མོན་པ་དང་ལ་དྭགས་གཉིས་སྔོན་ལ་སུ་འགྲོ་བལྟ་རྒྱུ་ཡིན།

དེ་རིང་ཞོགས་པའི་ཆུ་ཚོད་ ༡༠ སྟེང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མོན་རྟ་དབང་གནམ་ཐང་ལ་ཞབས་སོར་བདེ་བར་བཀོད་ཡོད་པ་དང་། སྐབས་དེར་ཨ་རུ་ན་ཅཱལ་མངའ་སྡེ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོས་གཙོས་པའི་མངའ་སྡེའི་དཔོན་རིགས་རྣམས་དང་། མོན་རྟ་དབང་རྫོང་གི་རྫོང་དཔོན་གཙོས་པའི་ས་གནས་མགོ་ཁྲིད་རྣམ་པ། དེ་བཞིན་དགོན་སྡེ་ཁག་གི་སྐུ་ཚབ་དང་ས་གནས་མི་དམངས་ཀྱི་འཐུས་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།

མོན་རྟ་དབང་དགོན་པའི་བླ་མ་ལས་སྣ་དང་གྲྭ་དམངས་འདུས་ཚོགས་ཀྱིས་བཀྲ་ཤིས་པའི་མཆོད་རྫས་སྣ་ཚོགས་དང་། རྔ་རོལ་གྱི་ཕེབས་བསུ་རྒྱ་ཆེན་དབུས་༧གོང་ས་མཆོག་སྐུ་འཁོར་དང་བཅས་པ་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པར་ཆིབས་སྒྱུར་བསྐྱངས་ཏེ། དགོན་པའི་འགྲེམས་སྟོན་ཁང་སྒོ་འབྱེད་དང་། དེ་ནས་འདུ་ཁང་དུ་ཕེབས་ཏེ་གཙོ་སྐུ་ཐུབ་པའི་སྐུ་བརྙན་ལ་སྙན་ཤལ་འཐེན་ཡོད། ཉིན་གུང་ཆུ་ཚོད་དང་པོ་ཐོག་རྟ་དབང་དགོན་པའི་རིག་གཞུང་སློབ་གཉེར་ཁང་གི་དཔེ་མཛོད་སྒོ་འབྱེད་གནང་རྗེས་སློབ་གྲྭའི་ཚོགས་ཁང་ནས་དགེ་ལས་རྣམ་པར་མཇལ་ཁ་གནང་བ་དང་སྦྲགས་སློབ་གྲྭའི་མཚན་ཉིད་རྩོད་པར་གསན་གཟིགས་གནང་ཡོད།

སྐབས་དེར་དགོན་པའི་མཁན་པོ་གུ་རུ་སྤྲུལ་སྐུ་རིན་པོ་ཆེ་མཆོག་གིས་གྲྭ་ཚང་གི་ལས་སྡོམ་སྙན་སྒྲོན་ཞུས་དོན། གྲྭ་ཚང་གི་སློབ་གྲྭ་སྔོན་འགྲོ་ནས་འཛིན་རིམ་བརྒྱད་པའི་བར་རྒྱ་གར་གཞུང་གི་ལམ་སྲོལ་ལྟར་སློབ་ཚན་གཏན་འབེབས་འགྲོ་མུས་ཐོག སྔར་ལོ་འཛིན་རིམ་བཅུ་བའི་བར་གསར་དུ་སྤར་ཏེ་མདོ་སྔགས་ཀྱི་སློབ་ཚན་དང་གྲྭ་ཚང་གི་ཆོ་ག་ཕྱག་ལེན་སོགས་ལ་དོན་གཉེར་གནང་བཞིན་ཡོད། གྲྭ་ཚང་ལ་དགེ་འདུན་པ་སྔར་ནས་མང་པོ་ཡོད་ལ། ད་ལོ་སྔར་ལས་མང་བ་བྱུང་། ཉེ་ཆར་རྒྱ་གར་ཁོར་ཡུག་སྲུང་སྐྱོབ་ཚོགས་པའི་ནང་འདི་ག་གྲྭ་ཚང་གི་དགེ་འདུན་པ་ ༤ ཕེབས་ཏེ་ཁོར་ཡུག་སྐོར་ལ་གོ་རྟོགས་གང་ལེགས་བྱུང་ཡོད་ལ། ༧གོང་ས་མཆོག་གི་བཀའ་དགོངས་བཞིན་དགོན་པའི་མཁན་པོ་ནས་ཡུལ་ལུང་སོ་སོའི་མང་ཚོགས་ལ་ནང་ཆོས་ཀྱི་གོ་རྟོགས་སྤེལ་གྱིན་ཡོད་ལ། སྔར་ལོ་ཉིན་གྲངས་ ༢༠ རིང་ས་གནས་སོ་སོར་ངོ་སྐྱོད་ཀྱིས་ནང་ཆོས་ངོ་སྤྲོད་བྱས་པས་ཕན་ཐོགས་ཆེན་པོ་བྱུང་སྙམ་པའི་དགའ་ཚོར་སྐྱེས། ཞེས་གསུངས་སོང་།

དེའི་རྗེས་སློབ་གྲྭའི་གཙོ་འཛིན་མཆོག་གིས་སློབ་གྲྭའི་ལས་སྡོམ་སྙན་སྒྲོན་ཞུས་དོན། ༡༩༧༧ ལོར་སློབ་གཉེར་ཁང་འདི་ཉིད་དབུ་བརྙེས་ཤིང་། ཐོག་མར་སྔོན་འགྲོའི་འཛིན་གྲྭ་གཅིག་དང་དེ་ནས་ ༡༩༨༨ ལོར་འཛིན་རིམ་བརྒྱད་པ་བར་ཚུགས་ཐུབ་པ་བྱུང་། ཉེ་བའི་ཆར་སྔོན་འགྲོ་གོང་འོག་གཉིས་དང་འཛིན་རིམ་བརྒྱད་པ་ནས་བཅུ་བའི་བར་སྤར་ཏེ། ད་ལྟ་སློབ་གཉེར་ཁང་འདིར་ཁྱོན་སྡོམ་འཛིན་གྲྭ་བཅུ་གཉིས་ཡོད། སློབ་གྲྭའི་སློབ་ཚན་ལ་མཚན་ཉིད་རིགས་ལམ་དང་དགོན་པའི་ཆོ་ག་ཕྱག་ལེན། བོད་ཡིག་དང་ཧིན་རྡི། དབྱིན་ཡིག སྤྱི་ཚོགས་ཚན་རིག་བཅས་ཡོད། འཛིན་གྲྭ་མཐོ་བའི་སློབ་ཕྲུག་རེར་ཟླ་བ་དྲུག་རིང་གློག་ལས་འཕྲུལ་འཁོར་རིགས་སློབ་སྦྱོང་སྤྲོད་ཀྱིན་ཡོད། ལོ་ཤས་སྔོན་ནས་དགོན་པ་འདིའི་ཐུན་མོང་མ་ཡིན་པའི་གར་འཆམ་སོགས་ཀྱང་སྦྱོང་བརྡར་བྱེད་ཀྱིན་ཡོད། སློབ་ཕྲུག