ལིག་ཞོ་པོར་ལོ་ ༡༡ གི་ཁྲིམས་ཐག་བཅད་འདུག

སྐུ་ཞབས་ལིག་ཞོ་པོ་ལ་བཙོན་འཇུག་ཁྲིམས་ཐག་བཅད་པ་དེ་ནི་སྨྲ་བརྗོད་རང་དབང་ལ་ཉེས་ཁྲིམས་བཅད་པ་ཞིག་རེད་ཟེར།

ཕྱི་ཚེས་ ༢༥ ཉིན་གྱི་སྔ་དྲོར་པེ་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་དང་པོ་ཡིས་རྒྱ་རིགས་དམངས་གཙོ་དོན་གཉེར་བ་སྐུ་ཞབས་ལིག་ཞོ་པའོ་ལགས་ལ་༼རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་འཁྲིགས་ཟིང་སློང་མཁན་༽ཞེས་པའི་ཉེས་མིང་འོག་ལོ་ ༡༡ གི་དུས་བཀག་བཙོན་འཇུག་གི་ཁྲིམས་ཐག་བཅད་དང་། ལོ་གཉིས་ཀྱི་ཆབ་སྲིད་ཁེ་དབང་བཙན་འཕྲོག་བྱས་ཡོད། ཁྲིམས་ར་ནས་ཁྲིམས་བཅད་གསལ་བསྒྲགས་ཞུ་སྐབས་ལིག་ཞོ་པོ་ཡི་ཆུང་མ་ལིག་ཞ་དང་ཁོའི་ནུ་བོ་ལིག་ཧྲོ་ཞན། དེ་མིན་འབྲེལ་མེད་ཟུར་ཉན་པ་ཉི་ཤུ་མ་གཏོགས་ལིག་ཞོ་པོ་དང་འབྲེལ་ཡོད་ཀྱི་ནང་མི་གཉེན་གྲོགས་གང་ཡང་ཁྲིམས་རར་ཡོང་དུ་བཅུག་མེད་པ་དང་། ཁྲིམས་ཁང་གི་ཕྱི་ལོགས་སུ་ཉེན་རྟོག་པ་བཀྲམས་ཏེ་བཀག་སྡོམ་ནན་མོ་བྱས་ཡོད་པ་རེད། ལིག་ཞོ་པོ་ཡིས་ཁོ་རང་ཉིད་ཀྱི་རྩོམ་ཡིག་མཐའ་དག་ནི་སྨྲ་བརྗོད་རང་དབང་དང་འབྲེལ་བ་ཡོད་པ་འབའ་ཞིག་ཡིན་པ་དང་། ཁོ་རང་ཉིད་ཀྱིས་ཉེས་ཁྲིམས་དེ་ངོས་ལེན་མེད་པའི་སྐོར་བརྗོད་ཡོད་འདུག དེར་མ་ཟད། ཁོང་གི་ཁྲིམས་རྩོད་པ་གཉིས་ཀྱིས་ཀྱང་༼རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་འཁྲིགས་ཟིང་སློང་མཁན་༽གྱི་དྲག་སྤྱོད་ཀྱི་ཉེས་མིང་བཀལ་བ་དེ་ནི་གཞི་རྩ་མེད་པ་ཞིག་ཡིན་པ་དང་། སྨྲ་བརྗོད་རང་དབང་ལ་ཉེས་ཁྲིམས་བཅད་པ་ཞིག་ཀྱང་ཡིན་པས་ཁྲིམས་ཆད་གཏན་འབེབས་དེར་ངོ་རྒོལ་ཡོད་སྐོར་བརྗོད་ཡོད་འདུག 

