ཆོས་བརྒྱུད་ཁག་གི་བགྲོ་གླེང་།

སེར་བྱེས་ལྡན་མ་ཁང་ཚན་དུ་ཆོས་བརྒྱུད་ཁག་བཞིའི་གནད་ཡོད་མི་སྣ་ཁག་ཅིག་གདན་ཞུས་ཀྱིས། ཉིན་གཉིས་རིང་ཆོས་བརྒྱུད་སོ་སོའི་བྱུང་རིམ་དང་ཕྱི་ནང་གི་ལྟ་གྲུབ། དབུ་མའི་ལྟ་བ་སོགས་ཀྱི་སྐོར་ལ་བགྲོ་གླེང་གནང་ཡོད།

ཕྱི་ཚེས་ ༢༨ དང་ ༢༩ ཉིན་གཉིས་རིང་སེར་བྱེས་ལྡན་མ་ཁང་ཚན་དུ་སྦེལ་ཀོབ་གཉའ་ཁྲི་ཆོས་རིག་ཞབས་ཞུ་རིས་མེད་བོད་ཀྱི་དཔེ་མཛོད་ཁང་གི་གོ་སྒྲིག་འོག ཆོས་བརྒྱུད་ཁག་བཞིའི་མཁན་པོ་དང་དཔེ་ཁྲིད་དགེ་རྒན་སོགས་མཁས་དབང་ཁག་ཅིག་གདན་ཞུས་ཀྱིས་ཕྱི་ནང་གི་ལྟ་གྲུབ་དང་ཆོས་བརྒྱུད་སོ་སོའི་བྱུང་རིམ། དབུ་མའི་ལྟ་བའི་སྐོར་བཅས་ལ་བགྲོ་གླེང་གནང་ཡོད་ལ། མཛད་སྒོའི་སྐུ་མགྲོན་གཙོ་བོར་སེར་བྱེས་མཁན་རིན་པོ་ཆེ་བློ་བཟང་དཔལ་ལྡན་མཆོག་དང་། ས་གནས་ཁྲིམས་ཞིབ་པ་མཚོ་སྣ་གཡུ་ཐོག་ལྷག་པ་མཆོག ས་གནས་གཞིས་མགོ་གཉིས་ཀྱི་ལས་ཚབ། བགྲོ་གླེང་བ་དང་ཚོགས་ཞུགས་པ་སོགས་མི་སྣ་བརྒྱ་ལྷག་འདུ་འཛོམས་བྱུང་ཡོད།

ཉིན་དེར་གཉའ་ཁྲི་ཆོས་རིག་ཞབས་ཞུ་རིས་མེད་བོད་ཀྱི་དཔེ་མཛོད་ཁང་གི་འགན་འཛིན་གྲྭ་ངག་དབང་སྟོབས་ལྡན་མཆོག་གིས་ཐེངས་འདིའི་བགྲོ་གླེང་སྐོར་ལ་ངོ་སྤྲོད་གསུང་བཤད་གནང་དོན།  ཕྱི་ལོ་ ༡༩༥༩ ལོ་ནས་བཟུང་ང་ཚོ་བོད་མི་རྣམས་གང་སར་འཐོར་ཏེ། རྒྱ་གར་གཙོས་མི་ཡུལ་ལུང་པ་གང་སར་སྐྱབས་བཅོལ་གྱི་མི་ཚེ་བསྐྱལ་ནས་མི་ལོ་ ༥༠ འཁོར་བའི་སྐྱིད་སྡུག་དྲན་གསོ་བྱེད་པའི་ལོ་དུས་འདིར།  ༧གོང་ས་མཆོག་གི་བཀའ་དྲིན་དང་བཙན་བྱོལ་བོད་གཞུང་གི་སྒྲིག་འཛུགས་སྲ་བརྟན་ལ་བརྟེན། གཞིས་ཆགས་ཁག་བརྟན་གནས་ཐུབ་པ་དང་ཤེས་ཡོན་སློབ་སྦྱོང་བྱེད་སའི་སློབ་གྲྭ་ཙམ་མ་ཟད། ས་དགེ་བཀའ་རྙིང་དང་བཅས་པའི་ཆོས་བྱེད་དགེ་འདུན་གྱི་སྡེ་རྣམས་ཀྱང་མཐུན་སྒྲིལ་དམ་ཟབ་ཐོག འཆད་རྩོད་རྩོམ་གསུམ་གྱི་བྱ་བ་རྣམས་ཡར་རྒྱས་དང་གོང་འཕེལ་གང་འཚམ་ཕྱིན་ཡོད། འོན་ཀྱང་། ༧གོང་ས་མཆོག་གི་རླབས་ཆེན་དགོངས་བཞེད་ནང་སྤྱིར་འཛམ་གླིང་གི་ཆོས་ལུགས་ཁག་དང་། ཁྱད་པར་བོད་ཀྱི་ཆོས་བརྒྱུད་རྣམས་ཐུགས་མཐུན་དམ་གཙང་ཐོག་ཆོས་བརྒྱུད་སོ་སོའི་ལྟ་གྲུབ་སོགས་ཐུན་མོང་གྱི་དཀའ་གནད་རྣམས་ལ་ཆགས་སྡང་དང་ཕྱོགས་རིས་སྤངས་པའི་ཐོག་སློབ་སྦྱོང་དང་། ཉམས་ལེན་དགོས་པ་གལ་ཆེའི་བཀའ་སློབ་ལན་མང་ཕེབས་ཡོད་སྟབས།  ཐེངས་འདིའི་ཆོས་བརྒྱུད་ཁག་གི་མཁན་པོ་གཙོས་མཁས་དབང་ཁག་ཅིག་གདན་ཞུས་ཀྱིས་ཉིན་གཉིས་རིང་གི་བགྲོ་གླེང་ཚོགས་འདུ་འདི་བསྐངས་པ་ཡིན་ཞེས་དང་། ཡང་ཁོང་གིས་འདི་ནི་ང་ཚོ་གྲྭ་རྐྱང་དཀྱུས་མ་འགའ་ཞིག་གམ། ཡང་ན་གཉའ་ཁྲི་ཆོས་རིག་ཞབས་ཞུ་རིས་མེད་བོད་ཀྱི་དཔེ་མཛོད་ཁང་གིས་ལྷག་བསམ་རྣམ་དག་གིས་བོད་ཀྱི་ཆོས་དང་རིག་གཞུང་རྣམས་ཡར་རྒྱས་གོང་འཕེལ་དང་། ཆོས་བརྒྱུད་ཁག་ནང་སྔར་བས་མཐུན་ལམ་རྡོག་རྩ་གཅིག་སྒྲིལ་དང་དཔུང་པ་མཉམ་སྐྱོད་ཡོང་ཆེད་ཡིན་ཞེས་གསུངས་ཡོད།

