ཐེའུ་རང་སྤུན་དགུ། (Therang Buengu) ཡིས་བརྩམས། བཀྲ་ཤིས་རྣམ་རྒྱལ་གྱིས་བསྒྱུར།
ཐེངས་འགར་ངའི་མི་ཚེའི་ནང་རང་ཉིད་ལོ་ན་གཞོན་ཙམ་ཡིན་ན་ཅི་མ་རུང་སྙམ་པ་སླེབས་མྱོང་། དེ་འདྲ་བའི་དྲན་འཁྲུལ་རྣམས་རྒྱུན་དུ་འདས་དོན་དང་འགྱོད་སེམས་འདྲེས་མ་ཞིག་གི་ལམ་དུ་ཕྱིན།
ད་ལྟ་རང་ཉིད་ཀོ་ཧྥི་ཁང་ཞིག་གི་ནང་དུ་བསྡད་དེ་དེང་དུས་བོད་མིའི་རྡུང་ལེན་ཚོགས་པ་གཡུ་འབྲུག་གི་རྨི་ལམ་ཞེས་པའི་འཁྲབ་སྟོན་བྱེད་སར་ལྟ་སྐབས། ང་རང་སླར་ཡང་ཚོར་བ་དེ་ཚོས་རབ་ཏུ་སྒུལ། རང་ཉིད་ལོ་ན་འདི་ལས་གཞོན་ཙམ་ཡོད་ན་སྙམ་ཞིང་དེ་སྔོན་པེ་ཅིན་དུ་མཐོ་སློབ་ཀྱི་སློབ་ཕྲུག་ཅིག་ཡིན་དུས་ང་རང་ཉམས་དོད་པོ་དང་བོད་པ་ཞིག་བྱེད་པའི་གོ་སྐབས་རག་གི་ཡོད་པ་རེད་སྙམ།
དེ་དུས་ངས་རང་ཉིད་སུ་ཞིག་བྱེད་འདོད་མིན་ཐད་འཐབ་རྩོད་བྱེད་མྱོང་ཞིང་། ཕྱིར་བལྟས་ཤིག་བྱེད་དུས་ང་རང་ཉམས་དོད་པོ་དང་ལྷན་དུ་བོད་པ་ཞིག་བྱེད་པའི་ལམ་ཞིག་འཚོལ་བཞིན་ཡོད་པར་མཐོང་། སྐབས་དེ་དུས་བོད་སྐད་དང་རྒྱ་སྐད་གང་གི་ནང་དུའང་ཉམས་དོད་པོ་ཞེས་པའི་ཐ་སྙད་དེ་མེད་ནའང་། གང་ལྟར་རྒྱ་མིའི་མཐའ་མཇུག་གི་བསམ་བློའི་ནང་བོད་པ་ནི་མཛའ་བརྩེ་མེད་མཁན་ཞིག་རེད། རྒྱ་མིའི་ཤེས་ཡོན་སློབ་གསོའི་ལམ་ལུགས་འོག་འཚར་ལོངས་བྱུང་བའི་བོད་མི་ན་གཞོན་ཞིག་ཡིན་པའི་ཆ་ནས་ང་ཚོས་ངོ་མ་རྒྱ་མིའི་བསམ་བློ་ལས་ལོགས་སུ་ཇི་ལྟར་སྡོད་དགོས་མིན་མ་ཤེས།
