བློ་བཟང་གིས་རྒན་པོ་ཚེ་རིང་དོན་འགྲུབ་ཀྱི་གྲོགས་པོ་ཞིག་གི་ཁང་བ་ཞིག་གོ་སྒྲིག་བྱས་ཡོད་པ་དེའི་ནང་དུ་ལྷོད་ལྷོད་བྱས་ནས་བརྙན་འཕྲིན་ཞིག་ལ་ལྟ་བཞིན་པའི་སྐབས་སུ། མི་ཞིག་གིས་སྒོ་ཕྱེ་ནས་ནང་དུ་སླེབས། དེ་ནི་རྒན་པོ་ཚེ་རིང་དོན་འགྲུབ་ཚང་གི་ཟ་ཁང་ནང་གི་ལས་ཀ་བ་བུད་མེད་ཅིག་ཡོད་པ་དེ་ཡིན་པ་དང་། ཁོ་མོས་བློ་བཟང་ལ། འདི་ཁྱེད་རང་གི་དགོང་ཟས་རེད། ཨ་ཅེ་འཚོ་མོ་དང་ཨ་རྒ་ཚེ་རིང་དོན་འགྲུབ་གཉིས་ཀྱིས་ཁྱེད་རང་ལ་བསྐྱལ་དུ་བསྔགས་སོང་ཞེས་བཤད་ཀྱིན། རང་གི་ལག་ནང་གི་ཧུབ་རིང་དཀར་ཡོལ་ཆེན་པོ་དེ་ཁོ་རང་གི་འཁྲིས་སུ་བཞག
བུད་མེད་དེས་སང་ཞོགས་ག་དུས་ཤིག་ལ་ཁྱེད་རང་ལ་ཞོགས་ཇ་འཁུར་ནས་ཡོང་ན་འགྲིག་མིན་ཞིག་སྐད་ཆ་དྲིས་ཤོག་ཟེར། བློ་བཟང་གིས་འཁང་ཆུང་གིས་ཚུལ་དང་བཅས། ད་ཁྱེད་ཚོ་ལ་དངོས་ནས་དཀའ་ལས་ཁག་པོ་བཟོ་བཞིན་འདུག ཁྱེད་ཚོས་གྲྭ་སྒྲིག་ཚང་མ་ཚར་ནས་ང་རང་ལ་ཞོགས་ཇ་འཁུར་ནས་ཡོང་བ་ཡིན་ན་འགྲིག་གི་འདུག་ཟེར་ནས་ཁོང་གཉིས་ལ་ཞུ་རོགས། ཁྱེད་རང་ལ་ཐུགས་རྗེ་ཆེ།
བུད་མེད་དེས། ཨོ་རེད། ཨ་རྒ་ཚེ་རིང་དོན་འགྲུབ་ཁོ་རང་གཅིག་བྱས་ན་དོ་ནུབ་ཁྱེད་རང་ཡོད་སར་ཡོང་ངེས་ཡིན་ཟེར་ནས་ཤོད། དགོས་རྒྱུ་འདྲ་ཡོད་ན་ཁོ་རང་གི་དེ་དུས་འཁུར་ནས་ཡོང་ཟེར་ནས་བཤད་སོང་།
བློ་བཟང་གིས་ཐུགས་རྗེ་ཆེ་ཟེར་ནས་བཤད་རོགས། ང་རང་ལ་འདི་ན་དགོས་པ་གང་ཡང་མི་འདུག ནང་དུ་བརྙན་འཕྲིན་ཡང་འདུག་ལ། ཉིན་བཀང་བོར་ལྟད་མོ་ལྟ་ས་ཡང་འདུག གཙང་སྤྱོད་སོགས་གང་ཅིའི་མཐུན་རྐྱེན་འཛོམ་པོ་ཡིན་པས་དངོས་ནས་དཀའ་ངལ་ཞིག་མི་འདུག་ཟེར་ནས་ཁོང་བཟའ་མི་གཉིས་ལ་ཞུ་རོགས།
