གཞིས་ལུས་བོད་མིས་བོད་ཀྱི་རྒྱལ་དར་བསྒྲེངས། །གྲོས་ཚོགས་ནང་དུ་དཔུང་གི་དར་ཆ་འཕྱར།།
བོད་མི་མང་སྤྱི་འཐུས་སྒྲོལ་མ་མཚོ་མོ་ལགས་ནས་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་འདོན་པ་དང་འབྲེལ། བཙན་བྱོལ་བོད་མིའི་མང་གཙོའི་ཀ་བ་གསུམ་གྱི་ཡ་གྱལ། ཁྲིམས་བཟོ་ལྷན་ཚོགས་ཀྱི་འཐུས་མི་འགའ་ཞིག་གི་རང་གཟུགས་ངོ་མ་དེ་དག་རིམ་བཞིན་མངོན་བྱུང། སྤྱིར་བྱ་སྤྱོད་དེ་དག་གསར་པ་གང་ཡང་མ་ཡིན་ནའང་། ང་ཚོ་མང་གཙོའི་ལམ་བཟང་ལ་ཕེབས་ནས་མི་ལོ་ལྔ་བཅུ་ཉེ་བར་ཕྱིན་པའི་དུས་སྐབས་འདི་འདྲར། ད་དུང་ང་ཚོའི་སྤྱི་ཚོགས་ནང་ནང་ཁུལ་ཕྱོགས་སྒྲིལ་གྱི་བྱ་སྤྱོད་སྤེལ་མཁན་ལྷག་ཡོད་པ་མཐོང་སྐབས། དངོས་གནས་ཧང་སངས་དགོས་པ་ཞིག་མ་ཡིན་ནམ།
འདི་ནས་མི་ལོ་དགུ་ཙམ་གྱི་ཡར་སྔོན་དུ་སློབ་དཔོན་ཆེན་མོ་ཟམ་གདོང་རིན་པོ་ཆེས། གྲོས་ཚོགས་ནང་བཟོད་གསོལ་གྱི་གླེང་མོལ་རིང་པོ་ཞིག་གནང་ཡོད་པ་དེ་ཉིད། ད་ལྟ་བསམ་སྐབས་བཙན་བྱོལ་བོད་མིའི་བྱུང་རབས་སྤྱི་དང་བྱེ་བྲག་གྲོས་ཚོགས་ཀྱི་བྱུང་རབས་གསལ་བའི་མེ་ལོང་ཞིག་ཏུ་གྱུར་འདུག་སྙམ།
བཟོད་གསོལ་དེའི་ནང་རིན་པོ་ཆེ་ནས་ཁྲིམས་དང་སྒྲིག་གཞི་ཕལ་ཆེ་བ་སྒེར་གྱི་འཁོན་འཛིན་གྱི་བརྣག་སེམས་སྐབས་ལུང་དྲང་རྒྱུ་དང་སྒེར་གྱི་ངོ་ཤེས་རྒྱབ་གཉེར་བྱེད་སྐབས། སྦས་ནས་བཞག་རྒྱུའམ་མཐོང་བཞིན་ཁྱད་གསོད་བྱེད་རྒྱུ་ཞིག་ཏུ་ཆགས་འདུག་ཅེས་དང། གྲོས་ཚོགས་དང་འཛིན་སྐྱོང་གི་ལས་ཀྱི་སྣེ་མོར་གཏོགས་པའི་གང་ཟག་བྱེ་བྲག་པ་སོ་སོའི་རྒྱུད་ལ། ཁྲིམས་དང་སྒྲིག་གཞི་བརྩི་སྲུང་བྱ་འདོད་ཀྱི་རང་བྱུང་གཤིས་ཀྱི་འདུན་པ་ཞིག་མེད་ན། ཁྲིམས་ལུགས་དང་སྒྲིག་གཞི་ཡིག་ཐོག་ཏུ་ཡོད་པ་ཙམ་གྱིས། གང་ཡང་མི་ཕན་པའི་གནས་ཚུལ་དེ་ཧ་གོ་དུས་ཧ་ལོག་ཚར་འདུག་ཅེེས་གསུངས་པའི་གསུང་གི་ཚིག་དོན་སླར་ཡར་མངོན་དུ་འགྱུར་བཞིན་པ་མཐོང་ཐུབ།
