སློབ་གྲྭ་ཁག་གིས་ཤེས་ཡོན་གྱི་གནས་སྟངས་གཙོས། བོད་ཡིག་གི་གནས་ཚན་ཞན་རུ་འགྲོ་བཞིན་པ་དང་དབྱིན་ཇིའི་གནས་ཚད་འདོད་པ་ཁེངས་པ་ཞིག་ཡོང་ཐུབ་ཀྱིན་མེད་པ། སློབ་གྲྭའི་ནང་རིག་གཅིག་རྐང་འཛིན་གྱི་སློབ་གསོ་སྤྲོད་སྟངས་གང་འདྲ་ཞིག་གི་སྒང་ལ་འགྲོ་མིན་སོགས་ཀྱི་ཐད་འཚོགས་ཀྱིན་ཡོད་ཟེར།
ཟླ་འདིའི་ཚེས་ ༢༧ ཉིན་ནས་ཉིན་གསུམ་རིང་བོད་གཞུང་ཤེས་རིག་ལས་ཁུངས་ཀྱི་སྐབས་ལྔ་བའི་ཤེས་རིག་ཚོགས་ཆེན་དེ་ངྷ་ཤོད་བོད་ཁྱིམ་སློབ་གྲྭའི་ནང་འཚོགས་གཏན་འཁེལ་ཡོད་སྟབས། འདི་གའི་གསར་འགོད་པས་ཤེས་རིག་དྲུང་འཕར་དངོས་གྲུབ་རྡོ་རྗེས་ལགས་སུ་ཐེངས་འདིའི་ཚོགས་ཆེན་སྐོར་གྱི་ཞིབ་ཕྲའི་གནས་ཚུལ་བཀའ་འདྲི་ཞུས་པར། ཁོང་གིས། སྤྱིར་ཤེས་རིག་ལས་ཁུངས་ཀྱིས་སྔོན་མ་ནས་ལོ་ལྔའི་ནང་ཚོགས་ཆེན་ཐེངས་རེར་སྐོང་འཚོགས་གནང་བའི་བང་རིམ་ཞིག་སྒྲིག་ཡོད་པ་རེད། ཡིན་ནའང། གནས་ཚུལ་གང་མང་གི་རྐྱེན་གྱིས་ ༢༠༠༤ ལོའི་རྗེས་ནས་ཚོགས་ཆེན་འཚོགས་ཐུབ་ཡོད་པ་མ་རེད། ད་ལོ་སྐབས་ལྔ་བའི་ཤེས་རིག་ཚོགས་ཆེན་དེ་ཟླ་འདིའི་ཕྱི་ཚེས་ ༢༧ ནས་མགོ་འཛུགས་ཀྱིས་ཉིན་གྲངས་གསུམ་ལྷག་རིང་ངྷ་ཤོད་བོད་ཁྱིམ་སློབ་གྲྭའི་ནང་འཚོགས་གཏན་འཁེལ་ཡོད་ལ། དེའི་སྟེང་བཙན་བྱོལ་བོད་མིའི་ཤེས་རིག་ཁྱབ་ཁོངས་སུ་ཡོད་པའི་འབྲུག་དང་འབྲས་ལྗོངས། བལ་ཡུལ་སོགས་འདུས་པའི་སློབ་གྲྭ་ཡོངས་ཀྱི་འཛིན་སྐྱོང་འགན་འཛིན་དང་སློབ་སྤྱི། དགེ་ཆོས། དེ་བཞིན་མཐོ་རིམ་དང་དམའ་རིམ་སློབ་གྲྭའི་དགེ་རྒན་གྱི་འཐུས་ཚབ་དང་ཟློས་གར་དགེ་རྒན་གྱི་འཐུས་ཚབ། དེ་བཞིན་སྒེར་ངོས་ནས་གསར་འཛུགས་བྱས་པའི་སློབ་གྲྭ་ཁག་གི་སྐུ་ཚབ་བཅས་ཁྱོན་བསྡོམས་ཚོགས་བཅར་བ་ ༢༥༠ ལྷག་འདུ་འཛོམས་བྱ་འཆར་ཡོད་པ་རེད། ཅེས་ངོ་སྤྲོད་གནང་བྱུང་ལ།