བུད་མེད་དེས་སླར་ཡང་སྒོ་ཕྱི་ནས་སྒོ་ལྕགས་སྒྲོག་སེ་བརྒྱབ་དེ་སོང་བའི་སྒྲ་དེ་གོ་དུས། བློ་བཟང་གི་སེམས་ནང་དུ་རང་ཉིད་འདི་ལྟར་ཉི་མ་ག་ཚོད་གཅིག་ལ་འདུག་དགོས་སམ་སྙམ་ཞོར། སྒེའུ་ཁང་ནང་ནས་ཕར་བལྟས་ན་མཐོང་བའི་རྒྱ་ནག་གི་དར་དམར་དེ་མཐོང་དུས། མི་འདོད་བཞིན་དུ་སླར་ཡང་དར་དམར་འདིའི་འོག་ལ་ཡོང་ཡོད་པ་རེད་སྙམ་ཞོར། སྒྲ་ཕབ་འཕྲུལ་ཆས་ཆུང་ཆུང་ཞིག་གི་ནང་དུ་རོགས་མཐུན་བསྐོར་ཞིག་གྲགས་དུ་བཅུགས་དེ་མགོ་བོ་སྔས་ལ་བཞག་ནས་ཡུན་རིང་མ་སོང་མོད། སྒོ་ཕྱི་ནས་སྒྲོག་སྒྲ་ཞིག་ཐོས་བ་དང་སྙིང་ཆུང་ཡང་ལྷོག་ལྷོག་ཞིག་ལྡིང་ཞོར། དེ་ནི་རྒན་པོ་ཚེ་རིང་དོན་འགྲུབ་ཡིན་ངེས་སྙམ་ན་ཡང་། མི་གཉིས་གསུམ་ཞིག་གི་སྐད་གྲགས་བཞིན་པ་དེས་ཁོ་རང་ལ་རང་དབང་མེད་པར་དངངས་སྐྲག་ཞིག་ཕྱིན།
རྒན་པོ་ཚེ་རིང་དོན་འགྲུབ་ཀྱིས་བློ་བཟང་གི་ཕ་ཡུལ་གཅིག་པ་རིག་འཛིན་འཁྲིད་དེ་ཡོང་ཡོད་པ་དང་། ཡ ཨ་རོགས་སུན་བཞིན་མེད་ལ། ནང་དུ་བཙོན་མ་ལྟ་བུ་ཞིག་བྱས་དེ་བསྡད་ན་དཀའ་ལས་ཁག་པོ་འདུག་གམ་ཟེར་ནས་བཤད་དུས། བློ་བཟང་གིས་དཀའ་ལས་ཁག་པོ་མི་འདུག་ལ། སུན་སྣང་ཡང་མི་འདུག ཁྱེད་རྒན་རྒོན་གཉིས་ལ་དངོས་ནས་དཀའ་ལས་བཟོས་སོང་ཞེས་ཁ་ཡག་མིན་པའི་ཁ་ཡག་ཞིག་བཤད།
རིག་འཛིན་གྱིས། ཨ་རྒ་ཚེ་རིང་དོན་འགྲུབ་ཀྱིས་ཁྱེད་རང་འདི་རུ་སྐོང་ནས་བསྡད་ཡོད་པ་བཤད་སྟབས། ང་རང་དོ་ནུབ་ཁྱེད་རང་ཡོད་སར་འདུག་རོགས་བྱེད་དུ་ཡོང་བ་ཡིན། དོ་ནུབ་ང་ཚོས་སྐད་ཆ་འདྲ་མིན་རེ་གླེང་དེ་ལྷོད་ལྷོད་ཅིག་བསྡད་ན་འགྲིག་གི་རེད། ཆང་འཐུང་གི་ཨེ་ཡོད་ཅེས་དྲིས་དུས། བློ་བཟང་གིས་རྒན་པོ་ཚེ་རིང་དོན་འགྲུབ་ལ་དོག་ནས་མེད་ཟེར་ནས་ལན་བཏབ།
