ཆོས་འཛིན།
ད་ལོའི་བོད་ཁྱིམ་གྱི་འཛིན་རིམ་བརྒྱད་པའི་སྤྱི་སྙོམས་ཡིག་རྒྱུགས་ཆེན་མོའི་བོད་ཡིག་དྲི་ཤོག་དེས་ང་ཚོར་ཤེས་ཡོན་གྱི་འཐུས་ཤོར་ཐད་ནས་སླར་ཡང་སེམས་འཚབ་ཆེན་པོ་རེ་བསླངས་བྱུང་།
ངས་དྲི་ཤོག་དེ་མགོ་ནས་མཇུག་བར་དུ་ཐེངས་ཤིག་བཀླགས་པ་ཡིན། ཤོག་ངོས་དང་པོའི་སྒང་དེར། དྲི་བའི་བརྒྱ་ཆ་ཆ་འགོད། ལྟ་བུ་ཞིག་བྲིས་འདུག་ལ། མཐར་ཐུག་རེ་བ་སྒྲུབ་པར་ཤོག ཅེས་ཤོག་ངོས་མཐའ་མའི་མཇུག་དེར་རེ་སྨོན་གྱི་ཚིག་དེ་ཡང་གོ་རྒྱུ་མེད་པ་ཞིག་བྲིས་འདུག འདི་ལྟ་བུའི་ཡིག་ནོར་གྱི་རིགས་ནི་དྲི་ཤོག་དེའི་ཤོག་ངོས་ཚང་མའི་སྟེང་ན་རྒྱུན་ལྡན་དང་བག་ཡངས་ཀྱི་ཚུལ་དུ་འདུག
དཀའ་ངལ་ཆེ་ཤོས་དེ་ནི་དགེ་རྒན་གྱི་དྲི་བ་ནོར་བ་དང་ཡིག་ནོར་ལ་བསྟེན་ནས་སློབ་མ་ཚོའི་སྐར་གྲངས་ལ་དོ་ཕོག་འགྲོ་བཞིན་པ་དེ་རེད། ངས་ཐེངས་འདིའི་ཡིག་རྒྱུགས་ཀྱི་དྲི་ཤོག་ལ་ལྟ་མཁན་བོད་ཡིག་དགེ་རྒན་རེ་ཟུང་མཉམ་དུ་སྐད་ཆ་བཤད་པ་ཡིན། དགེ་རྒན་གཅིག་གིས་བཤད་དོན། བཤེས་སྤྲིངས་ནི་འཛིན་རིམ་བཅུ་བའི་སྐབས་སུ་གཞི་ནས་འཁྲིད་ཀྱིན་ཡོད་པ་རེད། ཡིན་ཡང་། ཐེངས་འདིའི་འཛིན་རིམ་བརྒྱད་པའི་ཡིག་རྒྱུགས་ཀྱི་དྲི་ཤོག་ནང་དུ་བཤེས་སྤྲིངས་ཀྱི་ཚིགས་བཅད་ཅིག་བཀོད་དེ། ཚིགས་བཅད་ཀྱི་ནང་དོན་ལ་གཞིགས་ཏེ་ཡིག་ཕྲེང་བཅོ་ལྔ་ལས་མི་ཉུང་བའི་རྩོམ་ཐུང་ཞིག་ཕྲིས་ཞེས་བཀོད་ལ། ཚིགས་བཅད་དེའང་ཇི་བཞིན་དུ་བཀོད་མེད་པར་ནང་ལ་ཡིག་ནོར་བྲིས་ཏེ་གོ་རྒྱུ་མེད་པ་ཞིག་ཏུ་བཏང་འདུག་སྟབས། སློབ་མ་ཚོ་འཐོམ་བསྡད་འདུག་ཟེར།