ཡང་ཁོང་གིས། ཐེངས་འདིའི་ཚོགས་ཆེན་གྱི་བརྗོད་གཞི་དང་དམིགས་ཡུལ་ཐད་བརྗོད་དོན། ཐེངས་འདིའི་ཚོགས་ཆེན་གྱི་བརྗོད་གཞི་གཙོ་བོ་ནི། བོད་པའི་སློབ་གྲྭ་ཁག་གིས་ཤེས་ཡོན་གྱི་གནས་སྟངས་གང་འདྲ་ཞིག་ལ་སླེབས་ཡོད་མེད་གཞི་བྱས་པའི་བོད་ཡིག་གི་གནས་ཚན་ཞན་རུ་འགྲོ་བཞིན་པ་དང་དབྱིན་ཇིའི་གནས་ཚད་འདོད་པ་ཁེངས་པ་ཞིག་ཡོང་ཐུབ་ཀྱིན་མེད་པ་སོགས་ཀྱི་གནད་དོན་གང་མང་ཞིག་ཇི་ལྟར་ཡར་རྒྱས་དང་སླར་གསོ་བྱ་ཐབས་དང་། སློབ་གྲྭའི་ནང་རིག་གཅིག་རྐང་འཛིན་གྱི་སློབ་གསོ་སྤྲོད་སྟངས་གང་འདྲ་ཞིག་གི་སྒང་ལ་འགྲོ་གི་ཡིན་མིན་སོགས་ཀྱི་ཐད་ནས་བགྲོ་གླེང་གོ་བསྡུར་དང་གྲོས་ཆོད་གཏན་འབེབ་བྱ་རྒྱུ་དེ་རེད་ལ། དེ་དང་ཆབས་ཅིག་ནམ་རྒྱུན་ཤེས་ཡོན་ཐོག་ཕྱག་ལས་གནང་མཁན་དང་མཁས་པ་གང་མང་ཞིག་འདུ་འཛོམས་ཐོག་མི་ལོ་ལྔ་བཅུའི་ཤེས་ཡོན་གྱི་གནས་སྟངས་དང་རིག་གཅིག་རྐང་འཛིན་ཐད་བགྲོ་གླེང་གནང་རྒྱུ་རེད། དམིགས་བསལ་ཤེས་ཡོན་སྲིད་བྱུས་གསར་བ་ཞེས་ཟུར་དུ་མ་གླེང་རུང་བོད་དབྱིན་གཉིས་ཀྱི་ཤེས་ཚད་མཐོ་རུ་གཏོང་ཐབས་སོགས་ཤེས་ཡོན་སྲིད་བྱུས་དང་འབྲེལ་ཡོད་པ་རེད། མ་འོངས་ལག་ལེན་བསྟར་མིན་ཐད་གླེང་སློང་ཡོང་གི་རེད་བསམ་གྱི་འདུག ཅེས་བརྗོད་བྱུང།
ཐེངས་འདིའི་ཤེས་ཡོན་ཚོགས་ཆེན་དེ་ཉིན་གྲངས་གསུམ་རིང་འཚོགས་འཆར་ཡོད་འདུག་ལ། ཉིན་དང་པོའི་དབུ་འབྱེད་མཛད་སྒོའི་སྟེང་༧གོང་ས་མཆོག་ཆིབས་བསྒྱུར་གྱིས་དེར་ཡོད་ཤེས་ཡོན་འགན་འཛིན་རྣམ་པ་དང་ཕྱོགས་ཡོངས་དགེ་རྒན་ཡོངས་ལ་ལམ་སྟོན་བཀའ་སློབ་གནང་རྒྱུ་ཡིན་འདུག་ལ། ཉིན་གཉིས་པའི་སྟེང་ཚོགས་ཆུང་བགོས་ཏེ་གོ་བསྡུར་གནང་རྒྱུ་དང་། ཉིན་གསུམ་པར་ཕྱོགས་ཡོངས་འཐུས་མི་རྣམས་ཀྱི་བསམ་ཚུལ་བསྡུ་རུབ་ཀྱིས་གྲོས་ཆོད་གཏན་འབེབས་དང་བགྲོ་གླེང་གོ་བསྡུར་གནང་རྒྱུ་ཡིན་འདུག