སྤྱི་འཐུས་སྒེར་གྱི་གྲོས་འཆར་འདོན་མཁན་གྱི་ལྷག་བསམ་ལ་རྨ་ཡོད་མེད་ཞུ་ཚོད་མ་ཐིག་ཀྱང་། རྒྱབ་སྐྱོར་ཞུ་མཁན་དང་དགག་བྱ་བྱེད་མཁན་གྱི་བཀའ་མོལ་གསུང་ཕྱོགས་ལ་གཞིགས་ན། སྤྱི་དོན་ཡིད་ལ་བཅངས་ནས་དགག་སྒྲུབ་བྱེད་ཀྱི་ཡོད་པའི་རྣམ་པ་མེད་པ་ཙམ་དུ་མ་ཟད། སྤྱི་འཐུས་མང་ཆེ་བར་བོད་རྒྱ་ཆེའི་མི་དམངས་ཀྱིས་བཀུར་བའི་འཐུས་མི་ཞིག་ཡིན་པའི་ཀུན་སྤྱོད་ལས་ཡོངས་སུ་འདས་འདུག་པ་ནི། ཧ་ཅང་བློ་ཕམ་སྐྱེ་དགོས་པ་ཞིག་ཏུ་མཆིས། སྤྱི་འཐུས་ལ་ལས་གནས་དོན་དེ་ནི་གླེང་རིན་རྩ་བ་ནས་མེད་པ་ཞིག་ཡིན་ཁུལ་བརྗོད་དེ་སྦས་རྩོལ་བྱེད་པ་དང། ལ་ལས་ཆོལ་ཁ་དང་ལུང་ཚན་གྱི་དཔུང་སྒྲིག་གི་ཡོད་ཚུལ་བརྗོད་པ་དང། འགའ་ཞིག་གིས་ཆོལ་ཁ། གཞིས་བཞུགས་མི་མང་། ཆབ་སྲིད་བཙོན་ཟུར་སོགས་ཐ་སྙད་སྣ་ཚོགས་བེད་སྤྱད་དེ། གནས་དོན་འདི་ཆོལ་ཁ་དང་ལུང་ཚན་གྱི་གནད་དོན་ཞིག་ཡིན་ཁུལ་བརྗོད་དེ་གླེང་སློང་ཆེ་གཏོང་བྱེད་པ། ལ་ལས་རང་གིས་བཤད་འདོད་པ་ཐམས་ཅད་བཤད་དེ། གཞན་གྱི་སྐད་ཆར་མ་ཉན་པར་ཕྱིར་ཐོན་འགྲོ་བ་སོགས་མཐོང་སྐབས་ཡིད་སྐྱོ་བའི་ཚོར་འདུའི་ལྷན་དུ་དགོད་བྲོ་ལ་ངུ་ཡང་བྲོ་བ་ཞིག་ཡོང་གི་འདུག
ངས་འདི་ནས་ཆོལ་གསུམ་བོད་རྒྱ་ཆེའི་མི་མང་ལ་སེམས་ཚོར་དྲག་པོའི་ཐོག་ནས་ཞུ་རྒྱུར། ༧གོང་ས་༧སྐྱབས་མགོན་ཆེན་པོའི་བླ་ན་མེད་པའི་ཐུགས་རྗེའི་བཀའ་དྲིན་འོག་ང་ཚོ་ཆོལ་ཁ་ཕན་ཚུན་དང། ཆོས་ལུགས་ཕན་ཚུན་ལ་རྩོད་དགོས་པའི་གནས་དོན་གང་ཡང་མེད་ཅིང་། ད་བར་སྐྱ་སེར་རྒྱ་ཆེའི་མི་དམངས་རྣམས་དམ་ཚིག་འོ་ཆུ་གཅིག་འདྲེས་ཡིན་པ་དེ་གསལ་པོ་མཁྱེན་པ་གནང་རོགས་ཞེས་ཞུ་རྒྱུ་ཡིན།