ངས་ད་དུང་གསལ་བོའི་ངང་དྲན་གསོས་གསལ་ལ་རང་ཉིད་ཐོག་མར་རྒྱ་ནག་གི་ལྟེ་གནས་གྲོང་ཁྱེར་དུ་ཐེངས་དང་བོར་བསྐྱོད་དུས་ཚ་འདམ་བྱེ་ཐང་ནང་ཆགས་པའི་གོར་མོ་གྲོང་ཁྱེར་གྱི་མཐོ་སློབ་ཅིག་ཏུ། གསར་ཞུགས་བྱེད་མཁན་བོད་ཕྲུག་འགའ་དང་ལྷན་དུ་ང་ཚོས་ས་ཆ་གསར་བ་དེའི་ནང་ལོ་བཞིའི་རིང་སློབ་ཞུགས་བྱས་སྐབས། ཇི་ལྟར་བོད་པ་ཞིག་བྱེད་དགོས་མིན་ཐད་སྐད་ཆ་བཤད། དེའི་ཁྲོད་ནས་སློབ་ཕྲུག་ཅིག་དེ་སྔོན་རྐང་རྩེད་སྤོ་ལོ་རྩེད་མཁན་བྱས་ཏེ་རྒྱ་ནག་ཏུ་འགྲོ་མྱོང་བས། ཁོས་བཤད་སྟངས་ལྟར་ན་ང་ཚོས་བོད་མིའི་རལ་གྲི་བཏགས་ཏེ། ཅུང་ཙམ་གཏུམ་དྲག་བྱེད་དགོས་སྐོར་བཤད་མོད། དེ་དུས་ངས་རང་གི་སྐེད་པར་རལ་གྲི་བཏགས་ཤིང་རྫིག་མཉམ་དོད་པོས་རྒྱ་ནག་གི་རྒྱལ་སར་འགྲོ་རྒྱུར་རང་གི་བློ་ཡུལ་དུའང་ཤོང་དཀའ་བ་ཞིག་རེད་ལ། ངས་རེ་འདོད་གཞན་ཞིག་བྱས་པ་ནི་བོད་པ་དང་དེང་དུས་ཅན་གཉིས་ཀ་བྱེད་པའི་ལམ་ཞིག་འཚོལ་རྒྱུ་དེ་ཡིན་པ་རེད།
འོན་ཀྱང་ང་ཚོ་སླེབས་ནས་ཡུན་རིང་མ་སོང་བར་ངས་ཤེས་རྟོགས་བྱུང་གསལ་ལ་རྒྱ་ནག་རྒྱལ་ཁབ་ཀྱི་བསམ་བློའི་ཁྲོད་དུ་ང་རང་ལ་བོད་པ་དང་དེང་དུས་ཅན་གཉིས་ཀ་བྱེད་པའི་སྟོང་ཆ་མི་འདུག ང་རང་སུ་ཞིག་བྱེད་དགོས་མིན་ནི་སྔོན་ནས་ཐག་བཅད་ཟིན་འདུག
རྒྱ་ནག་གིས་བོད་འཛིན་བཟུང་བྱས་པའི་སྔ་མོ་ནས་བཟུང་ཀླ་ཀློ་དང་གཏུམ་དྲག་ཅན་གྱི་བོད་མིའི་གཟུགས་བརྙན་ཞིག་གསར་བཟོ་དང་ཁྱབ་བསྒྲགས་བྱས་ཟིན་པ་ལྟར། བོད་པ་ནི་ཤ་མདོག་ནག་ཅིང་སྣུམ་ཞག་ཆེ་བ། དཔལ་ཡོན་དང་བཅིངས་འགྲོལ་དགོས་ངེས་ཡིན་པའི་ཀླ་ཀློའི་གཟུགས་བརྙན་དེ་ནི་ཁྱབ་ཆེ་བའི་གློག་བརྙན་ཞིང་བྲན་ཞེས་པའི་ནང་། ལྐུགས་པའི་མི་སྣ་འཁྲབ་མཁན་བྱམས་པ་ཞེས་པ་ལས་ཧ་ཅང་གྲགས་ཆེ་བར་གྱུར། སྒྲུང་དེའི་ནང་མི་མང་བཅིངས་འགྲོལ་དམག་གིས་བྱམས་པ་དྲན་གཡོག་བདག་པོའི་སར་ནས་རང་དབང་སྤྲད་སྐབས་ལོ་མང་རིང་སྐད་ཆ་བཤད