རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད། དགེ་བསྟན་གྱིས།
བཙན་བྱོལ་བོད་མིའི་བཅའ་ཁྲིམས་ལེའུ་ལྔ་བ། དོན་ཚན་སོ་བདུན་པའི་ནང་གསལ་ལྟར་གྱི་བཙན་བྱོལ་བོད་མིའི་སྤྱི་འཐུས་ཀྱི་གྲུབ་ཆ་དང་ཡོང་ཁོངས་ཀྱི་ལམ་ལུགས་དེ་ནི་མེད་དུ་མི་རུང་བའི་དམངས་གཙོའི་ཆ་རྐྱེན་ཞིག་མིན་ཡང་ད་ལྟའི་བར་དུ་གལ་ཆེའི་ལམ་ལུགས་ཤིག་ཏུ་བརྩིས་ཡོད། འོན་ཀྱང་ལམ་ལུགས་དེ་ང་ཚོས་དེ་སྔའི་བྱུང་རིམ་དང། ད་ལྟའི་གནས་བབ།འབྱུང་འགྱུར་གྱི་དགོས་མཁོ་བཅས་ཕྱོགས་གང་ནས་དཔྱད་ཀྱང་ཕན་རླབས་ཆེ་བའི་ལམ་ལུགས་ཤིག་ཏུ་མ་མཐོང། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
ཁོངས་སོ་སོ་ནས་ཡོང་བའི་སྤྱི་འཐུས་གཙོ་བོར་གྱུར་བའི་མི་སྣ་ཁག་ཅིག་གིས་གྲུབ་ཆ་དེ་གལ་གནད་ཆེ་བའི་རྒྱུ་མཚན་དུ་ཆོལ་ཁ་ཆོས་ལུགས་གལ་ཆེན་ཡིན་པ་བགྲང་གི་ཡོད། ཆོལ་ཁ་ཆོས་ལུགས་གལ་ཆེ་ཡིན་ཡང་ཆོལ་ཁ་ཆོས་ལུགས་ཀྱི་འཐུས་མི་ཚོས་ཆོལ་ཁ་ཆོས་ལུགས་ལ་དོན་དམ་གྱི་ཕན་ཐོགས་གང་འདྲ་ཞིག་བྱུང་གི་ཡོད་མེད་ལ་ང་ཚོས་ངེས་པར་དཔྱད་ཞིབ་བྱེད་དགོས་པའི་གནད་དོན་ཞིག་མ་རེད་དམ། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད། ལྷག་པར་དེང་སྐབས་ཆོལ་ཁ་ཆོས་ལུགས་ཁག་གི་སྤྱི་འཐུས་མི་ཉུང་བ་ཞིག་ཆགས་སྡང་རགས་པའི་དབང་དུ་གྱུར་ཏེ་སྒོ་གསུམ་རྩུབ་སྤྱོད་ཀྱི་རྣམ་འགྱུར་ཚད་ལས་བརྒལ་བ་སོགས་ཀྱི་སྟེང་ནས་མཐོང་སྣང་ངན་པ་ཞིག་ཡོང་གི་ཡོད་ལ།དེའི་རྐྱེན་གྱིས་ཆོལ་ཁ་དང་ཆོས་ལུགས་ལ་རྨ་ཤུལ་ཆེན་པོ་བཟོ་བཞིན་ཡོད་པས། གནད་དོན་དེ་དང་དེས་མཚོན་པའི་བཙན་བྱོལ་བོད་མིའི་དམངས་གཙོའི་ཞན་ཆ་ཁག་གི་འབྱུང་རྩ་ལ་ངེས་པར་འགྱུར་བཅོས་གཏོང་བའི་དུས་སུ་སླེབས་ཡོད་པར་སྙམ། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
