རྣམ་འགྱུར་རྩོད་སྟངས་ཤིག

སྲིད་འཛིན་ཨོ་བྷ་མ་མཆོག་གིས་ཟླ་སྔོན་མར་པེ་ཅིན་ནས་བོད་རྒྱ་གཉིས་ཀྱི་འབྲེལ་མོལ་དེ་བསྐྱར་མཐུད་བྱ་དགོས་སྐོར་མངགས་པ་ལྟར། ད་སྐབས་བསྐྱར་དུ་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་ཀྲུའུ་ཝེ་ཆོན་དང་། ༧གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་རྣམ་གཉིས་ཀྱིས་ཕན་ཚུན་ལ་མཛུབ་མོ་འཛུགས་རེས་ཀྱི་མགོ་བརྩམས་ཡོད།

ད་རེབ་ཀྱི་རྩོད་གཞིར་བལྟས་ན། བོད་རྒྱའི་འབྲེལ་མོལ་གྱི་རིམ་པ་རྗེས་མ་དེ་མགོ་འཛུགས་དགོས་ཚེ་སླར་ཡང་ལོ་ ༧ གྱི་སྔོན་ཏེ། ༢༠༠༢ ལོར་བོད་རྒྱ་གཉིས་ཀྱིས་ཕན་ཚུན་བར་གྱི་དོགས་པ་རྣམ་རྟོག་སེལ་ཐབས་དང་། བར་ལ་ཡིད་ཆེས་བསྐྲུན་རྒྱུའི་གཞི་རིམ་གྱི་འབྲེལ་བ་དེར་ཕྱིན་ཏེ། བསྐྱར་ཏུ་ཕྱག་འཇུ་དང་བཅས་མགོ་འཛུགས་དགོས་པར་འདོད། དེའི་རྒྱུ་མཚན་ནི་ད་རེབ་ཀྱི་རྩོད་གཞི་འདི་ནི་འདས་པའི་ལོ་བདུན་རིང་གི་འབྲེལ་མོལ་གྱི་གྲུབ་འབྲས་ཏེ། ཏཱ་ལའི་བླ་མས་དོན་ངོ་མར་བོད་རང་བཙན་རྩོད་ཀྱིན་ཡོད་མེད་ཐོག་ལ་རྒྱ་ནག་གིས་དོན་ངོ་མར་རྣམ་འགྱུར་ཅི་ཞིག་བསྟན་ཡོད་མེད་དེ་ཡིན། རྒྱ་ནག་གི་ཕྱོགས་ནས་རྣམ་འགྱུར་དེ་ངག་ཐོག་ནས་བཤད་པ་ཙམ་དུ་མ་ཟད། ཤོག་ཐོག་ལ་ཕབ་ཡོད་ནའང་ད་དུང་ངོས་ལེན་མི་བྱེད་པའི་གནས་སུ་གྱུར་ཡོད། རྩོད་པ་འདིའི་དམིགས་ཡུལ་ངོ་མ་ནི་ཕན་ཚུན་བར་ལ་སྔར་ལས་ལྷག་པའི་དོགས་པ་རྣམ་རྟོག་བཟོ་རྒྱུ་དང་། ཡིད་ཆེས་མེད་པ་བཟོ་རྒྱུ་དེ་ཡིན། དམིགས་ཡུལ་འདི་འགྲུབ་སོང་ན་གཞི་ནས་བོད་རྒྱ་འབྲེལ་མོལ་གྱི་རིམ་པ་ཞིག་བསྐྱར་དུ་མགོ་བརྩམ་ཆོག

སྔོན་མ་ཏིན་ཞོ་ཕིན་དང་སྐུའི་གཅེན་པོ་རྒྱལ་ལོ་དོན་གྲུབ་རྣམ་གཉིས་ཀྱི་བཀའ་མོལ་དེ་དག་ཡིག་ཐོག་ན་མེད་སྟབས། རང་བཙན་གྱི་ཕན་ནས་གནད་དོན་གང་ཡིན་ཡང་ཐག་གཅོད་བྱ་ཆོག་ཅེས་པའི་སྐད་ཆ་ཞིག་ནམ་ཡང་བཤད་མེད་ལུགས་པེ་ཅིན་གྱི་མགོ་ཁྲིད་ཚོས་བཤད་ཡོད། ད་ནི་རྒྱ་རི་བློ་གྲོས་རྒྱལ་མཚན་མཆོག་ཀྱང་སྐུའི་གཅེན་པོ་རྒྱལ་ལོ་དོན་གྲུབ་ཀྱི་ཚད་དུ་ལྷུང་གིན་ཡོད་དེ། ཏཱ་ལའི་བླ་མས་བོད་རང་བཙན་རྩོད་ཀྱིན་མེད་པ་དེར་པེ་ཅིན་གྱི་དབུ་ཁྲིད་ཚོས་ངོས་ལེན་བྱས་ཚུལ་དེ་ནི་༧གོང་ས་མཆོག་གི་སྐུ་ཚབ་ཀྱིས་རྫུན་བཤད་པ་ཡིན་ཚུལ་བཤད་ཡོང་གི་ཡོད། ༧གོང་ས་མཆོག་གི་སྐུ་ཚབ་ངོ་མ་རྒྱལ་ལོ་དོན་གྲུབ་དང་རྒྱ་རི་བློ་གྲོས་རྒྱལ་མཚན་གཉིས་ཀ་ཁུངས་ལུང་མེད་པའི་རྫུན་བཤད་མཁན་རེར་བསྒྱུར་ཡོད།

བོད་མི་ཚོར་ཐེངས་གཉིས་པར་ངོ་འཕྲོད་པ་ནི། མ་གཞི་ནས་རྒྱ་ནག་གཞུང་གིས་༧གོང་ས་མཆོག་གི་སྐུ་ཚེར་ཚད་བཙུགས་ཏེ་དུས་ཚོད་འབུད་རྒྱག་གཏོང་བ་དང་། སྐབས་རེར་རྒྱལ་སྤྱིའི་གནོན་ཤུགས་ལ་གཡོལ་ཐབས་སུ་བོད་དོན་ཐོག་ལ་སྐད་ཆ་བཤད་ཀྱིན་ཡོད་པའི་རྣམ་འགྱུར་ཙམ་སྟོན་བཞིན་པ་མ་གཏོགས། བོད་དོན་ཐག་གཅོད་ཀྱི་ཕྱོགས་ལ་འདི་ལས་ལྷག་ཅིག་འགྲོ་ས་མེད་པ་དེ་ཡིན་སྟབས། ད་ནི་རྒྱ་ནག་གིས་འབྲེལ་མོལ་གྱི་ཐོག་ལ་རྣམ་འགྱུར་ཡག་ཉེས་གང་བསྟན་ནའང་གུང་ཁྲན་ཏང་གི་གཞུང་འདིའི་རིང་ལ་ཐག་མི་ཆོད་པ་མངོན་སུམ་ཡིན་པས། ང་ཚོས་མ་མཐར་ཡང་བོད་དོན་འདི་བོད་ཀྱི་མི་རབས་ཕྱི་མ་རྣམས་ལ་རྩོད་རྒྱུ་ཡོད་པ་ཞིག་ཏུ་འཇོག་དགོས་པར་འདོད་དོ།།