་ཚོས་ཁོར་ཡུག་སྲུང་སྐྱོབ་ཆེད་ཤིང་ནགས་འདེབས་འཛུགས་གང་ལེགས་བྱུང་ཡོད། གཞན་སློབ་གྲྭ་འདིར་ཕ་མ་ཉམ་ཐག་གི་བུ་ཕྲུག་མི་སྐྱ་ཚོ་ལའང་སློབ་སྦྱོང་གི་གོ་སྐབས་སྤྲོད་ཀྱིན་ཡོད། ད་ལྟའི་ཆར་སློབ་གྲྭ་འདིར་དགེ་རྒན་ ༡༣ དང་ལས་བྱེད་ ༧ ། དགེ་འདུན་པ་ ༢༡༠ དང་མི་སྐྱ་ ༢༠ བཅས་ཡོད། ཝར་ནཱ་མཐོ་སློབ་ཐོན་པ་ ༡༥ ཡིས་རིག་གཞུང་དང་སྤྱི་ཚོགས་ཞབས་ཞུ་སྒྲུབ་ཀྱིན་ཡོད་ལ། ད་ལྟ་སློབ་གཉེར་གནང་མུས་ ༣༥ ཙམ་ཡོད། སློབ་གཉེར་ཁང་འདིར་རྒྱ་གར་དབུས་གཞུང་རིག་གཞུང་ལྷན་ཁང་དང་མི་རིགས་སྡེ་ཚན་གཉིས་ནས་མཐུན་འགྱུར་རོགས་རམ་གནང་བཞིན་ཡོད། ཅེས་གསུངས་སོང་།

མཇུག་མཐར་སྤྱི་ནོར་༧གོང་ས་མཆོག་གིས་སློབ་གྲྭ་དེ་གའི་དགེ་ལས་སློབ་ཕྲུག་ཡོངས་ལ་བླང་དོར་གྱི་བཀའ་སློབ་གསུང་བཤད་གནང་དོན། ཕྱི་དངོས་པོ་ཡར་རྒྱས་ཕྱིན་པ་དང་ལྷན་དུ་ཆོས་ཕྱོགས་ཀྱི་ཤེས་ཚད་དང་། དེང་དུས་ཀྱི་ཤེས་ཡོན་གཉིས་ཀ་ཡར་རྒྱས་སུ་འགྲོ་དགོས་པ་ཧ་ཅང་གལ་ཆེན་པོ་རེད། དེང་སྐབས་ཡུལ་སྐོར་སྤྲོ་འཆམ་པ་མང་པོ་ཡོང་གིན་ཡོད་པ་རེད། མཐའ་མཚམས་འདིར་དགོན་པ་ཞིག་ཡོད་བསྡད་པ་དེ་ཚད་ལོངས་པ་ཞིག་དང་སྤུས་དག་པོ་ཞིག་ཡོད་པ་ཡིན་ན། མི་མང་པོ་ཞིག་ལ་དོ་སྣང་གསར་བ་ཞིག་ཡོང་གི་རེད། ཉེ་ཆར་ཨ་རིའི་བཟོ་གྲྭ་ཆེན་པོ་ཞིག་གི་སྦྱིན་བདག་བཟའ་མི་གཉིས་ངོས་སར་སླེབས་སོང་། སྐྱེས་དམན་དེས་ལོ་བཅུ་གྲངས་གོང་ཞིག་ལ་བལ་ཡུལ་གྱི་དགོན་པ་ཞིག་ནས་ཟླ་གཅིག་རིང་ནང་ཆོས་ལ་ཉན་པ་ཡིན། དུས་དེ་ནས་བཟུང་ངའི་མི་ཚེ་ལ་འགྱུར་བ་ཕྱིན་སོང་། ཞེས་མིག་ཆུ་འཁོར་བཞིན་བརྗོད་སོང་། དེར་བརྟེན། ང་རང་ཚོའི་ནང་པ་སངས་རྒྱས་པའི་ཆོས་ལ་དོ་སྣང་གིས་ལྟ་སྐོར་བྱེད་མཁན་ཞིག་ཡོང་བ་ཡིན་ན། མཐོང་རྒྱུ་སྟོན་རྒྱུ་ཡོད་པ་དང་ངོམ་སོ་བྱེད་ཆོག་པ་ཞིག་བྱུང་བ་ཡིན་ན་མི་ལ་ཕན་ཐོགས་ཡོང་གི་རེད་ལ། བསྟན་པའི་ཞབས་འདེགས་ཀྱང་རེད། ད་ལྟ་སློབ་སྦྱོང་གནང་མཁན་ཚོ་མ་འོངས་པར་དགོན་པའི་ངོ་བོ་ཆ་ཚང་བ་ཞིག་དང་སྤུས་དག་པོ་ཞིག་ཡོང་རྒྱུའི་སོན་རྩ་ཆགས་ཡོད་པ་རེད། སོ་སོ་སྒེར་གྱི་འདི་ཕྱི་གཉིས་ཀྱི་དོན་ཆེན་རེད་ལ། བསྟན་པ་སྤྱིའི་སྲི་ཞུ་རླབས་ཆེན་རེད། ཐོས་བསམ་སྒོམ་གསུམ་ད་ལྟའི་བར་ཡག་པོ་བྱུང་འདུག་ལ། ད་དུང་ཡར་རྒྱས་གཏོང་རྒྱུར་ཧུར་སྐྱེད་གནང་རོགས་ཞུ་རྒྱུ་ཡིན། སློབ་ཕྲུག་ཚོས་དེང་དུས་ཀྱི་ཤེས་ཡོན་དང་སངས་རྒྱས་ཀྱི་ཆོས་ཤེས་ཏེ་དད་པ་ཐོབ་རྒྱུ་གལ་ཆེན་པོ་རེད། ལས་སྡོམ་ནང་གྲོང་གསེབ་ཁག་ཏུ་ཕྱིན་ཏེ་ནང་ཆོས་ངོ་སྤྲོད་བྱེད་ཀྱིན་ཡོད་སྐོར་བཀོད་འདུག དེ་ཞེ་དྲག་གལ་ཆེན་པོ་རེད། དེ་སྔའི་ང་ཚོས་ཆོས་བྱེད་སྟངས་དེ་རྗེས་ལུས་ཀྱི་ཆོས་བྱེད་སྟངས་ཤིག་རེད། དེ་འགྲིག་གི་མི་འདུག ཡིན་གཅིག་མིན་གཅིག་དུས་ཚོད་དང་མཐུན་པའི་ཆོས་བྱ་དགོས་པ་དང་། ཆོས་ཤེས་ཏེ་དད་པ་ཐོབ་པ་ཞིག་བྱུང་བ་ཡིན་ན་དུས་ཚོད་དང་མཐུན་པ་ཞིག་ཆགས་ཀྱིན་ཡོད། གྲངས་ཀ་མང་ཉུང་དེ་ཡང་བསམ་བློ་གཏོང་དགོས་པ་ཞིག་རེད། གྲྭ་ཚང་སོ་སོའི་གནས་སྟངས་ལ་བལྟས་ན་གྲྭ་བ་མང་པོ་བྱུང་ན་ཡག་པོ་རེད། འོན་ཀྱང་། སྤྱི་ཡོངས་ནས་ཡུལ་མིའི་གྲངས་འབོར་ལའང་བསམ་བློ་གཏོང་དགོས་པ་ཞིག་ཡིན། ལ་དྭགས་སོགས་སུ་དེ་འདྲ་འདུག གྲྭ་བཙུན་མང་པོ་ཆགས་ཡོང་ན། དེས་ཡུལ་སྤྱིའི་མི་འབོར་ལ་བསམ་བློ་གཏོང་དགོས་པ་ཞིག་ཆགས་ཀྱིན་ཡོད། ངོས་རྟག་པར་བཤད་ཀྱིན་ཡོད། ཁ་ཐུག་གི་གནས་སྟངས་གཅིག་དང་། ཕྱོགས་ཡོངས་ནས་ལྟ་དགོས་པ་གཅིག་བཅས་འདུག ཡོད་པ་དེ་སྤུས་དག་པོ་ཡོང་རྒྱུ་གལ་ཆེན་པོ་རེད།