ཡང་། དོན་གནད་གཞན་ཞིག་ནི། འཕྲིན་ཡིག་གི་སྐབས། ལྷ་ས་ནས་ཡིན་པ་དགྲ་ལྷ་ཞུ་བ་ཞིག་ལ་ ༢༠༠༨ དང་ ༢༠༠༩ ལོའི་བཙན་བྱོལ་བོད་གཞུང་གི་གསུམ་བཅུའི་དུས་དྲན་དང་འབྲེལ་བའི་ལས་འགུལ་སྤེལ་བའི་ནང་ནས་གལ་ཆེའི་སྙིང་བསྡུས་ཤིག་ཕྲིས་ཞེས་མངགས་འདུག་ལ། གཏོང་ཡུལ་དེ་བཙན་བྱོལ་གྱི་སློབ་མ་ཞིག་ཡིན་པ་འདྲ། ཡིག་རྒྱུགས་ལ་ཞུགས་མཁན་གྱི་སློབ་མ་ཚོས། དགེ་རྒན་ཆེ་གེ་མོར། དྲི་བ་འདི་ནོར་འདུག ལྷ་སའི་སློབ་ཕྲུག་ཅིག་གིས་བཙན་བྱོལ་གྱི་གསུམ་བཅུའི་དུས་དྲན་སྐོར་འབྲི་ཁག་པོ་རེད། དེ་བས་འདི་ཕྱོགས་ཀྱི་སློབ་ཕྲུག་ཅིག་གིས་གསུམ་བཅུའི་དུས་དྲན་གྱི་སྐོར་བྲིས་ནས་ཕར་ལྷ་སའི་སློབ་ཕྲུག་དེར་བཏང་ན་ལན་པོ་ཡོད་པ་རེད་ཅེས་བཤད་ཀྱིན་འདུག་ཟེར། འདི་ནི་དྲི་ཤོག་བཟོ་མཁན་དགེ་རྒན་དང་ཡིག་རྒྱུགས་ལ་ཞུགས་མཁན་སློབ་ཕྲུག་གི་བར་གྱི་མ་མཐའི་གོ་རྟོགས་ཀྱི་གནས་བབ་ཙམ་རེད།
དེ་བཞིན་སྐབས་ཤིག་ཏུ། འོག་གི་ཚིག་རྣམས་ལ་ཡིག་འབྲུ་བཅུ་ལས་མི་ཉུང་བའི་ཚིག་སྒྲུབ་དོན་དང་ལྡན་པ་རེ་ཕྲིས་ཞེས་མངགས་པ་དང་། ཚིག་དེ་དག་གི་ཁོངས་སུ། ཁ་ཚ་དགོས་འདུག ཅེས་ཁ་ཚ་དགོས་གཏུགས་ཀྱི་དག་ཆ་ནོར་ནས་བྲིས་ཡོད་ལ། དགེ་རྒན་ཞིག་གིས་ཧབ་དགོད་དང་བཅས་བཤད་དོན། སློབ་མ་ཚོར་ཁག་མི་འདུག སློབ་ཕྲུག་ཅིག་གིས། ཟ་མ་བཟའ་དུས་ཁ་ཚ་དགོས་འདུག ཅེས་བྲིས་པ་དང་། ཡང་སློབ་ཕྲུག་གཞན་ཞིག་གིས། ཁྱིམ་ཚང་གི་ཨ་མ་ཚོ་ཁ་ཚ་དགོས་འདུག ཅེས་བྲིས་འདུག་ཟེར། སྐབས་འདིར་སློབ་ཕྲུག་ཚོར་སྐར་གྲངས་སྤྲོད་ཀྱི་ཡིན་ནམ་མིན།
དྲི་ཤོག་གི་ངོས་ཤིག་ཏུ། གཤམ་གྱི་ཚིགས་བཅད་འདི་ལ་འགྲེལ་བཤད་ཁ་གསལ་དོན་དང་ལྡན་པ་ཞིག་ཕྲིས་ཞེས་སྐུལ་ཞིང་། ཚིགས་བཅད་དེ་ཡང་།
