སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཅོ་ལྔ།

ད་ནི་བློ་བཟང་གིས་དགོང་མོ་རྟག་པར་དུ་ལས་ཀ་གྲོལ་ནས་ཉི་མ་ལྷ་སྒྲོན་བསྐྱེལ་བཞིན་ཡོད། དུས་གང་ཞིག་ནས་སུས་མགོ་བརྩམས་པ་མ་ཤེས་པར་ཁོ་གཉིས་ནི་ཕོ་མོའི་བར་གྱི་བརྩེ་དུང་གི་བརྒྱུད་རིམ་གླེང་རྒྱུར་དགའ་བ་ནས་ལག་རྩེད་བྱེད་པ་དང་། འཐམ་རེ་བྱེད་པ་སོགས་མང་དུ་ཕྱིན་པ་དང་འབྲེལ། མཚན་མོ་ཞིག་ལ་ལས་མཚམས་མ་བཞག་སྔོན་དུ་ལས་རོགས་ཕོ་གསར་དེ་ནི་རོགས་པ་ཞིག་དང་འགྲོག་ནས་སྔོན་དུ་སོང་ཤུལ་དུ། ཁོ་གཉིས་ནི་སུས་ཀྱང་བཀག་རྒྱ་མེད་པ་ལྟ་བུ་ཞིག་ཆགས་དེ། བློ་བཟང་གིས་ཉི་མ་ལྷ་སྒྲོན་ལ་འོ་ཞིག་བསྐྱལ། དེ་དུས་ཉི་མ་ལྷ་སྒྲོན་ཡང་འདོད་ཐོག་དུ་སོང་བ་ལྟར་ཁ་རོག་གེར་བསྡད།

བློ་བཟང་ནི་བཙོན་ལས་ཐར་བའི་བཙོན་མ་ཞིག་དང་འདྲ་བར་ཉི་མ་ལྷ་སྒྲོན་གྱི་ཁ་ནང་གི་ལྕེ་དེ་ཡང་འབབ་གྲབས་བྱས་དེ་ཤུགས་ཆེན་པོ་ནུས། དེ་དུས་ཉི་མ་ལྷ་སྒྲོན་ཡང་རང་དབང་མེད་པར་འདོད་པ་གཅིག་གི་བཟུང་བའི་ཕོ་མོ་གཉིས་ལྷན་དུ་འདུས་པའི་ངང་ཚུལ་དེས་བློ་བཟང་གི་སྐེ་རུ་འཐམ་ནས་དམ་པོར་བསྡམས།

མགོ་ཡང་དེ་ལྟར་བཙུགས། རེད་དེ། བློ་བཟང་གིས་ཉི་མ་ལྷ་སྒྲོན་ལ་འོ་བསྐྱལ་བ་ལས། ཉི་མ་ལྷ་སྒྲོན་དང་ལྷན་དུ་ལུས་འབྲེལ་བཞག་མེད། དེ་ལྟར་ཁོ་གཉིས་ཉིན་ཞག་མཐུད་དེ་སོང་དུས། ལས་མཚམས་བཞག་ནས་ཉི་མ་ལྷ་སྒྲོན་ནང་གི་སྒོ་འགྲམ་དུ་སླེབས་གྲབས་ཡོད་དུས། བློ་བཟང་གི་སྐེ་རུ་འཐམ་ནས་འོ་རེ་བྱེད་རྒྱུ་དེ་ནི་རྒྱུན་ལྡན་ལྟ་བུ་ཞིག་དུ་ཆགས་པ་མ་ཟད། གསར་དུ་དགའ་རོགས་སྒྲིག་བཞིན་པའི་གཞོན་ནུ་ཕོ་མོ་གཉིས་དང་འདྲ་བོ་ཞིག་ཆགས་ཡོད་པ་རེད།

བློ་བཟང་གིས་མི་ཚེ་ནང་ད་ལྟའི་བར་དུ་བུད་མེད་ཅིག་ལ་ཁ་བསྐྱེལ་བ་དེ་ཡང་ཐོག་མ་ཡིན་དུས། དེ་ཡང་མ་འདྲ་བའི་ཚོར་བ་ཞིག་ངང་གིས་སྐྱེ་ན་ཡང་། ཉི་མ་ལྷ་སྒྲོན་གྱིས་ཁོ་ལ་བཤད་པའི་སྐད་ཆ་དེ་ལས་བློ་བཟང་ཡང་བརྒལ་མ་ཐུབ་པར་བསྡད་ཡོད།