རྒན་པོ་ཚེ་རིང་དོན་འགྲུབ་ཀྱིས། བློ་བཟང་དེ་རིང་དངོས་ནས་ཁྱེད་རང་ལ་ལམ་འགྲོ་འདུག ངས་ཁྱེད་རང་ལ་ངའི་གྲོགས་པོ་ནང་དུ་སོང་ཞེས་བཤད་དེ་གྲོགས་པོ་དེའི་ལྷན་དུ་ཁང་བ་འདིར་བསྔགས་ནས་ཆུ་ཚོད་གཉིས་གསུམ་ཞིག་གི་རྗེས་སུ་ངའི་ཟ་ཁང་ནང་དུ་ནམ་རྒྱུན་མི་ཡོང་བའི་ཉེན་རྟོག་པ་ཁ་ཤས་ཤིག་སླེབས་ནས་མགྲོན་པོ་དག་ལ་སྐད་ཆ་འདྲི་བ་དང་། ལག་ཁྱེར་ཡོད་མེད་སོགས་སྐད་ཆ་མང་བོ་ཞིག་དྲིས་སོང་། དེ་དུས་ཨ་ཅེ་འཚོ་མོ་ཡིས་ང་ལ་ཁ་རོག་གེར་དེ་རིང་དངོས་ནས་བློ་བཟང་ཁྱེད་རང་གི་ངོ་ཤེས་དེའི་སར་བཏང་མེད་པ་ཡིན་ན་ཚར་འདུག་ཟེར་ནས་བཤད་སོང་། ད་དུང་། དེའི་ག་ལ་ཚད། ང་རང་གི་འདུག་ཁང་གི་སྒོ་ཕྱེ་ཟེར་ནས་ངའི་འདུག་ཁང་གི་སྒོ་ཕྱེ་ནས་ནང་ལོག་སྟོན་དགོས་བྱུང་སོང་།
བློ་བཟང་གིས་ཁྱེད་རྒན་རྒོན་གཉིས་ལ་ང་རང་འདི་ལྟར་བསྡད་ན་དཀའ་ངལ་འདྲ་འཕྲད་མི་ཡོང་ང་། དེ་འདྲ་ཞིག་ཡིན་ན་ང་རང་སང་ཉིན་རྐང་འཐུང་དུ་ཡིན་རུང་སྔ་བོ་ནས་འགྲམ་དང་ཁ་ཁར་ཐབས་བྱས་པ་ཡིན་ན་ཡག་པོ་མེད་འགྲོ་ཟེར་ནས་རང་གི་སེམས་ནང་གི་དངངས་འཚུབ་དང་ཁོང་བཟའ་མི་གཉིས་ལ་དཀའ་ངལ་འདྲ་སྤྲད་མི་ཡོང་ངམ་སྙམ་པའི་སྐད་ཆ་དེ་དག་བཤད་དུས། རྒན་པོ་ཚེ་རིང་དོན་འགྲུབ་ཀྱིས་ད་ནི་སེམས་འཁུར་མ་བྱེད། ཁྱེད་རང་འདི་ནས་ཁ་རོག་གེར་སྐོང་ནས་འདུག་ཐུབ་པ་ཡིན་ན་དེ་གས་འགྲིག་གི་རེད། མི་འགྱངས་པར་ཁྱེད་ཚང་གི་ཕ་རྒན་གྱིས་ཁྱེད་རང་ལ་ཐོབ་ཐང་ལག་ཁྱེར་སྐུར་ཡོང་ནས་འབྱོར་མ་ཐག ངའི་ཟ་ཁང་ནས་ཉིན་རྟག་པར་ཁ་ལོ་བ་མང་བོའི་ཟ་མ་ཟ་བཞིན་ཡོད་སྟབས། ང་རང་ལ་ཁ་ལོ་བ་ཡང་མི་ཉུང་བ་ཞིག་ངོ་ཤེས་ཡོད་པ་རེད། ནམ་ཐོན་ན་དེ་དུས་ལམ་དུ་ཆས་ཆོག་གི་རེད།