དེ་བཞིན། བཙུན་མའི་དགོན་པ་ཚོས་ཡིན་གཅིག་མིན་གཅིག་མཚན་ཉིད་ལ་བལྟ་དགོས་པ་རེད། བཙན་བྱོལ་ནང་བཙུན་མའི་དགོན་པ་ཚོ་ལོ་ཧ་ལམ་བཞི་བཅུ་ཆགས་ཀྱིན་ཡོད། མཚན་ཉིད་ཀྱི་གཞུང་ཆེན་བལྟས་ཏེ་དགེ་བཤེས་མ་འཐོན་རྒྱུའི་དུས་ལ་སླེབས་བསྡད་ཡོད། ལ་དྭགས་ཁུལ་དུའང་ངོས་འབོད་སྐུལ་ཞུ་རྒྱུ་བྱུང་། ཁྱེད་ཅག་མོན་ཁུལ་དུའང་རབ་བྱུང་མའི་དགོན་པ་ཚོས་གཞུང་ཆེན་བལྟ་རྒྱུའི་ལམ་སྲོལ་ཅིག་ངེས་པར་དུ་དགོས་ཀྱིན་འདུག ཆོས་དད་ཀྱི་ཆ་ནས་ཡུལ་ལུང་གང་ལ་བལྟས་ཀྱང་། སྐྱེས་པ་དང་བུད་མེད་གཉིས་ལས་བུད་མེད་ཚོ་ཆོས་དད་ཆེ་བའི་བཟོ་འདྲ་བོ་ཞིག་འདུག ཆོས་དད་བྱེད་མཁན་མང་ཕྱོགས་དེར་ཐོབ་ཐང་ཉུང་བ་དང་སློབ་སྦྱོང་གི་གོ་སྐབས་མེད་པ་ཆགས་ན་ཐབས་སྐྱོ་བོ་རེད། འོན་ཀྱང་། དགེ་སློང་མའི་སྡོམ་རྒྱུན་ཟེར་བ་དེ་ང་ཚོས་ཐག་གིས་གཅོད་ཐུབ་ཡོད་པ་མ་རེད། འདུལ་བའི་འགྲོ་སྟངས་དང་མཐུན་པ་ཞིག་གི་ཐོག་ནས་འདུལ་བ་འཛིན་པ་ཚོས་གོ་བསྡུར་དང་། གཞུང་མང་པོ་གོ་བསྡུར་བྱས་ཏེ་འགྲོ་དགོས་པ་ཞིག་ལས་ང་ཚོ་བོད་པ་གཅིག་པུས་ཐག་གིས་གཅོད་ཐུབ་པ་ཞིག་མ་རེད། སློབ་གཉེར་གནང་རྒྱུ་དེ་དགེ་འདུན་པ་ཚོ་དང་གཅིག་མཚུངས་ཀྱིས་གཞུང་ཆེན་ལ་སློབ་སྦྱོང་གནང་རྒྱུ་དེ་ང་ཚོའི་ལག་ཏུ་ཡོད་པ་ཞིག་རེད།

དེ་བཞིན། མི་སྐྱ་ཚོས་རིགས་ལམ་སློབ་གཉེར་གནང་རྒྱུ་དེ་གལ་ཆེན་པོ་རེད། ཆོས་གཅིག་པུའི་སྐད་ཆ་མ་རེད། དོན་དག་གང་དང་གང་ཡིན་ནའང་ཕན་གྱིན་ཡོད་པ་རེད། རིགས་ལམ་གྱི་འགྲོ་སྟངས་དེ་མཁྱེན་པ་ཡིན་ན། དཔལ་འབྱོར་དང་ཁོར་ཡུག དེང་རབས་ཚན་རིག