ང་ལ་ཆ་མཚོན་ནའང་ང་རང་བོད་པ་ཞིག་ཡིན་པའི་ཆ་ནས་སྤོབས་པ་ཡོད། ཁྱེད་རང་ཚོ་ཡིན་ནའང་སྤོབས་པ་སྐྱེ་དགོས་ཀྱི་རེད། གཞིས་སྡོད་བོད་མི་ཚོས་ང་ཚོར་རྒྱ་ནག་གིས་བཙན་གནོན་དང་བཤུ་གཞོག་གང་འདྲ་ཞིག་བྱེད་ཀྱང། ང་ཚོས་བདེན་མཐའ་ལས་ནམ་ཡང་ཕྱིར་བཤོལ་མི་བྱ་ཞེས་སེམས་ཤུགས་ཆེན་པོས་བཤད་ཀྱི་ཡོད་པ་རེད། འདིར་ཡོད་ང་ཚོས་ཀྱང་བོད་དོན་དེ་ནམ་ཡང་འདོར་རྒྱུ་ཡོད་པ་མ་རེད། གལ་སྲིད་འདོར་རྒྱུའི་བསམ་པ་ཡོད་ན་དེ་ནི་དངོས་གནས་ངོ་ཚ་དགོས་པ་ཞིག་རེད།
རེས་གཟའ་ཉི་མའི་ཉིན་རྒྱ་གར་རྒྱལ་ས་ལྡི་ལིའི་ཏ་ཇི་གསོལ་མགྲོན་ཁང་དུ། བོད་གཞུང་སྐུ་ཚབ་དོན་གཅོད་ཁང་གི་གོ་སྒྲིག་འོག་ལྡི་ལིར་བཅའ་སྡོད་བོད་མི་ཆེད་ལས་པ་ ༤༠ ལྷག་ནས་༸གོང་ས་མཆོག་དང་བཀའ་ཁྲི་ཟམ་གདོང་རིན་པོ་ཆེར་མཇལ་ཁ་ཞུས་ཡོད་པ་རེད། ཁོང་ཚོ་ནི་ལྡི་ལིར་གསར་འཛུགས་བྱས་པའི་རྒྱལ་སྤྱིའི་བོད་རིགས་ཆེད་ལས་པའི་འབྲེལ་མཐུད་ཅེས་པའི་ཚོགས་མི་ཡིན་ཞིང་། ད་ལྟའི་ཆར་རྒྱ་གར་དང། བྱང་ཨ་མི་རི་ཀའི་བོད་རིགས་ཆེད་ལས་པ་མང་པོ་ཞིག་ཏུ་ཡན་ལག་ཚོགས་པའང་ཡོད་འདུག ཡར་རྒྱས་འགྲོ་མུས་ཡིན་པ་རེད། ཐེངས་འདིའི་མཇལ་ཁའི་རིང་ཚོགས་མི་ཚོས་༧གོང་ས་མཆོག་ལ་ཚོགས་པ་གསར་པའི་ངོ་སྤྲོད་དང་། ལས་གཞི་སྤེལ་ཟིན་པ་མཐའ་དག་སྙན་སྒྲོན་ཞུས་ཡོད་ཅིང། ༸གོང་ས་མཆོག་གིས་འདུ་འཛོམས་བྱས་པའི་མི་མང་ལ་བཀའ་སློབ་ལམ་སྟོན་གནང་དོན། ཁྱེད་རང་ཚོ་ཆེད་ལས་པ་ཞིག་གི་ངོས་ནས་ཆ་མཚོན་ན། ཁྱེད་ཚོས་བོད་མི་ཚང་མའི་ངོ་ཚབ་བྱས་ཏེ་ལས་ཀ་བྱེད་དགོས་པ་དེ་གལ་ཆེན་རེད། མི་རིགས་གཞན་ཚོས་ཀྱང་བོད་མི་དེ་ཚོ་དྲང་པོ་དང་། ཡིད་ཆེས་བློས་འགེལ་བྱེད་ས་ཞིག་ཏུ་བརྩི་གི་ཡོད་པ་རེད། དེ་འདྲ་ཡིན་དུས་ཁྱེད་རང་ཚོས་དུས་ནམ་ཡང་ཡིད་ཆེས་དེ་དམ་འཛིན་བྱེད་དགོས་པ་རེད། ཆེད་ལས་པ་ཞིག་གི་མི་ཚེ་སྐྱེལ་ཕྱོགས་ཀྱི་ཆ་ནས་བཤད་ནའང། དྲང་བདེན་དང་ཡིད་ཆེས་ཡོད་དགོས་རྒྱུ་དང། ཡོང་དགོས་རྒྱུ་དེ་ཞེ་དྲག་གི་གལ་ཆེན་པོ་རེད། དྲང་བདེན་གྱི་ལངས་ཕྱོགས་དེའི་ནང་ཐོག་དང་པོར་དཀའ་ངལ་དང། ཐོབ་ཤོར། མི་སྐྱིད་པ་མང་པོ་ཞིག་ཡོང་རྒྱུ་བཤད་མི་དགོས་པ་རེད། ཡིན་ཡང་དུས་ཚོད་གང་འཚམ་གྱི་རྗེས་ལ་དྲང་བདེན་དེས་ཁྱེད་ཚོར་རྒྱལ་ཁ་སྟེར་ངེས་རེད། དེ་འདྲ་ཡིན་དུས་ཚང་མས་མི་ཚེ་དྲང་བདེན་གྱི་ལམ་ནས་སྐྱེལ་དགོས་རྒྱུ་གལ་ཆེན་པོ་རེད། ལས་དོན་གང་འདྲ་ཞིག་བྱ་རྒྱུ་དང། གང་ཞིག་བྱས་པ་ཐམསཅད་ཐུག་ས་གཙོ་བོ་དངུལ་མ་རེད། སྤྱི་ཚོགས་ཀྱི་དགོས་འདུན་དང་དཀའ་ངལ་གང་འདུག་པ་དེར་བལྟས་ཏེ། དེ་དག་གི་དགོས་འདུན་བསྐང་ཕྱིར་ལས་དོན་རེ་བྱས་ན། དེས་རང་གཞན་ཐམས་ཅད་ལ་ཕན་ཐོགས་ཀྱི་རེད། ཁྱེད་རང་ཚོས་རང་ཉིད་ཀྱི་ལས་ཀར་ལྷག་བསམ་རྣམ་དག་དང། དྲང་པོ་ཞིག་ཡོད་དགོས་རྒྱུ་གལ་ཆེན་པོ་རེད། སོ་སོས་སོ་སོ་བོད་མི་གཙང་མ་ཞིག་ཡིན་པ་ཤེས་པའི་ཐོག་ནས་བོད་ཀྱི་རིག་གཞུང་དང། ལེགས་བྱང་། སྐད་ཡིག་སོགས་ཆད་པ་མེད་པར་སྦྱངས། དེའི་ཐོག་ཏུ་དེང་དུས་ཀྱི་ཚན་རྩལ་གྱི་ཤེས་ཡོན་དེ་དག་ཤེས་པར་བྱས་ཏེ། དེང་དུས་ཀྱི་བོད་མི་ཚད་ལྡན་ཞིག་དང་། འགན་འཁུར་ཐུབ་མཁན་གྱི་མི་ཞིག་ཆགས་རྒྱུ་གལ་ཆེན་པོ་རེད། ང་ལ་ཆ་མཚོན་ནའང་ང་རང་བོད་པ་ཞིག་ཡིན་པའི་ཆ་ནས་སྤོབས་པ་ཡོད། ཁྱེད་རང་ཚོ་ཡིན་ནའང་སྤོབས་པ་སྐྱེ་དགོས་ཀྱི་རེད། གཞིས་སྡོད་བོད་མི་ཚོས་ང་ཚོར་རྒྱ་ནག་གིས་བཙན་གནོན་དང་བཤུ་གཞོག་གང་འདྲ་ཞིག་བྱེད་ཀྱང། ང་ཚོས་བདེན་མཐའ་ལས་ནམ་ཡང་ཕྱིར་བཤོལ་མི་བྱ་ཞེས་སེམས་ཤུགས་ཆེན་པོས་བཤད་ཀྱིན་ཡོད་པ་རེད། འདིར་ཡོད་ང་ཚོས་ཀྱང་བོད་དོན་དེ་ནམ་ཡང་འདོར་རྒྱུ་ཡོད་པ་མ་རེད། གལ་སྲིད་འདོར་རྒྱུའི་བསམ་པ་ཡོད་ན་དེ་ནི་དངོས་གནས་ངོ་ཚ་དགོས་པ་ཞིག་རེད། མ་རེད་དམ། དེ་འདྲ་ཡིན་དུས་སོ་སོ་བོད་མི་ཞིག་ཡིན་པའི་ཆ་ནས་སྤོབས་སེམས་དང། དགའ་བ་ཡོད་དགོས་པ་རེད་ཅེས་བཀའ་སློབ་གནང་ཡོད་པ་རེད།
