དུས་དྲན། བགྲོ་གླེང་། ཟིན་ཐོ།

ས་རཱ་མཐོ་སློབ་ཀྱིས་གོ་སྒྲིག་བྱས་པའི་ལྔ་བཅུའི་དུས་དྲན་དང་འབྲེལ་བའི་མཁས་པའི་བགྲོ་གླེང་སྐབས་ཀྱི་དོན་གནད་རགས་བཀོད།

ས་རཱ་མཐོ་སློབ་ནི་བཙན་བྱོལ་སྤྱི་ཚོགས་ནང་འདིར། ལས་བྱེད་དང་དགེ་རྒན་མང་པོ་བསྐྱེད་བསྲིང་དང་། རིག་གནས་རབ་འབྱམས་པ་དང་། མཐོ་རིམ་རིག་གནས་རབ་འབྱམས་པ་བཅས་བསྐྱེད་བསྲིང་གནང་ཡུལ་གཞི་རྒྱ་ཆེ་ཤོས་ལྟ་བུ་ཆགས་ཡོད། འདི་ནས་བསྐྱེད་བསྲིང་གནང་བ་དེ་དག་གིས་བཙན་བྱོལ་བོད་ཀྱི་སློབ་གྲྭ་ཁག་དང་། རིག་གཞུང་གི་བསྟི་གནས་མང་པོ་ཞིག་ན་ལས་དོན་སྒྲུབ་བཞིན་ཡོད་ཅིང། འདས་པའི་ལོ་ངོ་བཅུ་ལྷག་གི་གྲུབ་འབྲས་དེར་སྤྱི་ཚོགས་ནང་གདེང་འཇོག་ཚད་མཐོ་བྱེད་བཞིན་པ་ཞིག་རེད། ཉིན་ཤས་སྔོན་ཏེ། འདི་ཟླའི་ཚེས་ 17 ནས་ཚེས་ 21 ཉིན་ལྔའི་རིང་《ལྔ་བཅུའི་དུས་དྲན་དང་འབྲེལ་བའི་མཁས་པའི་བགྲོ་གླེང》ཞིག་གོ་སྒྲིག་གིས་མཁས་པ་དང་ཉམས་ཞིབ་པ། དགེ་རྒན་དང་རྩོམ་སྒྲིག་གི་ཕྱག་ལས་གནང་མཁན་བཅུ་དགུ་ཆེད་ཞུས་དང་འབྲེལ། ཚད་མ་རིག་པའི་བྱུང་རིམ་དང་དེའི་དགེ་མཚན། མི་རབས་གསར་པས་ནང་ཆོས་རྒྱུན་འཛིན་གྱི་ཐབས་ལམ་སོགས་ཀྱིས་མཚོན་པའི་ནང་ཆོས་རིག་གཞུང་རྒྱུན་འཛིན་ཐབས་ལམ་དང་། བོད་ཀྱི་རྒྱལ་རབས་ལོ་རྒྱུས་ཀྱི་འཕེལ་རིམ་དང། དེ་སློབ་གཉེར་དང་ཉམས་ཞིབ་ཀྱི་དགོས་དོན། བོད་ཀྱི་བརྡ་སྤྲོད་རིག་གནས་རྒྱུན་འཛིན་དང་། ད་ཡོད་བརྡ་སྤྲོད་རིག་གནས་ལ་སྣོན་འཕྲི་དགོས་མིན་གྱི་གནད་དོན། དེ་བཞིན་གནའ་རབས་དང་དེང་རབས་ཀྱི་རྩོམ་རིག་དར་སྤེལ་བྱ་ཐབས་བཅས་ལ་བགྲོ་གླེང་དང་། ཕྱོགས་མཚུངས་ས་རཱ་མཐོ་སློབ་ཀྱིས་གསར་འཛུགས་ཞུ་འཆར་ཆེས་མཐོའི་རིག་གནས་རབ་འབྱམས་པའི་སློབ་ཚན་སྐོར་ལའང་དམིགས་བསལ་བགྲོ་གླེང་གནང་ཡོད་ཅིང། མཁས་པ་དང་ཉམས་ཞིབ་པ་དག་གིས་རང་ཉིད་ཀྱི་ལྟ་ཚུལ་གླེང་བའི་དཔྱད་རྩོམ་རེ་སྤེལ་ཡོད་པ་དག་ནི། ས་རཱ་མཐོ་སློབ་ཀྱིས་རིང་མིན་ཕྱོགས་བསྒྲིགས་དཔར་འགྲེམས་གནང་ཉེར་ཡོད་འདུག་ཅིང། འདིར། མཁས་པ་དང་ཉམས་ཞིབ་པ་ཚོས་བགྲོ་གླེང་གསུང་བཤད་སྐབས་གང་རྩལ་འདོན་གནང་བའི་དོན་གནད་ལས་གལ་གནད་དུ་མཐོང་བ་ཁག་ཕྱོགས་བསྡུས་ཀྱིས་བཀོད་ཡོད།
གཅིག ལོ་རྒྱུས་བགྲོ་གླེང་།
༡ མཁན་པོ་འཇུ་བསྟན་སྐྱོང་མཆོག་གིས། ཁྲི་སྲོང་སྐབས་བོད་དུ་ནང་ཆོས་དར་ཚུལ་ལས་འཕྲོས་ཏེ། ཁྲི་སྲོང་སྐབས་བོད་དུ་ནང་ཆོས་དར་ཤུགས་ཆེན་པོ་བྱུང་བ་དེ་ནི། རྒྱལ་རབས་ལོ་རྒྱུས་རྣམས་སུ་མཁན་སློབ་གཉིས་བོད་དུ་གདན་དྲངས་ནས་བསྟན་པ་སྤེལ་ཚུལ་སྤྱི་བཤད་ཙམ་ལས་ཞིབ་བཤད་མཛད་མེད་ནའང། མདོ་དོན་ནི། ཐོག་མར་བསྟན་པ་སྤེལ་བའི་སྐབས་སུ་རིག་པའི་གཞུང་ལུགས་ཀྱི་ལྟ་གྲུབ་རྒྱས་བཤད་བྱས་ནས་བསྟན་པ་སྤེལ་བ་ཞིག་མིན་པར། ནང་ཆོས་ཀྱི་ཚད་མཐོ་པོའི་ཁྱད་ཆོས་ཁག་ཅིག་མིག་མཐོང་ལག་ཟིན་དུ་སྤྱད་ནས་བསྟན་པ་དར་སྤེལ་གྱི་གཞི་བཏིངས་པ་དང་། ཡང་། བསྟན་འགྱུར་དཀར་ཆག་དང་བཀའ་འགྱུར་དཀར་ཆག་དག་བསྡུར་ནས་མཐོང་ཐུབ་པ་ཞིག་ལ། ཁྲི་སྲོང་གི་སྐབས་སུ་བཀའ་དང་བསྟན་བཅོས་གཉིས་ལས་བསྟན་བཅོས་བོད་བསྒྱུར་ལ་ནུས་པ་ཤུགས་ཆེར་བཏོན་ཡོད་པ་དང་། བསྟན་བཅོས་བོད་བསྒྱུར་སྐབས་ལ་མཚོན་ནའང། མདོ་ཕྱོགས་ནས་བསྟན་པ་སྤྱིའི་རྣམ་གཞག་ཆ་ཚང་ཞིག་བསྒྱུར་གནང་ཡོད་པ་དང། སྐབས་དེར་རབ་བྱུང་ངུར་སྨྲིག་གི་སྡེ་དར་ལུགས་དང།  དེང་ནའང་བཀའ་བརྒྱུད་པ་དང། རི་བོ་དགེ་ལུགས་པ། ས་སྐྱ་པ་བཅས་ཐུན་མོང་གིས་གཞུང་འགྲེལ་སྣ་ཚོགས་མཛད་ནས་ཉམས་སུ་བསྟར་བཞིན་ཡོད་པའི་རྫོགས་ཆེན་གྱི་གཞི་ཡང་སྐབས་དེར་བོད་དུ་དར་བའི་མགོ་ཚུགས་པ་ནས། གཞན་ཡང་། སྤྱོད་པ་ལས་འཕྲོས་པའི་བན་བོན་གྱི་རྩོད་པ་དང་། སྒོམ་སྟངས་ལས་འཕྲོས་པའི་སྟོན་རྩེན་གྱི་རྩོད་པ་བྱུང་ལུགས་སོགས་ལོ་རྒྱུས་སྟེང་གི་གནད་དོན་མང་པོ་ཞིག་གླེང་སློང་གནང་།