//མཛད་རིམ་དང་ཡིག་ཆ་ཀློག་པའི་མི་རབས།,,
ང་ལ་ནམ་རྒྱུན་ཚོར་སྣང་འདི་འདྲ་ཞིག་འདུག མི་རབས་འདི་མཛད་རིམ་དང་ཡིག་ཆ་ཙམ་ཀློག་མཁན་ཞིག་ཡིན་པ་དང། མཛད་རིམ་གྱི་རྗེས་ལ་ཡིག་ཆ་ཞིག་ཀློག་རྒྱུ་རག་གི་རེད། དེ་ནས་ལག་ལེན་གྱི་ཉི་མ་ཞིག་འཆར་རྒྱུ་མེད་འགྲོ། སློབ་གྲྭ་ཁག་གི་སློབ་ཚན་དང་དགེ་རྒན་ནི་སྔར་བཞིན་རླུང་རྩེ་ན་འདར་ཞིང་རིམ་གྱིས་འཁྱག་ལ་འབྱར་འགྲོ་བའི་གནས་བབ་ན་ལྷག་འདུག
ཁ་སང་དེ་རིང་ཤེས་རིག་ཚོགས་ཆེན་ཐེངས་ལྔ་བ་འཚོགས་བཞིན་ཡོད། ཚོགས་བཞུགས་པ་ཚོས་བསམ་བློ་ཅི་ཞིག་གི་འོག་ནས་འཆར་གཞི་གང་ཞིག་ཁུར་ཡོད་དམ་ངས་གསལ་བོ་མི་ཤེས། མཛད་རིམ་དང་གྲོས་གཞི་ཁག་མཐོང་སོང། ཚོགས་ཆེན་གྱི་རྗེས་ལ་ཡིག་ཆ་ཁ་ཤས་ཁུར་ནས་ཚོགས་ཞུགས་པ་ཚོ་རང་རང་གི་ས་ལ་སོང་ནས་སྐད་ཆ་སྙན་པོ་རེ་བཤད་ཀི་རེད། གཙོ་བོ་༸གོང་ས་མཆོག་གི་གསུང་དངོས་སུ་ཐོས་པ་དང་ཞལ་དངོས་སུ་མཇལ་བ་དེ་ཁོང་ཚོའི་ཚོགས་ཆེན་ལ་ཞུགས་པའི་ཁེ་ཕན་དང་གཟི་བརྗིད། མཛད་གཙོ་རྣམ་པ་དང་ཚོགས་ཞུགས་ལྷན་རྒྱས་ཀྱི་འདྲ་པར་དེ་ནི་ལོ་རྒྱུས་ཤིག་དང་རིན་ཐང་ཞིག་ལ་བརྩི་ངེས་རེད། དེ་ནས་ཡིག་ཆ་དེ་ཚོ་ཡིག་སྣོད་ཅིག་གི་ནང་ལ་བཅུགས་ནས་གཉིད་འཇུག་གི་རེད་ལ། ཚོགས་ཆེན་ཟེར་བའི་སྒྲ་དབྱངས་དེ་ཡང་རིམ་གྱིས་འཇག་འགྲོ་གི་རེད། འདི་ནི་གློ་བུར་དུ་གཉིད་སད་དེ་གློ་བུར་དུ་གཉིད་འགྲོ་བའི་འགྲོས་ཤིག་རེད།
གྲོས་གཞི་ཁག་སྔོན་མ་ནས་ཡོད་བསྡད་པ་དེ་འདྲ་རེད། དམིགས་བསལ་གྱི་གྲོས་གཞི་གང་ཡང་མི་འདུག ཤེས་རིག་གིས་འཆར་གཞི་ཞིག་བཟོས་ནས་ལག་ལེན་ལ་བསྟར་རྒྱུ་བཞག་པའི་ལས་དོན་གང་ཡང་མེད་ན། གྲོས་བསྡུར་ཞིག་བྱས་པའི་རྗེས་ལ་ལོ་འགའ་ཤས་ཀྱི་རྗེས་སུ་ཡང་གྲོས་བསྡུར་ཞིག་བསྐྱར་དུ་བྱེད་རྒྱུ་རེད། གོ་རིམ་འདི་ནས་འགྱུར་བ་ཞིག་མཐོང་རྒྱུ་ཡོད་དམ། འཕེལ་རྒྱས་ཤིག་འགྲོ་རྒྱུ་ཡོད་དམ།
ལག་འཁྱེར་མཐོན་པོ་ཡོད་པའི་དགེ་རྒན་དང་སློབ་སྤྱི་རྣམ་པ་ཚོ་དེ་རིང་གི་ཚོགས་ཆེན་ལ་ཞུགས་ཡོད་རྒྱུ་རེད། ང་ཚོའི་སློབ་གྲྭའི་སློབ་སྤྱི་ཡང་ཚོགས་ཆེན་ལ་ཕེབས་སོང། སྒམ་ཚུགས་ཀྱིས་འགྲོ་སོང། ཡིན་ནའང་ཁོ་ལ་ལག་འཁྱེར་ཙམ་ལས་ཅི་ཡང་ཡོད་ནི་མ་རེད། དུས་རབས་ཀྱི་འགྱུར་འགྲོས་དང་མཐུན་པའི་སློབ་གསོའི་གོ་རྟོགས་དང་ཤེས་ཚད་ནི་ཀླད་ཀོར་གྱི་མན་ན་ཡོད། ང་ཚོའི་སློབ་སྤྱི་འདྲ་བ་མང་པོ་ཞིག་ཚོགས་ཆེན་འདི་ལ་ཞུགས་ཡོད་ཚད་དོན་སྙིང་མེད་པ་ཐག་གིས་བཅད་ནས་བཤད་ན་ཆོག་གི
ཚོགས་ཆེན་ལ་སྙིང་པོ་ཡོད་མེད་ནི་དེ་རིང་གི་ངའི་བརྗོད་དོན་གཙོ་བོ་མ་རེད། དངོས་གནས་ང་ཚོའི་ང་ཚོའི་ཤེས་ཡོན་དེ་ཡར་རྒྱས་ལ་གཏོང་དགོས་ན། ཐོག་མར་སློབ་གྲྭ་ཁག་ན་ཤེས་ཚད་ཀྱིས་མི་འདང་བཞིན་དུ་ཨུ་ཚུགས་ཀྱིས་དགེ་རྒན་དང་སློབ་སྤྱི་སོགས་ཀྱི་རྐུབ་བཀྱགས་སྲུང་ནས་འདུག་མཁན་ཚོ་དང། ཤེས་རིག་ལས་ཁུངས་ཀྱི་ཤེས་ཡོན་སློབ་གསོའི་སྐོར་ལ་ཕྱག་ལས་གནང་མཁན་གྱི་ལས་བྱེད་ཤེས་ཡོན་དང་འཇོན་ཐང་མེད་ས་དེ་ཚོས་རང་ངོས་ནས་དགོངས་ཞུ་བྱེད་ཐུབ་ན། ད་གཟོད་གཞི་ནས་ང་ཚོའི་ཤེས་ཡོན་སློབ་གསོ་ལ་རེ་བ་ཞིག་ཡོད་རྒྱུ་རེད། དེ་ལྟར་མིན་ན་མི་རབས་འདི་མཛད་རིམ་དང་ཡིག་ཆ་ཙམ་ཀློག་མཁན་ལས་ཅི་ཡང་འབྱུང་གི་མ་རེད།
རིགས་གཅིག་རྐང་འཛིན་ཐད་བགྲོ་གླེང་གནང་ཉིན་བརྡ་ཞིག་འབྱོར་ན་ཅི་མ་རུང་།
