བོད་ཀྱི་རིག་གཞུང་རྩ་མེད་དུ་ཕྱིན་པ་ཡིན་ན། འཛམ་གླིང་ལ་གྱོང་གུད་ཆེན་པོ་ཡོང་གི་རེད། ཅེས་༧གོང་ས་མཆོག་གིས་ཉི་ཧོང་གི་དད་ལྡན་པ་རྣམས་ལ་གསུངས་ཡོད།
ཕྱི་ཚེས་ ༣ ཉིན་༧གོང་ས་མཆོག་གིས་ཉི་ཧོང་གི་ Matsuyama ས་ཁུལ་གྱི་མཛད་འཕྲིན་ལེགས་པར་གྲུབ་རྗེས་ཕྱི་ཚེས་ ༤ ཉིན་གྱི་སྔ་དྲོ་ཉི་ཧོང་ལྷོ་ཕྱོགས་ཀྱི་ Okinawa རུ་ཞབས་སོར་འཁོད་དེ། ཡུལ་དེའི་དད་ལྡན་པ་ ༤༥༠ ལྷག་ལ་བདེན་པ་བཞི་དང་འབྲེལ་བའི་ནང་ཆོས་ཀྱི་སྐོར་ནས་བཀའ་སློབ་གནང་ཡོད་པ་མ་ཟད། འདུ་འཛོམས་དེའི་སྟེང་གི་དྲི་བ་དྲིས་ལན་གྱི་སྐབས་སུ་༧གོང་ས་མཆོག་གིས། བོད་ཀྱི་དཀའ་ངལ་དེ་སྲིད་དོན་གྱི་དཀའ་ངལ་གཅིག་པུ་མ་ཡིན་པར། ལོ་རྒྱུས་ལྡན་པའི་མི་རིགས་ཤིག་གི་ནང་པའི་ཆོས་དང་ཞི་བའི་ལྟ་གྲུབ་གལ་ཆེན་དུ་འཛིན་པའི་རྩ་ཆེ་བའི་རིག་གཞུང་མེད་པར་ཆགས་འགྲོ་བ་ཞིག་རེད། དེ་འདྲ་ཡིན་དུས། ང་ཚོས་རྩ་ཆེ་བའི་རིག་གཞུང་དེ་ལ་བདག་པོ་ཡག་པོ་ཞིག་རྒྱག་ཐུབ་པ་ཡིན་ན། མི་འབོར་ཆེ་བའི་རྒྱ་ནག་དང་འཛམ་གླིང་གི་མི་མང་ལ་རིག་གཞུང་དེ་བརྒྱུད་ཞི་བའི་ཐོག་ལ་ནུས་པ་ཆེན་པོ་ཞིག་འདོན་ཐུབ་ཀྱི་ཡོད། གལ་སྲིད་རིག་གཞུང་དེ་རྩ་མེད་དུ་ཕྱིན་པ་ཡིན་ན། བོད་མི་རིགས་ཙམ་མ་ཡིན་པར་འཛམ་བུ་གླིང་ལ་གྱོང་གུད་དང་ཕམ་པོ་ཞེ་དྲག་ཞིག་ཆགས་ཡོང་གི་ཡོད་སྟབས། ཚང་མས་དེའི་ཐོག་ལ་བསམ་བློ་གཏོང་དགོས་པ་ཞིག་ཆགས་འདུག ཅེས་བཀའ་སློབ་གནང་འདུག་ལ། དེ་བཞིན་༧གོང་ས་མཆོག་གིས། བོད་ཀྱི་ཁོར་ཡུག་དེ་ཡང་བོད་ཙམ་མ་ཟད། ཨེ་ཤ་ཡ་སྤྱི་དང་ལྷག་པར་རྒྱ་གར་དང་རྒྱལ་སྤྱི་ལ་འབྲེལ་བ་དམ་ཟབ་ཡོད་པས་མ་འོངས་པར་ཚན་རིག་པ་ཡོངས་ཀྱིས་བོད་ཙམ་མ་ཡིན་པར་འཛམ་གླིང་སྤྱིའི་ཁོ་ཡུག་ལ་སྲུང་སྐྱོབ་དང་ལྟ་རྟོག་བྱ་དགོས་པའི་ལམ་སྟོན་བཀའ་སློབ་གནང་ཡོད་པ་རེད།
