སྤྱིར་མི་སུས་ཀྱང་བོད་ཀྱི་ཆབ་སྲིད་ཀྱི་མགོ་ཁྲིད་བྱེད་ཆོག་ཅིང། དེའང་འདས་པའི་བོད་ཀྱི་ལོ་རྒྱུས་ཁག་ལ་རྒྱུས་མངའ་ཆ་ཚང་ཡོད་པ་ཞིག་དང། ཉམས་ཞིབ་ཐུབ་མཁན་ཞིག་ཡོད་དགོས་རྒྱུ་གལ་ཆེན་པོ་རེད། ཀརྨ་པ་སྐུ་ཐོག་གོང་མ་རྣམས་ཀྱིས་ཆོས་ཕྱོགས་ཁོ་ནའི་མཛད་འཕྲིན་བསྐྱངས་པ་མ་གཏོགས། གཞུང་ཕྱོགས་དང་འབྲེལ་བའི་སྲིད་དབང་བཟུང་མྱོང་མེད་པ་ཞིག་ཡིན་དུས། ངའི་བསམ་ངོར་ངས་འདས་པའི་ཀརྨ་པའི་ལོ་རྒྱུས་ཀྱི་འབྱུང་རིམ་ཁག་ལ་མཚན་གཅིག་ནང་དུ་བསྒྱུར་བཅོས་ཀྱིས། སང་ཉིན་ནས་ཀརྨ་པའི་མཛད་འཕྲིན་བསྐྱངས་ཕྱོགས་དེ་ཆོས་ཕྱོགས་ལས་ལྷག་པའི་ངོ་བོ་ཞིག་ཏུ་བཟོ་རྒྱུ་ནི་ཞེ་དྲག་གི་དཀའ་ལས་ཁག་པོ་རེད་བསམ་གྱིན་འདུག
ཟླ་འདིའི་ཚེས་ ༢༠ ཉིན་རྒྱ་གར་དུས་བབ་གསར་ཁང་གིས་༸རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ལྡི་ལིར་ཆིབས་བསྒྱུར་གནང་བ་དང་འབྲེལ་དྲི་བ་འགའ་བཅར་འདྲི་ཞུས་ཡོད་པ་དང། དེར་ལན་འདེབས་གནང་བ་གཤམ་གསལ།
ར་མེ་ཤ་རོ་ཤན་ལལ། ཁྱེད་རང་གིས་བཤད་ན་ང་ཚོ་རྒྱ་གར་གཞུང་ཕྱོགས་ནས་རྒྱ་ནག་གི་ཐོག་ཏུ་ཆབ་སྲིད་འཛིན་སྟངས་དང། རྒྱ་ནག་གིས་ངེད་ཚོར་བལྟ་སྟངས་གང་འདྲ་འདུག
༸རྒྱལ་བ་ཀརྨ་པ། ད་སྐབས་རྒྱ་ནག་དང་འབྲེལ་མོལ་རྒྱུན་འཁྱོངས་བྱེད་མཁན་གྱི་རྒྱ་གར་ཆབ་སྲིད་པའི་ཕྱོགས་ལ་ངས་དམིགས་བསལ་ཞུ་ཚོད་ཐིག་གི་མི་འདུག ཕྱོགས་གཉིས་པོའི་གཞུང་ཕྱོགས་ནས་ད་ལྟའི་འབྲེལ་མོལ་གྱི་ཐོག་ལ་སོ་སོའི་སྤྲོ་སྣང་རེ་ཡོད་པ་རེད། གལ་སྲིད་ང་ལ་གནད་དོན་དེའི་ཐོག་སོ་སོའི་མཐོང་ཕྱོགས་དང་རྒྱུས་ལོན་བྱེད་ཕྱོགས་ཤིག་ཤོད་ཟེར་ན། རྒྱ་ནག་གཞུང་གིས་རྒྱ་གར་ལ་ཆེད་དུ་དམིགས་ནས་ཕྲན་བུ་སུན་བཙིར་བཟོ་གི་ཡོད་པའི་རྣམ་པ་ལྟ་བུ་འདུག གང་ཡིན་ཟེར་ན། རྒྱ་གར་ནི་དུས་ནམ་ཡིན་ཡང་ཞི་བདེའི་རྒྱལ་ཁབ་ཅིག་ཡིན་ཞིང་དམག་དོན་གྱི་ཐད་ལ་བརྒྱུད་སྐུལ་བྱ་རྒྱུར་དང་དོད་མེད་ལ། ཞི་བདེར་ཆེ་མཐོང་སྤྲོད་མཁན་གྱི་རྒྱལ་ཁབ་ཅིག་ཡིན་དུས། ད་བར་གྱི་ལོ་རྒྱུས་ཀྱི་ཁྲོད་རླབས་ཆེའི་མཛད་རྗེས་བཞག་མྱོང་ཡོད་པ་རེད། གང་ལྟར་ཡང་དེང་སྐབས་རྒྱ་གར་དེ་རྒྱལ་སྤྱིིའི་སྤྱི་ཚོགས་ཁྲོད་དུ་ཡར་རྒྱས་འགྲོ་མུས་ཡིན་ཡང། རྒྱ་ནག་གཞུང་ཕྱོགས་ནས་ཡར་ཐོན་འགྲོ་རྒྱུར་བཙན་འགོག་བྱེད་ཀྱི་ཡོད་པ་ནི་ང་ཚོས་མངོན་གསལ་དོད་པོས་མཐོང་གསལ་རེད།
ར་མེ་ཤ་རོ་ཤན་ལལ། སྐུ་ཉིད་ཕྱི་ལོ་ ༢༠༠༠ ལོར་བོད་ནས་བྲོས་བྱོལ་དུ་ཕེབས་པ་ནས་བཟུང་། ད་བར་བོད་དུ་ཕྱིར་བསྐྱོད་གནང་མེད་པ་ཡིན་དུས། ད་སྐབས་ཁྱེད་རང་དང་རྒྱ་ནག་མཐོ་རིམ་མི་སྣའི་དབར་ལ་འབྲེལ་ལམ་ཡོད་མེད་དང་། རྒྱ་ནག་གཞུང་ཕྱོགས་ནས་ཁྱེད་རང་སླར་བོད་དུ་ཕེབས་རྒྱུར་དམིགས་བསལ་གྱི་མགྲོན་འབོད་འདྲ་གནང་བྱུང་ངམ།
༸རྒྱལ་དབང་ཀརྨ་པ། སྤྱིར་ང་ལ་དམིགས་བསལ་གྱི་འབྲེལ་བ་གང་ཡང་མེད་ཀྱང་། སྔར་ང་བོད་ལ་ཡོད་དུས་རྒྱ་ནག་གི་བཙན་འོག་ཏུ་ཡོད་པས། བཙན་དབང་འདེིའི་འོག་ནས་ང་ལ་ངོ་ཤེས་ཕྲན་བུ་རེ་ཡོད་ཁུལ་རེད། འོན་ཀྱང་ད་ཆ་རྒྱ་གར་དུ་བསླེབས་པ་ནས་བཟུང་། ཕྱོགས་གང་གི་ཡང་གཉའ་གནོན་དང་བཙན་འགེལ་མེད་པས། རྒྱ་ནག་མཐོ་རིམ་མི་སྣའི་དབར་ལ་འབྲེལ་འདྲིས་ཡོད་རྒྱུ་ལྟ་ཞོག ཐ་ན་སྐད་ཆ་ཡང་བྱུང་མ་མྱོང་།
ར་མེ་ཤ་རོ་ཤན་ལལ། ཁྱེད་རང་སྤྱིར་རྒྱ་ནག་གཞུང་ཕྱོགས་དང་། ༧གོང་ས་མཆོག་ཐུན་མོང་གིས་ངོས་འཛིན་བྱས་པའི་ཀརྨ་པའི་ཡང་སྲིད་འཁྲུལ་བྲལ་ཞིག་ཡིན་དུས། མི་མང་པོ་ཞིག་གིས་བོད་རྒྱ་གཉིས་པོའི་མཐུན་སྒྲིལ་བཟང་ཕྱོགས་སུ་འགྲོ་རྒྱུར། ཁྱེད་རང་གིས་ཁ་ཕྱོགས་གསར་པ་ཞིག་ཏུ་འཁྲིད་ཐུབ་པར་བཤད་ཀྱི་ཡོད་པ་རེད། འོན་ཀྱང་ཁྱེད་རང་ལ་མཚོན་ན་རྒྱ་ནག་གཞུང་ཕྱོགས་ལ་ཁོང་ཁྲོ་ཆེན་པོ་ཡོད་བཟོ་འདུག
