རྒྱ་གཞུང་གིས་སྤྲུལ་སྐུ་ངོས་འཛིན་གྱི་ལམ་ལུགས་ལ་ཐེ་བྱུས་བྱེད་ཀྱིན་པའི་དམིགས་ཡུལ་གཙོ་བོ་ནི། ༧གོང་ས་མཆོག་དགོངས་པ་རྫོགས་མཚམས་སུ་རྒྱ་ནག་གི་འདོད་མོས་ལྟར་ཡང་སྲིད་ཞིག་འཚོལ་རྒྱུ་དེ་རེད་ཅེས་བཙན་བྱོལ་བོད་གཞུང་གིས་ལན་འདེབས་གནང་ཡོད།
༢༠༠༧ ལོའི་ཟླ་བ་ ༧ པའི་ནང་རྒྱ་ནག་གཞུང་གིས་བཀོད་པ་ཨང་ལྔ་པ་ཅེས་པའི་ཡིག་ཆ་ཞིག་འདོན་སྤེལ་བྱས་ཏེ། བོད་ཀྱི་བླ་སྤྲུལ་ཁག་གི་ཡང་སྲིད་ངོས་འཛིན་བྱ་བར་རྒྱ་ནག་གུང་ཁྲན་ཏང་གི་ཆོག་མཆན་ཐོབ་དགོས་ཀྱི་ཡོད་ཚུལ་དང། བོད་ཀྱི་བླ་སྤྲུལ་ཁག་གི་ཡང་སྲིད་ངོས་འཛིན་གྱི་ཐོབ་ཐང་རྒྱ་གཞུང་ལ་ཡོད་ཅེས་པའི་འཁྱོག་བཤད་དང་བསྒྲགས་གཏམ་གང་སར་སྤེལ་བ་དང་། ཆོས་ལུགས་ཀྱི་བྱེད་སྒོ་ཁག་ལ་ཐེ་བྱུས་ཇེ་མང་དུ་འགྲོ་གིན་ཡོད་སྟབས། བདུན་ཕྲག་འདིའི་ནང་བཙན་བྱོལ་བོད་གཞུང་གིས་རྒྱ་གཞུང་ལ་ལན་འདེབས་གནང་ཡོད། ཐེངས་འདིའི་བཙན་བྱོལ་བོད་གཞུང་གི་ལན་འདེབས་ནང་དུ། ང་ཚོས་རྒྱ་གཞུང་གི་བྱེད་ཐབས་དེ་རྒྱལ་སྤྱིའི་འགྲོ་བ་མིའི་ཡོངས་ཁྱབ་གསལ་བསྒྲགས་ནང་འཁོད་པའི་ཆོས་དད་རང་མོས་ཀྱི་རྩ་བའི་ཐོབ་ཐང་བོད་མིའི་ལག་ནས་འཕྲོག་པ་ཞིག་དང་། རྒྱ་ནག་གི་རྩ་ཁྲིམས་ནང་འཁོད་པའི་ཆོས་དད་རང་མོས་ཀྱི་ཐོབ་ཐང་ཡང་འཕྲོག་པ་ཞིག་ལ་ངོས་འཛིན་བྱེད་ཀྱིན་ཡོད་ལ། བོད་མི་རིགས་ནི་སྐྱེ་བ་ཕྱི་མ་ཁས་ལེན་མཁན་ཞིག་དང་འགྲོ་བ་ཡོངས་ལ་བརྩེ་བའི་མི་རིགས་ཤིག་ཡིན་སྟབས། ཁྱད་དུ་འཕགས་པའི་བླ་མ་དགེ་བཤེས་སོགས་ཀྱིས་སྐྱེ་བ་སྔ་ཕྱིའི་ལམ་སྤྱད་དེ་སེམས་ཅན་གྱི་དོན་དུ་ཡང་སྲིད་ཕེབས་ཀྱི་ཡོད། ཅེས་དང་། དེང་སྐབས་རྒྱ་ནག་གཞུང་གིས། མི་བདེན་རྫུན་སྒྲིག་གིས་བོད་ཀྱི་བླ་སྤྲུལ་ཁག་གི་ཡང་སྲིད་གསེར་བུམ་དཀྲུག་ནས་གདམ་སྲོལ་ཡོད་ཅེས་ཤོད་ཀྱིན་ཡོད་ལ། ༡༧༩༢ ལོར་གོར་བོད་དམག་ཁྲུག་གི་རྗེས་སུ་རྒྱ་ནག་མན་ཇུའི་གོང་མ་ཆན་ལུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་གསེར་བུམ་དཀྲུག་ནས་ངོས་འཛིན་དགོས་པའི་སྲོལ་གཏོད་རྩིས་བྱས་མོད། འོན་ཀྱང་། ༡༨༠༥ ལོར་རྒྱལ་མཆོག་སྐུ་ཕྲེང་བརྒྱད་པའི་ཡང་སྲིད་ངོས་འཛིན་ཞུ་སྐབས་འོས་སྤྲུལ་བུ་གཉིས་ཡོད་ཀྱང་གསེར་བུམ་མ་དཀྲུག་པར་བོད་ཀྱི་དབུ་ཁྲིད་ཚོས་ངོས་འཛིན་གནང་བ་རེད།
དེ་ཙམ་མ་ཟད་སྐབས་དེའི་རྒྱ་ནག་གི་མན་ཇུའི་དམག་སྤྱི་ཕུ་ཁན་ཨན་གྱིས་རྒྱལ་མཆོག་སྐུ་ཕྲེང་བརྒྱད་པར། གསེར་བུམ་དཀྲུག་དགོས་སོགས་སྒྲིག་སྲོལ་དོན་ཚན་ཉེར་དགུ་ཡོད་པ་དེ་དག་བསམ་འཆར་ཙམ་ལས་མཐའ་མའི་ཐག་གཅོད་བོད་མི་རང་ནས་བྱེད་དགོས་ཞེས་ཞུས་ཡོད་པ་རེད། རྒྱལ་མཆོག་སྐུ་ཕྲེང་དགུ་པ་དགུང་ལོ་བཅུ་པར་དགོངས་པ་རྫོགས་རྗེས་ཡང་སྲིད་ངོས་འཛིན་ཞུ་སྐབས་རྒྱ་མིའི་ཨམ་བན་གྱིས་གསེར་བུམ་དཀྲུག་དགོས་པའི་འདུན་པ་བསྟན་ཡང༌། བོད་གཞུང་གི་བཀའ་ཤག་དང༌། རྒྱལ་ཚབ། དེ་བཞིན་སེ་འབྲས་དགའ་གསུམ་གྱི་འཐུས་མིས་ལི་ཐང་དུ་འཁྲུངས་པའི་མཆོག་སྤྲུལ་དེ་བོད་ཀྱི་སྲོལ་རྒྱུན་ལྟར་ངོས་འཛིན་གནང་བ་ལས་གསེར་བུམ་དཀྲུག་མེད། རྒྱལ་མཆོག་སྐུ་ཕྲེང་བཅུ་པ་དགུང་ལོ་ ༢༧ ལ་དགོངས་པ་རྫོགས་རྗེས་ཁོང་གི་ཡང་སྲིད་ཀུན་གཟིགས་པཎ་ཆེན་སྐུ་ཕྲེང་བདུན་པས་ངོས་འཛིན་གནང་བ་དང་མཚན་ལ་མཁས་གྲུབ་རྒྱ་མཚོ་ཞེས་གསོལ་ཡོད་པ་རེད། དེར་བརྟེན། ལོ་རྒྱུས་ནང་བོད་ཀྱི་བླ་སྤྲུལ་ཁག་གི་ཡང་སྲིད་ངོས་འཛིན་བོད་མི་ཚོས་རང་དབང་ངང་བྱས་པ་ལས་སུ་ཞིག་གི་ཐེ་ཇུས་དང་དབང་ཤུགས་འོག་གནང་བ་བྱུང་མེད་སྟབས། བཙན་བྱོལ་བོད་གཞུང་གི་ངོས་ནས་ ༢༠༠༧ ལོའི་ཟླ་ ༧ པའི་ནང་རྒྱལ་ཁབ་ཀྱི་ཆོས་ལུགས་ཅུས་བཀོད་པ་ཨང་ལྔ་པ་ཞེས་པའི་ཡིག་ཆའི་ནང་འཁོད་པའི་བོད་ཀྱི་བླ་སྤྲུལ་ཁག་གི་ཡང་སྲིད་ངོས་འཛིན་བྱ་རྒྱུར་རྒྱ་ནག་གཞུང་གིས་ཆོག་མཆན་དགོས་ཞེས་བཀོད་ཡོད་པ་དེ། བོད་མིའི་གཞི་རྩའི་ཆོས་དད་རང་མོས་ཀྱི་ཐོབ་ཐང་ལ་མངོན་སུམ་འཛེམས་མེད་ཀྱི་ཐེ་ཇུས་བྱས་པ་ཞིག་དང་། ཡིག་ཆ་དེ་ནི་བོད་མིའི་ཆོས་ཕྱོགས་ཀྱི་བྱ་བར་རྒྱ་ནག་གཞུང་གིས་ངོ་ཚ་ཁྲེལ་མེད་ངང་ཆབ་སྲིད་ཀྱི་ལག་པ་བརྐྱངས་པ་ཞིག་རེད། དེར་བཙན་བྱོལ་བོད་གཞུང་གི་ཆོས་དོན་ལས་ཁུངས་ཀྱིས་དབུས་བོད་ཀྱི་ཆོས་ལུགས་ཆེན་པོ་བཞིའི་དབུ་ཁྲིད་དང༌། བོན་ཆོས་ཀྱི་དབུ་ཁྲིད། དེ་བཞིན་གྲྭ་བཙུན་རྣམས་དང༌། ནང་ཆོས་ལ་དད་མོས་བྱེད་མཁན་ཡོངས་ནས་མཐའ་ཅིག་ཏུ་ཁས་ལེན་མེད་ཅེས་དང་། ཡང་སྲིད་ངོས་འཛིན་གྱི་བཀོད་ཁྱབ་དེ་རྫུན་གཏམ་ཁོ་ན་ཞིག་ཡིན་སྟབས། བོད་མི་རིགས་དང་རྒྱལ་སྤྱིའི་མི་མང་སུ་ཞིག་ལ་མགོ་བསྐོར་གཏོང་ཐུབ་ཀྱི་མ་རེད་ཅེས་བརྗོད་ཡོད་པ་རེད།
བོད་གཞུང་གིས་ལན་འདེབས་ནང་མུ་མཐུད་བཀོད་དོན། བཀོད་པ་དེའི་དམིགས་ཡུལ་གཙོ་བོ་ནི་བླ་སྤྲུལ་གྱི་ཡང་སྲིད་བྱེད་སྟངས་ལ་ཐེ་ཇུས་བྱས་ཏེ། རྒྱ་ནག་གཞུང་གིས་ྋགོང་ས་མཆོག་དགོངས་པ་རྫོགས་མཚམས་སུ་ཁོ་པ་ཚོའི་འདོད་མོས་ཀྱི་ཡང་སྲིད་འཚོལ་རྒྱུ་དེ་རེད། ཡིན་ན་ཡང་ྋགོང་ས་མཆོག་གིས། ཡང་སྲིད་ཕེབས་དགོས་པའི་རྒྱུ་མཚན་གཙོ་བོ་ནི། སྐུ་གོང་མ་དེས་ལས་ཀ་འགོ་འཛུགས་གནང་བའི་བསྟན་པ་དང་འགྲོ་བའི་དོན་ལ་ཕན་ཐོགས་པའི་ཞབས་འདེགས་ཞུ་རྒྱུ་དེའི་མུ་མཐུད་པའི་དོན་དུ་ཡིན་ཞེས་གསུངས་ཡོད་པར་མ་ཟད། ཁོང་གིས། གལ་ཏེ་ང་བཙན་བྱོལ་ལ་སྡོད་རིང་ཤི་ན། ཡང་སྲིད་ཡོང་ས་དེ་རྒྱ་མིའི་ལག་པར་ཡོང་རྒྱུ་མིན་པར། འདི་ཕྱོགས་རང་དབང་ལུང་པའི་ནང་ཡོང་གི་རེད་ཅེས་ཚིག་ཐག་ཆོད་པོས་བཀའ་ནན་ཏན་གནང་ཡོད། དེར་བརྟེན། གལ་སྲིད་རྒྱ་ནག་གཞུང་གིས་ཡང་སྲིད་ངོས་འཛིན་ཐོག་ཐེ་བྱུས་བྱས་ན། ཡང་སྲིད་རྫུན་མ་ཡོང་རྒྱུ་ངེས་པ་མ་ཟད། བོད་མིའི་སེམས་ནང་རྒྱ་ནག་གཞུང་ལ་མི་དགའ་བ་དེ་ལས་མང་བ་ཡོང་རྒྱུ་དོན་མི་ཟ། རྒྱ་ནག་གཞུང་གི་འཆར་གཞི་ནི། ཆོས་ལུགས་ཀྱི་བྱེད་སྒོ་ཁག་ཆབ་སྲིད་ཀྱི་ལག་ཆར་བེད་སྤྱད་དེ་ཁོ་པ་ཚོའི་དམིགས་ཡུལ་སྒྲུབ་ཐབས་བྱ་རྒྱུ་ལས། བོད་མིའི་ཆོས་ཕྱོགས་ཀྱི་བྱ་བ་དང་བདེ་སྡུག་ཐོག་རྒྱ་ནག་གཞུང་གིས་སེམས་འཚབ་བྱེད་ཀྱི་མེད། བོད་ཀྱི་བླ་སྤྲུལ་རྣམས་ལ་གོ་མཚོན་སོགས་གང་ཡང་མེད། ཁོང་ཚོར་ཡོད་པ་ནི། བཟང་ཕྱོགས་ཀྱི་ནུས་པ་དང་སྤྱི་ཚོགས་ཀྱི་འགན་བཞེས་པའི་ཐོག ཁོང་ཚོ་ནི་བོད་མི་ཚོའི་ཆོས་དང་འཇིག་རྟེན་གཉིས་ཀའི་ལམ་སྟོན་བསླབ་བྱ་ཞུ་ས་ཞིག་ཡིན། དེ་ནི་རྒྱ་ནག་གུང་ཁྲན་གྱི་དབང་ཆར་ཐད་ཀར་གདོང་ཐུག་ཏུ་འགྲོ་ཡི་ཡོད་སྟབས། རྒྱ་ནག་གཞུང་ལ་རྩ་བ་ནས་མི་དགོས་པ་ཞིག་རེད། རྒྱུ་མཚན་དེ་དག་ལ་བརྟེན། རྒྱ་ནག་གཞུང་གིས་བླ་སྤྲུལ་གྱི་ཡང་སྲིད་ངོས་འཛིན་ལ་སྒོ་ཀུན་ནས་ངོ་ཚ་ཁྲེལ་མེད་ཀྱིས་སྟངས་འཛིན་གྱི་བྱེད་ཐབས་བྱེད་བཞིན་པ་རེད་ཅེས་ལན་འདེབས་གནང་ཡོད་པ་རེད།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
མདའ་ཚན་ཚེ་རིང་ལགས།
ངད་བོད་པ་ཚང་ལ་དགོས་རྒྱུ་ནི་བོད་རྒྱ་གཉིས་གྲོས་མོལ་གྱི་ལམ་ནས་ཞི་འགྲིག་འཐོབ་རྒྱུ་དེ་རེད། དེ་ཡོང་བ་ལ་ཐབས་ལམ་འདྲ་མིན་གྱི་སྲིད་གྱུས་དང་ནུས་པ་འདོན་ཐུབ་པའི་གང་ཟག་ཁྱད་པ་བ་དེ་འདྲ་ངོ་སྤྲོད་དང་ལམ་བསྟོན་གནང་ཡ་ཡོད་ན་འུ་ཚོོ་ལ་ནད་ཐོག་གི་སྨིན་བཞིན་དུ་ཧ་ཅང་མཁོ་ཆེ་བས་ངོ་སྤྲོད་དང་ལམ་བསྟོན་མགྱོགས་ཙམ་གནང་རོག་གནང་། གལ་སྟེ་རང་ཉིད་ལ་ཐོན་མོང་མ་ཡིན་པའི་ནུས་པ་གང་ཡང་འདོན་རྒྱུ་མེད་ན་གཞུང་གི་བྱ་བཞག་ལ་སྐྱོན་བརྗོད་མ་བྱས་ན་མི་ལེགས་སམ།
འབྲོག་ཁྱི་ལགས། ཁྱེད་ཀྱིས་ངོས་འཛིན་གང་ལ་བྱེད་ཀྱི་ཡོད་མེད་མི་ཤེས། འོན་ཀྱང་།མཆན་གྱི་དོན་དག་གང་ཡིན་ངོས་འཛིན་གསལ་བོ་བྱུང་མཚམས་གཞི་ནས་རང་གི་བསམ་ཚུལ་བཏོན་ན་མི་བཟང་ངམ།