གལ་ཏེ་ཆོས་ལུགས་སྤྱི་འཐུས་ཀྱི་ས་མིག་དེ་ཡོད་ན་སངས་རྒྱས་ཀྱི་བསྟན་པ་དར་ཞིང་རྒྱས་པ་དང། མེད་ན་དར་རྒྱས་མི་ཐུབ་པའི་གནད་དོན་ཞིག་མིན་ལ། ཆོས་ལུགས་སྤྱི་འཐུས་ཀྱི་ས་མིག་ཡོད་ན་དམངས་གཙོ་ཚད་ལྡན་ཡིན་པ་དང་མེད་ན་ཚད་མི་ལྡན་པ་ཞིག་དེ་བས་ཀྱང་མིན་པར་སྙམ། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
དེར་མ་ཟད་ཆོས་ལུགས་སྤྱི་འཐུས་ཀྱི་ས་མིག་དེ་དམངས་གཙོའི་ཁེ་དབང་དོ་མི་མཉམ་པའི་དོན་དངོས་གནད་དོན་ཞིག་ཏུ་གྱུར་ཡོད་པས་ངེས་པར་འགྱུར་བཅོས་གཏོང་གལ་ཆེ་བར་མངོན། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
ཡང་ཅིག་བཤད་ན་ཆོལ་ཁ་ཆོས་ལུགས་སྤྱི་འཐུས་ཡོང་ཁོངས་ལ་གཞིགས་པའི་འོས་འདེམས་བྱེད་སྟངས་དེའི་མཇུག་འབྲས་སུ་གྱུར་བའི་ཞན་ཆའི་གནད་དོན་མང་ཞིང། དེ་ཡང་ཆོལ་ཁ་ཆོས་ལུགས་ཀྱི་ཕྱོགས་སུ་ལྷུང་འདོད་མེད་མཁན་ཞིག་ཡིན་ན་ཡང་འདམ་བྱ་དང་འདེམ་བྱེད་གང་དུ་ཞུགས་ཚེ་རང་བཞིན་གྱིས་ཕྱོགས་སུ་མི་ལྷུང་ཀ་མེད་དུ་གྱུར་ཡོད། གནད་དོན་འདི་གཅིག་པུའི་སྟེང་ནས་ཀྱང་ཞན་ཆ་མང་དག་ཅིག་མཐོང་ཐུབ་པས་སྐྱོན་གནད་དེ་སེལ་དགོས་ན་འོས་འདེམ་བྱེད་སྟངས་ལ་འགྱུར་བཅོས་གཏོང་དགོས་པར་སྙམ། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
གལ་སྲིད་ཆོལ་ཁ་སོ་སོའི་སྤྱི་འཐུས་བཅུ་རེ་ངེས་པར་དགོས་པ་ཞིག་ཡིན་ནའང་འོས་སྔོན་འགྲོ་སྔར་བཞིན་ཆོལ་ཁོངས་སོ་སོ་ནས་འོས་འདེམས་བྱ་རྒྱུ་ལས།འོས་དངོས་གཞིར་ཆོལ་ཁ་རིས་མེད་ཀྱི་ངོ་བོ་ཐོག་གྲངས་ཚད་བཅུ་རེ་འདེམས་ཐུབ་བྱ་རྒྱུའི་ཁྲིམས་ལུགས་ཤིག་ངེས་པར་དགོས་གལ་མཐོང་། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
