་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།
ཉི་མ་ནི་རི་སྤྱང་གིས་དེད་པའི་ལུག་ཁྱུ་བཞིན་དུ་གར་སོང་ཆ་མེད་དུ་འགྲོ་བཞིན་ཡོད་ལ། བློ་བཟང་གི་མི་ཚེ་དེ་ཡང་དེ་ལྟར་དུ་འགྱུར་བ་འགྲོ་བཞིན་ཡོད་པ་ལྟར། ཟླ་ངོ་ཁ་ཤས་ཀྱི་རྗེས་ཀྱི་དེ་རིང་བློ་བཟང་ནི་སྔོན་ཆད་ཀྱི་ལས་ཀ་བྱེད་ས་དེ་ན་མེད།
བློ་བཟང་གིས་དབྱིན་ཇིའི་ཟ་ཁང་ཞིག་གི་ནང་དུ་ཕོར་བ་འཁྲུ་བའི་ལས་ཀ་བྱེད་བཞིན་ཡོད་ལ། དེ་རུ་ཁོ་རང་ལ་དབྱིན་ཡིག་སྤྱོང་བའི་གོ་སྐབས་ཤིག་དང་དྭང་བླང་དབྱིན་དགེ་ཡང་རེག་གི་ཡོད་པ་རེད། བློ་བཟང་གིས་ཟ་ཁང་འདིར་ལས་ཀ་ལས་ནས་རིང་བོ་སོང་མེད་ན་ཡང་། ད་ལྟའིའཆར་ཁོ་རང་ལ་དབྱིན་ཡུལ་ནས་ཡིན་པའི་དྭང་བླང་དབྱིན་དགེ་མ་ཞིག་ཀྱང་རེག་ཡོད།
བློ་བཟང་ལ་ཉིན་རེ་ལ་དུས་ཚོད་གཅིག་གཉིས་ཤིག་གི་རིང་དུ་ངལ་གསོ་ཡོད་པ་རེད། དེ་ཡང་ཉིན་གུང་དུ་འཁེལ་ཡོད་པས་སྐབས་དེ་དང་བསྟུན་ནས་དབྱིན་དགེ་མ་དེ་ཡང་བློ་བཟང་གི་ནང་དུ་དབྱིན་ཡིག་ཁྲིད་དུ་ཡོང་གི་ཡོད། བློ་བཟང་གི་འདུག་སའི་ནང་དུ་རང་གི་གྲོགས་པོ་ཞིག་ལྷན་དུ་བསྡད་ཡོད། ཡིན་ཡང་། གྲོགས་པོ་དེ་ལ་གཞུང་འབྲེལ་མ་ཡིན་པའི་ལས་ཀ་ཞིག་ཡོད་སྟབས། ཉིན་དཀར་མང་ཤོས་སུ་ནང་དུ་མེད།
བློ་བཟང་གིས་ནང་དུ་མོག་མོག་ཞིག་བཟོ་བཞིན་ཡོད་ལ། ཕྱི་རོལ་དུ་རྡ་སའི་གནམ་ངོ་ནི་འགྱུར་ལྡོག་ཧ་ཅང་ཆེ་བའི་ཆར་བ་ཡང་ཟིམ་ཟིམ་ཞིག་འབབ་བཞིན་ཡོད་ཀྱང་། དབྱིན་དགེ་མ་ལེས་ན་དེ་ལ་་ཡང་མ་འཛེམ་པར་བློ་བཟང་གི་ནང་དུ་འབྱོར། ཧེ་་་བློ་བཟང་། ག་རེ་བྱེད་ཀྱི་ཡོད་ཟེར་ནས་དབྱིན་སྐད་ཀྱིས་དྲིས།