རང་ལོ་ ༥༣ ལ་སོན་པའི་སྐུ་ཞབས་ལིག་ཞོ་པོའོ་ནི་རྒྱ་རིགས་མི་མང་ཁྲོད་གྲགས་ཅན་གྱི་ཤེས་ལྡན་མི་སྣ་ཞིག་གམ་འགྲོ་བ་མིའི་ཐོབ་ཐང་རྩོད་ལེན་པ་ཞིག་ཡིན་ལ། ༡༩༨༩ ལོའི་དམངས་གཙོའི་ལས་འགུལ་དང་། ཐིག་བརྒྱད་ལོའི་རྩ་འཛིན་ཡིག་ཆ་འདོན་མཁན་གྱི་མི་སྣ་གཙོ་གྲོས་ཤིག་ཀྱང་ཡིན། ཐིག་བརྒྱད་ལོའི་རྩ་འཛིན་ཡིག་ཆ་འདོན་སྤེལ་གནང་བའི་རྗེས་སུ། རྒྱ་གཞུང་གི་ཉེན་རྟོག་པས་ལོ་སྔོན་མའི་ཕྱི་ཟླ་ ༡༢ པའི་ནང་ཁོ་རང་འཇུ་བཟུང་བྱས་ཏེ་ལོ་གཅིག་གི་དུས་ཡུན་རིང་ཁྲིམས་མཐུན་མ་ཡིན་པའི་བཙོན་འཇུག་བཀག་ཉར་བྱས་རྗེས། ཟླ་འདིའི་ཕྱི་ཚེས་ ༢༣ ཉིན་ཁྲིམས་བཤེར་ཁྲིམས་ར་ཚོགས་ཡོད་པ་དང་། ཕྱི་ཚེས་ ༢༥ ཉིན་ལོ་ ༡༡ གི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་རེད།

ཕྱི་ཚེས་ ༢༣ ཉིན་ལིག་ཞོ་པོ་ལ་ཁྲིམས་བཤེར་ཁྲིམས་ར་ཚོགས་སྐབས། ཁྲིམས་རྩོད་པ་གཉིས་ལ་ཁྲིམས་རྩོད་དག་འབུལ་གྱི་དུས་ཡུན་སྐར་མ་ ༢༠ ལས་སྤྲད་མེད་པར་མ་ཟད། ཁྲིམས་རྩོད་དག་འབུལ་བྱེད་སྐབས་ཀྱང་ཕྱོགས་ཡོངས་ཚད་བཀག་ཆེན་པོ་བཟོས་ཡོད། ལིག་ཞོ་པོ་ཡིས་རང་ཉིད་དག་འབུལ་གྱི་སྙན་ཞུ་ཡི་གེ་དེའང་ཁྲིམས་བཤེར་དཔོན་གྱིས་དུས་ཚོད་རིང་པོ་མེད་པར་ཁ་གཡར་ཏེ་ཁྲིམས་ཁང་ནས་སྒྲོག་སྦྱོང་བྱེད་དུ་བཅུག་མེད་པ་རེད།  ཁྲིམས་བཤེར་ལ་ཟུར་ཉན་དུ་ཆས་མཁན་ལིག་ཞོ་པའོ་ཡི་ནུ་བོ་ལིག་ཧྲོ་ཞན་གྱིས་རྒྱལ་སྤྱིའི་གསར་ལམ་ཁག་ཏུ་བརྗོད་དོན། དྲང་སྙོམས་མ་ཡིན་པས་གནས་སྟངས་མང་པོ་ཞིག་འདུག དཔེར་ན། ཁྲིམས་ཁང་དུ་ངའི་ཕུ་བོས་རང་ཉིད་དག་འབུལ་བྱེད་སྐབས། ཁོ་རང་ཉིད་ཀྱིས་བྲིས་པའི་དག་འབུལ་ཞུ་ཡིག་དེ། ཁྲིམས་བཤེར་དཔོན་གྱིས་ཁྲིམས་ལུགས་གཞིར་བཟུང་ཁོ་རང་ཉིད་ལ་སྒྲོག་སྦྱོང་བྱེད་པའི་གོ་སྐབས་སྤྲད་མེད་པ་རེད་ཅེས་འགྲེལ་བརྗོད་བྱས་ཡོད་པ་རེད།