བློ་བཟང་གིས་ཉིན་དགུའི་རིང་དུ་རྒན་པོ་ཚེ་རིང་དོན་འགྲུབ་ཀྱི་་ངོ་ཤེས་དེའི་ནང་དུ་སྐོང་ནས་བསྡད་པ་དང་། ཉིན་དགུ་འགོར་བའི་ཞོགས་པ་དེར། ད་ནི་ལག་ཁྱེར་གང་འདྲ་ཞིག་ཆགས་ཡོད་སྟབས། དེ་རིང་སང་ཉིན་གང་ཞིག་ལ་སླེབས་ཀྱི་ཡོད་དམ་སྙམ་ཞོར་དུ་རང་གི་ཕྲེང་བ་རྩ་ཆེན་དེ་བླངས་ནས་མོ་ཞིག་བཏབ་དུས། ལག་ཁྱེར་དེ་ཉིན་ཁོ་རང་ལ་རེག་པ་ཞིག་འབབ་འདུག་ན་ཡང་། ད་ནི་ས་ཡང་རུབ་གྲབས་འདུག དེ་རིང་མོ་མ་ཐེབས་པ་ཡིན་ས་རེད་སྙམ་ཞོར་དུ། རང་གིས་རང་ལ་ཁེར་ལབ་ཅིག་རྒྱག་ཞོར་བརྙན་འཕྲིན་གྱི་ཁ་ཕྱེ་ནས་བསྡད་ཡོད་དུས། མི་ཞིག་ནང་དུ་ཡོང་བཞིན་པའི་རྐང་སྒྲ་ཐོས། མི་དེ་ནི་ཁོ་རང་གི་ཕ་ཡུལ་གཅིག་པ་རིག་འཛིན་ཡིན་པ་ཤེས་ནས་སྒོ་ཕྱེ་ཞོར་དུ། ཡ་ ཨ་རོགས། དེ་རིང་ཡང་ས་རུབ་ཁ་ཞིག་ལ་འདི་རུ་ཡོང་ཁོམ་ཡོད་པ་དངོས་ནས་བཟང་གི ཤོག་ཤོག་ཤོག
རིག་འཛིན་གྱིས། ད་ཁྱེད་རང་བཟུང་བཙོན་ལས་ཐར་སོང་བ་རེད། དོ་ནུབ་ཕྱི་ལ་འཁྱམ་དུ་སོང་ན་འགྲིག་གི་རེད། འུ་གཉིས་ལྷན་དུ་མཚན་མོའི་ཆང་ཁང་ཞིག་དུ་སོང་དེ་སྤི་རག་ཡིད་ཚིམ་པ་ཞིག་འཐུང་། འདི། ཁྱེད་རང་གི་ཐོབ་ཐང་ལག་ཁྱེར་ས་མཚམས་བར་དུ་ཡོང་ཆོག་པའི་ཡི་གེ་འབྱོར་འདུག་ཟེར་ནས་བློ་བཟང་ལ་བསྟན།
བློ་བཟང་སེམས་གཏིང་ནས་དགའ་བ་དང་ལྷན་དུ། ཡ་དེ་ན་འུ་གཉིས་དེང་ཐོག་ཟ་ཁང་ནང་དུ་སོང་དེ། ཁོང་རྒན་རྒོན་གཉིས་ལ་དོ་ནུབ་འུ་གཉིས་ལྷན་དུ་འདུག་རྒྱུ་ཡིན་རབས་བཤད་ནས་འོང་། ད་འགྲིག་སོང་ནི་རེད་ཅེས་སེམས་གཏིང་ནས་དགའ་ཞོར་དུ་ཕྱི་ལ་བུད།