བློ་བཟང་། ཁྱེད་རང་ནི་ད་ལྟ་གཞི་ནས་དགའ་རོགས་གསར་བ་ཞིག་སྒྲིག་དགོས་པ་མ་ཟད། རང་ཉིད་ལ་དགའ་ས་ཞིག་ཀྱང་ཡོད་ངེས་དུས། དེ་ལ་རང་གི་ཐོག་མའི་བརྩེ་བ་སྤྲོད་དགོས་པ་ལས། ང་རང་ལྟ་བུ་བྱིས་པ་གཉིས་ཀྱི་ཨ་མ་ཞིག་ལ་ཁྱེད་རང་གི་ཐོག་མའི་བརྩེ་བ་དེ་ནི་གཏན་ནས་སྤྲོད་མི་རུང་། ནམ་ཞིག ཁྱེད་ཀྱིས་རང་གི་དགའ་ས་ཞིག་དང་ལྷན་དུ་བརྩེ་བ་དེ་སྤྲད་རྗེས་སུ། ངས་ཁྱེད་རང་ལ་ད་ལྟ་ནས་ཁས་ལེན་བྱས་པ་ཡིན། འུ་གཉིས་ལྷན་དུ་ཉལ་ནས་རང་རང་གི་འདོད་པ་དེ་དང་ལེན་བྱེད་ཆོག དེ་མིན་དངོས་ནས་ང་རང་ལྟ་བུ་ཞིག་གི་ཁྱེད་ཀྱི་ཐོག་མའི་བརྩེ་བ་དེ་དང་ལེན་བྱེད་འཕོད་ཀྱི་མི་འདུག་ཟེར་ནས་རྒྱུན་དུ་བཤད།

བློ་བཟང་གིས་ཀྱང་ཉི་མ་ལྷ་སྒྲོན་ནི་བྱིས་པ་གཉིས་ཀྱི་ཨ་མ་ཡིན་ཡང་། འདི་འདྲའི་བསམ་ཤེས་ཤིག་རེད་འདུག་སྙམ་ནས་ཁོས་ཀྱང་ཉི་མ་ལྷ་སྒྲོན་ལ་བདེན་ཁ་སྤྲད་དེ། ཁ་རེ་བསྐྱེལ་དུས་མཇེ་ངན་བླངས་དེ་ཆག་གྲབས་བྱས་ཀྱང་། ཨུ་ཚུགས་བྱས་དེ་བསྡད་ཡོད་པ་མ་ཟད། ནམ་ཞིག་ཁོ་གཉིས་ལ་རང་དབང་གི་གོ་སྐབས་ཤིག་ཡོད་ངེས་ཡིན་སྙམ་བཞིན་ཡོད་ལ། ཉི་མ་ལྷ་སྒྲོན་ནི་ཁོ་རང་གི་མི་སྐྱའི་ལམ་ཁ་བདམས་དེ་སེམས་གཏམ་ཆེས་མང་ས་བཤད་སའི་བུད་མེད་དེ་ཆགས་ཡོད། ཉི་མ་ལྷ་སྒྲོན་ཡང་དེ་མཚུངས་ཀྱིས་རང་གི་ཁྱོ་ག་དང་འབྲེལ་བ་བྱུང་བ་ནས་བཟུང་དེ་ད་ལྟའི་བར་གྱི་གནས་ཚུལ་མི་ཉུང་བ་ཞིག་གསང་བ་མེད་པར་རྟག་དུ་གླེང་བཞིན་ཡོད།

གང་ལྟར། མིའི་འཚོ་བ་ནི་སྐད་ཅིག་ཀྱང་མི་སྡོད་པར་འགྲོ་བཞིན་ཡོད་དུས། བློ་བཟང་གིས་སྤྱིན་བདག་གིས་བཤད་ན། མི་རིང་བར་ཟ་ཁང་མི་གཞན་ཞིག་ལ་བཙོང་རྒྱུ་བྱས་ཡོད་ཟེར་བ་དེ་ནི་ཁོ་གཉིས་ལ་མཚོན་ན་དངོས་ནས་གོ་མི་འདོད་པའི་སྐད་ཆ་ཞིག་རེད་ཟེར་ཀྱང་ཅིས་མི་ཆོག

དེ་ནས་བཟུང་དེ། ཉི་མ་ལྷ་སྒྲོན་གྱིས་ལས་་མཚམས་བཞག་ན་ཡང་། སྐབས་རེར་བློ་བཟང་ལ་ཐུག་འཕྲད་བྱེད་དུ་ཡོང་བ་མ་ཟད། ཉིན་ཞིག་བློ་བཟང་གི་ལྷམ་མགོ་རལ་བ་དེ་མཐོང་ནས་ཁོ་རང་ལ་མོས་ལྷམ་མགོ་ཞིག་ཉོ་རྒྱུུ་ཡིན་ཞེས་བཤད་དུས། བློ་བཟང་གིས་དེ་འདྲ་མ་བྱེད། ང་རང་ལ་དངོས་ནས་ལྷམ་མགོ་གསར་བ་ཞིག་དགོས་དོན་མི་འདུག འདི་ཡང་བསྐྱར་བཟོ་བཅོས་བརྒྱབ་དེ་གོན་བསྡད་ན་འགྲིག་གི་རེད་ཅེས་ཨུ་ཚུགས་བརྒྱབ།