ངས་ནི་བོད་རྒྱ་གཉིས་ཞི་འགྲིག་མི་ཡོང་བའི་རྒྱུ་རྐྱེན་ཕན་ཚུན་སྐད་བརྡ་མ་འཕྲོད་པར་ངོས་འཛིན་རྩ་བ་ནས་བྱེད་ཀྱིས་མེད།
ཞིང་མཆོག་ཐུགས་དམ་གནད་བསྐུལ།
སྔོན་བསྟན་པ་སྔ་དར་དུས་སུ། །
མགོན་ཨོ་རྒྱན་ཆེན་པོས་ཞལ་ནས། །
བོད་རྒྱལ་བློན་རྗེ་འབངས་ཡོངས་ལ། །
དུས་གཏན་དུ་སྐྱོང་ཞེས་གསུངས་པས། །
དེང་སྙིགས་མ་ལྔ་བདོའི་གཤམ་འདིར། །
རྒྱ་དམར་པོས་བོད་ཁམས་འཇོམས་ཤིང་། །
གདོན་དམ་སྲིའི་བསྟན་པ་རྒྱས་པས། །
བདུད་རྒྱལ་འགོངས་སྡེ་བཅས་ཆོམས་ཤིག།
བོད་བསྟན་སྲིད་ཡོངས་ཀྱི་སྤྱི་དགྲ། །
ལྷ་ཕྱག་ན་པདྨོའི་སྐུ་དགྲ། །
དཔལ་ཞྭ་སེར་བསྟན་པའི་སྒོས་དགྲ། །
བདུད་རྒྱལ་འགོངས་སྡེ་བཅས་ཆོམས་ཤིག
རྒྱ་ནག་གིས་ག་དུས་ཡིན་ན་ཡང་འཁྱོགས་བཤད་དང་རྗུན་སྒྲིགས་རྐྱང་བྱེད་ཀྱིན་ཡོད་པ་རེད། འོན་ཀྱང་། ང་རང་ཚོའི་གཞུང་གི་ངོས་ནས་དེ་ཚོ་ཤེས་བཞིན་དུ་ད་དུང་རྒྱ་སྐད་རྒྱ་ཡིག་མི་ཤེས་པའི་སྐུ་ཚབ་རྐྱང་བཏང་བསྡད་ན་ཡོང་རྒྱུ་འདི་ལས་ག་རེ་ཡོད། ད་དུང་དེ་ལ་ལན་ཕོག་མི་ཕོག་གི་འགྲེལ་བཤད་ཙམ་བྱས་ནས་འདུག་དགོས་ན། གཞུང་སྒེར་གཉིས་ཆ་དཀའ་ལས་མ་ཡིན་ནམ།
༧གོ ང་ས་མཆོག་གིས་འཛམ་གླིང་འདིར་ཆོས་ཁས་ལེན་མཁན་མི་ལེན་མཁན་དངས་སྙོམ་ཡིན་མཁན་གསུམ་ཡོད་ཞེས་གསུང་བ་ལྟར། རྒྱ་ནག་ནི་ཆོས་ཁས་མི་ལེན་མཁན་དེ་ཡིན་པའི་ཆོས་ལུགས་ཀྱི་བླ་སྤྲུལ་ངོས་འཛིན་བྱེད་པའི་ཐོབ་ཐང་གཏན་ནས་མེད།
རྒྱ་དམར་ལ་བོད་ཀྱི་བླ་སྤྲུལ་གྱི་ཡང་སྲིད་ངོས་འཛིན་བྱེད་པའི་ཐོབ་ཐང་གཏན་ནས་མེད།་གང་ལ་ཟེར་ན་རྒྱ་དམར་གུང་ཁྲན་རིང་ལུགས་ནི་ཆོས་དུག་ལ་ངོས་འཛིན་བྱེད་མཁན་ཞིག་རེད།་དེ་འདྲ་ཡིན་དུས་ཁོ་ཚོས་བོད་ཀྱི་བླ་སྤྲུལ་ཇི་ལྟར་ངོས་འཛིན་བྱེད་དམ།་
http://www.youtube.com/watch?v=kKhiEBWAqkg
