ཨ་རིའི་སྲིད་འཛིན་ལ་དགེ་སློང་བསྒྲུབས་པ། ཚྭ་རུ་མའི་ཐབས་མཁས།

ཉེ་ཆར་ནོ་སྦེལ་ཞི་བདེ་གཟེངས་རྟགས་ཚོགས་པས་ ༢༠༠༩ ལོའི་ཞི་བདེའི་གཟེངས་རྟགས་ཨ་རིའི་སྲིད་འཛིན་ཨོ་བྷ་མ་ལ་སྤྲོད་རྒྱུའི་ཡོངས་ཁྱབ་གསལ་སྒྲགས་བྱས་དུས། ངའི་ཁོར་ཡུག་ན་འགྲུལ་བཞིན་པའི་འུ་ཚོའི་བོད་པ་འགས་ཧ་ལས་ཧང་སངས་ཀྱིས་གཞན་དག་གི་མི་ཚེའི་འབད་འབྲས་བརྒྱུད་ནས་འཐོབ་རྒྱུའི་གཟེངས་རྟགས་ཤིག་ཨོ་བྷ་མར་སྲིད་འཛིན་བྱས་ནས་ལོ་ངོ་གཅིག་མ་ཟིན་སྔོན་ནས་ཐོབ་པ་འདི་ཨོ་བྷ་མ་དངོས་གནས་འཇོན་པོ་དང་བསོད་དེ་འདུག་ཟེར་ནས་བཤད་ཀྱིན་འདུག

༼དོན་དངོས་སུ་ཨོ་བྷ་མའི་གཏམ་བཤད་ཁ་ཤས་ཀྱིས་ལས་འཆར་དང་ལངས་ཕྱོགས་གསལ་སྟོན་བྱས་ཡོད་ཁུལ་བསྟན་པ་ཙམ་གྱིས་གཟེངས་རྟགས་ཐོབ་སོང་ཟེར་བ་དེ་རེད༽ ཡིན་ན་ཡང་། ངའི་བསམ་པར་ད་ལྟའི་སྐབས་སུ་ནོ་སྦེལ་གཟེངས་རྟགས་ཚོགས་པ་ཡང་ཆབ་སྲིད་འཁྲབ་སྟོན་པ་ཞིག་ཏུ་གྱུར་ཡོད་པ་རྟོགས་བྱུང་། དངོས་གནས་བྱས་ན། འདི་འདྲའི་ཆབ་སྲིད་འཁྲབ་སྟོན་ནི་དུས་རབས་འདིའི་དགོས་མཁོ་དང་ཡོངས་སུ་མཐུན་ཞིང། རྣམ་དཔྱོད་ལྡན་པའི་རྨད་བྱུང་ཐབས་མཁས་ཀྱི་བྱེད་ཐབས་ཤིག་ཏུ་མཐོང།

གཞན་ཕན་རླབས་ཆེན་གྱི་བྱས་རྗེས་བཞག་ཟིན་མཁན་གྱི་གཟེངས་རྟགས་ཤིག་ཐེངས་འདིར་རླབས་ཆེན་གྱི་བྱས་རྗེས་འཇོག་པ་ལ་མངོན་དུ་ཕྱོགས་པའམ། ཡང་ན་འཇོག་རྒྱུའི་ལས་གཞིའི་འགོ་རྩོམ་མཁན་ལྟ་བུ་ཞིག་ལ་སྤྲད་པ་ནི། གཟེངས་རྟགས་སྤྲོད་ཡུལ་གྱི་འོས་ཆོས་ཀྱི་ཆ་ནས་བལྟས་ན་དམིགས་བསལ་པ་ཞིག་ཏུ་གྱུར་ཡོད་པར་སེམས།

ཕྱོགས་གཞན་ནས་བཤད་ན། ཨ་རིའི་སྲིད་འཛིན་ལ་འདི་ལྟར་གཟེངས་རྟགས་སྤྲད་པ་ནི། ཨ་རིའི་སྲིད་འཛིན་གྱི་ལུས་ངག་ཡིད་གསུམ་གྱི་རང་དབང་གི་ཁོར་ཡུག་ཆུང་དུ་བཏང་བ་ཞིག་གམ། ཡང་ན་ཨ་རིའི་སྲིད་འཛིན་ལ་རྒྱལ་ཁབ་གཅིག་གི་རྡོག་ཁྲེས་ཀྱི་ཐོག་ལ་འཛམ་གླིང་རྒྱལ་སྤྱིའི་རྡོག་ཁྲེས་བསྣན་ནས་འཁུར་དུ་བཅུག་པ་ཞིག་རེད། དེ་མིན་ཨ་རིའི་སྲིད་འཛིན་གྱི་མེ་མདའ་ཚུར་འཕྲོག་ནས་ཕར་ལག་ཏུ་མེ་ཏོག་དཀར་པོ་རྐང་གཅིག་སྤྲད་པ་ཞིག་རེད། མ་ཟད་ལོ་ལྔའི་རིང་ཨ་རིའི་དམག་མི་ཡོངས་རྫོགས་ཀྱི་ལག་གི་མེ་མདའ་འཕྲོག་ཅིང་རྡུལ་ཕྲན་གོ་མཚོན་ཆ་ཚང་སྒམ་ནང་དུ་བཅུག་ནས་སྒོ་ལྕགས་བརྒྱབས་པ་ཞིག་ཀྱང་རེད་སྣམ།