བློ་བཟང་དོ་ནུབ་ཁྱེད་རང་རིག་འཛིན་དང་ལྷན་དུ་བསྡད་ན་འགྲིག་གི་རེད། ཕྱི་ལོག་ལ་འཁྱམ་ནས་མ་འདུག་མ་གཏོགས། ལག་ཁྱེར་ཡོད་ཀྱང་། ཁྱེད་རང་ས་ཁུལ་འདིས་མི་གསར་བ་ཡིན་པ་ཁོང་ཚོས་བལྟས་པ་ཙམ་གྱིས་ཤེས་ངེས་ཡིན། ངས་འདི་ནས་ཁྱེད་རང་སང་ཞོགས་སྔ་བོ་འགྲོ་མཁན་གྱི་ཁ་ལོ་བ་ཞིག་ལ་སྐད་ཆ་བཤད་དེ་བཞག་ཡོད། སང་ཞོགས་ཆུ་ཚོད་དྲུག་པ་ཏག་ཏག་ལ་སླེབས་ཐུབ་པ་བྱོས། ཁ་ལོ་བ་དེ་ངས་ངོ་ཤེས་ཤིག་ཡིན་སྟབས། ཁྱེད་རང་ལ་ལྷ་ས་བར་དུ་རྒྱ་སྒོར་ཉིས་བརྒྱ་ལས་བླངས་མ་སོང་ཞེས་བཤད།
རིག་འཛིན་གྱིས། འུ་གཉིས་ལ་འགྲོ་རོགས་བུ་མོ་གཉིས་ཡོད་ན་དངོས་ནས་ཡག་པོ་འདུག ང་རང་ལ་ངོ་ཤེས་བུ་མོ་ཞིག་ཡོད། ཁོ་མོ་སྐད་གཏོང་དུ་འགྲོ ཕོ་རྐྱང་གཉིས་སོང་དེ་སྤི་རག་འཐུང་ནས་བསྡད་པ་ཡིན་ན་ཞེ་དྲགས་སྐྱིད་པོ་ཡོད་པ་མ་རེད་ཟེར་ནས་ཆང་ཁང་ཆུང་ཆུང་ཞིག་གི་ནང་དུ་ཁྲིད། ཆང་ཁང་ཆུང་ཆུང་དེའི་ནང་དུ་བོད་པའི་བུད་མེད་གཉིས་ཡོད་པ་དང་རིག་འཛིན་མཐོང་མ་ཐག དེ་རིང་དངོས་ནས་ཉི་མ་ཡག་པོ་ཞིག་ཡིན་ས་རེད། གང་ཞིག་ནས་འདི་རུ་ཡོང་རྒྱུ་དྲན་སོང་ཟེར་ནས་བཤད་ཞོར་དུ་ཐལ་ལྕགས་ཀྱིས་ཡང་མོ་ཞིག་བརྒྱབས།
རིག་འཛིན་གྱིས། ཁྱེད་རང་དྲན་ནི་མིན་ནས་ཟེར་ཞོར་དུ། སྐེ་རུ་འཐམ་ཁུལ་བྱེད་ཞོར་དུ། འདི། ངས་ངོ་ཤེས་ཤིག་ཡིན། ད་རེབས་ལས་ཀ་ཞིག་གི་ཆེད་དུ་འགྲམ་དུ་ཡོང་བ་རེད། སང་ཉིན་ཕྱིར་འགྲོ་རྒྱུ་ཡིན་ཟེར་གྱི་འདུག་སྟབས། ངས་ཁྱེད་གཉིས་ཡོད་སར་ཆང་འཐུང་དུ་ཁྲིད་དེ་འོང་བ་ཡིན། སྤི་རག་ཤེལ་དམ་གཉིས་བསྔགས་ནས་ཚང་མས་ལྷན་དུ་འཐུང་ཟེར་ན་ཡང་། བུད་མེད་དེ་གཉིས་ཀྱིས་ངོ་ཚ་ཁུལ་བྱས་དེ་ཅུང་ཙམ་རིང་མ་འཐུང་མོད། ག་ལེར་ཁོ་གཉིས་དང་ལྷན་དུ་འཐུང་། རིག་འཛིན་གྱིས་འབོད་སྐུལ་བྱས་པ་ལྟར། བུད་མེད་དེ་གཉིས་ཀྱི་ནང་གི་གཅིག་ཁོ་གཉིས་ཀྱི་ལྷན་དུ་མཚན་ཚོགས་ལ་འགྲོ་རྒྱུ་ཁས་ལེན་བྱས།
བློ་བཟང་གིས། རིག་འཛིན་འུ་གཉིས་གོང་གི་ཟ་ཁང་དེར་གཅིག་སོང་ནས་ཕྱིར་ཡོང་ན་ག་འདྲ་འདུག དེ་རུ་ང་རང་གི་ངོ་ཤེས་ཤིག་ཡོད་ཅེས་བཤད་ནས་བུད་མེད་དེ་གཉིས་ལ་མགྱོགས་པོ་མཇལ་ཡོང་ཟེར་ནས། བློ་བཟང་ཁོ་རང་ཐོག་མར་འགྲམ་དུ་སླེབས་དུས་འགྲོ་སའི་ཟ་ཁང་དེར་ཕྱིན། ཟ་ཁང་དེའི་ནང་གི་བུད་མེད་ཆུང་ཆུང་དེས་བློ་བཟང་མཐོང་མ་ཐག གདོང་ལ་འཛུམ་ཞིག་བླངས་ཞོར་དུ་ནང་དུ་ཤོག སྤྱིན་བདག་ཕྱི་ལོག་དུ་བུད་སོང་མོད། མི་རིང་བར་ཡོང་ངེས་ཡིན་ཟེར་ནས་བཤད།
རིག་འཛིན་གྱིས་བུ་མོ་དེ་སྔ་ས་ནས་ཤེས་ཀྱི་ཡོད་འདུག ཡིན་ཡང་། ཟ་ཁང་དེ་ནས་ངོ་ཤེས་པ་ལས་དམིགས་བསལ་གྱིས་འགྲེལ་བ་གང་ཡང་མེད་པ་ཡིན་དུས། རིག་འཛིན་གྱིས་བུ་མོ་ཆུང་ཆུང་དེ་ནུབ་མཚན་ཚོགས་དུ་འགྲོ་བར་སྐུལ་ཡང་། ང་རང་མི་འགྲོ་ཟེར་ནས་ཨུ་ཚུགས་མཐའ་བསྐྱེལ་བྱས་དུས། བློ་བཟང་གིས་ཁྱེད་རང་དོ་ནུབ་ལས་ཀ་ཡོད་དམ་ཟེར་ནས་དྲིས།
བུད་མེད་ཆུང་ཆུང་དེས། མེད། འོན་ཀྱང་། ང་རང་ཕྱི་བོ་ཆགས་པ་ཡིན་ན། ཕྱིར་ནང་དུ་ཡོང་རྒྱུར་སྐྲག་གི་འདུག
བློ་བཟང་གིས། ཁྱེད་རང་ངེད་གཉིས་ལྷན་དུ་འགྲོ་འདོད་ཡོད་ན། ངས་ཁྱེད་རང་ཕྱིར་ནང་དུ་བསྐྱེལ་ཆོག དོ་ནུབ་ཀྱིས་མཚན་མོའི་ཞབས་བྲོ་ཁང་གི་ནང་དུ་སོང་ན་སྤི་རག་དང་མངར་ཁུའི་རིགས་ཀྱི་སྤྱིན་བདག་ངས་བྱེད་ཆོག་ཟེར་ནས་བཤད་དུས། བུད་མེད་ཆུང་ཆུང་དེས་སྤྱིན་བདག་ཕྱིར་ཡོང་དུ་བཅུགས་དང་། དེ་ནས་ཁྱེད་ཚོར་སྐད་ཆ་འདྲ་བཤད་རྒྱུ་ཡོད་ན་ཤོད་དང་། ཟ་ཁང་གི་སྒོ་སྔ་བོ་བརྒྱབ་པ་ཡིན་ན། ང་རང་ཁྱེད་གཉིས་ལྷན་དུ་འགྲོ་ཆོག་ཟེར་ནས་བཤད་དུས།
