ལ་དྭགས་ཁུལ་གྱི་མཱ་ཅིང་དགེ་རྒན་བོད་པ་ཚོ་རེད་ཟེར།

ཉེ་སྔོན་ངོས་རང་ལ་དྭགས་ལ་ཕྱིན་སྐབས་ལ་དྭགས་བློན་ཆེན་དང་སྐད་ཆ་བྱུང་། ཁྱེད་ཚོའི་ལ་དྭགས་ནང་ཆང་འཐུང་མཁན་ག་ཚོད་ཡོད་པ་རེད་ཅེས་དྲིས་སྐབས། ཞེ་དྲག་ཉུང་དུ་ཕྱིན་ཡོད་ཟེར། འོན་ཀྱང་། དེང་སིང་མཱ་ཅིང་རྩེད་མཁན་ཡོང་གིན་འདུག དེ་ནི་བོད་པ་ཚོས་བསླབས་སོང་ཟེར། ངོས་དེའི་སྐོར་བཤད་ཡོད་ལ། ཉེ་ཆར་ཨ་རི་ནས་ཀྱང་བཤད་པ་ཡིན། དངུལ་ཏོག་ཙམ་ཡོད་ན་སྤྱི་བར་ཕན་པ་ཞིག་དང་། སྤྱི་ཚོགས་ཡར་རྒྱས་ལ་ཕན་ས་ཞིག་ཏུ་གཏོང་རྒྱུ་ལས་རྒྱན་འཛུགས་ཤོ་རྒྱག་སོགས་བྱས་ན་འཕྲོ་བརླག་རེད། ཅེས་༧གོང་ས་མཆོག་གིས་གསུངས་ཡོད།

ཕྱི་ཚེས་ ༡༡ ཉིན་གྱི་ཕྱི་དྲོ་༧གོང་ས་མཆོག་གིས་མོན་རྟ་དབང་ཁུལ་གྱི་ཉིན་གྲངས་གསུམ་རིང་གི་གསུང་ཆོས་ལེགས་པར་གྲུབ་རྗེས་མི་དམངས་ལ་བླང་དོར་གྱི་བཀའ་སློབ་བསྩལ་ཡོད། སྐབས་དེར་༧གོང་ས་མཆོག་གིས་སོ་སོའི་ཆོས་ལུགས་རིག་གཞུང་སྲུང་སྐྱོབ་དང་གནའ་དེང་གི་ཤེས་བྱ་ཟུང་འབྲེལ་ཐོག་སློབ་གཉེར་གནང་དགོས་སྐོར། མང་ཚོགས་ཀྱི་འཕྲོད་བསྟེན། ཁོར་ཡུག་སྲུང་སྐྱོབ། སྤྱི་ཚོགས་འཆམ་མཐུན་བཅས་གནང་དགོས་ཚུལ་བཀའ་གནང་དོན། ཁྱེད་རང་ཚོས་ངོས་ལ་དྲན་རྟེན་ཞིག་གསོལ་རས་སུ་གནང་བ་དང་རིག་གཞུང་འཁྲབ་སྟོན་བྱེད་ཀྱིན་ཡོད་པ་རེད། གོ་སྒྲིག་འདི་ལྟར་གནང་བར་ཞེ་དྲག་དགའ་བོ་བྱུང་། ཐུགས་རྗེ་ཞུ་རྒྱུ་ཡིན། ཉིན་གསུམ་རིང་ཆོས་འབྲེལ་བྱེད་པའི་གོ་སྐབས་བྱུང་བ་རེད། ངོས་རང་ནམ་རྒྱུན་ས་ཆ་གང་དུ་ཕྱིན་པ་ཡིན་ནའང་ནང་ཆོས་ཀྱི་བྱིན་རླབས་བྱེད་པ་དང་དབང་བསྐུར་བ་སོགས་བྱེད་ཀྱིན་ཡོད་མོད། གཙོ་བོ་ནང་ཆོས་ངོ་སྤྲོད་བྱ་རྒྱུ་གལ་ཆེན་དུ་རྩི་བཞིན་ཡོད། ད་རེབ་འདིར་ཡང་ནང་ཆོས་ངོ་སྤྲོད་བྱེད་པའི་གོ་སྐབས་ཤིག་བྱུང་བ་རེད། ངོས་རང་དགའ་བོ་ཞེ་དྲག་བྱུང་ལ། ཁྱེད་རང་ཚོ་ལའང་ཕན་ཐོགས་ཕྲན་བུ་ཡོང་བའི་རེ་བ་ཡོད། ཅེས་དང་།

ཡུལ་ལུང་གང་ཞིག་ཡིན་ནའང་རང་རང་སོ་སོར་ལོ་རྒྱུས་ཐོག་ནས་གོམས་གཤིས་དང་རིག་གཞུང་། ཆོས་སོགས་ཡོད། ཕ་མེས་ནས་ཡོད་པའི་རིག་གཞུང་དེ་དག་ཡུལ་དེའི་མི་མང་ལ་རང་བཞིན་གྱིས་འབྲེལ་བ་ཡོད་པ་ཞིག་ཡིན། ཧི་མ་ལ་ཡའི་རི་རྒྱུད་ལ་ཆ་བཞག་ན། སྔར་རྒྱ་གར་ནས་བོད་དུ་ཆོས་དར་བ་རེད་དེ། རིམ་པས་བོད་ནས་ཚུར་ཧི་མ་ལ་ཡའི་རི་རྒྱུད་དུ་བོད་ཀྱི་བཀའ་འགྱུར་བསྟན་འགྱུར་རྩ་བར་བཞག་པའི་སངས་རྒྱས་ཀྱི་ཆོས་དར་གྱིན་ཡོད། ཧི་མ་ལ་ཡའི་རི་རྒྱུད་ཀྱི་ཕ་མེས་ཀྱི་རིག་གཞུང་གོམས་གཤིས། ཆོས་དད་སོགས་སངས་རྒྱས་པའི་ཆོས་དང་འབྲེལ་ཡོད། སྤྱི་ཚོགས་དེ་ནང་པར་ཆོས་དད་ཅན་གྱི་སྤྱི་ཚོགས་ཤིག་ཆགས་ཡོད། ཧི་མ་ལ་ཡའི་རི་རྒྱུད་ནས་སོ་སོའི་རྣམ་པ་མཚོན་བྱེད་དེ་སངས་རྒྱས་པའི་ཆོས་དེ་ཆགས་ཡོད་སྟབས། སོ་སོའི་ཕ་མེས་ཀྱི་ཆོས་དེ་ལ་བདག་པོ་རྒྱག་རྒྱུ་གལ་ཆེན་པོ་རེད། ངོས་ནམ་རྒྱུན་ཁ་ཆེ་ཆོས་པ་ཚོས་ཁ་ཆེ་ཆོས་བྱ་དགོས་ལ། ཡི་ཤུ་ཆོས་པ་ཚོས་ཡི་ཤུ་ཆོས་བྱ་དགོས། ཆོས་ལུགས་བརྗེ་ན་དགོས་པ་ཡོད་པ་མ་རེད་ཟེར་གྱིན་ཡོད། ཅེས་དང་།

ངོས་རང་འདིར་ཐད་ཀར་འགན་ཡོད་པ་ཞིག་མ་རེད་དེ། ཁྱེད་རང་ཚང་མས་དད་པ་དང་དམ་ཚིག་གཅིག་ཏུ་གཏད་ཡོད་སྟབས། ངོས་ལའང་སེམས་འཁུར་ཞིག་སླེབས་ཀྱིན་ཡོད། དེ་གཞིར་བཟུང་གིས་ཁྱེད་རང་ཚོར་རེ་འདུན་ཞུ་རྒྱུ་ནི། ཕྱི་དངོས་པོའི་ཐོག་ནས་འཛམ་གླིང་སྤྱི་ཡར་རྒྱས་སུ་འགྲོ་བཞིན་ཡོད་ལ། རྟ་དབང་ཁུལ་ཡང་ཡར་རྒྱས་འགྲོ་མུས་རེད། དངོས་པོ་ཡར་རྒྱས་དང་ལྷན་དུ་ནང་གི་ཤེས་བྱ་ཡོན་ཏན་དེ་ཞེ་དྲག་གལ་ཆེན་པོ་རེད། ཤེས་ཡོན་རིགས་གཉིས་རེད། དེང་དུས་ཀྱི་ཤེས་ཡོན་གལ་ཆེན་པོ་རེད། དེང་དུས་ཀྱི་ཤེས་ཡོན་མེད་ན། དུས་རབས་གསར་བའི་མི་རབས་ནང་དུ་འཚུད་གི་མ་རེད། དེ་དང་ཆབས་གཅིག་དེང་