བློ་བཟང་གིས་མྱུར་དུ་ཤེལ་ཕོར་ཞིག་ལེན་ཞོར་དུ། ངས་འུ་གཉིས་ལ་ཉིན་གུང་ཁ་ལག་ཞིག་བཟོ་བཞིན་ཡོད། དང་བོ་ཁྱེད་རང་གིས་ཇ་ཞིག་བཏུང་ཟེར་ནས་རང་གི་ལག་ནང་གི་ཤེལ་ཕོར་ནང་དུ་ཤོག་བཏུམ་བརྒྱབ་པའི་ཇ་ནག་ཆུང་ཆུང་དེ་གཡུགས་ནས། དེའི་སྟེང་དུ་ཆུ་བསྐོལ་བླུགས་དེ་ལག་གཉིས་ཀྱིས་དམ་པོར་སྐྱོར་ནས་རང་གི་དབྱིན་དགེ་མ་ལེས་ན་ལ་སྤྲད།
དབྱིན་དགེ་མ་ལེས་ན་དངོས་ནས་གནམ་གཤིས་ཀྱི་དབང་གི་ཟེར་ན་འདྲ། གོན་པ་སྲབ་དྲགས་དེ་ཟེར་ན་འགྲིག དངོས་ནས་གྲང་བཞིན་ཡོད་པ་མ་ཟད། ལག་པ་གཉིས་ཀྱང་འདར་ཞོར་དུ་ཐུགས་རྗེ་ཆེ་ཟེར་ནས་བློ་བཟང་གི་ལག་གི་ཇ་ཕོར་དེ་བླངས།
བློ་བཟང་གིས་དབྱིན་སྐད་ཕྲན་པུ་ཞིག་ལས་མི་ཤེས་ཀྱང་། ངོ་ཚ་ཞོར་དུ་ལེས་ན་ཁྱེད་ཀྱིས་ཇ་དེ་འཐུང་ནས་ཅུང་ཙམ་སྒུག་དང་། ངས་མོག་མོག་བཟོས་དེ་ཚར་གྲབས་འདུག དེ་ཚར་ན་འུ་གཉིས་ཀྱིས་མོག་མོག་བཙོ་བཞིན་པའི་སྐབས་སུ་ཅུང་ཙམ་ཁ་སང་གི་འཕྲོར་མཐུད་ན་འགྲིག་གི་འདུག་གམ་ཟེར་ནས་དྲིས།
དབྱིན་དགེ་མ་ལེས་ན་དངོས་ནས་འཛུམ་མདངས་དང་བཅས་དེ། ཡིན་དང་ཡིན། ངས་རོགས་བྱེད་དགོས་པ་འདྲ་འདུག་གམ་ཟེར་ནས་བློ་བཟང་ལ་བཤད། བློ་བཟང་གིས་མགོ་བོ་ཐད་དུ་གཡུགས་ཞོར་དུ། དབྱིན་སྐད་ཀྱིས་མིན་མིན། འདི་ལས་སླ་བོ་ཡོད་པ་རེད་ཟེར་ནས་སྐར་ཆ་ཁ་ཤས་ཀྱི་རྗེས་སུ་མོག་མོག་དབུགས་ཐབ་ཀྱི་སྒང་དུ་བཞག་ནས། དབྱིན་དགེ་མ་ལེས་ན་གམ་དུ་བསྡད་དེ་སློབ་དེབ་ཀྱི་ཁ་ཕྱེ།
དབྱིན་དགེ་མ་ལེས་ན་ཡིས། དེ་རིང་འུ་གཉིས་ཀྱིས་སློབ་དེབ་སྟེང་གི་མི་ཁྲིད་པར། རང་རང་གི་བསམ་ཚུལ་དང་མི་ཚེ་སོགས་དྲི་བ་དང་དྲི་ལན་སོགས་བྱས་པ་ཡིན་ན། ཁྱེད་རང་གི་དབྱིན་སྐད་ཡར་རྒྱས་འགྲོ་རྒྱུར་དངོས་ནས་ཕན་ཐོག་གི་རེད་ཅེས་བློ་བཟང་ལ་བལྟས་དེ་བཤད།
