བུད་མེད་རྩོམ་པ་པོ་ཚེ་རིང་འོད་ཟེར་དང་སྒྲོལ་མ་སྐྱབས་གཉིས་ལོ་འདིའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་ ཧེལ་མན་ ཧམ་མེ་ཊ་ ཡི་གཟེངས་རྟགས་པ་ ༣༧ ཁྲོད་དུ་བདམས་འདུག
ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པས་གསལ་བསྒྲགས་སྤེལ་བ་ལྟར་ན། ལོ་འདིར་རྒྱལ་ཁབ་ ༡༩ ཡི་རྩོམ་པ་པོ་ ༣༧ ལ་ཧེལ་མན་ ཧམ་མེ་ཊ་གཟེངས་རྟགས་ Hellman/Hammett ཐོབ་ཡོད་ཅིང་། དེའི་ཁྲོད་དུ་བོད་རིགས་རྩོམ་པ་པོ་ཚེ་རིང་འོད་ཟེར་དང་སྒྲོལ་མ་སྐྱབས་གཉིས་ཀྱང་འདུག
ཁོང་ཚོར་གཟེངས་རྟགས་འདི་འབུལ་དོན་ནི་ཁོང་ཚོས་སྲིད་དོན་གྱི་གཉའ་གནོན་འོག་ནས་རང་གི་སྨྲ་བརྗོད་རང་དབང་གི་ཐོབ་ཐང་རྩོད་ལེན་བྱས་པའི་རྐྱེན་གྱིས་ཡིན་འདུག
རྩོམ་པ་པོ་འདི་དག་ཐམས་ཅད་ནི་ཆབ་སྲིད་ཀྱི་བཙན་གནོན་འོག་ན་བཞུགས་པའི་རྩོམ་པ་པོ་དང་ལས་འགུལ་བ་རྐྱང་ཡིན་འདུག ཁོང་ཚོས་རང་རང་གི་གནས་སྟངས་ཙམ་དུ་མ་ཟད། ཡུལ་ལུང་དེ་དག་གི་རྩོམ་པ་པོ་དང་གསར་འགོད་པ་གཞན་རྣམས་ལ་སྲིད་གཞུང་གིས་ཆབ་སྲིད་ཀྱི་དགོས་མཁོའི་དབང་གིས་བཙན་གནོན་མྱོང་བཞིན་པའི་གནས་བབ་དེའང་མཚོན་ཡོད་འདུག
ཧེལ་མན་ ཧམ་མེ་ཊ་གཟེངས་རྟགས་ནི་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་འཛིན་སྐྱོང་འོག ལོ་རེ་བཞིན་འཛམ་གླིང་སྟེང་གཞུང་གི་ཆབ་སྲིད་ཀྱི་སྡིགས་རའི་འོག་ཚུད་མཁན་གྱི་རྩོམ་པ་པོ་རྣམས་ལ་འབུལ་བཞིན་ཡོད་འདུག གཟེངས་རྟགས་འདི་ནི་ ༡༩༨༩ ལོར་ཨ་རིའི་འཁྲབ་གཞུང་རྩོམ་པ་པོ་ Lillian Hellman ལགས་ཀྱིས་ཁོང་མོའི་གཞིས་ཀའི་རྒྱུ་ནོར་རྣམས་ནི་སྨྲ་བརྗོད་རང་དབང་རྩོད་ལེན་བྱ་མཁན་གྱི་རྩོམ་པ་པོ་རྣམས་ལ་དཔལ་འབྱོར་གྱི་མཐུན་རྐྱེན་དུ་སྦྱོར་རྒྱུ་ཡིན་ལུགས་བཤད་པ་ལྟར་མགོ་བཙུགས་ཡོད་ལ། ད་བར་གྱི་ལོ་ ༢༠ རིང་རྒྱལ་ཁབ་ ༩༡ གི་རྩོམ་པ་པོ་ ༧༠༠ ལ་གཟེངས་རྟགས་འདི་འབུལ་མྱོང་ཡོད་ལ། གཟེངས་རྟགས་རེའི་མང་མཐའི་མ་དངུལ་ནི་ཨ་སྒོར་ ༡༠༠༠༠ རེ་ཡིན་འདུག གཟེངས་རྟགས་འདིར་ད་བར་དུ་ཨ་སྒོར་ས་ཡ་ ༣༠ ཡི་མ་དངུལ་བཏང་ཡོད་འདུག