མཁས་པ་ཐམས་ཅད་སློབ་པའི་དུས་ན་སྡུག །སྐྱིད་པོ་བྱས་པའི་ལོ་པན་རྒྱ་བོད་མེད། །འཇིག་རྟེན་པ་ནི་སློབ་མི་དགོས་ཏེ་ཤེས། །ཡོན་ཏན་མཁས་པའི་གོང་ན་ཡོད་པ་མིན། ། ཞེས་བྲིས་འདུག ཚིགས་བཅད་འདི་བཀླགས་རྗེས་ང་རང་ཡང་འཐོམ་སོང་། བཤད་ཚུལ་ལྟར་ན། དྲི་ཤོག་ལ་ལྟ་མཁན་དགེ་རྒན་ཚོ་ཡང་འཐོམ་སྟེ། མཐར་འདིའི་གོ་དོན་གང་ཡིན་མ་ཤེས་པར་དྲི་ཤོག་བཟོ་མཁན་ཁོ་རང་གི་ལན་ངོ་མ་དེར་ལྟ་དགོས་པར་གྱུར་ཟེར། གཤམ་དུ་ང་ཚོས་དྲི་ཤོག་བཟོ་མཁན་ཁོ་རང་གི་ལན་དེར་ཅིག་ལྟ། ཚིག་ལྷུག་ནི། བླང་དོར་འབྱེད་པར་མཁས་པའི་མཁས་པ་ཐམས་ཅད་ཡོན་ཏན་སློབ་པའི་དུས་ན་སྡུག ངལ་མེད་སྐྱིད་པོ་བྱས་པའི་ལོ་ཙཱ་བ་དང་པཎ་ཏ་ནི་རྒྱ་བོད་གང་ན་ཡང་མེད་དོ། འཇིག་རྟེན་པ་ནི་སློབ་མི་དགོས་པར་རང་བཞིན་གྱིས་ཤེས་པ་ཡིན་ལ་ཡོན་ཏན་ནི་མཁས་པའི་གོང་ན་ཡོད་པ་མ་ཡིན་ནོ། ཟེར།
རྣམ་པ་ཚོས་འདིའི་གོ་དོན་གསལ་བོ་ཞིག་རྟོགས་སོང་ངམ། སྤྱིར་ཤེས་ཡོན་འཐུས་ཤོར་གྱི་ཨག་སྐད་ཤོར་བཞིན་པའི་སྐབས་ཤིག་ལ་འདི་ལྟའི་གོ་རྒྱུ་མེད་པ་དག་བྲིས་ནས་ཡིག་རྒྱུགས་བླངས་བསྡད་ན་སློབ་ཕྲུག་འདི་ཚོར་བློ་སྐྱེད་ཅིག་ཡོང་གི་རེད་དམ།
ཨ་མ་ཡིན་དང་ཡིན། བོད་ཁྱིམ་སློབ་གྲྭའི་གློག་ཀླད་ཀྱི་སློབ་ཚན་ཞིག་ཡོད་སྐད་འདུག་ ཕན་ཐོག་ཡོད་པ་གང་ཡང་སློབ་ཀྱི་ཡོད་དང་ཁུངས་ཁྱོལ་བ་གང་ཡང་སློབ་ཀྱི་མ་རེད། དེ་ནི་ཁོང་ཚོའི་ཆོས་ཉིད་རེད།
དངོས་གནས་ཁྱད་མཚར་རེད། བོད་ཕྲུག་རྣམས་ལ་སློབ་སྦྱོང་ཡག་པོ་ཞིག་སྤྲད་རྒྱུ་དང་། འཛམ་གླིང་གང་དུ་བསྐྱོད་ཀྱང་མི་རིགས་གཞན་དང་དཔུང་པ་མཉམ་གཤིས་བྱེད་ཐུབ་ན་ང་རང་ཚོ་ལ་ཁེ་ཕན་ལས་གནོད་ཚབས་མེད་པ་ཧ་གོ་གསལ་རེད། ན་ལོ་བོད་ནང་ཟིང་འཁྲུགས་ཐོག་མར་ལངས་སྐབས་དེའི་པར་དང་གནས་ཚུལ་རྣམས་ཉིན་རེ་བཞིན་བཏང་མ་ཐུབ་པའི་རྒྱུ་མཚན་གང་ཡིན་ལབ་དུས་ཀྱང་། ང་ཚོ་རྒྱ་གར་སློབ་གྲྭ་སོགས་སུ་བསྡད་སྐབས་དྲྭ་གནས་གཏོང་སྟངས་སྐོར་སློབ་སྦྱོང་སྤྲད་མ་སོང་ཟེར་གྱིས།