ཉི་མ་ལྷ་སྒྲོན་གྱིས་དེ་འདྲ་མ་བྱེད། ངས་ཁྱེད་རང་གིས་དེ་ལྟར་འཚོ་བ་བསྐྱལ་ན་མི་འགྲིག་གི་ཟེར་ནི་མིན། ངས་ཁྱེད་རང་ལ་དངོས་ནས་ལག་རྟགས་ཤིག་ཉོ་འདོད་ཡོད། དེ་ཡིན་གཅིག་མིན་གཅིག་ཁས་ལེན་བྱེད་རོགས་ཞེས་ཞུ་བ་ཞུས་དུས། བློ་བཟང་གིས་ཀྱང་ངོ་གནོང་ཞོར་དུ་དེ་ན་འགྲིག་གི་རེད། ཁྱེད་རང་གིས་བསམ་ནི་ཞིག་ཉོས། གོང་ཆེན་དེ་འདྲ་ཉོ་མི་དགོས་ཟེར་ནས་བཤད།

ཉི་མ་ལྷ་སྒྲོན་གྱིས་འདང་ཞིག་བརྒྱབ་དེ། ངས་བསམ་ན་ང་རང་གིས་ཕོ་གསར་ཞིག་གི་ལྷམ་མགོ་ཉོས་པ་ཡིན་ན། འདི་ཁུལ་གྱི་ཚོང་ཁང་མི་ཉུང་བ་ཞིག་གིས་ང་རང་ངོ་ཤེས་སྟབས། ཁྱོ་གའི་ཤེས་པ་ཡིན་ན་ཡག་པོ་མེད་པ་རེད། དེ་ལས་ཁྱེད་རང་གི་ངའི་ཚབ་དུ་ཉོ་རོགས་ཟེར་ནས་ཧིན་སྒོར་ཆིག་སྟོང་ལྷག་ཞིག་བློ་བཟང་གི་ལག་པར་བཞག བློ་བཟང་གིས་དེ་འདྲ་དངོས་ནས་ཡག་པོ་མི་འདུག རྗེས་མ་ཞིག་ལ་ཁྱེད་རང་གིས་བསམ་ནས་ལག་རྟགས་ཆུང་ཆུང་ཞིག་ཉོས་ན་འགྲིག་གི་རེད་ཟེར་ནས་ལག་པ་ནང་དུ་བཀུམ་རྩིས་བྱས་དུས། ཉི་མ་ལྷ་སྒྲོན་གྱིས་བློ་བཟང་གི་ལག་མགོ་ནས་བཟུང་དེ་ལག་དུ་བཙན་པོ་བྱས་དེ་བཞག

བློ་བཟང་གི་སྤྱིན་བདག་གིས་ཟ་ཁང་ཡང་བོད་པ་གཞན་ཞིག་ལ་བཙོང་བ་དང་། བློ་བཟང་གི་ལས་ཀ་ལ་ཡང་འགྱུར་བ་མ་སོང་བ་མ་ཟད། གླ་ཆ་ཡང་སྔོན་ཆད་ལས་ཧིན་སྒོར་སུམ་བརྒྱ་འཕར་བ་དང་། ལྕགས་ཤོག་ཁང་བ་དེ་ཡང་གནས་སྐབས་ཤིག་ལ་སྤྱིན་བདག་གིས་ཁོ་རང་གི་ལས་ཀ་འདི་མུ་མཐུད་དུ་བྱས་བསྡད་པ་ཡིན་ན་དེའི་ནང་དུ་བསྡད་ན་འགྲིག་པར་བཤད།

ཉིན་ཞིག་བློ་བཟང་ལ་ཉི་མ་ལྷ་སྒྲོན་ཀྱིས་འཁྲིས་ཀྱི་ཚོང་ཁང་ནང་དུ་ཁ་པར་ཞིག་འབྱོར། བློ་བཟང་ཁྱེད་རང་ཁོམ་པ་ཡོད་དམ། ཡོད་ན། ད་ལྟ་སྐར་མ་ཁ་ཤས་ཤིག་གི་རིང་དུ་འུ་གཉིས་ནམ་རྒྱུན་འདུག་སའི་གྲོ་ཤི་ཐའི་ལམ་ཁའི་འགྲམ་གྱི་ཟ་ཁང་དེར་ཤོག་དང་ངས་ཁྱེད་རང་ལ་སྒུག་ནས་འདུག ངས་ཁྱེད་རང་ལ་ཁ་བརྡ་གལ་ཆེན་ཁ་ཤས་ཤིག་བྱེད་འདོད་འདུག་ཟེར་ནས་བཤད།