ཏང་གཟི་བརྗིད་ངང་རྒན་ཡོལ་དུ་འགྲོ་ཐུབ་ན་ཡག་པོ་རེད།

ངོས་ཀྱི་བསམ་པར། རྒྱ་ནག་ལ་སྒྱུར་བཅོས་ཡིན་གཅིག་མིན་གཉིས་འགྲོ་དགོས་ཀྱི་འདུག  ཡིན་ནའང་། སྒྱུར་བཅོས་དེ་ག་ལེར་སོང་ན་མ་གཏོགས་ཧོབ་ཀྱིས་བཏང་ན་མི་མང་བོར་དཀའ་ངལ་ཡོང་གི་རེད་ཅེས་༧གོང་ས་མཆོག་གིས་གསུངས་ཡོད།

༢༠༠༩ ལོའི་ཟླ་ ༩ ཚེས་ ༢༨  ཉིན་༧གོང་ས་མཆོག་ཁེ་ན་ཌའི་གྲོང་ཁྱེར་ཝན་ཁོ་ཝར་ནང་རྒྱ་བོད་གླེང་སྟེགས་༼བྱམས་བརྩེ་དང་གུས་བརྩི་ནི་ང་ཚོའི་ཐུན་མོང་གི་མདུན་ལམ་ཡིན་༽ཞེས་པའི་ཚོགས་འདུའི་སྟེང་ཆིབས་བསྒྱུར་གནང་སྟེ། རྒྱ་རིགས་མཁས་པ་ཡང་ཅན་ལེ་དང་ཧྲིན་ཞེ། ཏོན་ཀོ་ཏེན། བུའུ་ཀོ་ཀང་སོགས་དང་མཉམ་དུ་རྒྱ་ནག་གིས་བོད་མིའི་ཐོག་མཐོང་ཚུལ་དང་། དེ་བཞིན་བོད་མིས་རྒྱ་ནག་ལ་ཇི་ལྟར་ལྟ་བ། རྒྱ་བོད་འབྲེལ་ལམ་གྱི་ད་ལྟའི་གནས་སྟངས་དང་མ་འོངས་མདུན་ལྗོངས་སོགས་ཀྱི་ཐོག་བགྲོ་གླེང་དང་གཏམ་བཤད་གནང་ཡོད་པ་རེད། རྒྱ་བོད་གླེང་སྟེགས་འདི་ནི་ད་ལོའི་ཕྱི་ཟླ་བརྒྱད་པར་སུད་སིའི་རྒྱལ་སའི་ནང་ཚོགས་པའི་རྒྱལ་སྤྱིའི་རྒྱ་བོད་ཚོགས་འདུའི་རྗེས་ཀྱི་རྒྱ་བོད་གཉིས་འཛོམས་ཀྱི་ཚོགས་འདུ་ཐོག་མ་དེ་ཆགས་ཡོད་པ་རེད།

༧གོང་ས་མཆོག་གིས་ཚོགས་ཞུགས་པ་ཡོངས་ལ་ཐོག་མར་གསུངས་དོན། དེ་རིང་ངོས་འདི་ནས་རྒྱ་རིགས་ཀྱི་གྲོགས་པོ་མང་བོ་ཞིག་ལ་ཐུག་པ་རེད། ཁྱེད་རང་ཚོ་ཚང་མར་འཚམས་འདྲི་བཀྲ་ཤིས་བདེ་ལེགས་ཡོད། ང་རང་བཙན་བྱོལ་བ་ཆགས་ནས་མི་ལོ་ལྔ་བཅུ་འགོར་བ་རེད། ཕྱོགས་གཅིག་ནས་རང་གི་ལུང་བ་དང་ཁ་བྲལ་བ་རེད། ཡང་ཕྱོགས་གཅིག་ནས་རང་དབང་ཐོབ་སྟེ་ལོ་ལྔ་བཅུ་ཕྱིན་པ་རེད། ཁྱེད་རང་ཚོ་ཡིན་ནའང་གྲོང་ཁྱེར་འདིའི་ནང་རང་དབང་ལོངས་སྤྱོད་བྱས་ནས་བསྡད་ཡོད་པ་རེད། ཡིན་ནའང་། ང་ཚོའི་ཤ་ཁྲག་རུས་གསུམ་ཡོང་ས་དེ་ལུང་བ་གཞན་ཞིག་ནས་ཡོང་བ་རེད། ང་ཚོ་ས་ཆ་གང་དུ་བསྡད་ཀྱང་ང་ལ་མཚོན་ན་བོད་མི་ཞིག་དང་། ཁྱེད་ཚོར་མཚོན་ན་རྒྱ་མི་ཞིག་མ་ཤི་བར་དུ་གནས་པ་རེད། དེར་བརྟེན། ང་ཚོས་རང་གི་ལུང་བའི་གནས་ཚུལ་དེ་བརྗེད་ཐབས་མེད་པ་རེད། རྒྱ་ནག་དེ་མི་འབོར་མང་ཤོས་དང་། ལོ་རྒྱུས་རིང་པའི་རྒྱལ་ཁབ་ཅིག་ཆགས་པས་འཛམ་གླིང་སྟེང་། གལ་ཆེན་ཆགས་ཡོད་པ་རེད་ལ། མ་འོངས་པར་ཡང་གལ་ཆེན་ཆགས་ཡོད། དེ་འདྲ་སོང་ཙང་། སྟོབས་ཆེན་རྒྱལ་ཁབ་དེ་འཛམ་གླིང་ཐོག་ཞི་བདེ་བསྐྲུན་མཁན་ཞིག་དང་། ཕན་ཐོགས་ཡོད་པ་ཞིག  མི་མང་ཞེད་སྣང་མེད་པ་ཞིག་ཆགས་རྒྱུ་གལ་ཆེན་ཡིན། ཅེས་དང་།

ཡང་༧གོང་ས་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་དྲུག་ཅུ་འཁོར་བའི་རྒྱལ་སྟོན་དུས་ཆེན་དངངས་སྐྲག་ངང་སྐྱེལ་བཞིན་པའི་སྐོར་ལ་གསུངས་དོན། ད་སྐབས་རྒྱ་ནག་ཡང་རྒྱལ་སྟོན་དུས་ཆེན་བསུ་བར་གྲ་སྒྲིག་ཞེད་པོ་བྱེད་ཀྱིན་ཡོད་པ་རེད་ལ། དམ་དྲག་ཀྱང་ཆེན་པོ་བྱེད་ཀྱིན་ཡོད་པ་རེད། ཁ་སང་རྒྱ་མི་ཞིག་དང་ངེད་གཉིས་ཐུག་ནས་གླེང་མོལ་བྱུང་། སྤྱིར་བཏང་དུས་ཆེན་ལ་མི་རྣམས་ཀྱིས་དགའ་དགའ་སྤྲོ་སྤྲོ་བྱེད་ཀྱིན་ཡོད་པ་རེད། ཡིན་ནའང་། རྒྱ་ནག་བཙུགས་ནས་ལོ་དྲུག་ཅུ་འགོར་བའི་དུས་ཆེན་སྐབས་ལ་རྒྱ་ནག་གི་དཔོན་རིགས་ཚོས་དུས་ཆེན་དེར་ཕྱི་ཕྱོགས་ནས་ག་འདྲ་བྱེད་འོང་ངམ། ནང་གི་མང་ཚོགས་ཀྱིས་ག་འདྲ་བྱེད་འོང་ངམ་བསམ་ནས་དངངས་སྐྲག་ངང་ཡོད་པ་རེད། མི་མང་གི་ནང་ཡང་རྒྱ་ནག་གིས་དམ་དྲག་ཆེན་པོ་བྱེད་ཨེ་ཡོང་བསམ་ནས་དངངས་སྐྲག་ངང་གནས་ཡོད་པ་རེད། རྒྱ་ནག་གི་དཔོན་རིགས་ཚོར་མཚོན་ན་དུས་ཆེན་མཇུག་རྫོགས་པའི་སྐབས་སུ་ད་གཟོད་དོན་དག་བྱུང་མ་སོང་བསམ་ནས་དགའ་སྤྲོ་སྐྱེས་གི་རེད། བསམ་བློ་བཏང་ན་དེ་ཐབས་སྐྱོ་བོ་རེད། གལ་སྲིད་སྟོབས་ཆེན་རྒྱལ་ཁབ་འདིས་འཛམ་གླིང་ཐོག་ཞི་བདེ་དང་། མི་མང་དངངས་སྐྲག་མི་ཡོང་བ་ཞིག་བཟོས་