དེ་རིང་ནས་རིག་གཞུང་ལ་བརྩེ་བ་ཡོང་བའི་ཐབས་ལམ་འཚོལ།

ང་མཐོ་སློབ་འགྲིམ་མཁན་འགའ་རེར་ཐུག་སྐབས། མཐོ་སློབ་ནང་བོད་པའི་སྐོར་ལ་སྐད་ཆ་བཤད་ན། གུ་དོག་པོ་དང་བསམ་བློ་གཏོང་མི་ཤེས་པ། ཐང་པོ་མེད་པ། ཕལ་ཆེར་ཀླད་པར་སྐྱོན་ཤོར་ཡོད་པ་ལྟ་བུར་ངོས་འཛིན་བྱེད་ཀྱིན་འདུག་ཟེར། དེ་ནི་སོ་སོའི་རིག་གཞུང་དང་མི་རིགས་ལ་བརྩེ་དུང་ཟབ་མོ་ཞིག་མེད་པའི་སྐྱོན་རེད། ཅེས་དཔལ་རྒྱལ་བ་༧ཀརྨ་པ་མཆོག་གིས་གསུངས་ཡོད།

དེ་རིང་ཞོགས་པ་རི་བོ་ཧི་མ་ལ་ཡའི་རི་བརྒྱུད་རྒྱ་གར་བྱང་ཤར་རྡོ་ལ་རྡར་གྱི་རི་རྩེར་ཉི་རྩེ་ཕོག་པ་དང་ཆབས་གཅིག ངྷ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་ལོ་ཡི་བགྲང་བྱ་ ༤༩ འཁོར་བའི་མཛད་སྒོ་ངྷ་སྟེང་བོད་ཕྲུག་ཁྱིམ་སྡེའི་རྩེད་ཐང་ནས་གཟབ་རྒྱས་ངང་ཚོགས་ཡོད་ལ། ཞོགས་པའི་ཆུ་ཚོད་བརྒྱད་དང་ཕྱེད་ཀའི་ཐོག སློབ་ཕྲུག་ཡོངས་རྩེད་ཐང་ལ་ཚང་འཛོམས་ཀྱིས་སྐུ་མགྲོན་རྣམ་པར་ཕེབས་བསུ་ཞུས་ཡོད། ཆུ་ཚོད་ ༩ དང་ཕྱེད་ཀའི་ཐོག་སྐུ་མགྲོན་གཙོ་བོ་སྒྲུབ་བརྒྱུད་བསྟན་པའི་སྲོག་ཤིང་། དཔལ་༧རྒྱལ་བ་ཀརྨ་པ་ཨོ་རྒྱན་འགྲོ་འདུལ་འཕྲིན་ལས་རྡོ་རྗེ་མཆོག་རུ་ཕྲེང་སྒྲིག་པའི་སློབ་ཕྲུག་དག་གི་རྔ་རོལ་གྱི་རམ་འདེགས་ཁྲོད་ཆིབས་བསྒྱུར་བསྐྱངས་ཡོད།

སྐབས་དེར་བོད་ཁྱིམ་སྤྱི་ཁྱབ་དབུ་འཛིན་ཚེ་དབང་ཡེ་ཤེས་མཆོག་ནས་ཁྱིམ་སྡེའི་ལས་བསྡོམས་སྙན་སྒྲོན་ཞུས་དོན། ངྷ་སྟེང་བོད་ཕྲུག་ཁྱིམ་སྡེ་འདི་ཉིད་ཕྱི་ལོ་ ༡༩༦༠ ཟླ་ ༥ ཚེས་ ༡༧ ཉིན་བཙན་བྱོལ་བོད་མིའི་བུ་བཅོལ་ཁང་གི་མིང་ཐོག་ནས་དབུ་འཛུགས་གནང་ཡོད་ལ། ཐོག་མ་ལམ་བཟོ་བ་ཁག་ཅིག་གི་བུ་ཕྲུག་ ༥༡ ཙམ་སྐུའི་གཅེན་མོ་ཚེ་རིང་སྒྲོལ་མ་མཆོག་གིས་ཐུགས་འགན་བཞེས་ཤིང་འགྲོ་གྲོན་སྐུ་སྒེར་ནས་བཏང་ཡོད། ༡༩༦༤ ལོར་གཅེན་མོ་ཚེ་རིང་སྒྲོལ་མ་མཆོག་ཉིད་སྐུ་ཚེ་མ་ཟིན་སྟབས། གཅུང་མོ་བཀའ་ཟུར་རྗེ་བཙན་པད་མ་མཆོག་གིས་མཇུག་སྐྱོང་གནང་ཡོད། ༡༩༧༡ ལོར་བོད་ཕྲུག་ཁྱིམ་སྡེར་མིང་སྒྱུར་གྱིས་ཁྲིམས་མཐུན་དེབ་སྐྱེལ་བྱས། ཞེས་བོད་ཕྲུག་ཁྱིམ་སྡེ་ཡི་བྱུང་རབས་ངོ་སྤྲོད་བྱས་བྱུང་།

ཁོང་གིས་མུ་མཐུད་དུ་ཕྱི་ལོ་ ༢༠༠༩ ལོའི་སློབ་ཕྲུག་གི་ཡིག་རྒྱུགས་སྐོར་ངོ་སྤྲོད་གནང་དོན། བོད་ཁྱིམ་སློབ་ཁག་ནང་འཛིན་རིམ་བཅུ་བའི་ཡིག་རྩལ་གཏོང་མཁན་སློབ་ཕྲུག་ ༧༥༡ བྱུང་ཡོད་ལ། ཡིག་ཚད་འཁྱོལ་བ་ ༦༡༣ ། ཡང་བསྐྱར་གཏོང་དགོས་པ་ ༡༣༧ ། མ་འཕྲོད་པ་ ༡ ། ཡིག་ཚད་འཕྲོད་པའི་བརྒྱ་ཆ་ ༨༡ ། ༦༢ ཙམ་ཟིན་ཡོད། འཛིན་རིམ་བཅུ་གཉིས་པའི་རྒྱལ་ཡོངས་ཡིག་ཚད་གཏོང་མཁན་ནང་། ཚན་རིག་ཐོག་སློབ་མ་ ༡༠༣ དང་འབྱུང་རིག་ཐོག་ ༢༡༢ ། ཚོང་འབྲེལ་ཐོག་ ༡༨༥ ། ཁྱོན་བསྡོམས་ ༥༠༠ སློབ་མ་ཙམ་བྱུང་ཡོད། དེ་དག་ལས་ཚན་རིག་ཡིག་གི་རྒྱུགས་འཕྲོད་པ་སློབ་མ་ ༩༥ དང་འབྱུང་རིག་ ༢༡༢ ། ཚོང་འབྲེལ་ ༡༧༨ བཅས་ཁྱོན་བསྡོམས་ ༤༨༥ འདུག ཡིག་རྒྱུགས་བསྐྱར་དུ་གཏོང་དགོས་པ་ཚན་རིག་ཐོག་སློབ་མ་ ༦ དང་། འབྱུང་རིག་ཐོག་མེད། ཚོང་འབྲེལ་ཐོག་ ༧ བཅས་ཁྱོན་བསྡོམས་སློབ་མ་ ༡༣ འདུག ཡིག་རྒྱུགས་མ་འཕྲོད་པ་ཚན་རིག་ནང་སློབ་མ་ ༢ དང་། འབྱུང་རིག་དང་ཚོང་འབྲེལ་ཐོག་མེད། ཡིག་ཚད་འཕྲོད་པའི་བརྒྱ་ཆ་ཚན་རིག་ཐོག་ ༩༢ ། ༢༣ དང་། འབྱུང་རིག་ཐོག་བརྒྱ་ཆ་ ༡༠༠ ། ཚོང་འབྲེལ་ཐོག་བརྒྱ་ཆ་ ༩༦ ། ༢༡ བཅས་ཁྱོན་བསྡོམས་བརྒྱ་ཆ་ ༩༧ ཙམ་ཟིན་ཡོད། ཅེས་ངོ་སྤྲོད་གནང་བྱུང་།

