བོད་མི་ ༢༢༨ འདས་གྲོངས་སུ་ཕྱིན་ཡོད།

༢༠༠༨ ལོའི་ཟླ་བ་ ༣ ནས་ད་བར་བོད་མི་ ༢༢༨ མནར་གཅོད་ཀྱིས་འདས་གྲོངས་སུ་ཕྱིན་འདུག དེའི་ནང་མི་ ༡༡༨ གྱི་མིང་དང་བཅས་པའི་ཞིབ་ཕྲའི་གནས་ཚུལ་ཤེས་རྟོགས་བྱུང་ཡོད། བོད་མི་༣༧༡ བཙོན་འཇུག་ཁྲིམས་བཅད་བཏང་པ་དང་། བོད་མི་ ༤༦༥༧ འཛིན་བཟུང་ངམ་བཀག་ཉར་བྱས་ཡོད། བོད་མི་༩༩༠ གར་སོང་ཆ་མེད་དུ་གྱུར་བ་མ་ཟད། བོད་མི་ ༡༢༩༤ ཙམ་ལ་རྨས་སྐྱོན་ཕོགས་པ་རེད།

༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་ལོ་ ༢༠ འཁོར་བའི་དུས་དྲན་དེ་ཕྱི་ཚེས་ ༡༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་ཐོག་སྲུང་གཙི་གནང་ཡོད། བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་བཀའ་ཤག་གི་གཏམ་བཤད་སྒྲོག་སྦྱོང་གནང་དོན། འགྲོ་བ་ལྷ་དང་བཅས་པའི་མ་འདྲིས་པའི་མཛའ་བཤེས། འཇིག་རྟེན་ཞི་བདེའི་དེད་དཔོན། གཞིས་བྱེས་བོད་མིའི་བླ་ན་མེད་པའི་དབུ་ཁྲིད་༧གོང་ས་མཆོག་གིས་བོད་མིའི་རྩ་དོན་བསྒྲུབ་བྱ་སྤྱི་དང་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས་སོགས་མི་ཉམས་གོང་འཕེལ་དང་ཉམས་པ་སོར་ཆུད། དེ་བཞིན་འཛམ་གླིང་ནང་ཞི་བདེ་ཡུན་གནས་འབྱུང་བ་དང་ཆོས་ལུགས་འདྲ་མིན་ཁག་བར་མཛའ་མཐུན་འབྲེལ་ལམ་དམ་ཟབ་གོང་འཕེལ་གཏོང་རྒྱུ། འགྲོ་བ་མིའི་བཟང་སྤྱོད་ཀྱི་རིན་ཐང་རྣམས་གོང་འཕེལ་གཏོང་ཐབས། ཁོར་ཡུག་སྲུང་སྐྱོབ་སོགས་འཇིག་རྟེན་ཀུན་ཁྱབ་ཀྱི་འགན་ཁུར་འཛམ་གླིང་ནང་ཁྱབ་སྤེལ་གནང་བ་བཅས་ལ་ཐུགས་ཁུར་དང་འབད་བརྩོན་རྒྱུན་བསྲིངས་གནང་དང་གནང་བཞིན་པའི་རླབས་ཆེན་མཛད་འཁུར་གྱི་འཕྲིན་ལས་བསམ་སྤྱོད་ལས་འདས་པར་བརྟེན། རིས་སུ་མ་ཆད་པའི་རྒྱལ་ཁབ་དང་མི་རིགས་ཚོགས་སྡེ་རྣམས་ཀྱིས་གཟེངས་བསྟོད་བྱ་དགའ་དང་ཕྱག་འཁྱེར་སོགས་བརྒྱ་ཕྲག་བརྒལ་བ་ཞིག་ཕུལ་བ་དགྱེས་བཞེས་མཛད་ཡོད་པ་མ་ཟད། འདི་ལོར་མཚོན་ནའང་༧གོང་ས་མཆོག་ལ་སྔ་རྗེས་སུ་པོ་ལན་ཌིའི་རྒྱལ་ས་ཝ་སོར་གྲོང་ཁྱེར་གྱིེ་ཆེ་བསྟོད་ཕྱག་འཁྱེར་དང་། འཇར་མན་ཧེ་སན་མར་བྷར་གཙུག་ལག་སློབ་གྲྭ་ཆེན་མོའི་མཁས་དབང་གི་ཕྱག་འཁྱེར། ཨ་རིའི་གྲོང་ཁྱེར་མེམ་ཕེ་སིའི་རྒྱལ་ཡོངས་མི་མང་འགྲེམས་སྟོན་ཁང་གི་རྒྱལ་སྤྱིིའི་རང་དབང་གཟེངས་རྟགས། ཁེ་ན་ཌའི་གྲོང་ཁྱེར་ན་ཁུ་རའི་ཕེ་ཛར་སྒྲིག་འཛུགས་ཀྱིས་བྱམས་བརྩེ་དང་བཟོད་བསྲན་གྱི་གཟེངས་རྟགས། ཁེ་ན་ཊའི་གྲོང་ཁྱེར་ཁལ་གྷ་རིའི་གཙུག་ལག་སློབ་གྲྭ་ཆེན་མོའི་མཁས་དབང་གི་ཕྱག་འཁྱེར། ཨ་རིའི་ཊོམ་ལན་ཌོ་སི་འགྲོ་བ་མིའི་ཐོབ་ཐང་གི་གཟེངས་རྟགས་བཅས་འབུལ་བཞེས་མཛད་པ་དང། ༡༩༨༩ ལོར་འཛམ་གླིང་ནང་སྙན་གྲགས་ཆེ་ཤོས་ཀྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་གནང་སྟེ་མི་ལོ་ཉི་ཤུ་ཧྲིལ་བོ་འཁོར་བར་དོན་དམ་གྱི་གཟི་བརྗིད་ཀྱི་རྒྱན་དུ་གྱུར་ཡོད། ཅེས་དང་། སྔར་ལོ་བོད་ནང་ཕྱི་རྒོལ་བྱུང་བ་ནས་བཟུང་རྒྱ་ནག་ནང་བློ་གཟུ་བོར་གནས་པའི་ཤེས་ཡོན་ཅན་དང་ཁྲིམས་རྩོད་པ། གཞན་སྤྱིར་བཏང་གི་མང་ཚོགས་ཀྱིས་རྒྱ་ནག་གིས་རྫུན་པའི་དྲིལ་བསྒྲགས་ལ་མགོ་མ་འཁོར་བར་གསལ་སྟོན་གྱི་སྙན་ཐོ་ཡོངས་གྲགས་སུ་བཏོན་པ་དང་། རྒྱ་གཞུང་གིས་བརྒྱུད་ལམ་ཁག་བཀག་འགོག་བྱས་མིན་ལ་མ་ལྟོས་པར་རྒྱབ་སྐྱོར་གྱི་རྩོམ་ཡིག་རིམ་བཞིན་ཇེ་མང་དུ་འགྲོ་བཞིན་ཡོད། འདི་ལོའི་ཟླ་ ༨ པར་སུད་སིར་འཚོགས་པའི་བོད་རྒྱའི་ཚོགས་ཆེན་སྟེང་ཐུན་མོང་གི་བསྒྲགས་གཏམ་ཞིག་སྤེལ་བའི་ནང་ད་ལྟའི་བོད་ཀྱི་གནད་དོན་གྱི་འབྱུང་རྩ་ནི་བོད་རྒྱ་མི་རིགས་གཉིས་དབར་གྱི་གདོང་ཐུག་ལས་བྱུང་བ་མིན་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ལ་ལག་བསྟར་བྱས་པའི་སྲིད་དབང་སྒེར་སྡོམ་གྱི་དབང་སྒྱུར་དང་རིག་གཞུང་ཐོག་མི་རིགས་རྩ་གཏོར་གྱི་བྱེད་བབ་ལས་བྱུང་བ་ཞིག་ཡིན། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཞེས་པ་དེ་ནི་ལོ་རྒྱུས་ཀྱི་དོན་དངོས་དང་མཐུན་གྱི་མེད། ༧གོང་ས་མཆོག་གི་དབུ་མའི་ལམ་ལ་མུ་མཐུད་ནས་རྒྱབ་སྐྱོར་ཞུ་རྒྱུ་ཡིན། འདི་ལོའི་ཟླ་ ༡༡ པར་རོམ་དུ་འཚོགས་པའི་འཛམ་གླིང་གྲོས་ཚོགས་འཐུས་མིའི་བོད་དོན་ཚོགས་འདུ་བསྐངས་ནས་སྐབས་དེར་༧གོང་ས་མཆོག་གི་སྐུ་ཚབ་དང་རྒྱ་གཞུང་བར་དོན་ལྡན་གྱི་གྲོས་མོལ་མགོ་འཛུགས་པར་རྒྱལ་སྤྱིའི་གནོན་ཤུགས་སྤྲོད་དགོས་པ་དང་། བོད་ཕྱོགས་ནས་རང་སྐྱོང་སྐོར་གྱི་ཡིག་ཆ་ཕུལ་ཟིན་པ་དེར་མཇུག་སྐྱོང་རྒྱུ། དེ་བཞིན་ནོ་སྦེལ་གཟེངས་རྟགས་བཞེས་མཁན་བརྒྱད་ཀྱིས་བོད་དོན་རྒྱབ་སྐྱོར་ཞུས་པའི་བསྒྲགས་གཏམ་སྤེལ་བ་དང་ཉེ་ཆར་ཡང་སྲིད་འཛིན་ཨོ་བྷ་མས་པེ་ཅིན་ནས་ཧུའུ་ཅིན་ཐོ་ལ་ཐུག་སྐབས་བོད་དོན་སྐོར་ནན་བཤད་བྱས་ཡོད་པ་སོགས་ཀྱི་གྲུབ་འབྲས་ཐོན་ཡོད། ཅེས་གསུངས་བྱུང་ལ། 

གཞན་ཡང་སྔར་ལོར་བོད་ས་ཡོངས་སུ་ཞི་བའི་ངོ་རྒོལ་བྱུང་རྗེས་རྒྱ་ནག་གཞུང་གིས་གདུག་རྩུབ་ཆེན་པོའི་དྲག་གནོན་འོག་མི་ཅི་ཙམ་ཤི་སྐྱོན་བྱུང་བའི་ཞིབ་ཕྲའི་གནས་ཚུལ་དེ་རེད། འདི་ལོའི་ཕྱི་ཟླ་ ༡༠ ཚེས་ ༢༧ ནང་ཚུད་དུ་ང་ཚོར་ཐོབ་པའི་གནས་ཚུལ་ཤེས་རྟོགས་བྱུང་བར་གཞིགས་ན། ཕྱི་ལོ་ ༢༠༠༨ ལོའི་ཟླ་བ་ ༣ ནས་ད་བར་བོད་མི་ ༢༢༨ མནར་གཅོད་ཀྱིས་འདས་གྲོངས་སུ་ཕྱིན་འདུག དེའི་ནང་མི་ ༡༡༨ གྱི་མིང་དང་བཅས་པའི་ཞིབ་ཕྲའི་གནས་ཚུལ་ཤེས་རྟོགས་བྱུང་ཡོད། བོད་མི་ ༣༧༡ བཙོན་འཇུག་ཁྲིམས་བཅད་བཏང་པ་དང་། བོད་མི་ ༤༦༥༧ འཛིན་བཟུང་ངམ་བཀག་ཉར་བྱས་ཡོད། བོད་མི་༩༩༠ གར་སོང་ཆ་མེད་དུ་གྱུར་བ་མ་ཟད། བོད་མི་ ༡༢༩༤ ཙམ་ལ་རྨས་སྐྱོན་ཕོགས་པ་རེད། ཁོང་ཚོ་མ་ཡིན་པའི་བོད་མི་ཅི་ཙམ་ཚེ་ལས་འདས་པ་དང་བཙོན་དུ་བཅུག་པ། སྡུག་སྦྱོང་མནར་གཅོད་འོག་ད་དུང་གནས་ཡོད་སུས་ཤེས་ཐུབ། ལྷག་པར་ ༧ཀུན་གཟིགས་པན་ཆེན་ཆུང་སྲིད་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་ཆུང་བྱིས་པའི་དུས་ནས་མཉམ་འབྲེལ་རྒྱལ་ཚོགས་ཀྱིས་གཏན་འབེབས་བྱས་པའི་བྱིས་པའི་ཐོབ་ཐང་ཙམ་ཡང་སྲུང་གཙི་མེད་པར་བཙན་འཕྲོག་བྱས་ཏེ། ད་ཆ་དགུང་ལོ་ཉི་ཤུར་ཉེ་བར་སླེབས་ཀྱང་སྤྱི་མང་གི་ཐོབ་ཐང་མ་འཐོབ་པར་དུས་ད་ལྟ་ཡང་འཚོ་བཞུགས་དང་གར་ཡོད་ཆ་མེད་ལ་གནས་ཡོད་པ་དེར་བློ་འཚབ་ཆེན་པོ་ཡོད་པ་མ་ཟད། ཆུང་སྲིད་རིན་པོ་ཆེས་དབུས་པའི་ཉེས་མེད་ཆབ་སྲིད་བཙོན་པ་རྣམས་འཕྲལ་དུ་གློད་གྲོལ་དགོས་པའི་ནན་སྐུལ་བྱེད་ཀྱི་ཡོད།  ཉེ་བའི་ཆར་རྒྱལ་སྤྱིའི་བརྒྱུད་ལམ་ཁག་ནས་ཁུངས་ལྡན་གྱི་གནས་ཚུལ་སྤེལ་བར་གཞིགས་ན། ལྷ་སར་སྔ་ལོའི་ཞི་རྒོལ་དང་འབྲེལ་བའི་བོད་མི་བློ་བཟང་རྒྱལ་མཚན་དང་ལོ་ཡག་གཉིས་འཕྲལ་མར་སྲོག་ཐོག་དང་རྐང་བཙུགས་དང་བསྟན་ཛིན་ཕུན་ཚོགས། བུ་མོ་སྤེན་སྐྱིད་བཅས་བོད་མི་གསུམ་ལོ་གཉིས་དུས་འགྱངས་ཀྱི་སྲོག་ཆད་གཏོང་རྒྱུའི་ཁྲིམས་ཐག་བཅད་ཅིང་། ད་དུང་བོད་ཀྱི་ས་ཁུལ་གཞན་དུའང་བོད་མི་འཛིན་བཟུང་དང་སྲོག་ཐོག་ལ་བཏང་བའི་གནས་ཚུལ་གོ་ཡོང་གི་འདུག མཐའ་མར་རྒྱ་ནག་གཞུང་གི་ད་ལྟའི་མགོ་ཁྲིད་པ་ཚོས་ངེས་པར་དུ་བོད་རྒྱ་མི་རིགས་ཀྱི་ཕུགས་ཀྱི་ཁེ་ཕན་དང་རྒྱ་ནག་གི་བརྟན་ལྷིང་སྲུང་སྐྱོབ་བྱ་ཆེད་ངེས་པར་དུ་རྒྱལ་སྤྱིའི་སྤྱི་ཚོགས་ཀྱི་འབོད་སྐུལ་ལ་དང་ལེན་ཞུ་དགོས་པར་མཐོང༌ཅེས་གསུང་སོང་།

ཡང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས།  དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་གཙིའི་ཉིན་མོར་འཁེལ་ཡོད་སྟབས།  བོད་མི་མང་སྤྱི་འཐུས་ལྷན་ཚོགས་ཀྱིས་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་རང་དབང་དང་དམངས་གཙོའི་རྒྱལ་ཁབ་ཁག་ལ་རྒྱ་གཞུང་གིས་ད་དུང་ཡང་བོད་ནང་འགྲོ་བ་མིའི་ཐོབ་ཐང་བརྡལ་བཤིག་དང་། དྲང་བདེན་མིན་པའི་ཁྲིམས་གཅོད་བྱས་དང་བྱེད་བཞིན་པ་རྣམས་ལ་ངོ་རྒོལ་དང་། འཕྲལ་དུ་མཚམས་འཇོག་དགོས་པར་རྒྱལ་སྤྱིའི་བོད་དོན་རྒྱབ་སྐྱོར་བ་ཡོངས་ནས་བདེན་རྒྱབ་དཔུང་རོགས་ངེས་གནང་ཡོང་བའི་འབོད་སྐུལ་དང་། རྒྱ་ནག་གཞུང་གིས་ཀྱང་ལུགས་མཐུན་ལག་བསྟར་ངེས་པར་དགོས་པའི་དགོས་འདུན་ཤུགས་ཆེར་ཞུ་བཞིན་ཡོད། བཙན་བྱོལ་བོད་མི་ཚོས་ཀྱང་། བཙན་གནོན་འོག་གི་གཞིས་སྡོད་བོད་མིའི་ལྷག་བསམ་དང་དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་བཅས་ལ་གདུང་སེམས་མཉམ་བསྐྱེད་དང་། བོད་མིའི་བདེན་མཐའ་མྱུར་གསལ་སླད་༧གོང་ས་མཆོག་དབུས་པའི་བཙན་བྱོལ་བོད་མི་ཡོངས་ཀྱིས་འཚེ་མེད་ཞི་བའི་ལས་འགུལ་མུ་མཐུད་སྤེལ་རོགས་ཞེས་རེ་སྐུལ་གནང་སོང་།

མཐའ་མར་ཁོང་གིས། བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་གྲོས་ཆོད་བྱུང་བ་ལྟར། བོད་ནང་འདས་གྲོངས་སུ་ཕྱིན་པའི་དཔའ་བོ་དཔའ་མོ་རྣམས་ཀྱི་སྙིང་སྟོབས་དང་མཛད་རྗེས་ལ་གུས་འདུད་ཆེད་མི་འགྱངས་བར་རྗེས་དྲན་རྡོ་རིང་བཞེངས་རྒྱུ་ཡིན། ཅེས་བརྗོད་བྱུང།

དུས་དྲན་གྱི་ཉིན་མོ་འདི་དང་སྟབས་བསྟུན་ཏེ་སྐུ་མགྲོན་གཙོ་བོ་མཆོག་གིས་གཞུང་ཞབས་ནང་སྲི་ཞུ་སྒྲུབ་མཁན་བགྲེས་ཡོལ་ཁག་ཅིག་དང་བོད་གཞུང་འཕྲོད་བསྟེན་ཁྱབ་ཁོངས་ཀྱི་རང་ལོ་ ༢༥ སྲི་ཞུ་སྒྲུབ་མཁན་རྣམས་ལ་བྱ་དགའ་གསོལ་རས་དང་། ནོར་ཝེ་བོད་ཀྱི་རོགས་ཚོགས་ཀྱི་རྒྱབ་སྐྱོར་འོག་རྩོམ་པ་པོ་འོད་ཟེར་ལགས་ཀྱིས་བརྩམས་པའི་༼གསར་བརྗེ༽ ཞེས་པའི་བོད་འགྱུར་གྱི་དེབ་དང་། བོད་མིའི་ཚོང་ལས་བདེན་ཚོགས་ཀྱིས་༼རྒྱ་གར་ནང་ཚོང་འབྲེལ་བྱེད་ཐབས༽ དང་སྒྲོན་མེ་རྩོམ་སྒྲིག་ཁང་གི་མི་ལོ་ལྔ་བཅུའི་དུས་དྲན་གྱི་སྒྲོན་མེ་ཆེད་རྩོམ་འགྲན་བསྡུར་ ༼ཤེས་རྟོགས་དང་ལག་ལེན༽ ཅེས་པའི་དཔེ་དེབ་ཁག་ཅིག་དབུ་འབྱེད་གནང་རྗེས་བོད་གཞུང་ཟློས་གར་ཚོགས་པ་དང་བཞུགས་སྒར་ཁུལ་གྱི་སློབ་གྲྭ་ཁག   དེ་བཞིན་གངས་སྐྱིད་ཀྱི་ལས་བྱེད་ཁག་བཅས་སྡེ་ཚན་ ༡༡ ལྷག་གིས་དུས་དྲན་ལ་དགའ་སྟོན་རྟེན་འབྲེལ་གྱི་གཞས་སྣ་འཁྲབ་སྟོན་གནང་ཡོད།