༧གོང་ས་མཆོག་གིས་དགྱེས་འཛུམ་ཞིག་སྟོན་བཞིན། ངོས་ནས་རང་ཉིད་བུད་མེད་རྒྱབ་སྐྱོར་རིང་ལུགས་པ་ཞིག་ཡིན་ལབ་གིན་ཡོད། འདི་ནི་ཁྱེད་རང་ཚོས་བརྗོད་བཞིན་པའི་བུད་མེད་ཀྱི་ཐོབ་ཐང་བརྩོད་ལེན་པ་ཟེར་བ་དེ་མ་རེད་དམ། འདི་ནི་ཁོང་གིས་ཕྱི་ཚེས་ ༢༣ ཉིན་རང་དབང་གི་གཟེངས་རྟགས་དེ་བཞེས་སྐབས་ཀྱི་གསུང་ཚིག་ཅིག་རེད།
ནུབ་ཕྱོགས་ཀྱི་གསར་འགོད་པ་ཚོས་བཤད་དོན། ༧གོང་ས་མཆོག་གི་གསུང་འཕྲིན་ནི་ག་དུས་ཡིན་ནའང་བྱམས་སྙིང་རྗེ་དང་འཆམ་མཐུན། སེམས་བཟང་པོ། ནང་སེམས་ཀྱི་ཞི་བདེ། དམངས་ཀྱི་ཐོབ་ཐང་བཅས་ཀྱི་སྐོར་ཞིག་ཡིན། ཐེངས་འདིར་ཁོང་གིས་རང་དབང་གི་གཟེངས་རྟགས་དེ་བཞེས་སྐབས་བུད་མེད་ཀྱི་གནད་དོན་སྐོར་ལ་གསུངས་དོན། བུད་མེད་ནི་སོ་སོའི་ཁམས་དང་སྐྱེད་ནུས། བུ་ཕྲུག་བཙའ་ཐུབ་པ་བཅས་ཀྱི་སྒོ་ནས་རང་བཞིན་གྱིས་བྱམས་སྙིང་རྗེ་ཆེ་བ་ཡོད་པ་རེད། དེར་བརྟེན་བུད་མེད་ཚང་མས་ཞི་བདེ་ཡི་འཛམ་གླིང་ཞིག་འཛུགས་སྐྲུན་བྱ་བར་སྣེ་འཁྲིད་དགོས་པ་རེད། ཅེས་ཁོང་གིས་ཨ་མ་རྣམས་དང་ནད་གཡོག་མ་རྣམས་དཔེ་མཚོན་དུ་བཀོད་ནས་གསུངས། དེ་བཞིན་ཁོང་གིས། ཡག་ཕྱོགས་ནས་བཤད་ན། དེང་སྐབས་བུད་མེད་རྒྱབ་སྐྱོར་རིང་ལུགས་པའི་ཚོགས་པ་ཁག་ཡོད་ལ། དེ་དག་གིས་བུད་མེད་ཀྱི་སྐྱེས་ཁམས་ཕྱོགས་ནས་ལངས་ཏེ་ཁོང་ཚོར་ལས་ཀའི་སྟེང་ནས་ཁྱད་གསོད་བྱེད་བཞིན་པ་དག་ལ་ངོ་རྒོལ་བྱ་ཐུབ་ཡོད་པ་རེད། ཅེས་གསུངས་པ་དང་སྦྲགས་ཁོང་གིས་སྐུ་རྩེད་དང་བཅས་བསྟན་དོན། བུད་མེད་རྒྱབ་སྐྱོར་རིང་ལུགས་པ་ཁག་ཅིག་ལ་སེམས་ཚོར་ཆེ་དྲག་པའི་བཟོ་འདུག དེའི་རིགས་ལ་ངོས་རང་དགའ་བོ་མེད་ཅེས་ཀྱང་གསུངས་ཡོད་པ་རེད།
རང་དབང་གཟེངས་རྟགས་འབུལ་བཞེས་ཀྱི་ཉིན་གུང་གསོལ་ཚིགས་ཀྱི་རྗེས་སུ་༧གོང་ས་མཆོག་གིས་ཁན་ནོན་ལྟེ་གནས་ཁང་དུ་མང་ཚོགས་ལ་ཞི་བདེ་དང་འཆམ་མཐུན་ཡར་རྒྱས་གཏོང་ཕྱོགས་ལ་གསུང་བཤད་གནང་ཡོད་པ་རེད།
