ཨ་རིའི་རྒྱལ་ཡོངས་མཁའ་འགྲུལ་དང་མཁའ་དབྱིངས་ཞིབ་འཇུག་ཚན་པས་དུས་རབས་ཕྱེད་ཀའི་རྗེས་ནས་ཟླ་བའི་སྟེང་མཁའ་འགྲུལ་བ་བཞི་ཐེངས་དང་པོ་བཏང་འདུག
ཁ་སང་ཕྱི་ཚེས་ ༡ ཉིན་ཨ་རིའི་རྒྱལ་ཡོངས་མཁའ་འགྲུལ་དང་མཁའ་དབྱིངས་ཞིབ་འཇུག་ཚན་པས་ (NASA) ཨ་རིའི་ཨར་ཊི་མི་སི་གཉིས་པའི་ (Artemis II) ལས་གཞི་དང་འབྲེལ་ནས། ཨ་རིའི་མངའ་སྡེ་ཧྥོ་ལོ་རི་ཌ་ (Florida) ནས་མཁའ་དབྱིངས་བརྒྱུད་ཟླ་བའི་མཐའ་འཁོར་དུ་མཁའ་འགྲུལ་བ་བཞི་འཕུར་སྐྱོད་བྱས་ཡོད་འདུག་ལ། དེ་ནི་འདས་པའི་ལོ་ངོ་ལྔ་བཅུའི་རྗེས་སུ་ཨ་རིས་རྒྱ་ནག་མཉམ་དུ་འགྲན་བསྡུར་བྱས་ཏེ་མིའི་རིགས་ཟླ་བའི་ཕྱི་ངོས་སུ་བསྐྱོད་ཐེངས་བཞི་བ་ཡིན་འདུག ད་ལན་ཨ་རིའི་ཟླ་བའི་གོ་ལ་འཚོལ་ཞིབ་ཀྱི་རུ་ཁག་ཁྲོད། ཨ་རིའི་མཁའ་འགྲུལ་བ་རེ་ཌི་ (Reid Wiseman) ལགས་དང་། ཝིག་ཊོར་ (Victor Glover) ལགས། ཁི་རི་སི་ཊི་ནཱ་ (Christina Koch) ལགས། ཁེ་ན་ཌའི་མཁའ་འགྲུལ་བ་རྗེ་རེ་མི་ (Jeremy Hansen) ལགས་བཅས་ཡོད་འདུག
དེ་འབྲེལ་ཨ་རིའི་རྒྱལ་ཡོངས་མཁའ་འགྲུལ་དང་མཁའ་དབྱིངས་ཞིབ་འཇུག་ཚན་པའི་འཛིན་སྐྱོང་འགན་འཛིན་རྗེ་རེ་ཌི་ (Jared Isaacman) ལགས་ཀྱིས། ད་ལན་གྱི་ཟླ་བའི་ཡང་སྟེང་འཚོལ་ཞིབ་ཀྱི་ལས་དོན་དེ་ནི་མ་འོངས་པའི་ལས་གཞི་སྒོ་འབྱེད་བྱེད་པར་དམིགས་ཡོད་པ་མ་ཟད། དེ་ནི་ཟླ་བའི་ངོས་སུ་འཛུགས་སྐྲུན་གྱི་གཞི་རྩ་ཚུགས་ཐུབ་པར་འབད་བརྩོན་བྱེད་པའི་དམིགས་ཚད་བཟུང་ཡོད། ཅེས་བརྗོད་འདུག
གལ་ཏེ་ད་ལན་གྱི་ལས་དོན་ལ་ལམ་ལྷོངས་བྱུང་ཚེ། མཁའ་འགྲུལ་བ་བཞིས་ཉིན་བཅུའི་རིང་ད་སྔ་བར་མི་བསྐྱོད་མྱོང་མེད་པའི་ཟླ་བའི་མཐའ་འཁོར་དུ་འཕུར་སྐྱོད་ཀྱིས་འཚོལ་ཞིབ་བྱ་རྒྱུ་ཡིན་པ་དང་། དེ་ནི་ཨ་རིའི་རྒྱལ་ཡོངས་མཁའ་འགྲུལ་དང་མཁའ་དབྱིངས་ཞིབ་འཇུག་ཚན་པའི་གྲང་དམག་དུས་སྐབས་ཀྱི་ཟླ་བ་འཚོལ་ཞིབ་ཀྱི་ཨ་པོ་ལོ་ (Apollo) ལས་གཞིའི་ཤུལ་འཛིན་བྱས་པ་ཡིན་ཞིང་། འཛམ་གླིང་ཐོག་ལོ་ངོ་ ༥༣ ནང་ཟླ་བའི་ཉེ་འཁོར་དུ་མཁའ་འགྲུལ་བ་གཏོང་མཁན་ཐོག་མ་དེ་ཡིན་འདུག
ཕྱི་ལོ་ ༢༠༣༠ ལོར་རྒྱ་ནག་གིས་ཟླ་བའི་ལྷོ་སྣེ་རུ་མཁའ་འགྲུལ་བ་འཕུར་སྐྱོད་བྱ་རྒྱུའི་འཆར་གཞི་ཡོད་པ་དེར་འགྲན་རྩོད་ཀྱི་སླད་དུ། ཕྱི་ལོ་ ༢༠༢༨ ལོར་ཨ་རིའི་རྒྱལ་ཡོངས་མཁའ་འགྲུལ་དང་མཁའ་དབྱིངས་ཞིབ་འཇུག་ཚན་པས་ (Artemis IV) ལས་གཞི་དང་འབྲེལ་ནས་ཟླ་བའི་ལྷོ་སྣེ་རུ་མཁའ་འགྲུལ་བ་ཐེངས་དང་པོ་བསྐྱོད་རྒྱུའི་དམིགས་ཡུལ་བཟུང་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
