འདི་ཁ་བྲལ་གྱི་བྱ་སྤྱོད་རེད་ཟེར།

རྒྱ་གཞུང་གི་མགྲིན་ཚབ་པས་༧གོང་ས་མཆོག་གི་མོན་རྟ་དབང་ཁུལ་གྱི་མཛད་འཕྲིན་དེ་ཁ་བྲལ་གྱི་བྱ་སྤྱོད་རེད་ཅེས་སྐྱོན་བརྗོད་བྱས་འདུག

༧གོང་ས་མཆོག་གིས་ཐེངས་འདིའི་ཉི་ཧོང་གི་མཛད་འཕྲིན་ལེགས་པར་གྲུབ་རྗེས་ཟླ་འདིའི་ཚེས་ ༨ ཉིན་ཨ་རི་ན་ཅལ་མངའ་སྡེའི་མོན་རྟ་དབང་ངམ་རྒྱལ་མཆོག་སྐུ་ཕྲེང་དྲུག་པ་ཚངས་དབྱངས་རྒྱ་མཚོ་མཆོག་གི་འཁྲུངས་ཡུལ་དུ་མཛད་འཕྲིན་བསྐྱང་འཆར་ཡོད་པ་རེད། རྒྱ་གར་གྱི་སྲིད་བློན་རིམ་པས་ཁོང་ཉིད་ལ་ཆེ་མཐོང་གནང་སྟེ། ༧གོང་ས་མཆོག་རྒྱ་གར་གྱི་མངའ་སྡེ་གང་དུ་ཆིབས་བསྒྱུར་ཞབས་སོར་འཁོད་ཀྱང་ཁོང་ཉིད་ཐུགས་འདོད་བཞིན་ཕེབས་ཆོག་པའི་ཆོག་མཆན་གནང་ཡོད། དེ་ལྟ་ནའང་།  ཕྱི་ཚེས་ ༣ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་མཱ་ཀྲོ་ཞི་ཡིས་གསར་འགོད་ལྷན་ཚོགས་ཤིག་གི་སྟེང་སྐྱོན་བརྗོད་བྱས་ཡོད་འདུག ཁོས་བརྗོད་དོན། རྒྱ་ནག་གཞུང་གིས་ཏཱ་ལའི་བླ་མ་ཐེངས་འདིར་རྩོད་གཞི་ཅན་གྱི་ས་ཁུལ་དེར་ཕེབས་པ་དེ་ཁ་བྲལ་གྱི་བྱ་སྤྱོད་ཞིག་ལ་ངོས་འཛིན་བྱེད་ཀྱི་ཡོད་ལུགས་བརྗོད་ཡོད་པ་མ་ཟད། དེ་ནི་ཏཱ་ལའི་རུ་ཚོགས་ཀྱིས་རྒྱ་ནག་ལ་རྒོལ་བའི་ཁ་བྲལ་རིང་ལུགས་ཀྱི་གདོང་གཤིས་ཀྱི་ངོ་བོ་དམར་རྗེན་དུ་ཐོན་པ་ཞིག་དང་། རྒྱ་ནག་དང་རྒྱལ་ཁབ་གཞན་གྱི་འབྲེལ་ལམ་ལ་གཏོར་བཤིག་བྱས་པ་ཡིན་ན་ཡང།  རྒྱ་ནག་ཕྱོགས་ནས་རྒྱ་དཀར་ནག་གཉིས་ཀྱི་རྩོད་གཞིར་གྱུར་བའི་ས་མཚམས་ཀྱི་ལྟ་སྟངས་ལ་ཐོག་མཐའ་བར་གསུམ་དུ་འགྱུར་བ་མེད་ལ། རྒྱ་ནག་ཕྱོགས་ནས་ཐེངས་འདིར་ཏཱ་ལའི་བླ་མ་མོན་རྟ་དབང་དུ་ཆིབས་བསྒྱུར་གནང་བར་མཐའ་གཅིག་ཏུ་ངོ་རྒོལ་ཡོད་ཅེས་བརྗོད་ཡོད་པ་རེད།

གནད་དོན་འདིའི་ཐད་གནས་ཚུལ་དབྱེ་ཞིབ་པས་བརྗོད་དོན། རྒྱ་ནག་གཞུང་མ་གཞི་ནས་གདུག་རྩུབ་ཀྱི་བྱ་སྤྱོད་སྤེལ་མཁན་དང་། བོད་མི་རིགས་ནི་དུས་ནམ་ཡང་ཞི་བདེར་སྙེགས་མཁན་ཞིག་ཡིན། བཟང་བོ་དེ་དུས་ནམ་ཡང་གདུག་རྩུབ་དང་དྲག་སྤྱོད་ལས་རྒྱལ་བ་ཆོས་ཉིད་དུ་གྲུབ་ཡོད་ཚུལ་བརྗོད་ཡོད་པ་དང་། གལ་སྲིད། ཏཱ་ལའི་བླ་མ་ཁ་བྲལ་རིང་ལུགས་པ་ཞིག་ཏུ་ངོས་འཛིན་བྱས་ཏེ་ཆིབས་བསྒྱུར་ལ་བཀག་འགོག་བྱས་པ་ཡིན་ན་འཛམ་གླིང་ནང་ཡང་བསྐྱར་གྷན་ངྷི་གཅིག་དམར་བསོད་བྱས་པ་དང་གཅིག་མཚུངས་ཆགས་ཡོད་ཅེས་བརྗོད་ཡོད་པ་རེད།