རྒྱལ་ཁབ་སོ་སོའི་རང་སྐྱོང་གི་ངོ་བོ་གཅིག་མཚུངས་མིན།

རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་བློན་ཆེན་གཞོན་པ་ཀྲུའུ་ཝེ་ཆོན་གྱིས་འཇར་མན་གྱི་གསར་འགོད་པའི་དྲི་བའི་ལན་དུ། རྒྱལ་ཁབ་སོ་སོའི་མི་རིགས་གྲུབ་ཚུལ་མི་འདྲ་ཞིང་། ལོ་རྒྱུས་དང་རིག་གནས། སྲོལ་རྒྱུན་བཅས་ཀྱང་འདྲ་མཚུངས་མིན་སྟབས། རང་སྐྱོང་གང་རུང་ལག་བསྟར་བྱེད་པའི་རྒྱལ་ཁབ་དག་གི་དོན་དངོས་ཀྱི་རང་སྐྱོང་ཐབས་ལམ་ཡང་གཅིག་མཚུངས་ཡོང་ཐབས་མེད་སྐོར་བརྗོད་ཡོད།

ཟླ་སྔོན་མའི་ཚེས་ ༢༢ ཉིན་འཇར་མན་གྱི་༼ གཙོ་གནད ༽ Focus དུས་དེབ་ཀྱི་གསར་འགོད་པ། གྷོ་ཌེ་ལོན་མོར་མེ་ཊེ་ཁྲི་ Gu Delong more metet ཡིས་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་བློན་ཆེན་གཞོན་པ་ཀྲུའུ་ཝེ་ཆོན་ལ་ཐུག་འཕྲད་བྱས་ཏེ། ཆུ་ཚོད་གཉིས་རིང་བོད་དོན་གཙོས་པའི་ཀྲུང་གོའི་མི་རིགས་ཀྱི་གནད་དོན་སྐོར་ལ་བཅར་འདྲི་ཞུས་ཡོད་པ་དང་། བཅར་འདྲི་མ་བྱས་སྔོན་ལ་ཀྲུའུ་ཝེ་ཆོན་གྱིས་ཐེངས་འདིར་བཅར་འདྲི་བྱས་པའི་ནང་དོན་འཇར་མན་གྱི་གཙོ་གནད་དུས་དེབ་སྟེང་ངེས་པར་དུ་འགོད་དགོས་པའི་ཆ་རྐྱེན་བཏོན་པ་ལྟར། ཟླ་འདིའི་ཕྱི་ཚེས་ ༥ ཉིན་འཇར་མན་གྱི་གཙོ་གནད་དུས་དེབ་སྟེང་ཀྲུའུ་ཝེ་ཆོན་ལ་བཅར་འདྲི་བྱས་པའི་ནང་དོན་བཀོད་ཡོད་པ་དང་། ཕྱི་ཚེས་ ༡༡ ཉིན་རྒྱ་ནག་གཞུང་འབྲེལ་ཞིན་ཧྭ་གསར་ཁང་གཙོས་པའི་རྒྱ་ཡིག་གི་གསར་ལམ་ཁག་ཏུ་འདྲེན་བཀོད་བྱས་ཤིང་། ཕྱི་ཚེས་ ༡༦ ཉིན་ནས་ཀྲུང་གོའི་བོད་ལྗོངས་ཆ་འཕྲིན་ལྟེ་གནས་སོགས་སུ་བོད་སྒྱུར་བྱས་ཡོད། བཅར་འདྲིའི་སྐབས་ཀྲུའུ་ཝེ་ཆོན་གྱིས་ངས་བཤད་པའི་སྐད་ཆའི་ནང་དོན་ཁག་ཁྱོད་ཚོས་དུས་དེབ་སྟེང་འགོད་པའི་རེ་བ་ཡོད། རྒྱུ་མཚན་ནི་ངས་ནུབ་ཕྱོགས་རྒྱལ་ཁབ་ཀྱི་གསར་འགོད་པ་མི་ཉུང་བ་ཞིག་མཐོང་བྱུང་། ངས་ཁོང་ཚོ་ལས་ཤེས་རྟོགས་བྱུང་བ་ནི་ཁོང་ཚོར་ཕྱོགས་ལྷུང་གི་ལྟ་བ་ཡོད་པ་རེད། ངས་གླེང་བའི་ནང་དོན་མཐའ་དག་ཁོང་ཚོར་དགོས་མཁོ་མེད་ཚེ། ཁོང་ཚོས་དེའི་རིགས་དུས་དེབ་དང་ཚགས་པར་སྟེང་དུ་སྤེལ་འདོད་མེད་པ་རེད། ཅེས་ནུབ་ཕྱོགས་ཀྱི་གསར་འགོད་པ་ཚོར་སྐྱོན་བརྗོད་ཀྱང་བྱས་ཡོད།

སྐབས་དེར་གསར་འགོད་པས། ཀྲུང་གོར་བོད་ལྗོངས་ནི་རང་སྐྱོང་ས་ཁུལ་ཅིག་ཡིན་ཞེས་པ་དེར། ཁྱོད་ཀྱིས་རང་སྐྱོང་བྱ་བའི་མཚན་ཉིད་དེར་ཇི་ལྟར་ངོས་འཛིན་བྱེད་ཀྱིན་ཡོད་ཅེས་དྲིས་པའི་ལན་དུ་ཀྲུའུ་ཝེ་ཆོན་གྱིས་བརྗོད་དོན། གནད་དོན་འདི་ནི་གཞུང་ལུགས་རང་བཞིན་གྱི་གནད་དོན་ཞིག་དང་ཆབ་སྲིད་རང་བཞིན་གྱི་གནད་དོན་ཞིག་ཡིན་ལ། ལག་ལེན་རང་བཞིན་དྲག་ཆེ་བའི་གནད་དོན་ཞིག་ཀྱང་ཡིན། ཀྲུང་གོ་ནི་མི་རིགས་མང་པོའི་རྒྱལ་ཁབ་ཅིག་ཡིན་ཞིང་། ང་ཚོར་མི་རིགས་ ༥༦ ཡོད་པ་དང་། ང་ཚོས་འདྲ་མཉམ་དང་མཐུན་སྒྲིལ། ཕན་ཚུན་རོགས་རམ། ཞི་མཐུན་བཅས་ཀྱི་མི་རིགས་ལས་དོན་གྱི་བྱེད་ཕྱོགས་ཤིག་ལག་བསྟར་བྱེད་བཞིན་ཡོད། མི་རིགས་གྲངས་ཉུང་འདུས་སྡོད་ཁུལ་ནི། མི་རིགས་གྲངས་ཉུང་གིས་ཡུལ་དེའི་མི་གྲངས་ཀྱི་བརྒྱ་ཆ་ངེས་ཅན་ཟིན་ཡོད་པའི་ས་ཁུལ་ཞིག་ཡིན་ཞིང་། དེར་ང་ཚོས་མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱེད་ཀྱིན་ཡོད། ཀྲུང་གོའི་གྲངས་ཉུང་མི་རིགས་ཀྱིས་རྒྱལ་ཡོངས་ཀྱི་མི་གྲངས་ལས་བརྒྱ་ཆ་ ༨ ལས་བརྒལ་ཡོད་མོད། འོན་ཀྱང་། མི་རིགས་ས་ཁོངས་རང་སྐྱོང་ལག་བསྟར་བྱེད་པའི་ས་ཁྱོན་གྱིས་ང་ཚོའི་རྒྱལ་ཁོངས་ཡོངས་ཀྱི་བརྒྱ་ཆ་ ༦༤ ཙམ་ཟིན་ཡོད། ཀྲུང་གོའི་མི་རིགས་ཁྱབ་ཚད་ཀྱི་ཁྱད་ཆོས་གཙོ་བོ་ནི། མི་རིགས་སོ་སོ་མཉམ་བསྲེས་འདུས་སྡོད་ཀྱི་ཚད་གཞི་ཅུང་མཐོན་པོར་སླེབས་ཡོད། དཔེར་ན། མི་རིགས་ས་ཁོངས་རང་སྐྱོང་ལག་བསྟར་བྱེད་པའི་བོད་ལྗོངས་སུ་བོད་རིགས་ལས་གཞན་ད་དུང་མོན་པ་དང་། ལྷོ་པ་རིགས། མན་ཇུ་རིགས། ཁ་ཆེ་རིགས། ཆང་རིགས། རྒྱ་རིགས་སོགས་ཡོད། ཅེས་དང་།

སྤྱིར་བཏང་གི་ཞིང་ཆེན་དང་གྲོང་ཁྱེར་དཀྱུས་མ་ཞིག་སྟེ། དཔེར་ན་ང་ཚོ་ད་ལྟ་གནས་ཡོད་པའི་པེ་ཅིན་གྲོང་ཁྱེར་དང་ཀྲུང་གོའི་ཤར་རྒྱུད་ཀྱི་ཞིང་ཆེན་དུའང་མི་རིགས་གྲངས་ཉུང་མཉམ་བསྲེས་འདུས་སྡོད་བྱས་ཡོད་པ་ཤིན་ཏུ་མང་། ཁོང་ཚོས་སྤྱི་དམངས་ཀྱི་ལས་སྒོ་སོ་སོའི་དབང་ཆ་དང་མི་རིགས་གྲངས་ཉུང་ལ་ཐོབ་འོས་པའི་གཟིགས་སྐྱོང་མཐའ་དག་ལོངས་སུ་སྤྱོད་ཀྱིན་ཡོད། རྒྱལ་ཁབ་སོ་སོའི་མི་རིགས་གྲུབ་ཚུལ་མི་འདྲ། ལོ་རྒྱུས་དང་རིག་གནས། སྲོལ་རྒྱུན་བཅས་འདྲ་མཚུངས་མིན་སྟབས། རང་སྐྱོང་གང་རུང་ལག་བསྟར་བྱེད་པའི་རྒྱལ་ཁབ་དག་གི་དོན་དངོས་ཐོག་གི་རང་སྐྱོང་གི་བྱེད་ཐབས་ཀྱང་གཅིག་མཚུངས་ཡིན་མི་སྲིད། རྒྱལ་ཁབ་སོ་སོར་རང་རང་གི་གནས་སྟངས་ལྟར་ལམ་ལུགས་ལག་བསྟར་བྱས་ཏེ། མི་རིགས་ཀྱི་འབྲེལ་བ་ཐག་གཅོད་བྱེད་པའི་དབང་ཆ་ཡོད་ཅིང་། རང་སྐྱོང་། ཞེས་བའི་ཐ་སྙད་འདིའང་དེ་ལས་མ་འདས་ཤིང་། རྒྱལ་ཁབ་སོ་སོས་རང་གི་རྒྱལ་ཁབ་ཀྱི་གནས་ཚུལ་ལྟར་དེར་ངེས་ཤེས་འདྲོང་ཚུལ་ཡང་མི་མཚུངས་ལ།སྲིད་ཇུས་ལག་བསྟར་བྱས་པའི་ནང་དོན་ཡང་གཅིག་མཚུངས་མིན། རང་ཉིད་ཀྱི་ཡོད་ཚད་རྒྱལ་ཁབ་གཞན་ལ་སྦྱོར་བའི་དབང་ཆ་སུ་ལའང་མེད། ཅེས་ལན་འདེབས་བྱས་འདུག

ཡང་གསར་འགོད་པས། ང་ཚོས་ཤེས་འདོད་པ་ནི་བོད་ལྗོངས་མི་དམངས་ལ་དབང་ཆ་ཇི་འདྲ་ཞིག་ཡོད་པ་དེ་ཡིན་ཞིང་། ཁོང་ཚོར་མི་རིགས་ས་ཁུལ་གྱི་འཕེལ་རྒྱས་ལ་རང་བདག་གིས་ཐག་གཅོད་བྱེད་པའི་དབང་ཚད་གང་དག་ཡོད། ཁ་གསལ་བོའི་ཐོག་ནས་བྱེ་བྲག་གི་དཔེ་འགའ་འཇོག་རོགས། ཞེས་བརྗོད་པའི་ལན་དུ་ཀྲུའུ་ཡིས། བོད་ལྗོངས་ཀྱི་ལས་རིགས་སོ་སོའི་མི་དམངས་ལས་བདམས་ཐོན་བྱུང་བའི་རིམ་པ་ཁག་གི་མི་དམངས་འཐུས་མིའི་ཚོགས་ཆེན་དང་རིམ་པ་སོ་སོའི་སྲིད་གཞུང་གིས་རྩ་ཁྲིམས་གཞིར་བཟུང་གི་རྩ་དོན་འོག་དང་། ཡང་ན། རྩ་ཁྲིམས་ཀྱི་རྩ་དོན་