ཉེ་ཆར་ནོ་སྦེལ་ཞི་བདེ་གཟེངས་རྟགས་ཚོགས་པས་ ༢༠༠༩ ལོའི་ཞི་བདེའི་གཟེངས་རྟགས་ཨ་རིའི་སྲིད་འཛིན་ཨོ་བྷ་མ་ལ་སྤྲོད་རྒྱུའི་ཡོངས་ཁྱབ་གསལ་སྒྲགས་བྱས་དུས། ངའི་ཁོར་ཡུག་ན་འགྲུལ་བཞིན་པའི་འུ་ཚོའི་བོད་པ་འགས་ཧ་ལས་ཧང་སངས་ཀྱིས་གཞན་དག་གི་མི་ཚེའི་འབད་འབྲས་བརྒྱུད་ནས་འཐོབ་རྒྱུའི་གཟེངས་རྟགས་ཤིག་ཨོ་བྷ་མར་སྲིད་འཛིན་བྱས་ནས་ལོ་ངོ་གཅིག་མ་ཟིན་སྔོན་ནས་ཐོབ་པ་འདི་ཨོ་བྷ་མ་དངོས་གནས་འཇོན་པོ་དང་བསོད་དེ་འདུག་ཟེར་ནས་བཤད་ཀྱིན་འདུག
༼དོན་དངོས་སུ་ཨོ་བྷ་མའི་གཏམ་བཤད་ཁ་ཤས་ཀྱིས་ལས་འཆར་དང་ལངས་ཕྱོགས་གསལ་སྟོན་བྱས་ཡོད་ཁུལ་བསྟན་པ་ཙམ་གྱིས་གཟེངས་རྟགས་ཐོབ་སོང་ཟེར་བ་དེ་རེད༽ ཡིན་ན་ཡང་། ངའི་བསམ་པར་ད་ལྟའི་སྐབས་སུ་ནོ་སྦེལ་གཟེངས་རྟགས་ཚོགས་པ་ཡང་ཆབ་སྲིད་འཁྲབ་སྟོན་པ་ཞིག་ཏུ་གྱུར་ཡོད་པ་རྟོགས་བྱུང་། དངོས་གནས་བྱས་ན། འདི་འདྲའི་ཆབ་སྲིད་འཁྲབ་སྟོན་ནི་དུས་རབས་འདིའི་དགོས་མཁོ་དང་ཡོངས་སུ་མཐུན་ཞིང། རྣམ་དཔྱོད་ལྡན་པའི་རྨད་བྱུང་ཐབས་མཁས་ཀྱི་བྱེད་ཐབས་ཤིག་ཏུ་མཐོང།
གཞན་ཕན་རླབས་ཆེན་གྱི་བྱས་རྗེས་བཞག་ཟིན་མཁན་གྱི་གཟེངས་རྟགས་ཤིག་ཐེངས་འདིར་རླབས་ཆེན་གྱི་བྱས་རྗེས་འཇོག་པ་ལ་མངོན་དུ་ཕྱོགས་པའམ། ཡང་ན་འཇོག་རྒྱུའི་ལས་གཞིའི་འགོ་རྩོམ་མཁན་ལྟ་བུ་ཞིག་ལ་སྤྲད་པ་ནི། གཟེངས་རྟགས་སྤྲོད་ཡུལ་གྱི་འོས་ཆོས་ཀྱི་ཆ་ནས་བལྟས་ན་དམིགས་བསལ་པ་ཞིག་ཏུ་གྱུར་ཡོད་པར་སེམས།
ཕྱོགས་གཞན་ནས་བཤད་ན། ཨ་རིའི་སྲིད་འཛིན་ལ་འདི་ལྟར་གཟེངས་རྟགས་སྤྲད་པ་ནི། ཨ་རིའི་སྲིད་འཛིན་གྱི་ལུས་ངག་ཡིད་གསུམ་གྱི་རང་དབང་གི་ཁོར་ཡུག་ཆུང་དུ་བཏང་བ་ཞིག་གམ། ཡང་ན་ཨ་རིའི་སྲིད་འཛིན་ལ་རྒྱལ་ཁབ་གཅིག་གི་རྡོག་ཁྲེས་ཀྱི་ཐོག་ལ་འཛམ་གླིང་རྒྱལ་སྤྱིའི་རྡོག་ཁྲེས་བསྣན་ནས་འཁུར་དུ་བཅུག་པ་ཞིག་རེད། དེ་མིན་ཨ་རིའི་སྲིད་འཛིན་གྱི་མེ་མདའ་ཚུར་འཕྲོག་ནས་ཕར་ལག་ཏུ་མེ་ཏོག་དཀར་པོ་རྐང་གཅིག་སྤྲད་པ་ཞིག་རེད། མ་ཟད་ལོ་ལྔའི་རིང་ཨ་རིའི་དམག་མི་ཡོངས་རྫོགས་ཀྱི་ལག་གི་མེ་མདའ་འཕྲོག་ཅིང་རྡུལ་ཕྲན་གོ་མཚོན་ཆ་ཚང་སྒམ་ནང་དུ་བཅུག་ནས་སྒོ་ལྕགས་བརྒྱབས་པ་ཞིག་ཀྱང་རེད་སྣམ།
ད་དུང་དཔེ་མཚོན་གཞན་ཞིག་ནས་བཤད་ན། ཐེངས་འདིའི་གཟེངས་རྟགས་ཨ་རིའི་སྲིད་འཛིན་ལ་སྤྲད་པ་ནི། མི་སྐྱ་སྲིད་འཛིན་ཞིག་ལ་གཞན་གནོད་གཞི་དང་བཅས་པ་ལས་ལྡོག་དགོས་པའི་གྲྭ་པའི་སྡོམ་ཁྲིམས་ལེན་དུ་བཅུགས་པ་ཞིག་ཡིན་ཞིང། གཞན་དོན་དུ་ཉིན་མཚན་དུས་དྲུག་ཏུ་སྨོན་འཇུག་གི་དམ་བཅའ་དྲན་དགོས་པ་དང་དམ་བཅའ་བཞིན་གནས་ཤིང་བསྒྲུབ་དགོས་པའི་བྱང་ཆུབ་སེམས་དཔའི་སྡོམ་པ་འཛིན་དུ་བཅུག་པ་ཞིག་དང་ཤིན་ཏུ་འདྲ།
དེས་ན་འཛམ་གླིང་ཞི་བདེ་དང་འགྲོ་བ་མིའི་རང་དབང་དང་ཐོབ་ཐང་རྩིས་མེད་བྱ་མཁན་གྱི་རྒྱལ་ཁབ་ཁག་གི་དབང་སྒྱུར་བྱེད་མཁན་དང་རྒྱལ་ཁབ་ཚོར་ཚོང་འབྲེལ་འགོག་པ་དང། འཇིགས་སྐུལ་གྱི་བཙན་བཀའ་གཏོང་བ། ཕྱོགས་ཡོངས་ནས་གནོན་ཤུགས་སྤྲོད་པ་སོགས་བྱེད་པ་ལས་འདི་ལྟར་ཞི་བདེ་གཟེངས་རྟགས་བརྒྱུད་ནས་དགེ་སློང་བསྒྲུབ་ན། མི་རིང་བར་རྒྱ་ནག་དང་བྱང་ཀོ་རི་ཡ། ཨུ་རུ་སུ་དང་འབར་མ། ཁ་ཆེའི་རྒྱལ་ཁབ་སོགས་དམར་ཕྱོགས་རྒྱལ་ཁབ་ཁག་གི་སྲིད་འཛིན་དང་སྲིད་བློན་ཚོ་ཡང་ང་ཚོའི་༸རྒྱལ་དབང་དོན་གྱི་བདག་པོ་ཇི་བཞིན་འཛམ་གླིང་གི་སྡིངས་ཆའི་སྟེང་ན། ཕྱི་ཚུལ་མི་སྐྱ་རུ་ཡོད་ཀྱང་བསམ་སྤྱོད་དགེ་སློང་གི་སྡོམ་ཁྲིམས་སུ་གནས་པའི་འཛམ་གླིང་ཞི་བདེའི་དགེ་སློང་གསེར་མདོག་ཅན་རེར་འགྱུར་ངེས་ཡིན་པས། མཁས་པའི་བྱེད་ཐབས་འདི་ལྟ་བུ་བརྒྱུད་ནས། ད་དུང་འདི་ལྟར་ལག་ཏུ་གོ་མཚོན་འཛིན་མཁན་དང་ཁ་ནས་འཇིགས་སྐུལ་སྒྲོག་མཁན། སེམས་ལ་རང་རྒྱལ་གཞན་ཕམ་དང་གཅིག་སྡུད་དབང་སྒྱུར་སྤེལ་འདོད་མཁན་གྱི་འཛམ་གླིང་རྒྱལ་ཁབ་འགའི་གང་ཟག་གི་དབང་སྒྱུར་སྟོབས་ཤུགས་སུ་བརྩི་བའི་སྲིད་དབང་སྒེར་གཅོད་པ་ཚོ་ལ་འདི་ལྟར་དུ་དགེ་སློང་བསྒྲུབ་ན། ནམ་ཞིག་འཛམ་གླིང་རྒྱལ་སྤྱིའི་རང་བཞིན་ཅན་གྱི་དོན་དངོས་དང་མཐུན་པའི་ཞི་བདེ་དང་འཆམ་མཐུན་གྱི་ཉི་མ་གསར་པ་ཞིག་འཆར་ཐུབ་པར་སེམས། རྒྱུ་མཚན་ནི་བྱེད་ཐབས་འདི་ནི། རྐུན་མ་ལ་ཕར་ཅ་ལག་བཅོལ་བཞག་ན་རྐུ་མི་ཐུབ་པའི་ལས་འགུལ་ཞིག་ཡིན་པས་སོ།
ཚ་རུ་ཐབས་མཁས་ཟེར་བས། ཨ་རིའི་སྲིད་འཛིན་ལ་དགེ་སློང་བསྒྲུབས་པ་ཟེར་བ་དེ་དཔེ་དོན་གཉིས་མཚུངས་ཀྱི་མི་འདུག་ དགེ་སློང་བསྒྲུབས་བ་ཡིན་ན་ག་རེ་ཡིན་ནི་རེད། སྲིད་འཛིན་ལ་བསྡད་མི་ཆོག་པ་ཡིན་ནམ།
བསམ་འཆར་གང་ཡང་བཤད་རྒྱུ་མེད། དགེ་སློང་དང་དགེ་ཚུལ་གང་བསྒྲུབ་ན་བསྒྲུབ་ཆིག
དྲ་གྲོགས་མེ་འོད་ཀྱིས་ངའི་མཆན་བུར་བསམ་ཚུལ་བཏོན་པ་སྟེ། དགའ་བོ་བྱུང་ལ། རྗེས་ཕྱོགས་ཀྱང་འདི་ལྟར་བསམ་བློ་སྒམ་དཀྱེལ་གྱིས་སྒོ་ནས། རང་གི་ལྟ་ཚུལ་སྲོང་པོར་བརྗོད་དགོས་པ་ནི། དུས་བབ་ཅིག་དང་འགན་ལེན་ཞིག་གི་སྙིང་སྟོབས་མངོན་ཚུལ་རེད་ཨང་། ཐོག་མར་དྲ་གྲོགས་ཉིད་ལ་དོགས་འདྲི་ཁ་ཤས་འགོད་དགོས་བྱུང་། གང་ཡིན་ཟེར་ན།
དང་པོ། སྙན་ངག་པ་ཡིན་ཚད་བསམ་བློ་པ་ཡིན་པའི་ཁྱབ་པ་རེད་དམ།
གཉིས་པ། སྙན་ངག་ནི་བསམ་བློའི་བཀག་རྒྱ་མིན་ན། བསམ་གཞིག་བྱེད་སའི་གཞི་ཞིག་ཅི་ཡང་རྙེད་རྒྱུ་མ་རེད། གསུམ་པ། ཚད་མཐོ་བའི་སྙན་ངག་ཅིག་ངོས་འཛིན་བྱེད་རྒྱུ་ཨེ་ཡོད། ཡོད་ན་མིའི་རིགས་ཀྱི་བསམ་བློ་དང་མོས་པ། དགའ་ས་དང་ཁ་ཕྱོགས་ཚང་མ་ཚད་ཐིག་གཅིག་གི་ཁོངས་སུ་སུ་ཞིག་གིས་བསྡུ་ཐུབ།
བཞི་པ། རང་ཉིད་དགའ་ཕྱོགས་དང་རྒྱུས་མངའ་ཡོད་ཕྱོགས་ལ་གཞན་ཞིག དེར་འཇུག་དགོས་པའི་རྣམ་འགྱུར་བསྟན་པ་ནི། བདེན་པ་དང་འགལ་འགྲོ་བ་ཞིག་མ་རེད་དམ།