དེ་བཞིན་ཉེས་ཁྲིམས་ཞིབ་བཤེར་གྱི་ཉིན་དེར་ཨ་རི་དང་། དབྱིན་ཡུལ། ཨི་ཊ་ལི། འཇར་མན། ཨོ་སི་ཊོ་ལི་ཡ། ཅག་སྤྱི་མཐུན་རྒྱལ་ཁབ། ཁེ་ན་ཌ། ནོར་ཝེ། སི་ཝེ་ཌན་བཅས་ཡུ་རོབ་མནའ་མཐུན་གྱི་རྒྱལ་ཁབ་ཁག་གཙོས་རྒྱལ་ཁབ་ ༡༠ ལྷག་གི་ཕྱི་འབྲེལ་དཔོན་རིགས་དག་གིས་སྐུ་ཞབས་ལིག་ཞོ་པའོ་ལ་ཁྲིམས་བཤེར་བྱེད་པའི་ཁྲིམས་རར་མཉམ་ཞུགས་བྱེད་ཆོག་པར་རེ་སྐུལ་བྱས་ཡོད་ནའང་རྒྱ་གཞུང་གིས་ངོས་ལེན་བྱས་མེད་པ་རེད།  ཁྲིམས་བཤེར་ཁྲིམས་རར་མཉམ་ཞུགས་བྱེད་མ་བཅུགས་པའི་ཨ་རིའི་གཞུང་ཚབ་ཁང་གི་དཔོན་རིགས་ Gregory May གྷུ་རེ་གྷོར་རེ་མེ་ཡིས་ཁྲིམས་ཁང་གི་ཕྱི་ལོག་ནས་གསལ་བསྒྲགས་བྱས་དོན། ང་ཚོས་རྒྱ་ནག་སྲིད་གཞུང་གིས་མྱུར་དུ་ལིག་ཞོ་པའོ་གློད་གྲོལ་ཡོང་བའི་རེ་སྐུལ་བྱེད་ཀྱིན་ཡོད། དེར་མ་ཟད། རྒྱ་ནག་མི་དམངས་ཀྱིས་ཞི་བའི་ལམ་ནས་ཆབ་སྲིད་ཐད་ཀྱི་བསམ་ཚུལ་བརྗོད་པའི་ཁེ་དབང་ལ་བརྩི་བཀུར་དང་། དེ་བཞིན་རྒྱལ་སྤྱིའི་ངོས་ལེན་ཡོད་པའི་གཞི་རྩའི་རང་དབང་དང་། ཁྲིམས་བཤེར་འགྲོ་ལུགས་ཡོང་རྫོགས་དྲང་བདེན་དང་ཕྱི་གསལ་ནང་གསལ་བྱས་ཏེ་རྒྱ་ནག་མི་དམངས་ཀྱི་ཁེ་དབང་སྲུང་སྐྱོབ་ལ་གུས་བརྩི་ཡོང་བར་རེ་སྐུལ་ཞུ་གི་ཡོད་ཅེས་བརྗོད་འདུག

རྒྱ་ནག་གི་ཕྱི་འབྲེལ་མགྲིན་ཚབ་པ་ཅང་ཡུས་ཀྱིས་ཕྱི་ཚེས་ ༢༤ ཉིན་པེ་ཅིན་དུ་འཚོགས་པའི་གསར་འགོད་གསལ་བསྒྲགས་སྟེང་བརྗོད་དོན། ལིག་ཞོ་པའོ་ནི་རྒྱ་ནག་གི་སྤྱི་དམངས་རེད། རྒྱ་ནག་འབྲེལ་ཡོད་ཁྲིམས་ལུགས་སྡེ་ཚན་ཁག་གིས་ཁྲིམས་ཐོག་ནས་ཉེས་དོན་ཐག་གཅོད་གནང་གི་རེད། རྒྱལ་ཁབ་འགའ་རེ་དང་ཁོ་ཚོའི་གཞུང་ཚབ་པ་རེ་འགས་ཉེས་དོན་འདིའི་ཐད་བཏོན་པའི་ལྟ་ཚུལ་མཐའ་དག་ནི་རྒྱ་ནག་གི་ནང་སྲིད་ལ་ཐེ་ཇུས་བྱས་པ་ཞིག་ཡིན་ལུགས་དང་། རྒྱ་ནག་གིས་དེར་མོས་མཐུན་རྩ་བ་ནས་མེད་པར་མ་ཟད། རྒྱལ་ཁབ་འདི་དག་གིས་རྒྱ་ནག་གི་རྩ་ཁྲིམས་ལ་བརྩི་བཀུར་གྱི་སྒོ་ནས་རྒྱ་ནག་གི་ནང་སྲིད་ལ་ཐེ་ཇུས་མི་བྱེད་པར་སྐུལ་མ་གཏོང་གི་ཡོད་ཅེས་བརྗོད་ཡོད་འདུག

