སྙི་མོ་སེམས་ལ་ན་ཟུག་ལྕི་ན་ཡང་།།
གོར་མོ་རྡོ་ལ་སྐད་ཆ་བཤད་མི་འདོད།།
ཡིན་ཡང་སེམས་ཀྱི་ཆུ་ཐིགས་རེ་རེ་ཡིས།།
རྡོ་འཁྱག་གོར་མོ་ཨུ་ཁུངས་གཏད་པ་མཐོང་།།
རང་གཤིས་གསེར་དུ་འཁྲུལ་བའི་གཤིས་ཀ་མེད།།
རང་རྩིས་ནོར་དུ་རློམ་པའི་ལྟ་བ་མེད།།
རང་ཉིད་བདེན་དུ་འཁྲུལ་བའི་རྣམ་དཔྱོད་མེད།།
མེད་མུག་འདི་གསུམ་རྒྱུན་དུ་ང་ལ་ཡོད།།
གྲགས་ན་སྲིད་པ་འགུལ་པའི་མིང་བྱང་མེད།།
དར་ནས་གླིང་བཞི་བསྐོར་བའི་སྒོར་མོ་མེད།།
དབའ་ནས་གཞན་སྲོག་གཅོད་པའི་མཚོན་ཆ་མེད།།
མེད་མུག་འདི་ཡིས་ང་རང་དམ་དུ་བཏེགས།།
མཚན་རེ་འཁྲུགས་པ་སྤྱོད་པའི་མཇེ་ཤུགས་མེད།།
ཉིན་རེ་ཆོ་འཕྲུལ་སྟོན་པའི་གཡོ་སྒྱུ་མེད།།
ཡོད་ཚད་གཞན་ལ་རེ་བའི་འདུན་པ་མེད།།
མེད་མུག་ཡི་ག་ལོག་པའི་གཅེར་བུ་ཡིན།།
ཆུང་དུས་བརྣག་སེམས་ཆེ་བའི་ངན་སྤྱོད་མེད།།
གཞོན་དུས་ལོང་ཚོ་ཚོང་བའི་འདུན་པ་མེད།།
རྒས་དུས་གཞན་གྱི་གསོ་བར་རེ་སྒུག་མེད།།
མེད་མུག་འཁྲུལ་སྣང་འདི་ཡིས་སེམས་པ་བསླུས།།
སྟོད་ནས་ཇག་པ་བྱས་པའི་ལོ་རྒྱུས་མེད།།
བར་ནས་གཞན་རྒྱུ་རྐུས་པའི་ནག་ཉེས་མེད།།
སྨད་ནས་རང་རིགས་བསླུ་བའི་རེ་འདོད་མེད།།
མེད་མུག་བྱང་ལ་ཆུབ་པའི་མི་རིགས་མིན།།
ཁ་ནས་གང་ཐོན་སྨྲ་བའི་མཁས་འདོད་མེད།།
ཁོག་ནས་གང་ཤར་བྱེད་བསམ་ལག་ལེན་མེད།།
ལུས་འདི་ཚེ་གཡོག་བྱེད་པའི་ཆོ་ལོ་མེད།།
མེད་མུག་འདི་ཡི་མི་ཚེ་རིན་ཐང་བཙལ།།
གཞན་སྲོག་བཅད་དེ་སེམས་ཅན་ཟེར་མྱོང་མེད།།
རང་སྲོག་སྲུང་དེ་གཞན་སྲོག་གཅོད་རྩིས་མེད།།
རང་གཞན་མི་གཅིག་བསམ་པའི་བསམ་བློ་མེད།།
མེད་མུག་ཤར་ཤར་གླེང་བའི་གཡོ་མཁན་མིན།།
བོད་དོན་གླིང་ལ་བསྒྲགས་པའི་བྱས་རྗེས་མེད།།
བོད་མི་རྒྱ་ལ་བཙོང་བའི་ཁེ་གྲགས་མེད།།
བོད་རིགས་ཁ་ཁར་གཏོང་བའི་སྤོབས་པ་མེད།།
མེད་མུག་འདྲེན་མཁན་ཚོ་ལ་ཡི་ཁ་ལོག།
མི་ཞིག་གིས་ད་ཕན་མི་ཚེ་ཅི་འདྲ་བསྐྱེལ་ཡོད་མེད་དེ། མི་དེ་ལོ་ག་ཚོད་ཡིན་པར་བལྟ་རྒྱུ་མིན་པར། མི་དེས་ལས་ཀ་ག་རེ་བྱས་འདུག་པར་བལྟ་དགོས།
ལིན་ཁེན་གསུང༌།