སྐབས་ལྔ་པའི་ཤེས་རིག་ཚོགས་ཆེན་འཚོགས་གཏན་འཁེལ་ཡོད་སྟབས་ངས་དེ་རིང་རང་གི་བསམ་ཚུལ་ཅུང་ཟད་ཅིག་ཞུ་འདོད་བྱུང་། དྲ་ཚིགས་ཏུ་ཕེབས་མཁན་ཕལ་ཆེ་བས་རང་ཉིད་དང་། རང་གི་མིག་མདུན་དུ་དངོས་སུ་མྱོང་བཞིན་པའི་ཉིན་རེའི་ལས་འགན་ལ་སྲུང་བརྩི་མ་གནང་བར་རང་ཉིད་ཀྱི་ས་ནས་ལེ་དབར་ཁྲི་འབུམ་གྱི་བར་ཐག་ཆོད་པའི་གནས་ཚུལ་ཁག་ལ་དོ་སྣང་དང་གླེང་སློང་གང་མང་ཞིག་གནང་བཞིན་འདུག་པ་དེར་ཞིབ་ཏུ་དཔྱད་ཚེ་ངོ་མ་སེམས་སྐྱོ་དགོས་པ་ཞིག་རེད་སྙམ།
ཕལ་ཆེར་ངས་བསམས་ན་ད་ལྟའི་གཞོན་སྐྱེས་མང་ཆེ་བའི་བསམ་བློའི་རང་བཞིན་དང་ཤེས་ཡོན་ཀྱི་གནས་ཚད་གནད་དུ་སྨིན་མ་ཐུབ་པ་ཞིག་གི་སྐྱོན་ཆ་ཡིན་པ་འདྲ།
ཁ་སང་རླབས་ཆེན་གྱི་མི་སྣ་ང་ཕོད་མཆོག་སྐུ་གཤེགས་དུས་ནས་ད་བར་དྲ་ཚིགས་སུ་ཆན་བཀོད་ཀྱི་མི་གྲངས་༡༤༠ ལྷག་བྱུང་སོང་ཡང་དོན་དངོས་ཐོག་ཁོང་ནི་རླབས་ཆེན་དང་ཡང་ན་བྱབ་ཆུང་གང་ཞིག་ཡིན་ཀྱང་ཁོང་འཇིག་རྟེན་འདི་ནས་རྫོགས་སོང་བ་རེད།
ཡིན་ནའང་ཤེས་རིག་ཚོགས་ཆེན་འཚོགས་གཏན་འཁེལ་བ་འདི་བཙན་བྱོལ་བོད་མིའི་མ་འོངས་བོད་ཀྱི་རྒྱུན་འཛིན་མཁན་ལོ་ཆུང་བྱིས་པ་ཚོའི་མི་ཚེའི་མདུན་ལམ་དང་། ལྷག་དོན་ཤེས་ཡོན་གྱི་སྦྱང་ཚད། མ་འོངས་བོད་གསར་པའི་ལས་དབང་ནི་ཁོང་ཚོའི་རྣམ་དཔྱོད་དང་། ཤེས་ཡོན་དང་། ལྷག་བསམ། འཇོན་ཐང་བཅས་ལ་རག་ལུས་སྟབས།
ས་ཕྱོགས་གང་དུ་བཞུགས་པའི་དྲ་གྲོགས་ཚོས་བོད་ཀྱི་ལོ་ཆུང་བྱིས་པ་ཚོའི་ཤེས་ཡོན་དང་མི་ཚེའི་མདུན་ཐད་ལ་སོ་སོའི་བསམ་ཚུལདང་། ཉམས་མྱོང་།
བསླབ་གསོ་སྤེལ་སྟངས་སོགས་ཀྱི་ཐད་ལ་ལེགས་སྤེལ་ཉེས་འགོག་གི་དགོངས་ཚུལ་དང་ལམ་སྟོན་གནང་རྒྱུ་སོགས་ནི་ཆེ་ཤིན་ཏུ་ནས་གལ་ཆེ་ཞིག་ཡིན།