར་རྒྱལ་ཡོངས་ཀྱི་གཞས་སྣ་འགྲན་བསྡུར་བྱས་པ་ལྟར། ང་ཚོ་བོད་གཞུང་ཟློས་གར་གྱི་ངོས་ནས་གཞོན་སྐྱེས་དེ་དག་ལ་དེ་འདྲའི་གོ་སྐབས་ཤིག་བསྐྲུན་བསམ་པའི་བསམ་བློ་འཁོར་བསྡད་ཡོད། ཡིན་ཡང། ཟློས་གར་ཚོགས་པ་རང་ནས་ ༢༠༡༠ བར་གྱི་ལས་འཆར་ཚང་མ་ད་ལྟ་ནས་གཏན་འཁེལ་ཡོད་སྟབས། ད་ལྟ་ཡོད་པའི་དགེ་རྒན་ ༥ གཙོ་བྱས་པའི་ལས་བྱེད་ཡོངས་ཕྱི་རྒྱལ་ཁག་དང་ནང་ཁུལ་གྱི་འཁྲབ་སྟོན་སོགས་ཀྱི་ལས་དོན་ཁྲོད་ཁོམ་ལོང་ཡོད་པ་མ་རེད། གལ་སྲིད། དེ་འདྲའི་གར་སྟེགས་ཤིག་སྐྲུན་ཏེ་འགྲན་བསྡུར་བྱས་པ་ཡིན་ན་ཟླ་བ་མང་པོའི་རིང་ནས་ལས་འཆར་དང་གསལ་བསྒྲགས། འགྲན་བསྡུར་སོགས་བྱ་དགོས་སྟབས་ང་ཚོ་རང་གི་ལས་ཀ་མང་པོ་ཞིག་འཐུས་ཤོར་སུ་འགྲོ་བཞིན་ཡོད་སྟབས། སེམས་ལ་དྲན་ཡང་ང་ཚོར་དུས་ཚོད་དང་མི་ཤུགས་དང་རྒྱུ་ཤུགས་ཀྱིས་འདང་གི་ཡོད་པ་མ་རེད། ད་ལྟའི་ཆར་ཡང་ང་ཚོས་དགེ་རྒན་ཚོར་གུང་གསེང་གི་དུས་ཚོད་མ་སྤྲད་པར་ཚོགས་པ་རང་གི་ལོ་གཅིག་གི་ལས་འཆར་སྟེང་བྲེལ་བཞིན་ཡོད་པ་རེད།

དྲི་བ། གླུ་གཞས་ནི་སྤྱི་ཚོགས་ཀྱི་སྦྱར་རྩི་ཡིན་ལབ་གིན་ཡོད་པ་རེད། ད་ལྟའི་བོད་ཀྱི་སྤྱི་ཚོགས་ལ་འདི་འདྲའི་སྦྱར་རྩི་ནི་ལྷག་པར་དུ་གལ་ཆེན་མ་རེད་དམ།
ལན། གླུ་གཞས་དེ་ཧ་ཅང་གལ་ཆེན་པོ་རེད། སྤྱི་ཚོགས་ནང་མེད་དུ་མི་རུང་བ་ཞིག་ཆགས་ཡོད་པ་རེད། དཔེར་ན། སྔོན་མ་སུད་སིར་གནས་སྡོད་བོད་རིགས་ཚོའི་ས་དེར་ཟློས་གར་འཁྲབ་སྟོན་བྱེད་མཁན་དེ་འདྲ་ཡོད་པ་མ་རེད། ཕྱིས་སུ་ང་ཚོས་ས་དེར་འཁྲབ་སྟོན་ཐེངས་མང་བྱས་མཐར་དེར་ཡོད་བོད་པའི་གཞོན་སྐྱེས་གང་མང་ཞིག་ལ་བོད་རིགས་རང་གི་ལྷ་མོ་འཁྲབ་སྟོན་སོགས་ཀྱི་བག་ཆགས་ཟབ་མོ་བཞག་ཡོད་པ་དང་། མི་རིགས་རང་གི་སྲོལ་རྒྱུན་གྱི་གླུ་གཞས་གང་མང་ཞིག་ངོ་ཤེས་པའི་ནུས་པ་དེ་འདྲ་ཞིག་ཐོན་ཡོད་པ་རེད། དེ་བས། ང་ཚོ་རང་གི་སྒྱུ་རྩལ་རིག་གཞུང་འདི་གལ་ཆེན་པོ་རེད། གལ་སྲིད། ང་ཚོས་འདི་དག་ལ་བདག་པོ་རྒྱག་མ་ཐུབ་པ་ཡིན་ན་མི་རིགས་འདིའི་ཉེན་ཁ་ཞིག་ཏུ་འགྱུར་སྲིད་པ་རེད། མི་མང་གི་དགའ་མོས་དེའང་ང་ཚོ་རང་གི་རིག་གཞུང་འདི་གལ་ཆེན་དང་དེའི་ནུས་པ་ཞིག་ཐོན་གྱིན་ཡོད་པའི་རྟགས་རེད།