ཆབ་སྲིད་ཚན་རིག ཁྲིམས་ལུགས་སོགས་གང་ཞིག་ཡིན་རུང་། སློབ་ཚན་མི་འདྲ་བ་ཡིན་ནའང་རིགས་ལམ་གྱི་འགྲོ་སྟངས་དེས་ཕན་ཞེ་དྲག་ཐོགས་གི་རེད། རིགས་ལམ་ནི་མི་ལ་རྣམ་དཔྱོད་ཀྱི་ཤེས་རབ་ཅིག་ཡོད་བསྡད་པ་དེའི་ལག་ཆ་ལྟ་བུ་རེད། དེ་དགོན་པའི་འདི་ནས་རྐང་བཙུགས་ཏེ་ཡག་པོ་ཞིག་གནང་ཐུབ་པ་ཡིན་ན། རིམ་པས་སློབ་གྲྭ་གཞན་དུའང་སྲོལ་གཏོད་ཐུབ་པ་ཞིག་ཡོང་གི་རེད།

བོད་ཨ་མདོ་ཕྱོགས་སུ་སློབ་གྲྭ་ཞིག་འདུག སྤྱི་ཡོངས་ནས་རྒྱ་ནག་གཞུང་གི་སློབ་གྲྭའི་འགྲོ་སྟངས་ལྟར་རེད། དེའི་ནང་དུ་བཀྲ་ཤིས་འཁྱིལ་ནས་དཔེ་ཆ་བལྟས་མྱོང་བ་ཁ་ཤས་འདུག ཁོང་ཚོས་རྟགས་གསལ་བསླབ་འདུག སློབ་གྲྭ་དེ་ནས་ཐོན་པའི་སློབ་མ་ཚོ་རྒྱ་ནག་གི་མཐོ་རིམ་སློབ་གྲྭར་ཕྱིན་སྐབས། ཁོང་ཚོས་རྣམ་དཔྱོད་གཏོང་སྟངས་དེ་གཞན་དང་མི་འདྲ་བ་ཞིག་བྱུང་སྟབས། རྒྱ་ནག་གི་མཐོ་རིམ་སློབ་གྲྭའི་དགེ་རྒན་འགའ་རེ་སློབ་གྲྭ་དེར་ལྟ་སྐོར་ལ་ཡོང་སྟེ། ཁྱེད་ཅག་གི་སློབ་གྲྭ་ནས་ཐོན་པའི་སློབ་མ་ཚོས་དཔྱད་པ་གཏོང་སྟངས་མི་འདྲ་བ་འདུག དེ་ང་ཚོས་བསླབ་དགོས་ཀྱིན་འདུག ཅེས་བརྗོད་འདུག དེར་ང་ཚོས་ངེས་པར་དུ་དོ་སྣང་བྱ་དགོས་པ་རེད།

ངོས་ལ་དྭགས་ལའང་འབོད་སྐུལ་ཞུས་ཡོད། ད་ལྟ་མོན་པར་འབོད་སྐུལ་ཞུ་བཞིན་ཡོད། རྗེས་མ་ལ་དྭགས་སྔོན་ལ་ཕྱིན་སོང་ངམ། མོན་པ་སྔོན་ལ་ཕྱིན་སོང་བལྟ་རྒྱུ་ཡིན། འཛུགས་སྐྲུན་ཡར་རྒྱས་ཞེ་དྲག་ཕྱིན་འདུག ཁྱེད་ཅག་དགེ་འདུན་པ་ཚོའང་གསལ་རིག་རིག་དང་གྲུང་རིག་རིག་འདུག དེ་བཞིན་དགོན་པའི་སྲི་ཞུ་བ་ཚོའང་ཡག་པོ་ཞེ་དྲག་ཡོད་པའི་བཟོ་འདྲ་བོ་ཞིག་འདུག ད་དུང་མུ་མཐུད་དེ་ཧུར་ཐག་བྱོས། ཞེས་གསུངས་སོང་།

