ཆིབས་སྒྱུར་ལ་གྲ་སྒྲིག

བོད་ཀྱི་ཆོས་སྲིད་གཉིས་ཀྱི་དབུ་ཁྲིད་༧གོང་ས་ཏཱ་ལའི་བླ་མ་མཆོག་ཕྱི་ཟླ་ ༡༢ པའི་པའི་ནང་ཨོ་སི་ཊོ་ལི་ཡ་དང་ནེའུ་ཛི་ལན་ཌི་གཉིས་སུ་ཉིན་ ༡༠ རིང་གི་ཆིབས་བསྒྱུར་མཛད་འཕྲིན་གནང་འཆར་འཁེལ་ཡོད་པ་དང་།  ནམ་རྒྱུན་༧གོང་ས་མཆོག་གི་མཛད་འཆར་མཐའ་དག་ལ་ཁ་རྡུང་གཏོང་མཁན་གྱི་རྒྱ་ནག་གཞུང་གིས་ཐེངས་འདིའི་མཛད་འཆར་ཐད་ཉེ་ཆར་དགག་རྒྱག་ཁ་རྡུང་ཅི་ཡང་བཏང་མེད་མོད། ཨོ་སི་ཊོ་ལི་ཡའི་སྲིད་བློན་ཁེ་བིན་རོ་ཌི་  Kevin Rudd ཡིས་ཐེངས་འདིར་གོང་ས་མཆོག་དང་མཇལ་འཕྲན་གནང་གི་མེད་སྐོར་བརྗོད་ཡོད་པ་རེད། ཡིན་ནའང་། ཁུལ་དེར་གནས་སྡོད་བོད་རིགས་དང་རྒྱ་རིགས་ཚོགས་པ་དག་གིས་༧གོང་ས་མཆོག་གི་ཆིབས་བསྒྱུར་ལ་སྟ་གོན་གཟབ་རྒྱས་གནང་གིན་ཡོད་འདུག    
༧གོང་ས་མཆོག་ཕྱི་ཟླ་ ༡༢ པའི་ཚེས་ ༡ ནས་ ༣ པར་ཨོ་སི་ཊོ་ལི་ཡའི་རྒྱལ་ས་སེ་ཌི་ནེའུ་ Sydney རུ་ཆིབས་བསྒྱུར་མཛད་འཆར་སྐྱོང་རྒྱུ་ཡིན་པ་དང་། ༧གོང་ས་མཆོག་གི་ཆིབས་སྒྱུར་གྲ་སྒྲིག་གནང་མཁན་ཚོས་ཕྱི་ཟླ་ ༡༠ པ་ནས་བཟུང་རྒྱལ་ས་སེ་ཌི་ནེའུ་གྲོང་ཁྱེར་གྱི་སྐད་གྲགས་ཅན་གྱི་ས་གནས་སྒྲ་ལིན་ཧར་བྷོར་ Darling Harbor གཙོས་པའི་མྱུར་བསྒྲོད་གཞུང་ལམ་ཁག་ཏུ་ཐེངས་འདིའི་མཛད་འཆར་དང་འབྲེལ་བའི་༧གོང་ས་མཆོག་གི་སྐུ་པར་བཀོད་པའི་གསལ་བསྒྲགས་སྣ་ཚོགས་སྤེལ་ཡོད་པ་མ་ཟད། སྤྱི་སྤྱོད་རླངས་འཁོར་ ༣༠ ལྷག་གི་སྟེང་དུའང་གཅིག་མཚུངས་ཀྱི་གསལ་བསྒྲགས་དེ་སྦྱར་ཡོད་འདུག དེ་བཞིན་སེ་ཌི་ནེའུ་གྲོང་ཁྱེར་དུ་ཡོད་པའི་བོད་རིགས་དང་རྒྱ་རིགས་ཚོགས་པ་ཁག་ནས་༧གོང་ས་མཆོག་གི་ཆིབས་བསྒྱུར་ལ་གྲ་སྒྲིག་བྱེད་བཞིན་ཡོད་འདུག སེ་ཌི་ནེའུ་གྲོང་ཁྱེར་དུ་ཡོད་པའི་བོད་རྒྱ་མཐུན་ཚོགས་དང་རྒྱ་ནག་དམངས་གཙོ་འབྲེལ་མཐུད་ཚོགས་པ་གཉིས་ཀྱིས་མཉམ་འབྲེལ་ཐོག་ཐེངས་འདིར་༧གོང་ས་མཆོག་གིས་རྒྱ་རིགས་ཕྱི་སྡོད་པ་རྣམས་ལ་མཇལ་འཕྲད་གནང་ཡུལ་གྱི་ས་གནས་ཁག་ཡོངས་ཁྱབ་གསལ་བསྒྲགས་ཀྱང་སྤེལ་ཡོད་པ་རེད།
ཨོ་སི་ཊོ་ལི་ཡར་གནས་སྡོད་རྒྱ་ནག་དམངས་གཙོ་འབྲེལ་མཐུད་ཚོགས་པའི་ཡན་ལག་ཚོགས་གཙོ་ཆིན་ཅིན་གྱིས་ཨ་རིའི་རླུང་འཕྲིན་ཁང་ལ་བརྗོད་དོན། ང་ཚོས་གོ་སྒྲིག་གནང་བཞིན་པའི་༧གོང་ས་ཏཱ་ལའི་བླ་མཆོག་གི་མཛད་འཆར་དང་འབྲེལ་བའི་བྱ་འགུལ་ཁག་གི་དམིགས་ཡུལ་གཙོ་བོ་ནི། བོད་རྒྱ་མི་རིགས་བར་གྱི་ལོ་རྒྱུས་དང་རིག་གནས། ཆོས་