བློ་བཟང་གིས་བསམ་བློ་གང་ཡང་མ་བཏང་བར། དེ་འགྲིག་གི་འདུག དངོས་ནས་བསམ་ཚུལ་ཡག་པོ་རེད། ངས་ཀྱང་དབྱིན་ཡིག་ཡག་པོ་ཞིག་ཤེས་རྒྱུ་དཀའ་མོ་རེད། དེ་ལས་སྐད་ཡག་པོ་ཞིག་ཤེས་སོང་བ་ཡིན་ན་ཡག་པོ་ཡོད་པ་མ་ཟད། ང་རང་ལ་དེ་ཙམ་གྱིས་འགྲིག་གི་འདུག་ཞེས་དབྱིན་དགེ་མ་ལེས་ན་ལགས་ཀྱི་བསམ་ཚུལ་ལ་རྒྱབ་སྐྱོར་བྱས།
དབྱིན་དགེ་མ་ལེས་ན་ཡིས་ང་ནི་དབྱིན་ཡུལ་ནས་སྐྱེ་བ་ཡིན། ད་ལོ་ལོ་ཉེར་བརྒྱད་ཡིན། ནང་དུ་སྤུན་མཆེད་ཀྱང་མང་བོ་མེད། སྔོན་ཆད་གནམ་ཐང་ཞིག་དུ་ལས་ཀ་བྱས་མྱོང་། འདིར་མ་ཡོང་སྔོན་དུ་ལས་ཀ་དེ་མཚམས་བཞག་པ་ཡིན། རྗེས་སུ་ཕར་སོང་ན་གཞི་ནས་ལས་ཀ་གསར་བ་ཞིག་འཚོལ་དགོས་ཀྱི་ཡོད་པ་རེད། ང་རང་ལ་ཁང་བ་དང་རླངས་འཁོར་སོགས་གང་ཡང་མེད། ད་ལྟ་ང་རང་རྒྱ་གར་རྡ་ས་མེག་ལོར་དུ་གུང་གསེང་དུ་བསྡད་ཡོད། མི་རིང་བར་ཕྱིར་རང་ཡུལ་དུ་འགྲོ་རྒྱུ་ཡིན། མེག་ལོར་དུ་ང་རང་ལ་བོད་པའི་སློབ་ཕྲུག་མང་བོ་ཞིག་ཡོད། ཕྱི་དྲོ་དང་སྔ་དྲོ་གཉིས་ལ་ང་རང་སློབ་ཕྲུག་དེ་དག་ལ་དབྱིན་ཡིག་སློབ་ཁྲིད་བྱེད་དུ་འགྲོ་བཞིན་ཡོད་ཅེས་བློ་བཟང་ལ་འདི་ལྟར་ཁྱེད་རང་གིས་ཀྱང་ང་རང་ལ་སྟབས་བདེ་སྒོ་ནས་ངོ་སྤྲོད་ཅིག་བྱས་ཟེར་ནས་བཤད།
བློ་བཟང་གིས་ཀྱང་དེ་ལྟར་དུ་རང་ཉིད་ངོ་སྤྲོད་ཅིག་བྱས་ཚར་དུས། མོག་མོག་ཟ་རན་ལ་སླེབས་འདུག་སྟབས། བློ་བཟང་གིས་ལྕགས་སྡེར་གཅིག་གཉིས་ཤིག་འགྱིག་གི་ཅོག་རྩེ་ཆུང་ཆུང་དེའི་སྒང་དུ་བཞག་ནས་ཁོ་གཉིས་ཀྱི་ཉིན་གུང་ཁ་ལག་མོག་མོག་ཟ་མགོ་བཙུགས།
དབྱིན་དགེ་མ་ལེས་ན་ནི་དངོས་ནས་དྲང་གནས་ཀྱི་བློ་བཟང་གི་བཟོས་པའི་མོག་མོག་དེར་བྲོ་བ་ཞིམ་པོ་ཞིག་བྱུང་སྟབས། བློ་བཟང་ལ་ཡང་དང་བསྐྱར་དུ་དངོས་ནས་ཐུགས་རྗེ་ཆེ་ཞེས་བཤད།
བློ་བཟང་གིས་དེ་འདྲ་གསུངས་དགོས་ཀྱི་ཡོད་པ་མ་རེད། འདི་ནི་འོས་པ་ཞིག་རེད། ཁྱེད་རང་ལྟ་བའི་དབྱིན་དགེ་ལྷག་བསམ་ཅན་མི་ཉུང་བ་ཞིག་གིས་ངེད་ཅག་བོད་པ་ཚོ་ལ་རིན་མེད་དུ་སློབ་ཁྲིད་བྱེད་པ་དང་། རང་རང་གི་འཇོན་ཚོད་ཀྱི་བོད་དོན་ལ་རོགས་རམ་བྱེད་པ་དེ་དག་ལ་བསམ་བློ་བཏང་དུས། ང་ལ་ཡང་མཐུན་རྐྱེན་འཛོམ་པོ་མེད་ཀྱང་། ནང་ནས་ཁྱེད་རང་ལ་ཟ་མ་སྟབས་བདེ་ཞིག་བཟོས་པ་དེ་ཙམ་བཟོས་དེ་བཀའ་དྲིན་ལ་བསམ་ཤེས་ཤིག་བྱས་པ་དེ་ཙམ་ནི་བྱེད་དགོས་པ་ཞིག་རེད། སྤྱིར་ཡིན་ན་ངས་ཁྱེད་རང་ལ་ཟ་ཁང་ཁ་ལག་ཡག་ས་ཞིག་དུ་མགྲོན་འབོད་བྱེད་དགོས་མོད། དེ་འདྲ་མ་བྱུང་བ་རེད་ཅེས་བཤད།
དབྱིན་དགེ་མས་དངོས་ནས་ཟ་ཁང་ནང་གི་ཟ་མ་ལས་ཁྱེད་རང་གི་བཟོས་པའི་ལག་ཟས་ཞིམ་པོ་འདུག ང་རང་གིས་མང་ཤོས་སུ་ཟ་ཁང་དག་གི་ནང་དུ་ཁ་ལག་ཟ་བཞིན་ཡོད་པ་རེད། ང་རང་ག་དུས་ཡིན་ཡང་ཁྱེད་རང་གི་ནང་དུ་ཡོང་དུས་ཡོང་དུས་སུ། ཁྱེད་རང་གིས་འཚེར་སྣང་དང་བཅས་དེ་ང་རང་ལ་ནམ་རྒྱུན་དུ་ཁ་ལག་བཟོ་བ་དང་ཇ་བཟོ་བ་དེ་དག་ནི་དངོས་ནས་བྱེད་དགོས་པ་མ་རེད་དེ། སྐུ་ཉིད་ཀྱིས་དེ་ལྟར་གནང་བ་དེར་ང་གང་དུ་སོང་ཡང་བརྗེད་ཐུབ་ས་མ་རེད་ཅེས་བློ་བཟང་ལ་སླར་ཡང་ཐུགས་རྗེ་ཆེ་ཞུས།
ཕན་ཚུན་ལ་ཐུགས་རྗེ་ཆེ་ཟེར་ནས་རང་རང་གི་ལྟ་ཚུལ་སོགས་དབྱིན་སྐད་ཤེས་མིན་ལ་མ་བལྟས་པར། གནམ་གཤིས་སྐྱོ་བའི་ཉིན་དེར་ཁོ་གཉིས་དངོས་ནས་ལྷོད་ལྷོད་ཅིག་ཆགས་དེ་ཆུ་ཚོད་ཀྱང་གཉིས་ལྷག་འགོར་བ་ཡང་མ་ཤེས་པ་རེད།
བློ་བཟང་གིས་ཆུ་ཚོད་ལ་ལྟ་ཞོར་དུ། དབྱིན་དགེ་མ་ལེས་ན་ལ། ད་ངས་དུས་ཚོད་རྫོགས་ནས་ཆུ་ཚོད་ཕྱེད་ཀ་ཕྱིན་འདུག ང་རང་སླར་ཡང་ལས་ཀ་འགྲོ་དགོས་པ་རེད། སང་ཉིན་ཡང་ཁྱེད་རང་ལ་ལས་ཀ་འདྲ་མ་བྱུང་བ་ཡིན་ན་དུས་ལྟར་དུ་ངའི་ནང་དུ་ཕེབས་རོགས་ཞུ་ཟེར་ནས་བཤད།
མུ་འགོད།
སྤུན་ཟླ་ཚོ་བློ་བཟང་འདི་ལ་སྙིང་རེ་རྗེ་ཡི་འདུག་གམ། ད་དུང་། མཇེ་མགོ་འཛུགས་ས་མ་རེག་པར། ཐ་མག་རེ་འཐེན་ནས་བསྡད་འདུག མི་རིང་བར་འདིས་ཆང་ཡང་འཐུང་ངེས་རེད། ཁྱེད་ཅག་མུ་མཐུད་དུ་བློ་བཟང་གི་གཏམ་རྒྱུད་གསན་དུ་ཕེབས་ཤོག་དང་། བློ་བཟང་འདི་ད་དུང་འཁྱར་འཁྱོར་ངང་དུ་འགྲོ་བཞིན་འདུག
ད་བློ་བཟང་ལ་ཟ་ལེ་རྒྱལ་གྱི་ཆོ་ལོ་སྤྲོད་ན་འདོད་དམ།
རྒན་རབས་པ་ལགས། ཁ་སྔོན་ནས་རྒྱུགས་སྤྲོད་ཀྱི་དབང་གི་ཉིན་ཤས་རིང་དྲ་ཐོག་ཏུ་སླེབས་མ་ཐུབ་མ་སོང་། དེའི་རིང་སྐུ་ཁམས་བདེ་བོ་དང་ཞེ་སེམས་སྐྱིད་པོའི་ངང་དུ་འཚོལ་ཡོད་དམ། ཁྱེད་ཀྱིས་བྲིས་བའི་སྒྲུང་རྩོམ་འདི་ངོ་མས་ཡག་པོ་ཡོད་ས་རེད། ཡིན་ན་ཡང་ད་རེས་ཞིབ་གློག་ཅིག་བྱས་ཐུབ་མ་སོང་། རྗེས་སུ་ཞིབ་གསགློག་ཅིག་བྱས་ཐུབ་ན་བསམ་སོང་།
ད་བློ་བཟང་དབྱིན་མོ་འདིས་ཟ་ཟ་རེད་
དྲ་གྲོགས་ལགས། ཉིན་ཤས་རིང་ཁྱོད་ཀྱི་ནང་ལ་ཡོང་ཐུབ་མ་སོང་། དེ་རིང་ཁྱོད་ཀྱི་ནང་ལ་ཡོང་ནས་ཡར་མར་བལྟས་དུས་ཁྱོད་ཀྱི་ནང་དེ་སྔོན་མ་ལས་ཧ་ཅང་ཡར་རྒྱས་བྱུང་འདུག འདི་འདྲ་ཞིག་ཅེས་ཕྱིར་སོང་བ་ཡིན་ནམ་བསམས་ནས་བརྟག་སྐབས་སྤོབས་པ་དང་མདུན་སྐྱོད་ཀྱིས་ཁ་ལོ་བསྒྱུར་བ་གཞི་ནས་ཤེས་སོང་། དྲ་གྲོགས་ལགས། མུ་མཐུད་ནས་འབད་པ་བྱོས་དང་གངས་ཅན་པའི་བུ་རྒོད་ཅིག་ཡོང་བའི་རེ་བ་ཆེ།
ཡ་ཡ།
དྲ་གྲོགས་ཤ་ཁྲག་རུས་ལགས་ཀྱིས་དངོས་གནས་བློ་བཟང་ལ་དགོངས་བཞེས་པ་ཡག་པོ་གནང་འདུག་ཨ།