སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ལྔ།

འཐེན་ཐུག་འཐུང་ཞོར་དུ་སྐུ་ཞབས་མར་ཁུའི་ཁ་ལག་འདིས་མིང་ལ་ག་རེ་ཟེར་བ་རེད་ཅེས་དྲིས་དུས། བློ་བཟང་གིས་འདིའི་མིང་ལ་འཐེན་ཐུག་ཟེར་གྱི་ཡོད་པ་རེད་ཟེར་ནས་ལན་སྤྲད་རྗེས་ཁོ་གཉིས་ཀྱིས་མུ་མཐུད་དུ་འཐེན་ཐུག་འཐུང་། སྐུ་ཞབས་མར་ཁུའི་ལྕགས་ཤོག་གི་ཁང་བ་ཆུང་ཆུང་འདི་འདྲ་ཞིག་གི་ནང་དུ་མི་གཉིས་བསྡོད་རྒྱུ་ནི་ལས་སླ་བོ་ཞིག་མ་རེད་ཟེར་ནས་ཁོ་རང་ལ་གོ་བརྡ་འཕྲོད་མི་འཕྲོད་བྱེད་ཞོར་དུ་བཤད།

བློ་བཟང་གིས་རང་གི་མི་ཤེས་པ་དག་ཚིག་མཛོད་ནང་ནས་བཙལ་ཞོར་དུ་སྐུ་ཞབས་མར་ཁུ་ལ་འདི་ནི་ང་རང་གི་ཁང་བ་མིན་པ་དང་རང་ཉིད་འདི་རུ་གནས་ཚང་དུ་བསྡད་ཡོད་པ་དང་། ད་ལྟའི་འཆར་འདུག་ས་ཡང་གཏན་འཁེལ་མེད་པ་མ་ཟད། རང་ཉིད་ལ་འཚོ་བའི་ཕྱོགས་ཀྱི་དཀའ་ངལ་སོགས་གང་ཡོད་པ་ཚང་མ་སྐུ་ཞབས་མར་ཁུ་ལ་འགྲེལ་བཤད་བརྒྱབ། སྐུ་ཞབས་མར་ཁུའི་སྐད་ཆ་དེ་དག་ཞིབ་དུ་ཉན་རྗེས་སུ། འདུག་སའི་ཁང་བ་དང་བློ་བཟང་གི་བཤད་པའི་སྐད་ཆ་སོགས་ལ་ཞིབ་དུ་ཉན་རྗེས་སུ། ཁོས་བློ་བཟང་ལ་འདི་ལྟར་བཤད། ངས་ཁྱེད་རང་ལ་འཚོ་བའི་ཐད་དུ་རོགས་པ་འདྲ་བྱེད་དགོས་ཀྱི་འདུག་གམ། ང་རང་ད་ལྟ་སློབ་མ་ཞིག་ཡིན་ན་ཡང་། རོགས་རམ་ཆུང་ཆུང་ཞིག་བྱེད་ཐུབ་ངེས་ཡིན་ཟེར་ནས་བཤད་དུས་སུ། བློ་བཟང་གིས་རང་གི་གདོང་བ་ཡང་དམར་པོ་ཆགས།

བློ་བཟང་གིས་ ཡ ད་ངས་སྐད་ཆ་བཤད་ཕྱོགས་མ་འགྲིག་པ་འདྲ། རོགས་རམ་སློང་བ་ལྟ་བུ་ཞིག་ཆགས་སོང་བསམ་ཞོར་དུ། སྐུ་ཞབས་མར་ཁུ་ལ་སླར་ཡང་། རང་གི་དབྱིན་སྐད་ཤེས་མིན་ལ་མ་བལྟས་པར་འདི་ལྟར་བཤད། ང་རང་གིས་ད་ལྟ་ཟླ་བ་གཅིག་ཙམ་རིང་དུ་འཚོ་བ་འདང་ངེས་ཀྱི་དངུལ་ཞིག་ཡོད། དེ་ནས་རང་གི་ཐུབ་ཚོད་དང་འཇོན་ཚོད་ཀྱི་ལས་ཀ་ཞིག་བཙལ་ནས་ལས་ཀ་ལས་ཞོར་དུ་སློབ་སྤྱོང་ཏོག་ཙམ་རེ་བྱེད་རྒྱུ་ཡིན། སྐུ་ཉིད་ཀྱིས་རོགས་རམ་བྱེད་འདོད་ཡོད་པ་ཐུགས་རྗེ་ཆེ་ལགས། ང་རང་ལ་དངོས་ནས་རོགས་རམ་མི་དགོས་ཟེར་ནས་ལན་སློག