སྤུན་ཟླ་ཚོ། ཚང་མས་འབྲེལ་ཐག་འདི་བརྒྱུད་དེ་གསལ་བོ་ཞིག་གསན་རོགས་ཞུ་ལགས།
བོད་གཞུང་དང་རྒྱ་གཞུང་གཉིས་ཀས་རྩོད་པ་བྱེད་པ་ནི་མ་འོངས་པའི་རྒྱལ་བ་རིན་པོ་ཆེའི་ཡང་སྲིད་སུས་ཐག་གཅོད་བྱེད་མིན་དེ་རེད། རྩོད་པ་དེ་ལས་ཀྱང་ཡ་མཚར་བ་ཞིག་ནི་ཕྱོགས་གཉིས་ཀས་ད་ལྟ་ལས་མ་འོངས་པ་གལ་ཆེན་དང་མཐོང་ཆེན་བྱེད་པ་འདི་རེད། འདི་ནི་དོན་དངོས་སུ་དགོད་བྲོ་བའི་ཆབ་སྲིད་ཀྱི་ཟློས་གར་ཆུང་ཆུང་ཞིག་རེད། གང་ཞེ་ན། དོན་དངོས་སུ་ནུས་པ་ཆ་ཚང་ཡོད་པ། མཚན་སྙན་དོན་དང་ལྡན་པ། གཉིས་ཀས་་རྩོད་པ་མེད་པ། ཀུན་གྱིས་ཁས་ལེན་ཡོད་པ། བོད་མིས་དད་གུས་བྱེད་པ། རྒྱ་མིས་དམིགས་འབེན་འཇོག་ས། མེད་ན་ཡོངས་རྫོགས་ཚར་ས། ཡོད་ན་འབྲས་བུ་སྨིན་ས། ལ་སོགས་པའི་ད་ལྟའི་༧གོང་ས་མཆོག་འདི་ལ་མི་དམིགས་པར་འདིའི་ཡང་སྲིད་ཅིག་ལ་རེ་བ་འདྲ་བརྒྱབས་བསྡད་པ་ནི་གཉིས་ཀའི་ནོར་འཁྲུལ་རེད། གང་ཞེ་ན། མ་འོངས་པའི་བོད་དོན་དེ་ཡང་འགྲུབ་མ་འགྲུབ་ཀྱང་སྐུ་ཐོག་འདི་ལ་རག་ལས་པ་ཞིག་ཡིན་པས་མ་འོངས་པར་རེ་བ་བརྒྱབ་རྒྱུ་མེད་ཅིང་། དེར་བརྟེན་མ་འོངས་པར་ཡང་སྲིད་ཕེབས་མིན་ཀྱང་མི་ཤེས་ལ་སུས་གཅོད་དགོས་པ་དེ་ཀྱང་བཤད་དཀའ། སྐབས་དེ་ལ་སུས་བཅད་པའི་ཡང་སྲིད་དེ་ཉིད་རྒྱ་བོད་གཉིས་ཀས་་ཁས་ལེན་དཀའ་ཞིང་གཉི་གར་ཕན་པ་འང་མེད་པ་ཞིག་ཡོང་སྲིད་པ་ཚོད་དཔག་བྱེད་ཐུབ་པ་ཞིག་རེད། དེས་ན་ང་ཚོས་ཡོད་ཚད་མ་འོངས་པ་ལ་བསམས་ཤིང་དེ་ལ་རེ་བ་ད་ལྟ་གལ་ཆུང་དུ་རྩི་བའི་བོད་ཀྱི་སྲོད་ངན་དེ་ད་ལྟ་རང་སྤངས་ཏེ།་ད་ལྟ་ང་ཚོར་ཡོད་བཞིན་པའི་༧གོང་ས་མཆོག་འདི་ལ་བདག་པོ་རྒྱག་རྒྱུ་དེ་ང་ཚོའི་རྩོད་དོན་ནམ་ལས་དོན་གཙོ་བོ་ཡིན་པ་ལས་རྒྱ་ཕྱོགས་ལ་ལན་བརྒྱབས་ནས་དོན་དག་རྫོགས་ཐབས་ལ་འབད་བསྡད་པ་དེ་འདྲ་ཞིག་གིས་༧གོང་ས་མཆོག་དང་མི་རིགས་ཀྱི་རེ་བའི་གཙོ་དོན་གང་ནས་འགྲུབ་ཐུབ་བམ།