ལོ་འདིའི་གཟེངས་རྟགས་ཐོབ་མཁན་ ༣༧ གྱི་ཁྲོད་ནས་ ༦ ནི་རྒྱ་ནག་དང་ཨི་རན། ཝེ་ཐུ་ནམ་བཅས་ནས་ཡིན་པ་དང་། སོ་སོའི་བདེ་འཇགས་ལ་མུ་མཐུད་ནས་དཀའ་ངལ་སྤྲོད་རྒྱུའི་ཉེན་ཁའི་འོག་རྩོམ་པ་པོ་ ༣༧ ཁྲོད་ཀྱི་རྩོམ་པ་པོ་ ༡༨ ཀྱི་མིང་ནི་གསང་བར་ཉར་ཡོད་པ་རེད། རྩོམ་པ་པོ་རེ་རེའི་རྒྱལ་ཁབ་ཀྱི་མིང་འདོན་བཞིན་པ་ལྟར། ཚེ་རིང་འོད་ཟེར་ལགས་ལ་རྒྱ་ནག་དང་བོད་ཅེས་བྲིས་འདུག་ལ། སྒྲོལ་མ་སྐྱབས་ལ་བོད་ཅེས་བྲིས་འདུག
རྒྱ་ནག་གི་རྩོམ་པ་པོའི་གྲས་སུ་ ཧུའི་ཅ་དང་ཧྲི་ཐའོ། ཡུ་གུར་གྱི་གསར་འགོད་པ་དང་རྩོམ་པ་པོ། སྙན་ངག་པའི་མིང་འཐོབ་མཁན་ Nurmuhemmet Yasin བཅས་འདུག
དངོས་གནས་ཡག་པོ་རེད་ང་ཚོ་བོད་ཀྱི་ན་གཞོན་ཚོའི་ཁོང་རྣམས་གཉིས་ལ་མིག་དཔེ་ལྟར་འོས་པ་ཞིག་རེད།
བོད་ཀྱི་བུད་མེད་རྩོམ་པ་པོ་ཚེ་རིང་འོད་ཟེར་དང་། སྒྲོལ་མ་སྐྱབས་ཁོང་རྣམ་གཉིས་ལ་བཀྲ་ཤིས་བདེ་ལེགས་ཞུ་རྒྱུ་ཡིན།
བཀྲ་ཤིས་བདེ་ལེགས།
དྲ་གྲོགས་ཚོ། གསར་འགྱུར་འདིའི་བཀླགས་ཚར་རྗེས་གསར་འགྱུར་འདི་དང་འབྲེལ་བ་ཡོད་པའི་མཆན་འདེབས་པར་བརྩོན་རོགས། དཔེར་ན། ཁ་ཉིན་བོད་ནང་གི་རྩོམ་པ་པོ་ཚེ་རིང་དོན་གྲུབ་ལའང་ཉེས་ཆད་བཏང་འདུག དེ་བཞིན་དུ་ད་ལོར་རྩོམ་པ་པོ་ཁྲག་ཡིག་འབྲི་མཁན་འཇུས་པ་དང་རྩོམ་པ་པོ་རིན་བཟང་སྨྱོན་པར་བཏང་འདུག་པ་ལྟ་བུ་རེད།
