བོད་དོན་འབྲེལ་མཐུད་པ་བསྐོ་འཇོག

སྲིད་འཛིན་ཨོ་བྷ་མའི་འཛིན་སྐྱོང་གི་ངོས་ནས་སྐུ་ཚབ་ཚོགས་ཆུང་ཞིག་བཞུགས་སྒར་ དུ་ཕེབས་པ་ཐེངས་དང་པོ་ཆགས་ཡོད། འདི་ཡང་གཙོ་བོ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་ གནང་སྟེ་ཕེབས་པ་ཞིག་ཡིན་སྟབས། ང་ཚོའི་ངོས་ནས་ཡག་པོ་བྱུང་སོང་བསམ་ཡོད་ཅེས་བཀའ་ཁྲི་མཆོག་གིས་གསུངས།

ཕྱི་ཚེས་ ༡༢  ཉིན་ཨ་རིའི་སྲིད་འཛིན་ཨོ་བྷ་མ་མཆོག་གི་སློབ་སྟོན་པ་ཆེ་བ་ལྕམ་ཝེ་ལེ་རོས་རྗ་རོས་ཁྲེ་ valerie jarrett མཆོག་དང་དྲུང་གཞོན་ལས་རོགས་ལྕམ་མའེ་རེ་ཨོ་ཁྲུའུ་རོ་ maria otero མཆོག ཨོ་བྷ་མ་སྲིད་གཞུང་གི་འཛིན་སྐྱོང་ཚོགས་གཙོ་སྐུ་ཞབས་མེ་ཁེལ་སི་ཁྲིའུ་ཁྲི་མན་ནེས་སུ་ Michael strautmanis བཅས་༧གོང་ས་མཆོག་གི་སྐུ་ཚབ་རྒྱ་རི་བློ་གྲོས་རྒྱལ་མཆོག་གི་སྣེ་འཁྲིད་འོག་བཞུགས་སྒར་དུ་ཕེབས་ཤིང་།  ཕྱི་ཚེས་ ༡༢ ཉིན་ངྷ་སའི་ཉེ་འདབས་ཀྱི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དང་ཤེས་རབ་དགའ་ཚབ་སློབ་གླིང་དུ་ཆིབས་བསྒྱུར་གནང་བ་དང་། ཕྱི་ཚེས་ ༡༣ ཉིན་ངྷ་སྟེང་བོད་ཁྱིམ་བཅས་སུ་གཟིགས་སྐོར་འཚམས་འདྲིར་ཕེབས་རྗེས་བོད་གཞུང་བཀའ་ཤག་ཏུ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་མཇལ་འཕྲད་གནང་ཡོད་ལ། དེ་རིང་ཞོགས་པའི་ཆུ་ཚོད་ ༩ དང་ཕྱེད་ཀ་ནས་ ༡༠ དང་ཕྱེད་ཀའི་བར་གྱི་དུས་ཚོད་གཅིག་གི་རིང་བཞུགས་སྒར་ཕོ་བྲང་དུ་༧གོང་ས་མཆོག་དང་མཇལ་འཕྲད་གནང་ཡོད། སྐབས་དེ་དང་བསྟུན་འདི་གའི་གསར་འགོད་པས་བཀའ་བློན་ཁྲི་པ་མཆོག་ལ་ཐེངས་འདིའི་ཨོ་བྷ་མ་སྲིད་གཞུང་གི་སྐུ་ཚབ་ཀྱི་གཟིགས་སྐོར་ཐད་བཀའ་འདྲི་ཞུས་པར། བཀའ་ཁྲི་མཆོག་ནས་གསུངས་དོན། སྲིད་འཛིིན་ཨོ་བྷ་མས་འཛིན་སྐྱོང་གི་ངོས་ནས་སྐུ་ཚབ་ཚོགས་ཆུང་ཞིག་བཞུགས་སྒར་དུ་ཕེབས་པ་ཐེངས་དང་པོ་ཆགས་ཡོད། འདི་ཡང་གཙོ་བོ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་སྟེ་ཕེབས་པ་ཞིག་ཡིན་སྟབས། ང་ཚོའི་ངོས་ནས་ཡག་པོ་བྱུང་སོང་བསམ་ཡོད། ཅེས་གསུངས་སོང་།
 
ཐེངས་འདིའི་ཨ་རིའི་གཞུང་གི་སྐུ་ཚབ་ཆེད་དུ་གཟིགས་སྐོར་གནང་བ་དེ།  སྤྱི་ལོ་  ༢༠༠༨ ལོའི་ཕྱི་ཟླ་ ༣ པར་ཨ་རིའི་གྲོས་ཚོགས་འོག་མའི་ཚོགས་གཙོ་ལྩམ་ནན་སེ་པེ་ལོ་སེ་མཆོག་ཕེབས་པའི་ཚུན་ནས་བཞུགས་སྒར་དུ་ཕེབས་ཐེངས་དང་པོ་ཆགས་ཡོད་པ་དང་། ཟླ་འདིའི་ཟླ་སྨད་ནས་འཆར་ཟླའི་ཟླ་སྟོད་བར་དུ་༧གོང་ས་མཆོག་ཨ་རིའི་ནང་ཆིབས་བསྒྱུར་བསྐྱང་གཏན་འཁེལ་འདུག་ལ། སྐབས་དེར་ཨ་རིའི་སྲིད་འཛིན་ཨོ་བྷ་མ་དང་མཇལ་འཕྲད་གནང་རྒྱུ་ཡིན་ཚུལ་བརྗོད་ཡོད་པ་རེད།