ད་དུང་དེ་དག་ག་ལ་ཚད། བོད་ཁྱིམ་སློབ་གྲྭའི་སློབ་ཕྲུག་རེར་སྦྱིན་བདག་གསུམ་བཞི་ཡོད་པ་ཡོངས་གྲགས་རེད། ཡིན་ནའང༌། ལོ་སྔོན་མ་ནས་བཟུང་སློབ་ཕྲུག་ཚོར་སྒྲིག་ཆས་རག་གི་མེད་ཅིང༌། སོ་སོའི་ནང་མི་སྤུན་མཆེད་ཡོད་ན་བཟོས་སྟེ་མཁྱེར་ཤོག་ཟེར་ཡོད་པ་རེད། གལ་སྲིད་འཛིན་གྲྭར་འགྲོ་དུས་སྒྲིག་ཆས་མེད་ན་སློབ་གྲྭའི་གཞུང་གི་བཟོ་མ་སོང་ཟེར་ས་མེད་ཅིང༌། འབྲེལ་ཡོད་དགེ་རྒན་སོགས་ནས་བཙན་དབང་གི་སྒྲིག་ཆས་མེད་ན་གྱོན་ཤོག་ཟེར་གྱི་ཡོད་པ་རེད། དེ་ལྟ་བུ་སྦྱིན་བདག་གི་རེ་རེའི་དངུལ་དེ་དག་ག་འདྲ་བེད་སྤྱོད་གཏོང་གི་ཡོད་མེད་ཐེ་ཚོམས་ཀྱི་གནས་སུ་གྱར། སྤྱིར་བོད་ཁྱིམ་སློབ་གྲྭ་དངུལ་རྩིས་གཙང་མ་ཡོད་པའི་ཚོགས་པ་ཞིག་མིན་ལ། མི་ལོ་ཉི་ཤུའི་སྔོན་ལ་དངུལ་རྩིས་སྐོར་དཀའ་ངལ་དུ་མ་འཕྲད་ཡོད་པ་ཡོངས་གྲགས་རེད།
ཁྱོད་རྣམས་ཀྱིས་བོད་ཁྱིམ་སློབ་གྲྭའི་སྐོར་གསུང་དུས། ང་རང་གིས་ཀྱང་ཚིག་ཁ་ཤས་ཞུ་འདོད་བྱུང་། ང་རང་ད་ལོ་སྦེར་སུ་ཇ་སློབ་གྲྭར་ཕྱིན་པ་ཡིན། དེར་སློབ་ཕྲུག་ངོ་ཤེས་གཅིག་གིས་སློབ་གྲྭར་ད་ལོར་ཁ་ལག་ཡག་པོ་མེད་རབས་དང་། བོད་ནས་གསར་དུ་སློབ་སྦྱོང་གི་ཆེད་དུ་ཡོང་མཁན་མང་པོ་ཞིག་ཡིག་རྒྱུགས་མ་འཕྲོད་པར་ཕ་ཡུལ་དུ་ལོག་དགོས་པ་དང་། ཟ་ཁང་སོགས་སུ་གཡོག་པོའི་ལས་ཀ་མ་རག་པའི་དཀའ་ངལ་ནི་དམྱལ་བ་ལྟ་བུ་འདུག་ཅེས་ཟེར། ཕ་ཡུལ་དུ་ལོག་ན་སློབ་སྦྱོང་མེད་པ་དང་། རྒྱ་ནག་གིས་དོག་པའི་མི་སྣར་གྱུར་པ་སོགས་ཀྱི་བུ་མོ་མང་པོ་ཞྀག་ནི་འཁྱམས་པོ་ཆགས་ཀྱི་ཡོད་འདུག