བོད་ཕྲུག་ཁྱིམ་སྡེ་ཡི་ད་ལྟའི་གྲུབ་ཆ་ངོ་སྤྲོད་གནང་དོན། ལོ་འདིར་གསར་དུ་སློབ་འཇུག་བྱས་པའི་སློབ་མ། རྒྱ་བལ་འབྲུག་གསུམ་ནས་གཏན་སློབ་ནང་གསར་འཇུག་བྱས་པ་ ༥༣༤ དང་བོད་ནས་འབྱོར་བ་ ༡༠༩ ཡོད་ལ། ཁྱོན་བསྡོམས་ ༦༤༣ ཙམ་ཡོད། གཏན་སློབ་ཀྱི་སློབ་མ་ ༩༥༨༠ དང་ཉིན་སློབ་ཀྱི་སློབ་མ་ ༡༧༠༣ ཡོད་ལ། མཐོ་རིམ་སློབ་གཉེར་བ་ ༡༦༤༡ དང་། ལག་ཤེས་སློབ་མ་ ༦༢༢ ། ཆུ་གློག་སྡེ་ཚན་ཁོངས་སུ་སློབ་མ་ ༡༦༣༠ བཅས་ཡོད། ལས་བྱེད་གྲངས་ ༡༣༥༩ དང་འཕྲལ་སེལ་ལས་བྱེད་ ༡༦༠ ཡོད་ལ། བགྲེས་ཡོལ་བ་ ༡༧༨ བཅས་མི་འབོར་ཁྱོན་བསྡོམས་ ༡༧༡༧༣  ཙམ་ཡོད། ཕྱི་ལོ་ ༡༩༦༠ ནས་ད་བར་གཏན་སློབ་ཁག་ནང་སློབ་འཇུག་བྱས་པ་ ༣༦༩༧༥ དང་། ཉིན་སློག་ཁག་ནང་སློབ་འཇུག་བྱས་པ་ ༨༤༥༨ བཅས་ཁྱོན་བསྡོམས་ ༤༥༤༣༣ ཙམ་བྱུང་ཡོད། ཅེས་དང་།

སྔར་ལོའི་ཕྱི་ཟླ་ ༤ ཚེས་ ༡ ནས་ད་ལོའི་ཕྱི་ཟླ་ ༣ ཚེས་ ༣༡ བར་དངུལ་གྱི་བྱུང་སོང་རྩིས་ཁྲ། བྱུང་ཧིན་སྒོར་ས་ཡ་སུམ་བརྒྱ་ ༣༣༩༩༢༤༤༦༧ ། ༦༠ དང་འཆར་གཞིའི་ཐོག་ཧིན་སྒོར་ས་ཡ་ཉིས་བརྒྱ་ ༢༢༣༤༥༥༣༣༨ ། ༡༥ བཅས་ཁྱོན་བསྡོམས་ཧིན་སྒོར་ས་ཡ་ལྔ་བརྒྱ་ ༥༦༣༣༧༩༨༠༥ ། ༡༥ ཙམ་ཆགས་ཡོད། སོང་རྒྱུན་འགྲོན་ཐོག་ཧིན་སྒོར་ས་ཡ་སུམ་བརྒྱ་བཅོ་བརྒྱད་ ༣༡༨༧༡༨༡༦༢ ། ༦  དང་འཆར་གཞིའི་ཐོག་ཧིན་སྒོར་ས་ཡ་ཉིས་བརྒྱ་ཉེར་བདུན་ ༢༢༧༧༨༧༥༧༠ ། ༥༨ བཅས་ཁྱོན་བསྡོམས་ཧིན་སྒོར་ས་ཡ་ལྔ་བརྒྱ་ ༥༤༦༥༠༧༣༣༢ ། ༦༧ ལ་སླེབས་ཡོད། བྷེན་ལོར་མཐོ་སློབ་དེ་ ༢༠༠༩ ཟླ་ ༢ ཚེས་ ༡༩ ཉིན་༼ ཏཱ་ལའི་བླ་མ་མཐོ་རིམ་སློབ་གཉེར་ཁང་ ༽ ཞེས་༧གོང་ས་མཆོག་གིས་མཚན་གནང་བ་མ་ཟད། ད་ལྟ་དགེ་རྒན་འོས་སྦྱོང་གནང་མུས་ཡིན་ལ། ལོ་རྗེས་མ་ནས་སློབ་ཚན་གཞན་རྣམས་ཀྱང་མགོ་འཛུགས་ཞུ་རྒྱུ་ཡིན། ཞེས་གསུངས་བྱུང་།