་མ་མྱོང་བའི་མི་དེས་བཀའ་དྲིན་དྲན་པའི་ངུ་འབོད་ཀྱིས་མའོ་ཀྲུའུ་ཞི་སྐུ་ཚེ་རིང་བོར་ཤོག་ཅེས་བཤད། རྫུན་བཟོ་བྱས་པའི་སྣང་བརྙན་དེ་ནི་རྒྱ་ནག་རྒྱལ་ཡོངས་ཀྱི་བསམ་བློར་འཐིམ་པ་མ་ཟད། དེ་ནི་དེང་དུས་རྒྱ་ནག་རྒྱལ་ཁབ་ཀྱི་གཏམ་བཤད་བྱེད་པའི་གྲུབ་ཆ་གལ་ཆེན་ཞིག་ཏུ་གྱུར་ཡོད།
དོན་དངོས་ཐོག་ཉེ་རབས་རྒྱ་ནག་གི་སྨྱོན་པའི་འཁྲབ་གཞུང་ཁྲོད་རྒྱ་གཞུང་གིས་བོད་མི་འཁྲབ་སྟོན་པ་གཉིས་ལ་མ་གཏོགས་འཁྲབ་སྟོན་བྱེད་པའི་གོ་སྐབས་སྤྲད་མེད། ང་ཚོ་ལ་ཡོད་པའི་གདམ་ཁ་ནི་རང་ཉིད་བཅིངས་འགྲོལ་མ་བཏང་བའི་ཀླ་ཀློ་ཞིག་བྱེད་རྒྱུའམ། ཡང་ན་བཅིངས་འགྲོལ་བཏང་རྗེས། རྒྱ་གཞུང་གིས་རང་ཉིད་ངོ་མ་གང་ཡིན་པ་ལས་སྐྱབས་པའི་བཀའ་དྲིན་དྲན་མཁན་གྱི་ཆབ་སྲིད་ཐོག་གི་སྤྲེལ་ལད་འཁྲབ་མཁན་ཞིག་བྱ་རྒྱུ་དེ་གཉིས་རེད།
ང་ཚོ་མང་ཆེ་བ་ནི་བཅིངས་འགྲོལ་བཏང་རྗེས་ཀྱི་སྤྲེལ་ལད་འཁྲབ་མཁན་བྱེད་རྒྱུར་མཁས་ལ་སྤོབས་པ་ལྡན་པ་ཤ་སྟག་ཡིན་པ་དེས། ང་ཚོའི་ངོ་བོ་ནི་ཀླ་ཀློའི་རང་བཞིན་ཅན་དུ་བསྒྱུར། དེ་ཡང་ང་ཚོ་བོད་ནང་ཡོད་དུས་ང་ཚོའི་ཉམས་ཆུང་དང་སྤྱོད་པ་དུད་ཅིང་། ཐ་ན་བརྩོན་འགྲུས་ཅན་གྱི་སློབ་ཕྲུག་ཡིན་པ་རེད། འོན་ཀྱང་རྒྱ་ནག་ནང་ང་ཚོ་ཁྲོམ་གཞུང་ཐོག་རྒྱལ་འདྲེ་རྒྱག་མཁན་དུ་གྱུར། ང་ཚོས་ཟ་ཁང་ནང་དུ་འཛིང་རེས་བཏང་བ་དང་སློབ་གྲྭའི་ནང་སློབ་ཕྲུག་གཞན་ལ་ཉེས་རྡུང་བཏང་བ། མི་ཚང་མས་ང་ཚོ་ལ་སྐྲག་ཁུལ་དང་ང་ཚོས་ཀྱང་རང་ཉིད་གཏུམ་དྲག་ཆེ་བའི་མི་རྒོད་ཡིན་ཁུལ་བྱས། ང་ཚོ་ནི་བོད་པ་རེད། དེ་ལྟར་ངས་རང་ཉིད་ཉམས་དོད་པོ་དང་དེང་དུས་ཅན་གྱི་བོད་པ་ཞིག་བྱེད་པའི་རེ་འདོད་རྒྱང་རིང་དུ་ལུས།