དུས་ཀྱི་ཤེས་ཡོན་དེ་ཕྱི་དངོས་པོའི་ཡར་རྒྱས་དང་འབྲེལ་བ་ཙམ་རེད། ནང་བསམ་བློའི་བདེ་སྐྱིད་བསྒྲུབ་རྒྱུར་འབྲེལ་བ་ཞེ་དྲག་མེད། དེང་སང་ནུབ་ཕྱོགས་ཀྱི་ཕྱིའི་དངོས་པོ་ཡར་རྒྱས་ཆེ་བའི་རྒྱལ་ཁབ་དག་ཏུ་གནས་ཚུལ་དེ་གསལ་བོ་ཆགས་ཡོང་གིན་ཡོད། དེར་བརྟེན། ང་ཚོ་ཧི་མ་ལ་ཡའི་རི་རྒྱུད་ཀྱི་ནང་པའི་སྤྱི་ཚོགས་ནང་། དེང་གི་ཤེས་ཡོན་དང་ཆབས་གཅིག་སོ་སོ་ལ་ཕ་མེས་ནས་ཡོད་པའི་སངས་རྒྱས་ཆོས་ལ་སློབ་སྦྱོང་བྱ་རྒྱུ་གལ་ཆེན་པོ་རེད། ཅེས་གསུངས་བྱུང་།

ཁོང་གིས་མུ་མཐུད་དུ་ནང་ཆོས་སྦྱོང་བར་བོད་ཡིག་གལ་ཆེན་ཡིན་སྐོར་གསུངས་དོན། སངས་རྒྱས་ཀྱི་ཆོས་གོ་བརྡ་འཕྲོད་བྱེད་ཀྱི་སྐད་ཡིག་ཡག་ཤོས་དེ་བོད་ཡིག་ཆགས་ཡོད། དཔེར་ན། སོག་པོར་ཆ་བཞག་ན། སོ་སོར་སོག་སྐད་ཡོད་ལ། སོག་ཡིག་ཀྱང་ཡོད་མོད། བོད་ནས་དར་བའི་སངས་རྒྱས་པའི་ཆོས་སློབ་སྦྱོང་བྱེད་པར་བོད་ཡིག་ཐོག་ནས་སྤྱོང་གིན་ཡོད། བོད་ཀྱི་ནང་ཆོས་ཐོག་ལ་ཧ་ལས་པའི་མཁས་པ་བྱུང་ཞིང་། ལེགས་བཤད་བརྩམས་བཞག་པ་མང་པོ་འདུག དེ་དཔེ་མཚོན་ཞིག་རེད། བཀའ་འགྱུར་བསྟན་འགྱུར་རྩ་བར་བཞག་པའི་ནང་ཆོས་ཡག་པོ་ཞིག་བསླབ་པར་བོད་སྐད་དེ་གལ་ཆེ་ཤོས་རེད། མིང་ལ་ག་རེ་བཏགས་ཀྱང་ཁྱད་པར་མེད། དོན་ལ་བཀའ་འགྱུར་བསྟན་འགྱུར་གྱི་ཡི་གེ་ཤེས་དགོས་པ་དེ་གནད་འགག་རེད། འཛམ་གླིང་ཤར་ཕྱོགས་སུ་སངས་རྒྱས་ཆོས་བྱེད་པའི་ཡུལ་གྲུ་མང་པོ་ཡོད། འོན་ཀྱང་། ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་དང་། བཤད་པ་དང་སྒྲུབ་པ་ཟུང་འབྲེལ་གྱི་ཐོག་ནས་ཉམས་ལེན་བྱ་རྒྱུ་ཡོད་པ། དེ་འདྲའི་བསྟན་པ་དེ་བོད་གངས་ཅན་པའི་ཆོས་བརྒྱུད་མ་གཏོགས་མེད། ངོང་རང་ལུང་པ་མང་པོར་ཕྱིན་པ་ཡིན། ང་ཚོ་བོད་པར་བོད་ཡིག་ཅིག་ཡོད་པ་དང་། བོད་ཡིག་གི་ཐོག་ནས་སངས་རྒྱས་ཀྱི་བསྟན་པར་འགྲེལ་བཤད་ཆ་ཚང་ཡོད་པ་མཐོང་ཡོང་དུས། སོ་སོའི་ཕ་མེས་ཀྱི་གཅེས་ནོར་ལ་རིན་ཐང་ཡོད་པ་མཐོང་གིན་འདུག དེ་སྙན་ངག་གི་རབ་བཏགས་མ་རེད་དངོས་ཡོད་གནས་ཚུལ་རེད། ཅེས་བསྟན་བྱུང་།