དེའི་རྗེས་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱོང་གནང་དོན། ཚང་མས་མཁྱེན་གསལ་ལྟར་ཤེས་ཡོན་ཟེར་བ་དེ་གལ་ཆེན་པོ་རེད། ཤེས་ཡོན་མེད་ན། བསམ་བློའི་ནང་འཁོར་བསྡད་པ་གང་ཞིག་ལག་ལེན་བསྟར་ཐུབ་རྒྱུ་ཁག་པོ་རེད། ཤེས་ཡོན་བསླབ་པར་སློབ་གྲྭ་དང་དགེ་རྒན། མཐུན་རྐྱེན་སོགས་འཛོམས་དགོས། བོད་ཕྲུག་ཁྱིམ་སྡེར་མཚོན་ན་དེ་དག་འཛོམས་ཡོད། སློབ་གྲྭ་གཞན་ལས་འབུར་དུ་ཐོན་པ་ཞིག་ཆགས་ཡོད། ཉེ་ཆར་ངྷ་ཤོད་སློབ་གྲྭའི་མཛད་སྒོའི་ཉིན། ངྷ་ཤོད་སློབ་གྲྭ་རང་སྐྱ་ཐུབ་པ་ཞིག་ཆགས་ཡོད། ཅེས་བཀའ་ཁྲི་མཆོག་གིས་གསུངས་སོང་། ང་རང་གི་བསམ་ཚུལ་ཞུས་ན། དབུས་བོད་ཕྲུག་ཁྱིམ་སྡེ་ཡི་འཛིན་སྐྱོང་བྱེད་སྟངས་དང་སློབ་ཕྲུག་སྐྱོང་སྟངས་ལ་བསམ་བློ་བཏང་ན། རྒྱལ་ཁབ་རང་བཙན་ཡོད་པ་ཞིག་གིས་ཀྱང་བསྒྲུབ་དཀའ་བ་ཞིག་འགྲུབ་ཡོད། སློབ་ཕྲུག་ཆ་རྐྱེན་ཡོད་མེད་གཉིད་ཀ་སློབ་སྦྱོང་གཅིག་གྱུར་དང་། འགྲོ་སྟངས་གཅིག་མཚུངས། སྒྲིག་གཞི་འདྲ་མཉམ་གྱི་ཐོག་སྐྱོད་ཀྱིན་ཡོད། ཅེས་དང་། སློབ་ཕྲུག་ཚོའི་ངོས་ནས་ཀྱང་དབུ་བཞུགས་ལས་བྱེད་དང་དགེ་རྒན་རྣམ་པ། སློབ་གྲོགས་ཕན་ཚུན་བར་བཅས་ལ་བརྩི་བཀུར་བཟང་པོ་དང་། ངང་རྒྱུད་རིང་པོ། བཟོད་བསྲན་ཆེན་པོ། ཧུར་བརྩོན་ཡག་པོ་བྱ་དགོས། ལྷག་པར་དུ་ད་ལྟའི་བོད་པའི་ཛ་དྲག་གི་གནས་སྟངས་ལ་གཞིགས་ཏེ། སྔར་ལས་ལྷག་པར་སློབ་སྦྱོང་ལ་འབད་བརྩོན་གནང་རོགས་ཞུ་རྒྱུ་ཡིན། ཞེས་གསུངས་བྱུང་།