༢ བོད་ཀྱི་དཔེ་མཛོད་ཁང་གི་ལོ་རྒྱུས་ཉམས་ཞིབ་པ་མགུ་ལོག་དམ་ཆོས་དཔལ་བཟང་ལགས་གིས། བཀའ་བསྟན་གྱི་འགྱུར་བྱང་གཞིར་བཞག་བྱས་ན། ཐོན་མི་ནས་དགེ་འདུན་ཆོས་འཕེལ་བར་ལོ་ཙཱ་བ་ 276 བྱོན་ཡོད་ཚུལ་དང་། དེ་དག་གིས་བཀའ་བསྟན་བོད་དུ་བསྒྱུར་གནང་བའི་ཚུལ་གསལ་བཤད་དང་འབྲེལ། ལོ་ཙཱ་བའི་སྐོར་ལ་དམིགས་བསལ་གྱི་ཉམས་ཞིབ་བྱ་འོས་པ་དང། སྔོན་བྱོན་ལོ་ཙཱ་བར་རྗེས་དྲན་ཞིག་ངེས་པར་དུ་གོ་སྒྲིག་ཞུ་གལ་ཆེ་བ་བཅས་ཀྱི་དགོངས་ཚུལ་གསལ་སྟོན་དང་འབྲེལ་བའི་གླེང་སློང་དང་། ཕྱོགས་མཚུངས་ར་ཤི་ཡ་དང་ཉི་ཧོང་དུ་ཉེ་རབས་བོད་ཀྱི་གནས་སྟངས་གསལ་བའི་ཡིག་ཚགས་མང་པོ་ཉར་ཚགས་བྱས་ཡོད་པ་དེ་དག་ལ་མ་འོངས་པར་ངེས་པར་ཉམས་ཞིབ་ཞུ་དགོས་པ་དང་། འགོས་ཆོས་གྲུབ་ཀྱིས་མདོ་སྡེ་ལང་ཀར་གཤེགས་པ་རྒྱ་ནག་སྐད་ནས་བཀའ་བསྟན་གསུང་རབ་བྱེ་བྲག་པ་བོད་སྐད་དུ་བསྒྱུར་བའི་ལོ་རྒྱུས་ཡོད་པ་སོགས་དང་། མི་ཉག་ལོ་ཙཱ་བ་ཙ་མི་སངས་གྲགས་པས་རྡོ་རྗེ་གདན་དུ་སྟོན་པའི་རྒྱལ་ཚབ་མཛད་པ་སོགས་ལོ་རྒྱུས་ཡིག་ཚང་བསྔོགས་པ་ལས་རྙེད་པའི་གལ་གནད་མང་པོ་ཞིག་གསལ་འདོན་གནང་།
༣ དྲུང་འཕར་བཀྲ་ཤིས་རྒྱ་མཚོ་ལགས་ཀྱིས། མན་ཇུའི་དུས་མཇུག་ནས་ཏིང་ཤོ་ཕིང་བར་གྱི་རྒྱ་ནག་དང་། དུས་སྐབས་དེའི་རིང་གི་བོད་ཀྱི་ལོ་རྒྱུས་ལས་འཕྲོས་ཏེ། མན་ཇུའི་དུས་སྐབས་ནི་བོད་ཀྱི་ལོ་རྒྱུས་སྟེང་གི་དཀའ་རྙོག་ཆེན་པོ་དག་མངོན་གསལ་དོད་པོའི་དུས་སྐབས་ཤིག་ཡིན་པ་དང། དེང་སྐབས་རྒྱ་ནག་གི་ཆབ་སྲིད་ཀྱི་གནས་སྟངས་ནི་ཏིན་གྱི་གྲིབ་གཟུགས་ཤིག་གི་འོག་ཏུ་ཡོད་པ། བོད་སོག་ལས་ཁུངས་ཀྱི་མགོ་ཁུངས་དེ་མི་སེར་རྒྱལ་ཁབ་ཀྱི་སྐབས་དང་འབྲེལ་ཡོད་པ། རྒྱལ་སྤྱིའི་ཁྲིམས་དོན་མཁས་པའི་ཚོགས་ཚུང་གིས་བོད་ནི་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་བྱས་ཡོད་པ། རྒྱ་གུང་ཁྲན་དང་བོད་གཉིས་ཀྱི་འབྲེལ་བ་ནི་རིག་གཞུང་རྩ་གཏོར་དང་རང་དབང་སླར་གསོའི་གདོང་ཐུག་ཅིག་དང་། རྒྱ་ནག་གུང་ཁྲན་གཞུང་གིས། བོད་འདི་ས་ཁོངས་དུམ་བུ་མང་པོར་བཅད་བགོས་དང། བོད་ཀྱི་ཡུལ་མི་དེ་དག་མི་རིགས་མི་འདྲ་བར་དབྱེ་ཚན་ཕྱེས་པ། ཤེས་ཡོན་དང་ཆོས་ལུགས་ཀྱི་རང་དབང་གི་གནས་སྟངས་མེད་པ་སོགས་མདོར་ན། རྒྱ་ནག་གིས་བོད་དུ་སྤེལ་བའི་སྲིད་བྱུས་དེ་ནི་རིག་གཞུང་རྩ་གཏོར་གྱི་བརྒྱུད་རིམ་ཞིག་ཡིན་པ་སོགས་གསལ་སྟོན་གནང་།
༤ ཀིརྟི་བྱེས་པ་གྲྭ་ཚང་གི་དགེ་རྒན་རེ་མདོ་སེང་གེ་ལགས་ཀྱིས། བོད་ཀྱི་ལོ་རྒྱུས་ཡར་རྒྱས་གཏོང་ཕྱོགས་ཀྱི་བརྗོད་གཞི་ལས་འཕྲོས་ཏེ། ལོ་རྒྱུས་ནི་ཆབ་སྲིད་དང་ཆོས་ལུགས་ཀྱི་ལྟ་བའི་ཚོས་གཞི་མ་འདྲེས་པའི་དངོས་ཡོད་བདེན་པའི་རང་བཞིན་དང་ལྡན་པ་ཞིག་ཡིན་དགོས་པའི་ངོས་འཛིན་དང། ལེགས་ཆ་ལེན་པ་དང་སྐྱོན་ཆ་འདོར་བ། མི་རིགས་གཞན་གྱི་ལོ་རྒྱུས་འབྲི་སྟངས་ལས་འབྲི་ཐབས་སྐོར་ལ་དཔེ་ལྟོས་བྱེད་པ་སོགས་བརྒྱུད་ནས་ལོ་རྒྱུས་འབྲི་ཐབས་དང་རྩོམ་སྟངས་གསར་བཏོད་བྱེད་དགོས་པ། ད་ཡོད་བོད་ཀྱི་ལོ་རྒྱུས་དེབ་གཞི་མང་ཆེ་བ་ནི། ཆོས་ལུགས་ཀྱི་ཆེ་བ་དང་དད་པ་ལ་སྦྱར་བའི་དག་སྣང་གི་ལོ་རྒྱུས་ཤིག་ལས་འཚོ་གནས་དངོས་བརྗོད་པའི་ལོ་རྒྱུས་ཉུང་བ་ནས་ཧ་ལམ་མེད་པ་ལྟ་བུར་ཡོད་སྟབས། ལོ་རྒྱུས་རྩོམ་རིག་ནི་དངོས་ཡོད་འཚོ་བ་དང་ཐག་ཉེ་ས་ཞིག་ནས་མགོ་རྩོམ་དགོས་པ་སོགས་གླེང་། འདི་སྐབས་གླང་དར་མས་བསྟན་པ་བསྣུབས་ཡོད་མེད་སོགས་ལས་འཕྲོས་ཏེ་གླེང་སློང་ཤུགས་ཆེ་བྱུང་ཞིང། མཐའ་མ་དེར་།  