རྒྱུ་མཚན་དེ་ལ་བརྟེན་ནས་བོད་ནས་འབྱོར་མཁན་རྣམས་ཀྱི་ཚད་གཞིར་བལྟས་ནས་སློབ་སྦྱོང་སྤྲད་དགོས་པ་ལས་བཙན་དབང་གིས་ཚད་མཐོ་པར་སློབ། མ་ཤེས་དུས་སློབ་གྲྭ་ནས་ཕྱིར་ཕུད་བཏང་པ་སོགས་ནི་བཙན་བྱོལ་ཞིག་གིས་ལས་ཀ་ནི་མ་མཐོང་ངོ།
འཛིན་རིམ་བརྒྱད་པའི་བོད་ཡིག་དྲི་ཤོག་དང་།།
ཟིན་བྲིས་པ་དང་བསམ་ཚུལ་སྤེལ་མཁན་གྱི།།
ང་དང་ཁྱོད་དང་ད་དུང་ཁོང་ཚོ་སྟེ།།
མང་པོ་ཞིག་གིས་ཡིག་ཚད་འདི་འདྲ་ཡི།།
རྩོམ་ཡིག་བསམ་ཚུལ་གང་བྱུང་སྤེལ་མུས་ལ།།
ཉེན་བརྡ་ཙམ་ནི་གཏོང་མཁན་དགོས་ནས་འདུག།
ཧཧཧ་་་ཧཧཧཧ་
ང་རང་ཐེ་བའི་མང་པོ་ཞིག་ནི་འཛིན་རིམ་བརྒྱད་པ་དང་དེའི་མན་ན་འདུག་གོ།
འཇིག་རྟེན་པ་ནི་སློབ་མི་དགོས་ཏེ་ཤེས། །ཡོན་ཏན་མཁས་པའི་གོང་ན་ཡོད་པ་མིན། །
དངོས་གནས་ཉྭ་འདར་དགོས་བ་ཞིག་བྲིས་འདུག
གྲོགས་པོ་ཚོ། གནད་དོན་གླེང་ན་ཆོས་འཛིན་གྱི་གླེང་སྟངས་ལྟར་གླེང་དགོས་པ་རེད། ཁོས་གང་ཟག་སྒེར་དང་ཚོགས་པ་སྒྲིག་འཛུགས་ནག་པོར་བཟོ་འདོད་ཀྱི་དབང་གིས་དགའ་མི་དགའི་སྐད་ཆ་བཤད་མི་འདུག དོན་དངོས་གང་ཡིན་པ་དེ་རེ་རེ་བཞིན་བྲིས་རྗེས་ཀློག་མཁན་ཚོར་དཔྱད་ཞིབ་ཏུ་བཞག་འདུག
ཁྱེད་ཚོས་ཀྱང་བསམ་ཚུལ་འདོན་དུས། དཀའ་ངལ་གང་དུ་འཕྲད་འདུག དེ་སེལ་ཐབས་ཅི་ཞིག་འདུག ཡང་ན། དཀའ་ངལ་ལ་ངོས་འཛིན་སྟངས་མི་འདྲ་བ་འདྲ་ཡོད་ན་དེ་དག་གསལ་བོར་བཤད་དགོས་པ་རེད། ག་དུས་ཡིན་ན་གང་ཟག་སྒེར་བ་ཞིག་གི་ཐོག་ལ་བསྐོར་ནས་མུག་བཤད་རྒྱག་གིན་པ་འདི་ཡག་རྟགས་ཤིག་ཁྱོན་ནས་མ་རེད།