དང་མི་འགལ་བའི་ཆ་རྐྱེན་འོག་ཏུ། བོད་ལྗོངས་ཀྱི་དཔལ་འབྱོར་དང་སྤྱི་ཚོགས། རིག་གནས་གོང་སྤེལ་བཅས་ཀྱི་ལས་སྒོ་སོ་སོའི་ལས་དོན་མཐའ་དག་གི་དབང་ཆ་ལོངས་སྤྱོད་བྱེད་པའི་དབང་ཆ་ཡོད་ལ། དེ་དང་མཉམ་དུ། ངས་བརྗོད་དགོས་པ་ཞིག་ལ། ཀྲུང་གོའི་མི་རིགས་ས་ཁོངས་རང་སྐྱོང་ནི། ཁྱེད་ཀྱི་རྒྱུད་ན་ཆགས་ཡོད་པའི་སླད་མ་འདྲེས་པའི་མི་རིགས་ཐ་དད་པ་ཞིག་གི་རང་བདག་བཅོས་སྐྱོང་དེ་མིན་ཞིང་། ང་ཚོའི་མི་རིགས་ས་ཁོངས་རང་སྐྱོང་ནི། རྒྱལ་ཁབ་གཅིག་གྱུར་དང་ཀྲུང་ཧྭ་མི་རིགས་ཀྱི་མཐུན་སྒྲིལ་དང་ཡོངས་སུ་མཉམ་གནས་བྱས་ཡོད་པ་ཞིག་ཡིན། ཞེས་དང་།

རྒྱལ་ཁབ་ཀྱི་གཅིག་གྱུར་མེད་ན། མི་རིགས་ཀྱི་མཐུན་སྒྲིལ་མེད་པ་དང་། རང་སྐྱོང་གང་རུང་གླེང་ཐབས་བྲལ་བ་དེ་རེད། ལོ་རྒྱུས་ལས་བདེན་དཔང་བྱས་ཡོད་པ་སྟེ། གལ་ཏེ་ང་ཚོའི་རྒྱལ་ཁབ་གཅིག་གྱུར་མིན་པ་དང་། མི་རིགས་ཕན་ཚུན་མཐུན་སྒྲིལ་མེད་ན། ང་ཚོའི་མི་རིགས་ཚང་མར་བཙན་རྒྱལ་རིང་ལུགས་ཀྱི་བརྙས་བཅོས་དང་བཙན་འཛུལ་ཐེབས་སྲིད་ཅིང་། སྐབས་དེར་རང་སྐྱོང་ཟེར་བ་དེ་བརྗོད་ཐབས་མེད་པ་ཞིག་རེད། ངས་འདིར་རང་སྐྱོང་དབང་ཆའི་གནད་དོན་སྐོར་གྱི་དཔེ་འགའ་བཞག་ན། གྲོགས་པོ་ཁ་ཤས་ཤིག་གིས་བོད་རིགས་ཀྱིས་བོད་ལྗོངས་ཀྱི་ལས་བྱེད་ཁྲོད་བསྡུར་ཚད་ག་ཚོད་ཟིན་ཡོད་ཟེར་པ་དང་། ཏཱ་ལའི་བླ་མས་ཀྱང་བོད་ལྗོངས་ཀྱི་བོད་མིའི་ཆབ་སྲིད་གོ་གནས་ཤོར་ཟིན་ཞེས་འུར་རྒྱག་བཞིན་ཡོད། ངས་ཁྱེད་ཚོར་ཁ་གསལ་བོ་བྱས་ཏེ་བརྗོད་ཆོག་པ་ནི། སྐད་ཆ་དེ་ནི་རྫུན་གཏམ་ཁོ་ན་རེད། བོད་ལྗོངས་སུ་བོད་རང་སྐྱོང་ལྗོངས་རིམ་པ་དང་པོའི་ལས་བྱེད་པ་བརྒྱ་ཆ་ ༧༠ ཡན་བོད་རིགས་ཡིན་ཞིང་། ས་ཁུལ་རིམ་པ་དང་པོའི་ལས་བྱེད་པ་བརྒྱ་ཆ་ ༨༠ ཡན་བོད་རིགས་ཡིན་ལ། རྫོང་དང་རྫོང་མན་གྱི་ལས་བྱེད་པ་བརྒྱ་ཆ་ ༩༠ ཡན་བོད་རིགས་ཡིན། ཞེས་དོན་དངོས་དང་མི་མཐུན་པའི་ལན་འདེབས་བྱས་ཡོད།