བགྲོ་གླེང་གི་དྲི་རྨེད་ཀྱི་སྐབས། མཁན་པོ་འཇུ་བསྟན་སྐྱོང་ལགས་ཀྱིས། རྒྱལ་པོ་དར་མས་སངས་རྒྱས་ཀྱི་བསྟན་པ་བསྣུབས་མེད་པ་དང་ལྷ་ལུང་དཔལ་རྡོར་གྱིས་རྒྱལ་པོ་དར་མ་བསད་མེད་པ། རྒྱལ་པོ་དར་མ་གསོད་མཁན་ནི་ཡུམ་བརྟན་གྱི་ཨ་ཞང་ཡིན་པའི་སྐོར་ཏུན་ཧོང་ཡིག་རྙིང་ལས་གསལ་བ་དང།  ལོ་རྒྱུས་ནི་ངེས་ཅན་དུའང། ཐུན་མོང་དབང་ལྔའི་ཡུལ་དུ་གྱུར་པའི་ཐུན་མོང་གི་ལོ་རྒྱུས་དང། དེའི་ཡུལ་དུ་མ་གྱུར་པའི་ཐུན་མོང་མ་ཡིན་པའི་ལོ་རྒྱུས་གཉིས་སུ་ཕྱེས་ནས་རྩོམ་སྒྲིག་དང་ཉམས་ཞིབ། སློབ་སྦྱོང་བྱེད་དགོས་པ་བཅས་གལ་ཆེན་ཡིན་པ་བཅས་གསལ་འདོན་གནང་།
༥ རྡོ་རྗེ་དབང་ཕྱུག་ལགས་ཀྱིས། ལོ་རྒྱུས་སྟེང་དོ་སྣང་བྱ་དགོས་སྐོར་གང་ཡིན་ཞེས་པའི་བརྗོད་གཞི་ལས་འཕྲོས་ཏེ། བོད་ཀྱི་ལོ་རྒྱུས་ནི།  བོད་རང་གི་མཁས་པས་བྲིས་པའི་དུམ་བུ་གཅིག་དང། རྒྱ་ནག་གིས་བོད་ཀྱི་ལོ་རྒྱུས་འཁྱོག་བརྗོད་བྱས་པའི་དུམ་བུ་གཅིག རྒྱལ་སྤྱིའི་བོད་རིག་པའི་ཞིབ་འཇུག་པའི་ཁྱབ་ཁོངས་ན་བོད་ཀྱི་ལོ་རྒྱུས་གླེང་སྟངས་དུམ་བུ་གཅིག་བཅས་དུམ་བུ་གསུམ་དུ་ཡོད་ཅིང། ལྷག་པར་རྒྱལ་སྤྱིའི་བོད་རིག་པའི་ཞིབ་འཇུག་ཁྱབ་ཁོངས་ཀྱི་ཉམས་ཞིབ་པ་ཚོས། ལོ་རྒྱུས་ཀྱི་བོད་དང་། རིག་གཞུང་གི་བོད་ཅེས་སྡེ་ཚན་གཉིས་སུ་ངོས་འཛིན་བྱེད་ཀྱིན་ཡོད་པ་དང་། གང་ལྟར་དེང་སྐབས་བོད་ཀྱི་ལོ་རྒྱུས་འབྲི་རྩོམ་གྱི་གནས་བབ་དེ་རིམ་པ་མི་འདྲ་བ་གསུམ་ཆགས་ནས། བོད་ཀྱི་ལོ་རྒྱུས་སློབ་སྦྱོང་དང་ཉམས་ཞིབ་གང་ཡང་དཀའ་རྙོག་ཅིག་གི་ནང་འཛུལ་ས་ལྟ་བུ་ཞིག་ཆགས་ནས་ཡོད་སྟབས། བོད་ཀྱི་ལོ་རྒྱུས་སློབ་གཉེར་དང་ཉམས་ཞིབ་ལ་འཇུག་པ་དག་གིས། གནའ་རབས་ནས་ཉེ་བའི་ཕྱི་ལོ་ 1959 ་ལོའི་བར་བྲིས་ཤིང་བརྩམས་པའི་ལོ་རྒྱུས་དག་གཞི་རྩར་བཟུང་ནས་རང་ཉིད་ལ་ལོ་རྒྱུས་ཀྱི་ལྟ་གྲུབ་བམ་གཞུང་ཤིང་ཞིག་ཆགས་པ་བྱེད་དགོས་པ་དེ་གལ་ཆེ་ཚུལ་དང་། ལྷག་དོན་རྒྱ་ནག་གཞུང་ཕྱོགས་ནས་བོད་འདི་རྒྱ་ནག་གི་ཆ་ཤས་ཤིག་ཡིན་པ་དང་། རྒྱ་ནག་གིས་བོད་འདི་དབང་བསྒྱུར་བྱས་པ་ནས་བཟུང་བོད་དེ་བདེ་སྐྱིད་ལྡན་པའི་སྤྱི་ཚོགས་ཤིག་ཏུ་བསྒྱུར་ཡོད་རབས་གཉིས་གཙོ་བོའི་སྒྲུབ་གཞིར་བཟུང་བའི་བོད་ཀྱི་ལོ་རྒྱུས་གླེང་སྟངས་འདི་རིགས་ལ། ངེས་པར་ཁ་གཏད་གཅོག་དགོས་ཤིང་། དེ་ཡང་། དུས་སྐབས་སུ་དབྱེ་ནས་གནས་ཚུལ་གྱི་སྤྱི་ཡོངས་ལ་ལྟ་བ། ལོ་རྒྱུས་ཀྱི་ཚབ་མཚོན་མི་སྣ་དང་འབྲེལ་བའི་ཐོག་ནས་ལོ་རྒྱུས་ལ་བལྟ་བ། ཡིག་རྙིང་ཁག་གཤིབ་བསྡུར་གྱི་ལམ་ནས་ལོ་རྒྱུས་ཀྱི་འཕེལ་རིམ་ལ་བལྟ་བ་བཅས་གནད་འགག་ཡིན་པ་སོགས་གླེང།
གཉིས། ནང་ཆོས་བགྲོ་གླེང།
༡ ཀིརྟི་དགེ་རྩ་ཚོགས་པའི་ཚོགས་གཙོ་དགེ་བཤེས་དཀོན་མཆོག་རྒྱ་མཚོ་ལགས་ཀྱིས། ཚད་མ་རིག་པའི་བྱུང་རིམ་དང་དེའི་གལ་གནད་ལས་འཕྲོས་ཏེ། ཚད་མ་རིག་པ་དར་ཚུལ་གྱི་སྤྱི་བཤད་དང་། སྒོས་སུ་བོད་དུ་ཚད་མ་རིག་པ་དར་ཚུལ། ནང་བསྟན་ཆོས་ལུགས་ཀྱི་དབང་དུ་བྱས་ན་བཀའ་དང་པོ་བདེན་བཞིའི་ཆོས་འཁོར་ནས་བཟུང་གཏན་ཚིགས་རིག་པའི་རྣམ་གཞག་བསྟན་ཡོད་པ་དང། བསྟན་པ་སྔ་དར་གྱི་སྐབས་སུ་ཚད་མ་རིག་པར་འཆད་ཉན་གནང་སྟངས། བསྟན་པ་ཕྱི་དར་སྐབས་རྔོག་ལོ་ཡབ་སྲས་ཀྱིས་བོད་འདིར་ཚད་མ་རིག་པ་དར་རྒྱས་སོང་བ་དང།  གསང་ཕུའི་མཁན་རབས་བཞི་པ་ཕྱྭ་བ་ཆོས་ཀྱི་སེང་གེས་ཚད་མ་རིག་པ་འཆད་རྩོད་ཀྱི་རྣམ་གཞག་དེ་འཕེལ་རིམ་གསར་པ་ཞིག་ཏུ་ཕྱོགས་བཅུག་པ།  ཕྱིས་ན་འཇང་དགུན་ཆོས་སོགས་ཀྱི་སྲོལ་བྱུང་སྟེ་ཤིན་ཏུ་ནས་དར་འཕེལ་བྱུང་བ་སོགས་ཞིབ་ཏུ་གླེང་ཞིང། བོད་དུ་ཚད་མ་རིག་པའི་བསྟན་བཅོས་འཆད་སྤེལ་བརྒྱུད་རིམ་ལ་བཤད་སྲོལ་རིགས་མི་འདྲ་བ་ཆེན་པོ་གསུམ་གྱི་སྐོར་དང་། ས་པཎ་ནས་ཚད་མ་སྔ་རབས་པ་དང་ཚད་མ་ཕྱི་རབས་པའི་ཐ་སྙད་བྱེད་པ་འོས་འཚམ་ཡིན་མིན། ཚད་མ་རིག་པ་འདི་བཞིན་མདོ་བྱེ་བྲག་པ་ཞིག་ལ་ཁུངས་གཏུགས་ཞུ་ཡུལ་ཡོད་མེད་སོགས་ཀྱི་སྐོར་ལ་བགྲོ་གླེང་ལྷུག་པོ་བྱས།