དྲི་བ། མི་ལོ་ ༥༠ རྗེས་ལ་བོད་གཞུང་ཟློས་གར་ཁང་འདིའི་སྲིད་བྱུས་དང་གྲུབ་ཆ། བྱེད་སྒོ་བཅས་ཕྱོགས་གང་ཐད་ལ་བཅོས་བསྒྱུར་འདྲ་དགོས་པར་དགོངས་ཀྱིན་ཡོད་དམ།
ལན། ང་ཚོ་བོད་གཞུང་ཟློས་གར་ལ་མཚོན་ན་ལས་དོན་རྒྱ་ཆེན་པོ་མང་པོ་ཞིག་ཡོད་པ་རེད། མ་འོངས་པར་ང་རང་གི་བསམ་པར་བོད་མི་འདུས་སྡོད་ཀྱི་ས་གནས་ཁག་ཏུ་ཟློས་གར་རང་གི་ཡན་ལག་གསར་འཛུགས་བྱས་ཏེ། དེ་རུ་མི་སྣ་མང་པོ་ཞིག་གསོ་སྐྱོང་དང་དེ་དག་ལས་དྲག་འདེམས་ཀྱིས་བོད་གཞུང་ཟློས་གར་ནང་བསྡུ་རུབ་བྱས་རྗེས་སྦྱོང་བ་སྤྲོད་རྒྱུའི་དམིགས་ཡུལ་དེ་འདྲ་ཞིག་བཟུང་ཡོད་ལ། ད་ལྟའི་ཟློས་གར་ཚོགས་པ་འདི་ཉིད་གཞི་རྒྱ་ཆེ་རུ་བཏང་སྟེ་སློབ་ཆེན་ལྟ་བུའི་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་ཀྱི་གཞོན་སྐྱེས་སོགས་འཛུལ་ཞུགས་ཀྱིས་བོད་རང་གི་ལྷ་མོ་སྒྱུ་རྩལ་གཙོ་བྱས་པའི་རིག་གཞུང་སྦྱོང་སའི་བསྟི་གནས་ཤིག་གསར་འཛུགས་གནང་རྒྱུའི་འདུན་པ་ཡོད། ད་ལྟའི་ཆར་ང་ཚོའི་ཉར་ཚགས་ཀྱི་ལས་རིམ་ཞིག་འགྲོ་བཞིན་ཡོད། འདིས་ལྷ་མོ་སྒྱུ་རྩལ་རིག་གཞུང་གཙོས་བོད་རང་གི་འདས་པའི་ལྷ་མོའི་བྱུང་རབས་ལོ་རྒྱུས་དག་མི་སྣ་སུ་ཞིག་གིས་ཉམས་ཞིབ་བྱེད་ན་དེ་ལ་མཐུན་རྐྱེན་དང་རོགས་འདེགས་སུ་འགྱུར་བ་དང་། དེ་དག་གློག་ཀླད་ནང་ཐད་ཀར་ལྟ་རྒྱུ་ཡོད་པ་དེ་འདྲའི་ཕྱོགས་ལ་འབད་པ་བྱེད་བཞིན་ཡོད། དེ་བཞིན་ད་ལྟའི་འཁྲབ་སྟོན་བྱེད་སའི་ཚོགས་ཁང་དང་གར་སྟེགས་སོགས་ལས་གཞི་གང་མང་ཞིག་ཆ་རྐྱེན་གྱིས་འདང་གི་མེད་སྟབས། དེ་དག་གི་དཀའ་ངལ་སེལ་བར་ད་ལྟ་ནས་ལས་ཀ་མགོ་འཛུགས་བྱེད་བཞིན་ཡོད། འདས་པའི་དུས་ནས་བཟུང་ང་ཚོ་ཟློས་གར་ནང་ཕྱི་རོལ་གྱི་མི་སླེབས་པ་ཡིན་ན་ནང་ཁུལ་གྱི་ཁང་པ་མ་གཏོགས་དམིགས་བསལ་ལྟ་ས་གང་ཡང་ཡོད་པ་མ་རེད། དེ་བས། ང་ཚོ་ལ་སྒྱུ་རྩལ་རིག་གཞུང་གི་འགན་འཁུར་ཆེན་པོ་ཡོད་པར་དགོངས་ཏེ་ཉེ་ཆར་ནས་བཟུང་ང་ཚོས་འགྲེམས་སྟོན་ཁང་གསར་བ་ཞིག་རྒྱག་མགོ་བརྩམས་ཡོད་ལ། དེའི་ནང་བོད་རང་གི་ལྷ་མོ་འཁྲབ་སྟོན་གྱི་རིགས་དང་དེ་དག་གི་འཁྲབ་ཆས་རིགས་སྣ་ཚོགས་དང་དེ་དག་གི་ལོ་རྒྱུས། བོད་ཀྱི་ལྷ་མོ་སྒྱུ་རྩལ་གསར་གཏོད་གནང་མཁན་ཐང་སྟོང་རྒྱལ་བོའི་གཙོ་སྐུ་དང་ལོ་རྒྱུས་སོགས་བོད་རང་གི་སྒྱུ་རྩལ་རིག་གཞུང་དང་འབྲེལ་བ་ཡོད་པའི་རིགས་དང་། བོད་གཞུང་ཟློས་གར་ཚོགས་པའི་འདས་པའི་ལོ་རྒྱུས་དང་འབྲེལ་བའི་ལྷ་མོ་འཁྲབ་སྟོན་གྱི་རིགས་རྣམས་འགྲེམས་སྟོན་བྱ་འཆར་ཡོད་ལ་། ལོ་རྗེས་མའི་སྤྱི་ཟླ་ ༤ པའི་ནང་ངེས་པར་དུ་འགྲུབ་དགོས་པའི་འཆར་གཞི་བཏིངས་ཡོད། དེ་བཞིན་ང་ཚོས་འདས་པའི་དུས་སུ་ལྷ་མོ་འཁྲབ་སྟོན་བྱས་པའི་སྐོར་ཡོངས་གློག་བརྙན་ནང་བལྟ་ཐུབ་པ་དེ་འདྲ་ཞིག་བཟོ་འཆར་དང་། བོད་ཀྱི་དམངས་གཙོའི་དུས་ཆེན་དང་བཀའ་ཁྲི་འོས་འདེམས་སོགས་དང་འབྲེལ་བ་ཡོད་པའི་ལས་འཆར་ཞིག་ད་ལྟ་ནས་མགོ་རྩོམ་བཞིན་ཡོད།

དྲི་བ། སྔར་ལོ་བོད་མི་མང་སྤྱི་འཐུས་གྲོས་ཚོགས་སུའང་བོད་གཞུང་ཟློས་གར་ཁང་གི་སྒྱུ་རྩལ་གྱི་ལས་རིགས་ཐད་ལ་ཞན་ཆ་ཡོད་རབས་གླེང་སོང། སྐུ་ཉིད་ནས་དེ་གསན་ཡོད་དམ། གལ་སྲིད་ཡོད་ན་དེའི་ཐད་དགོངས་ཚུལ་ཅི་ཡོད།
ལན། དེ་ངས་གསལ་བོ་ཞིག་ཧ་གོ་མ་སོང། ང་མ་སླེབས་པའི་ཡར་སྔོན་དུ་གནས་ཚུལ་ཁག་ཅིག་བྱུང་ཡོད་པ་འདྲ། ང་རང་ཟློས་གར་ཚོགས་པའི་ནང་སླེབས་པ་ནས་བཟུང་གནས་ཚུལ་དེ་འདྲའི་རིགས་གཅིག་ཀྱང་གོ་མ་སོང་ལ་ཞན་ཆ་ཞེས་དམིགས་བསལ་གྱིས་མཐོང་མ་སོང། གང་ཡིན་ཟེར་ན། ཟློས་གར་ཚོགས་པ་དེ་འདས་པའི་དཀའ་སྡུག་གི་ལོ་ཟླ་ནས་ད་ལྟའི་དུས་སྐབས་འདི་འདྲ་ཞིག་ཏུ་སླེབས་ཐུབ་པ་དེ་ཟློས་གར་འགན་འཛིན་ཟུར་པ་དག་གི་བྱས་རྗེས་རེད། གལ་སྲིད་སྐྱོན་ལ་བལྟ་མཁན་ཞིག་ཡིན་ཚེ་སྐྱོན་མང་པོ་ཡོད་པ་རེད། དེང་སང་ཚོགས་པ་གང་མང་ཞིག་མགོ་བཙུགས་ཏེ་ཅུང་མ་འགོར་བར་སྒོ་རྒྱག་དགོས་པ་དེ་འདྲ་ཆགས་ཀྱིན་ཡོད་པ་རེད། ང་ཚོ་འདི་ལྟར་གནས་ཤིང་། ༧གོང་ས་མཆོག་དང་བོད་གཞུང་གི་དགོངས་པ་སྒྲུབ་ཐུབ་པ་དེའང་འགན་འཛིན་རིམ་བྱོན་གྱིས་སྐུ་ལས་སྐྱོན་པའི་གྲུབ་འབྲས་ཉག་གཅིག་རེད། ཡིན་ཡང། ཞན་ཆ་ཡོད་སྲིད་པ་རེད། ང་རང་ཉིད་ཀྱིས་འགན་ཁུར་བ་ནས་བཟུང་དཀའ་ལས་གང་མང་ཞིག་རྒྱག་གིན་ཡོད། དེ་ལྟར་སྒྲུབ་ཀྱང་མི་གཞན་གྱི་ཞན་ཆ་མཐོང་གི་རེད། ཞན་ཆ་ཚུར་བཏོན་རྗེས་འགྱུར་བ་གཏོང་ཐུབ་པ་ཞིག་ཡིན་ན་འགྱུར་བ་གཏོང་རྒྱུ་ལས་གཞན་ཐབས་ཤེས་གང་ཡང་ཡོད་པ་མ་རེད། གལ་སྲིད། སྐྱོན་ལབ་མཁན་ཞིག་ཡིན་ནའང་སྐྱོན་འདི་དང་འདི་རེད་ཅེས་ལབ་ན་ཡག་པོ་རེད་བསམ་གྱི་ཡོད། ང་རང་ལ་མཚོན་ན་དེང་རབས་དང་མཐུན་པའི་གཞས་ཀྱི་ཕྱོགས་ལ་ཡར་རྒྱས་གཏོང་དགོས་ཀྱིན་འདུག་ཅེས་ལབ་མཁན་བྱུང་བ་ལས་སྐྱོན་འདི་རེད་ཅེས་ལབ་མཁན་བྱུང་མ་སོང། ཡིན་ནའང། ཟློས་གར་སྒྱུ་རྩལ་གྱི་ཡར་རྒྱས་ལ་མཐའ་མེད་སྟབས། མི་མང་ཚང་མའི་རོགས་འདེགས་ལ་བརྟེན་དགོས་པ་རེད། སྐྱོན་ཡོད་པ་དེ་དག་ལ་ཡོ་སྲང་དང་ཡར་རྒྱས་གཏོང་ཕྱོགས་ཀྱི་བསམ་འཆར་བརྗོད་པ་ཡིན་ན་དེ་ལས་ཀྱང་ཕན་ཐོགས་ཆེན་པོ་ཡོང་གི་རེད། བོད་ནང་གི་བོད་མི་དེ་དག་གིས་ང་ཚོར་རྒྱབ་སྐྱོར་གྱི་ཚུལ་དུ་ང་ཚོར་ཟློས་གར་གྱི་འཁྲབ་ཆས་བསྐུར་བ་དེ་འདྲ་བྱུང་ཡོད་པ་རེད། ང་ཚོར་དངུལ་ཁོ་ནའི་སྟེང་རོགས་སྐྱོར་བྱེད་དགོས་པ་མ་རེད། རྒྱ་ཆེའི་མི་མང་གི་ལྷག་བསམ་དང་མཐུན་རྐྱེན། བསམ་ཚུལ་གྱི་ལམ་ནས་རོགས་སྐྱོར་འཛུབ་སྟོན་གནང་རྒྱུ་དེ་ཧ་ཅང་གལ་ཆེན་དུ་མཐོང་གི་ཡོད། ང་ཚོས་སྔོན་མ་ནས་མི་མང་ནང་ཁུལ་དུ་བོད་གྱི་གཞས་རྙིང་བ་སོགས་བསྡུ་རུབ་ཀྱི་གསལ་བསྒྲགས་བསྐྱངས་ཀྱང་ད་ལྟའི་ཆར་དེའི་སྐོར་ལ་རྒྱབ་སྐྱོར་མཐུན་རྐྱེན་སྤྲོད་མཁན་གཅིག་ཀྱང་རག་མ་སོང། མ་འོངས་པར་རྒྱ་ཆེའི་མི་མང་ངོས་ནས་རྒྱབ་སྐྱོར་དང་རོགས་འདེགས་བྱ་རོགས་གནང་ཅེས་འབོད་སྐུལ་ཞུ་རྒྱུ་ཡིན།