༧གོང་ས་མཆོག་གིས་མོན་པ་གཙོས་པའི་ཧི་མ་ལ་ཡའི་རི་རྒྱུད་ཁུལ་གྱིས་ཁོར་ཡུག་སྲུང་སྐྱོབ་ལ་དོ་གལ་གནང་དགོས་སྐོར་གསུངས་དོན། དེ་ནས་ངོས་ཁོར་ཡུག་སྐོར་ལ་སྐད་ཆ་ཞིག་བཤད་ན་བསམ་སོང་། དེང་སང་འཛམ་གླིང་ཁྱོན་ཡོངས་ཀྱི་ཚ་དྲོད་འཕར་གྱིན་ཡོད། དེའི་དབང་གིས་གནམ་གཤིས་ཀྱི་འགྱུར་བ་ཡོང་གིན་ཡོད། ཧི་མ་ལ་ཡའི་རི་རྒྱུད་དེ་ཧ་ཅང་གི་གལ་ཆེན་པོ་ཆགས་ཡོད། ཧི་མ་ལའི་རི་རྒྱུད་ཀྱི་ཁོར་ཡུག་སྲུང་སྐྱོབ་ཐད་དམིགས་བསལ་ཐུགས་ཁུར་བཞེས་མཁན་གྲོགས་པོ་རྒྱ་གར་བ་ཞིག་གིས་ངོས་ལ་ལས་འགན་ཞིག་བསྐུར་སོང་། ངོས་རང་ཧི་མ་ལ་ཡའི་རི་རྒྱུད་ཀྱི་ས་ཁུལ་གང་ལ་ཕྱིན་ཡང་། ཁོར་ཡུག་སྲུང་སྐྱོབ་སྐོར་བཤད་རོགས་ཟེར། ངོས་ཀྱང་དེ་དེ་བཞིན་དུ་བྱའོ་ཞེས་ཁས་ལེན་བྱས་ཡོད། ཁོར་ཡུག་སྲུང་སྐྱོབ་ཟེར་བ་དེ་ཚོགས་པ་གཅིག་གིས་བྱ་དགོས་པའི་སྐད་ཆ་མ་རེད། ཚོགས་པས་མང་ཚོགས་ལ་འབོད་སྐུལ་ཞུས་ཏེ། མང་ཚོགས་ཚང་མར་ཁོར་ཡུག་སྲུང་སྐྱོབ་ཀྱི་འགན་ཡོད་པ་ངོ་ཤེས་སུ་འཇུག་དགོས། གལ་སྲིད་ཤིང་གཅོད་འབྲེག་བྱ་དགོས་ན། དེ་དང་མཉམ་དུ་ཤིང་གསར་པ་འཛུགས་རྒྱུ་གནད་འགག་རེད། དེ་བཞིན། དེང་སྐབས་འགྱུག་ཤོག་གི་སྣོད་མང་པོ་ཡོང་གིན་ཡོད། དེ་དག་གིས་ཁོར་ཡུག་ལ་གནོད་ཚབས་ཆེན་པོ་ཡོད་པ་རེད། གང་བྱུང་དུ་མི་གཡུག་པར་རུབ་རུབ་བཟོས་ཏེ། ཇི་ལྟར་བདག་པོ་རྒྱག་དགོས་ན་དེ་ལྟར་བྱ་རྒྱུ་གལ་ཆེན་ཡིན།  ཞེས་དང་།

