མི་ལོ་ལྔ་བཅུ་འཁོར་བའི་བོད་གཞུང་ཟློས་གར།
རྒྱུད་སྨད་སྔགས་རམས་པ་ཡོན་ཏན།
༥༩ ལོར་བོད་གངས་ཅན་འདི་ཟུངས་ཟད་ཀྱི་ནད་པ་ལྟར་གྱུར་བའི་སྐབས། བོད་ལྗོངས་རིག་པའི་སྒྱུ་རྩལ་མི་ཉམས་སླར་གསོའི་ཆེད་ལོ་དེ་ཉིད་དུ་༧གོང་ས་མཆོག་ནས་ཛ་དྲག་ཐོག་ཀ་སྦུག་ཏུ་བོད་གཞུང་ཟློས་གར་འདི་ཉིད་གསར་འཛུགས་མཛད་པ་ནས་བཟུང་། བཙན་བྱོལ་སྤྱི་ཚོགས་ནང་གླུ་གར་སྒྱུ་རྩལ་གྱི་བསྟི་གནས་རྙིང་ཤོས་དང་གཞི་རྩ་བརྟན་ཤོས་ཤིག་ཆགས་ཡོད་ཅིང་། སྒྱུ་རྩལ་གྱི་བསྟི་གནས་འདིས་ཉམས་འགྱུར་ཕུན་སུམ་ཚོགས་པའི་བོད་ཀྱི་ལྷ་གཞུང་གིས་མཚོན་པའི་གླུ་གར་རྒྱ་མཚོའི་དཔལ་ལ་མངོན་པར་རོལ་ཏེ། ངལ་བ་དང་མཐུན་རྐྱེན་གཞི་རྒྱ་ཆུང་བའི་འོག་དབུ་མང་ཡོངས་ཀྱིས་ལྷག་བསམ་དུང་ལྟར་དཀར་ཞིང་། རྣམ་དཔྱོད་རྒྱ་ཁབ་ལྟར་རྣོ་བའི་ཐོག་ནས་༧རྒྱལ་བའི་བཀའ་དགོངས་ཇི་ལྟ་བ་བཞིན་འཛིན་པ་དང་། སྐྱོང་བ། སྤེལ་བ་གསུམ་གྱིས་མཛད་རྗེས་རྨད་དུ་བྱུང་བ་བཞག་ཡོད་པ་ནི་ལྟ་ཤེས་ན་མིག་གིས་མཐོང་བ་དང་ལག་པས་ཟིན་རྒྱུ་ཡོད་པ་ཞིག་ལས། གཏན་ཚིགས་སམ་རྒྱུ་མཚན་མང་དུ་བཀོད་པའི་ངལ་བ་ཅི་བསྟེན། བོད་གཞུང་ཟློས་གར་ཞེས་གངས་ལྗོངས་སྒྱུ་རྩལ་བསྟི་གནས་འདི་ཉིད་ད་ཆ་བགྲང་བྱ་ཧྲིལ་པོ་ལྔ་བཅུ་འཁོར་ཟིན་པ་དང་། དུས་ཡུན་དེའི་རིང་ཐོག་མར་༧གོང་ས་མཆོག་དང་བོད་གཞུང་གི་རླབས་ཆེན་གྱི་དགོངས་གཞིའམ་དམིགས་ཚད་གཞིར་བཟུང་། སྒྱུ་རྩལ་ཚོགས་པ་འདིས་གཙོ་བོ་ནི་རང་ཅག་བོད་ལྗོངས་སུ་རྒྱ་དམར་གྱིས་དངོས་ཤུགས་བརྒྱུད་གསུམ་ནས་བོད་ཀྱི་སྒྱུ་རྩལ་རྩ་ཆེན་རྣམས་རྨང་ནས་བཤིག་པར་བྱེད་པ་དང་། ཉམས་ཉེས་པར་བྱེད་པ་དང་། བསྲེ་ཞིང་ལྷད་པར་བྱེད་པའི་སྣང་ཚུལ་ངན་པ་འདི་ལས་རྣམ་པར་རྒྱལ་བར་བྱེད་པའི་སླད་དུ་བོད་གཞུང་ཟློས་གར་ནས་བྱེད་སྒོ་ནམ་མཁའི་སྐར་ཚོགས་བཀྲ་བ་ལྟར་སྤེལ་རྩོམ་གནང་ཡོད་པ་རེ་རེ་བཞིན་བརྗོད་གྱིས་མི་ལངས་མོད། གཙོ་གནད་ཆེ་ལ་དོན་སྙིང་ལྡན་པའི་སྲི་ཞུའི་ཞབས་འདེགས་འགའ་ཞིག་ཐོས་འཛིན་དུ་མ་གྱུར་པའི་དོན་གཉེར་ཅན་འགའི་ངོར་ཆེད་དུ་བརྗོད་པར་བྱ་སྟེ།
༡༽ ༥༩ ལོར་མཐུན་རྐྱེན་ཤིན་ཏུ་ཞན་པའི་འོག་སྐབས་དེའི་འགོ་མང་ཡོངས་ནས་འཕྱར་གྲུ་མཉམ་འདེགས་ཞུས་ནས་རང་རེའི་མི་རིགས་ཀྱི་གཅེས་ནོར་རིག་གཞུང་གི་ཞབས་འདེགས་སུ་དམིགས་ཏེ། ཆོས་རྒྱལ་མེས་དབོན་རྣམ་གསུམ་སོགས་ཀྱི་རྒྱལ་རབས་བརྗིད་ཉམས་ལྡན་པ་འཁྲབ་སྟོན་དང་། ཆོས་རྒྱལ་ནོར་བཟང་སོགས་བོད་ཀྱི་ལྷ་གཞུང་ཁག བོད་ལྗོངས་མདོ་དབུས་ཁམས་གསུམ་གྱི་གླུ་གར་དང་། རོལ་མོའི་ཆ་བྱད་སོགས་ངལ་དུབ་དང་གཞན་དབང་སྟབས་བསྟུན་ཁོ་ནའི་འོག་ནས་མཁོ་བའི་ཡོད་བྱད་དང་། ཚོགས་མི་སོགས་ཚགས་སུ་ཚུད་པ་མངོན་པར་འདུ་པར་བྱས་ཏེ་བོད་གཞུང་ཟློས་གར་གྱི་གཞི་ཚུགས་པར་བྱས་པ་དང་གཅིག
༢༽ ཆིབས་སྒྱུར་དང་། གཞུང་འབྲེལ་མཛད་སྒོ་ཁག་ལ་མང་ཚོགས་འདུ་འཛོམས་སར་མཛད་སྒོ་སོ་སོ་དང་འབྲེལ་ཡོད་ཀྱི་ཡིད་དབང་རབ་ཏུ་འཕྲོག་པའི་གླུ་དང་། གར་དང་། རོལ་མོ་དཀྲོལ་བརྡུང་སོགས་གླུ་གར་མཆོད་སྤྲིན་གྱིས་བཀུར་བསྟི་ཕུན་སུམ་ཚོགས་པ་ཞུ་བཞིན་པ་དང་གཉིས།
༣༽ གནའ་སྲོལ་བོད་ཀྱི་ཞོ་སྟོན་ཞེས་སེར་སྐྱ་མང་ཚོགས་རྣམས་ཞི་བསིལ་དགའ་བདེའི་དཔལ་ཡོན་ལ་རོལ་བའི་དུས་སྟོན་སྲུང་བརྩིའི་ཆེད། བོད་གཞུང་ཟློས་གར་གྱིས་འགྲོ་གྲོན་ཕོན་ཆེས་གོ་སྒྲིག་འོག་ཕྱོགས་མཐའི་ལྷ་མོ་བ་རྣམས་མགྲོན་དུ་བསུས་ཤིང་། ལྷར་བཅས་འགྲོ་བའི་མགོན་པོ་༧གོང་ས་མཆོག་ཇི་ལྟར་སྒྱུ་སྐར་གྱི་དབུས་སུ་མཚན་མོའི་མགོན་པོ་ཉིད་མེ་ཏོག་ཀུ་མུད་སྐྱོང་བའི་ཕྱིར་ཆས་པ་དང་གཉིས་སུ་མེད་པར་ཚོགས་མགོན་དུ་གཟི་འོད་འབར་བར་བཞུགས་སུ་གསོལ་ཏེ། གཞུང་གི་སྲི་ཞུ་བ་ཆེ་ཕྲ་དང་། སེར་སྐྱ་མང་ཚོགས་ལ་བོད་ཀྱི་ལྷ་གཞུང་སྣ་ཚོགས་གཟིགས་འབུལ་གྱིས་ཡིད་དགའ་ཞིང་མགུ་བའི་ཆེད་དུ་བརྩོན་པ་ལྷུར་ལེན་བྱེད་པ་དང་གསུམ།
༤༽ རང་རེའི་གཞོན་ནུ་ཕོ་མོ་བོད་ལྗོངས་ཀྱི་གླུ་གར་རྒྱ་མཚོར་འཇུག་པར་འདོད་ཅིང་ཆ་རྐྱེན་ཚང་བའི་རིགས་ཤེས་རིག་ལས་ཁུངས་བརྒྱུད། བོད་ཀྱི་རྐང་བྲོ་གླུ་གཞས་དང་། སོར་མོའི་འདུ་བྱེད་ལས་གྲོལ་བའི་སྙན་འཇེབས་ཁུག་པ་ཅན་གྱི་རོལ་མོའི་བྱེ་བྲག་སྣ་ཚོགས་པར་བོད་གཞུང་ཟློས་གར་ནས་སྦྱོང་བརྡར་ཕུལ་དུ་བྱུང་བ་སྤྲད་དེ། གཏན་ཉིན་སློབ་གྲྭ་ཁག་གི་སྒྱུ་རྩལ་རིག་གཞུང་གི་དགེ་རྒན་འཕེར་བ་ཡང་རབ་ཅིག་བསྐྲུན་ཏེ་སྤྱི་ཚོགས་ནང་དགེ་མཚན་མངོན་བཞིན་པ་དང་བཞི།
༥༽ སྔོན་དེང་ཕྱི་རྒྱལ་ཡུལ་ཁག་ཏུ་ཕྱི་བསྐྱོད་གནང་སྟེ། ལྟ་ན་སྡུག་པའི་བོད་ཀྱི་ལུགས་ཟུང་ཆས་གོས་ཀྱིས་མཛེས་པར་བརྒྱན་ཅིང་། འཛུམ་མདངས་གྲོལ་བའི་བཞིན་གྱི་རྣམ་འགྱུར་དང་བཅས་ཚད་ལྡན་གྱི་འཁྲབ་སྟོན་ཞུས་པའི་འབྲས་བཟང་སྟེ། རྒྱལ་ཁབ་དེ་དང་དེའི་སྐྱེ་བོ་ཕོ་མོ་རྣམས་ཡིད་ཀྱི་བརྟན་པ་དབང་མེད་དུ་འཕྲོག་ཅིང་དགའ་བདེའི་ཚོར་བ་སྔོན་ཆད་མི་ཚེའི་ནང་འཕྲད་མ་མྱོང་བའི་བརྗོད་དཀའ་བའི་སེམས་ཀྱི་ཞི་བདེ་སྦྱིན་པ་མ་ཟད། གཏིང་ཟབ་ཀྱི་རང་བཞིན་ལྡན་པའི་བོད་ཀྱི་གླུ་གར་དང་ལྷ་གཞུང་གི་དུམ་ཚན་སོགས་འཁྲབ་སྟོན་གྱི་ལམ་ནས་བོད་རྒྱལ་ཁབ་དང་བོད་མིའི་ངོ་བོ་གཞན་དང་མ་འདྲེས་པ་མཚོན་པའི་གསལ་བསྒྲགས་ཀྱང་ཇི་ལྟར་དབྱར་གྱི་ཆུ་འཛིན་འཁྲིགས་པའི་གསེབ་ནས་འབྲུག་སྒྲས་ས་གཞི་འགེངས་པ་དེ་ལྟར་ཁྱབ་བརྡལ་ཐུབ་པ་བྱུང་བ་དང་ལྔ།