ལུགས། འཚོ་བའི་གོམས་གཤིས་སོགས་ཕན་ཚུན་རྒྱུས་ལོན་ཡོང་བར་རོགས་ཕན་སྒྲུབ་རྒྱུ་དེ་ཡིན། ཅེས་དང་། དེ་སྔ་ཕྱི་སྡོད་རྒྱ་རིགས་རྣམས་ཀྱིས་བོད་ཀྱི་གནད་དོན་ཐད་རྣམ་འགྱུར་གྲང་མོ་ཞིག་བཟུང་ནས་བསྡད་ཡོད་པ་རེད། ངས་སྔོན་ཆད་ཚོགས་པའི་མགོ་ཁྲིད་ནས་བཙན་བྱོལ་བོད་གཞུང་གི་བསྟི་གནས་རྡ་རམ་ས་ལར་འཚམས་གཟིགས་ལ་བསྐྱོད་མྱོང་ཡོད་ལ། དེ་བཞིན་ཏཱ་ལའི་བླ་མ་མཆོག་གིས་ཀྱང་ཨོ་སི་ཁྲི་རུ་ཡར་ཆིབས་བསྒྱུར་གནང་ཐེངས་རེ་ལ་རྒྱ་རིགས་རྣམས་དང་ཐད་ཀར་བཀའ་མོལ་གནང་གིན་ཡོད་པ་རེད། དེ་ལྟའི་བཀའ་མོལ་གྱིས་ཕྱི་སྡོད་རྒྱ་རིགས་ཚོས་བོད་ཀྱི་གནད་དོན་རྒྱུས་ལོན་ཡོང་པར་རོགས་ཕན་ཆེན་པོ་འདུག་ཅེས་བརྗོད་ཡོད་པ་རེད།
ཡང་ཁོང་གིས་བརྗོད་དོན། སྔོན་ཆད་ཏཱ་ལའི་བླ་མ་མཆོག་གིས་རྒྱ་ནག་གཞུང་དང་བཀའ་མོལ་གྱི་ལམ་བུ་ཞིག་བཏོད་ཏེ་རྒྱ་ནག་དཔོན་རིགས་ཚོའི་བར་ཕན་ཚུན་བཀའ་མོལ་རིམ་པར་མཛད་ཡོད་པ་རེད།  ད་ལྟ་ཁོང་གིས་ལམ་གསར་བ་ཞིག་བཏོད་ཡོད་པ་རེད། ལམ་གསར་བ་དེ་ནི་རྒྱ་ནག་མི་དམངས་དང་ཐད་ཀར་འབྲེལ་མོལ་གནང་རྒྱུ་དེ་རེད། ང་རང་ངོས་ནས་ཀྱང་འདི་ནི་ཏཱ་ལའི་བླ་མཆོག་རྐང་པ་གཉིས་ལ་བརྟེན་དེ་མདུན་དུ་བསྐྱོད་ཐབས་ཀྱི་ཐབས་ལམ་ཞིག་ཏུ་ངོས་འཛིན་བྱེད་ཀྱིན་ཡོད། ཏཱ་ལའི་བླ་མ་མཆོག་གིས་ ༡༩༧༠ ལོ་ནས་བཟུང་བོད་རང་བཙན་བརྩོད་ཀྱིན་མེད་པ་དེ་ཡོངས་ཁྱབ་ཕྱིར་བསྒྲགས་གནང་ཡོད་པ་རེད། དེ་བས། བོད་རང་བཙན་ཞེས་པའི་གླེང་གཞི་འདི་ནི་རྒྱ་ནག་གཞུང་གིས་ཁོང་ལ་བསྙོན་འདོགས་བྱས་པ་ཞིག་དང་། དེ་བཞིན་རྒྱ་ནག་མི་དམངས་ལའང་བསླུ་བྲིད་མགོ་སྐོར་བཏང་བ་ཞིག་རེད། འདི་ནི་རྒྱ་ནག་གཞུང་གིས་མཐའ་གཅིག་ཏུ་རྒྱ་ནག་མི་དམངས་ལ་རྫུན་སྒྲོག་བྱེད་བཞིན་པའི་གླེང་གཞི་དེ་རེད། ཅེས་བརྗོད་ཡོད་པ་རེད།
དུས་རྒྱུན་རྒྱ་ནག་གཞུང་གིས་༧གོང་ས་མཆོག་གིས་བོད་རང་བཙན་འཐབ་བརྩོད་མཚམས་འཇོག་མྱོང་མེད་པའི་ཉེས་འདོགས་དང་། ༧གོང་ས་མཆོག་ཕྱིའི་རྒྱལ་ཁབ་ཁག་ཏུ་ཆིབས་བསྒྱུར་སྐབས་མཐའ་གཅིག་ཏུ་ངོ་རྒོལ་ཁ་རྡུང་གཏོང་བཞིན་ཡོད་པ་རེད། ཡིན་ནའང་། ཉེ་ཆར་རྒྱ་ནག་གཞུང་གིས་༧གོང་མཆོག་གི་ཨོ་སི་ཊོ་ལི་ཡའི་ཆིབས་བསྒྱུར་ཐད་སྐྱོན་བརྗོད་ཁ་རྡུང་ཅི་ཡང་བྱས་མེད་པ་རེད། ཡིན་ནའང་། ཨོ་སི་ཊཔ་ལི་ཡའི་སྲིད་བློན་ཁེ་བིན་རོ་ཌི་ཡིས་ཐེངས་འདིའི་གོང་ས་མཆོག་ཆིབས་བསྒྱུར་སྐབས་མཇལ་འཕྲད་གནང་གི་མིན་སྐོར་བརྗོད་ཡོད་པ་རེད།