༸རྒྱལ་དབང་ཀརྨ་པ། དེ་ནི་རྩ་བ་ནས་བདེན་པ་མ་རེད། སྤྱིར་ང་རང་ནང་ཆོས་དོན་གཉེར་བྱེད་མཁན་ཞིག་ཡིན་པའི་ཆ་ནས། ངས་དུས་རྒྱུན་དུ་ཕྱོགས་རིས་དང་འཐེན་འཁྱེར་མེད་པའི་ངང་ཚུལ་འཛིན་རྒྱུ་དང་། ལྷག་པར་རང་གི་ཕྱོགས་གཏོགས་ལ་ཆགས་ཞེན་ཆེན་པོ་དང་། མི་འདོད་པའི་རིགས་གཞན་ལ་ཁོང་ཁྲོ་དང་ང་རྒྱལ་བྱེད་རྒྱུ་སོགས་འཇིག་རྟེན་པའི་ལས་ལས་ཡོངས་སུ་གྲོལ་རྒྱུར་འབད་བརྩོན་ཤུགས་ཆེན་བྱེད་ཀྱི་ཡོད། ང་རང་སྒེར་གྱི་དགའ་སྣང་ལྟར་བྱས་ན། ༧གོང་ས་མཆོག་གིས་སྲོལ་གཏོད་གནང་བའི་དབུ་མའི་ལམ་གྱི་ལངས་ཕྱོགས་འདིར་ཞེ་དྲག་གི་ཚོར་བ་རྣོན་པོ་དང་། རྒྱབ་སྐྱོར་ཆེན་པོ་ཡོད། དེས་བོད་མི་རིགས་ཙམ་མ་ཟད། རྒྱ་ནག་ལའང་དོན་དངོས་ཀྱི་ཕན་འབྲས་ཆེ་ཤིང་། དོན་སྨིན་ལྡན་པ་ཞིག་ཡོང་ཐུབ་གི་རེད། བོད་མི་ཚོའི་ནང་དུའང་བརྒྱ་ཆ་ ༩༠ ལྷག་གིས་དབུ་མའི་ལམ་ལ་ཁ་ཞེ་གཉིས་མེད་ཀྱི་རྒྱབ་སྐྱོར་བྱེད་ཀྱི་ཡོད་པ་རེད། ངས་རང་ཉིད་བོད་མི་གཞན་ལྟར་བོད་མི་རིགས་ཀྱི་དཀའ་ངལ་སེལ་རྒྱུར་འོས་འགན་ཡོད་པར་བསམ་གྱི་ཡོད་ལ། ད་སྐབས་བཙན་བྱོལ་བོད་གཞུང་གིས་རྒྱ་ནག་མཐོ་རིམ་དཔོན་རིགས་ཚོ་དང་འབྲེལ་མོལ་བྱེད་ཀྱི་ཡོད་པ་རེད། འོན་ཀྱང་དེས་དེ་ཙམ་གྱི་དོན་འབྲས་སྨིན་པ་ཞིག་བྱུང་ཐུབ་མེད། དེ་འདྲ་ཡིན་དུས་ང་ཚོས་ད་ཆ་གོ་སྐབས་བཟང་པོ་ཞིག་ཡོང་རྒྱུར་ངང་སྒུག་དང། རྟོགས་ཞིབ་བྱེད་དགོས་པ་རེད།
ར་མེ་ཤ་རོ་ཤན་ལལ། ཁྱེད་རང་ད་ཆ་གུང་ལོ་ ༢༤ ཕེབས་ཟིན་ཅིང། བོད་རིགས་ཚོ་རྒྱ་གར་དུ་སླེབས་ནས་ལོ་ངོ་ ༥༠ ཙམ་འགྲོ་གི་ཡོད་པ་རེད། ཁྱེད་རང་གི་བསམ་ངོར་བྱས་ན་ཁྱེད་རང་གུང་ལོ་ ༥༠ ཕེབས་སྐབས་དེ་ལྟ་བུའི་གོ་སྐབས་ཞིག་ཡོང་རྒྱུ་དང། བཙན་བྱོལ་དུ་གནས་མཁན་བོད་རིགས་ཐམས་ཅད་རྒྱ་གར་གི་མི་རིགས་སུ་འགྱུར་གྱི་རེད་དྲན་གྱི་འདུག་གམ།
༧རྒྱལ་དབང་ཀརྨ་པ། ད་སྐབས་ང་ཚོར་རྒྱ་གར་གཞུང་དམངས་གཉིས་པོའི་རླབས་ཆེ་བའི་རྒྱབ་སྐྱོར་དང། འཛམ་གླིང་གི་མིག་དཔེར་འོས་པའི་དབུ་ཁྲིད་སྤྱི་ནོར་༸གོང་ས་སྐྱབས་མཆོན་ཆེན་པོ་མཆོག་ཡོད་དུས། བོད་མི་ཚོས་རང་གི་རིག་གཞུང་དེ་ཚད་གཞི་ངེས་ཅན་ཞིག་གི་བར་ཉར་ཚགས་བྱས་དང་བྱེད་མུས་ཡིན་པ་རེད་ལ། བོད་ནང་གི་བོད་མི་ཚོས་བོད་ཀྱི་རིག་གཞུང་སྲུང་སྐྱོབ་ཐད་ལ་དཀའ་ངལ་གང་མང་རྒྱག་གི་ཡོད་པ་ང་ཚོས་ཤེས་གསལ་ཙམ་མིན་པར་མངོན་སུམ་དུ་མཐོང་ཐུབ་ཀྱི་ཡོད་པ་རེད། གཉན་འཕྲང་གི་དུས་ཚོད་འདི་ལྟ་བུའི་ནང་ང་ཚོས་རང་གི་འདོད་པ་ལྟར། རིག་གཞུང་སྲུང་སྐྱོབ་དང་རྒྱུན་འཛིན་བྱ་རྒྱུར་དཀའ་ངལ་མི་ཉུང་བ་ཞིག་འཕྲད་རྒྱུ་ཡིན་པ་བསྙོན་མེད་རེད། གལ་སྲིད་ང་ཚོས་དོན་དངོས་ཐོག་རང་གི་རིག་གཞུང་དུས་ཡུན་རིང་པོའི་རིང་རྒྱུན་འཛིན་བྱ་དགོས་ན། དེ་ནི་ངེས་པར་དུ་བོད་ནང་དུ་བྱེད་དགོས་པ་རེད། རྒྱུ་མཚན་དེ་ལ་བརྟེན་ནས་ངས་བོད་ཀྱི་གནས་སྟངས་དེ་ཛ་དྲག་པོ་ཞིག་ཏུ་མཐོང་གི་འདུག་ལ། རྒྱལ་སྤྱིའི་གཞུང་མང་ཚོས་བོད་ཀྱི་ཐོག་ཏུ་དོ་སྣང་གང་ལས་མང་བ་བྱེད་དགོས་པར་བསམ་གྱི་འདུག ང་ཚོས་ལས་དོན་གང་ཞིག་བྱེད་ཀྱང་མགྱོགས་མྱུར་བྱེད་དགོས་པ་ལས། དུས་ཚོད་ནར་འགྱངས་གཏོང་རྒྱུ་མི་འདུག
ར་མེ་ཤ་རོ་ཤན་ལལ། ཁྱེད་རང་ད་ལྟ་སྐུ་ན་གཞོན་དུས། ངས་ཤེས་ཚོད་ལ་ཁྱེད་རང་ཕྲན་བུ་བཟོད་སྒོམ་མི་ཐུབ་མཁན་ཞིག་ཡིན་པ་འདྲ། ད་སྐབས་༸གོང་ས་མཆོག་གུང་ལོ་ ༧༣ ལ་ཕེབས་ཀྱི་ཡོད་དུས། མི་མང་པོ་ཞིག་གིས་ཁྱེད་རང་༸གོང་ས་མཆོག་གི་རྗེས་འབྲངས་གནང་དགོས་པར་བཤད་ཀྱི་ཡོད་པ་རེད། རྒྱུ་མཚན་ནི་ཁྱེད་རང་གཞིས་བྱེས་མང་ཚོགས་ཀྱི་ལོ་རྒྱུས་དང་དཀའ་སྡུག་སོགས་ཕྱོགས་གང་གི་ཐད་ནས་སྐུ་ཚབ་མཚོན་གྱི་ཡོད་པ་རེད། ༸གོང་ས་མཆོག་ནས་ད་བར་ཁྱེད་ལ་དམིགས་བསལ་གྱི་ལམ་སྟོན་འདྲ་གནང་བྱུང་ངམ།
༸རྒྱལ་དབང་ཀརྨ་པ། ཁྱེད་རང་གིས་ང་ལ་དམིགས་བསལ་གྱིས་མང་ཚོགས་ཀྱི་རྨང་གཞི་ལྡན་པར་ངོས་འཛིན་བྱེད་ཀྱི་ཡོད་པར་འགྲེལ་བརྗོད་བྱས་པ་ལྟར། སྤྱིར་བཏང་གི་ཆ་ནས་ངས་འདིར་ངོས་ལེན་བྱེད་ཀྱི་ཡོད་ལ། ངས་ང་རང་གི་ལོ་རྒྱུས་ཀྱི་ཆ་ནས་ང་ལ་གཞི་རྟེན་ལྡན་པའི་དམིགས་བསལ་གྱི་ཁྱད་ཆོས་འགའ་ལྡན་ཡོད། ང་ཚོའི་རྒྱུན་ལྡན་གྱི་སྐད་ཆའི་ནང་ཆེས་གལ་འགངས་ཆེ་བའི་གླེང་མོལ་ནི། མ་འོངས་པར་༸གོང་ས་མཆོག་གི་ཆབ་སྲིད་ཀྱི་ལངས་ཕྱོགས་འདིར། དོན་དངོས་ཀྱིས་རྗེས་འབྲངས་བྱེད་མཁན་གྱི་བོད་ཀྱི་མགོ་འཁྲིད་ཅིག་འདེམས་ཕྱོགས་དེ་རེད། གང་ལྟར་ཡང། ངས་རྒྱུན་དུ་ནས་བཤད་པ་ལྟར་ང་ནི་༸གོང་ས་མཆོག་གི་རྗེས་འབྲངས་ཞིག་དང། སློབ་མ་ཞིག་རེད། ད་ལྟའི་དུས་སུ་ང་ཙམ་མིན་པར་དབུ་མའི་ལམ་གྱི་རྗེས་སུ་འབྲངས་པའི་ཐོག ༸གོང་ས་མཆོག་གི་དམིགས་ཡུལ་གཞིར་བཟུང་གིས་ཞབས་འདེགས་ཞུ་མཁན་བོད་མི་སྐྱེས་ཆེན་མང་པོ་ཞིག་ཡོད་པ་རེད། མ་འོངས་པའི་ངའི་འོས་འགན་ལེན་ཕྱོགས་ཀྱི་ཆ་ནས་བཤད་ན། ང་རང་ཀརྨ་པ་ཡིན་པའི་ཆ་ནས་ངས་མི་མང་ལ་ཆོས་ཕྱོགས་དང་འབྲེལ་བའི་བྱ་གཞག་མང་པོ་ཞིག་སྤེལ་མུས་རེད་ལ། དེའི་འོས་འགན་ཡང་ཚད་ལྗིད་པོ་རེད། ངས་ད་ལྟ་ང་རང་ག་རེ་བྱེད་བཞིན་པ་དེ་མ་འོངས་པར་ཡང་རྒྱུན་འཁྱོངས་བྱ་རྒྱུ་དང། ལྷག་པར་༸གོང་ས་མཆོག་གི་དགོངས་གཞི་གཞིར་བཟུང་གིས་ཞབས་འདེགས་ཞུ་རྒྱུ་ཡིན།