བཀའ་བློན་ཁྲི་པ་དང་སྤྱི་འཐུས་སོགས་ཀྱི་འོས་བསྡུའི་ལས་རིམ་ནང་འོས་འཕེན་མཁན་ཡོད་ཚད་མཉམ་ཞུགས་ཡོང་ཐུབ་པ་ལ་ཐབས་ལམ་མེད་པ་མིན་ཏེ། རང་བདེན་ལག་དེབ་ཀྱི་ཁྲལ་དངུལ་ལོ་ལྟར་འབུལ་དགོས་པ་དེ་བོད་མི་ཡོད་དོ་ཅོག་གི་གཞི་རྩའི་ཆ་རྐྱེན་ཞིག་ཏུ་གཞུང་འབྲེལ་གྱིས་གཏན་འབེབས་གནང་ཡོད་པ་ལྟར། ལག་དེབ་དེའི་མཇུག་ཏུ་འོས་འཕེན་མིང་འགོད་ཀྱི་རེའུ་མིག་ཅིག་གསར་བསྣོན་བྱས་ཏེ་ལོ་རེའི་ཁྲལ་དངུལ་གཙང་འབུལ་དགོས་པ་བཞིན་སྐབས་སོ་སོའི་འོས་ཤོག་ཆ་ཤས་གཙང་ལེན་དགོས་པ་གཞི་རྩའི་ཆ་རྐྱེན་ཏུ་གཏན་འབེབས་གནང་ཚེ་འོས་འཕེན་སྔར་ལས་མང་དུ་འགྲོ་ངེས་ཡིན་པར་སྙམ། རྒྱ་ཆེའི་དྲ་གྲོགས་ཚོར་དགོངས་ཚུལ་ཅི་ཡོད།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
དྲ་གྲོགས་དགེ་བསྟན་ལགས་ཆོལ་ཁ་དང་ཆོས་ལུགས་ཀྱི་སྤྱི་འཐུས་དེ་ངེས་པར་དུ་དགོས་པ་མ་ཟད་རྒྱལ་བ་དོན་གྱི་བདག་པོའི་དགོངས་བཞེད་བླ་ན་མེད་པའང་རེད།དེ་བས་ན་ཆོས་ལུགས་ཀྱི་སྤྲི་འཐུས་དེ་མེད་པ་གྱུར་ཚེ་དུས་དེ་ནས་བཟུངས་དགོན་སྡེ་ཁག་གི་བདེ་སྡུག་གནས་ཆུལ་གྲོས་ཚོགས་ཀྱི་ར་བ་ནང་སླེབས་མི་སྲིད་བོད་གཞུང་དང་རབ་བྱུང་ངུར་སྨྲིག་གི་སྡེ་གཉིས་པོ་དེ་ཡ་བྲལ་དུ་འགྱུར་རྒྱུ་གདོན་མི་ཟ་བའོ།
དགེ་བསྟན་གྱི་དགོངས་ཚུལ་དེར་བརྒྱ་ཆ་བརྒྱ་ཐམ་པ་རྒྱབ་སྐྱོར་ཡོད། བཙན་བྱོལ་དུ་་འབྱོར་བ་ནས་དུས་ད་ལྟ་བར་བཙན་བྱོལ་སྤྱི་ཚོགས་ཆིག་སྒྲིལ་མ་ཡོང་བའི་འགག་རྩ་ཡང་ཆོལ་ཁ་ཆོས་ལུགས་ཀྱི་སྤྱི་འཐུས་དེ་ལ་ཐུག་འདུག འབྱུང་འགྱུར་གྱི་བཀའ་ཁྲིའི་ཕྱག་ལས་ལམ་དུ་གཏོང་མིན་དེ་ཡང་སྤྱི་འཐུས་ལྷན་ཚོགས་ལ་རག་ལས་ཡོད།