དེང་སང་ངས་ཤེས་གསལ་ལ་རྒྱ་ནག་ཏུ་ཡོད་པའི་བོད་རིགས་མཐོ་སློབ་ཏུ་བོད་རིགས་ཚོར། བོད་པ་ཡིན་པའི་ཆ་ནས་ཁོང་ཚོར་རང་རང་གི་དཀའ་ངལ་ཡོད་པ་རེད།
འོན་ཀྱང་། རྒྱ་ནག་དེ་རྣམ་གྲངས་ཇེ་མང་དང་ཉོག་དྲ་ཇེ་ཆེར་འགྲོ་བཞིན་པའི་སྐབས་དེར་བོད་པ་ཚོར་ཡང་དེ་སྔོན་བཅིངས་འགྲོལ་དང་འབྲེལ་བའི་ངོས་འཛིན་སྟངས་དེའི་ཕྱི་ལ་ཐོན་ཡོད་པ་རེད། ད་ལྟའི་ཆར་རྒྱ་མིའི་སེམས་ངོས་སུ་ང་ཚོ་བོད་པར་ཧ་ཅང་འགལ་ཟླ་ཆེ་བའི་མཐོང་ཚུལ་མང་བོ་ཡོད་པ་ནི། བོད་པ་རྣམས་གྱེན་ལོག་པ་དང་ནང་དོན་རིག་པའི་མཁས་དབང་། ཐ་ཤལ་ཅན་གྱི་ཏང་གི་མགོ་ཁྲིད། རྣམ་རིག་བཀྲ་བའི་མཐོ་སློབ་ཀྱི་སློབ་ཕྲུག དེ་བཞིན་རྒྱ་ནག་ནང་རྫིག་ཉམས་དོད་ཤོས་ཀྱི་མི་དང་། མཁྲེགས་བཟུང་ཆེ་བའི་ཆོས་པ། ལྷག་པར་དུ་ང་ཚོ་ནི་གྲགས་ཆེ་བའི་དེང་དུས་གཡུ་འབྲུག་རྡུང་ལེན་ཚོགས་པའི་ནང་གི་ཕོ་གསར་བཞི་བོ་ལྟར་ཉམས་དོད་པོ་ཡོད་པ་རེད།
གཡུ་འབྲུག་གི་གནས་ཚུལ་དེ་བསྟན་པ་ནས་བོད་པ་ཚོས་ཉམས་དོད་པོ་བྱེད་ཐུབ་ཀྱི་ཡོད་པ་ཁོ་ན་མ་ཡིན་པར། བོད་པ་ཡིན་པའི་ཆ་ནས་ཉམས་དོད་པོ་ཡིན་པ་དེ་རེད། དེ་ནི་འགྱུར་བ་ཆེན་པོ་ཞིག་རེད། འོན་ཀྱང་དེ་བསྟན་པ་ནས་བོད་པ་ཡིན་པའི་ཚོར་བ་དེ་ཉམས་དོད་པོར་གྱུར་ཡོད་པ་ཙམ་མ་ཡིན་པར། དེ་ད་དུང་གསལ་བོར་བཟོ་བ་ནི་བོད་པའི་གཟུགས་བརྙན་དེ་རྒྱ་མིའི་བསམ་ཚུལ་ལས་ཡོངས་སུ་བརྒལ་བ་ཞིག་བཟོ་ཐུབ་པ་དེ་ཡིན། དེ་འདྲ་བའི་བོད་པ་ཡིན་པའི་ཚོར་བ་ནི་བོད་པ་རྣམས་ཀྱིས་བཟོས་ཤིང་བོད་པ་རྣམས་ཀྱི་ཆེད་དུ་བཟོས་པ་ཞིག་ཀྱང་ཡིན།
མདངས་ནུབ་ང་ལ་རྨི་ལམ་ཡག་པོ་ཞིག་རྨིས་བྱུང་། །
ང་ཡིས་བོད་ཁ་བ་ཅན་རྨི་ལམ་ནང་བཏང་བྱུང་། །
ཚོན་སྣ་ལྔའི་མེ་ཏོག་ཤར་བ་རྨིས། །
གཡུ་འབྲུག་སྔོན་མོ་བབ་པ་རྨིས། །
དུས་རབས་གསར་བའི་སྐབས་འདིར་བོད་རིགས་ན་གཞོན་ཚོར་རང་གི་རིག་གཞུང་ཐད་ནུས་པ་འདོན་པའི་གོ་སྐབས་གང་མང་ཡོད་པ་བསམ་ནས་ང་རང་ལ་སྤྲོ་སྣང་ཆེན་པོ་ཞིག་སླེབས། ཁོང་ཚོར་རང་ཉིད་བོད་པ་ཞིག་བྱེད་པའི་ཁར། གཞན་འདྲ་མིན་སྣ་ཚོགས་བྱེད་པའི་གོ་སྐབས་ཀྱང་ཡོད་པ་རེད། དུས་དེར་བཟོད་པར་དཀའ་ཞིང་གཡོལ་ཐབས་བྲལ་བའི་གཉའ་གནོན་གྱི་གྲིབ་ནག་འོག་ཏུ་སྤྲང་འཁྱམ་བྱས་མྱོང་བའི་འདས་དོན་དག་བསམ་དུས། རྫོགས་ཟིན་པའི་ངའི་ལང་ཚོ་དེར་སྐྱོ་སྣང་སྐྱེས།
ཨོ་་་་ མ་རྩོམ་ཡིག་དེ་ད་སོ་མ་ཅིག་བཙལ་བ་ཡིན། ཕ་ཡུལ་ཐོག་བཀོད་འདུག ཞིབ་ཀློག་བྱ་བ་མ་བྱུང་བས་རྗེས་སུ་ཀློག་གི་ཡིན། རྣམ་པ་ཚོས་འདི་ནས་བགྲོ་གླེང་ཡག་པོ་ཞིག་བྱས་འདུག འོན་ཀྱང་། འདི་ལྟར་རྩོད་བསྡད་པ་ལས། ང་ཚོ་ཚང་མས་རང་ངོས་ནས་རྩོམ་ཡིག་འདིའི་མགོ་མཇུག་ཚང་བ་ཞིག་སྒྱུར་ནས་འདིར་རང་རང་གི་ཟིན་བྲིས་སུ་བཀོད་ན་དེ་ལེགས་སམ་སྙམ། དེང་སྐབས་ཡིག་སྒྱུར་བ་མང་དྲགས་པས། ངོ་མ་་་ སྒྱུར་ལུགས་ཀྱང་མང་པོ་འདུག དེ་བས་་་ཕན་ཚུན་བསམ་བློ་བརྗེ་རེས་རེ་བྱེད་ན་ཡག་པོ་ཡོང་ས་རེད།
ང་ཡིན་ན་ ” Be cool – Be Tibetan” ཞེས་པ་འདི། མཐོང་དོད་པོ་བྱོས། བོད་པ་བྱོས། ཞེས་དང་ཡང་ན། མཐོང་དོད་པོ་དང་བོད་པ་བྱོས། ཞེས་བསྒྱུར་དགོས་སྙམ། འདི་འགྲིག་མིན་རྣམ་པ་ཚོས་དཔྱད་རོགས།