ར་མེ་ཤ་རོ་ཤན་ལལ། གལ་སྲིད་སྐུ་ཉིད་ལ་བོད་ཀྱི་ཆབ་སྲིད་ཀྱི་འོས་འགན་བཞེས་དགོས་པའི་མང་མོས་ཀྱི་དགོས་འདུན་བཏོན་ཚེ། ཁྱེད་རང་གིས་ངོས་ལེན་བྱེད་འདོད་དམ་མི་འདོད།
༸རྒྱལ་དབང་ཀརྨ་པ། སྤྱིར་མི་སུས་ཀྱང་བོད་ཀྱི་ཆབ་སྲིད་ཀྱི་མགོ་ཁྲིད་བྱེད་ཆོག་ཅིང། དེའང་འདས་པའི་བོད་ཀྱི་ལོ་རྒྱུས་ཁག་ལ་རྒྱུས་མངའ་ཆ་ཚང་ཡོད་པ་ཞིག་དང། ཉམས་ཞིབ་ཐུབ་མཁན་ཞིག་ཡོད་དགོས་རྒྱུ་གལ་ཆེན་པོ་རེད། ཀརྨ་པ་སྐུ་ཐོག་གོང་མ་རྣམས་ཀྱིས་ཆོས་ཕྱོགས་ཁོ་ནའི་མཛད་འཕྲིན་བསྐྱངས་པ་མ་གཏོགས། གཞུང་ཕྱོགས་དང་འབྲེལ་བའི་སྲིད་དབང་བཟུང་མྱོང་མེད་པ་ཞིག་ཡིན་དུས། ངའི་བསམ་ངོར་ངས་འདས་པའི་ཀརྨ་པའི་ལོ་རྒྱུས་ཀྱི་འབྱུང་རིམ་ཁག་ལ་མཚན་གཅིག་ནང་དུ་བསྒྱུར་བཅོས་གྱིས། སང་ཉིན་ནས་ཀརྨ་པའི་མཛད་འཕྲིན་བསྐྱངས་ཕྱོགས་དེ་ཆོས་ཕྱོགས་ལས་ལྷག་པའི་ངོ་བོ་ཞིག་ཏུ་བཟོ་རྒྱུ་ནི་ཞེ་དྲག་གི་དཀའ་ལས་ཁག་པོ་རེད་བསམ་གྱི་འདུག ད་ལྟའི་ཆར་ང་ཚོར་མཚོན་ན་ཡང་དག་པའི་དབུ་ཁྲིད་༸གོང་ས་མཆོག་ཡོད་མུས་རེད། ཁོང་ནི་ལས་ལ་ཧུར་པོ་དང། དུས་རྒྱུན་དུ་བོད་མི་རིགས་ཀྱི་བདེ་དོན་ཁོ་ནའི་དོན་དུ་མཛད་པ་སྐྱོང་གིན་ཡོད་པ་རེད་ལ། དེའང་རིམ་བཞིན་རྒྱུན་མཐུད་ཀྱི་རེད། བོད་ཀྱི་མ་འོངས་པའི་ཡང་དག་པའི་མང་གཙོ་དེ་གང་འདྲ་ཞིག་ཏུ་ཆགས་མིན་དང། ཆབ་སྲིད་ཀྱི་མགོ་འཁྲིད་སུས་བྱེད་མིན་གྱི་ཐད་ལ་ད་སྐབས་བགྲོ་གླེང་མང་པོ་ཞིག་བྱེད་མུས་ཡིན་པ་རེད།
ར་མེ་ཤ་རོ་ཤན་ལལ། དོན་གནད་གཞན་གྱི་ཐོག་ནས་སྐད་ཆ་བཤད་ན། ངས་ཤེས་ཚོད་ལ་ཁྱེད་རང་དེང་དུས་ཀྱི་དབྱིན་གཞས་ཧིབ་ཧོབ་ (Hip-Hop ) གསན་རྒྱུར་དགའ་མོས་གནང་གི་ཡོད་པ་འདྲ། ཁྱེད་རང་གི་གཞས་པ་དགའ་ཤོས་དེ་སུ་ཡིན་ནམ།
༸རྒྱལ་དབང་ཀརྨ་པ། ངས་ད་ལྟ་དམིགས་བསལ་དྲན་གི་མི་འདུག སྤྱིར་ང་རང་མནབས་བཟའ་གྱོན་མཁན་ཞིག་ཡིན་པའི་ཆ་ནས། ང་རང་ལ་མཚོན་ན་རང་ཉིད་ཀྱི་ཐུན་མིན་རིག་གཞུང་གི་ཟློས་གར་ཁག་ལ་དགའ་མོས་དང། ཉར་ཚགས་བྱེད་དགོས་རྒྱུ་གལ་ཆེན་པོ་རེད། ངས་དུས་ནས་དུས་སུ་ཧིབ་ཧོབ་ཀྱི་གཞས་ཉན་རྒྱུར་དགའ་མོས་བྱེད་ཀྱི་ཡོད་པའི་རྒྱུ་མཚན་ནི། གཞས་དེ་དག་གི་ནང་དུ་དེང་རབས་ཀྱི་རོལ་དབྱངས་ལྡན་ཡོད་པས་ཡིན། སྤྱིའི་ཆ་ནས་ང་རང་གནའ་རབས་ཀྱི་ནང་ཆོས་དང་ཆོས་འབྱུང་ཁག་བཤད་འཁྲིད་བྱེད་མཁན་གྱི་བོད་དགེ་ཞིག་ཡིན་ལ། དུས་རབས་ཉེར་གཅིག་པའི་རྒྱལ་སྤྱིའི་མི་སེར་ཞིག་ཀྱང་ཡིན་དུས། ང་ལ་མཚོན་ན་གཞས་སྣ་དེའི་ལམ་ནས་ང་རང་དུས་རབས་ཉེར་གཅིག་པའི་ནང་སླེབས་པར་དྲན་གྱི་ཡོད།
ར་མེ་ཤ་རོ་ཤན་ལལ། རྒྱུ་མཚན་དེ་དག་ལ་བརྟེན་ནས་ཁྱེད་རང་གློག་རྡུལ་རྩེད་ཆས་ཀྱི་ནང་། དམག་གི་རྩེད་མོའི་རིགས་རྩེད་རྒྱུར་དགའ་པོ་གནང་གི་ཡོད་དམ། སྤྱིར་མི་མང་པོ་ཞིག་གིས་ཞི་བདེ་འཛུགས་སྐྲུན་བྱེད་མཁན་གྱི་ནང་པའི་དགེ་སློང་ཞིག་གིས་དམག་གི་རྩེད་རིགས་རྩེད་རྒྱུ་ནི་འོས་འཚམ་མ་རེད་ཅེས་བཤད་སྲིད་པ་རེད།
༸རྒྱལ་དབང་ཀརྨ་པ། ངས་གློག་རྡུལ་རྩེད་རིགས་དེ་དག་ནི་ནང་སེམས་ཀྱི་ཚོར་བ་བཅོས་བསྒྱུར་བྱེད་མཁན་ཞིག་ཏུ་འདོད་ཀྱི་ཡོད། ནང་ཆོས་ཉམས་ལེན་བྱེད་མཁན་ཡིན་ཡང་རུང། མིན་ཡང་རུང་ང་ཚོ་ཚང་མར་དགའ་སྡུག་སྤྲོ་གསུམ་གྱི་ཚོར་བ་ཡོད་པ་རེད། ཚོར་བ་དེ་དག་མངོན་འགྱུར་བྱེད་པའི་སྐབས་ང་ཚོས་དེ་ཚོ་དང་འབྲེལ་འདྲིས་ཇི་ལྟར་བྱེད་དགོས་མིན་བཙལ་དགོས་པ་རེད། དེ་འདྲ་ཡིན་དུས་ང་ལ་མཚོན་ན། མཚམས་རེར་ངའི་སེམས་ཀྱི་ནང་མི་འོས་པའི་བསམ་པ་དང་ཚོར་བ་དག་མངོན་ཡོང་དུས། ངས་གློག་རྡུལ་རྩེད་ཆས་བེད་སྤྱོད་བྱེད་ཀྱི་ཡོད། དེས་ངའི་ཚོར་བ་ངན་པ་མཐའ་དག་རང་བཞིན་གྱིས་འཇོམས་ཐུབ་པ་དང། རིམ་པས་སེམས་པ་སྐྱིད་པོ་ཡོང་གི་འདུག
ར་མེ་ཤ་རོ་ཤན་ལལ། གནད་དོན་དེའི་ཐོག་ལ་སྒོམ་སྒྲུབ་ཉམས་ལེན་གྱིས་ཕན་རླབས་ཆེ་བ་མིན་འདུག་གམ།
༸རྒྱལ་དབང་ཀརྨ་པ། མི་འདུག གློག་རྡུལ་རྩེད་རིགས་དེ་ཚོ་གང་ལས་ཀྱང་ཐབས་ལམ་ལེགས་པ་འདུག
ར་མེ་ཤ་རོ་ཤན་ལལ། ཁྱེད་རང་རྒྱ་གར་ནང་དུ་འཚར་ལོངས་བྱུང་བ་ཞིག་ཡིན་དུས། ཁྱེད་ཀྱིས་རྒྱ་གར་གྱི་སྐད་ཡིག་འབྲི་ཀློག་ཐུབ་པ་དང། རྒྱུན་ལྡན་ནས་རྒྱ་གར་གྱི་ཞལ་ལག་མཆོད་རྒྱུར་དགའ་མོས་ཡོད་དམ། ཡང་ན། བོད་ཀྱི་རིག་གཞུང་དང་ལེགས་བྱང་གཅེས་སྤྲས་བྱ་སླད། ཁྱེད་རང་དེ་དག་དང་རྒྱང་ཐག་རིང་དུ་གནས་ཀྱི་ཡོད།
༸རྒྱལ་དབང་ཀརྨ་པ། ཐོ་རཱ། ཐོ་རཱ། སྤྱིར་ང་རང་རྒྱ་གར་གྱི་ཞལ་ལག་བཟའ་རྒྱུར་དགའ་པོ་ཡོད་ལ། ཧིན་སྐད་ཀྱང་ཕྲན་བུ་ཤེས་ཀྱི་ཡོད། ང་ཚོ་བོད་ཀྱི་ནང་ཆོས་ཉམས་ལེན་པ་ཚོས་ད་ལྟའི་དུས་སྐབས་སུ་རྒྱལ་སྤྱིའི་ནང་གི་རིག་གཞུང་འདྲ་མིན་དང་། ལེགས་བྱང་ཁག་ལ་རང་གི་བློ་གྲོས་ཀྱི་སྒོ་མོ་རྒྱ་ཆེ་རུ་ཕྱེ་སྟེ། རྒྱུས་ལོན་དང་གོ་རྟོགས་ཡོད་པ་ཞིག་བྱེད་རྒྱུ་ནི་གལ་ཆེན་པོ་རེད། ང་ཚོ་ཁེར་རྐྱང་དུ་རྒྱུན་རིང་པོར་འཚོ་གནས་ཐུབ་ཐབས་བྲལ་བ་ཡིན་དུས། ནང་པའི་ཆོས་པ་ཚོས་ངས་སྤྱི་ཚོགས་ཀྱི་འདུ་འཛི་ལས་ཡོངས་སུ་བྲལ་ཏེ། དབེན་གནས་བསྟེན་པར་བྱ་གི་ཡིན་ཞེས་བརྗོད་ནས་མ་བསྡད་པར། དེང་དུས་ཀྱི་འཛམ་གླིང་སྤྱིའི་སྐད་ཡིག་དང་རིག་གཞུང་ལ་སྦྱོང་བ་བྱ་དགོས་རྒྱུ་གལ་ཆེན་པོ་རེད། ལྷག་པར་དུ་རྒྱ་གར་ལ་མཚོན་ན་ནང་པའི་བསྟན་པ་འབྱུང་ཡུལ་གྱི་གནས་རེད། ནང་པའི་དཔེ་ཆ་ཀུན་གྱི་ནང་དུ་རྒྱ་གར་གྱི་གནས་དེ་རྩ་ཆེར་འཛིན་གྱི་ཡོད་པ་རེད། སོང་ཙང། ངས་ཧིན་སྐད་སྦྱོང་གི་ཡོད་ལ། ཕྲན་བུ་ཤེས་ཀྱི་ཡོད། སྤྱིར་ཧིན་སྐད་དེ་ནི་དེ་ཙམ་གྱི་ཁག་པའི་སློབ་ཚན་ཞིག་མ་རེད། གང་ཡིན་ཟེར་ན། ཧིན་དྷི་དང་བོད་ཡིག་གཉིས་ཕྱོགས་མང་པོ་ཞིག་གི་ཐོག་ནས་འདྲ་མཚུངས་ཡོད་པ་རེད། དེ་བཞིན་དུ་ངས་སྔར་རྒྱ་གར་སམྚི་ཏའི་བརྡ་སྤྲོད་ཀྱང་ཕྲན་བུ་སྦྱངས་མྱོང་ཡོད།
ར་མེ་ཤ་རོ་ཤན་ལལ། ཁྱེད་རང་གིས་ལྡི་ལར་སློབ་སྦྱོང་བྱེད་བཞིན་པའི་སློབ་ཕྲུག་ཚོར། སྐྱིད་པོ་ཇི་ལྟར་བྱས་ནས་ཡོང་ཐུབ་བམ་ཞེས་པའི་ཐོག་ལ་གསུང་བཤད་གནང་བ་རེད། མི་ཚོར་དོན་དམ་གྱི་སྐྱིད་པོ་ཞིག་ཇི་ལྟར་ཡོང་ཐུབ་བམ། གལ་སྲིད་ཁྱེད་རང་ལ་བོད་རང་བཙན་ཐོབ་ན་དགའ་བ་ཁྱད་པར་བ་ཞིག་བྱུང་ཡང། ངེད་ཚོ་མི་སྐྱ་ཚོས་མྱོང་བའི་དོན་དམ་གྱི་དགའ་བ་དེ་ལྟ་བུ་ཞིག་ཁྱེད་ལ་ཡོད་ཀྱི་མ་རེད།
༸རྒྱལ་དབང་ཀརྨ་པ། བོད་ནང་གི་གནས་སྟངས་གཞིར་བཞག་སྟེ་བཤད་ན། ང་ཚོ་མང་བོ་ཞིག་གིས་བོད་ནང་དུ་ཆབ་སྲིད་གནས་སྟངས་ཡར་རྒྱས་འགྲོ་རྒྱུར་རེ་སྨོན་བྱེད་ཀྱི་ཡོད་པ་རེད་ལ། གལ་སྲིད་དབུ་མའི་ལམ་གྱི་ཐོག་ནས་བོད་ལ་ཆེས་མཐོའི་རང་སྲིད་རང་སྐྱོང་ཐོབ་ཀྱང། ཁྱེད་ཀྱི་འདོད་བློ་ད་དུའང་ཚིམས་མི་སྲིད་པ་རེད། སྐྱིད་པོ་ཡོང་དང་མི་ཡོང་ཞེས་པ་དེ་ནི་གང་ཟག་སྒེར་གྱི་བསམ་བློ་གཏོང་ཕྱོགས་དང། འདོད་ཆུང་ཆོག་ཤེས་ཡོད་མེད་ལ་རག་ལས་པ་རེད། ཆོག་ཤེས་དེ་ནི་བདེ་སྐྱིད་ཡུན་གནས་ཐུབ་པ་དང། བརྟན་པོར་གནས་རྒྱུའི་གཞི་རྟེན་ལྟ་བུ་ཞིག་རེད། ལར་ནས་ཁྱེད་རང་ལ་ཇི་སྲིད་སྡུག་བསྔལ་ངོ་མ་འཕྲོད་བར་དུ་བདེ་སྐྱིད་ཅེས་པ་ཞིག་བཤད་རྒྱུ་ཡོད་པ་མ་རེད།
༧ རྒྱལ་དབང་རྐ་མ་མཆོག་ནི་ང་ཚོ་བོད་གང་ཅན་པ་ཡོངས་ལ་ཡོད་པའི་ཆོས་སྲིད་གཉིས་ལ་མེད་དུ་མི་རུང་བའི་སྟོབས་ཤུགས་གཅིག་ཡིན་
ལྷོ་ཕྲུག་སྣ་བོ་ཆེ་ལགས། ཉིད་ཀྱིས་སྐུ་ཚེགས་ལ་མ་འཛེམ་པར་སླར་ཡང་ལྗག་ལན་གནང་བ་ཐུགས་རྗེ་ཆེ་ལགས།
ད་ནི་བདག་གིས་ཉིད་ཀྱིས་འགྲེལ་བཤད་ཐུང་ཐུང་འདི་ཞིབ་དུ་བཀླགས་ཟིན་པ་ཡིན་ལ། ཉིད་ཀྱིས་འདོད་ཚུལ་དེ་ལ་རྒྱབ་སྐྱོར་ཞུ་རྒྱུ་ལས། འགག་པ་གང་ཡང་མེད་ལགས། རྗེས་ཕྱོགས་ཀྱང་དུས་ཚོད་གནད་འགག་དང་འཕྲད། སྐད་ཆ་དགོས་འཁོ་ཡོད་ས་དང་གདོང་འཕྲད་སྐབས་འཛེམ་གཟོད་མེད་པར་འདི་ལྟར་གསུངས་ལན་གནང་རྒྱུར་རེ་བ་ཡོད།
གང་ལྟར། མཐའ་མཇུག་གི་རེ་བ་ནི་སྐྱེ་ཆེན་དམ་པ་འདི་དག་གིས་གངས་ཅན་བོད་ཀྱི་ཆོས་སྲིད་གང་ཅིའི་ཐད་དུ་ཐུགས་འགན་ཞིག་བཞེས་ཐུབ་རྒྱུའི་སྨོན་ལམ་དང་རེ་སྐུལ་དང་༧གོང་ས་མཆོག་གི་དགོངས་བཞེད་མཐའ་དག་ཆུད་ཟོས་སུ་མི་འགྲོ་བར་སྐྱབས་ཞུ་དང་བཅས། སྐྱེ་ཆེན་འདི་དག་གི་གཙོ་བའི་བོད་མི་གང་ན་སུ་ཡོད་པ་དག་གིས་་བོད་ཟེར་བ་ནི་རང་གི་འཚོ་བ་དང་ཚེ་སྲོག་ལས་ཀྱང་གལ་ཆེན་ཡིན་པ་ངོས་ཟིན་པར་ཤོག་ཟེར་ན་འདོད་བྱུང་།
༸དཔལ་རྒྱལ་བ་ཀརྨ་པ་མཆོག་གིས་་བཀའ་ལན་བསམ་གྱིས་མི་ཁྱབ་པ་བསྩལ་གནང་མཛད་པར་བསྔགས་བརྗོད་དང་འབྲེལ། སྐུ་ཚེ་ཡུན་དུ་བརྟན་པའི་སྨོན་འདུན་ཞུ།
བོད་ཤ་ཁྲག་རུས་གསུམ་གྱིས་ཁ་གསལ་གོ་བདེའི་དགོངས་ཚུལ་གསུངས་པར་ཐུགས་རྗེ་ཆེ།