དེའི་རྗེས་ཕེབས་ལམ་ནས་རྒྱ་གར་དང་ཕྱི་རྒྱལ་གྱི་གསར་འགོད་པ་དག་གིས་༧གོང་ས་མཆོག་ལ་བོད་རྒྱའི་གནད་དོན་དང་། བོད་དང་ཨ་རུ་ན་ཅལ་གྱི་ས་མཚམས་གནད་དོན་སྐོར་ལ་བཅར་འདྲི་ཞུས་པའི་ལན་དུ་ཁོང་གིས་བཀའ་ལན་སྐྱོན་དོན། ཐོག་མར་ངོས་སྐྱབས་བཅོལ་དུ་ཡོང་སྐབས་རྒྱ་ནག་གཞུང་ཕྱོགས་ནས་ཏཱ་ལའི་བླ་མ་ཕྱི་རྒྱལ་གྱི་ལོག་སྤྱོད་པས་བཙན་ཁྲིད་བྱས་པ་རེད་ཅེས་བརྗོད་པ་རེད། རྗེས་སུ་མ་སུ་རི་ནས་དེའི་སྐོར་ལ་གསལ་བཤད་ཀྱི་གཏམ་བཤད་ཅིག་བྱས་པ་ཡིན། དེ་ནི་དངོས་ཡོད་གནས་ཚུལ་དང་ཁ་གསལ་ཤོས་དེ་ཡིན། སྐད་ཆ་དེ་ལ་རྒྱ་ནག་གཞུང་ཕྱོགས་ནས་ཀྱང་ངོས་ལེན་ཆ་འཇོག་ལྟ་བུ་བྱས་པ་རེད། ཅེས་དང་། ཕྱི་ལོ་ ༢༠༠༦ ལོའི་ཟླ་ ༢ ནང་ངོས་རང་གི་སྐུ་ཚབ་ཚོགས་པ་རྒྱ་ནག་གཞུང་གི་དཔོན་རིགས་ཚོར་ཐུག་འཕྲད་བྱས་སྐབས། ཕར་ཕྱོགས་ནས་ངོས་རང་གི་ལངས་ཕྱོགས་གང་ཡིན་པ་དང་། ངོས་ཀྱི་བསམ་པ་རྣམ་དག་ཡིན་པ་གསལ་བོར་ཤེས་ཡོད་ལ། དེ་བཞིན་དུ་ངོས་ལེན་ཡང་གཙང་མ་གནང་ཡོད་པ་རེད། དེ་གསང་བ་རེད། འོན་ཀྱང་། དེའི་རྗེས་རྒྱ་ནག་གཞུང་གིས་ཕྱི་ཕྱོགས་ནས་ངོས་ལ་སྐྱོན་བརྗོད་ཤུགས་ཆེན་པོ་བྱས་པ་རེད། ཅེས་གསུངས་བྱུང་ལ། ཡང་ཨ་རུ་ན་ཅལ་དང་བོད་པའི་ས་མཚམས་སྐོར་ལ་ཏཱ་ལའི་བླ་མ་སྐུ་ཉིད་ཀྱི་ལངས་ཕྱོགས་གང་ཡིན་དྲིས་པའི་ལན་དུ་ཁོང་གིས། ས་མཚམས་སྐོར་ལ་ངོས་རང་གི་ལངས་ཕྱོགས་སྔོན་མ་ནས་གསལ་བོ་ཡིན། ད་དུང་དོགས་པ་དང་གསལ་ཁ་བྱུང་མེད་ན། ངས་སྔར་བཤད་ཟིན་པའི་ལངས་ཕྱོགས་དེར་སློབ་སྦྱོང་བྱོས། ཞེས་སྐུ་རྩེད་དང་སྦྲགས་ཏེ་བཀའ་ལན་གནང་སོང་།

བོད་ཀྱི་དུས་བབ་གསར་འགོད་པ། དོན་གྲུབ་བཀྲ་ཤིས་ཀྱིས་མོན་རྟ་དབང་ནས་སྤེལ།