རྒྱ་ནག་སྲིད་གཞུང་གིས་དུས་དང་ནམ་པ་ཀུན་དུ་བོད་མི་མང་གི་སྐྱིད་སྡུག་ལ་ཁ་ཡ་བྱེད་མྱོང་མེད། ལྷག་པར་དུ་བོད་མི་དག་ཇི་ལྟར་མེད་པ་བཟོ་རྒྱུའི་ཐབས་ལམ་བྱེད་ཀྱི་ཡོད་པ་དེ་ནི་རྒྱའི་སྲིད་གཞུང་གི་མཐར་ཐུག་གི་མངོན་འདོད་དེ་ཡིན་ཟེར་ན་འགྲིག་གི་ཡོད། རྒྱ་ནག་སྲིད་གཞུང་ལ་བོད་མི་མང་གཏན་ནས་དགོས་དོན་མེད་པར། ཁོང་ཚོའི་སྲིད་གཞུང་ལ་དགོས་པ་དེ་ནི་བོད་ཁམས་ཡོངས་ཀྱི་ས་ཆ་ཡིན།
སྤྲུལ་སྐུ་བསྟན་འཛིན་བདེ་ལེགས་མཆོག་ནི་༸ གོང་ས་སྐྱབས་མགོན་ཆེན་པོས་ཡེ་ཤེས་དབྱིངས་དཔྱད་ཀྱིས་ཐོག་ནས་ངོས་འཛིན་མཛད་པ་དེ་དོན་དང་མཐུན་པར་ཁོང་གིས་བོད་ཀྱི་ཆོས་དང་། སྐད་ཡིག རིག་གཞུང་། སྨན་ཁང་། རྒན་གསོ་ཁང་། ཡ་རབས། བཟང་སྤྱོད་སོགས་ཀྱི་ཐད་ལ་མཛད་རྗེས་རླབས་ཆེན་ཞིག་འཇོག་གནང་ཡོད་པར་བརྟེན་མ་ཉེས་ཁ་གཡོག་གིས་དྲག་སྤྱོད་པ་ཞིག་ཡིན་པའི་ཉེས་ཞྭ་གཡོགས་ཏེ་བཙན་འཇུག་བྱས་ཡོད་པ་རེད།
དེ་ནི་ང་ཚོ་བོད་རིགས་ཡོངས་ཀྱི་གྱོང་གུན་ཆེན་པོ་ཞིག་ཡིན་པ་ཙམ་མ་ཟད་ལྷག་དོན་བོད་ནང་ཡོད་པའི་མ་འོངས་པའི་སོན་རྩ་ལོ་ཆུང་བྱིས་པ་ཚོའི་མདུན་ལམ་ཐད་གྱོང་གུན་གསོབ་ཏུ་མེད་པ་ཞིག་ཏུ་གྱུར་པ་རེད།
བཙན་བྱོལ་གཞུང་གིས་ལན་འདེབས་གནང་བ་ལྟར་ཆོས་རྩ་བ་ནས་ཁས་མི་ལེན་པའི་གུང་ཁྲན་ཏང་གི་རྩ་འཛུགས་དང་གུང་ཁྲན་ཏང་ཡོན་གྱི་ལས་བྱེད་ཚོས་བོད་ཀྱི་སྤྲུལ་སྐུའི་ལམ་ཞུགས་ལ་ཇེ་བྱུས་བྱས་ཏེ་ལག་པ་འཆང་བཞིན་ཡོད་པ་དེས་འཛམ་གླིང་མི་དམངས་དུང་ཕྱུར་དྲུག་ཅུ་ཐམ་པ་ལ་མགོ་བསྐོར་རྩ་བ་ནས་གཏོང་ཐབས་བྲལ་བ་ཞིག་རེད།
ཕྱི་ལོ་ ༡༩༥༤ ༸ བོད་མིའི་བླ་ན་མེད་ཆོས་སྲིད་གཉིས་ཀྱི་དབུ་འཁྲིད་༸ གོང་ས་མཆོག་རྒྱ་ནག་ཏུ་ཕེབས་དུས་གུང་ཁྲན་ཏང་གི་རླབས་ཆེན་གཙོ་འཛིན་མའོ་ཙེ་ཏུང་གིས་ཆོས་ཟེར་བ་དེ་ལ་ཁས་ལེན་རྩ་བ་ནས་མེད་པ་མ་ཟད་ལྷག་དོན་༸ གོང་ས་མཆོག་ལའང་རྒྱལ་ཁབ་ཡར་རྒྱས་དང་མི་འབོར་སྤེལ་ཐབས་ཐད་ཆོས་དེ་དུག་རེད་ཅེས་ནན་བཤད་བྱས་ཡོད་པ་རེད།