ཉིན་དེར་༧གོང་ས་མཆོག་གིས་གསུངས་དོན། ཁྱེད་རང་ཚོའི་མང་པོ་ཞིག་གིས་ངོས་ནས་ཡ་མཚན་པོ་ཞིག་བཤད་གི་རེད་བསམ་ནས་ཡོང་བ་རེད། མང་པོ་ཞིག་གིས་ངོས་ལ་རྫུ་འཕྲུལ་རིགས་ཤིག་ཡོད་པའམ། ཡང་ན། ནད་པ་དྲག་སྐྱེད་ཡོང་འཇུག་པའི་ནུས་པ་ཡོད་པ་རེད་བསམ་ཡོད་ཀྱི་རེད། ཡང་ཁག་ཅིག་གིས་ངོས་ནས་གཏམ་བཤད་གལ་ཆེན་པོ་ཞིག་སྤེལ་གི་རེད་བསམ་ནས་ཡོང་ཡོད་རྒྱུ་རེད། ངོས་ལ་ཅི་ཡང་བཤད་རྒྱུ་མེད་ཅེས་བཞད་མོ་དང་བཅས་གསུངས་ལ། ཁོང་གིས་ན་ཚ་དྲག་སྐྱེད་ཀྱི་ནུས་པ་ཁོང་ལ་མེད་པའི་སྐོར་ནས་གསུངས་དོན། ལོ་སྔོན་མར་ངོས་ཀྱི་མཁྲིས་རྡོ་གཤེགས་བཅོས་བྱས་ནས་བླངས་པ་རེད། འདི་ནི་ངོས་ལ་ན་ཚ་དྲག་སྐྱེད་ཀྱི་ནུས་པ་མེད་པའི་ཁུངས་སྐྱེལ་རེད་ཅེས་ཀྱང་གསུངས་འདུག
ཆོས་ལུགས་ཀྱི་ཕྱོགས་ནས་གསུངས་དོན། ཁྱོད་རང་ཚོ་ཆོས་ལུགས་འདི་ལ་དད་ནའང་རེད། གཞན་པ་ཞིག་ལ་དད་ནའང་རེད། ང་ཚོ་ཚང་མ་འགྲོ་བ་མི་ཡིན་པ་གཅིག་པ་རེད་ཅེས་དང་། ང་རང་ཚོ་ཚང་མས་མཉམ་དུ་ལས་ཀ་ལས་དགོས་པ་རེད། ང་རང་ཚོས་སའི་གོ་ལ་འདི་སྲུང་སྐྱོབ་བྱ་དགོས་པ་རེད། དངངས་སྐྲག་དང་མཉམ་དུ་འཆམ་མཐུན་ཡོང་ཐབས་ཡོད་པ་མ་རེད། ང་རང་ཚོར་ཡིད་ཆེས་དགོས་པ་རེད། ཡིད་ཆེས་ནི་བྱམས་སྙིང་རྗེ་ཡི་རྩ་བ་རེད། ཡིད་ཆེས་མེད་པ་དེས་དངངས་སྐྲག་འཁྱེར་ཡོང་གི་རེད། དངངས་སྐྲག་གིས་དྲག་སྤྱོད་འཁྱེར་ཡོང་གི་རེད། དངངས་སྐྲག་གིས་ཁེར་རྐྱང་དང་སེམས་སྡུག་འཁྱེར་ཡོང་གི་རེད། ང་རང་ཚོ་ཚང་མ་ཡོང་ས་གཅིག་པ་རེད། ང་རང་ཚོ་ཚང་མ་གཅེན་པོ་དང་གཅུང་མོ་རེད། ཅེས་གསུངས་ཡོད་པ་རེད།
མི་ཞིག་གིས་༧གོང་ས་མཆོག་ལ། རྒྱ་ནག་དང་བཙན་བྱོལ་བོད་གཞུང་གཉིས་ཞི་བདེའི་འདུམ་འགྲིག་ཅིག་ལ་བསླེབ་རྒྱུ་ཡོད་མེད་སྐོར་བཀའ་འདྲི་གནང་སྐབས་ཁོང་གིས་གསུངས་དོན། རྒྱ་མི་རིགས་དང་བོད་མི་རིགས་གང་ཡིན་ཡང་། ང་རང་ཚོ་འགྲོ་བ་མི་ཡིན་པ་གཅིག་པ་རེད། ང་ཚོས་རྒྱ་མི་རིགས་ལ་