ཕྱུགས་ཟོག་བཙོང་ན་བྱ་དགའ་སྟེར།

ཕྱི་ཟླ་ ༨ པའི་ཚེས་ ༢༣ ཉིན་རྒྱ་ནག་མི་དམངས་ཉིན་རེའི་ཚགས་པར་སྟེང་གནས་ཚུལ་སྤེལ་དོན། ཟླ་ ༨ པའི་ཚེས་ ༢༢ ཉིན། རྒྱ་ནག་གིས་དབུས་གཙང་ཁུལ་དུ་ “རྩྭ་ཐང་གི་སྐྱེ་ཁམས་སྲུང་སྐྱོབ་བྱེད་པར་བྱ་དགའ་སྟེར་བའི་ནང་རྐྱེན་གྱི་ཚོད་ལྟ་བྱེད་གནས་”ཟེར་བའི་ལས་གཞི་ཞིག་རྒྱ་གཞུང་གི་རྩ་འཛུགས་འོག་ནས་སྤེལ་མགོ་བཙུགས་ཡོད་པ་དང་། བྱ་དགའི་མ་དངུལ་ཡང་གཞུང་གི་ས་གནས་ནོར་སྲིད་ལས་ཁུངས་ཀྱིས་འགན་བླངས་ཏེ་ཐད་ཀར་མང་ཚོགས་ལ་སྟེར་རྒྱུ་ཡིན་ལུགས་བརྗོད་འདུག ལས་གཞི་དེ་ནི་འབྲོག་པ་རྣམས་ཀྱིས་རང་གི་འཚོ་བའི་རྟེན་གཞིར་གྱུར་བའི་སྒོ་ཕྱུགས་བཙོང་བར་སྐུལ་མ་གཏོང་ཐབས་ལ་དམིགས་པ་ཞིག་ཡིན་ལ། ཕྱུགས་རིགས་ཀྱི་ཆེ་ཆུང་ལྟར་རྟ་གཅིག་བཙོང་ན་སྐོར་ ༣༠༠ དང་། ནོར་གཅིག་ལ་སྒོར་ ༢༥༠ ། ལུག་གཅིག་ལ་སྒོར་ ༥༠ ། ར་མ་གཅིག་ལ་སྒོར་ ༤༠ བཅས་ཀྱི་བཅད་ཐིག་ལྟར་བྱ་དགའ་སྤྲོད་རྒྱུ་ཡོད་པ་མ་ཟད། ཕྱུགས་ཟོག་བཙོང་མཁན་གྱི་ཁྱིམ་ཚང་ལ་ཀུན་གསབ་རྒྱ་སྒོར་ ༡༠༠༠  རེ་སྤྲོད་རྒྱུ་ཡིན་པ་རེད། ཚོད་ལྟ་བྱེད་གནས་ཀྱི་རྫོང་ཁག་དག་ནི་དབུས་གཙང་ཁུལ་གྱི་འབྲོག་ལས་ཐོན་སྐྱེད་ལྟེ་བར་གྱུར་ཞིང་རྩྭ་སའི་ཐོན་ཁུངས་ལ་འཚོ་བའི་རྒྱབ་རྟེན་བཅོལ་ཡོད་པའི་འབྲོག་ཁུལ་དག་ཡིན་འདུག རྒྱ་ནག་ཉིན་རེའི་ཚགས་པར་གྱི་གསར་འགོད་པས་གསལ་བཤད་བྱས་པ་ལྟར་ན། བོད་ལྗོངས་ནི་རྒྱལ་ཡོངས་ཀྱི་རྩྭ་ཐང་གི་གཞི་ཁྱོན་ཆེས་ཆེ་བའི་ཞིང་ཆེན་ཡིན་པའི་ཆ་ནས། བོད་ལྗོངས་ཀྱིས་རྒྱལ་ཡོངས་ཀྱི་སྔོན་མ་བྱས་ནས་རྩྭ་ཐང་སྐྱེ་ཁམས་སྲུང་སྐྱོབ་བྱེད་པར་བྱ་དགའ་སྟེར་བའི་ནང་རྐྱེན་བཙུགས་པ་རེད་ཟེར།