དེའི་རྗེས་བོད་མི་མང་སྤྱི་འཐུས་ཚོགས་གཙོ་རྒྱ་རི་སྒྲོལ་མ་མཆོག་གིས་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་སྦྱོང་གནང་དོན། སློབ་ཕྲུག་རྣམས་ཀྱིས་ད་ལྟ་དང་། མ་འོངས་པ་བཅས་སུ་སྤྱི་ཚོགས་ཞབས་ཞུའི་ལས་འགན་རང་སྐྱ་འཕེར་བ་བྱ་ཐུབ་པའི་རིགས་གཅིག་རྐང་འཛིན་པ་གང་མང་འཐོན་ཐུབ་རྒྱུར། ཕྱོགས་ཚང་མའི་ཐོག་ནས་དགོངས་བཞེས་གནང་རྒྱུར་འབོད་སྐུལ་ཞུ་རྒྱུ་ཡིན། སློབ་ཕྲུག་ཚོའི་ཤེས་ཡོན་ཡར་རྒྱས་གོང་འཕེལ་ཡོང་མིན་དེ་དགེ་རྒན་རྣམ་པའི་ཤེས་ཚད་དང་ཉམས་མྱོང་། སློབ་ཁྲིད་བྱེད་ཕྱོགས། ལྷག་བསམ། སེམས་ཤུགས་བཅས་ལ་ཐུག་ཡོད་སྟབས། དགེ་རྒན་གནས་ཚད་དྲག་གྲས་རིགས་མུ་མཐུད་བོད་ཕྲུག་ཁྱིམ་སྡེ་ནང་། ཞབས་ཞུ་རྒྱུན་གནས་ཐུབ་ཐབས་སུ་འཛིན་སྐྱོང་གིས་ཀྱང་། དུས་ནས་དུས་སུ་དམིགས་བསལ་མཐུན་འགྱུར་གཟིགས་སྐྱོང་གནང་རྒྱུ་གལ་ཆེན་རེད། ཅེས་དང་། རང་རེའི་སྤྱི་ཚོགས་ནང་མྱོས་རྫས་ལ་ངན་གོམ་ལང་ཤོར་དུ་ཕྱིན་པ་གང་འཚམ་ཡོང་གིན་ཡོད་སྟབས། སློབ་གྲྭ་ཁག་ནང་མྱོས་རྫས་བེད་སྤྱོད་བྱེད་མཁན་ཁྱབ་བརྡལ་དུ་སོང་ཚེ། བྱིས་པའི་ཤེས་ཡོན་དང་འཕྲོད་བསྟེན། ཐ་ན་མི་ཚེ་གང་བོ་ཆུད་ཟོས་སུ་འགྲོ་ཉེན་ཆེ་སྟབས། དེ་རིགས་སྔོན་འགོག་གི་སྒྲིག་ཁྲིམས་དམ་དྲག་གང་ལེགས་གནང་གལ་ཆེ། ཞེས་གསུངས་སོང་།

མཇུག་མཐར་སྐུ་མགྲོན་གཙོ་བོ་དཔལ་རྒྱལ་བ་༧ཀརྨ་པ་མཆོག་གིས་ལམ་སྟོན་བཀའ་སློབ་གནང་དོན། དེ་རིང་འདིར་སློབ་གྲོགས་ཚོའི་མདུན་ནས་ལམ་སྟོན་ཡིན་མདོག་མདོག་གི་སྐད་ཆ་བཤད་རྒྱུའི་འཇོན་ཐང་དང་སྤོབས་པ་མི་འདུག་མོད། དུས་རྒྱུན་སོ་སོ་བོད་པའི་བླ་ཆེན་གྱི་མིང་འཁུར་མཁན་ཞིག་ཡིན་པའི་ཆ་ནས། ཕྱོགས་མང་པོ་ཞིག་ནས་བོད་དང་བོད་ཀྱི་མ་འོངས་པའི་སྐོར་ལ་བསམ་འཆར་འདོན་མཁན་དང་། རེ་བ་སྐྱོན་མཁན་མང་པོ་ཞིག་ཡོང་བསྡད་ཡོད་སྟབས། དེ་རིང་འདིར་ཁོ་རང་ཚོའི་ཚབ་བྱས་ཏེ། གནས་ཚུལ་ཁ་ཤས་བརྒྱུད་བསྒྲགས་བྱས་ན། སློབ་ཕྲུག་ཚོ་དང་མི་མང་ལ་ཕན་ཐོགས་ཅུང་རེ་ཐོགས་སྲིད་པའི་རེ་བ་ཞུ་བཞིན་ཡོད། ང་ཚོ་བོད་མི་ཞིག་ཡིན་པའི་ཆ་ནས་བོད་པའི་སྲོལ་རྒྱུན་རིག་གནས་སྲུང་སྐྱོབ་བྱ་རྒྱུ་དེ་བོད་མི་ཚང་མའི་འགན་འཁུར་ཆགས་ཡོད། ཕ་ཡུལ་བོད་དུ་འཚོ་བ་སྐྱེལ་མཁན་ཡིན་ན་འདྲ་ལ། ཕྱི་རྒྱལ་ལུང་པར་ཚར་ལོངས་བྱུང་མཁན་ཡིན་ནའང་འདྲ། བོད་མི་ཚང་མའི་འདུན་པ་གཅིག་གྱུར་ཡོང་དགོས། གང་ཡིན་ཟེར་ན། བོད་མི་ཟེར་བ་དེ་བོད་ཀྱི་རིག་གཞུང་སྲུང་སྐྱོབ་བྱེད་མཁན་དང་། བོད་ཀྱི་རིག་གཞུང་དེ་བོད་མིའི་བླ་སྲོག་ཆགས་ཡོད། དེ་གཉིས་ལ་ཁ་འབྲལ་ཐབས་མེད་པའི་འབྲེལ་བ་བཟང་པོ་ཡོད།

ང་ཚོས་ངེས་པར་དུ་དུས་ཚོད་དམ་འཛིན་བྱས་ཏེ། སློབ་སྦྱོང་གི་གོམ་འགྲོས་ཇེ་མགྱོགས་དང་། འབད་བརྩོན་ཇེ་ཆེར་བཏང་ཏེ་བོད་ཀྱི་རིག་གཞུང་གི་སྙིང་བཅུད་སྲུང་སྐྱོབ་བྱ་དགོས། དེ་དང་མཉམ་དུ་དེང་དུས་ཀྱི་སློབ་སྦྱོང་ལའང་དོ་སྣང་ཆེན་པོ་བྱ་དགོས། སློབ་སྦྱོང་བྱས་པ་ཙམ་དུ་མ་ཟད་ནུས་པ་ཐོན་པ་ཞིག་དང་སྤྱི་ཚོགས་ལ་ཞབས་འདེགས་བསྒྲུབ་ཐུབ་མཁན་ཞིག་ཡིན་དགོས་སྟབས། ངེས་པར་དུ་ཆེད་ལས་རིགས་ལ་གདམ་ཀ་བྱས་ཏེ་སློབ་སྦྱོང་བྱ་དགོས། དེ་ལྟར་བྱུང་བ་ཡིན་ན་འཛམ་གླིང་གི་སྟིངས་ཆར་ལངས་ཏེ། འཛམ་གླིང་དང་མཉམ་དུ་བོད་ཀྱི་རིག་གཞུང་ལོངས་སུ་སྤྱོད་ཐུབ་པ་དང་སློབ་སྦྱོང་བྱ་ཐུབ་པ་ཞིག་ཆགས་ཡོད། བོད་མི་ཚོ་འཛམ་གླིང་ཐོག་གསོན་པ་ཙམ་གྱིས་མི་ཆོག་པར་གསོན་པར་བཟི་བརྗིད་ལྡན་པ་ཞིག་དང་། དོན་སྙིང་ལྡན་པ་ཞིག་ཡོང་རྒྱུ་གལ་ཆེན་པོ་ཡིན།