དེའི་རྗེས་ཚོགས་མི་ཚོས་༧གོང་ས་མཆོག་ལྷན་དུ་སྐུ་པར་སྒྲོན་རྗེས་ཆེད་ལས་པ་རྣམ་པའི་ཚོགས་འདུ་ཚོགས་ཡོད་པ་རེད། ཁོང་རྣམས་ཀྱི་ཁྲོད་དུ་ཁྲིམས་རྩོད་པ་དང་སྨན་པ། འཛིན་སྐྱོང་གི་ཕྱག་ལས་ལ་ཆེད་ལས་ཐོན་མཁན་སོགས་ལས་རིགས་འདྲ་མིན་གྱི་མི་སྣ་འདུས་ཡོད་པ་རེད།
དྲ་གྲོགས་བསེ་རུ་ལགས།
ཉིད་ཀྱིས་ཕྲན་གྱི་ཟིན་བྲིས་འབྲི་སྟངས་ལ་རྒྱབ་སྐྱོར་བྱས་པས། སེམས་ཤུགས་ཀྱི་སྐུལ་མ་ཆེན་པོ་ཞིག་ཏུ་གྱུར་སོང་། དེས་ན། རྗེས་ཕྱོགས་ཟིན་བྲིས་འབྲི་དུས་ངེས་པར་དུ་གཟབ་གཟབ་དང་རིག་པ་བསྒྲིམ་ངེས་ཡིན་ལགས། ད་དུང་ངའི་བསམ་ཚུལ་ཡིན་ན། ཕན་ཚུན་ངོ་ཤེས་མིན་གཙོ་བོ་ཞིག་མ་རེད་སྙམ། དང་ཐོག་ང་ཚོའི་རྩ་དོན་ཐོག་ཏུ་ཆིག་སྒྲིལ་དང་སྐད་ཡིག་བཀོལ་སྤྱོད་ཀྱི་གཞི་རྒྱ་ཆེ་གཏོང་ཐུབ་སོང་ན། ང་ཚོའི་རིགས་མཐུན་དུ་གྱུར་པའི་སྤུན་འཕྲལ་ཕུགས་ཀྱི་དགོས་དམིགས་འགྲུབ་ཐག་ཉེ་རུ་བཏང་བ་ཞིག་རེད།
༸ གོང་ས་མཆོག་གིས་ཁྱེད་ཚོར་པོད་ཡིན་པའི་སྤོབས་པ་སྐྱེ་དགོས་ཀྱི་རེད་ཅེས་བཀའ་སློབ་ཟབ་མོ་ཞིག་བསྩལ་འདུག་པ་དེ་དགོས་འབྲེལ་གལ་ཆེན་པོ་ཞིག་རེད་འདུག
མི་རིགས་ཀྱི་ལ་རྒྱ་དང་འབྲེལ་བའི་བཀའ་སློབ་འདི་གོ་མ་ཐག་ཏུ་ངས་མའོ་ཙེ་ཏུང་གིས་གསུངས་པའི་བསླབ་བྱ་ཞིག་ཡིད་ལ་གློ་བུར་དུ་ལྷང་ངེར་དྲན། དེ་ནི་འདི་ལྟ་སྟེ། མི་རིགས་ལ་ལྟ་བ་མེད་ན་མི་དེ་ལ་བླ་སྲོག་མེད་པ་དང་གཅིག་པ་ཡིན། ཞེས་པ་དེ་དང་གཅིག་མཚུངས་སུ་གསུངས་འདུག
བོད་མི་སུ་ཞིག་ཡིན་ནའང་སོ་སོའི་མི་རིགས་ཀྱི་ལ་རྒྱ་དང་། རྒྱལ་ཞེན། སྤོབས་པ་བཅས་ངེས་པར་དུ་ཡོད་དགོས་མི་རིགས་ཀྱི་སྤོབས་པ་མེད་ན་སྲོག་མེད་ཀྱི་བེམ་པོ་དང་འདྲ་བར་བོད་མི་རིགས་ཀྱི་སྐྱེ་གོ་ཆོད་མེད།
ཆེད་ལས་པ་ཟེར་བ་དེ་གལ་ཆེན་པོ་རེད། ཡིན་ནའང་དེང་སང་བོད་པའི་ཆེད་ལས་པ་ཞིག་ལ་ལྷག་བསམ་དང་མི་རིགས་ཀྱི་ལ་རྒྱ་ག་ཚོད་ཙམ་ཡོད་མེད་བཤད་དཀའ་བའི་གནད་དོན་ཞིག་ཆགས་འདུག ང་ཚོའི་སྤྱི་ཚོགས་ནང་ཆེད་ལས་ཡོད་བདེན་པ་རེད། རང་མི་རིགས་ཀྱི་བདེ་སྡུག་དང་སྤྱི་ཚོགས་ཀྱི་ཆེད་དུ་ལས་དོན་ཐུབ་པའི་ཆོད་སེམས་མེད་ན། ཆེད་ལས་མཁས་པ་ག་ཚོད་ཡིནའང་ཧང་སང་རྒྱུ་ཅི་ཡང་མེད། ཆེད་ལས་དེ་དག་མང་ཆེ་བ་ཞིག་རང་མི་རིགས་ཀྱི་རིག་གནས་དང་ལ་རྒྱ་མེད་པའི་ཤ་ཏག་ཡིན་པ་ཚོར་སྣང་ཡོང་གི་འདུག
༧བླ་མའི་འཛད་མ་བསམ་མི་ཁྱབ།
སློབ་མའི་མིང་འཛིན་ང་ཚོ་ཡིས།།
བསྐལ་བ་སྲིད་མཐའི་བཤད་དཀའ་ཡང་།།
ཚེ་ཐོག་འདི་ལ་བོད་མ་བརྗེད།།
བརྩེ་དུང་གི་རྒྱལ་སྲས་ལགས།
ངས་ཉིད་ཀྱི་མཚན་དེ་སྔར་ནས་ཐོས་མྱོང་འདུག
འོན་ཀྱང་ངས་ཤེས་པའི་བརྩེ་དུང་གི་རྒྱལ་སྲས་དེ་ཡིན་མིན་ད་དུང་ཐེ་ཚོམ་དུ་གྱུར།
ཡི་གེའི་དག་ཆ་ཁག་དག་མོ་ཞིག་བྲིས་འདུག་པས། འདི་ནི་ཧ་ཅང་བསྔགས་འོས་ཀྱི་གནས་སུ་མཐོང་། ད་དུང་འདི་འདྲའི་བསམ་ཚུལ་སོགས་སྤེལ་སྐབས་ཡིག་སྡེབ་དག་མ་ཞིག་སྤེལ་དང་།
དེ་ནི་རང་ཉིད་ཀྱིས་བོད་མི་རིགས་ལ་བཞག་པའི་ལག་རྗེས་ཤིག་ཀྱང་རེད་སྙམ།
ང་ཚོའི་བོད་མི་རིགས་ཀྱི་བྱུང་རབས་ལོ་རྒྱུས་ནང་དུ་བྱུང་མྱོང་མེད་པ་དང་ད་ལྟའང་ཁ་སྟབས་ཧ་ཅང་ཞན་པའི་དུས་ཚིགས་འདིར་དང་། མ་འོངས་པའང་འབྱུང་བར་དཀའ་བ་དང་རྙེད་པར་དཀའ་བའི་ཆེས་བླ་ན་མེད་པའི་དབུ་ཁྲིད་གཅིག་པུར་ངེས་པའི་༸ཡིད་བཞིན་ནོར་བུ་རིན་པོའི་རླབས་ཆེན་གྱི་དགོངས་གཞི་དང་ཟབ་བརླིང་ལྡན་པའི་ལམ་སྟོན་དག་གི་སྣེ་མོར་འཁྱུད་པའི་རིགས་མཐུན་སྤུན་ཟླ་ཡོངས་ཀྱི་རྣམ་དཔྱོད་དང་ནུས་སྟོབས། དུས་བབ་དང་གཟབ་ནན། དཔྱད་གཞིགས་དང་ལན་ལེན། དགོངས་དོན་དང་འཚོལ་ཞིབ། གདེང་སྤོབས་དང་རང་འགན་འཁྱེར་ཐུབ་པའི་ཕྱོགས་སུ་བློ་རིག་བསྒྲིམ་དགོས་པ་མ་ཟད། ལན་ལེན་གྱི་གྲུབ་དོན་མངོན་པར་གསལ་ཐབས་ཀྱི་ཕྱོགས་སུ་འབད་སྤུངས་བྱེད་དགོངས་ང་ཚོར་ལོ་རྒྱུས་དང་དུས་རབས་ཀྱིས་བསླངས་པའི་ལྡོག་ཏུ་འགན་འཁྲི་ལྕི་མོ་ཞིག་ཡིན་པ་ལས། ཁ་ཡོད་ལག་མེད་ཀྱིས་རྒྱུན་སྲོལ་ལྟར་བསྟོད་ཚོགས་དང་འུར་བསྟོད་སྣ་ཚོགས་ཀྱི་རྣམ་འགྱུར་ཅི་ཙམ་བསྟན་ཀྱང་ཁ་ཚ་དགོས་གཏུགས་ཀྱི་བྱ་སྤྱོད་རྩོམ་སྟངས་དོན་སྙིང་ལྡན་པ་ཞིག་ཏུ་མ་མཐོང་།