ལྔ་པ། བོད་མི་རིགས་དང་བོད་ཀྱི་རིག་གཞུང་སྙན་ངག་གིས་སྲུང་སྐྱོབ་བྱས་པ་མ་ཡིན་པར། སྙན་ངག་མཁན་དག་གི་སྙིང་སྟོབས་དང་ལྷག་བསམ། ཤེས་རབ་དང་ཐབས་ལམ་སོགས་ཀྱིས་བོད་དང་བོད་ཀྱི་སྙན་ངག་སོགས་ཁྱད་ནོར་རྣམས་སྲུང་འཛིན་བྱས་པ་ཞིག་ཡིན་པ་གསལ་ཐང་ཐང་རེད།
ངའི་རེ་བ་ལ་ཐབས་མཁས་ལགས་ཀྱིས་སྙན་ངག་གསར་བ་གང་མང་འབྲི་གི་ཡོད་རྒྱུ་རེད་སྙམ་གི དེ་ལྟར་ཡིན་པར་སྨོན།
ཐབས་མཁས་ལགས་ཀྱི་སྙན་ངག་འབྲི་མཚམས་བཞག་ནས་རྩོམ་ལུས་གཞན་ཞིག་དམིགས་འཛིན་བྱེད་ཀི་ཡོད་ན་ད་བར་ཁྱོད་ཀྱིས་བྲིས་པའི་སྙན་ངག་ཡོད་ཚད་མེ་ལ་བསྲེགས་པ་དང། གསེར་ལྟ་བུའི་དུས་ཚོད་དང་མི་གཤིས་ཀྱང་མེ་ལ་བསྲེགས་པ་མ་ཡིན་ནམ། སྙན་ངག་འབྲི་མཁན་ཚོས་ཤོག་དངུལ་དང་ཐོབ་གོ་གནས་ཀྱི་གནོན་ཤུགས་ཐེག་གི་མེད་དུས་འཆི་བ་ལ་མངོན་པར་ཕྱོགས་ཀི་ཡོད།
སྙན་ངག་དངརྩོམ་ལུས་གཞནགྱི་རྩོམ་ཡིག་ག་རེ་བྲིས་ཀྱང། བསམ་བློའི་ཟབ་ཚད་ཀྱིས་དེ་ལ་ངེས་པར་ཚད་འཛིན་བྱེད་པ་ཡིན། སྙན་ངག་འབྲི་མཁན་གྱི་བསམ་བློ་ལ་རྒྱང་ཆོད་མེད་པའི་ལྟ་ཚུལ་བཟུང་བ་ཡིན་ན་ཏག་ཏག་ཅིག་བསྡད་མི་འདུག་བསམ་གི། དཀོན་རྒྱམ་ལགས་ལ་བསམ་ཚུལ་འདི་དམིགས་ཀྱིས་བཤད་པ་ཡིན།
སྙན་ངག་ནི་བསམ་བློའི་བཀག་རྒྱ་ཡིན་པར་འཛིན་མཁན་ཞིག་ཡོད་ན་དེ་ལ་བཀག་རྒྱ་གཞན་ཞིག་ཡོད་ཁོ་ཐག་རེད། རླབས་ཆེ་བའི་སྙན་ངག་ཅིག་ཡིན་ན་ཀློག་མཁན་གྱི་བསམ་བློ་ནི་
ཆེས་མཐོ་ས་དང་གཏིང་ཟབ་ས། ཁོད་ཡངས་ས་ཞིག་ལ་ཁྲིད་ཁོ་ཐག་རེད།
བདེ་བོ་སྐུ་ཉིད་གང་ན་ཡོད།
ཚྭ་རུ་མའི་ཐབས་མཁས་ལགས།
སྐུ་ཉིད་བར་སྐབས་ཤིག་མལ་དུ་གཉིད་ཡུར་བ་འདྲ།
ད་འདི་ལྟར་གཉིད་སད་ཡོང་དུས་སླར་ཡང་མལ་དུ་མ་གཟིམས་རོགས།
འདི་ལྟར་རང་རང་གི་ལྟ་ཚུལ་ཞིག་ཤོད་ཀྱིན་ཡོད་པ་དེ་ཀློག་པ་པོ་ཡོད་ཚད་ཀྱི་སེམས་ཁམས་དང་མཐུན་དགོས་པ་ཞིག་མ་རེད་སྙམ།།