ཉིན་དེར་སྐུ་མགྲོན་གཙོ་བོ་སེར་བྱེས་མཁན་རིན་པོ་ཆེ་མཆོག་གིས་འདི་ལྟ་བུའི་ཆོས་བརྒྱུད་ནང་ཁུལ་དུ་བགྲོ་གླེང་གོ་སྒྲིག་ཞུ་ཐུབ་པ་དངོས་གནས་ཡག་པོ་རེད་ལ། ངས་སེར་བྱེས་ལས་ཁུངས་ཀྱི་ཚབ་བྱས་ཏེ། ཚོགས་འདུ་གོ་སྒྲིག་པ་དང་བགྲོ་གླེང་དུ་ཞུགས་མཁན་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན་ཞེས་དང་། ཐེངས་འདིའི་བགྲོ་གླེང་དེ་ཆོས་བརྒྱུད་ནང་ཁུལ་དུ་བགྲོ་གླེང་གནང་བ་ཐེངས་དང་བོ་ཆགས་ཡོད་ནའང་། བགྲོ་གླེང་བ་རྣམས་ཀྱིས་གྲུབ་འབྲས་ལྡན་པ་དང་ཕན་ཚུན་ལ་བློ་བསྐྱེད་རྙེད་པའི་བགྲོ་གླེང་ཡག་པོ་གནང་རྒྱུ་མ་ཟད། མ་འོངས་པར་ཡང་འདི་ལྟ་བུའི་བགྲོ་གླེང་མུ་མཐུད་འཚོགས་ཐུབ་ན་དགེ་མཚན་ཆེན་པོ་མཐོང་གི་འདུག་ཅེས་ཐེངས་འདིའི་བགྲོ་གླེང་ཚོགས་འདུ་འདིར་ཐུགས་རེ་ཆེན་པོ་གནང་སོང་།

ཐེངས་འདིའི་བགྲོ་གླེང་གཙོ་སྐྱོང་བ་སྤྱི་འཐུས་དགེ་བཤེས་ཐུབ་བསྟན་འཕེལ་རྒྱས་ལགས་དང་བགྲོ་གླེང་གསུང་བཤད་གནང་མཁན་རྣམས་ནི། རྫོགས་ཆེན་མཁན་རིན་པོ་ཆེ་འཇམ་དཔལ་བསྟན་འཛིན་མཆོག་དང་སེར་བྱེས་མཁན་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག རྣམ་གྲོལ་གླིང་སློབ་དཔོན་དོལ་པོ་སྤྲུལ་སྐུ་དང་བཀའ་བརྒྱུད་དཔེ་ཁྲིད་རྒན་ཡེ་ཤེས་རྒྱ་མཚོ། ས་སྐྱའི་དཔེ་ཁྲིད་རྒན་འཇམ་དབྱངས་མགོན་པོ། དགེ་ལུགས་དགེ་བཤེས་རྒན་ཡ་མ་བསོད་ནམས། ས་སྐྱའི་དཔེ་ཁྲིད་རྒན་ངག་དབང་ལྷུན་འགྲུབ། དགེ་ལུགས་དགེ་བཤེས་ཐུབ་བསྟན་ལེགས་སྨོན་བཅས་ཡིན་འདུག

ཉིན་གཉིས་རིང་གི་བགྲོ་གླེང་གི་བརྗོད་གཞི་ནི། ཆོས་བརྒྱུད་སོ་སོའི་བྱུང་རིམ་དང་ཕྱི་ནང་གི་ལྟ་གྲུབ། དབུ་མའི་ལྟ་བ་སོགས་ཀྱི་སྐོར་བཅས་རེད།