སློབ་དཔོན་ཆེན་མོ་ཟམ་གདོང་རིན་པོ་ཆེས་གསུངས་པ་བཞིན། ང་དགུ་ལོའི་གུར་སེར་པོའི་ལབ་གཞི་ནས་དེ་རིང་གི་ལབ་གླེང་བར་ཆོལ་ཁ་དང། ཆོས་ལུགས། ལུང་ཚན་སོགས་ཀྱི་མིང་ཐོག་ནས་རྩོད་གླེང་དུ་མ་ཞིག་བྱུང་ཡོད་པ་དེ་དག ཕུགས་རྩད་བཅད་ན་གང་ཟག་བྱེ་བྲག་པ་རེ་ཟུང་བར་གྱི་འཁོན་འཛིན་རང་ཉིད་སྒེར་གྱི་ཁ་གཏད་མ་ཆོག་སྐབས། སྤྱི་ཚོགས་དང་སྲིད་གཞུང་ནང་འཁྱེར་ཡོང་བ་ཞིག་ཡིན་པ་ཤེས་པ་གནང་རོགས་ཞེས་ཞུ་རྒྱུ་ཡིན། ལྷག་པར་ཆོས་ལུགས་སྤྱི་འཐུས་ཀྱི་མིང་འཁུར་དམ་འབུལ་ཅན་རྣམས་ལ་དམིགས་བཀར་ཞུ་རྒྱུར། ཆོས་ལུགས་སྤྱི་འཐུས་ཀྱི་ཞབས་སྟེགས་སྟེང་བཞུགས་པའི་ཆོས་རྒྱུད་ཁག་གི་དགེ་བཤེས་རྣམ་པས། གཟན་ཤམ་འོག་ནས་དུག་གསུམ་གྱིས་ཀུན་ནས་བསླངས་པའི་རྣམ་འགྱུར་ངན་པ་དེ་བསྟན་ཚོད་བྱེད་རོགས་གནང་ཞེས་ཞུ་འདོད་བྱུང། དམིགས་བཀར་ཚོགས་གཙོ་མཆོག་ལ་ཞུ་རྒྱུར། བཀའ་ཤོག་གི་རྒྱབ་ལ་མི་ཤུགས་མེད་ན་བདེན་པ་བདེན་ཐོག་ཏུ་འཁྱོལ་དཀའ་བའི་དུས་སྐབས་འདི་འདྲར། ཚོགས་གཙོ་ཁྱེད་ལྟ་བུ་ཞིག་མེད་ན་གྲོས་ཚོགས་འདི་ཉིད་དབང་ཡོད་པ་དང་རྒྱུ་ཡོད་པ་འགའ་ཞིག་གི་ནང་ལྟ་བུ་ཞིག་ཏུ་འགྱུར་ཉེན་འདུག་པས་ཡིད་གཟབ་གནང་རོགས་ཞུ།
སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་བརྒྱུད། མགོ་༧རྒྱལ་བ་རིན་པོ་ཆེ་མཆོག་ནས་མཇུག་མི་དམངས་དཀྱུས་མ་ང་འདྲ་བའི་བར་གྱི། སྐྱེ་བོ་མཆོག་དམན་མང་པོས་བཀུར་བའི་སྤྱི་ཡི་འཐུས་མི་མང་པོའི་བཞིན་རས་ངོ་མ་དེ། མཇལ་ཐུབ་པ་དེ་ཡང་སྐལ་ངན་གྲོགས་སུ་གྱུར་བ་ཞིག་བྱུང་སོང། མདོར་ན་བོད་མི་མང་སྤྱི་འཐུས་ལྷན་ཚོགས་འདི་དུས་ཐོག་ཏུ་ཚོགས་པ་དང་། དུས་ཐོག་ཏུ་གྲོལ་ཐུབ་པ་ཞིག་གནང་བ་ལས་རྐང་རྐྱང་ལག་རྐྱང་འདྲ་མིན་བྱས་ཏེ། བོད་གཞུང་གི་རྒྱུ་གྲོན་ཆུད་ཟོས་སུ་མ་གཏོང་རོགས་ཞེས་བཀུར་འོས་སྤྱི་འཐུས་ལྷན་རྒྱས་ལ་འབོད་སྐུལ་ཤུགས་དྲག་ཏུ་ཞུ་རྒྱུ་ཡིན་ནོ།།
བསྟན་འཛིན་ཕན་བདེ་ལགས་ཀྱིས་དགོངས་ཚུལ་ཡག་པོ་གསུངས་འདུག་ཐུགས་རྗེ་ཆེ། སྤྱི་དོན་ཞིག་གི་ཆེད་དུ་ཧུར་ཐག་བྱེད་མཁན་ཚོའི་སྟེང་སྒེར་གྱི་ནད་ཚའི་རིགས་ཁུར་ཡོང་མཁན་འདི་ཚོས་དྲ་བ་འདི་བཙོག་པ་བཟོ་བཞིན་འདུག་པས། བསམ་བློ་བཏང་ན་ཡག་པོ་འདུག
ཕན་བདེ་ལགས་ནས་བོད་མིའི་བདེ་སྡུག་གི་ཆེད་ཏུ་ཀུན་སློང་བཟང་བོ་ཞིག་ཁྱེར་ནས་ཡོང་བ་ལ་དགའ་བསུ་ཡོད། བློ་བཟང་གི་འཁོན་སེམས་སྒེར་དོན་ཁོ་ན་ཡིན་པས་འདིར་མི་གླེང་བར་ཞུ།
བློ་བཟང་ཟེར་བའི་མི་འདི་ཕྲག་དོག་དང་འགྲན་སེམས་ཀྱི་གོང་བུ་ཞིག་དང་སྤྱི་ཚོགས་ནང་དཀྲུགས་ཤིང་འཕེན་གྱི་གཏེ་བོ་ཞིག་ཡིན་པ་ནི་ཁོས་སྤེལ་བའི་མཆན་དེ་དག་ལ་བཀླགས་ཚེ་ཟུར་བལྟོས་ལེབ་མཐོང་གི་ཚུལ་དུ་འདུག
བློ་བཟང་ཟེར་བ་འདིས་བསྟན་འཛིན་ཕན་བདེ་ངོ་ཤེས་མི་འདུག་ལ་ཁོའི་རྩོམ་གྱི་བརྗོད་དོན་ཡང་རྟོགས་མི་འདུག
བློ་གཟུ་བོར་གནས་ན་ཁྱོད་ཀྱི་འཁོན་སེམས་ཟེར་བ་ཡང་འགྲན་སེམས་ཙམ་རེད།
དོན་དངོས་སུ་བསྟན་འཛིན་ཕན་བདེས་གནས་ལུགས་ཞིག་འཆད་ཀྱིན་འདུག་པས་དེ་ལ་འཁོན་སེམས་འཛིན་དོན་ཅི།
བསྟན་འཛིན་ཕན་བདེ་ཟེར་བའི་གང་ཟག་འདི།
གཞི་རིམ་སློབ་གྲྭ་ཁག་གི་བོད་དགེ་རྣམས་ཕྱོགས་གཅིག་ཏུ་བསྡུས་པའི་བཟོ་འདྲ་པོ་འདུག རྩོམ་གྱི་བརྗོད་བྱ་དང་སྙན་བྱ་གང་ཡང་མི་འདུག་གོ
ང་བོད་དགེ་ཀླད་མེད་དེ་དག་ལ་ཁོང་ཁྲོ་ཟ་གི་འདུག གང་ཡིན་ཟེར་ན་དེ་ཚོའི་དྲིན་ལ་ང་བོད་ཡིག་མི་ཤེས་པའི་བོད་པ་ཞིག་ཆགས་འདུག
གོང་གི་རྩོམ་འདྲ་པོ་འདི་སྔོན་མ་ང་ཚོ་སློབ་གྲྭའི་ནང་ཡོད་དུས་བློ་འཛིན་བྱེད་དགོས་པའི་བགྲོ་གླེང་གི་བརྗོད་བྱ་ཤོག་ལྷེ་གསུམ་པོ་དང་གཅིག་པ་གཅིག་རྐྱང་རེད་འདུག
ངས་འདི་མཐོང་བ་དང་རྣམ་རྟོག་ཟ་སོང༌།
ང་བོད་དགེ་བརྫུན་མ་ཁྱོད་ཚོར་འཁོན་སེམས་ཤིན་ཏུ་ཆེ།
ངོ་མ་རེད་
དགོད་དྲོ་ལ་ངུ་ཡང་དྲོ་བ། དགོད་བྲོ་ལ་ངུ་ཡང་བྲོ།
བཞིན་རིས། བཞིན་རས།
བསྟན་འཛིན་ཕན་བདེ་ལགས་ཀྱི་རང་གི་སེམས་ངོགས་ཀྱི་གཞེན་སྐུལ་གནང་བར་འཚམས་འདྲི་ཡོད།
བདེན་རྫུན་གྱི་རྒྱ་སྲང་ལ་འདེགས་མཁན་ནི་བློ་གཟུར་བོར་གནས་པའི་ཀློག་པ་པོ་ཚོ་ཡིན་པ་ལས། སེམས་ཁམས་གཞུ་ལྟར་འཁྱོག་པའི་ས་ཕུག་ཁ་བྱང་ལྟ་ཚོ་མ་ཡིན་ནོ།།