གོང་དུ་རབ་གསལ་ལགས་ཀྱིས་གསུངས་པ་ལྟར། Cool ཞེས་པར་གོ་དོན་མང་པོ་ཡོད་པ་རེད། ངས་དབྱིན་ཡིག་གི་དག་ཡིག་ལས་སྐབས་འདིའི་ཁོལ་གྱི་ནང་དོན་འོས་འཚམ་ཞིག་བཙལ་བ་ཡིན་པས་ཚང་མས་དེ་ཡིན་མིན་དཔྱད་རོགས། དེ་ནས་བོད་རང་གི་ཚིག་ངོ་མ་ཞིག་ཡོད་མེད་དང་། གལ་སྲིད་མེད་ན་གསར་གཏོད་བྱ་རྒྱུ་ཡོད་མེད་ལ་དཔྱད་རོགས། སྐབས་འདིའི་ཁོལ་གྱི་དོན་ནི། the quality of being fashionably attractive or impressive ཞེས་པ་འདི་ཡིན་པ་འདྲ། གཡུ་འབྲུག་ནང་གི་ཕོ་གསར་བཞི་བོ་ཡང་གོང་གི་་ལྟ་ཚུལ་འདི་འདྲ་ཞིག་གི་ཐོག་ནས་ ཁོལ་ ཞེས་པ་དེར་གྱུར་བར་འདོད།
དྲ་གྲོགས་ཚོ་ཁམས་བཟང་། ཉམས་དོད་པོ་བྱེད་པ་དང་བོད་པ་བྱེད་པ། ཞེས་བསྒྱུར་བ་འདི་བོད་སྐད་དུ་ཅུང་མི་བདེ་བ་ཞིག་འདུག་ལར་ནས་དབྱིན་སྐད་ནང་།
” Be cool – Be Tibetan” ཟེར་བའི་གོ་དོན་ལ་གཞིགས་ན་སྐབས་འདིར་ཞི་བ་འམ་ལྷིང་པོ་གཉིས་ལ་གོ་དགོས་པ་དང་དེ་ཡང་བསྐུལ་ཚིག་ལ་འཇུག་དགོས་སྟབས་་་་ ཞི་ལྷིང་པོའི་བོད་མི་ཞིག་བྱོས། ཞེས་བསྒྱུར་ན་ལེགས་པར་སེམས།
Be Cool—Be Tibetan
ཞེས་པ་འདི་བསྐུལ་ཚིག་གིས་བསྒྱུར་དགོས་སྙམ། གང་ཡིན་ཟེར་ན་དབྱིན་ཚིག་ Be ནི་སྐབས་འདིར་བསྐུལ་ཚིག་ཡིན་པས་སོ།། དེར་བརྟེན་པདྨ་ཚེ་དབང་གིས་བྱོས་ཞེས་བསྒྱུར་བ་ལེགས།
ཐེའུ་རང་སྤུན་དགུ་འདི་བོད་སྐད་རྣལ་མ་ཞིག་རེད། ༼ཐེ་རིང་བྷུན་གུ། ༽ཞེས་པ་གང་འདྲ་ཐོན་པ་རེད་དམ། དེང་སྐབས་ཀྱི་ཡིག་མཁན་ཚོ་བག་ལེབ་བཟོ་མཁན་ཞིག་ལའང་མི་དོ་དོན་ཅི། སེམས་པ་ཞེ་དྲག་སྡུག་སོང་།
བཀྲ་ཤིས་རྣམ་རྒྱལ་ལགས་ཀྱིས་བསྒྱུར་བའི་རྩོམ་འདི་ཉིན་ཤས་སྔོན་པད་མ་ཚེ་དབང་ལགས་ཀྱིས་ཀྱང་བསྒྱུར་ནས་ཁ་བརྡའི་ཐོག་བཀོད། རྩོམ་པ་པོའི་མཚན་འདིར་འཁོད་པ་དེ་མིང་ངོ་མ་མིན་ཞེས་གསལ་འདུག་པ་དེ་བཅོས་དགོས་པར་སྣང་། ཁ་བརྡའི་ཐོག་ཏུ་ Be Cool—Be Tibetan