རྒྱ་མིས་ལ་དྭགས་ལ་བཙན་འཛུལ།

ཤ་ཀླན་འཇམ་དབྱངས་གྲགས་པའི་ཟིན་བྲིས་ལས་བཤུས།

ཟླ་བ་འདིའི་ཚེས་བདུན་ཉིན་ཧིན་དྷི་དུས་བབ་ནང་གནས་ཚུལ་སྤེལ་བ་ལྟར་ན། རྒྱ་ནག་གིས་རྒྱ་གར་གྱི་ས་མཚམས་བརྒལ་ནས་ཚུར་སྤྱི་ལེ་ ༡་༥ ཉེ་བར་བཙན་འཛུལ་བྱས་ཡོད་འདུག

རྒྱ་ནག་གིས་རྒྱ་གར་གྱི་ས་ཁུལ་ལ་དྭགས་དང་སྤི་ཏིའི་ཁུལ་དུ་བཙན་འཛུལ་བྱས་པར་མ་ཟད། རྡོ་ཕུང་དང་ས་རྟགས་ཡོངས་ལ་ཚོན་རྩི་དམར་པོས་དམར་རྟགས་བརྒྱབས་ཡོད་འདུག རྒྱ་དམག་རྣམས་ས་མཚམས་བརྒལ་ཏེ་ཕལ་ཆེར་སྤྱི་ལེ་ ༡་༥ ཡོང་ཡོད་འདུག་ལ། རྒྱ་དཀར་ནག་གཉིས་ཀྱི་ས་མཚམས་སུ་རྒྱལ་སྤྱིས་ངོས་འཛིན་ཡོད་པའི་རི་བོ་‘རྒྱ’འི་ཉེ་འགྲམ་གྱི་རྒྱ་གར་ས་ཁུལ་དུ་འཛུལ་
འདུག
དམག་མི་ཚོས་‘ཁ་བའི་ལྷ་མོར་’འབོད་ཅིང་མཐོ་ཚད་ལ་སྨི་ ༢༢་༤༢༠ ཡོད་པའི་རི་བོ་‘རྒྱ’་ནི་ལ་དྭགས་དང་སྤི་ཏི།བོད་བཅས་ཀྱི་ནང་དུ་གནས་ཤིང་དབྱིན་ཇིས་རྒྱ་གར་དབང་སྒྱུར་བྱས་པའི་སྐབས་རྒྱལ་མཚམས་བགོས་ཏེ་རྒྱལ་ཁབ་གཉིས་ཀས་རྒྱལ་སྤྱིའི་ས་མཚམས་སུ་ངོས་འཛིན་བྱས།
གནས་ཚུལ་མཁོ་སྤྲོད་པས་བཤད་ན། རྒྱ་མིས་ཙུ་ལུང་ལ་དང་། ས་རྟགས། བྲག་རྡོ་ཡོད་ཚད་དུ་དམར་རྟགས་བརྒྱབས་པ་དང་རྒྱ་གར་གྱི་ས་མཚམས་སུ་འཛུལ་ནས་གང་སར་‘རྒྱ་ནག’‘རྒྱ་ནག’ཅེས་རྒྱ་ཡིག་གིས་བྲིས་ཡོད་པ་རྣམས་ས་མཚམས་སྲུང་མིས་ཟླ་བདུན་པའི་ཚེས་སོ་གཅིག་ཉིན་ཤེས་རྟོགས་བྱུང་འདུག

གནས་ཚུལ་འདི་མ་བྱུང་སྔོན་དུ་རྒྱ་ནག་གི་ཐད་འཕུར་གནམ་གྲུས་རྒྱ་གར་གྱི་མཁའ་ལམ་བརྒལ་ཏེ་ཆུ་མར་ས་ཁུལ་གྱི་ཐོད་དུ་ཟླ་བ་དྲུག་པའི་ནང་སླེབས་ཡོད་ལ་དུས་ཚོད་ཡོལ་ཟིན་པའི་ཁ་ཟས་སྐོར་ཞིག་གཡུགས་ཡོད་འདུག

འདིའི་སྐོར་ལ་རྒྱ་གར་གྱི་དམག་དཔོན་ཞིག་གིས་བཤད་དོན་“འདི་ནི་རྒྱ་དཀར་ནག་གཉིས་ཀར་ས་ཐིགས་དང་བདག་དབང་དངོས་ཀྱི་ཐད་བཤད་ཚུལ་འདྲ་མིན་ཡོད་པའི་ཆུ་མར་ས་ཁུལ་གྱི་ལྷོ་ངོས་སུ་ཐད་འཕུར་གནམ་གྲུ་འགའ་འཕུར་བའི་སྐོར་གྱི་གནས་ཚུལ་ཞིག་རེད། གནས་ཚུལ་ཡར་ཞུ་བྱེད་མཁན་ས་ཁུལ་འདིའི་རྫི་བོ་རྣམས་རེད།” ཟེར་ཡང་རྒྱ་དཀར་ནག་གཉིས་ཀྱིས་འདིའི་བདག་དབང་དངོས་ཀྱི་ཐད་སྐད་ཆ་བཤད་དེ་ ༢༠༠༢ ལོར་ས་ཁྲའང་བརྗེ་ཟིན་འདུག