༢ རིགས་ལམ་སློབ་གཉེར་ཁང་གི་དཔེ་ཁྲིད་རྒན་དགེ་བཤེས་དཀོན་མཆོག་དབང་འདུས་མཆོག་གིས།  བོད་བརྒྱུད་ནང་བསྟན་བོད་ཀྱི་མི་རབས་གསར་པས་རྒྱུན་འཛིན་བྱེད་ཐབས་ལས་འཕྲོས་ཏེ། ཁྱིམ་པའམ་སྐྱ་བོ་ཡིན་པའི་མི་རབས་གསར་པས་བོད་བརྒྱུད་ནང་བསྟན་འཛིན་སྐྱོང་བྱེད་ཚུལ་ལ་དེ་ངོ་འཕྲོད་པའི་ཐོག་ནས་བྱེད་དགོས་པས་དེ་ངོ་སྤྲོད་ཀྱི་རིམ་པ་དེ་ངེས་པར་རྩལ་འདོན་དགོས་པ་དང་། ཆོས་ཀྱི་ངོ་སྤྲོད་དེ་ཡང་གཙོ་བོ་ཀུན་སྤྱོད་ཀྱི་རྣམ་གཞག་དང་འབྲེལ་ནས་ངོ་སྤྲོད་བྱས་པ་ཡིན་ན་ངོ་འཕྲོད་སླ་བ་དང་། དེ་བཞིན་མི་སྒེར་གྱི་ཕན་ཐོགས་ནས་སྤྱི་ཚོགས་ཀྱི་ཕན་ཐོགས། དེ་ནས་འཛམ་གླིང་ལ་ཕན་ཐོགས་གང་ཡོད་སྐོར་མང་ཚོགས་ནང་འཆད་སྤེལ་གཏིང་ཚུགས་ཐུབ་པ་ཞིག་བྱེད་ཐུབ་པ་ཡིན་ན། གཞི་ནས་མང་ཚོགས་ནང་ཆོས་ཀྱི་གཞི་རྩ་ཞིག་ཚུགས་ཐུབ་རྒྱུ་དང། དེ་བཞིན་དུ་ནང་ཆོས་ཀྱི་ཀུན་སྤྱོད་རྣམ་གཞག་དེ་དག་རང་རྒྱུད་ལ་འཇགས་པ་ལས་མི་ཚད་ལྡན་ཞིག་བྱེད་པའི་ཐབས་ལ་ཕྱོགས་དགོས་པ་དང། ནང་ཆོས་ཁྱབ་སྤེལ་བྱེད་པ་དེ་ཡང་རང་གི་ཆོས་ལུགས་དར་སྤེལ་གྱི་ཆེད་དུ་མ་ཡིན་པ་ཞིག་དགོས་སྐོར་སོགས་གླེང་།
༣ ས་རཱའི་ནང་རིག་འཛིན་གྲྭའི་དགེ་རྒན་རབས་འབྱམས་པ་བློ་བཟང་བསོད་ནམས་མཆོག་གིས། གྲུབ་མཐའི་རྣམ་གཞག་དང་དེའི་གལ་གནད་ལས་འཕྲོས་ཏེ། སློབ་ཁྲིད་བྱེད་ཐབས་སྐོར་རང་གི་ཉམས་མྱོང་ཁྲོད་ངེས་ཤེས་བྱུང་བ་ཁག་ཅིག་གསལ་བཤད་དང་ཆབས་ཅིག གྲུབ་མཐའི་རྣམ་གཞག་ནི་དབང་ཤེས་ལས་འདས་པའི་ཡིད་ཤེས་སམ་བསམ་བློའི་རྣམ་གཞག་དང་འབྲེལ་བའི་ལྟ་ཚུལ་ཞིག་ཡིན་པ་སོགས་གླེང་ཞིང་། དངོས་གཞི་དྲི་རྨེད་ཀྱི་སྐབས་སུ།  ལྟ་བ་དང་གྲུབ་མཐའི་ཁྱད་པར་སྐོར་དང་། ཤེས་རབ་ལ་བརྟེན་ནས་བདེན་པ་འཚོལ་བའི་རིག་པ་དེ་གྲོལ་བའི་རིག་པ་དང་། དེ་ཉིད་རྒྱུད་ཐོག་ཏུ་སྦྱར་བ་དེ་ཀུན་སྤྱོད་ཀྱི་རྣམ་གཞག་ཡིན་པས་དེ་ལ་སྡུད་པའི་རིག་པ་ཞེས་པ་ལྟ་བུའི་ཐ་སྙད་སྦྱར་ན་འགྲིག་མིན་གྱི་སྐོར་དོགས་སློང་དང་བཅས་ཏེ་གླེང་།
༤ དཔེ་མཛོད་འགན་འཛིན་དགེ་བཤེས་ལྷག་རྡོར་མཆོག་གིས། དེང་དུས་དང་མཐུན་པའི་ནང་ཆོས་སློབ་ཁྲིད་བྱེད་ཐབས་ལས་འཕྲོས་ཏེ། དེང་དུས་དང་མཐུན་པ་ཞེས་པ་དེ་ནི་དངོས་ཡོད་གནས་ཚུལ་དང་མཐུན་པ་ཞིག་དགོས་པ་དེ་གལ་ཆེ་བ་ཞིག་རེད། དེ་བཞིན་དུ་༸གོང་ས་མཆོག་གིས་དུས་རབས་ཉི་ཤུ་རྩ་གཅིག་པའི་ཆོས་པ་ཞེས་པ་དེ་ཆོས་ལ་བསྒྱུར་བཅོས་ཀྱི་ཆེད་གསུངས་པ་མ་རེད་ཅེས་དང་། གཙོ་དོན་མིའི་བསམ་བློའི་དགོས་མཁོ་དང་མཐུན་པར་འགྲེལ་བརྗོད་བྱེད་དགོས་པ་དང་། གཞན་དོན་ཆེད་བློས་གཏོང་གི་བསམ་བློ་ཞིག་ཡོད་དགོས་པ་དེ་ངེས་པར་གལ་ཆེ་བ། བརྡ་འཕྲིན་གྱི་བརྒྱུད་ལམ་དེ་བེད་སྤྱོད་བྱེད་གལ་ཆེ་བ་བཅས་གླེང་།
གསུམ། བརྡ་སྤྲོད་བགྲོ་གླེང།
༡ བོད་ཀྱི་དཔེ་མཛོད་ཁང་གི་སྐད་ཡིག་སློབ་དཔོན་ན་ག་སངས་རྒྱས་བསྟན་དར་མཆོག་གིས། བརྡ་སྤྲོད་རིག་པའི་དཀའ་གནད་ཀྱི་བརྗོད་གཞི་ལས་འཕྲོས་ཏེ།  བརྡ་སྤྲོད་དང་སྐད་ཡིག་གཉིས་ཕུང་པོ་གཅིག་ཏུ་ངོས་འཛིན་བྱེད་དགོས་པ་དང་། བོད་ལ་བརྡ་སྤྲོད་རིག་པ་བཤད་པའི་སྐབས་སུ་ཆ་མ་ཚང་བ་ཡོད་ནའང་། ལག་ལེན་གྱི་ཐོག་ལ་དཀའ་ངལ་མེད་པ། དེང་སང་བོད་ཀྱི་གཞོན་སྐྱེས་ཚོའི་ནང་སྐད་ཡིག་གཞན་པའི་འགྲོ་སྟངས་ཀྱི་བསམ་བློ་གཏོང་ཕྱོགས་ཀྱི་དབང་གིས་བོད་ཀྱི་སྐད་ཡིག་གི་སྒྲོམ་གཞི་དང་གོ་རིམ་འཁྲུག་རྐྱེན་ཡོང་གི་ཡོད་པ། ཐ་སྙད་གཡར་ན་སྐྱོན་ཆ་མེད་ཀྱང་ཚིག་སྦྱོར་གྱི་གོ་རིམ་འཁྲུག་པ་དང་ཚིག་ཕྲད་གཡར་ན་གཏན་ནས་མི་འགྲིག་པ་སོགས་དང་། དགེ་རྒན་གཙོ་བོར་བྱས་པའི་ཤེས་ཡོན་པ་དག་གིས་གཏམ་བཤད་ཀྱི་སྐབས་ཙམ་མ་ཡིན་པར། དུས་རྒྱུན་དུ་ནས་སྐད་ཡིག་དང་རིག་གཞུང་དར་སྤེལ་ལ་ཤུགས་རྒྱག་དགོས་པའི་རེ་སྐུལ་ནན་ཏུ་གནང་།