བློ་བཟང་དང་སྐུ་ཞབས་མར་ཁུ་གཉིས་ཆུ་ཚོད་གཉིས་དང་ཕྱེད་ཀའི་རིང་དུ་སློབ་ཁྲིད་བྱེད་ཞོར་དུ་སྐད་ཆ་དེ་དག་བཤད་ཞོར་དུ་ལུས། སྤྱིར་ཡིན་ན་ཁོ་གཉིས་ཀྱི་ཆུ་ཚོད་གཅིག་གི་དུས་ཚོད་བཟོས་ཡོད་མོད། གཉིས་ཀ་སྐད་ཆའི་ནང་དུ་གཡེང་བ་དང་འཐེན་ཐུག་ཞིམ་པོ་ཞིག་བཟོས་ནས་འཐུང་བ་སོགས་བྱས་དེ་ཆུ་ཚོད་གཉིས་དང་ཕྱེད་ཀ་གར་སོང་ཆ་མེད་ཆགས། སྐུ་ཞབས་མར་ཁུ་འགྲོ་ཁར་སང་ཉིན་ཁྱེད་རང་རླངས་འཁོར་འབབ་ཚིགས་སུ་ཡོང་མི་དགོས། ང་རང་ཁྱེད་རང་གི་ནང་དུ་ཆུ་ཚོད་ཏག་ཏག་ལ་སླེབས་ཡོང་། སང་ཉིན་མཇལ་ཡོང་ཟེར་ནས། སྐུ་ཞབས་མར་ཁུ་ཕྱིན་སོང་།

དགོང་མོར་དེར་བློ་བཟང་གིས་རང་གི་གནས་ཚང་གྲྭ་བ་དེ་ལ་སློབ་ཁྲིད་བྱེད་དུ་འོང་བའི་སྐུ་ཞབས་མར་ཁུ་དང་ཁོ་གཉིས་ཀྱི་སྐད་ཆ་དག་ཞིབ་དུ་བཤད་དུས། གྲྭ་བ་དེས་ཁྱེད་རང་དངོས་ནས་མི་གླེན་པ་ཞིག་རེད། དེང་སང་རྡ་ས་འདི་ན་སྐྱ་སེར་གཉིས་ཀའི་སྤྱིན་བདག་ཕར་བཙལ་ནས་ཡོད་དུས། ཁྱེད་རང་ཚུར་རོགས་པ་བྱེད་ཟེར་མཁན་ཞིག་བྱུང་ན་དེ་ལ་ཡ་མི་ཟེར་ནི་ཅི་བྱེད་ཟེར་ཞོར་དུ། ཡ་ དེ་ན་ཁྱེད་རང་གིས་ག་རེ་བྱེད་རྩིས་ཡོད་ཅེས་བློ་བཟང་ལ་སྐད་ཆ་ཞིག་དྲིས་དུས། བློ་བཟང་གིས་ང་རང་གི་སྒོར་མོ་འདི་དག་མ་ཚར་སྔོན་དུ་ལས་ཀ་ཞིག་བཙལ་ནས་ལས་ཞོར་དུ་དབྱིན་ཡིག་ཕྲན་པུ་རེ་སྤྱོང་རྒྱུ་ཡིན། དེ་མིན་ད་ནི་དངོས་ནས་མི་གཞན་གྱིས་རོགས་དངུལ་ནི་གཏན་ནས་མི་ལེན་ཁོ་ཐག་ཡིན་སྙམ་ཡོད་ལ། རང་གིས་ཀྱང་དེ་ལྟར་བྱེད་འདོད་ཡོད་ཅེས་བཤད།