༦༽གངས་ལྗོངས་གླུ་གར་རྒྱ་མཚོའི་དཔལ་ཡོན་མི་ཉམས་ཤིང་། ཉམས་པ་སོར་ཆུད་པའི་སླད་དུ། རྨད་དུ་བྱུང་བའི་ཐབས་ཚུལ་གཞན་ཞིག་སྟེ། དབྱར་སྐྱིད་ཅེས་མིང་དུ་བཏགས་པའི་དོན་དངོས་སུ་རུ་ཁག་གཉིས་དབར་གླུ་གར་འགྲན་བསྡུར་གྱི་ལམ་ནས། བོད་ལྗོངས་ཀྱི་ཡུལ་གྲུ་ཁུག་ཀྱོག་ཚུན་ཆད་ཀྱི་གླུ་གར་རྣམས་བསྡུ་རུབ་དང་། ཉམས་ཞིབ། སྦྱོང་བརྡར་དང་། ཉར་ཚགས་ཀྱིས་གཅེས་འཛིན་ཡོང་ཐབས་སུ་ལོ་ལྟར་ཉམས་དང་འགྱུར་བ་ཕུན་སུམ་ཚོགས་པའི་འཁྲབ་གཞས་དང་། བརྗིད་ཉམས་མཛེས་སྡུག་ལྡན་པའི་དམངས་གཞས། སྙན་འཇེབས་འགྱུར་ཁུག་གི་དཔལ་བཞད་པའི་རྐྱང་གཞས་དག་འཁྲབ་སྟོན་བྱེད་པས། བློ་གཟུ་བོར་གནས་ཏེ་ལྟ་དང་ཉན་ཤེས་ན་སྒྱུ་རྩལ་གྱི་གནས་ཚད་མཐོན་པོར་སོན་ཡོད་ལ། འཁྲབ་ཚན་དེའི་འོད་སྡེར་བཟོ་བསྐྲུན་གྱིས་ལོ་ལྟར་འགྲེམས་སྤེལ་བྱེད་བཞིན་པ་དང་། དེ་དག་གི་ཁྲོད་ནས། ༢༠༠༨ ལོའི་དབྱར་སྐྱིད་དེ་ནི་ལོ་དེའི་གསུམ་བཅུའི་དོན་རྐྱེན་ཐད་གཙོ་བོ་གཞིས་ལུས་སྤུན་ཟླ་རྒྱལ་གཅེས་དཔའ་བོ་དཔའ་མོ་རྣམས་ནས་བོད་བསྟན་སྲིད་སླད་གཅེས་པའི་རང་སྲོག་འདོར་བ་ལའང་ཇི་མི་སྙམ་པའི་དཔའ་ངར་ཞུམ་པ་བྲལ་བའི་རླབས་ཆེན་གྱི་ལས་འགུལ་ལ་གདུང་སེམས་མཉམ་བསྐྱེད་མཚོན་པ་རྩལ་དུ་བཏོན་ཡོད་པ་དང་། ༢༠༠༩ ལོའི་འདི་ནི་བཙན་བྱོལ་དུ་མི་ལོ་ ༥༠ འཁོར་བའི་དུས་དྲན་གཙོ་འདོན་གནང་ཡོད་པས་འབྲེལ་ཡང་ཆགས་འདུག་སྙམ་པ་མ་ཟད། འོད་སྡེར་དེ་དག་བརྒྱུད་སྤྱི་ཚོགས་སྤྱི་དང་། ལྷག་པར་གཞོན་སྐྱེས་དོན་གཉེར་ཅན་རྣམས་ལ་ཐུགས་ཕན་གསོས་པའི་དགེ་མཚན་རྒྱ་ཆེར་བསྐྲུན་ཐུབ་པ་དང་དྲུག་སྟེ། གླུ་གར་སྒྱུ་རྩལ་གྱི་གཏེར་གྲོལ་བ་བོད་གཞུང་ཟློས་གར་གྱི་སྲི་ཞུའི་མཛད་སྒོ་འགའ་ཞིག་གླེང་ནས། དེ་དག་ལ་ལྡན་པའི་ཁྱད་ཆོས་དང་། དགེ་མཚན་ཅུང་ཟད་བརྗོད་པ་དང་ལྷན་ཅིག འབྱུང་འགྱུར་ཡང་། གངས་ཅན་བོད་ཀྱི་ཐུན་མིན་རིག་གཞུང་མི་ཉམས་གོང་འཕེལ་དང་། ཉམས་པ་སླར་གསོས་ཏེ། བོད་ཀྱི་ཆོས་རིག་གིས་འཛམ་གླིང་ཡངས་པའི་ཁྱོན་ལ་ཕན་པ་རྒྱ་ཆེན་པོ་ཡོང་བ་དང་། བོད་༧རྒྱལ་འབངས་ཞལ་གྱེས་པའི་སེམས་སྐྱོའི་ངང་ཚུལ་འདི་ལས་མངོན་པར་གྲོལ་ཏེ། གཞིས་བྱེས་གསེར་ཞལ་ལྷན་འཛོམས་ཀྱིས་དགའ་བའི་འཛུམ་མདངས་གྲོལ་བའི་ངང་། ལྷ་ལྡན་ཉིད་དུ་བོད་ཀྱི་ཞོ་སྟོན་གྱི་མཛད་སྒོ་བཀྲ་ཤིས་དགའ་སྟོན་གྱི་དཔལ་རོལ་བའི་ཡིད་སྨོན་ཡང་ཞུ།
བོད་གཞུང་ཟློས་གར་སྐོར་སྔོན་ནས་རྩོམ་ཡིག་ཐུང་ངུ་ཞིག་འབྲི་བར་འདོད་ཀྱང་། བརྩམ་བྱའི་དོན་དང་དུས་སྐབས་འཚམ་པ་ཞིག་བློ་ངོར་མ་འཇུག་པས་ལུས་ཤིང་། འདི་ལོ་འོས་ཤིང་འཚམ་པའི་དུས་སྐབས་ཏེ། བོད་༧རྒྱལ་འབངས་དུམ་ཞིག་བཙན་བྱོལ་དུ་ལྷགས་ཏེ་བགྲང་བྱ་ ༥༠ འཁོར་བ་སྤྱི་དང་། བྱེ་བྲག་བོད་གཞུང་ཟློས་གར་བཙུགས་ནས་ལོ་ ༥༠ འཁོར་བའི་དུས་དྲན་ལོ་གཅིག་གཞུང་འབྲེལ་སྲུང་བརྩི་ཞུ་བའི་ལས་འགུལ་གྱི་ཆ་ཤས་སྐོང་ཆེད་དུ་བྲིས་པ་ཡིན།
བཀུར་འོས་སྔགས་རམས་པ་ཡོན་ཏན་ལགས། ཕྲན་གྱིས་གློ་བུར་ལ་གསང་སྔགས་སྐོར་གྱི་བསླབ་པ་མཐར་སོན་པ་ཞིག་དུས་བབས་ལས་རིགས་སུ་ཞུགས་པ་མཐོང་བས་དགའ་སྤྲོའི་ངང་འཚམས་འདྲི་ཡོད། སྤྱིར་དུས་བབས་ཟིན་བྲིས་པའི་ནང་དགེ་བཤེས་དང་སྨན་པ། སྔགས་རམས་པ་སོགས་གང་མང་ཕེབས་ཐུབ་ན་སྤྱི་ཚོགས་ཞབས་ཞུ་དང་རིག་གཞུང་སྲུང་སྐྱོབ་བཅས་གང་ལའང་ཕན་ཐོགས་ཆེ་ངེས་ལ་ལྷག་པར་དུས་བབས་ཟིན་བྲིས་ཀྱི་གཟི་བརྗིད་ཆེ་རུ་འགྲོ་ངེས། དེར་བརྟེན་སྐུ་ཉིད་དུས་བབས་ཟིན་བྲིས་པའི་ནང་འཛུལ་ཞུགས་གནང་ན་ཕན་ཐོགས་ཡོད་པའི་ངོས་འཛིན་དང་རེ་སྐུལ་ཞུ་རྒྱུ་མ་ཟད། ཐེངས་འདིར་དྲི་བ་གཅིག་ཞུ་ཆོག་པ་གྱིས། རྩ་རླུང་ཐིག་ལེའི་རྣམ་གཞག་གི་རྩ་དབུ་མ་དེ་ངོས་འཛིན་གང་འདྲ་བྱེད་དགོས་མིན་རང་ལུགས་རྒྱུ་མཚན་དང་བཅས་གསུང་རོགས་གནང་། མཐར་མུ་མཐུད་མཇལ་ཆོག་པའི་རེ་སྨོན་ཞུ།
བྱས་རྗེས
གྲུབ་འབྲས་བྱུང་ཡོད་པ་དེ་ཡག་པོ་རེད།
ཡིན་ནའང་གཙོ་བོ་དེ་དུས་རབས་དང་ཉམས་ཏུ་རིང་གི་རིག་གཞུང་དེ་ཡར་རྒྱས་གཏོང་རྒྱུ་དེ་རེད།
ཡང་གཅིག་བཤད་ན་ད་པར་དུ་མི་རང་རང་སྒེར་འདུན་སྒྲུབ་པ་ལས་བཙན་བྱོལ་བོད་གཞུང་ལ་འདི་ཟེར་བ་ཞིག་ཞིབ་རྒྱས་བཞག་ཡོད་པ་མ་མཐོང་ངོ་།
མཚམས་རེར་གྲུབ་འབྲས་ཀྱི་སྐོར་ནས་གླེང་རྒྱུའང་གལ་ཆེན་པོ་རེད། ཡིན་ཡང་། འབྱུང་འགྱུར་གྱི་ཁ་ཕྱོགས་ནི་དེ་ལས་ཀྱང་གལ་ཆེན་པོ་འདུག འདི་ལོ་བོད་གཞུང་ཟློས་གར་ཁང་ཚུགས་པའི་མཛད་སྒོ་དང་བསྟུན་ནས་འདི་ག་གསར་ཁང་གིས་ཟློས་གར་འགན་འཛིན་ལ་བཅར་འདྲི་བྱས་ཡོད། དེའི་ནང་དུ་མ་འོངས་པའི་ཟློས་གར་ཁང་གི་ཁ་ཕྱོགས་དང་ལས་རིམ་གསར་པ་དེ་འདྲ་འདུག འདི་དག་ལམ་ལྷོང་ཡོང་བར་སྤྱི་སྒེར་ཚང་མས་མཐུན་འགྱུར་གནང་ཐུབ་ན་ཡག་པོ་རེད།
བཀའ་འགྱུར་རིན་པོ་ཆེས་གློག་བརྙན་གསར་པ་ཞིག་བཟོ་བཞིན་པ་དེའི་ནང་གི་འཁྲབ་སྟོན་པ་ ༢༠ ནི་བོད་གཞུང་ཟློས་གར་ཁང་གི་རེད། ཁོང་ལྟར་ན། མ་འོངས་པར་བོད་ཀྱི་འཁྲབ་སྟོན་ཡག་པོ་དེ་འདྲ་འབྱུང་ཐུབ་པར་ཡིད་ཆེས་ཆེན་པོ་འདུག་ཟེར།