ཁ་བ་དཀར་པོ་ལགས། སྐུ་ཉིད་ཀྱིས་ཐུགས་འཁུར་ཆེན་པོའི་འོག་ནས་བདག་ལ་བསམ་སྐུལ་གནང་བ་དེར་བཀའ་དྲིན་ཆེ་ལགས། དེང་སང་ལས་བྲེལ་གྱི་དབང་གིས་སྒྲུང་རིང་དེའི་མཇུག་འབྲི་ཁོམ་མ་བྱུང་མོད། ཕྱིས་སུ་དུས་ཚོད་ངེས་ཅན་ཞིག་བཏང་ནས་སྒྲུང་དེའི་མཇུག་འཕུད་ངེས་ཡིན་ལགས། བློ་བཟང་གི་རེ་འདོད་ཀྱང་དེ་ཡིན་པས་ངས་ཁོ་རང་ལ་དམ་བཅའ་བཞག་ཡོད།
སྐར་ཆེན་འོད་བཞག་འཁྱིལ་བའི་རིན་ཆེན་ནོར།།
ཁྲི་འབུམ་བསྟར་ལ་བརྒྱུས་པའི་མུ་ཏུག་བཞིན།།
བཙན་པོའི་གདུང་རྒྱུད་ཅིག་གི་གཏམ་རྒྱུད་ལ།།
རུས་ཞེན་བརྩེ་འདང་ཟབ་པའི་སྤུན་ཟླ་ཡིན།།
བློ་རིག་ཧ་ཅང་བསྐྲུན་པའི་སྤུན་ཟླ་ལགས།།
ས་ཐོ་བྷ་བྷེ་མང་སའི་ཡུལ་གྲོང་ནས།།
རིགས་ཞེན་སྙིང་ལ་བཅིངས་པའི་གངས་ཅན་བུ།།
དུས་ཚོད་ཅི་ཡོད་འདི་རུ་ཕེབས་རོགས་ཞུ།།
གངས་ཅན་ཕ་ཡུལ་གཅིག་པའི་རུས་འདིས།།
ཆུ་དང་བྲག་རིའི་བར་ཐག་རིང་ན་ཡང་།།
གླིང་རྗེ་གེ་སེར་རྒྱལ་བོའི་མཛད་རྗེས་དེ།།
བུ་ངའི་ནམ་ཡང་མི་བརྗེད་སེམས་སུ་འཛིན།།
ཇིང་གི་སྲས་ཤིག་ཡིན་པ་སྔ་ནས་ཤེས།།
མིག་གི་རིག་ས་ཞིག་མེད་ན་ཡང་།།
སེམས་ཀྱི་བརྡ་གསུམ་བདག་ལ་སྐུར་བ་དེ།།
པ་མགོ་གྱུར་ཡང་ཡིད་ཀྱི་གཏིང་སར་འཇོག།།
འབྲོང་གི་ཕ་ས་ཞིག་ནས་སྐྱེ་བ་ཡིས།།
བུ་རྒོད་སྟོང་གི་སྤྲོད་ཀྱི་དབའ་བོ་ཞིག།།
དགོས་པའི་ཚིག་གི་ནང་དོན་ཞིབ་མོ་འདིས།།
སྤུན་ཟླ་བདག་གི་སེམས་ལ་དྲན་ཞིག་བསླེང་།།
རེད་ཡ། ཁྱེད་ཉིད་ཁྱེད་ཉིད་ཀྱི་འཇིག་རྟེན་ན་འཚོ་བས། ཁྱེད་ཀྱིས་ཁྱེད་ཀྱི་རིན་ཐང་རྟོགས་ཡོད་ཚོད་འདུག མི་ལ་རང་ཚུགས་དགོས་པ་ཅི་མི་བདེན།
སྙན་མོ་ཞིག་བྲིས་འདུག
སེམས་ཤུགས་མ་ཆག་ང་ཚོ་ནམ་ཡང་ཁྱེད་རྒྱབ་མདུན་དུ་འགྲེང་ནས་ཡོད།
དེང་སྐབས་འཇང་དགུན་ཆོས་ཀྱི་རྩོད་གསེང་ནས་ཁོམ་ལོང་ཞིག་མི་འདུག
མཚན་རེ་འཁྲུགས་པ་སྤྱོད་པའི་མཇེ་ཤུགས་མེད།།
ཉིན་རེ་ཆོ་འཕྲུལ་སྟོན་པའི་གཡོ་སྒྱུ་མེད།།
ཡོད་ཚད་གཞན་ལ་རེ་བའི་འདུན་པ་མེད།།
མེད་མུག་ཡི་ག་ལོག་པའི་གཅེར་བུ་ཡིན།།
ཁྱོད་ཀྱི
བོད་ཀྱི་ལ་རྒྱ་འཛིན་པའི་སྙིང་སྟོབས་ཡོད།།
རིགས་ལ་སེམས་པ་དཀར་བའི་རང་གཤིས་ཡོད།།
ཀུན་དང་མཐུན་ལམ་ལེགས་པའི་བཟང་སྤྱོད་ཡོད།།