གྲྭ་བ་དེས་ད་དེ་ལྟར་མ་བྱེད། ཁྱེད་རང་ད་ལྟ་གྲྭ་བ་ནི་ལོག་མེད་པ་མེད་པ་རེད། གྲྭ་ལ་ཕྱིར་གྱོན་ནས་ང་རང་མཉམ་པོར་གྲོང་ཆོག་ལ་འགྲོ གྲོང་ཆོག་མེད་དུས། དབྱིན་ཡིག་འདྲ་སྤྱོང་། ཡོད་དུས་སུ་གྲོང་ཆོག་ལ་སོང་དེས་བྱས་པ་ཡིན་ན། འཚོ་བ་ལ་དཀའ་ངལ་མེད་ཙམ་ཞིག་ཡོང་གི་རེད་ལ། སློབ་སྤྱོང་ཡང་ཞོར་དུ་འགྲིག་འགྲོ་ནི་རེད་ཅེས་བཤད་དུས། བློ་བཟང་གིས་ང་རང་གིས་གྲྭ་བ་མི་བྱེད་རྒྱུའི་སེམས་ཐག་བཅད་ཟིན་པའི་ད་ནི་དངོས་ནས་གྲྭ་ལ་རང་གི་ཁ་ལྟོའི་ཆེད་དུ་གོན་ནས་མི་འདུག་ཁོ་ཐག་ཡིན། དེ་ལས་ཁྱེད་ལ་འདི་ན་ངོ་ཤེས་ཡོད་རྒྱུ་རེད། ཟ་ཁང་ནང་གི་ཕོར་བ་འཁྲུ་མཁན་ཞིག་ཡིན་རུང་འགྲིག ཁྱེད་ཀྱིས་ང་རང་ལ་རྡ་ས་ནས་ལས་ཀ་རེ་བྱེད་ས་ཨེ་རེག་གི་ལྟ་རོགས་གནོང་ཞེས་བཤད།

གྲྭ་བ་དེས་ཡ་ཡ་། ངོ་མ་ཁྱེད་རང་གིས་དེ་འདྲ་ཞིག་བསམ་ནས་བསྡད་ཡོད་ན། ངས་ཁྱེད་རང་ལ་ལས་ཀ་རེ་བྱེད་ས་ཨེ་རེག་གི་ལྟ་ཆོག་ཞེས་རང་གི་མདུན་གྱི་ཁ་འདོན་གྱི་དཔེ་ཆ་དེ་ཚུར་ལེན་བཞིན་པའི་སྐབས་སུ། བློ་བཟང་གིས་ཁྱེད་རང་ལ་འཚོ་བའི་ཐད་དུ་དེང་སང་དཀའ་ངལ་ཡོད་དམ་ཟེར་ནས་དྲིས། གྲྭ་བ་དེས་ངས་ཁྱེད་རང་ལ་གསང་དགོས་དོན་མི་འདུག དངོས་ནས་དཀའ་ངལ་ནང་དུ་ལྷུང་བསྡད་ཡོད། ཟླ་བ་གཉིས་རིང་གི་ཁང་གླ་སྤྲོད་ཐུབ་མ་སོང་། གང་ཡིན་ཟེར་ན། ང་རང་གི་སྤུན་ཞིག་གི་བྱིས་པ་གཉིས་ཉེ་སྔོན་གུང་སེང་དུ་ཡོང་ནས། སྒོར་རྡོག་ཁ་ཤས་ཤིག་ཡོད་པ་དེ། དེ་གཉིས་ལ་གོན་པ་རེ་དང་རྔན་པ་རེ་ཉོ་བྱེད་ཀྱིས་ཀྱང་མ་འདང་བར་དེའི་སྒང་ལ་ངོ་ཤེས་ཤིག་ལ་ཧིན་སྒོར་གཅིག་སྟོང་གི་བུ་ལོན་ཡོད། མི་འགོར་བར་ཕ་ཡུལ་ནས་སྒོར་མོ་ཁ་ཤས་ཤིག་སླེབས་རྒྱུ་ཡོད། དེ་ཐོན་ན་ཕ་ཡུལ་དུ་འགྲོ་དགོས་བསམ་ནས་བསྡད་ཡོད་ཅེས་བཤད།