ད་དུང་དཔེ་མཚོན་གཞན་ཞིག་ནས་བཤད་ན། ཐེངས་འདིའི་གཟེངས་རྟགས་ཨ་རིའི་སྲིད་འཛིན་ལ་སྤྲད་པ་ནི། མི་སྐྱ་སྲིད་འཛིན་ཞིག་ལ་གཞན་གནོད་གཞི་དང་བཅས་པ་ལས་ལྡོག་དགོས་པའི་གྲྭ་པའི་སྡོམ་ཁྲིམས་ལེན་དུ་བཅུགས་པ་ཞིག་ཡིན་ཞིང། གཞན་དོན་དུ་ཉིན་མཚན་དུས་དྲུག་ཏུ་སྨོན་འཇུག་གི་དམ་བཅའ་དྲན་དགོས་པ་དང་དམ་བཅའ་བཞིན་གནས་ཤིང་བསྒྲུབ་དགོས་པའི་བྱང་ཆུབ་སེམས་དཔའི་སྡོམ་པ་འཛིན་དུ་བཅུག་པ་ཞིག་དང་ཤིན་ཏུ་འདྲ།

དེས་ན་འཛམ་གླིང་ཞི་བདེ་དང་འགྲོ་བ་མིའི་རང་དབང་དང་ཐོབ་ཐང་རྩིས་མེད་བྱ་མཁན་གྱི་རྒྱལ་ཁབ་ཁག་གི་དབང་སྒྱུར་བྱེད་མཁན་དང་རྒྱལ་ཁབ་ཚོར་ཚོང་འབྲེལ་འགོག་པ་དང། འཇིགས་སྐུལ་གྱི་བཙན་བཀའ་གཏོང་བ། ཕྱོགས་ཡོངས་ནས་གནོན་ཤུགས་སྤྲོད་པ་སོགས་བྱེད་པ་ལས་འདི་ལྟར་ཞི་བདེ་གཟེངས་རྟགས་བརྒྱུད་ནས་དགེ་སློང་བསྒྲུབ་ན། མི་རིང་བར་རྒྱ་ནག་དང་བྱང་ཀོ་རི་ཡ། ཨུ་རུ་སུ་དང་འབར་མ། ཁ་ཆེའི་རྒྱལ་ཁབ་སོགས་དམར་ཕྱོགས་རྒྱལ་ཁབ་ཁག་གི་སྲིད་འཛིན་དང་སྲིད་བློན་ཚོ་ཡང་ང་ཚོའི་༸རྒྱལ་དབང་དོན་གྱི་བདག་པོ་ཇི་བཞིན་འཛམ་གླིང་གི་སྡིངས་ཆའི་སྟེང་ན། ཕྱི་ཚུལ་མི་སྐྱ་རུ་ཡོད་ཀྱང་བསམ་སྤྱོད་དགེ་སློང་གི་སྡོམ་ཁྲིམས་སུ་གནས་པའི་འཛམ་གླིང་ཞི་བདེའི་དགེ་སློང་གསེར་མདོག་ཅན་རེར་འགྱུར་ངེས་ཡིན་པས། མཁས་པའི་བྱེད་ཐབས་འདི་ལྟ་བུ་བརྒྱུད་ནས། ད་དུང་འདི་ལྟར་ལག་ཏུ་གོ་མཚོན་འཛིན་མཁན་དང་ཁ་ནས་འཇིགས་སྐུལ་སྒྲོག་མཁན། སེམས་ལ་རང་རྒྱལ་གཞན་ཕམ་དང་གཅིག་སྡུད་དབང་སྒྱུར་སྤེལ་འདོད་མཁན་གྱི་འཛམ་གླིང་རྒྱལ་ཁབ་འགའི་གང་ཟག་གི་དབང་སྒྱུར་སྟོབས་ཤུགས་སུ་བརྩི་བའི་སྲིད་དབང་སྒེར་གཅོད་པ་ཚོ་ལ་འདི་ལྟར་དུ་དགེ་སློང་བསྒྲུབ་ན། ནམ་ཞིག་འཛམ་གླིང་རྒྱལ་སྤྱིའི་རང་བཞིན་ཅན་གྱི་དོན་དངོས་དང་མཐུན་པའི་ཞི་བདེ་དང་འཆམ་མཐུན་གྱི་ཉི་མ་གསར་པ་ཞིག་འཆར་ཐུབ་པར་སེམས། རྒྱུ་མཚན་ནི་བྱེད་ཐབས་འདི་ནི། རྐུན་མ་ལ་ཕར་ཅ་ལག་བཅོལ་བཞག་ན་རྐུ་མི་ཐུབ་པའི་ལས་འགུལ་ཞིག་ཡིན་པས་སོ།