གོ་ཐོས་ལྟར་ན། སྔོན་མ་ས་ཞིང་ཡོད་པ་ཚོས་དེང་སྐབས་ས་ཞིང་ལ་དོ་སྣང་དེ་ཙམ་མེད་པར་ས་ཞིང་སྟོང་བར་ལྷག་གིན་ཡོད་པའི་སྐད་ཆ་འདུག ས་ཞིང་ཟེར་བ་དེ་ནོར་བུ་རེད། མི་ལ་འཕྲུལ་ཆས་རིགས་གལ་ཆེན་ཡིན་ཡང་མཐར་གཏུགས་ན། ཉིན་རེའི་ཟ་མ་གལ་ཆེ་ཤོས་རེད། བསྐལ་བ་ཐོག་མར་ཆགས་པ་ནས་ང་ཚོ་འབྲུ་རིགས་ལ་བསྟེན་པ་རེད་ལ། མ་འོངས་པར་ཡང་ཇི་སྲིད་མིའི་རིགས་གནས་པ་དེ་སྲིད་དུ་འབྲུ་རིགས་ལ་བསྟེན་དགོས་པ་རེད།  ས་ཞིང་ཡོད་མཁན་ཚོས་བདག་པོ་རྒྱག་རྒྱུ་གལ་ཆེན་པོ་རེད། དེ་མིན་ན། བརླན་གཤེར་དང་ས་བབ་དྲོ་གྲང་སོགས་ལ་གཞིགས་ཏེ། སྔོ་ཚལ་དང་ཤིང་ཏོག སྨན་རིགས་སོགས་གང་སྐྱེ་པར་ཉམས་ཞིབ་བྱ་དགོས་པ་རེད། དཔེར་ན། མ་ནཱ་ལི་ས་ཁུལ་གྱི་ཀུ་ཤུ་དེ་དག་སྔོན་མ་ནས་ཡོད་པ་ཞིག་མ་རེད། དུས་རབས་ཉི་ཤུ་བའི་མགོ་སྟོད་དུ་ཨ་རིའི་མི་ཞིག་དེར་ཡོང་སྟེ། ཀུ་ཤུ་འཛུགས་པའི་སྲོལ་ཐོག་མར་བཏོད་པ་རེད། དེང་སྐབས་སིམ་ལ་ས་ཁུལ་དང་མ་ནཱ་ལའི་ས་ཁུལ་ནས་ཀུ་ཤུ་ཞེ་དྲག་ཡོང་གིན་འདུག གང་ལྟར་ས་ཞིང་སྟོང་པར་མི་འཇོག་པར་ཐབས་ཤེས་བྱ་དགོས་པ་རེད། ཅེས་གསུངས་བྱུང་།

མཐར་ཁོང་གིས་མང་ཚོགས་ཀྱི་འཕྲོད་བསྟེན་དང་མང་ཚོགས་འཆམ་མཐུན་སྐོར་ལ་བཀའ་བསྩལ་དོན། དེ་ནས་འཕྲོད་བསྟེན་སྐོར་ལ་སྐད་ཆ་ཞིག་བཤད་ན་བསམ་སོང་། ཁྱེད་ཚོ་མོན་པའི་ཕོ་གསར་མོ་གསར་ཚོ་དཀར་མདངས་དམར་མདངས་་ཡག་པོ་འདུག འཕྲོད་བསྟེན་ཡག་པོ་ཡོད་ས་རེད། སྤྱིར་ང་ཚོས་ཚེ་དབང་དང་ཚེ་སྒྲུབ་སོགས་བྱེད་ཀྱིན་ཡོད་མོད། ཚེ་རིང་པོ་ཡོང་བའི་ནུས་པ་ཆེ་ཤོས་འཕྲོད་བསྟེན་རེད། ཆང་དང་ཨ་རག་ཚོད་མེད་འཐུང་ན། གཟུགས་པོར་ཞེ་དྲག་གནོད་གི་རེད། ཨ་རག་འཐུང་རྒྱུ་མང་དྲགས་ཏེ་མཆིན་པའི་ནད་ཚ་ཡོད་མཁན་ངོ་ཤེས་པ་དེ་འདྲ་ཡོད། ངོས་ཁོང་ཚོར་མཆིན་པའི་ནད་ཚ་སོ་སོས་བཟོས་པ་རེད་ཟེར་གྱིན་ཡོད། དེ་བཞིན་གསར་བརྗེ་ཡིན་པའི་ཁུལ་གྱིས་ཐ་མག་འཐེན་ན་ནོར་འཁྲུལ་རེད། དེང་སྐབས་ནུབ་ཕྱོགས་རྒྱལ་ཁབ་ཁག་ཏུ་ཐ་ནག་གི་གནོད་སྐྱོན་མང་པོ་བཤད་ཀྱིན་ཡོད། དེ་ཚོ་དང་པོ་ནས་མ་གོམས་པ་དང་ངན་ལངས་ལ་མ་ཤོར་བ་བྱ་རྒྱུ་གལ་ཆེན་པོ་རེད། ཅེས་དང་།