ཞེས་པའི་ནང་དོན་འདིར་རྩོད་པ་ཞིག་སླེབས། རྩོད་དོན་ནི་ Cool ཞེས་པ་དེ་ “བསིལ་པོ་”བསྒྱུར་ན་འགྲིག་མིན་གྱི་ཐད་རེད། འདིར་ “ཉམས་དོད་པོ་”ཞེས་བསྒྱུར་འདུག དབྱིན་ཡིག་གི་ “ཁོལ་”ཞེས་པ་འདི་ལ་གོ་དོན་སྣ་ཚོགས་པ་ཞིག་འདུག མཚམས་རེར་ཡག་པོ་དང་མཚམས་རེར་སྡུག་ཇག་གི་གོ་དོན་འདུག འདིར་བཤད་པའི་ “ཁོལ་”དེ་ལ་ཡང་ལྟ་མཁན་གྱི་ངོས་ནས་མཐོང་བའི་ཚོར་སྣང་ཞིག་འགྲེལ་དགོས་པ་རེད་དྲན། དཔེར་ན་རྩོམ་འདིའི་ནང་གི་ལྟ་མཁན་རྒྱ་མི་རིགས་ཀྱིས་བོད་མི་རྣམས་ལ་ “ཁོལ་”ཞེས་ཡིད་དབང་འཕྲོག་ས་ཞིག་ཏུ་བརྩི་གི་ཡོད་མེད་རེད། ཉམས་དོད་པོ་དེ་བྱེད་མཁན་གྱི་ངོས་ནས་ཡིན་ནམ། མི་ཤེས། ཨོ། “ཡིད་འཕྲོག་མཁན།” འདི་གང་འདྲ་འདུག དེ་ནས་རྩོམ་འདིའི་མགོ་བརྗོད་དེ་ཁ་བརྡའི་དྲ་ཐོག་ཏུ་ སྐུལ་ཚིག་གི་ངོ་བོར་བསྒྱུར་འདུག དྭོགས་འདྲི་ཞིག་ལ་ “དེ་ཡང་ང་ཚོ་བོད་ནང་ཡོད་དུས་ང་ཚོའི་ཉམས་ཆུང་དང་སྤྱོད་པ་དུད་ཅིང་། ཐ་ན་བརྩོན་འགྲུས་ཅན་གྱི་སློབ་ཕྲུག་ཡིན་པ་རེད།”ཅེས་པའི་ནང་གི་ཉམ་ཆུང་གི་དག་ཆ་དང་ དེ་ནས་སྤྱོད་པ་དུད་ཟེར་རམ་སྤྱོད་པ་དུལ་ཟེར། དུད་ནི་སྒུར་བའི་དོན་རེད། དུལ་ནི་རྒོད་དུ་ཤོར་བ་ཞིག་བཅོས་པའི་དོན་ཏེ་རྟ་བཏུལ་དང་གདུལ་བྱ་སོགས་ཀྱིས་མཚོན་ནོ།།
ངས་རྩོམ་ཡིག་འདི་བཀླགས་ཟིན་པ་ཡིན། བཀླགས་ཟིན་པའི་རྩོམ་ཡིག་འདིས་བོད་མི་རིགས་ཀྱི་ཁྲོད་དུ་ད་ལྟའི་འགྱུར་ལྡོག་གི་འཕོ་འགྱུར་གྱི་ཀྱོག་མཚམས་ཆེན་པོ་ཞིག་གསལ་བཤད་གནང་བར་མཐོང་སོང་ལ། འདི་ལྟ་བུའི་བསམ་བློ་མི་ཉུང་བ་ཞིག་དུས་རབས་འདིས་ན་གཞོན་དག་གི་སེམས་ཁོང་དུ་སླེབས་ཐུབ་པར་རེ་སྐུལ་ཀྱང་ཞུ་འདོད་བྱུང་སོང་།