༧གོང་ས་མཆོག་གིས་ཞི་ཀོ་ཁུལ་གྱི་མཛད་འཆར་ལེགས་པར་གྲུབ་རྗེས་ཉིན་རྒྱབ་དུ་མཁའ་ལམ་བརྒྱུད་ཉི་ཧོང་གི་མངའ་སྡེ་ཨོ་ཁེ་ནཱ་ཝ་ཁུལ་ཆིབས་བསྒྱུར་གནང་ཡོད་པ་དང་། དེར་འཛམ་གླིང་དམག་ཆེན་གཉིས་པའི་སྐབས་སུ་འདས་གྲོངས་སུ་ཕྱིན་པའི་དམག་མི་དང་མི་མང་ ༣༥༠༠༠ ལྷག་གི་བེམ་པོ་དུར་སྦས་བྱས་པའི་ཀམ་པ་ཀོ་མཆོད་རྟེན་དང་བྱང་ཆུབ་ཤིང་གི་སྡོང་བོ་སོགས་ལ་རབ་གནས་གནང་ཡོད་པ་དང་། སྐབས་དེར་༧གོང་ས་མཆོག་གིས་གསར་འགོད་པ་རྣམས་ལ་གསུངས་དོན། འདས་པའི་འཛམ་གླིང་གི་ལོ་རྒྱུས་ལ་ཕྱིར་མིག་བལྟས་ཀྱང་མཚོན་ཆ་དང་དམག་སྟོབས་ཀྱིས་མིའི་དཀའ་ངལ་སེལ་ཡོད་པ་རེད་ཅེ་ན། དེ་ནི་ནོར་འཁྲུལ་གྱི་བསམ་བློ་ཞིག་ཡིན་པ་གསལ་བོ་ཆགས་ཡོད་སྟབས། མ་འོངས་པར་ཚང་མས་ཤེས་ཡོན་ཡར་རྒྱས་གཏོང་བ་དང་ཆབས་ཅིག་བྱམས་དང་སྙིང་རྗེའི་ཐོག་དཀའ་ངལ་གང་མང་ཕན་ཚུན་བགྲོ་གླེང་བརྒྱུད་ཐག་གཅོད་བྱ་ཐུབ་ན་ཡག་པོ་རེད། ཅེས་གསུངས་ཡོད་པ་རེད།
གྲོགས་མཆོག་བསེ་རུས་ནོར་བཅོས་གང་བྱས་པར།
བསོྟོད་སྨད་བྱ་རྒྱུའི་དགོས་མ་མ་མཐོང་ཡང་།
བོད་ཀྱི་དུས་བབ་གཟབ་གཟབ་མ་གནང་ན།
ཡོད་ཚད་ནོར་བར་བྲིས་པའི་ཉེན་བརྡ་རེད།
བོད་ཡིག་གི་དག་ཆ་ཡར་རྒྱས་འགྲོ་རྒྱུར་ཕན་ཐོགས་ཆེ།།
“གོང་ས་མཆོག་གི་གསུངས་ལ་དད་པ་ཡོད།།
དྲ་གྲོགས་བསེ་རུའི་ཚིག་ལ་ཡིད་ཆེས་ཡོད།།
བོད་པ་ཤི་འདོད་མེད་ན་ད་ལྟ་ནས།།
བོད་ཀྱི་སྐད་དང་ཡི་གེར་དོ་སྣང་བྱོས།།
ཀུན་ལ་ཕན་ཕྱིར་བཀོད་འདུག་པས།
དོན་མེད་ཚིག་མཚོན་ག་ལ་འདེབས།
ཁྱོད་ཀྱིས་བཀོད་པའི་ཐ ་སྙད་རྣམས།
ངས་ཀྱང་ད་ནས་ལེགས་པར་ངེས།
ཀུན་ལ་ཕན་ཕྱིར་འདིར་བཀོད་པས།།
དོན་མེད་ཚིག་མཚོན་མ་འདེབས་རོགས།།
གཤམ་འཁོད་མིང་གི་ཐ་སྙད་རྣམས།།
སྔ་མ་ནོར་ལ་ཕྱི་མ་དག།
ཆིབས་བསྒྱུར། ཆིབས་སྒྱུར།
ཡིག་བསྒྱུར། ཡིག་སྒྱུར།
སྐད་བསྒྱུར། སྐད་སྒྱུར།
གསུང་བསྒྱུར། གསུང་སྒྱུར།
རྩོམ་བསྒྱུར། རྩོམ་སྒྱུར།
དབང་བསྒྱུར། དབང་སྒྱུར།
བཅོས་བསྒྱུར། བཅོས་སྒྱུར།
བསྒྱུར་རྩོམ། སྒྱུར་རྩོམ།
བསྒྱུར་གཞི། སྒྱུར་གཞི།
བསྒྱུར་བཅོས། སྒྱུར་བཅོས།
བསྒྱུར་སྟངས། སྒྱུར་སྟངས།
བསྒྱུར་མ། སྒྱུར་མ།
བསྒྱུར་རྩིས། སྒྱུར་རྩིས།
བསྒྱུར་ཐབས། སྒྱུར་ཐབས།
བསྒྱུར་ཕྱོགས། སྒྱར་ཕྱོགས།