༸གོང་ས་སྐྱབས་མགོན་ཆེན་པོའི་རྣམ་ཐར་གྱི་ཆ་ཤས་ཅུང་ཟད་ཅིག་གསལ་བའི་དངོས་བྱུང་གློག་བརྙན་Unwinking Gazeཞེས་པ་འདི་ནི་སེམས་ལ་དད་ཞེན་དང་སྐྱོ་སྣང་གི་ཚོར་བ་ཚད་མེད་སློང་མཁན་གྱི་གློག་བརྙན་ཞིག་རེད། དུས་རྒྱུན་ངས་རང་གི་ངོ་ཤེས་ཚོར་རྔན་པའི་ཚུལ་དུ་འབུལ་གྱིན་ཡོད། དེའི་ནང་༸གོང་ས་མཆོག་ནས་༸རྒྱལ་དབང་ཀརྨ་པ་མཆོག་དང་ཡོངས་འཛིན་གླིང་སྤྲུལ་རྣམ་གཉིས་ལ་བསྩལ་བའི་བཀའ་སློབ་དེ་ནི་དེ་བས་ཀྱང་སྐྱོ་སྣང་འགོག་མེད་དུ་སྟེར་མཁན་གྱི་གསུང་ཚིག་ཅིག་ཡིན་ཅིང་། དེ་དང་མཉམ་སྐབས་དེ་དུས་ཀྱི་༸རྒྱལ་དབང་ཀརྨ་པའི་ཞལ་རས་ཀྱི་རྣམ་འགྱུར་དེས་ཕྱོགས་གཞན་ནས་རེ་བ་དང་ཡིད་ཆེས་ཀྱི་སེམས་ཚོར་བཅོས་མིན་ཞིག་ཀྱང་ངམ་ཤུགས་ཀྱིས་བསྐྱེད་པར་བྱེད་ངེས་ཡིན།
བཀའ་སློབ་དེའི་དགོངས་དོན་གྱི་དམིགས་བྱ་གཙོ་བོའམ་༸གོང་ས་མཆོག་གི་ཐུགས་རེ་གཙོ་བོ་ནི་ད་ལྟ་སྒྲོམ་གཞི་བརྟན་པོ་ཞིག་དང་སྒྲིག་འཛུགས་ས་བརྟན་ཞིག་གི་ཐོག་ནས་འགྲོ་བཞིན་པའི་ཚན་རིག་དང་ནང་ཆོས་དབར་གྱི་འབྲེལ་ལམ་འདི་ཁོང་འཚོ་བཞུགས་མ་བྱུང་བའི་སྐབས་སུའང་གཞོན་རབས་པ་ཁོང་ཅག་གིས་རྒྱུན་འཁྱོངས་ཀྱི་ཐུགས་འགན་བཞེས་དགོས་སྐོར་དེ་ཡིན། བཀའ་སློབ་དེ་ཕལ་ཆེར་ཆོས་ཚན་དཔྱད་བསྡུར་གྱི་འཚོགས་འདུ་ཞིག་གི་བར་གསེང་དུ་གསུངས་པ་ཞིག་ཡིན་པ་དྲན་གྱི་འདུག
སྤྱིར་ཆོས་བརྒྱུད་རིས་མེད་ཀྱི་བླ་ཆེན་རྣམ་པས་བོད་ཀྱི་ཆབ་སྲིད་དང་རིག་གནས་ཀྱི་ཐད་ལ་མཛད་འཕྲིན་རེ་བསྐྱང་རྒྱུ་འདི་ནི་རེ་བ་ཆུང་ས་དང་ཚད་གཞི་དམའ་ས་ནས་བཤད་ན་རང་ཉིད་བོད་རིགས་སུ་སྐྱེས་པའི་འགན་འཁྲི་ཞིག་ཡིན་ངེས། ཡང་ཁོང་ཅག་གི་གནས་བབ་དང་རང་བཞིན་གྱི་ངོས་ནས་བཤད་ན་འགའ་ཞིག་གི་བོད་དོན་ལ་བཅངས་པའི་དགོངས་པའི་ཟབ་ཚད་དང་དང་བོད་དོན་ལ་ཕྱོགས་པའི་མཛད་པའི་རྒྱ་ཁྱོན་ལ་ང་ཞེ་བློ་ཚིམས་ཀྱི་མེད། སྐུར་འདེབས་སུ་སོང་ན་མཐོལ་ལོ་བཤགས། ངས་གོང་དུ་བཤད་པའི་བསམ་ཚུལ་གྱི་དམིགས་བྱ་ནི་བླ་མ་ཞིག་ཆབ་སྲིད་ཀྱི་གར་སྟེགས་ཐོག་བུད་སོང་ན་ངོ་རྒོལ་གྱི་དར་ཆ་འཕྱར་དགོས་ཟེར་བ་དེ་མིན། ངས་གོང་དུ་བཤད་པ་ལྟར་རང་རེའི་སྤྱི་ཚོགས་བདེ་མོའི་ཐང་དང་སྐྱིད་པོའི་གནས་ལ་འཁྲིད་པའི་འཇོན་ནུས་ཡོད་མཁན་ཞིག་ཡིན་ན་བླ་མ་མི་དགོས་གྲུབ་ཐོབ་གསང་གནས་བརྗེན་གཅེར་དུ་སྟོན་མཁན་ཞིག་ཡིན་ཀྱང་ངས་གོན་པ་གྱོན་མི་ཤེས་པའི་ལབ་གླེང་དེ་མི་བྱེད། སྐད་ཆ་སྙན་པོ་དང་རྣམ་འགྱུར་འཛུམ་བག་ཅན་ལ་ཆ་མ་བཞག་པར་ལག་ལེན་ངོ་མ་དང་དུས་ཀྱི་འགྱུར་ཕྱོགས། ཁོར་ཡུག་གི་གྲུབ་ཆ་སོགས་ཕྱི་དང་ནང་གི་རང་བཞིན་ཇི་ཡིན་ལ་ཞིབ་པར་བརྟག་ན་བླ་ཆེན་སྲིད་སྟེགས་ཀྱི་ཐོག་ཏུ་བུད་རྒྱུའི་དགོངས་བཞེད་མེད་པ་འདིར་དགའ་བསུ་ཞུ་ཡིན་ཡོད།
བོད་པའི་སྲིད་དོན་ལ་ཕན་པའི་ལས་དོན་ཞིག་ལ་ཆབ་སྲིད་ཀྱི་སྟེགས་བུར་བུད་རྒྱུ་འདི་ཙམ་ཞིག་མིན། ༸རྒྱལ་དབང་ཀརྨ་པ་མཆོག་ནས་འདི་ལྟའི་དགོངས་བཞེད་ཅིག་གནང་ཐུབ་པར་བསྟོད་བསྔགས་ཡོད། ཤེས་ཡོན་གྱི་ཐད་ནས། དཔལ་འབྱོར་གྱི་ཐད་ནས། སྤྱི་ཚོགས་བདེ་འཇགས་ཀྱི་ཐད་ནས་ཏེ། ཕྱོགས་དང་ངོས། ཟུར་དང་སུལ། སྟེང་དང་འོག་སོགས་གང་ནས་ཀྱང་སྲིད་དོན་གྱི་ཞབས་འདེགས་བླ་ན་མེད་པ་ཞིག་ཞུ་རྒྱུའི་གོ་སྐབས་འདུག
དེ་བཞིན་ངའི་བསམ་ཚུལ་གཅིག་ནི་དུས་རབས་མང་པོའི་འཁོར་བསྐྱོད་ཀྱི་ཁྲོད་ནས་བོད་པའི་སེམས་རྒྱུད་དང་འོ་ཆུ་གཅིག་འདྲེས་སུ་སོང་བའི་དྲི་མ་མི་གཙང་བ་ཞིག་དང་གོམས་པ་རྔམས་མཐུག་ཅིག་གཙང་ཕྱག་བྱེད་དགོས་ཟེར་བ་འདི་ཡིན། དྲི་མ་འདི་གཙང་སེལ་བྱས་པའི་མཇུག་ཏུ་ཁྲིམས་ལུགས་ལ་མཐོང་ཆེན་བྱེད་པའི་གཤིས་ཀ་ཞིག་དང་མི་ཆོས་ཀྱི་འགྲོ་ལུགས་ཤེས་པའི་ཀུན་སྤྱོད་ཅིག སྤྱིར་བཏང་གི་བསམ་ཤེས་[common sense]ལྡན་པའི་གོ་རྟོགས་ཤིག་ཏེ་འཇིག་རྟེན་སྤྱིའི་སྣང་ཚུལ་ལ་འཇུག་པ་བདེ་བའི་ལམ་ལུགས་ཤིག་གི་ཐོག་ནས་ཆབ་སྲིད་ཀྱི་ལམ་སྲོལ་ཞིག་བསྐྱང་ཐུབ་པ་བྱུང་ན་བསམ་གྱི་ཡོད།
རྨོངས་འཆར་རང་ཡིན། འཁྲུལ་པའི་རིགས་ལ་དྲྭ་གྲོགས་ཚོས་དགོངས་ཚུལ་གནང་བར་དགའ་བསུ་ཡོད།
The Dalai Lama Discusses Succession – Unwinking Gaze
འདི་གོང་ནས་བཤད་མ་ཐག་པའི་༧གོང་ས་སྐྱབས་མགོན་ཆེན་པོ་མཆོག་གིས་ཀརྨ་པ་མཆོག་དང་གླིང་རིན་པོ་ཆེ་རྣམ་གཉིས་ལ་གསུངས་པའི་བཀའ་སློབ་མདོར་བསྡུས་དེའི་འབྲེལ་ཐག་རེད་ལགས། ཡོ་གྲོབ་ནང་དུ་སོང་ནས་འདི་བླུགས་པ་ཡིན་ན་ཐད་ཀར་གཟིགས་ཐུབ་ཀྱི་ཡོད་པ་རེད་ལགས།
རྩོམ་སྒྲིག་པས་སྐུ་ཕྲེང་བཅུ་བཞི་བ་ཞེས་བྲིས་འདུག ༧ཀརྨ་པ་སྐུ་ཕྲེང་བཅུ་བདུན་པ་རེད། སྤྱིར་གྲངས་ཀའི་་ནོར་བ་ཞིག་ལ་སྐྱོན་ཆེན་པོ་མེད་ཀྱང་། ཆོས་ལུགས་པའི་མིག་འདི་སྐབས་རེར་སྙན་ངག་པའི་ཚོར་བ་ལས་ཀྱང་རྣོ་བས།༧ཀརྨ་པ་དང་ཆོས་ཕྱོགས་ཀྱི་འབྲེལ་བ་ཡོད་པའི་སློབ་མ་ཞིག་གིས་མཐོང་ན་འདི་འདྲའི་རིགས་ཁྱད་གསོད་བྱས་བ་ལྟ་བུར་ཡང་མཐོང་སྲིད་པས་གཟབ་པར་འཚལ།
ང་ཤི་སོང་ན་ངའི་ཤུལ་བཞག་ཁྱེད་གཉིས་ཀྱིས་སྐྱོང་དགོས་ཀྱི་ཡོད།
ལྷོ་ཕྲུག་སྣ་བོ་ཆེ་ལགས། ཉིད་ཀྱིས་དོན་དངོས་སུ་བདག་གི་སྐད་ཆ་གང་ཞིག་བཤད་ཕྱོགས་ནོར་ཡོད་མེད་ཀྱི་བསྐོར་ལ་བསམ་ཚུལ་ཞིབ་མོ་ཞིག་དང་གསལ་བོ་ཞིག་གནངས་མི་འདུག་སྟབས། བདག་གིས་ཕྲ་ཆུང་མིག་གིས་ཡང་ཡང་བལྟས་ཀྱང་། ཉིད་ཀྱིས་དོན་དངོས་ཐོག་སྐད་ཆ་གང་ཞིག་སྤུན་ཟླ་ང་ལ་གསལ་བོ་དང་ཉན་བདེ་བོ་ཞིག་སྤྲོད་མི་འདུག་ཀྱང་། ཤུགས་བསྟན་དུ་ཉིད་ཀྱིས་ངས་རྒྱལ་བ་ཀརྨ་པ་མཆོག་ལ་གུས་མེད་བྱེད་ཀྱི་ཡོད་པ་ལྟ་བུ་ཞིག་གསུངས་འདུག་པ་ལྟ་བུ་ཞིག་གོ་ཡི་འདུག་ན། ང་རང་སྒེར་ངོས་ནས་རྒྱལ་བ་ཀརྨ་པ་མཆོག་ལ་ཆོས་འབྲེལ་ཞིག་གཏན་ནས་བཞག་མྱོང་མེད་ལ། རྒྱུ་མཚན་ངོ་མའི་ཐོག་རྒྱལ་བ་ཀརྨ་པ་མཆོག་ལ་མི་དགའ་དགོས་དོན་སོགས་གང་ཡང་མེད་ལགས།
སྐུ་ཉིད་ཀྱིས་ཁོང་གིས་གནངས་པའི་བཀའ་ལན་དེ་དག་ལ་ཞིབ་མོ་བློ་ཡི་བརྟག་དཔྱད་ཡག་པོ་ཞིག་བྱེད་ཐུབ་པ་ཡིན་ན། ཁོང་གི་སྐུ་ཕྲེང་རིམ་བྱོན་ལ་ཆོས་ལུགས་རྐྱང་བའི་མཛད་པ་བཞེས་པ་ལས། སྲིད་ཀྱིས་ཕྱོགས་ལ་འགན་འཁུར་མྱོང་མེད་པ་སོགས་གསུངས་འདུག་ལ། ཁོང་སྐུ་སྒེར་ལ་ཡང་སྐུ་ཕྲེང་གོང་མ་དག་གིས་ཤུལ་བཞག་སྐྱོང་རྒྱུར་འདོད་མོས་ཤུགས་ཆེན་ཡོད་པ་ཞིག་གསུངས་ཀྱི་འདུག་པ་ལས། སྐྱིད་སྡུག་ལེགས་ཉེས་གང་དུ་ཐུག་རང་ང་ནི་བོད་མི་རིགས་ཀྱི་བླ་ཆེན་ཞིག་གི་མིང་ཡོད་མཁན་ཞིག་ཡིན་དུས། གང་ལ་ཐུག་ན་ཡང་ངས་བོད་མི་རིགས་ཀྱི་ཆེད་དུ་རང་གིས་གང་འཇོན་པ་དེ་དག་བྱེད་དགོས་ཀྱི་ཡོད་ལ། བྱེད་རྒྱུའི་ཆོད་སེམས་ཀྱང་ཡོད་ཟེར་ནས་གསུངས་པ་ཞིག་བདག་གིས་ཕྲ་མོ་མིག་གིས་མཇལ་མ་སོང་ལགས།
དེ་ལྟར་ཡིན་དུས། ངས་དུས་ཚོད་འདི་འདྲའི་གཉེན་ཕྲེང་གི་གནད་འགག་གི་སྐབས་སུ་༧གོང་ས་མཆོག་གིས་རྒྱལ་བ་ཀརྨ་པ་མཆོག་དང་༧གོང་ས་མཆོག་གི་ཡོངས་འཛིན་གླིང་རིན་པོ་ཆེ་རྣམ་གཉིས་ལ་༧ཁོང་གིས་སྐུ་ངོས་ཀྱིས་བཀའ་བློན་འདི་འདྲ་ཞིག་གནངས་པ་དེ་དག་བརྙན་འཕྲིན་བརྒྱུད་དེ་ངོས་སུ་མཐོང་མྱོང་། ད་ང་ནི་ལོ་ན་མཐོ་བས་ང་ཤི་སོང་ན་ངའི་ཤུལ་བཞག་ཁྱེད་གཉིས་ཀྱིས་སྐྱོང་དགོས་ཀྱི་ཡོད་པ་རེད་གསུངས་པ་དེ་ཐོས་སྐབས་སུ། བདག་གིས་ཤ་གསེང་རུས་གསེང་དུ་འདར་སུག་རྒྱག་མྱོང་ཡོད། དེའི་སྟབས་ཀྱིས་བདག་གིས་རྒྱལ་བ་ཀརྨ་པ་མཆོག་ལ་དངོས་ནས་རེ་བ་ཆེན་པོ་ཞིག་བཟུང་བ་ཡིན། རེད་དེ། འདི་འདྲའི་གནད་འགག་གི་དྲི་བ་དྲི་ལན་སྐབས་སུ་ཁོང་གིས་ང་ནི་ག་དུས་ཡིན་ཡང་༧སྐྱབས་མགོན་རྒྱལ་བའི་དབང་བོ་མཆོག་གིས་བཀའ་ཇི་གནངས་བཞིན། བོད་མི་རིགས་ཀྱི་ཆེད་དུ་བསམ་བློ་གཏོང་བ་ནས་དེའི་ཆེད་དུ་འབད་བརྩོན་བྱེད་དགོས་པའི་བསྐོར་གསུང་རྒྱུ་དེ་ནི་འུ་ཅག་ཁ་བ་ཅན་པ་ཚང་མའི་སེམས་ཀྱི་རེ་སྒུག་ཞིག་ཆགས་ཡོད་པ་རེད།
ང་རང་གིས་རྣ་བ་ལ་སྐྱོན་ཡོད་པ་དང་། མིག་ལ་སྐྱོན་ཡོད་པ། ཡང་ན། ངས་ཀློག་པའི་གསར་འགྱུར་རིགས་དང་། བརྙན་འཕྲིན་རིགས། རྒྱལ་བ་ཀརྨ་པ་མཆོག་དང་འབྲེལ་བ་ཡོད་པ་རེ་ཟུང་ནང་ནས་ངས་ཁོང་གིས་ཆོད་སེམས་གཏན་པོ་ཞིག་ཁ་བ་གངས་ཅན་པའི་ཆེད་དུ་བཞག་ཡོད་པ་ཞིག་ད་ལྟའི་བར་དུ་ཞིབ་མོ་ཞིག་དངོས་ནས་མཐོང་མ་སོང་། ངས་མཐོང་བ་དང་ཐོས་པ་སོགས་ནི། ཁོང་གིས་སྐུ་ཕྲེང་སྔ་མ་དག་གིས་མཛད་པའི་ཤུལ་བཞག་སྐྱོང་རྒྱུར་མོས་པ་ཆེན་པོ་ཡོད་པ་རྐྱང་རེད་འདུག་ལགས། དེ་འདྲ་ཡིན་དུས། ཀརྨ་ཆོས་བརྒྱུད་གཅིག་བུའི་བླ་ཆེན་ཞིག་གིས་བོད་གངས་ཅན་ལྗོངས་སུ་དབང་སྒྱུར་བ་ནས་བོད་གངས་ཅན་ཚང་མ་གཅིག་གྱུར་བཟོ་རྒྱུ་དཀའ་མོ་རེད་སྙམ་སོང་ལ། ཁོང་གི་སྐུ་ཕྲེང་སྔ་མ་དག་གིས་བོད་གངས་ཅན་བརྒྱ་ཆའི་སུམ་བཅུ་ཙམ་ལ་མ་གཏོགས་དབང་སྒྱུར་ཐུབ་མེད་པ་ནི་ཀུན་གྱིས་ཤེས་གསལ་ཡིན་ལ། སྐུ་ཕྲེང་སྔ་མའི་རྣམ་ཐར་ལ་ང་ལས་སྐུ་ཉིད་ལ་རྒྱུས་མངའ་ཡོད་ཤག་རེད།
མཐའ་དོན་ཞུ་རྒྱུ་ཞིག་ནི། ངས་ད་ལྟའི་གཉེན་ཕྲེང་གི་དུས་སྐབས་འདི་ལ། བོད་གངས་ཅན་ཚང་ལ་ཆོས་རྒྱུད་རེ་ཟུང་གི་དབུ་ཁྲིད་དེ་ཁ་རོག་གེར་བཞུགས་འདུག་པའི་བླ་ཆེན་ཞིག་གལ་ཆེན་པོ་དེ་འདྲ་ཞིག་མཐོང་གི་མི་འདུག་ལགས། གཙོ་བོ་བླ་ཆེན་དག་གིས་ཆོས་རྒྱུད་རིས་སུ་མ་ཆད་པར་ཕྱོགས་ཀྱི་བསམ་བློ་དང་རང་ཕྱོགས་ལ་ཆགས་ཞེན་ཤུགས་ཆེན་པོ་དེའི་རིགས་བྱེད་མཁན་ནི་ངེད་ཅག་གངས་ཅན་བོད་པ་ཚང་ལ་དངོས་ནས་དགོས་ཀྱི་མི་འདུག་ལགས། ངེད་ཅག་ལ་དགོས་པ་དེ་ནི་གངས་ཅན་སྐྱེ་འགྲོའི་ཡོངས་ཀྱི་བདེ་སྡུག་གི་ཆེད་དུ་ཆོས་སྲིད་གང་ཐད་ལ་འབད་པ་ལྷོད་མེད་དང་། ཆོས་ལུགས་རིས་མེད་ཀྱི་ལྟ་བ་ལ་འགྱུར་བ་མེད་པ། མཐུན་སྒྲིལ་དམ་ཟབ་ཀྱི་སྤོབས་པ་བླ་ན་མེད་པ། གང་ལ་ཐུག་ཀྱང་ཞུམ་པ་མེད་པར། འཚེ་མེད་ཞི་བའི་ལྟ་གྲུབ་གཞིར་བཟུང་གིས་ཆོས་སྲིད་གཉིས་འགན་བཞེས་མཁན་ཞིག་ལ་རེ་བ་བརྒྱབ་པ་མང་དྲགས་པས། ངས་གོང་གི་སྐད་ཆ་དེ་དག་སྐུ་ཉིད་ལ་ཞུ་དགོས་པ་ཆགས་སོང་ན། དེའི་ཁྲོད་དུ་མི་འགྲིག་པ་དང་རྣ་ལ་མི་སྙན་པ། གོ་ན་མི་འདོད་པ་དང་། མཐོང་བ་ཙམ་གྱིས་འཚུག་པ་ཟ་ས་དེ་འདྲ་བྱུང་ན་བོད་རིགས་སྤུན་ཟླ་ཞིག་གིས་སྐད་ཆ་བཤད་ཕྱོགས་ལ་ནོར་འཁྲུལ་ཤོར་བར་བཟོད་གསོལ་དང་བཅས་སྐུ་ཉིད་ལ་ལན་ཞིག་གི་ཚུལ་དུ་དྲ་ཐོག་ནས་ཤར་མར་བྲིས་པ་ཡིན་ལགས།
ང་ཚོ་གུས་སྲོལ་ལ་དགའ་བའི་མི་རིགས་ཤིག་དང་གདན་ཁྲི་མཐོ་དམན་དང་སྐད་མགོ་མཐོ་དམན། བརྗོད་ཚིག་འཇམ་རྩུབ་སོགས་སྐབས་རེ་གལ་ཅན་ཡིན་པའི་བཟོ་འདྲ་པོ། སྐབས་རེ་བྱབ་ཆུང་ཡིན་པའི་བཟོ་འདྲ་པོའི་ཕྱོགས་ལ་ཚོར་བ་བྱ་རྒོད་ཀྱི་མིག་ལས་རྣོ་བ་ཡོད་སྟབས་གངས་རིའི་གླིང་བུ་ལགས་ནས་༸རྒྱལ་དབང་ཀརྨ་པ་ལགས་ཞེས་པའི་ཚབ་ཏུ་༸རྒྱལ་དབང་ཀརྨ་པ་མཆོག་ཅེས་གསུངས་ལེགས་པ་མེད་འགྲོ འགའ་ཞིག་གིས་༸རྒྱལ་བ་དང་༸རྒྱལ་དབང་གཉིས་ལའང་ཁྱད་པར་ཆེན་པོ་ཞིག་ཡོད་སྐོར་རྩོད་ཀྱིན་འདུག གནད་དོན་འདི་འདྲའི་ཐད་རྡ་སའི་གླིང་སྐོར་ནང་གི་རྣ་མིག་མི་གསལ་བའི་རྒན་རྒོན་དེ་ཚོ་རྫི་རྣོ་སེ་ཡོད་ད།
ཡོད་པ་མ་ཡིན་རྒྱལ་བས་ཀྱང་མ་གཟིགས། མེད་པ་མ་ཡིན་འཁོར་འདས་ཀུན་གྱི་གཞི། །འགལ་འདུ་མ་ཡིན་ཟུང་འཇུག་དབུ་མའི་ལམ། །མཐའ་བྲལ་སེམས་ཀྱི་ཆོས་ཉིད་རྟོགས་པར་ཤོག །འཇིག་རྟེན་དབང་ཕྱུག་ཀརྨ་པ་མཁྱེན་ནོ།།
བོད། ཤ་ཁྲག་རུས་གསུམ་ལ་བསམ་འཆར་ཐུང་ཙམ་ཞིག་ཞུ་ཆོག་པ།
འཇིག་རྟེན་ཐོག་ལོ་ངོ་སྟོང་ཕྲག་མང་པོའི་རིང་གཡག་རྭ་ཟུང་ལྟར་འབྲེལ་མེད་སྒེར་ཚུགས་ཀྱི་ལམ་ནས་བསྐྱེད་འཚར་བྱུང་བའི་སྣ་ཚོགས་ལམ་སྲོལ་མང་པོ་གནམ་ཐོག་གི་མཁའ་གྲུ་དང་། ཆུ་ཐོག་གི་གཟིངས་ཆེན། ས་སྟེང་གི་མེ་འཁོར་སོགས་འཇིག་རྟེན་ཆུང་ངུར་བྱེད་པའི་དངོས་པོ་འདི་དག་གིས་ཆུ་ལ་ཆུ་བཞག་གི་ཚུལ་དུ་འདྲེས་པར་བྱས་ཤིང་། མི་རབས་ནས་མི་རབས་བརྒྱུད་དེ་གོ་ལའི་མཛེས་རྒྱན་དུ་དཀར་སེར་དམར་ལྗང་གི་རང་མདངས་འདྲ་མིན་བཟུང་སྟེ་ཁྲ་ཆིལ་ལེར་བཞད་མྱོང་བའི་སྲིད་པའི་དཔལ་ཡོན་ད་དུས་ཁ་དོག་གཅིག་གི་ངོ་བོར་རིམ་འགྱུར་འགྲོ་བཞིན་ཡོད། འགའ་ཞིག་གིས་དཀར་པོ་རེད་ཟེར། འགའ་ཞིག་གིས་ནག་པོ་རེད་ཟེར། གང་ཡིན་ཡང་ཡིན་དུ་ཆུག གང་ལྟར་ལམ་སྲོལ་འདིའི་མིང་ལ་གོ་ལ་གཅིག་གྱུར་རམ་ནུབ་ཕྱོགས་ཅན་གྱུར་ཞེས་བཏགས་ཤིང་། ད་ལྟའི་བཀའ་ཁྲིས་རང་རེའི་སྐད་ཡིག་གིས་མཚོན་པའི་རིག་གནས་ཉམས་ཆག་གི་ཐད་ནས་བཤད་ན་རིག་གནས་གསར་བརྗེ་ལས་ལམ་སྲོལ་འདི་གནོད་ཚབས་ཆེ་བ་གསུངས་མྱོང་། གང་ལྟར་ལམ་སྲོལ་འདིས་མི་རྣམས་ཀྱི་འཇིག་རྟེན་ལྟ་ཚུལ་དང་བཅས་པར་བཅོས་བསྒྱུར་བྱེད་ཀྱིན་ཡོད་ལ་འཇིག་རྟེན་སྐྱེ་འགྲོ་ཕལ་ཆེར་ལམ་སྲོལ་འདིའི་ཀླུང་ཆེན་གྱིས་ངམ་གནག་སྲིད་པའི་རྒྱ་མཚོར་འཁྱེར་འགྲོ་ཡིན་ཡོད་པ་རེད། གཅིག་བྱས་ན་ཤ་ཁྲག་རུས་གསུམ་གྱི་ཚོད་དཔག་ལྟར་རླབས་ཆེན་གྱི་སྐྱེས་བུ་གཅིག་སྐྱེ་འགྲོའི་བསོད་ནམས་ཀྱིས་མ་འཆུན་པར་དེང་རབས་གསར་པའི་ཀླུང་ཆེན་གྱིས་འུ་ཚོ་དང་མཉམ་གཅིག་ཏུ་བདས་ཀྱིན་ཡོད་སྲིད་པ་རེད་ལ། ངའི་བསམ་ཚོད་ལྟར་ན་དེ་ནི་རླབས་ཆེན་གྱི་སྐྱེས་བུ་ཞིག་གིས་དུས་རབས་རང་ཉིད་དང་མཐུན་པར་བསྒྱུར་བའི་རྣམ་ཐར་གྱི་ཆ་ཤས་ཤིག་ཡིན་སྙམ་གྱིན་ཡོད། དེ་ལྟར་ཡིན་པའི་སྨོན་ལམ་འདེབས།