ཡོད་པ་གསུམ་འདི་ཁྱོད་ཀྱི་ནོར་དུ་སྣང་།།
སྒྲུང་རྩོམ་རིང་བོ་འབྲི་བའི་སྨྱུག་རྩལ་ཡོད།།
དྲང་བདེན་སྐད་ཆ་བཤད་པའི་བློ་སྟོབས་ཡོད།།
ཞེན་ངན་དྲི་མས་མ་གོས་བཟང་ཆ་ཡོད།།
ཡོད་པ་གསུམ་འདི་ཁྱོད་རྒྱན་ཆ་ཉིད།།
མཐོན་པོར་ལྕེ་ནར་མེད་པའི་གོམས་སྲོལ་ཡོད།།
དམན་ལ་ཐུབ་ཚོད་མེད་པའི་བྱམས་སེམས་ཡོད།།
བར་ལ་ལྐོག་གཡོ་མེད་པའི་དམ་བཅའ་ཡོད།།
ཡོད་པ་འདི་གསུམ་ཁྱོད་གཟི་བརྗིད་ལགས།།
ད་རུང་ཡོད་དང་། མི་ཁོམ་གྱི་ལོ་བརྒྱ་མ་ལོན་རུང་དྲུག་བཅུ་ལ་སེམས་འཁྲལ་མེད་པའི་སྨོན་ལམ། ད་ང་འགྲོ་རན་སོང་།
ཁྱོས་སྦྱིན་བདག་མི་བྱེད། གྲྭ་པ་མི་དགོས་ཟེར་བའི་སྒྲུང་སྙན་མོ་དེ་ཧོབ་སྟེ་མཇུག་བསྡུས་བཞག་སོང་བ་དེ་ཅི་ཞིག་མ་འགྲིགས་པ་རེད། ངས་ཞིབ་ཏུ་ལྟ་དུས་ཁྱོས་སྤྱིན་བདག་ཅེས་ས་པ་བཏགས་བྲིས་འདུག འདི་ལ་ས་བ་བཏགས་འབྲི་དགོས་ནི་རེད། ས་པ་བཏགས་སྤ་ཡ་བཏགས་སྤྱིན་ཞེས་པ་ནི་དུས་རྭ་ཅོ་དང་ཀོ་བ་སོགས་རྒྱུན་རིང་བསྐོལ་ནས་གཤེར་ཁུ་བཟོས་ཏེ་ཤིང་ལེབ་དང་ཤིང་ལེབ་སྦྱོར་དུས་བར་དུ་ལྡུག་པ་དེ་རེད། དེ་སྤྲོད་མཁན་ཞིག་ཡིན་ན་ཁྱོས་སྤྱིན་བདག་ཅེས་བྲིས་ན་ཡང་ངས་ཅང་མི་ཟེར། ད་དུང་སྐྱེས་པའི་ཁུ་བ་དེ་སྐབས་རེར་སྤྱིན་འདྲ་བོ་ཞིག་ཀྱང་ཡོད་པས་དེ་སྤྲོད་མཁན་ལ་གོ་ལ་ཡང་ངས་ཅང་མི་ཟེར། ཡིན་ན་ཡང་ཁྱོའི་སྒྲུང་གི་ནང་དུ་གསར་བུ་དེ་ལ་སྒོར་མོ་སོགས་སྦྱིན་ནས་རོགས་རམ་བྱེད་མཁན་ཞིག་ལ་གོ་གིན་འདུག་པས་འདི་ལ་ངེས་པར་དུ་སྦྱིན་བདག་ཅེས་འབྲི་དགོས། འདི་ངས་དེ་རིང་མ་གཏོགས་མཉམ་མ་བཞག མཉམ་གཅིག་བཞག་དུས་ཁྱོས་སྒྲུང་འདི་འབྲི་མཚམས་བཞག་འདུག
ཨ་རོ་མེད་མུག་མ་རྩི་མ་གཏོགས། རྡོ་སྦིས་དགེ་བཤེས་ཟེར་བའི་བླ་རྒན་མན་ཚར་ཅན་དེས་ཀྱང་རྗེ་ཙོང་ཁ་པར་བསྟོད་པ་བྱེད་དུས་སྨད་པའི་ཟོལ་གྱིས་བསྟོད་ཀི་ཡིན་ཟེར་ནས། གྲུབ་རྟགས་སྤྱི་བོར་སྤུངས་པའི་རལ་བ་མེད། །སོགས་མེད་མུག་ལུང་བ་གང་བྲིས་པས། རིག་གསར་སྐབས་དམར་སྲུང་དམག་གསར་བུ་འགས་བླ་རྒན་གསོན་པོར་བརྡུངས་ནས་བསད་བཏང་བ་རེད། རྟགས་རྟེན་འབྲེལ་འདི་ལ་གཟབ་དགོས་ཡ། འཇིགས་སྣང་བསྐུལ་ནི་ཡིན་ན་ངའི་མཇེ།