དེས་ན་སྐུ་ཉིད་ལ་འདིའི་ཐད་དུ་བསམ་ཚུལ་ལྷུག་པོ་ཞིག་གནང་རྒྱུ་འདྲ་ཡོད་དམ། ཁོང་གིས་སྤུན་ཟླ་དག་ལ་བསམ་ཚུལ་འདིས་གླེང་གཞི་གཞི་གཏིང་བ་ཡིན་དུས། དུས་བབ་ཚང་གི་ཀ་བ་ལྟ་བུའི་ཁང་གསར་ལགས་ཉིད་རང་ལྟ་བའི་འདིའི་ཐད་དུ་བསམ་ཚུལ་ཞིག་སྤེལ་བ་ཡིན་ན། མི་མང་བོ་ཞིག་གིས་གདེང་ཆོག་བྱེད་ཀྱི་ཡོད་པ་རེད། དེ་མ་གཏོགས་ང་ལྟ་བུ་རེ་ཟུང་གིས་སྐད་ཆ་ནི་གོང་མེད་པ་ནི་ཤེས་གསལ་རེད་ལ། བཤད་ཀྱང་ཡག་པོ་ཞིག་ཤེས་ཀྱི་ཡོད་པ་རེད། ཉན་མཁན་དང་ཀློག་མཁན་བྱས་ན་ཡག་གི་རེད། འགྲིག་མིན་དང་བདེན་མིན་དེ་གནས་ཚུལ་རིམ་གྱིས་ལྷུང་དུ་འབུད་ངེས་རེད་ལགས།
ལྷག་པར་དུ། སྤྱི་འཐུས་སུ་ཞིག་གིས་ངོས་ནས་རང་ཉིད་ནི་བོད་མི་མང་གི་སྤྱི་མི་ཞིག་དུ་བསམ་རྒྱུ་དེ་ལས་གལ་ཆེ་བ་ཞིག་མེད་ལ། དེ་ལྟར་བསམ་ཐུབ་མཁན་ནི་དེ་ལྟར་བྱེད་ཐུབ་མཁན་ཞིག་གི་ཅིས་ཀྱང་མེད་དུ་མི་རུང་བ་ཞིག་ཆགས་ཡོད་པ་ཡིན་དུས། སྤུན་ཟླ་གང་ན་སུ་ཡོད་པ་དག་གིས་ཀྱང་དེ་དོན་སེམས་ལ་བཅིངས་ནས་མ་འོངས་སྤྱི་འཐུས་འདེམས་ཕྱོགས་ནོར་མི་རང་བར་འདོད་དོ།
བསམ་བློ་གཏོང་རིན་ཡོད་པ་ཞིག་བྲིས་འདུག ལྷག་པར་༼ཆོལ་ཁ་ཆོས་ལུགས་ཀྱི་ཕྱོགས་སུ་ལྷུང་འདོད་མེད་མཁན་ཞིག་ཡིན་ན་ཡང་འདམ་བྱ་དང་འདེམ་བྱེད་གང་དུ་ཞུགས་ཚེ་རང་བཞིན་གྱིས་ཕྱོགས་སུ་མི་ལྷུང་ཀ་མེད་དུ་གྱུར་ཡོད། གནད་དོན་འདི་གཅིག་པུའི་སྟེང་ནས་ཀྱང་ཞན་ཆ་མང་དག་ཅིག་མཐོང་ཐུབ་པས་སྐྱོན་གནད་དེ་སེལ་དགོས་ན་འོས་འདེམ་བྱེད་སྟངས་ལ་འགྱུར་བཅོས་གཏོང་དགོས་པར་སྙམ། ༽ཞེས་པ་དེ་གནད་འགག་ཅིག་རེད།
འོན་ཀྱང་༼ལག་དེབ་དེའི་མཇུག་ཏུ་འོས་འཕེན་མིང་འགོད་ཀྱི་རེའུ་མིག་ཅིག་གསར་བསྣོན་བྱས་ཏེ་ལོ་རེའི་ཁྲལ་དངུལ་གཙང་འབུལ་དགོས་པ་བཞིན་སྐབས་སོ་སོའི་འོས་ཤོག་ཆ་ཤས་གཙང་ལེན་དགོས་པ་གཞི་རྩའི་ཆ་རྐྱེན་ཏུ་གཏན་འབེབས་གནང་ཚེ་འོས་འཕེན་སྔར་ལས་མང་དུ་འགྲོ་ངེས་ཡིན་པར་སྙམ༽ ཞེས་པ་དེ་ཡོང་གི་མ་རེད། གང་ཡིན་ཟེར་ན། མང་གཙོའི་སྤྱི་ཚོགས་ནང་འོས་འཕེན་དབང་ཡོད་པ་བཞིན་མི་འཕེན་པའི་དབང་ཆ་ཡང་ཡོད་རེད།