རིག་འཛིན་ཁོང་ཁྲོ་བླངས་པའི་རྣམ་འགྱུར་དང་བཅས་དེ། ཅི་རེད། འུ་གཉིས་འདི་ནས་ངོ་ཤེས་ཡུན་རིང་བོ་རེད། ངས་བཤད་ན་མི་འགྲོ་ཟེར་བ་དང་ངའི་རོགས་པའི་བཤད་ན་འགྲོ་ཟེར་དོན་ཅི་རེད་ཅེས་དྲིས་དུས། བློ་བཟང་གིས་དེ་འདྲ་མ་རེད། མོ་རང་གིས་སྐད་ཆ་ཁྱེད་རང་གི་གོ་བ་དེ་རེད་ཅེས་ཚིག་མཚམས་བཅད།
མུ་འགོད།
ཝེ། དེ་རིང་སྒྲུང་གི་མཇུག་བཀོད་མི་འདུག་ག མདང་རྒན་མོས་ཉལ་གི་མ་བཅུག་ནི་མིན་་ནམ། ཧཧཧཧཧཧ
སྤུན་ཟླ་ཁྱེད་ཅག་འདི་ལྟར་ཕེབས་གནང་བ་དེར་ཐུགས་རྗེ་ཆེ་ལགས། དངོས་ནས་ང་རང་སྒྲུང་འདི་འབྲི་མཁན་ཡིན་པས་ཆ་ནས་ཁྱེད་ཅག་ལ་དུས་རྒྱུན་དུ་དགའ་བསུ་ཞུ་བཞིན་ཡོད།
ཁྱེད་ཆུ་མོ་བཞིན་དུ་ད་རུང་བཞུར་གྱིན་འདུག
ཁྱེད་ཀྱི་ཐུགས་ལ་ངེས་དགོས་པ་ཞིག་ལ།
དབྱར་དུས་ཚ་བ་ཆེ་བས་ཆུ་མོ་ལ་དཀའ་ངལ་འཕྲད་སྲིད་ལ།
དགུན་དུས་གྲང་ངར་ཆེ་བས་ཆུ་མོ་ལ་དེ་བས་ཀྱང་དཀའ་ངལ་འཕྲད་ངེས།
རེད་དེ་ཁེྱད་ཀྱིས་དཀའ་ངལ་དེ་ཚོ་ད་ལྟ་ནས་སེམས་ལ་ངེས་དགོས་ལ།
དེ་དུས་ཀྱི་གྲལ་སྒྲིག་ད་ལྟ་ནས་ཡོད་དགོས་ལྷ་ཡི་བུ་མོ་འདྲ་བའི་བོད་ཤ་ཁྲག་ཚང་།
དྲ་གྲོགས་སྐར་ཁྲི་བཙན་དང་ཤ་ཁྲག་གཉིས་ལ་མཆན་བུ་རིང་པོ་ཞིག་བྲིས་ནས་ཚར་གྲབ་ཡོད་དུས། རོ་གློག་འདི་ཆད་ཀི་ཐ། ད་ཡིན་ན་འབྲི་ཁོམ་མེད་ཀི ཁྱེད་གཉིས་ཀ་བདེ་མོ་བྱོས། བརྩམས་སྒྲུང་མུ་མཐུད་ནས་ཀློག་གིན་ཡོད།
ད་ཡིན་ན་བློ་བདེ་སོང་། བློ་བཟང་ལ་བར་ཆད་བྱུང་མ་སོང་། ངས་ཁ་རྩང་ནས་ཅིག་འདོན་གི་ཡོད་པའི་དྲིན་ཡིན་ཐལ།