བླ་མ་ཆབ་སྲིད་ཀྱི་གར་སྟེགས་ཐོག་བུད་རྒྱུ་འདི་འཁྲུན་ཐག་མ་ཆོད་པར་ལྷག་པའི་རྩོད་གཞི་ཞིག་རེད། གཞལ་དུ་མི་སྤྱོད་པའི་བརྩེ་བ་སྙིང་རྗེ་ཆེན་པོའི་གཞན་དབང་ལས་འགྲོ་བ་སྡུག་བསྔལ་ལས་སྒྲོལ་བའི་ཁུར་ཆེན་ཕྲག་ཏུ་བླངས་ཏེ་རྒྱུ་ནི་ཡོངས་སུ་སྨིན་གྱུར་ནས། །གང་དང་གང་ལ་གང་དང་ནི། །གང་ཚེ་བྱ་བ་ཕན་གྱུར་པ། །དེ་དང་དེ་ལ་དེར་སྣང་ངོ་། །ཡི་ཚུལ་ཇི་བཞིན་མཛད་མཁན་ཞིག་བྱུང་ན་ནི་ཆོས་འཇིག་རྟེན་གང་ནས་བལྟས་ཀྱང་རྒྱལ་པོ་མི་དགོས་རྒྱལ་པོའི་རྒྱལ་པོ་གནང་ནའང་ལགས་སོ་ཞུ་འོས་ངེས་རེད། འོན་ཀྱང་དེང་འཇིག་རྟེན་སྤྱིའི་བསམ་འཁྱེར་གྱི་འགྲོས་དང་གཅིག ཆབ་སྲིད་ཀྱི་མཚོན་པའི་ལམ་ལུགས་ཕལ་ཆེར་གྱི་ཟློས་གར་དེ་སྐལ་པ་བཟང་དུས་ཀྱི་སྟངས་སྟབས་དེ་ག་རང་བསྒྱུར་གྱི་མེད་པར་རྣམ་པ་གཞན་ཞིག་ཏུ་འཕོས་ཀྱིན་ཡོད་པའི་གནས་ལུགས་དང་གཉིས། གལ་ཆེ་ཤོས་རང་རེའི་ཕྱི་རབས་པ་རྣམས་ཀྱི་སེམས་ཀྱི་སྨོན་ཡུལ། དུང་ཞེན་གྱི་གཏད་ཕྱོགས་ལ་སྲོལ་རྒྱུན་གྱི་གོམས་གཤིས་ལས་དེང་རབས་གསར་པའི་ལམ་ལུགས་ཀྱི་བག་ཆགས་དེ་འགོས་སླ་ཞིང་མང་པ་འགོས་བསླད་ཤོར་ཟིན་པའི་དོན་དངོས་དང་གསུམ། དངོས་ཡོད་ཀྱི་ཐོག་ནས་གལ་ལ་ཐུག་དུས་ཆོས་ལུགས་ཀྱིས་ཆབ་སྲིད་ཀྱི་ལམ་འཁྲིད་བྱས་ཏེ་སྤྱི་ཚོགས་ལ་ཕན་བདེ་བསྐྲུན་པ་ལས་ཆབ་སྲིད་ཀྱི་ལག་ཆར་ཕྱིན་ཏེ་ཆག་སྒོ་བསླང་རྒྱུའི་གོ་སྐབས་དང་མཐུན་རྐྱེན་མང་བ་ཡོད་པ་དང་བཞི།
ལ་སོགས་པ་ལ་སོགས་པ་གནད་དོན་ཉེན་ཚབས་ཅན་མང་དག་ཅིག་མངོན་སུམ་གྱིས་ར་འཕྲོད་དུ་ཡོད་སྟབས། ༸གོང་ས་སྐྱབས་མགོན་ཆེན་པོ་མཆོག་དཀོན་མཆོག་གོང་ཕུད་ཡིན་སྟབས་ཞུ་ག་ལ་དགོས།
དེ་མིན་ཟམ་གདོང་བླ་མ་ནང་ལྟར་སྒེར་དོན་ཟེར་བ་རྨི་ལམ་ནའང་ཨེ་ཡོད་བསམ་པའི་ཡིད་ཆེས་དང་ཞེ་བློ་ལིང་འགེལ་བྱས་ཆོག་ས། མཁྱེན་དཔྱོད་དང་ཉམས་མྱོང་གི་གོང་བུ་ལྗིད་ཅན་དེ་འདྲ་ཞིག་ཡིན་ན་ནི་སྲིད་ཁྲི་མི་དགོས་གསེར་ཁྲི་བརྒྱག་དགོས་བྱུང་ཡང་དགའ་བསུ་ཡོད། དེ་མིན་བླ་ཆེན་དང་དཔོན་ཆེན། མི་ཆེན་དང་སྐུ་དྲགས་ཀྱི་རིགས་རྒྱུད་ཞིག་མིན་ན་ཆབ་སྲིད་ཀྱི་ལས་སྣེར་ཨེ་འཁྱོངས་སྙམ་གྱི་དྭོགས་པ་དང་གོམས་པ་མཐུག་པོ་དེ་བོད་པའི་ཤེས་རྒྱུད་ཀྱི་སྟེང་ནས་གཙང་སེལ་བྱ་དགོས་པའི་དྲི་མ་ཞིག་མིན་ནམ་བསམ་གྱི་ཡོད། གལ་ཆེ་ཤོས་བོད་མི་རྣམས་མི་ཆོས་ཀུན་སྤྱོད་དང་ཁྲིམས་ལུགས་ཀྱི་གཤིས་ཀ་ཅན་ཞིག་ཏུ་འགྱུར་ཐུབ་པའི་ཐབས་བཀོད་འཐེན་དགོས་པ་དེ་དུས་དང་བསྟུན་ན་ཁ་ཚ་དགོས་གཏུགས་ངོ་མ་དེ་རེད། སྐབས་རེ་ང་ཚོས་རྒྱལ་ཁབ་ཆོས་ཀྱིས་སྐྱོང་བ། ཆོས་སྲིད་ཟུང་འབྲེལ། ཆོས་ལྡན་རྒྱལ་ཁབ། སྙིང་རྗེ་ཅན་གྱི་མི་རིགས་ཟེར་བ་སོགས་མཐོ་ས་ཞེ་གཅིག་དང་སྙན་ས་རྐྱང་རྐྱང་ལ་དབུ་འཁོར། ཁ་ཐོག་ལག་ཐོག་ལ་སླེབས་དུས་སྤྱིར་སྟངས་བསམ་ཤེས་[common sense]ཡོད་པའི་ལས་སྟངས་ཤིག་ཀྱང་འཁྱོངས་ཁག་པོ་བྱེད་ཀྱིན་འདུག
སྙིང་པོ་དེ་འཇིག་རྟེན་སྤྱིའི་འགྲོ་ལུགས་ཤིག་གི་ཐོག་ནས་ཕྱིན་ན་སྟབས་བདེ་བ་མེད་འགྲོ། བླ་མས་སྲིད་བསྐྱང་མིན་དང་ཆོས་སྲིད་ཟུང་དུ་སྦྲེལ་མིན་གྱིས་ཆོས་ཀྱི་དར་རྒྱས་ལ་ཕན་གནོད་དེ་ཙམ་མི་འབྲེལ་བ་ནི་ཁ་ཆེ་དང་ཡེ་ཤུའི་ཆོས་ལུགས་སྐལ་པའི་མཐར་ཡང་ཉམས་རྒྱུ་ཞིག་ཨེ་ཡོད་ཀྱི་དྭོགས་པ་བྱེད་ཆོག་སའི་སྲིད་རྐྱང་རིང་ལུགས་སྐྱོང་བའི་ཡུལ་ལུང་ཁ་ཤས་ལ་གཟིགས་ན་འཐུས་པས་ཆོས་ཞེན་ཅན་རྣམས་བྲེད་ཤ་ལངས་མི་དགོས།
སྤྱིར་ནས་ཆོས་སྲིད་ཟུང་འབྲེལ་ཟེར་བ་ཕྱིའི་རྣམ་པའི་སྟེང་ནས་མ་རེད་པཱ། ལག་ལེན་ངོ་མའི་ནང་ཁྲིམས་ལུགས་དང་མི་ཆོས་ཀུན་སྤྱོད་ཀྱི་ཉམས་ལེན་ཙམ་ཡང་ཁག་ཙམ་བྱེད་ས་ཞིག་ལ་ཆོས་སྲིད་ཟུང་འབྲེལ། ཆོས་སྲིད་ཟུང་འབྲེལ་ཟེར་བ་ནི་ཆོས་སྲིད་ཟུང་འབྲེལ་ཞེས་པའི་མིང་སྙན་མོ་འདི་བློས་གཏོང་བྱེད་མ་ཐུབ་པ་ལ་ཙམ་ཐུག་འདུག་སྙམ།
༧་རྒྱལ་དབང་ཀརྨ་པ་ལགས་ཀྱིས་གསུང་ལན་ཚ་བོ་གནང་འདུག་ ཡིན་ན་ཡང་མ་འོངས་བ་བོད་ཀྱི་དབུ་ཁྲིད་སུ་འཇོག་མིན་དེ་བོད་མི་དམངས་ཀྱི་ཐག་ཆོད་གི་རེད། དེ་ཕྱོགས་ཀྱི་མང་གཙོའི་འཕེལ་རིམ་ད་ལྟ་ནས་འགྲོ་བཞིན་རེད།
ར་མེ་ཤ་རོ་ཤན་ལལ། གནད་དོན་དེའི་ཐོག་ལ་སྒོམ་སྒྲུབ་ཉམས་ལེན་གྱིས་ཕན་རླབས་ཆེ་བ་མིན་འདུག་གམ།
༸རྒྱལ་དབང་ཀརྨ་པ། མི་འདུག གློག་རྡུལ་རྩེད་རིགས་དེ་ཚོ་གང་ལས་ཀྱང་ཐབས་ལམ་ལེགས་པ་འདུག
གསུངས་ལན་ཚང་མའི་ནང་གི་སྐད་ཆ་འདི་ནི་དངོས་ནས་ནང་ཆོས་ཉམ་ལེན་རྒྱུན་བྱེད་རྒྱུར་སྤྲོ་བ་ཡོད་མཁན་གྱི་སྐྱེ་ཆེན་ཞིག་གི་ཐུགས་དགོངས་ལས་ཅུང་རིང་དུ་ཕྱིན་འདུག་པའི་སྣང་བ་ཞིག་སྤྲད་སོང་ལ། ཀརྨ་པ་ཁོང་གིས་བོད་སྤྱི་བའི་འགན་འཁུར་མིན་གྱི་གནད་དོན་ཐད་དུ་དེ་འདྲའི་སྤོབས་པ་ཆེན་པོ་ཞིག་ཕལ་ཆེར་མེད་པ་ལྟ་བུ་ཞིག་མཐོང་སོང་། འགྲོ་བ་མིའི་གཞི་རྩའི་བདེ་སྐྱིད་ཁོ་ན་ལས།