རྒྱ་དཀར་ནག་གཉིས་ཀྱིས་སྔར་ལས་ལྷག་པའི་མཉམ་ལས་བྱ་རྒྱུ་ཡིན་འདུག 

རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཝི་ཀི་རམ་མཆོག་གི་རྒྱ་ནག་གི་ཕྱོགས་སྐྱོད་དང་བསྟུན། རྒྱ་དཀར་ནག་གཉིས་ཀྱིས་ཧིན་བོད་མཐའ་མཚམས་སུ་བརྟན་བརླིང་དང་བདེ་འཇགས་ཡོང་ཐབས་སླད་འགན་འཁུར་དགོས་པའི་སྐོར་གླེང་སློང་གནང་།

ཁ་སང་ཕྱི་ཚེས་ ༢༧ ཉིན་ནས་ ༢༩ བར་ཉིན་གྲངས་གསུམ་རིང་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་དྲུང་ཆེ་སྐུ་ཞབས་ཝི་ཀི་རམ་(Vikram Misri) མཆོག་གིས་རྒྱ་ནག་གི་རྒྱལ་ས་པེ་ཅིན་ཁུལ་དུ་གཞུང་འབྲེལ་འཚམས་གཟིགས་གནང་མུས་ཡིན་པ་དང་བསྟུན། དེ་རིང་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་བློན་ཆེན་གཞོན་པ་ཧུ་( Hua Chunying) ཟེར་བ་དང་རྒྱ་ནག་གཞུང་གི་གནད་ཡོད་མི་སྣ་ཁག་ཅིག་ལ་ཐུག་འཕྲད་བྱས་འདུག་ལ། ཁ་སང་རྒྱ་ནག་དམར་ཤོག་ཚོགས་པའི་རྒྱལ་སྤྱིའི་སྡེ་ཚན་(CPC) གྱི་འགན་འཛིན་གཞོན་པ་སན་ཧི་ཡན་(Sun Haiyan) དང་ཐུག་འཕྲད་བྱས་ཏེ། ཕྱོགས་གཉིས་ཀྱི་རིག་གཞུང་བརྗེ་ལེན་གྱི་སྲིད་ཇུས་དང་། ཚོང་དོན་སྔར་ལས་ལྷག་སྐྱེད་ཐབས། ཧིན་བོད་མཐའ་མཚམས་ཁུལ་གྱི་བརྟན་བརླིང་བཅས་སོགས་ཀྱི་ཐད་ལ་གྲོས་མོལ་བྱས་ཡོད་འདུག

གནད་དོན་དེ་དང་འབྲེལ་ནས་རྒྱ་ནག་གི་རྒྱལ་ས་པེ་ཅིན་དུ་རྟེན་གཞི་བྱས་པའི་རྒྱ་གར་གཞུང་ཚབ་ཁང་གིས། ཕྱོགས་གཉིས་ཀྱི་འབྲེལ་ལམ་ཐད་བསྐྱར་ཞིབ་བྱས་པ་དང་། མཉམ་ལས་དང་མགོ་ཁྲིད་ཀྱི་འབྲེལ་འདྲིས་སོགས་གོང་མཐོར་གཏོང་ཐབས། དཔལ་འབྱོར་དང་ཚོང་དོན་གྱི་འབྲེལ་ལམ་དང་། རིག་གཞུང་། མི་མང་བར་གྱི་བརྗེ་རེས་བཅས་ལ་ཕན་ཚུན་ཕན་འབྲས་ཡོང་ཐབས་དང་། ཕྱོགས་གཉིས་གྱིས་ཧིན་བོད་ས་མཚམས་ཁུལ་དུ་ཞི་བདེ་དང་ལྷིང་འཇགས་རྒྱུན་འཁྱོངས་བྱ་རྒྱུའི་གལ་ཆེའི་རང་བཞིན་སོགས་ཀྱི་ཐད་གླེང་སློང་གནང་ཡོད་སྐོར་བསྒྲགས་འདུག

འདས་ལོར་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཝི་ཀི་རམ་ (Vikram Misri) མཆོག་གིས་རྒྱ་ནག་གི་རྒྱལ་ས་པེ་ཅིན་དུ་རྒྱ་ནག་གི་ཕྱི་སྲིད་བློན་ཆེན་ཝང་ཡི་ཟེར་བ་དང་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་མཉམ་ལས་ཀྱི་ནུས་པ་སྐྱེད་ཐབས་དང་འབྲེལ་ལམ་སྲ་བརྟན་ཡོང་ཐབས་ཟེར་བ་ཞིག་གི་འོག་ནས། རྒྱ་ནག་གིས་རྒྱ་གར་གྱི་གནས་མཇལ་བ་རྣམས་བོད་ཀྱི་གངས་རིན་པོ་ཆེར་གནས་མཇལ་གཏང་རྒྱུ་དང་། རྒྱ་དཀར་ནག་གཉིས་ཀྱི་མཁའ་ལམ་སྒོ་ཕྱེ་ནས་གནམ་གྲུ་ཤར་གཏོང་བྱ་རྒྱུ་སོགས་ཚུད་པའི་མཉམ་ལས་ཀྱི་ཐད་གྲོས་མོལ་བྱས་ཡོད་ཅིང་། སྐུ་ཞབས་ཝི་ཀི་རམ་མཆོག་གིས་དེ་སྔ་རྒྱ་ནག་གི་རྒྱལ་ས་པེ་ཅིན་དུ་རྟེན་གཞི་བྱས་པའི་རྒྱ་ནག་གཞུང་ཚབ་པ་གནང་མྱོང་སྟབས། ཕྱོགས་ཡོངས་ནས་རྒྱ་ནག་ཕྱི་སྲིད་བློན་ཆེན་ལས་ཁུངས་དང་། ལྷག་པར་རྒྱ་ནག་གི་གནད་ཡོད་མི་སྣ་ཁག་ལ་འབྲེལ་བ་ཡོད་པའི་རྒྱ་གར་གྱི་ཆེས་མཐོའི་དཔོན་རིགས་ཤིག་ཏུ་ངོས་འཛིན་གནང་གི་ཡོད།