གོང་གི་གསར་འགྱུར་ནང་དུ་བསྟན་པ་ལྟར། གཟེངས་རྟགས་འདི་བཞེས་མཁན་ཁོ་རང་ཚོ་ཙམ་མིན་པར། ཡུལ་ལུང་དེ་དག་གི་རྩོམ་པ་པོ་དང་གསར་འགོད་པ་སྤྱིའི་ངོ་ཚབ་མཚོན་གིན་ཡོད་ཅེས་བཤད་འདུག་པ་ལྟར། ཕྱོགས་གཞན་ནས་བཤད་ན། གཟེངས་རྟགས་འདི་ནི་ཚེ་རིང་འོད་ཟེར་དང་སྒྲོལ་མ་སྐྱབས་གཉིས་ཙམ་མིན་པར། རིན་བཟང་དང་ཚེ་རིང་དོན་གྲུབ། བཀྲ་ཤིས་རབ་བརྟན་སོགས། མདོར་ན། ད་ལོའི་གཟེངས་རྟགས་འདི་བོད་ནང་གི་རྩོམ་པ་པོ་རྣམས་ལ་ཐོབ་འདུག་ཅེས་གླེང་ན་རིན་ཐང་དེ་བས་ཆེ་བར་འདོད། ཚེ་རིང་འོད་ཟེར་དང་སྒྲོལ་མ་སྐྱབས་གཉིས་ནི་བོད་ནང་གི་རྩོམ་པ་པོ་རྣམས་ཀྱི་ཁྲོད་སྨྲ་བརྗོད་རང་དབང་རྩོད་ལེན་གྱི་སྣེ་ཁྲིད་པ་ལྟ་བུར་ངོས་བཟུང་ན་ཤིན་ཏུ་ལེགས་པར་འདོད།
དྲ་གྲོགས་ཚོས་མཆན་འདེབས་སྐབས་འབྲེལ་ཡོད་ཀྱི་གནད་དོན་དང་གནས་ཚུལ་གྱི་རིགས་འགོད་རྒྱུ་གཙོ་བོར་དམིགས་དགོས། རྟེན་འབྲེལ་ཞུ་བ་དང་དགའ་བསུ་ཞུ་བ། རྒྱབ་སྐྱོར་ཡོད་ཅེས་བྲིས་པ་ཙམ་གྱིས་འགྲིག་གིན་མེད་པའི་གནས་སྟངས་ཤིག་གསལ་ཡོང་གིན་འདུག
འདི་ནི་ཏན་ཏན་གཏམ་བཟང་ཤིག་རེད། འོན་ཀྱང་གསར་འགྱུར་རྩོམ་ཡིག་འདི་ནང་དུ་འདུས་མེད་པ་ཞིག་ནི་སྒྲོལ་མ་སྐྱབས་ལགས་རྒྱ་གར་དུ་ཕེབས་ནས་ཁོང་གི་བརྩམས་ཆོས་པར་དུ་འདེབས་པར་བོད་གཞུང་ལ་རེ་བ་ཡང་ཡང་ཞུས་ཀྱང་དང་ལེན་མ་བྱས་པས། ཁོང་རང་བོད་ནང་དུ་མི་ལོག་ཐབས་མེད་བྱུང་སྟེ་བོད་ནང་དུ་ཁོང་གི་དེབ་པར་དུ་བསྐྲུན་པ་རེད། དེའི་དབང་གིས་ཁོང་ལ་བཙོན་འཇུག་ཐེབས་ཏེ་ད་ལྟ་རྒྱ་ནག་གི་ལག་འོག་ཏུ་མནར་གཅོད་མྱོང་བཞིན་ཡོད། འདི་བོད་གཞུང་གི་ལས་གནས་ལ་གཏོགས་པའི་མི་རྣམས་ཀྱི་བྱས་ཉེས་ཤིག་ཏུ་རྩི་ཆོག
གཏམ་བཟང་རང་རེད
གཟེངས་རྟགས་དེ་ཁོང་རྣམ་པ་གཉིས་ལ་ཕུལ་བར་རྟེན་འབྲེལ་ཞུ།
དེ་ནི་གཏམ་བཟང་རེད། སྒྲོལ་མ་སྐྱབས་དང་འོད་ཟེར་གཉིས་ལ་ཐོབ་པ་ནི་དོན་དང་ལྡན་ནོ།།
ཨོ་ཨོ་ད་ཡིན་ན་གཏམ་བཟང་རང་རེད་འདུག འདི་དང་འདི་ལྟ་བུའི་གཟེངས་རྟགས་ལེན་མཁན་བོད་རིགས་གཞན་དག་ཡོད་ན།
བཀྲ་ཤིས་བདེ་ལེགས་ཞུ་རྒྱུ་ཡིན་