སློབ་རར་ཡོད་དུས་ཀྱི་རེ་འདོད། པད་མ་བསམ་གྲུབ།

ཚོགས་ལ་ཉེ་བའི་ཤེས་རིག་ཚོགས་ཆེན་ཐེངས་ལྔ་བར་ཆེད་དུ་ཕུལ་བ།

པད་མ་བསམ་གྲུབ། ཤེས་རབ་དགའ་ཚལ་སློབ་གླིང༌།

མི་ལོ་བཅུ་དྲུག་ལྷག་གི་ཡར་སྔོན་ཞིག་ལ། ང་རང་བོད་འབྱོར་ན་ཆུང་བྱིས་པ་བྱིངས་དང་འདྲ་བར་ཧི་མ་ལ་ཡའི་གངས་གསེང་བརྒྱུད་དེ་བྲོས་བྱོལ་ལ་སླེབས། སྐབས་དེའི་བསམ་མེད་ཀྱི་བུ་ཆུང་ང་ཡུལ་ནས་ཐོན་ཁར། ཕ་མས་ང་ལ་ནམ་ཡང་དྲན་རྟེན་དུ་ཉར་འོས་པའི་རྒྱུན་སྲོལ་གྱི་དངོས་པོ་གང་ཡང་གནང་མི་འདུག རྒྱབ་ཁུག་ཆུང་ཆུང་དེར་ལྭ་བའི་བརྗེ་ལེན་སོགས་ལམ་ཁའི་མཁོ་ཆས་འགའ་བླུགས་ཡོད། མ་གཞི་རླངས་འཁོར་ལ་བསྡད་དེ་ལྷ་སར་བསྐྱོད་དུས། དེ་ངས་རྒྱབ་དུ་འཁུར་མི་དགོས་པས་ནང་དུ་ཅི་ཡོད་ལ་དོ་སྣང་མ་བྱུང༌། དེ་ནས་ཟླ་ངོ་གཅིག་རིང་རྐང་ཐང་དུ་བསྐྱོད་པའི་ལམ་བར་དུ་རྒྱབ་ཁུག་དེ་ཧ་ཅང་ལྗིད་ཆེ་བའི་སྣང་བ་ཞིག་འདུག ཨ་མྱེས་ཀྱིས་རྒྱུན་དུ་བཤད་པ་ལྟར་༼ཁུར་བོ་ཁུར་གིན་ཁུར་གིན་ལྕི་༽བས་ཡིན་ནམ། ངལ་གསོ་ཞིག་གི་གླགས་བཙལ་ཏེ། ངས་རྒྱབ་ཁུག་གི་ཁ་བསྔོགས་ནས་གཡུག་ཆོག་པའི་ཅ་དངོས་འདྲ་ཨེ་ཡོད་བལྟས། དེའི་ནང་དུ་ལྗིད་ཆེ་བའི་ཅ་དངོས་ཤིག་ཡོད་པ་ནི་བོད་ཡིག་གི་དེབ་གཟུགས་ཆེན་པོ་ཞིག་སྟེ། ༼བོད་ཀྱི་བརྡའ་སྤྲོད་པ་སུམ་ཅུ་པ་དང་རྟགས་ཀྱི་འཇུག་པའི་མཆན་འགྲེལ་མདོར་བསྡུས་ཏེ་བརྗོད་པ་ངོ་མཚར་འཕྲུལ་གྱི་ལྡེ་མིག་ཅེས་བྱ་བ་བཞུགས་སོ་༽ཞེས་འཁོད་པའི་གསེར་ཏོག་སུམ་རྟགས་ཀྱི་དེབ་ཅིག་རེད། དུས་དེ་ནས་བཟུང་ཕ་མས་ང་ལ་སྔོན་ཆད་ནས་དྲན་རྟེན་རྩ་ཆེན་ཞིག་གནང་ཡོད་པ་དང་དེ་ཡང་ཤིན་ཏུ་ལྗིད་ཆེ་ཞིག་ཡིན་པ་ཤེས་བྱུང༌།

དྲན་རྟེན་དེའི་དབང་གིས། ང་རང་སློབ་གྲྭར་ཡོད་དུས་བོད་ཡིག་གི་དགེ་རྒན་ཚོ་ལས་ཀྱང་བོད་སྐད་ལ་དུངས་ཤིང་བོད་ཡིག་ལ་དགའ་བའི་སློབ་མ་ཞིག་ཡིན་པའི་སྣང་བ་འཆར་མྱོང༌། ཁ་ཕོ་ཆེ་ཚོད་འདུག་ཀྱང་། དེ་ནི་སྐབས་དེའི་བྱིས་བློ་དྭངས་གཙང་ཞིག་རེད། དེར་བརྟེན་སློབ་བུ་ཆུང་ཆུང་ངས་ཕ་མ་དྲན་པ་ནང་བཞིན། ཉིན་མཚན་དུས་དྲུག་ལ་རང་གི་ལག་ཏུ་ཀློག་སྤྲོ་བའི་བོད་ཡིག་གི་དེབ་རེ་ཨེ་འཐོབ་ལ་རེ་བ་ཡིན། འོན་ཀྱང་ལོ་ཆུང་བྱིས་པ་ང་ལ་ཕ་སྐད་ཀྱི་ལམ་ནས་དབུགས་ཀྱི་འབྱིན་རྔུབ་བྱེད་སའི་རྩེད་རྭ་སྐྱིད་པོ་ཞིག་གཏན་ནས་མ་ཐོབ། ང་ལ་ཐོབ་པ་ནི་སུན་སྣང་བསྐྱེད་བྱེད་ཀྱི་སློབ་དེབ་དང་དོན་ཅི་ཡང་མི་གོ་བའི་གཞུང་ལུགས་དང་ལྟ་གྲུབ་གྱི་དཔེ་ཆ། ཡང་ན་ངའི་བློô་ཁ་ལ་མི་འཚམ་པའི་ཆབ་སྲིད་དྲིལ་བསྒྲགས་ཀྱི་ཡིག་ཆ་འགའ་རེད། དེ་བས་ངས་བོད་སྐད་ཡིག་ནི་བྱིས་པའི་སྦྱོང་ཐུབ་པའི་སྐད་ཡིག་ཅིག་མིན་པར་སྙམ་ཞིང༌། རང་གི་ཕ་སྐད་སྦྱོང་བའི་རེ་འདོད་ཆེ་ནའང་ནུས་པས་མ་ལྕོགས་པའི་སྡུག་བསྔལ་ལྕི་མོ་ཞིག་གིས་མནན་ཞིང་མནར། ཐབས་ཟད་པའི་གནས་བབ་དེ་འདྲའི་འོག་ཏུ། ན་ཆུང་སློབ་བུ་ངས་འུ་ཚུགས་དང་སྡུག་རུས་ཀྱི་ངང་ནས། མཐོང་ན་མགོ་ན་བར་བྱེད་པའི་དཔེ་ཆ་དེ་དག་ཡང་ཡང་ཁ་མི་འབྱེད་ཀ་མེད་བྱུང༌། ཚུལ་དེ་ནི་བཟོ་ལས་གསར་བརྗེ་ཡི་ཚུན་དང༌། ལྷག་པར་འཛམ་གླིང་དམག་ཆེན་སྔ་གཞུག་སྐབས་ཀྱི་བྱིས་པའི་ཐོབ་ཐང་ཤོར་བའི་དྭ་ཕྲུག་དག་གི་དཀའ་སྡུག་དང་ཅིས་མི་མཚུངས།