དེ་དངོས་འབྲེལ་ཡིན་པར་བརྟེན་བོད་ཆོལ་ཁ་གསུམ་གྱི་ཁྱོན་ཡོངས་ལ་རིག་གནས་གསར་བརྗེ་ཟེར་བའི་ལས་འགུལ་ཤུགས་ཆེར་སྤེལ་ཏེ་བོད་ཀྱི་ཆོས་དང་འབྲེལ་བའི་དགོན་སྡེ་དྲུག་སྟོང་དང་། བཀའ་འགྱུར། བསྟན་འགྱུར། དཔེ་ཆ། སྐུ་བརྙན་སོགས་གནའ་བོའི་ཆོས་དང་འབྲེལ་བའི་ཅ་དངོས་ཡོངས་རྫོགས་དང་ད་དུང་ཆོས་དང་འབྲེལ་བའི་བླ་མ། གྲྭ་བཙུན། མཁན་པོ། མཁས་དབང་སོགས་ཚང་མ་རྩ་མེད་དུ་བཟོས་ཡོད་པ་རེད།
ད་ལྟ་རྒྱ་ནག་གཞུང་གིས་བོད་ནང་རིག་དངོས་སྲུང་སྐྱོབ་དང་། དགོན་སྡེ་ཉམས་གསོ། ཆོས་དད་རང་དབང་། བོད་ཀྱི་སྤྲུལ་སྐུའི་ཡང་སྲིད་ངོས་འཛིན་བྱེད་རྒྱུའི་བདག་དབང་ཡོད་རབས་བཤད་ཏེ་ལག་ལེན་བྱེད་ཀྱིན་ཡོད་པའི་གསལ་བཤད་བྱེད་པ་དེར་འཛམ་གླིང་གྱི་མི་དམངས་ཡོངས་ཁྲེད་གོད་ཤོར་བའི་བྱེད་སྟངས་ངན་པ་ཞིག་ཕྱིར་བཏོན་བྱས་ཡོད་པ་རེད།
༸ གོང་ས་མཆོག་ད་ལྟ་སྐུ་ཁམས་སྔར་ལས་དངང་བ་མ་ཟད་ཁོང་ཉིད་གུང་གྲངས་བརྒྱ་ལྷག་ཙམ་ཞིག་བཞུགས་རྒྱུའི་བཀྲིན་ཞལ་བཞེས་ཟབ་མོ་གནང་ཡོད་སྟབས་ང་ཚོའོ་བོད་ཕྱི་ནང་གཉིས་ཀྱི་བོད་རིགས་ཡོངས་བློ་སེམས་བདེ་མོར་འཁོད་ཡོད་ལ་འབྱུང་གྱུར་༸ རྒྱལ་བའི་ཡང་སྲིད་དེ་ཡང་བོད་རིགས་ཡོངས་ཀྱི་དབང་བ་ཞིག་ལས།
དེ་ནི་ཆོས་ཁས་ལེན་མི་བྱེད་པའི་རྒྱ་ནག་གཞུང་དང་། ཆོས་ཁས་ལེན་གྱི་རྒྱ་གར་གཞུང་། དམངས་གཙོ་གལ་ཆེར་བརྩི་བའི་སྟོབས་ཆེན་ཨ་རི་སོགས་འཛམ་གླིང་རྒྱལ་ཁབ་སུ་ཞིག་ལ་བདག་དབང་དེ་མེད་ལ་དེ་ནི་འཛམ་གླིང་ཁྱོན་ལ་སྔར་ནས་ད་བར་ལོ་རྒྱུས་ཐོག་བྱུང་མྱོང་མེད་པའི་བོད་མི་རིགས་ཀྱི་ཐུན་མོང་མ་ཡིན་པའི་ནང་བསྟན་ཆོས་ལུགས་ཀྱི་ཁོ་ནའི་བདག་དང་དང་ཁྱད་ཆོས་ཅིག་ཡིན།
yes …