ཁྱེད་རང་ཡུལ་མི་ཚང་མ་འཆམ་པོ་བྱོས། ཚང་མས་རྒྱ་ཆེ་ས་དང་ཕུགས་རྒྱང་རིང་ས་ནས་བསམ་བློ་བཏང་སྟེ། སྲིད་འབྱོར་རིག་གསུམ་ཚང་མ་ཡག་པོ་ཡོང་ཐུབ་པར་བསམ་བློ་གཏོང་དགོས། མངའ་སྡེ་བློན་ཆེན་ལ་ཆ་བཞག་ན་ངོས་ཀྱི་གྲོགས་པོ་ཞེ་དྲག་ཡག་པོ་ཡིན། ཁོང་གིས་འཁུར་ཞེ་དྲག་གནང་གིན་འདུག དེས་མཚོན་པའི་ཆབ་སྲིད་ཀྱི་ལས་ཀ་བྱེད་མཁན་ཡིན་ནའང་འདྲ་ལ། འཛིན་སྐྱོང་གི་ལས་ཀ་བྱེད་མཁན་ཚོ་ཡིན་ནའང་འདྲ། ཚང་མས་ཧུར་ཐག་གནང་རོགས་ཞུ་རྒྱུ་ཡིན། དྲང་པོ་དྲང་བཞག་བྱ་རྒྱུ་གལ་ཆེན་པོ་རེད། སྐབས་རེར་མངའ་སྡེ་ཚོར་དངུལ་འབེལ་བོ་ཆགས་ཡོང་དུས། ལྐོག་ཟ་རུལ་སུངས་བྱེད་མཁན་ཡོང་མི་སྲིད་པ་མ་རེད། གཞན་དེང་སྐབས་རྒྱན་འཛུགས་མཁན་དར་ཡོང་གིན་འདུག་ཟེར། ཉེ་སྔོན་ངོས་ལ་དྭགས་ལ་ཕྱིན་སྐབས། ལ་དྭགས་བློན་ཆེན་དང་སྐད་ཆ་བྱུང་། ཁྱེད་ཚོའི་ལ་དྭགས་ནང་ཆང་འཐུང་མཁན་ག་ཚོད་ཡོད་པ་རེད་ཅེས་དྲིས་སྐབས་ཞེ་དྲག་ཉུང་དུ་ཕྱིན་ཡོད་པ་རེད་ཟེར། འོན་ཀྱང་། དེང་སང་མཱ་ཅིང་རྩེད་མཁན་ཡོང་གིན་འདུག དེ་བོད་པ་ཚོས་བསླབས་སོང་ཟེར། ངོས་དེའི་སྐོར་བཤད་ཡོད་ལ། ཉེ་ཆར་ཨ་རི་ནས་ཀྱང་བཤད་པ་ཡིན། དངུལ་ཏོག་ཙམ་ཡོད་ན་མུ་མཐུད་སྤྱི་བར་ཕན་པ་ཞིག་དང་། སྤྱི་ཚོགས་ཡར་རྒྱས་ལ་ཕན་ས་ཞིག་ཏུ་གཏོང་རྒྱུ་ལས་རྒྱན་འཛུགས་ཤོ་རྒྱག་སོགས་བྱས་ན་འཕྲོ་བརླག་རེད། རྒྱ་གར་དབུས་གཞུང་གིས་དངུལ་འབོར་ཆེན་སྤྲོད་ཀྱིན་ཡོད་མོད། དེ་ནི་རྒྱ་གར་མི་དམངས་དུང་ཕྱུར་གཅིག་ལྷག་གི་ཁྲག་དང་རྔུལ་ནས་བྱུང་བ་རེད། གནམ་ནས་བབ་པ་མ་རེད། དེ་འདྲའི་དངུལ་དེ་གང་བྱུང་འཕྲོ་བརླག་ཏུ་བཏང་ན་ཡག་པོ་མ་རེད། ངོས་བཤད་པ་དེ་དག་ཇུས་གཏོགས་ཚ་དྲགས་ན་དགོངས་དག་ཞུ་རྒྱུ་ཡིན། ཞེས་གསུངས་བྱུང་།

༼ གསར་འགོད་པ་དོན་འགྲུབ་བཀྲ་ཤིས་ཀྱིས་མོན་རྟ་དབང་ནས་སྤེལ ༽