བཟུང་བའི་ཡིད་ཆེས་ལ་འགྱུར་བ་འགྲོ་མྱོང་མེད། ང་རང་ཚོར་སྔར་ལས་ལྷག་པའི་བཟོད་སྒོམ་དགོས་པ་རེད། སེམས་ཐག་ཆོད་པོ་དགོས་པ་རེད། བོད་ནང་གི་བོད་རིགས་གཞོན་སྐྱེས་ཚོའི་སེམས་ཤུགས་བརྟན་པོ་རེད། དཀའ་རྙོག་ཡོང་ས་དེ་རྒྱ་ནག་གཞུང་གི་དམ་དྲག་དང་འཁྱོག་བཤད་རེད་ཅེས་གསུངས་ཡོད་པ་རེད།
༧གོང་ས་མཆོག་གིས་རྒྱལ་སྤྱིའི་རང་དབང་གི་གཟེངས་རྟགས་དེ་བཞེས་ས་ནི་མི་རིགས་ནག་པོའི་འགྲོ་བ་མིའི་ཐོབ་ཐང་རྩོད་མཁན་གྱི་སྐྱེས་ཆེན་དམ་པ་མར་ཊིན་ལུ་ཐར་ཁིན་བགྲོངས་ས་དེ་ཡིན་ལ། ༧གོང་ས་མཆོག་གིས་ཉིན་དེར་ཁོང་ལ་མྱ་ངན་གུས་འདུད་དང་སྨོན་ལམ་བཏབས་རྗེས། མར་ཊིན་ལུ་ཐར་ཁིན་བགྲོངས་ས་ནི་གནས་འདི་ཡིན་སྟབས་སེམས་སྐྱོ་བ་ཞིག་རེད་དེ། ཕྱོགས་གཞན་ནས་བསམ་ན་སེམས་ཤུགས་འཕར་དགོས་པ་ཞིག་ཀྱང་རེད་ཅེས་དང་། ལོ་རྒྱུས་ཀྱི་དོན་རྐྱེན་འདིས་ང་ཚོར་ཅི་ཙམ་གྱི་དཀའ་ཁག་དང་འགོག་རྐྱེན་ཡོད་རུང་། དྲང་བདེན་དང་འདྲ་མཉམ། ཁྱད་གསོད་བཅས་ཀྱི་ཕྱོགས་ལ་འཐབ་རྩོད་བྱས་ན་བདེན་པའི་མཐའ་གསལ་རྒྱུ་ཡོད་པའི་ཡིད་ཆེས་བསྐྲུན་པ་རེད་ཅེས་གསུངས་འདུག
མཆན། གོང་གསལ་བརྙན་པར་ནི་མེམ་ཧྥེ་སི་གྲོང་ཁྱེར་སྤྱི་ཁྱབ་པས་གོང་ས་མཆོག་ལ་ཕེབས་བསུ་གནང་བའི་སྐོར་ཡིན་ལ། གསར་འགྱུར་འདི་ནི་རོལ་དབྱངས་ཆེད་ལས་པ་བུད་མེད་ ཊ་མ་ར་ ཁོན་ནེ་ཧྥུ་ཡི་གསར་འགྱུར་དང་ཨེ་པེ་གསར་ཁང་གི་གསར་འགྱུར་གཉིས་བསྲེས་ནས་ཚུར་བསྒྱུར་བ་ཡིན།
དྲ་གྲོགས་ཤེལ་དཀར་བློ་བཟང་ལགས་ལ་ཞུ་རྒྱུར་ཁྱེད་ཀྱིས་
༧གོང་ས་མཆོག་ལ་མངོན་འདོད་ཀྱི་དད་པ་སྐྱེ་བ་དེར་ཁྱེད་ཀྱི་ཐུགས་བསམ་ག་འདྲ་ཞིག་གཏང་གནང་གི་ཡོད་དམ།
སྤྱིར་མངོན་འདོད་ཀྱི་དད་པ་ཟེར་དུས་དད་ཡུལ་དེ་རང་ཉིད་ཀྱི་མངོན་དུ་བྱེད་འདོད་ཀྱི་དད་པ་ཞིག་ལ་གོ་དགོས་ན། ༧གོང་ས་མཆོག་ཁྱེད་ཀྱིས་མངོན་དུ་བྱེད་རྒྱུ་མེད་པས་མངོན་འདོད་ཀྱི་དད་པ་ཞིག་ཡོང་ཡ་ཡོད་དམ།