ན་མཆོག་ཏུ་གྱུར་བ་རེད། དཔེར་ན་ངོས་རང་རྒྱ་གར་ནང་ལོ་ལྔ་བཅུར་བསྡད་པ་རེད། རྒྱ་གར་ནང་དུས་ཆེན་སྣ་ཚོགས་སྐབས་མི་རྣམས་དགའ་དགའ་སྤྲོ་སྤྲོ་བྱས་ནས་སྡོད་པ་རེད་མ་གཏོགས། དངངས་སྐྲག་བྱས་ནས་སྡོད་པ་ཞིག་མཐོང་མ་སོང་། རྒྱ་གར་གྱི་ཤར་ལྷོ་ནུབ་བྱང་ཚང་མ་ན་མི་རིགས་འདྲ་མིན་དང་རིག་གཞུང་འདྲ་མིན་ཡོད་པ་རེད། ཚང་མས་རང་གི་སྐད་དང་རིག་གཞུང་མཆོག་ཏུ་གྱུར་བར་བརྩི་གི་འདུག  མི་རིགས་ཚང་མ་འཆམ་མཐུན་ཐོག་གནས་ཡོད་པ་རེད། ཁ་བྲལ་ལ་སེམས་ཁྲལ་བྱེད་དགོས་གི་མ་རེད། ཡིན་ནའང་། ཀཤཱི་སྨིར་ལ་རྙོག་དྲ་ཏོག་ཙམ་ཡོད་པ་རེད། དེ་ནི་པ་ཀི་སུ་ཐན་ནས་བྱུང་བ་རེད་ཅེས་གསུངས་ཡོད།

ཡང་༧གོང་ས་མཆོག་ནས་རྒྱ་མི་དང་བོད་མི་ཚང་མར་རྒྱ་ནག་སྟོབས་ཆེན་རྒྱལ་ཁབ་དེ་ཞི་བདེ་ཅན་དུ་འགྱུར་བར་འགན་ཡོད་པའི་སྐོར་གསུངས་རྒྱུར། ངས་ནམ་རྒྱུན་རྒྱ་རིགས་གྲོགས་པོ་ཚོར་ལབ་ཀྱིན་ཡོད། དངོས་གནས་དྲང་གནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དེ་སྟོབས་ཆེན་རྒྱལ་ཁབ་ཏུ་ཆགས་ནས་མིང་དེ་སུས་ཐོས་ནའང་སེམས་ནས་དགའ་བ་བྱུང་ན། ང་ཚོ་བོད་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དེའི་འོག་ནས་བསྡད་ནའང་སྤོབས་པ་ཡོད། རྒྱ་ནག་དེ་ལས་ལྡོག་སྟེ། མི་རྣམས་ཞེད་སྣང་དང་དོགས་པ་ཟ་བ་ཡིན་ན། ང་ཚོ་གྲངས་ཉུང་མི་རིགས་ཚོར་དཀའ་ངལ་འཕྲད་གི་རེད་ལ། རྒྱ་རིགས་གྲོགས་པོ་ཚོར་ཡང་དཀའ་ངལ་འཕྲད་གི་རེད། དེར་བརྟེན། ང་ཚོ་རྒྱ་བོད་མི་རིགས་ལ་ཐུན་མོང་གི་འགན་འཁྲི་ཞིག་ཡོད་པ་རེད། ངོས་ཀྱི་བསམ་པར། རྒྱ་ནག་ལ་སྒྱུར་བཅོས་ཡིན་གཅིག་མིན་གཉིས་འགྲོ་དགོས་ཀྱི་འདུག  ཡིན་ནའང་། སྒྱུར་བཅོས་དེ་ག་ལེར་སོང་ན་མ་གཏོགས་ཧོབ་ཀྱིས་བཏང་ན་མི་མང་བོར་དཀའ་ངལ་ཡོང་གི་རེད། དེ་སྔོན་ཨུ་རུ་སུ་ལ་འགྱུར་བ་ཕྱིན་པས་མི་མང་བོར་དཀའ་ངལ་འཕྲད་འདུག  