ཉེ་ལམ་ཨེ་ཤ་ཡའི་ལྷོ་རྒྱུད་ཀྱི་ཧྥི་ལི་པེན་སི་རྒྱལ་ཁབ་ཀྱི་རྒྱལ་ས་མ་ནི་ལ་(Manila) རུ་བསྡུས་པའི་ཨེ་ཤ་ཡའི་རྒྱལ་ཁབ་ཁག་གི་ཕྱི་སྲིད་བློན་ཆེན་གྱི་ཚང་འཛོམས་དང་བསྟུན། ཟླ་འདིའི་ཕྱི་ཚེས་ ༢༢ ཉིན་རྒྱ་གར་ཕྱི་སྲིད་བློན་ཆེན་ཇེ་ཤར་གར་(Jaishankar ) མཆོག་གིས་རྒྱ་ནག་ཕྱི་སྲིད་བློན་ཆེན་ཝང་ཡི་དང་ཐུག་འཕྲད་བགྱིས་ཏེ། ཕྱི་ལོ་ ༢༠༢༤ ལོར་ཕྱོགས་གཉིས་ཀྱི་མགོ་ཁྲིད་གཉིས་བྷིག་སི་ (BRICS) ཚོགས་ཆེན་ཐོག་ཐུག་འཕྲད་སྐབས་ཀྱི་གྲོས་མོལ་གཞིར་བཞག་ནས་ཕྱོགས་གཉིས་ཀྱི་མཉམ་ལས་ཀྱི་ནུས་པ་ཇེ་མཐོར་གཏང་རྒྱུ་སོགས་ཀྱི་སྐོར་ལ་གླེང་སློང་བྱས་ཡོད་ཅིང་། དེ་དང་འབྲེལ་ནས་སྐུ་ཞབས་ཇེ་ཤང་གར་མཆོག་གིས། ང་ཚོས་ཕན་ཚུན་བརྩི་འཇོག་དང་། ཕན་ཚུན་ཁེ་ཕན། ཕན་ཚུན་ཚོར་ཤེས་བཅས་ཀྱི་རྨང་གཞིའི་ཐོག་བརྟན་བརླིང་དང་མཉམ་ལས་ཀྱི་འབྲེལ་བ་ཡག་ཤོས་འཕེལ་རྒྱས་གཏོང་ཐུབ་པར་ཡིད་ཆེས་བྱེད་ཀྱི་ཡོད། འདི་ལྟ་བུའི་འབྲེལ་བ་ཡིས་མང་སྣ་ཅན་གྱི་ཨེ་ཤ་ཡ་( multi-polar Asia) དང་མང་སྣ་ཅན་གྱི་འཛམ་གླིང་ལ་(multi-polar world) རིན་ཐང་ལྡན་པའི་ཞབས་འདེགས་སྒྲུབ་ཐུབ། ཅེས་གསུངས་འདུག

ད་བར་རྒྱ་དཀར་ནག་གཉིས་བར་ཧིན་བོད་མཐའ་མཚམས་ཁུལ་དུ་རྩོད་རྙོག་ཡང་ཡང་འབྱུང་གི་ཡོད་ཅིང་། ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན།  ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན་འཁོན་འཛིང་ཆེ་རུ་ཕྱིན་ཏེ། འདས་པའི་ལོ་ཤས་རིང་རྒྱ་དཀར་ནག་གཉིས་བར་ཧིན་བོད་མཐའ་མཚམས་ཁུལ་དུ་གདོང་ཐུག་ཡང་ཡང་བྱུང་ནས་གནས་སྟངས་ཛ་དྲག་ཅན་དུ་གྱུར།

དེ་བཞིན་ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་མ་ཟད། ཉེ་ཆར་རྒྱ་ནག་གཞུང་གིས་རྒྱ་གར་གྱི་ཨ་རུ་ན་ཅལ་མངའ་སྡེའི་རྒྱལ་ཁབ་གཉིས་ཀྱི་ས་མཚམས་ས་ཐིག་ (LAC) ལས་སྤྱི་ལེ་འགའ་ཤས་ཀྱི་ས་ཆར་གྲོང་ཚོ་ཞིག་གསར་འཛུགས་དང་། དེ་བཞིན་རྒྱ་ནག་གིས་སུ་བྷན་སི་རུ་སྟེང་མ་(Upper Subansiri ) རྫོང་ཁུལ་དུ་གཞུང་ལམ་གསར་རྒྱག་གིས་རླངས་འཁོར་ཤར་གཏོང་བྱེད་མུས་ཡིན་ལ། རྒྱ་གར་གྱིས་ཀྱང་ལ་དྭགས་རང་སྐྱོང་གི་མཐའ་མཚམས་བྱང་ཐང་ཁུལ་གྱི་ཆུ་དམར་ས་ཁུལ་དུ་རྒྱལ་སྲུང་བདེ་འཇགས་དང་། ཡུལ་མིའི་འཚོ་གནས་བརྟན་སྲུང་གི་སླད་དུ་གྲོང་ཚོ་ཐོག་མ་དེ་གསར་འཛུགས་ཀྱི་རྨང་རྡོ་འཇོག་ཡོད།

གསར་འགོད་པ། དཔལ་ལྡན།