ཧ་གོ་ཡི་ཡོད་ལ་དོན་རྟོགས་ཀྱི་ཡོད། ངས་དངོས་བདེན་གཞིར་བཞག་ནས་སྐད་ཆ་བཤད་ཀྱི་ཡོད་ལ། ཐོགས་མ་ཤེས་ཡོན་སྲིད་ཇུས་དེ་གཏན་ལ་མ་ཕེབས་གོང་ནས་ཤེས་ལྡན་མི་སྣ་དང་མང་ཚོགས་ནང་བསམ་ཚུལ་ཇི་ཡོད་མ་གོ་མ་ཐོས་མེད་པ་རང་གཞུང་གི་ཡང་ནས་ཡང་དུ་གསལ་བསྒྲགས་བྱས་ཡོད་པ་རེད། དེ་དུས་བློ་གྲོས་རྒྱལ་པོ་དང་ཆུང་ཚང་ཁྱེད་གཉིས་མགོ་དོང་ན་བཅུག་ཏེ་བསྡད་པ་ཡིན་ནམ་ཡང་ན་དབང་པོ་སྣ་ལྔ་མ་ཚང་པའི་གང་ཟག་ཡིན། གང་ལྟར་ད་ལྟའི་སྐབས་སུ་བོད་གཞུང་གི་ཤེས་ཡོན་སྲིད་ཇུས་ལ་སྤྱི་ཚོགས་ནང་བཟང་ཕྱོགས་ཀྱིས་ངོས་ལེན་ཡོད་པ་ཞིག་ཕྱོགས་མང་པོ་ནས་ཇི་གསལ་དུ་འགྲོ་ཡི་ཡོད། དཔེར་ན་བོད་གཞུང་གི་ཤེས་ཡོན་སྲིད་ཇུས་ལག་བསྟར་བྱེད་ས་གཙོ་བོ་མེ་དབོན་དཔེ་སྟོན་གཙུག་ལག་སློབ་གཉེར་ཁང་ལ་ཆ་མཚོན་ན་སློབ་འཇུག་དུས་སྐབས་ཚ་ཚ་འུར་འུར་ཀྱིས་སློབ་ཕྲུག་ཚུད་ཐབས་བྱེད་ཀྱི་ཡོད་པ་དང༌། ད་དུང་སློབ་ཕྲུག་མང་པོ་ཞི་རྒྱུ་རྐྱེན་དུས་མས་དབང་གིས་མི་ཚོད་པའི་དཀའ་ངལ་འཕྲད་གྱི་ཡོད། དེ་ཡང་ཁྱེད་གཉིས་ཀྱིས་དབང་པོ་ཐང་ཐང་ཡིན་མཁྱེན་ཡོད་ཚོད་རེད། དངོས་ཡོད་གནས་ཚུལ་ལ་ཁྱད་བསད་བྱས་ན་ཤེས་ལྡན་པ་ཞིག་མིན་ལ། ང་མི་རིགས་ཀྱི་ལ་རྒྱ་དང་རང་གི་རིག་གཞུང་ལ་ཡིད་ཆེས་དང་གདེང་འཇོག་ཡོད་པའི་ཆ་ནས་ཤེས་ཡོན་སྲིད་ཇུས་འདི་ཚད་ལྡན་དང༌། འབྱུང་འགྱུར་མི་རབས་གསར་པ་རྣམས་ལ་རང་གི་རིག་གཞུང་འདི་རྩ་ཆེན་དང་གཏིང་ཟབ་པོ་གང་འདྲ་ཡོད་པའི་ངེས་པ་རྙེད་ཐུབ་པའི་ལམ་སྟོན་གྱི་སྒྲོན་མེ་ཞིག་ཡིན་པ་མ་ཟད། སྲིད་ཇུས་འདི་དོན་འཁྱོལ་དང་རྒྱུན་གནས་ཐུབ་པའི་ངོ་འཛིན་དང་ཡིད་ཆེས་ཀྱང་བྱེད་ཀྱི་ཡོད། ང་ཚོ་ད་བར་མི་ལྔ་ཅུའི་རིང་ཤེས་ཡོན་སྲིད་ཇུས་ཞིག་གཏན་འབེབས་དང་ལག་བསྟར་བྱེད་ཐུབ་མེད་པ་དེ་ང་ཚོའི་རྒྱལ་ཁབ་དང་མི་རིགས་ལ་འཕྲད་པའི་གྱོང་གུན་ཆེན་པོ་ཞིག་ཡིན་པ་བཤད་མ་དགོས་པ་རེད། གལ་སྲིད་ཁྱེད་གཉིས་ཤེས་ཡོན་སྲིད་ཇུས་ལ་འདོད་བློ་ཁང་གི་མེད་ན། གོ་སྐབས་ཡོད་དུས་མ་བཤད་པར་དྲ་ཐོག་ལ་སྡུག་རོ་འཕང་དང་མ་འཕང་གི་ཁྱད་གང་ཡང་བཟོ་ཐུབ་ཀྱི་མ་རེད།
གསང་གཏོར་ལགས། སྤྱིར་འཇིག་རྟེན་པའི་བྱ་བ་དང་གནས་ལུགས་འགའ་ཞིག་རྩ་བའི་གནས་བབ་ལ་མ་བསྟུན་ཐབས་མེད་ཡིན་པས། སྣང་ཚུལ་ལས་ལྡོག་ཕྱོགས་ཤིག་ན་ཡོད་པ་ཡང་གནས་ལུགས་ཤིག་ཡིན། གལ་སྲིད་ཁྱོད་གནས་ལུགས་ལ་ཡིད་ཆེས་ཡོད་མཁན་ཞིག་ཡིན་ན་ཤེས་ཡོན་སྲིད་བྱུས་གསར་བས་ཅི་ཙམ་ཁོངས་ཆོད་པའི་གདེང་ཚོད་ཅིག་ད་དུང་ང་ཚོར་མེད་པ་ཤེས་གསལ་རེད། དེ་བས་ང་ཚོའི་གོམ་པ་རིམ་འཛེག་བྱས་ནས་ནམ་ཞིག་གནས་བབ་དང་དགོས་མཁོར་གཞིགས་རྒྱུ་དེ་གནས་ལུགས་ཤིག་མ་རེད་དམ།
སྐུ་ཞབས་གསང་གཏོར་ལགས། རྩམ་སྐྱ་གནམ་ལ་སྟོར་བསྡད་པ་ལས་དོན་དངོས་ཀྱི་གནས་ཚུལ་ཞིག་གསུངས་ན་མི་དགའ་འམ། ཁུངས་མ་འཁྱོལ་པའི་ཤེས་ཡོན་སྲིད་ཇུས་ཟེར་བ་དེ་འདྲ་ཁས་བླངས་ནས་མི་རབས་རྗེས་མ་ལ་ཕན་ཐོགས་གང་ཡོད་གསུངས་དང་། སེར་མོ་བའི་སྤྱི་ཚོགས་ཀྱིས་ལོ་ངོ་སྟོང་ཙམ་རིང་ལ་ལག་ལེན་གྱིས་ཁུངས་མ་འཁྱོལ་བར་ད་ནི་ཚན་རིག་དང་དཔུང་བ་མཉམ་གཤིབ་བྱེད་ཀྱི་ཡིན་ཟེར་བ་ལྟ་བུས་དེང་དུས་ཤེས་ཡོན་ལ་དང་དོད་ཆེ་རུ་འགྲོ་བཞིན་ཡོད་པ་མ་ཡིན་ནམ། ཨ་མ་རྗེ་བཙུན་པདྨ་ལྟ་བུ་བྱས་པ་ཅན་ཞིག་བོད་པའི་སྤྱི་ཚོགས་སུ་བྱུང་མྱོང་མེད་ཅེས་ཁ་མཚོན་བཅད་ཀྱང་མ་འགྲིག་པ་མེད་པ་ཞིག་ལ་ཁ་བཏང་རྒྱུ་བཞག་ན་མི་དགའ་འམ།