དྲན་རྟེན་དེའི་དབང་གིས། ང་རང་ལོ་ན་སོན་པའི་སློབ་བུ་ཞིག་སྟེ་ན་གཞོན་ཆུང་ཆུང་ཞིག་ཡིན་དུས། ང་ལ་ལས་ཀྱི་སྣེ་མོ་བ་གང་ལས་ཀྱང་༼ཕ་ཡུལ་བརྗེད་ཀྱང་ཕ་སྐད་མི་བརྗེད་༽རྒྱུའི་འགན་ཁུར་ཀྱི་བསམ་པ་དྲག་པོ་ཞིག་ཡོད་པར་འདོད་མྱོང༌། ང་རྒྱལ་ཆེ་ཚོད་འདུག་ཀྱང་། དེ་ནི་ན་གཞོན་ཞིག་གིས་དྲན་འོས་པའི་ཐོབ་ཐང་རེད། དེར་བརྟེན་གཞན་ལ་ཡོད་པ་མཐའ་དག་ང་ཚོར་ཡོད་མི་ཆོག་པ་ཅི། སྐད་ཡིག་ཡིན་པ་གཅིག་འདྲ་ཡིན་ན་འདི་འདྲའི་བར་ཁྱད་ཅིག་ཅི་ལ་དོད་པ་ཡིན་ནམ། བསམ་མ་ཤེས་པ་ཡིན་ནམ་ཡང་ན་ནུས་པས་མ་ལྕོགས་པ་ཡིན། ཐབས་གཞན་མེད་པ་རེད་དམ་ཡང་ན་གཞན་ལ་བཀོལ་ན་མི་འོས་པ་ཡིན་སོགས་ཀྱི་དྲི་རྟགས་གང་མང་གིས། ན་གཞོན་སློབ་བུ་ངའི་སེམས་པ་སྡུག་ཡུས་དང་འཁང་ར་མོད་པའི་དཔུང་གིས་གཙེས་ཤིང་རྒོལ། ཡི་མུག་པའི་ལས་དབང་བཙན་པོ་དེའི་འོག་ཏུ། ངས་ད་དུང་མྱ་ངམ་ཐང་ན་ཆུ་འཚོལ་བ་ནང་བཞིན། རང་གི་དགའ་ཁ་མོས་ཕྱོགས་ལ་རན་པའི་བོད་ཡིག་གི་དེབ་རེ་ཨེ་འཐོབ་ལ་འབུར་ཚུགས་ཀྱིས་རེ་ཞིང༌། ཧམ་རྒྱུག་གིས་བཙལ། འོན་ཀྱང་ང་ལ་ཐོབ་པ་ནི་སྔར་ལྟར་ཡིན། ཚུལ་དེ་ནི་ངའི་ཨ་མྱེས་ང་བརྒྱད་ལོར་རྒྱའི་བཙོན་དུ་ཚུད་སྐབས་དང༌། ལྷག་པར་དྲུག་ཅུ་ཐམ་པའི་མུ་གེ་ཁྲོད་དུ་ཀོ་དུམ་སྐམ་པོ་ལ་དམར་དྲི་བྲོ་རྒྱུ་ཡོད་པའི་དངོས་མྱོང་གི་གཏམ་རྒྱུད་དང་འདྲ་ཚོད་ཡིན་ངེས། དྲན་རྟེན་དེའི་དབང་གིས། ད་ལྟ་བདག་ཉེས་མེད་ན་ཆུང་བྱིས་པ་སྟོང་གི་སྐུ་ཚབ་ཏུ་འགྲེང་སྟེ། ཨ་ཁུ་དང་ཨ་ནེ་ཚོ་ལ་ཐུགས་རྗེ་གཟིགས་རོགས་ཞུ་ཞུ།

སྐད་ཡིག་ནི་ང་ཚོ་བོད་མི་རིགས་ཀྱི་སོན་རྩ་ཡིན་པའི་ངོ་རྟགས་གཅིག་པུ་དེ་ཡིན་ན། ན་ཆུང་ང་ཚོར་མཁོ་བ་ནི་སྣ་འཛོམས་སྤྱོད་བདེ་ཡིན་པའི་ཕ་སྐད་བསླབ་གཞིའི་སློབ་དེབ་ཡིན། མཛེས་ཆ་ལྡན་ལ་ཡིད་ཀྱི་དང་བ་འདྲེན་པའི་ལྟ་ཀློག་དེབ་ཆས་ཕུན་སུམ་ཚོགས་པོ་ཡིན། རྣམ་པ་མཛེས་ཤིང་ཇུས་འགོད་ཁྱད་པར་ཅན་གྱི་བརྙན་དེབ་སྣ་ཚོགས་ཡིན་ལ། ད་དུང་ཚིག་གིས་མི་ཤོད་པའི་དོན་དེ་རི་མོས་སྟོན་ཅིང༌། ལག་ལེན་དངོས་ལ་ཁྲིད་པའི་སྐད་ཡིག་སློབ་ཁྲིད་ཅིག་མཁོ་བ་ནི་ཨ་ཅང་ཅང༌། དེ་ལྟར་ན། ཕ་སྐད་དཔེ་དེབ་མེད་པ་ནས་ཡོད་པ་དང༌། ཡོད་པ་དེའང་གྲ་རྒྱས་ཕུན་ཚོགས་ཤིག་ཏུ་བསྒྱུར་བར་འོས་པའི་ཁར། སྐད་ཡིག་ནི་འཚོ་བ་དང་རྩོམ་རིག་ལ་བརྟེན་ནས་གོམས་འདྲིས་སུ་འགྲོ་དགོས་པ་ཞིག་ཡིན་གཤིས། ང་ཚོར་མི་མཁོ་བ་ནི་འཚོ་བ་དང་རྒྱང་བཀྱེད་ཅིང༌། རྩོམ་རིག་ལ་ཁ་བྲལ་ཏེ་ལག་ལེན་དངོས་ལ་མི་འབེབས་པའི་སྐད་ཡིག་གི་ཤུན་སྐོགས་ཙམ་པུ་བ་དེ་ཡིན། དེའི་ཕྱིར་ན། དེང་གི་བོད་ཡིག་དཔེ་དེབ་ཀྱི་འོས་འགན་ཤིན་དུ་ལྕི་སྟེ། བྱིས་པ་ང་ཚོའི་སྐད་ཡིག་གི་གོམས་འདྲིས་དེ་ཕ་མའི་ཁ་སྒོ་ཙམ་དུ་ཟད་ལ། ཕ་མ་ཚོའི་རང་སྐད་ཀྱང་ཁྱིམ་སྒོའི་ཕྱི་རོལ་ལ་བུད་ཚེ། འཚོ་བའི་དགོས་མཁོ་ཡི་བཙན་འཛུལ་ཧ་ཅང་རྒོད། ཁ་སྟབས་ཞན་པའི་སྣང་ཚུལ་འདི་བསྒྱུར་འདོད་ན། ཁ་ཚ་དགོས་གཏུགས་ཀྱི་ཁག་ཐེག་དེ་བྱིས་པའི་ལྟ་ཀློག་དཔེ་དེབ་ལ་ཡོད་འདུག་གོ