དངོས་ཡོད་ཀྱི་སྐད་ཆ་རེད།
སྙན་ངག་པ་ཚ་རུ་མ་ཐབས་མཁས་ལགས།
ཁམས་བཟང་།
ལོ་ངོ་མང་པོ་ཞིག་གི་རིང་ལ་ང་དང་ང་འདྲ་བ་གཞོན་སྐྱེས་གང་མང་ཞིག་གིས། ཉིད་ཀྱི་སྙན་ངག་གི་བྲོ་བ་དང་བཟི་ཁ། སྙན་ཆ་དང་སྡེབ་ལེགས་སོགས་ཀྱི་ཁྱད་ནུས་ལ། ཉམས་སུ་མྱོང་མཁན་ཞིག་གི་ངོས་ནས་བལྟས་ན། དེ་རིང་ཉིད་ཀྱིས་སྤེལ་བའི་སྤྱི་ཚོགས་དཔྱད་བརྗོད་ཀྱི་ཁོངས་སུ་འདུ་བའི་བསམ་ཕྱོགས་དེས། ཉིད་ཀྱི་ལྟ་ཚུལ་དང་ལངས་ཕྱོགས་ལ་འགྱུར་ལྡོག་ཐེབས་ཡོད་པ་ཕལ་ཆེར་སྔོན་དཔག་ཐུབ་པ་ཞིག་རེད་ལ། མ་འོངས་པ་ཡིན་ནའང་འདི་ལྟའི་ལས་སུ་ཞུགས་ཐུབ་ན། བསམ་བློ་དང་ལྟ་ཚུལ་ལ་རྒྱང་ཆོད་རང་བཞིན་གྱི་འགྱུར་བ་ཅི་བས་འགྲོ་སྲིད་པ་ཡིན་ཙ་ན། དེ་དང་བསྟུན་པའི་ཉིད་ཀྱི་ཕུགས་འདུན་དེ་རྒྱ་ཇེ་ཆེ་དང་གཏིང་ཇེ་ཚུགས་སུ་འགྲོ་དགོས་པ་ནི། ང་དང་ང་འདྲ་བ་མི་རབས་གསར་པ་མང་པོ་ཞིག་གི་རེ་འདུན་ཡིན་ན་ཐང་།
ཡ་ཡ་ཚ་ཐམས་ཁྱོས་བཤད་ན་དོན་ལ་གནས་པ་ཞིག་རེད།་་་དོན་ངོ་མ་ཁྱེད་རང་གི་དགེ་སློང་བསྒྲུབས་ཡོད་པ་མ་བརྗེད་ད།་
མིཚོས་བཤད་ན་ཁྱེད་རང་གསོ་སྦྱོང་ལ་འགྲོ་འདོད་མེད་པ་འདྲ།་་
ཡང་ན་རྒྱུན་དུ་གྲོང་ནང་ལ་འཁྱམ་རྒྱུར་གོམས་གཤིས་སུ་ཆགས་ཡོད་པ་འདྲ།
བུ་རྒོད་པོ་དགེ་སློང་བསྒྲུབས་ཡོད་པ་གཞན་ལ་ཁ་གཡར།
འཆར་ཡན་ཡིན་ཡང་གནས་ལུགས་ལ་ཁ་ཐག་ཉེ་ཙམ་ཞིག་དགོས་པ་རེད།
འདི་ཅུང་ཟད་རང་རིང་དྲགས་ཤིང་གནས་ལུགས་ལ་ཐོད་ཐུག་རྒྱུ་མེད་མཁན་ཞིག་རེད།
འོན་ཀྱང་བསམ་ཚུལ་འདོན་པའི་རང་དབང་ལ་བརྩི་བཀུར་ཞུ་ཡིན་ཡོད།
ཚྭ་རུ་མའི་ཐབས་མཁས་འདི་འཆར་ཡན་རིང་ལུགས་ཀྱི་བསམ་གཞིགས་ལ་མཁས་པ་ལ་དཔེ་རང་རེད། ད་དུང་བསམ་ཚུལ་འདིའི་རིགས་མུ་མཐུད་སྤེལ་བའི་རེ་བ་ཡོད།
དོན་ལ་གནས་པའི་སྐད་ཆ་ཞིག་རེད། འདི་འདྲ་བཤད་ན་འགྲིག་གི་འདོད།