བོད་ཁྱིམ་སློབ་གྲྭའི་བོད་ཡིག་གི་གནས་ཚད་ལ་སྐྱོན་སྟོན་དགོས་ན་སྟོན་ཚོད་ཡོད་མ་རེད། གང་ཡིན་ཟེར་ཟེར། རྗེ་བཙུན་པདྨ་མོ་རང་ཡང་བོད་ཡིག་ཤེས་ཀྱི་མེད་ཟེར་ནས་སྤོབས་བྱེད་མཁན་ཞིག་རེད། བོད་གཞུང་གི་ཤེས་ཡོད་སྲིད་ཇུས་ཡང་ངོ་ལེན་རྩ་ནས་མེད་ཟེར་ཏེ་རྒྱལ་སྤྱིའི་ནང་ཁྱབ་བསྒྲགས་བྱེད་ཚར་རེད།། དེ་ཚོ་མང་མ་བོད་ཀྱི་ཨ་མ་རྗེ་བཙུན་པདྨའི་གཟི་བརྗིད་དང་བྱས་རྗེས་ཡིན་པ་རྣམ་པ་མཁྱེན་གྱི་ཡོད་ཤག
དྲ་ཤོག་བཟོ་མཁན་དགེ་རྒན་དེར་ཁག་མི་འདུག ད་བར་དུ་འདི་འདྲའི་སྐྱོན་དམིགས་སུ་བཀར་ནས་སྟོན་མཁན་མེད་པའི་རྐྱེན་གྱིས་ཡིན་པ་འདྲ།
གོང་རིམ་ནས་བཀའ་མངགས་པ་ན་ཁོས་དྲི་ཤོག་བཟོ་མི་ཤེས་ཞེས་ཀྱང་བཤད་ཐུབ་མདོག་ཁ་བོ་མ་རེད། དེར་བརྟེན། རྔུལ་ནག་ཁྲོམ་ཁྲོམ་དུ་བཞུར་བཞིན་དྲི་ཤོག་འདི་བཟོས་པ་ཡིན་རྒྱུ་རེད།
གཙོ་བོ་བོད་ཁྱིམ་གྱི་དབུ་འཛིན་ཚོར་བོད་ཡིག་གི་ཚད་གཞི་ཡག་པོ་མེད་སྟབས། འོག་གི་དགེ་རྒན་ཚོའི་བོད་ཡིག་གི་ཚད་གཞིར་ངོས་འཛིན་བྱ་མི་ཐུབ་པ། དེ་མ་ཐུབ་པར་བརྟེན་དྲི་ཤོག་བཟོ་མཁན་གྱི་དགེ་རྒན་བདམས་མ་ཤེས་པ་ཡིན་རྒྱུ་རེད། ཕལ་ཆེར་འདི་འདྲ་ཞིག་ལ་ཐུག་མེད་འགྲོ་སྙམ།
དྲ་གྲོགས་ཆོས་འཛིན་ལགས། དངོས་གནས་ཐུགས་རྗེ་ཆེ་ཞུ་རྒྱུ་ཡིན། འདི་དང་འདི་འདྲ་བའི་སྤྱི་ཚོགས་ནང་གི་ཞན་ཆ་རྣམས་ཐེར་འདོན་བྱེད་རྒྱུ་དེ་ང་ཚོ་མི་རེ་ངོ་རེ་ལ་འགན་ཡོད་པ་ཞིག་རེད། ལྷག་པར་དུ་སློབ་གྲྭའི་ཁོར་ཡུག་ཅིག་གི་ནང་དུ་གནས་ཚུལ་འདི་ལྟ་བུ་བྱུང་བ་ནི་སོ་སོའི་འགན་ལས་ཐོབ་ཐང་གཙོ་འདོན་བྱེད་མཁན་གྱི་མི་བུ་དག་ཡིན་ལ། ང་ཚོའི་དུས་ནམ་ཡང་ངོ་རྒོལ་བྱེད་དགོས། ད་དུང་ས་ར་སློབ་གྲྭའི་ནང་དུ་འང་གནས་ཚུལ་དེ་དང་འདྲ་བོ་འབྱུང་བཞིན་ཡོད་པ་འདྲ།