དེ་རིང་ཞོགས་པའི་ཆུ་ཚོད་ ༨ དང་ཕྱེད་ཀའི་ཐོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་ནས་ཆིབས་ཐོན་གྱིས་རྟ་དབང་རྫོང་གི་ཁྲོམ་རྭ་རྙིང་བའི་དཀྱིལ་དུ་ལྷ་ཁང་གསར་པ་ཞིག་ཡོད་པ་དེར་ཞབས་སོར་བཀོད་ཡོད་པ་དང་། དེའི་རྗེས་རྟ་དབང་འཇམ་དབྱངས་དྭ་ཕྲུག་གཅེས་སྐྱོང་ཁང་དང་ཁྱི་མེད་དགོན་པ། སེར་བྱེས་ཡན་ལག་དགོན་འཇམ་དབྱངས་ཆོས་འཁོར་གླིང་བཅས་སུ་ཕེབས་ཏེ་རབ་གནས་ཐུགས་སྨོན་མཛད་ཅིང་། འབྲེལ་ཡོད་ལས་སྣེ་རྣམ་པར་མཇལ་ཁ་གནང་ཡོད། ཉིན་རྒྱབ་ཆུ་ཚོད་ ༡ ཡས་མས་སུ་མོན་རྟ་དབང་གི་ཉིན་ལྔའི་རིང་གི་མཛད་འཕྲིན་ཡོངས་ལེགས་པར་འགྲུབ་པར་མཛད་དེ། རྟ་དབང་ནས་གནམ་གྲུ་བརྒྱུད་དེ། སྡེ་རཱེང་ཞེས་པར་ཆིབས་ཐོན་གནང་འཆར་ཡོད་འདུག
ཐེངས་འདིར་༧གོང་ས་མཆོག་གིས་ཕྱི་ཚེས་ ༨ ཉིན་མོན་རྟ་དབང་དགོན་པའི་འགྲེམས་སྟོན་ཁང་དང་སློབ་གྲྭའི་དཔེ་མཛོད་ཁང་སྒོ་འབྱེད་དང་། ཚེས་ ༩ ཉིན་མཁའ་འགྲོ་འགྲོ་བ་བཟང་མོའི་སྨན་ཁང་སྒོ་འབྱེད། ཉིན་དེའི་ལྷ་བབ་དུས་ཆེན་དང་བསྟུན་ཏེ། ཉིན་གསུམ་རིང་གི་རྟེན་འབྲེལ་བསྟོད་པ་དང་ཐོག་མཐའ་མ། སྤྱན་རས་གཟིགས་ཀྱི་བཀའ་དབང་སོགས་ཀྱི་གསུང་ཆོས་གནང་ཡོད་ལ། ཚེས་ ༡༡ ཉིན་གྱི་ཞོགས་པར་མི་མང་ལ་ཚེ་དབང་གནང་གྲུབ་རྗེས། མོན་རྟ་དབང་གཙོས་པའི་ཧི་མ་ལ་ཡའི་རི་རྒྱུད་ཀྱི་ནང་པ་ཐུན་མོང་གིས་༧གོང་ས་མཆོག་ལ་བརྟན་བཞུགས་གཟབ་རྒྱས་ཤིག་བསྟར་འབུལ་ཞུས་ཡོད། ཉིན་གོང་ཆུ་ཚོད་དང་པོར་༧རྒྱལ་དབང་དྲུག་པ་རིག་འཛིན་ཚངས་དབྱངས་རྒྱ་མཚོའི་འཁྲུངས་ཡུལ་ཨོ་རྒྱན་གླིང་དགོན་པར་ཞབས་སོར་བཀོད་དེ། ཚངས་དབྱངས་རྒྱ་མཚོའི་གཞིས་ཁྱིམ་གྱི་ཤུལ་དུ་ལྷ་ཁང་ཞིག་ཡོད་པ་དེར་ཐུགས་སྨོན་མཛད་ཅིང་། ཉེ་འཁྲིས་སུ་ཚངས་དབྱངས་རྒྱ་མཚོ་སྐུ་ཆུང་ངུའི་དུས་སུ་སྐུ་རྩེད་གནང་ཡུལ་རྡོ་ཕ་བོང་ཆེན་པོ་ཞིག་ཡོད་ས་དེར་རྟ་དབང་འཇམ་དབྱངས་དྭ་ཕྲུག་གཅེས་སྐྱོང་ཁང་གིས་མཆོད་རྟེན་གསར་བ་ཞིག་བཞེངས་འཆར་ཡོད་པའི་ས་ཆར་རབ་གནས་མཛད་ཡོད།
ཉིན་རྒྱབ་བསླར་ཡང་གསུང་ཆོས་ར་བར་ཞབས་སོར་བཀོད་དེ། མོན་རྟ་དབང་མི་མང་གིས་༧གོང་ས་མཆོག་མོན་ཡུལ་དུ་ཡང་ཡང་ཞབས་སོར་བཀོད་པའི་བཀའ་དྲིན་རྗེས་དྲན་མཚོན་པའི་ཕྱག་རྟགས་ཤིག་ཕུལ་ཡོད་ཅིང་། དེ་དང་མཉམ་དུ་༧གོང་ས་མཆོག་གིས་མོན་རྟ་དབང་མི་མང་གཙོས་པའི་ཆོས་ཞུ་བ་ཡོངས་ལ་བླང་དོར་གྱི་བཀའ་སློབ་ཟབ་མོ་གནང་ཡོད། དེའི་རྗེས་མོན་རྟ་དབང་གི་ས་གནས་སོ་སོ་ནས་རང་རང་གི་ཁྱད་ཆོས་མཚོན་པའི་གླུ་གར་དང་ཞབས་བྲོ་སོགས་རིག་གཞུང་འཁྲབ་སྟོན་བྱས་ཤིང་། རྟ་དབང་རྫོང་གི་རྫོང་དཔོན་མཆོག་གིས་ཐེངས་འདིར་༧རྒྱལ་བ་ཡིད་བཞིན་ནོར་བུ་མཆོག་དཀའ་ངལ་དང་གཞན་གྱི་གནོན་ཤུགས་ལ་མ་འཛེམས་པར། མོན་རྟ་དབང་ཁུལ་དུ་ཆིབས་སྒྱུར་བསྐྱངས་ཏེ་མི་དམངས་ལ་ཆོས་ཀྱི་བདུད་རྩི་བསྩལ་བར་ཐུགས་རྗེ་ལེགས་གསོལ་དང་། ད་དུང་མ་འོངས་པར་ཡང་ནས་བསྐྱར་དུ་ཕེབས་རྒྱུར་ཐུགས་རྗེ་བཀའ་དྲིན་བསྐྱང་རྒྱུའི་སྐྱབས་འཇུག་ནན་གྱིས་ཞུས་སོང་།
དུས་བབ་གསར་འགོད་པས་དཀའ་བ་ཁྱད་བསད་ཀྱིས་གསར་འགྱུར་དུས་ཐོག་བཏོན་པར་བཀའ་དྲིན་ཞུ།།
ཇི་སྐད་དུ་རྒྱལ་ཚབ་ར་སྒྲེང་རིན་པོ་ཆེའི་ཞལ་སྔ་ནས།
མགོན་མེད་གངས་ཅན་ཞིང་འདིའི་འགྲོ་བ་རྣམས།།
ཇི་སྲིད་འཁོར་བའི་ཕྱི་མཐའ་མ་རྫོགས་པ།།
དེ་སྲིད་མཚུངས་པ་མེད་པའི་གསང་གསུམ་གྱིས།།
སྡེ་བཞིའི་དཔལ་ལ་སྦྱོར་བཞིན་བརྟན་པར་བཞུགས།།
ཉམ་ཐག་སྨག་རུམ་འཐིབས་པའི་གངས་ཅན་འདིར།།
མགོན་ཁྱོད་ཐུགས་རྗེའི་སྒྲོན་མེ་འབར་བའི་གཟིས།།
ཕན་དང་བདེ་བའི་སྣང་བ་འགྱེད་བཞིན་དུ།།
སྲིད་ཞིའི་བར་དུ་མི་གཡོ་རྟག་བརྟན་ཤོག།
ཞེས་གསུངས་པ་དང།
རྫོང་སར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་པའི་ཞལ་སྔ་ནས།
སྲིད་པ་གསུམ་ན་ངོ་མཚར་ཟླ་མེད་པ།།
ཨུ་དམ་ཝཱ་ར་ལྟར་འཕགས་ཐམས་ཅད་མཁྱེན།།
འཛམ་གླིང་བསྟན་འགྲོ་ཡོངས་ཀྱི་གཙུག་ནོར་ཆེ།།
རྒྱལ་མཆོག་ཕྱག་ན་པདྨོ་ཞབས་བརྟན་ཤོག།
ཅེས་གསུངས་པ་ལྟར་འགྲུབ་པར་སྨོན།
མཐའ་མེད་པའི་མཛད་འཕྲིན་ལེགས་གྲུབ་ཡོངས་བའི་སྨོན་འདུན་ཞུ།
གསར་འགོད་པ་དོན་གྲུབ་བཀྲ་ཤིས་ལགས། སྐུ་ཉིད་ནས་ངལ་བ་འཛེམས་མེད་ཀྱིས་སྐུ་ལས་བསྐྱོན་ཏེ་གསར་འགྱུར་དུས་ཐོག་ཏུ་གཏོང་ཐུབ་པར་ཡི་རང་ཞུ་གི་ཡོད། མ་ཟད་རེ་བ་ཆུང་ཆུང་ཞིག་ཡོད་པ་ནི་སྐུ་ཉིད་ནས་བཏང་གནང་བའི་གསར་འགྱུར་གྱི་དག་ཆར་དུས་ཚོད་མང་ཙམ་བཏང་སྟེ་སྤུས་ཀ་ལེགས་སུ་གཏོང་ཐུབ་ཚེ་གང་མིན་ཚད་ཀྱི་ཡག་པོ་ཡོང་བ་འདུག་གོ། ཐུགས་རྗེ་ཆེ། སྐུ་ཉིད་ལ་བཅོས་མིན་གྱི་བཀྲ་ཤིས་བདེ་ལེགས་ཞུ༎