ཆོས་བརྡ་གསལ་བསྒྲགས།

༄༅། །སྤྱི་ལོ་  ༢༠༡༠ ཟླ་ ༡  ཚེས་ ༥ ནས་ ༡༠ བར་གནས་མཆོག་རྡོ་རྗེ་གདན་དུ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་སྤྱི་སྒོས་སྐྱེ་འགྲོའི་བསོད་ནམས་ཀྱི་བགོ་སྐལ་དམ་པར་བྱང་ཆུབ་ལམ་སྒྲོན་སོགས་གསུང་ཆོས་བཀའ་དྲིན་བསྐྱང་གཏན་འཁེལ་བ་དང་སྟབས་བསྟུན་ ༢༠༡༠ ཟླ་ ༡  ཚེས་ ༣ ནས་ ༡༠ བར་གདན་ས་གྲ་ཚང་དྲུག་ནས་དགེ་བཤེས་ལྷ་རམས་པ་རེ་རེའི་དམ་འཇོག་དང་མཐར་བྱམས་པ་གདན་འདྲེན་བཅས་ཆོ་འཕྲུལ་སྨོན་ལམ་ཆེན་མོ་འཕར་མ་ཞིག་འཚོག་གཏན་འཁེལ་བ་ལགས་ན་དད་ལྡན་སེར་སྐྱ་མི་མང་ཡོངས་ནས་ཐུགས་སྣང་ཡོང་བ་ཞུ་རྒྱུ་ཡིན།
 དེ་ཡང་འཇམ་མགོན་བླ་མ་ཙོང་ཁ་བ་ཆེན་པོའི་མཛད་ཆེན་བཞིའི་ཡ་གྱལ་ཆོ་འཕྲུལ་སྨོན་ལམ་ཆེན་མོ་དེ་ཉིད་གནས་མཆོག་རྡོ་རྗེ་གདན་དུ་གདན་ས་གསུམ་གཙོ་བོར་གྱུར་བའི་དགེ་དགོན་ཡོངས་རྫོགས་མཉམ་ཚོགས་ཐུབ་ཐབས་སུ་སྨོན་ལམ་ཚོགས་པ་ཆེད་འཛུགས་ཞུས་ཀྱང་དུས་རྒྱུན་དགེ་འདུན་པ་ཕེབས་རྒྱུ་སོགས་གང་ཅིའི་དཀའ་ངལ་ལ་བརྟེན་ཚོགས་ཐུབ་ཀྱི་མེད་ཀྱང༌། ྋགོང་ས་མཆོག་གི་གསུང་ཆོས་དང་སྟབས་བསྟུན་བྱུང་ན་དགེ་འདུན་པ་ཕེབས་རྒྱུ་སོགས་གང་ཅིའི་མཐུན་རྐྱེན་འབད་མེད་ལྷུན་གྲུབ་ཡིན་པ་དང༌། ལྷག་པར་ྋགོང་ས་མཆོག་གི་གསུང་ཆོས་ལ་བཅར་འདུན་སྐོམ་པས་ཆུ་འདོད་ལྟར་ཆེ་བ༌། གདན་ས་གྲ་ཚང་ཁག་སོགས་ན་དགེ་འདུན་པ་ཧ་ཅང་མང་ཡང་བཞུགས་སའི་དཀའ་ངལ་ལ་བསམ་སྟེ་ཕེབས་མ་ཐུབ་པ་སོགས་ཀྱི་དཀའ་ངལ་སེལ་ཐབས་བཅས་སྟབས་གཅིག་དོན་གཉིས་ལ་དམིགས་ཏེ་སྨོན་ལམ་ཚོགས་པས་འགྲོ་གྲོན་བཏང་སྟེ་དགེ་འདུན་པ་རྣམ་པའི་བཞུགས་གུར་སོགས་གང་འོས་གྲ་སྒྲིག་ཞུ་རྒྱུ་ལགས་ན།  དགེ་འདུན་པ་སོ་སོའི་ངོས་ནས་རང་དོན་རང་གཅེས་ཀྱིས་སོ་སོའི་དགོན་པ་གྲ་ཚང་སོགས་ལ་ཐོ་འགོད་གནང་རྒྱུ་མ་ཟད།  དགོན་པ་གྲ་ཚང་སོ་སོས་ཀྱང་འགན་འཁུར་གྱིས་གསུང་ཆོས་སམ་སྨོན་ལམ་ལ་བཅར་མཁན་དགེ་འདུན་ཇི་ཡོད་མཚན་གཞུང་དང་བཅས་ཁ་གྲངས་ཁ་གསལ་་གཤམ་གསལ་ཁ་བྱང་ཐོག་སྤྱི་ཟླ་ ༩ ཚེས་ ༣༠ སྔོན་ཚུད་ངེས་གནང་ཡོང་བ་ཞུ་རྒྱུ་ནི་དོན་དངོས་དགེ་འདུན་གྱི་གྲངས་འབོར་ལ་གཞིགས་པའི་གྲ་སྒྲིག་ཞུ་རྒྱུ་ལས་གྲ་ཚང་ཆེ་ཆུང་དང་ གྲ་ཚང་འདྲ་འདྲའི་གནས་སྟངས་ཀྱི་ཐོབ་ཐང་ལྟ་བུ་འབུལ་ཐབས་མེད་པས་དོ་བདག་སོ་སོ་དང༌། དགོན་པ་གྲ་ཚང་སོ་སོས་འཐུས་ཤོར་བྱུང་ཏེ་སྐབས་མཚམས་བཞུགས་སའི་དཀའ་ངལ་འཕྲད་ཚེ་སྨོན་ལམ་ཚོགས་པས་འགན་འཁུར་ཞུ་ཐབས་བྲལ་བ་བཅས་དགོངས་འཇག་འཚལ།

 དགེ་ལྡན་ཆོ་འཕྲུལ་སྨོན་ལམ་ཆེན་མོའི་འཛིན་སྐྱོང་བསྟི་གནས་ཝ་ཎ་བོད་དགོན་བཤད་སྒྲུབ་འདོད་རྒུ་འཁྱིལ་ནས།

gelug monlam committee
tibetan monastry SA 10/83
p.o sarnath varanasi U.P pin 221007
Phone: 9559289080 / 9793333079