ག་ལེར་འགྱུར་བ་འགྲོ་རྒྱུ་གལ་ཆེན་རེད། ངའི་རེ་བར། གུང་ཁྲན་ཏང་རང་གིས་མགོ་ཁྲིད་ནས་སྔོན་ལ། ཏང་གི་ནང་ལོག་ནས་དམངས་གཙོ་བཅོས་བསྒྱུར་མང་ཙམ་བཏང་ནས་ག་ལེར་ཏང་གཟི་བརྗིད་ལྡན་པའི་ངང་རྒན་ཡོལ་དུ་འགྲོ་ཐུབ་ན་ཡག་པོ་རེད། ངོས་རང་ཡིན་ནའང་། རྒན་ཡོལ་དུ་ཕྱིན་ནས་ལོ་དགུ་ཙམ་འགྲོ་གིན་འདུག  དེ་ཡག་པོ་རེད། མི་ཁ་ཤས་ལོ་རྒས་ནས་ཤི་གྲབས་བྱེད་ཀྱིན་ཡོད་ཀྱང་དབང་བཟུང་ནས་འདུག་གི་རེད། དེ་ཚོའི་བསམ་བློ་གུ་དོགས་པ་རེད་ཅེས་གསུང་ཡོད། དེ་བཞིན་༧གོང་ས་མཆོག་གིས་རྒྱ་ནག་གི་ཨོ་ལིམ་པི་ཀི་བརྒྱུད་དྲིལ་བསྒྲགས་བྱེད་སྟངས་ཀྱི་སྐོར་ལ་གསུངས་དོན། བར་ལམ་བློ་ཕམ་པ་ཞིག་ལ་རྒྱ་ནག་གི་དྲིལ་བསྒྲགས་དེ་འཁྱོག་བཤད་ཁོ་ནར་སོང་ནས་རྒྱ་བོད་མི་རིགས་བར་དོགས་པ་ཟ་བ་དང་འགལ་ཟླ་ཤོར་ཡོང་བ་བཟོས་ཡོང་གི་འདུག དཔེར་ན། ན་ནིང་ཨོ་ལིམ་པི་ཀིར་མཚོན་ན་ངོས་དང་ཐོག་ནས་དེར་རྒྱབ་སྐྱོར་བྱས་ཡོད་པ་མ་ཟད། ནུབ་ཕྱོགས་ཀྱི་རྒྱལ་ཁབ་ཁག་མང་བོ་ཞིག་ཏུ་རྒྱ་ནག་གི་ཨོ་ལིམ་པི་ཀི་དེར་ངོ་རྒོལ་མི་བྱེད་རྒྱུའི་འབོད་སྐུལ་ཞུས་ཡོད། ཡིན་ནའང་། རྒྱ་ནག་གིས་ངོས་ངོ་རྒོལ་བྱེད་ཀྱིན་འདུག་ཅེས་བརྗོད་སོང་། ཉེ་ལམ་ངོས་རང་ཐའེ་ཝན་ནང་སོང་བ་ཡིན། སྐབས་དེ་དུས་མི་ལྔ་བཅུ་ལྷག་ཅིག་གིས་ངོས་རང་ལ་ཁ་བྲལ་བ་ཞེས་ནས་ངོ་རྒོལ་བྱས་སོང་། ངོས་ཁོང་ཚོར་ལབ་རྒྱུ་བྱུང་། ངོས་རང་དགའ་བོ་བྱུང་། ཁྱེད་རང་ཚོས་གཏམ་བརྗོད་རང་དབང་བེད་སྦྱོད་བྱེད་པ་ལ་དགའ་བོ་བྱུང་ཞེས་ལབ་པ་ཡིན། དངོས་གནས་དགའ་བོ་བྱུང་ཡང་བྱུང་སོང་། ཁྱེད་རང་ཚོས་ཐའེ་ཝན་ནང་གཏམ་བརྗོད་རང་དབང་ལོངས་སུ་སྤྱད་པ་རེད། ད་ཁྱེད་རང་ཚོས་རྒྱ་ནག་སྐམ་ས་ཆེན་མོར་གཏམ་བརྗོད་རང་དབང་གི་སློབ་སྟོན་བྱ་ཐུབ་ན་ཡག་པོ་ཡོད་པ་རེད་ཅེས་ལབ་རྒྱུ་བྱུང་ཞེས་གསུང་བཤད་གནང་ཡོད་པ་རེད།