ཕྱི་ཟླ་ ༡༢ ཚེས་༢ ཉིན་ཁམས་སོག་རྫོང་གི་རང་ལོ་ ༤༨ ཡིན་པའི་བཙུན་མ་ཆོས་སྒྲོན་དང་། རང་ལོ་ ༢༡ ཡིན་པའི་བསྟན་འཛིན་དར་རྒྱས། རང་ལོ་ ༡༧ ཡིན་པའི་ནོར་བུ་བཟང་པོ་བཅས་ལྷ་སའི་ཇོ་ཁང་སྒོ་འགྲམ་ནས་འཛིན་བཟུང་བྱས་འདུག ཁོང་རྣམས་ལྷ་སའི་ཇོ་ཁང་སྒོ་འགྲམ་དུ་ཕྱག་འཚལ་མཁན་སྤུན་མཆེད་རྣམས་ལ་ཁ་ལག་ སྐྱེལ་བར་འགྲོ་སྐབས་གློ་བུར་དུ་འཛིན་བཟུང་བྱས་ཡོད་འདུག ཉིན་ཤས་རིང་ཁོང་རྣམས་གར་སོང་མེད་པར་གྱུར་ནས་སྤུན་མཆེད་རྣམས་ཀྱིས་ས་ཕྱོགས་གང་སར་བཙལ་སྐབས་ལྷ་སའི་སྤྱི་བདེ་མི་སྣས་ནག་ཆུ་ས་ཁུལ་གྱི་བཙོན་ཁང་ཞིག་ལ་ཡོད་རེད་ཅེས་ལན་ཙམ་སྤྲད་ཡོད་འདུག སྤུན་མཆེད་རྣམས་ཀྱིས་ཁོང་རྣམས་ལ་ཐུག་པར་འགྲོ་སྐབས་ཐུག་བཅུག་མེད་པ་མ་ཟད། ཁོང་རྣམས་ད་ལྟ་བཙོན་ཁང་གང་དུ་ཡོད་པ་དང་འཛིན་བཟུང་བྱེད་དགོས་དོན་སོགས་གང་ཡང་གསལ་ཁ་མེད་པ་རེད།
སྤྱིར་བསྟན་འཛིན་དར་རྒྱས་ཀྱིས་དེ་སྔོན་རང་བཙན་སྐད་འབོད་བྱས་རྐྱེན་ལོ་ ༣ གྱི་ཁྲིམས་ཐག་བཅད་ཡོད་ཀྱང་བཙུན་མ་ཆོས་སྒྲོན་གྱིས་དངུལ་མང་པོ་སྤྲད་ནས་ཕྱིར་བཏོན་ཡོད་འདུག་པས། གནས་ཚུལ་དེ་དང་འབྲེལ་བ་ཡོད་པར་ཉེ་འབྲེལ་རྣམས་ཀྱིས་དོགས་པ་བྱེད་ཀྱི་ཡོད་པ་རེད། བཙུན་མ་ཆོས་སྒྲོན་ནི་ནམ་རྒྱུན་འདམ་གཞུང་རྫོང་དུ་ཟ་ཁང་ཞིག་གཉེར་ནས་སྡོད་ཀྱི་ཡོད་པ་དང་། འཛིན་བཟུང་བྱས་རྗེས་ཉེན་རྟོག་པ་ཡོང་ནས་ཁྱིམ་ནང་གི་ཅ་ལག་ཚང་མ་སྔོག་བཤེར་བྱས་ཡོད་འདུག་ཀྱང་། ཉེས་མིང་འདོགས་ས་ཡོད་པའི་དངོས་པོ་འདྲ་ལག་ཏུ་ཐེབས་མིན་གསལ་ཁ་མི་འདུག བུ་བསྟན་འཛིན་དར་རྒྱས་དང་ནོར་བུ་བཟང་པོ་གཉིས་ཀྱི་ཕ་མིང་ལ་ཁྲག་རུ་དབང་ཆེན་ཟེར་གྱི་ཡོད་པ་དང་། ཁོང་གཉིས་ནི་སྤུན་མཆེད་རྒན་གཞོན་ཡིན་པ་རེད།
ངག་དབང་ཐར་པས་མཁོ་སྤྲོད་བྱས།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
གངས་ཅན་ཞིང་གི་ཆོས་སྲིད་བྱ་བའི་དུགས། །འདེགས་པའི་སྲི་ཞུར་གཏོགས་པའི་སྐྱེ་བོ་ཀུན། །ལྷག་བསམ་རྣམ་དཔྱོད་དཔུང་པ་རབ་བརྟན་ཅིང་། །སྐྱེ་ཀུན་ཕྱག་ན་པདྨོས་རྗེས་བཟུང་ཤོག །
༸གོང་ས་མཆོག་གི་གསུང་།
སོག་རྫོང་ཙམ་མ་ཡིན་པར་བོད་ས་ཡོངས་རྫོགས་ནང་དོན་མེད་འཛིན་བཟུང་དང་། མནར་གཅོད་བཏང་བཞིན་ཡོད་ནའང་ཞི་བདེ་ཁ་ལ་ཁྱེར་བའི་འཛམ་གླིང་མི་ཆེན་དེ་དག་གིས་མིག་ཟུང་བཙུམས་པ་འདི་ཡིད་སྐྱོ་བའི་གནས་རེད
རྒྱ་དམར་གུང་ཁྲན་གིས་མི་ལོ་དྲུག་བཅུའི་རིང་ལ། གཞིས་ལུས་བོད་མི་ཐོག་ལ་སྡུག་རྒྱང་གནར་བཅོད་བཏང་བཞིན་པ་དེ། ང་ཚོ་མི་རབ་གསར་པ་སྐྱ་སེར་ཕོ་མོ་སུ་ཡིན་ན་ཡང་མ་འོངས་པའི་གཞོན་ནུ་དག་གི སེམས་ལ་གནས་ཐུབ་པ་ཞིག་ང་ཚོའི་མི་ཐོག་འདིས་ལས་མགན་ཡིན་པ་ཚང་མས་་ཤེས་དགོས།
ཉམས་ཆུང་བོད་མི་བྱེའུ་ཆུང་འདྲ།།
བྱ་ཁྲས་ནམ་བཟུང་ཆ་མེད་རེད།།
བཟུང་སྟེ་ཚེ་སྲོག་ཤོར་ཉིན་ནས།།
མ་ཎི་འགའ་ལས་ཅི་ཡང་མེད།།