༢ ཀིརྟི་བྱེས་པ་གྲྭ་ཚང་གི་དགེ་རྒན་འབྲིང་བ་འཇིགས་མེད་ལགས་ཀྱིས། བོད་ཀྱི་སྲོལ་རྒྱུན་བརྡ་སྤྲོད་རིག་པའི་རིན་ཐང་དང་རྒྱུན་འཛིན་གྱི་གལ་གནད་ལས་འཕྲོས་ཏེ། ཞང་ཡིག་བོད་ཡིག་མིན་པ་དང། སུམ་རྟགས་རྩ་ཚིག་ཐོན་མིས་མཛད་པ། རང་གིས་སྦྱོང་སྟངས་དང་གཞན་ལ་སློབ་སྟངས། སྲོལ་རྒྱུན་གྱི་སློབ་ཚན་དབྱེ་ཞིབ་བྱེད་ལུགས། སློབ་ཁྲིད་ཐབས་ལམ། བོད་ཀྱི་སྲོལ་རྒྱུན་བརྡ་སྤྲོད་ཀྱི་དགོས་དོན་དང་རིན་ཐང། བརྡ་སྤྲོད་འཆད་ཐབས་དེ་འཛིན་གྲྭ་རིམ་པའི་གོ་རིམ་དང་མཐུན་པར་སློབ་ཁྲིད་བྱེད་སྟངས་སོགས་གཙོ་ཆེ་སློབ་ཁྲིད་ཀྱི་གནད་འགག་མང་པོ་ཞིག་རྩལ་འདོན་གྱིས་བགྲོ་གླེང་གནང་།
༣ ཝ་ན་མཐོ་སློབ་ཀྱི་དགེ་རྒན་ལྷག་པ་ཚེ་རིང་ལགས་ཀྱིས། དེང་རབས་དང་མཐུན་པའི་སྒོ་ནས་མཐོ་སློབ་ཅིག་ལ་བོད་ཀྱི་བརྡ་སྤྲོད་སློབ་ཁྲིད་བྱེད་ཐབས་ཞེས་པའི་བརྗོད་གཞི་ལས་འཕྲོས་ཏེ། དེང་དུས་དང་མཐུན་པའི་སློབ་ཁྲིད་ཐབས་ལམ་སྐོར་མདོར་བསྡུས་ན། དགེ་རྒན་གཅིག་པུས་བཤད་བསྡད་པ་ཞིག་མ་ཡིན་པར། སློབ་ཕྲུག་གིས་ཆ་ཤས་མང་བ་ལེན་དགོས་པ། དེང་དུས་དང་མཐུན་པའི་དགེ་རྒན་གྱི་ཁྱད་ཆོས་དང་ལྡན་པ། བསླབ་གཞི་ལ་བྱང་ཆུབ་པ། བྱམས་བརྩེ་དང་བཟོད་བསྲན་ཆེ་བ་དང་། དོ་སྣང་མི་བྱེད་པའི་སློབ་ཕྲུག་ལ་གཙོ་བོར་ཕྱོགས་པ། སློབ་གྲྭའི་ར་བའི་ནང་དུ་རང་དབང་ཡོད་ལ་སྒྲིག་འཛུགས་ཡོད་པ་གལ་ཆེ་བ། དགེ་རྒན་ནི་སློབ་ཕྲུག་གི་གྲོགས་པོ་དང། ལམ་སྟོན་པ། མགོན་སྐྱབས་གསུམ་གར་འགྱུར་བ་ཞིག་དགོས་པ། སློབ་ཚན་ལ་མཚོན་ན། སྤྱིར་བཏང་གི་སློབ་ཚན་བསྒྲིགས་པ་དང་དམིགས་བསལ་གྱི་སློབ་ཚན་བསྒྲིགས་པ། དམིགས་བསལ་གྱི་རིག་ཚན་ཞིག་གི་སློབ་ཚན་བསྒྲིགས་ཕྱོགས་དེ་གང་ལེགས་པ་དེ་ལེན་པ་ལས་དེབ་གཅིག་ཧྲིལ་གྱིས་ལེན་པའི་སྲོལ་དུ་མ་ཡིན་པ། འཁྲིད་སྟངས་དེ་ཡང། ཆེ་ས་ནས་ཆུང་སར་འཁྲིད་པ། མངོན་སུམ་ནས་ལྐོག་གྱུར་ཏུ་འཁྲིད་པ། རགས་ས་ནས་ཕྲ་སར་འཁྲིད་པ། ཉམས་མྱོང་ནས་རིག་པར་འཁྲིད་པ། ཤེས་སླ་ཞིང་བརྗེད་དཀའ་བ་ཞིག་འཁྲིད་ཐབས་གལ་ཆེ་བ་བཅས་གསལ་འདོན་གནང།
༤ ས་རཱ་མཐོ་སློབ་ཀྱི་དགེ་རྒན་བསོད་ནམས་རྒྱལ་མཚན་ལགས་ཀྱིས། བརྡ་སྤྲོད་རིག་པའི་གལ་གནད་སྐོར་ལས་འཕྲོས་ཏེ། བོད་ལ་སྒྲའི་བསྟན་བཅོས་བརྒྱད་ཡོད་མེད། གཞུང་ལུགས་ལ་གཞུང་ལུགས་ཀྱི་ཐོག་ནས་བལྟ་མི་དགོས་པར་ལག་ལེན་གྱི་ཐོག་ནས་སྐད་ཀྱི་རྣམ་གཞག་སྟོན་པའི་གཞུང་ལུགས་ལ་བལྟ་དགོས་པ། སུམ་ཅུ་པ་ནས་མཚམས་སྦྱོར་གྱི་རྣམ་གཞག་དང་རྟགས་འཇུག་ནས་ལས་ཚིག་གི་རྣམ་གཞག་བསྟན་པ་སོགས་ཀྱི་སྐོར་དང་། གཞན་ཡང་། རྗེས་འཇུག་གི་ཡི་གེ་ནི་མིང་སྒྲུབ་བྱེད་དང་མིང་ཚིག་སྒྲུབ་བྱེད་ཀྱི་ལས་ཀ་ཆ་ཚང་བྱེད་མཁན་ཡིན་པ་སོགས་བོད་ཀྱི་བརྡ་སྤྲོད་རྣམ་གཞག་དང་ལེགས་སྦྱར་གྱི་བརྡ་སྤྲོད་རྣམ་གཞག་བསྡུར་ཏེ་གླེང་།
༥ སེར་བྱེས་ལྷ་རམས་པ་རོང་པོ་བློ་བཟང་སྙན་གྲགས་མཆོག་གིས། བོད་ཀྱི་བརྡ་སྤྲོད་རིག་པར་སྣོན་འཕྲི་གང་ཞིག་དགོས་མིན་སྐོར་ལས་འཕྲོས་ཏེ། བོད་ཀྱི་བརྡ་སྤྲོད་རིག་པའི་གཞུང་ལུགས་དང་ལག་ལེན་བར་གྱི་འགལ་འདུ་ལས་བྱུང་བའི་གནད་དོན་འགའ་ཞིག་ལ་ལྟ་སྟངས་དང་། གཞུང་ལུགས་དང་ལག་ལེན་གྱི་བར་ཁྱད། མཁས་པ་དག་གི་བཀའ་འབུམ་ལྟ་བུར་ད་ལྟའི་བརྡ་སྤྲོད་ཀྱི་འགྲོ་སྟངས་དང་རང་ཉིད་ཀྱི་ཤེས་ཚད་ཀྱི་ཐོག་ནས་ཞུས་དག་བྱས་ན་དག་མ་དག་པར་བཟོ་བ་དང། མཁས་པའི་གཞུང་རྩོམ་ནང་ཁ་མི་མཐུན་པར་བྱེད་པའི་ཉེན་ཁ་ཡོང་སྲིད་པ། ཐ་སྙད་གསར་བཟོ་དགོས་པའི་དབང་དུ་བྱས་ནའང། ངེས་པར་དུ། སྔོན་གྱི་ཚེ་ན་ཡོད་མེད་བསྔོགས་པ་དང་། མེད་ན་གསར་དུ་སྦྱོར་བ། ཅི་སྟེ་གཞན་སྐད་ནས་གཡར་དགོས་བྱུང་ན་གཡོར་བ་བཅས་ཀྱི་ལམ་ནས་ཐ་སྙད་གཏན་འབེབས་བྱེད་དགོས་པ། ཕལ་སྐད་དང་ཡིག་སྐད་བར་གྱི་བར་ཐག་ཆེ་བ། ཕལ་སྐད་མ་གཏོགས་ཡིག་སྐད་ཀྱིས་མཚོན་མི་ཐུབ་པའི་གནས་ཚུལ་ཡོད་པ། རྗེ་རིན་པོ་ཆེ་དང་མཁས་གྲུབ་དང་རྒྱལ་ཚབ་དག་གིས་ད་དྲག་གི་ཐོབ་ཐང་སྦྱོར་ལུགས་མི་འདྲ་བས་གཅིག་གྱུར་བྱེད་དཀའ་བ། སྒྲ་མཐུན་དང་བརྗོད་བདེ་རྟགས་མཚུངས་གསུམ་གྱི་ཁྱད་པར། སི་ཏུས་བརྗོད་བདེ་དང་རྟགས་མཚུངས་གཉིས་ཀ་སྒྲ་མཐུན་གྱི་ཁོངས་སུ་བགྲངས་ཚུལ། ཚེ་ཏན་ཞབས་དྲུང་དང་དམུ་དགེ་བསམ་གཏན་སོགས་ཀྱི་པ་བའི་སྦྱོར་ཚུལ་དེ་རྗེ་རིན་པོ་ཆེའི་ལུགས་ཀྱི་པ་བའི་ཐོབ་ཐང་གི་འགྲོ་སྟངས་ལྟར་སྦྱར་བ་དང།  རྗེ་རིན་པོ་ཆེའི་པ་བའི་ཐོབ་ཐང་གི་སྦྱོར་ཚུལ་ནི་དབུས་གཙང་གི་མཁས་པའི་མདུན་ནས་སྦྱང་བ་དང་ཁོང་གི་ཡིག་མཁན་དག་ནི་གཙང་པ་ཡིན་པ། འགྲོ་ལུགས་དེ་ཉིད་རྩ་བ་མཁན་པོའི་འགྲོས་དང་མཐུན་མིན་སོགས་ལ་དཔྱད་ཞིབ་གལ་ཆེན་པོ་ཡིན་པ་སོགས་ཞིབ་རྒྱས་གླེང་།
བཞི། རྩོམ་རིག་བགྲོ་གླེང།
༡ ཝ་ན་མཐོ་སློབ་ཀྱི་དགེ་རྒན་བཀྲ་ཤིས་ཚེ་རིང་ལགས་ཀྱིས། རྩོམ་རིག་གི་གོ་དོན་ཐད་ཤར་ནུབ་མཁས་པའི་འདོད་ཚུལ་ལས་འཕྲོས་ཏེ། རང་རེ་བོད་ལ་མཚོན་ན། རྩོམ་རིག་ཅེས་པའི་ཐ་སྙད་འདི་རྒྱ་ཁབ་ཏུ་བེད་སྤྱོད་དེ་ལྔ་བཅུ་ང་དགུའི་རྗེས་ནས་ཡིན་ཚུལ་དང་། དབྱིན་ཇིའི་སྐད་ཀྱི་ཐོག་ནས་བཤད་ན་རྩོམ་རིག་དང་སྙན་ངག་ལ་ཁྱད་པར་ཡོད་པ་དང། དེ་ཡང་གཙོ་བོ་རྩོམ་ལུས་ཀྱི་ཐོག་ནས་ཁྱད་པར་ཡོང་གི་ཡོད་པ་སོགས་རྩོམ་རིག་ཅེས་པའི་གོ་དོན་ཐད་བཞེད་ལུགས་སྣ་ཚོགས་ཡོད་པའི་སྐོར་གླེང།
༢ ནོར་གླིང་ཉམས་ཞིབ་པ་ཨ་འཇམ་དབྱངས་ཚུལ་ཁྲིམས་ལགས་ཀྱིས། སྙན་ངག་གསར་པའི་སྐོར་ལས་འཕྲོས་ཏེ། སྙན་ངག་པར་དཀའ་ངལ་འཕྲད་ཀྱི་ཡོད་པ་སྤྱི་ཚོགས་ཁོར་ཡུག་ཚད་ལྡན་མེད་པས་ཡིན་པ་དང་། རྩོམ་ཡིག་སྤེལ་སའི་སྡིངས་ཆ་མེད་པ། སྙན་ངག་འབྲི་མཁན་དག་ལ་མུ་མཐུད་སྙན་ངག་འབྲི་བའི་སྤོབས་པ་མེད་པས་རྒྱུན་མཐུད་མ་ཐུབ་པ། ཁ་གྲངས་དང་སྤུས་ཚད་དོ་མ་སྙོམས་པ། རྩོམ་སྒྲིག་པ་རེ་ཤས་ནས་སྙན་ངག་རྩོམ་རིག་ལ་བཅད་གཏུབས་ཚད་ལས་བརྒལ་བ་བྱེད་པའི་དཀའ་ངལ་སོགས་དང་། གཞན་ཡང་། འཛམ་གླིང་འདིར་རྩོམ་རིག་སྨྲ་བ་ཚོས་སྙན་ངག་ལ་མཚན་ཉིད་བརྒྱ་ཕྲག་བརྒལ་བ་བཞག་ཡོད་པ་དེ་སྙན་ངག་གི་རིན་ཐང་དང་འབྲེལ་བ་ཡོད་པ། སྙན་ངག་ལ་བརྟེན་ནས་དགྲ་ཤ་ལེན་པའི་ནུས་པ་དང།  སེམས་ཁམས་དང་འཕྲོད་བསྟེན་ཐོག་གི་ནུས་པ་དང་རིན་ཐང། བརྩེ་དུང་ཤུགས་ཆེན་པོ་མཚོན་པའི་ནུས་པ་དང། འཚོ་བ་དང་ཞིང་ཕྱུགས་ཀྱི་ལས་དོན་དང་འབྲེལ་བ་ཡོད་པའི་རིན་ཐང། རིག་གནས་ཐམས་ཅད་སྙན་ངག་དང་འབྲེལ་བ་དང། མིའི་བསམ་བློ་དང་དེ་མཚོན་པའི་སྐད་ཆ་ལ་འཛད་མཐའ་མེད་པ་བཞིན་དུ་སྙན་ངག་ལ་འཛད་མཐའ་མེད་པ། སྙན་ངག་ལ་བརྟེན་ནས་སྤྱི་ཚོགས་ཀྱི་དཀའ་ངལ་ལ་ཐད་ཀར་གདོང་ལེན་བྱེད་ཐུབ་ཀྱི་ཡོད་པ་སོགས་སྙན་ངག་གི་རིན་ཐང་སྐོར་དང་། སྙན་ངག་གི་མཚོན་དོན་སོགས་གླེང་། 
༣ ཝར་ན་མཐོ་སློབ་ཀྱི་དགེ་རྒན་བློ་བཟང་ནོར་བུ་མཆོག་གིས།  སྡེབ་སྦྱོར་རིག་པ་དང་སྙན་ངག་གི་འབྲེལ་བ་ལས་འཕྲོས་ཏེ། ལེགས་སྦྱར་སྐད་ཀྱི་དབང་དུ་བྱས་ཏེ། ཡི་གེའི་ལྕི་ཡང་བསྒྲིག་པའི་སྙན་ཆ་དང། ངལ་གསོའི་སྡོད་མཚམས་སོགས་བོད་སྐད་དུ་ཡང་ལག་ལེན་དུ་འགེལ་འོས་ཚུལ་དུང་དཀར་གྱི་ཚིགས་བཅད་རྩོམ་ཚུལ་ནས་སྦྲགས་བཤད་པ་དང་ཆབས་ཅིག བོད་སྐད་ལའང་ལེགས་སྦྱར་བཞིན་གྱི་སྡེབ་སྦྱོར་ཡོད་པ། འགྲོ་ལྡན་འཐེང་པོ་ཞེས་ཚིགས་བཅད་རྐང་པ་དོ་མི་སྙོམས་པའི་རྩོམ་སྟངས་ཡོད་པ། སྡེབ་སྦྱོར་བྱེད་ཚུལ་རྒྱ་གར་དང་འདྲ་བ་བོད་ཀྱི་གནའ་བོའི་རྩོམ་གྱི་ནང་དུ་ཡོད་པ། གླུ་ཐལ་སྦྱར་མའི་སྙན་ཚིག་བོད་བསྒྱུར་མ་དེར་སྡེབ་སྦྱོར་ཉམས་པའི་སྐྱོན་ཡོད་ཚུལ། སྡེབ་སྦྱོར་གྱི་ཁྱད་ཆོས་གཙོ་བོ་ནི། རང་གིས་བརྗོད་བདེ་ཞིང་གཞན་གྱི་རྣར་སྙན་པ་ཞིག་ལ་གོ་བ། རྩོམ་རྩལ་གྱི་ལེགས་ཉེས་དེ་ཚིགས་བཅད་ཀྱི་སྟེང་ནས་བཤད་མི་ཐུབ་པར་ལྷུག་རྩོམ་གྱི་ཐོག་ནས་བལྟ་དགོས་པའི་བཤད་སྲོལ་ཞིག་རྒྱ་གར་མཁས་པའི་ནང་དུ་ཡོད་པ་སོགས་ཞིབ་གླེང་གནང།
༤ ནོར་གླིང་མཛད་རྣམ་རྩོམ་སྒྲིག་པ་ཨ་ཚོགས་བསྟན་འཛིན་འཇམ་དབྱངས་ལགས་ཀྱིས། སྲོལ་རྒྱུན་རྩོམ་རིག་གི་རིན་ཐང་དང་རྒྱུན་འཛིན་བྱེད་ཐབས་ལས་འཕྲོས་ཏེ། རྩོམ་རིག་གིས། ལོ་རྒྱུས་ཀྱི་ཆ། དངོས་ཡོད་འཚོ་བའི་ཆ། ཚོར་འདུའི་ཆ་གསུམ་མཚོན་དགོས་པ། གཞན་ཡང། རྩོམ་རིག་གི་ཁྱབ་ཚད་ཀྱི་རང་བཞིན། བཀོལ་སྤྱོད་རང་བཞིན། ཕན་ནུས་རང་བཞིན། འགན་ལེན་གྱི་རང་བཞིན།  གཅིག་གྱུར་རང་བཞིན་དང་། རྩོམ་ཡིག་གང་ཞིག་གི་ལེགས་ཉེས་དང་སྒྱུ་རྩལ་གྱི་ཆ་ལ་དཔྱད་པ་བྱེད་པ་སོགས་བརྒྱུད་ནས་རྩོམ་རིག་དར་སྤེལ་དགོས་པ་སོགས་གླེང་།
༥ བོད་གཞུང་ཤེས་རིག་ལས་ཁུངས་ཀྱི་ཉམས་ཞིབ་པ་དང་རྩོམ་སྒྲིག་པ་ཆུང་ཚེ་རིང་ལགས་ཀྱིས། བཙན་བྱོལ་ནང་གི་བརྩམས་སྒྲུང་གི་གནས་བབ་དང་ཡར་རྒྱས་གཏོང་ཕྱོགས་ལས་འཕྲོས་ཏེ། བཙན་བྱོལ་ནང་གི་བརྩམས་སྒྲུང་གི་འཕེལ་རིམ་དེ་རིམ་པ་གསུམ་གྱིས་གྲུབ་ཡོད་ནའང། དེ་ཚོའི་བར་སྔ་མ་སྔ་མ་ཕྱི་མ་ཕྱི་མའི་རྨང་གཞི་བྱས་པ་སོགས་ཀྱི་འབྲེལ་བ་ཡེ་མེད་པར་ཡོད་པ་དང། དེ་ཡང་།  བོད་མིའི་རང་དབང་གསར་ཤོག་ནས་མགོ་བཙུགས་པའི་ད་ལྟའི་དུས་དེབ་ཁག་བར་གྱི་བརྩམས་སྒྲུང་དག་ནི། ཕྱི་ལོ་ ༡༩༦༠  ནས་ཕྱི་ལོ་ ༡༩༨༠ དང་། ཕྱི་ལོ་ ༡༩༨༠ ནས་ཕྱི་ལོ་ ༡༩༩༠ བར། ཕྱི་ལོ་ ༡༩༩༠ ནས་ཕྱི་ལོ་ ༢༠༠༩  བར་གྱི་རྩོམ་རིག་སྤྱི་དང་བརྩམས་སྒྲུང་གི་འཕེལ་རིམ་ནང། གྲངས་འབོར་ཅི་བྱུང་དང་། དགེ་སྐྱོན་ཅི་མཆིས་སོགས་ཞིབ་གླེང་དང་། ལོ་རབས་དགུ་བཅུ་པ་ནས་བཙན་བྱོལ་སྤྱི་ཚོགས་ཀྱི་ཁོར་ཡུག་ལ་གཞི་རྩའི་ཆ་ནས་འགྱུར་ལྡོག་བྱུང་བ་བཅས་འཕེལ་རིམ་གྱི་སྐོར་དང་། སྒྲུང་གི་ངོས་འཛིན་དང་། འབྲི་ཐབས། བསམ་བློའི་བཀོད་སྒྲིག་སོགས་ལས་འཕྲོས་ཏེ། སྒྲུང་རྩོམ་འབྲི་སྟངས་ཀྱི་སྐོར་དང་། དེའི་དཀའ་ངལ་གྱི་སྐོར་སོགས་ཕྱོགས་མང་པོ་ནས་གླེང་།
བཞི། སློབ་ཚན་བགྲོ་གླེང།
ཆེས་མཐོའི་རིག་གནས་རབ་འབྱམས་པའམ། ཡོངས་གྲགས་ཞིབ་འཇུག་སློབ་མའི་སློབ་ཚན་གྱི་སྐོར་ལ། བརྡ་སྤྲོད། རྩོམ་རིག། ལོ་རྒྱུས་བཅས་སློབ་གཞི་གསུམ་གྱི་སྟེང་བགྲོ་གླེང་གནང་ཞིང་། འདི་ནི་མ་འོངས་པར་གསར་འཛུགས་ཞུ་འཆར་གྱི་ཆེས་མཐོའི་རིག་གནས་རབ་འབྱམས་པའི་སློབ་ཚན་གཏན་འབེབས་ཀྱི་གཞི་སྒྲོམ་འཚོལ་བ་ལ་ཞུགས་པའི་བགྲོ་གླེང་དམིགས་བསལ་བ་ཞིག་ཆགས་ཡོད། ས་རཱ་མཐོ་སློབ་ཀྱི་ངོས་ནས་ངོ་སྤྲོད་གནང་དོན་ལྟར་ན། ད་ཡོད་མཐོ་རིམ་རིག་གནས་རབ་འབྱམས་པའི་སློབ་ཚན་ནི། བོད་ཀྱི་བརྡ་སྤྲོད་རིག་པ་དང་རྩོམ་རིག་གཉིས་གཙོ་བོར་བྱས་པའི་སྐད་ཡིག་གི་སློབ་ཚན་དེ་ཤུགས་ཆེན་པོར་བཞག་ཡོད་སྟབས། མ་འོངས་པར་གསར་འཛུགས་བྱ་འཆར་གྱི་ཆེས་མཐོའི་རིག་གནས་རབ་འབྱམས་པའི་སློབ་ཚན་གྱི་གཞི་རྩ་ཡང་འདིའི་སྟེང་ནས་འཛུགས་དགོས་པ་དང། གཞི་རྩ་དེའི་སྟེང་ནས་ཆེས་མཐོའི་རིག་གནས་རབ་འབྱམས་པའི་སློབ་ཚན་གཏན་འཁེལ་དགོས་པར་མཐོང་གི་ཡོད་ཚུལ་དང་བཅས་ཏེ། འབྲེལ་ཡོད་མཁས་པ་རྣམས་ཀྱིས་དགོངས་འཆར་དང་བགྲོ་གླེང་ལྷུག་པོ་གནང་སྐྱོང་ཡོང་བའི་རེ་འདུན་བཏོན་པ་གཞིར་བཞག་གིས་བགྲོ་གླེང་འཁྲུག་ཆ་དོད་པོ་གནང་བའི་སྙིང་དོན་དག་ཚུར་བསྡུས་ན།  