ད་བར་༧རྒྱལ་བ་རིན་པོ་ཆེའི་ལམ་སྟོན་འོག་བོད་རིགས་ཚང་མས་ལྷག་བསམ་སྟོབས་ཤུགས་ཆིག་སྒྲིལ་བྱས་ཤིང་། ལྷག་པར་དུ་བོད་ནང་གི་བོད་མི་ཚོས་འཆི་བ་སྲོག་ལ་མ་འཛེམས་པར་བོད་པའི་བདེན་དོན་ཆེད་ལས་འགུལ་སྤེལ་གྱིན་ཡོད། བཙན་བྱོལ་ནང་ཡོད་པ་ཚོར་རང་དབང་ཆེ་པོ་དང་གོ་སྐབས་མང་པོ་ཡོད་སྟབས། ང་ཚོ་མི་རེ་ངོ་རེ་ནས་འགན་འཁུར་ལེན་དགོས། ཁྱེད་ཅག་སློབ་ཕྲུག་ཚོའི་ངོས་ནས་ཀྱང་། སོ་སོ་མི་སྒེར་གྱི་ངོ་ནས་བོད་པའི་ཆོས་དང་རིག་གཞུང་སྲུང་སྐྱོབ་ཐད་ལས་ཀ་གང་བསྒྲུབ་ཐུབ་ཀྱིན་འདུག ཁས་ལེན་དམ་བཅའ་ཅི་ཞིག་བྱ་ཐུབ་ཀྱིན་འདུག དེ་ལ་བསམ་བློ་གཏོང་དགོས་པ་དང་སེམས་ཕུགས་སུ་འཛིན་དགོས་པ་གལ་ཆེན་རེད། ཐ་ན་བོད་པའི་དཔེ་དེབ་ཅིག་ཧུར་བརྩོན་གྱིས་བཀླགས་ཏེ། ངས་འདི་ལ་བབ་ཆགས་ཆེན་པོ་ཞིག་འཇོག་རྒྱུ་ཡིན་སྙམ་པའི་དམ་བཅའ་འཇོག་ཐུབ་ནའང་ཡག་པོ་རེད།

བོད་པའི་ཆོས་དང་རིག་ཞུང་ཐོག་འབད་བརྩོན་བྱེད་པ་དེ་ཁ་ཙམ་ཚིག་ཙམ་དང་། གཞན་གྱི་རྗེས་སུ་ཧོལ་རྒྱུག་ཙམ་ལས་སོ་སོའི་སེམས་པའི་གཏིང་ལ་འགུལ་སྐྱོད་དང་ཚོར་སྣང་གང་ཡང་མེད་མཁན། ལྷག་པར་དུ་ང་མཐོ་སློབ་འགྲིམ་མཁན་འགའ་རེར་ཐུག་སྐབས། མཐོ་སློབ་ནང་བོད་པའི་སྐོར་ལ་སྐད་ཆ་བཤད་ན། གུ་དོག་པོ་དང་བསམ་བློ་གཏོང་མི་ཤེས་མཁན། ཐང་པོ་མེད་པ། ཕལ་ཆེར་ཀླད་པར་སྐྱོན་ཤོར་ཡོད་པ་ལྟ་བུར་ངོས་འཛིན་བྱེད་ཀྱིན་འདུག་ཟེར། དེ་ནི་སོ་སོའི་རིག་གཞུང་དང་མི་རིགས་ལ་བརྩེ་དུང་ཟབ་མོ་ཞིག་མེད་པའི་སྐྱོན་རེད། སོ་སོས་དོ་སྣང་བྱས་མ་བྱས་དང་ཉམས་མྱོང་བསགས་མ་བསགས་ལ་རག་ལས་ཡོད་སྟབས། ཚང་མས་ཉི་མ་དེ་རིང་ནས་མགོ་བཙུགས་ཏེ་བོད་པའི་ཆོས་དང་རིག་གཞུང་། མི་རིགས་བཅས་པའི་ཆེད་དུ་སེམས་ལ་བག་ཆགས་མཐུག་པོ་ཞིག་དང་བརྩེ་བ་ཟབ་མོ་ཞིག་ཡོང་བའི་ཐབས་ལམ་འཚོལ་རོགས་གནོངས། ཞེས་གསུངས་སོང་།