དེ་བས་ན། སི་པན་གྱི་མཁས་པ་ཞིག་གིས་༼ང་ནམ་ཡང་ཕ་ཡུལ་དང་བྲལ་མ་མྱུང་སྟེ། ངའི་སྐད་ཡིག་ནི་ངའི་ཕ་ཡུལ་ཡིན་༽ཞེས་གསུངས་པ་ལྟར། ན་ཆུང་བྱིས་པ་ང་ཚོར་རང་གི་ཕ་སྐད་ཀྱི་ཕ་ས་དྲོན་མོ་ཞིག་རྔམ་རྔམ་ཤུགས་ཤུགས་ཀྱིས་ཅི་འདྲའི་མཁོ་བ་ལ་ཨང༌། ཕ་ས་ཕ་ཡུལ་དེ་ཡོད་ན། སྣང་བ་ཁྲལ་ཁྲུལ་གྱི་སོན་རྩ་ཞིག་མ་ཡིན་པར། ང་ཚོས་ཀྱང་ཕ་མ་འཛོམས་པའི་གཅེས་ཕྲུག་བཞིན། གནའ་བོའི་འཚོ་བར་བཞུད་ཅིང༌། དྲིན་ཅན་མེས་པོ་རྣམ་པར་ཁ་བརྡ་ལྷུག་པོ་ཞིག་བྱ་ཅི་ལ་མི་འདོད། ཕ་ས་ཕ་ཡུལ་དེ་ཡོད་ན། མགོ་བོ་ཞུམ་ཞུམ་གྱི་སོན་རྩ་ཞིག་མིན་པར། ང་ཚོ་ཡང་མི་རིགས་གཞན་གྱི་བྱིས་པ་ལྟར། དུས་གསར་གྱི་འཚོ་བར་འགྲིམས་ནས། ཕ་ཡུལ་འཛུགས་སྐྲུན་ལ་སྨན་པའི་རྐང་རྗེས་རེ་བཞག་སྟེ། ཁྲེལ་ཡོད་ཀྱི་བུ་ཕྲུག་ཅིག་བྱེད་ཅི་བས་འདོད་དོ།

མཇུག་མཐར་བདག་ཉེས་མེད་ཀྱི་བྱིས་པ་ཁྲི་སྟོང་གི་སྐུ་ཚབ་དུ་འགྲེང་སྟེ། ཨ་ཁུ་དང་ཨ་ནེ་ཚོ་ལ་རེ་སྐུལ་ནན་མོ་ཞིག་ཞུ་འདོད་པ་ནི། ང་ཚོར་བྱིས་པར་རན་པའི་ཕ་ཡུལ་ཞིག་མཁོ་སྟེ། བྱིས་པ་ང་ཚོར་རན་པའི་ཕ་ཡུལ་ནི་བོད་མི་ཀུན་ལ་དབང་བའི་མ་འོངས་ཕུགས་བསམ་ཞིང་གི་ཕ་ཡུལ་དེ་ཡིན་པར་མ་ཟད། དེ་ནི་རང་གིས་རང་ལ་ཁག་འཁུར་བྱས་ཤིང་འཛམ་གླིང་ཡོངས་ལ་འགན་ཁུར་བ་ཞིག་ཀྱང་ཡིན་པ་དེའོ།