བོད་མི་ཡོངས་ཀྱི་ཁོག་པའི་སྙིང་དང་སྤྲ་བའི་མིག། འཛམ་གླིང་སྐྱེ་འགྲོ་ཡོངས་ཀྱི་
མ་ནོར་ལམ་བཟང་སྟོན་པའི་སྟོན་པ་སྟེ་༧གོང་ས་སྐྱབས་མགོན་ཆེན་པོས་རང་དབང་གཟིངས་རྟགས་བཞེས་པ་གུས་པ་བོད་པ་ཞིག་དང་། ནང་པ་ཞིག་དང་། དྲང་བདེན་ལ་དགའ་བའི་མི་ཞིག་དང་། བདེ་བ་འདོད་པའི་སྲོག་ལྡན་ཞིག་ཡིན་པས་ཆ་ནས་བཀྲིས་བདེ་ལེགས་གྲངས་མེད་ཞུ། དེ་དང་ཆབ་གཅིག་མགོན་པོ་གང་ཉིད་སྐུ་ཚེ་སྐབས་བརྒྱ་བརྟེན་ཅིང་མཛད་འཕྲིན་ལུས་བཅན་ཀུན་ལ་ཁྱབ་པའི་སྨོན་འདུན་དང་བཅས་ཏེ་ཕུལ།
༧གོང་ས་ཡིད་བཞིན་ནོར་བུའི་སྐུ་ཚེ་བསྐལ་བརྒྱར་བརྟན་པར་ཤོག
༧ གོང་ས་ཐམས་ཅད་མཁྱེན་པ་མཆོག་སྐུ་ཚེ་ཁྲི་ལོ་ནས་ཁྲི་ལོ་བརྟན་པར་ཤོག
ཆོལ་གསུམ་བོད་མི་གཙོས་འཛམ་གླིང་སྐྱེ་འགྲོ་ཡོངས་ལ་བདེ་སྐྱིད་ཀྱི་རྩ་བ་སྐྲུན་མཁན་དང་མ་རིག་མུན་སེལ་གྱི་ཆོས་ཀྱི་ཉི་མ་གཞོན་ནུ་ནི་༸གོང་ས་མཆོག་ཁོ་ནར་ངེས་ན་ཁོང་གི་སྐུ་ལ་གནོད་འཚེ་བྱེད་འདོད་ཀྱི་སེམས་ངན་འཆིང་མཁན་དེ་དག་ནི་ཚེ་རབས་ཕྲེང་བར་སྡུག་བསྔལ་གྱི་མན་ནག་ནང་འཚོ་དགོས་པར་གདོན་མི་ཟའོ།
༸གོང་ས་མཆོག་གིས་རང་དབང་གི་གཟེངས་རྟགས་བཞེས་པར་སྙིང་ཁོང་རུས་པའི་གཏིང་ནས་འཚམས་འདྲའི་གུས་ཕྱག་དང་སྐུ་ཚེ་བསྐལ་བརྒྱར་བརྟན་པའི་གསོལ་བ་སྙིང་ནས་འདེབས་སོ༎
༸མགོན་པོ་མཆོག་ལ་མངོན་འདོད་ཀྱི་དད་པའི་སྒོ་ནས་གུས་ཕྱག་དང་བཅས། བཀྲ་ཤིས་པའི་བདེ་ལེགས་ཞུ།
འུ་ཚང་གི་སྤྱི་ཚོགས་སུ་བུད་མེད་ཚོར་མཐོང་ཆུང་དང་གཉའ་གནོན་བྱེད་བཞིན་པ་འདིས་བོད་མི་རིགས་ཡར་རྒྱས་དང་གཅིག་སྒྲིལ་གྱི་ནུས་ཤུགས་འདོན་པར་བཀག་འགོག་ཤུགས་ཆེན་ཐེབས་ཡོད།འུ་ཚང་གིས་བྱ་སྤྱོད་ངན་པ་འདི་ངེས་པར་དུ་བསྒྱུར་བཅོས་བྱེད་པར་སྙིང་ནས་རེ་འདུན་བྱེད་བཞིན་ཡོད་ལགས།
༧གོང་ས་མཆོག་གིས་རང་དབང་གཟེངས་རྟགས་བཞེས་པར་སྒོ་གསུམ་གྱིས་གུས་འདུད་དང་བཅས་བཀྲ་ཤིས་བདེ་ལེགས་གྲངས་མེད་ཞུ།སྐུ་ཚེ་བརྟན་པར་ཤོག