ཆེས་མཐོའི་རིག་གནས་རབ་འབྱམས་པ་བསྐྱེད་བསྲིང་བྱེད་པའི་དམིགས་ཕྱོགས་གསལ་པོ་དགོས་པ། སུམ་རྟགས་བསྐྱར་སྦྱོང་ལྟ་བུ་མ་ཡིན་པར་ཚད་མཐོ་བའི་གནས་ཚད་ཞིག་ཏུ་ཕྱོགས་དགོས་པ། ནང་དོན་དང་རྣམ་པ་གཉིས་ཐད་ནས་ཁ་ཕྱོགས་གསར་པ་ཞིག་ཏུ་ཕེབས་དགོས་པ། ས་རཱའི་སློབ་ཚན་ཁག་གི་གནས་ཚད་དང་མཐུན་པའི་སློབ་མའི་ཤེས་ཚད་ཡར་རྒྱས་ཡོང་གི་ཡོད་མེད། སྤྱི་ཚོགས་ཀྱི་དཀའ་ངལ་གཞི་ལ་བཞག་པའི་ཞིབ་འཇུག་སློབ་མའི་སློབ་གཞི་གཏན་འཁེལ་བྱེད་དགོས་པ། སྔ་མའི་སློབ་ཚན་ལ་བསྐྱར་ཞིབ་ཀྱིས་དེ་ནས་ཆེས་མཐོའི་རིག་གནས་རབ་འབྱམས་པའི་སློབ་ཚན་གོ་སྒྲིག་དང་དཔྱད་གླེང་བྱེད་དགོས་པ། ས་རཱའི་སློབ་ཚན་དང་སློབ་མའི་ཤེས་ཚད་བར་གྱི་དཀའ་ངལ་ངོས་འཛིན། ད་ཡོད་སློབ་མའི་ཤེས་ཚད་དང་གསར་ཞུགས་སློབ་མའི་ཤེས་ཚད་བཅས་ལ་བལྟས་ནས། ད་ལྟ་དང་མ་འོངས་པའི་སློབ་གཞི་གཏན་འཁེལ་དགོས་པ་བཅས་སྤྱི་བབ་ཀྱི་བསམ་ཚུལ་རིགས་གཅིག་དང་། དེ་ནས་སློབ་ཚན་དངོས་གཞིར་བགྲོ་གླེང་སྐབས། དགེ་རྒན་གྱི་ཕྱག་ལས་རྒྱུན་རིང་གནང་མྱོང་མཁན་ཚོས། ང་ཚོའི་འཛིན་རིམ་བཅུ་གཉིས་པའི་ཤེས་ཚད་འདི་སྤྱི་ཡོངས་འཛིན་རིམ་བཅུ་གཉིས་པའི་ཤེས་ཚད་ལས་སྐྱོ་བ་དང་། དེ་ལས་ཀྱང་སྐད་ཡིག་གཉིས་པ་དེ་སྐད་ཡིག་དང་པོར་བཞག་ནས་འཁྲིད་སླེབས་པའི་གནས་ཚད་དེ་ཡང་སྐྱོ་བོ་ཡིན་པའི་དཀའ་ངལ་དང་། དེ་འབྲེལ་མཐོ་རིམ་ནས་མཐོ་རིམ་དུ་བསྐྱོད་སྐབས་ཀྱང་ལག་འཁྱེར་དེ་ཡར་སོང་བ་ལས། ཤེས་ཚད་དེ་ཡར་མ་སོང་བ་སོགས་ལ་གདོང་ལེན་བྱེད་སྟངས་སོགས་དངོས་ཡོད་ཀྱི་དཀའ་ངལ་ཁག་ཅིག་གླེང་སློང་བཅས་ཚོགས་ཐུན་གཅིག་རིང་སྤྱི་ཡོངས་ཀྱི་གནས་སྟངས་གླེང་བསྡུར་གནང་བའི་མཇུག་ཏུ། སློབ་ཚན་དངོས་གཞིའི་སྟེང་བགྲོ་གླེང་སྐབས། སློབ་ཚན་རེ་རེ་བའི་འབབ་སྟེགས་འཚོལ་རིམ་ནང་དགོངས་ཚུལ་དང་བསམ་ཚུལ་སྣ་ཚོགས་ཤིག་སླེབས་ཤིང། མཐའ་མ་དེར། སློབ་ཚན་རེ་རེ་བར་ཚོགས་ཐེངས་རེ་རེ་བའི་དུས་བཅད་ཀྱིས་བགྲོ་གླེང་གི་བརྒྱུད་རིམ་ནང། སློབ་དེབ་འཚོལ་བའི་རིམ་པ་ལ་དཀའ་ངལ་འཕྲད་གཞི་གཅིག་ནི། མཐོ་རིམ་རིག་གནས་རབ་འབྱམས་པའི་སློབ་དེབ་དངོས་གཞི་དང་། ཟུར་ལྟའི་སློབ་དེབ་ནང་། ད་ཡོད་བོད་ཀྱི་རྒྱལ་རབས་ལོ་རྒྱུས་གྲགས་ཅན་ཁག་དང་། སུམ་རྟགས་ཀྱི་གཞུང་འགྲེལ་གྲགས་ཆེན་ཁག། དེ་བཞིན་སྙན་ངག་གི་འགྲེལ་བ་གྲགས་ཅན་ཁག གཞན་ཡང་། དེང་རབས་ཀྱི་རྩོམ་རིག་གཞུང་ལུགས་ཁག་ལས་བསྡུས་པའི་དེབ་གཞི་སྣ་ཚོགས་ཡོད་པ་དག་བཅས་མ་འདུས་པ་མེད་པ་ལྟ་བུར་ཡོད་པ་དེས། ཆེས་མཐོའི་རིག་གནས་རབ་འབྱམས་པའི་སློབ་ཚན་ལ་དེབ་གཞི་ཞིག་དམིགས་འདོན་བྱེད་པར་དཀའ་ངལ་འཕྲད་པའི་རྣམ་པ་མངོན་ཡོད་ཅིང། མཐའ་མ་དེར། དགེ་འདུན་རབ་གསལ་ལགས་ནས་བརྩམས་བསྒྲིགས་《རྩོམ་རིག་གི་བྱུང་བ་བརྗོད་པ་རབ་གསལ་མེ་ལོང》དང་། ལྷག་པ་ཆོས་འཕེལ་ལགས་ནས་བརྩམས་པ《རྩོམ་རིག་གི་རྩོམ་ལུས་རྣམ་གཞག》གཉིས་ཀྱིས་མཚོན་པའི་རྩོམ་རིག་དཔེ་དེབ་ཁག་ཅིག་དང་། མཁས་དབང་དགེ་འདུན་ཆོས་འཕེལ་གྱིས་མཛད་པ་《དེབ་ཐེར་དཀར་པོ》དང་། ཀ་ཐོག་ཚེ་དབང་རིག་འཛིན་གྱིས་བརྩམས་པ《བོད་བཙན་པོའི་གདུང་རབས་རིམ་བྱོན་གྱི་ལོ་རྒྱུས》 《ལ་དྭགས་རྒྱལ་རབས》 《གུང་ཐང་ལོ་རྒྱུས》སོགས་རྒྱལ་རབས་ལོ་རྒྱུས་ཀྱི་དེབ་ཐེར་སྐོར་ཞིག  ཚེ་ཏན་ཞབས་དྲུང་གིས་བརྩམས་པ《དག་ཡིག་ཐོན་མིའི་དགོངས་རྒྱན》དང་། འབྲས་སྤུངས་ཁྲི་པ་བསྟན་པ་བསྟན་འཛིན་གྱིས་བརྩམས་པ《བརྡ་སྤྲོད་འགྲེལ་བ་ཉི་ཟླ་ཟུང་འཇུག》སོགས་བརྡ་སྤྲོད་སྐོར་གྱི་དེབ་གཞི་ཁག་ཅིག་ཆེས་མཐོའི་རིག་གནས་རབ་འབྱམས་པའི་སློབ་གཞིར་འོས་པའི་མཚམས་སྦྱོར་ཞུ་ཐུབ་པ་བྱུང་ཡོད་པ་བཅས་ཀྱི་ངོ་སྤྲོད་ཉིང་བསྡུས་སུ།

བོད་ཀྱི་དུས་བབ་གསར་ཁང་གིས།