ཕྱི་ཚེས་ ༢༥ ཉིན། ཁྲིམས་ཆད་ཕྱིར་བསྒྲགས་བྱས་མ་ཐག ཐིག་བརྒྱད་ལོའི་རྩ་འཛིན་ཡིག་ཆར་མིང་རྟགས་འགོད་མཁན་ཡིང་ལིས་ཚེ་ཡིས་ཕྱི་ཕྱོགས་ཀྱི་གསར་འགོད་པར། རྒྱ་ནག་སྲིད་གཞུང་གིས་ལིག་ཞོ་པའོ་ལ་ལོ་ ༡༡ གི་དུས་བཀག་བཙོན་འཇུག་གི་ཁྲིམས་ཐག་བཅད་པ་དེར་ངོ་རྒོལ་ཡོད་ལ།  ང་རང་ཐིག་བརྒྱད་ལོའི་རྩ་འཛིན་ཡིག་ཆར་མོས་མཐུན་དང་མིང་རྟགས་འགོད་འཁན་ཞིག་ཡིན་པའི་ཆ་ནས། ད་ལྟ་ཁྲིམས་བཤེར་ཁྲིམས་རའི་ལས་གནས་དངོས་ན་ཡོད་པའི་ཉེན་རྟོག་པར་རང་ཉིད་ལ་ཡང་ཉེས་ཁྲིམས་འདི་འགེལ་དགོས་པའི་ངོས་ལེན་བྱེད་དུ་འགྲོ་རྒྱུ་ཡིན་ཅེས་བརྗོད་དེ། ཉེན་རྟོག་པ་དག་གི་མདུན་དུ་སོང་སྟེ་རང་ཉིད་ཀྱང་ལིག་ཞོ་པའོ་དང་ལྷན་དུ་བཙོན་འཇུག་བྱེད་དགོས་པར་བརྗོད་ཡོད་པ་དང་།  སྐར་མ་འགའི་རྗེས་སུ་ཉེན་རྟོག་པའི་ལྭ་བ་གྱོན་མེད་པའི་མི་བཅུ་གྲངས་འགའ་ཡོང་སྟེ། ཡང་ལིས་ཚེའང་ཉེན་རྟོག་པའི་རླངས་འཁོར་ནང་བླུགས་ནས་ས་ཆ་གཞན་ཞིག་ཏུ་ཁྲིད་ཡོད་འདུག


པེ་ཅིན་གྱི་རང་དབང་རྩོམ་པ་པོ་ཡུས་ཅེ་ཡིས་ཧྥ་རན་སིའི་གསར་སྤེལ་ཁང་ལ། སྐུ་ཞབས་ལིག་ཞོ་པོ་ལ་ཉེས་ཁྲིམས་བཅད་པ་དེ་ནི་སྨྲ་བརྗོད་རང་དབང་ལ་ཉེས་ཁྲིམས་བཅད་པ་རེད། ལིག་ཞོ་པོ་ནི་རྒྱ་ནག་མི་དམངས་ཁྲོད་ཀྱི་ཤེས་ལྡན་པ་དང་རྩོམ་པ་པོ་ཞིག་རེད། ཐིག་བརྒྱད་ལོའི་རྩ་འཛིན་གཙོས་པའི་ཁོང་གི་རྩོམ་ཡིག་མཐའ་དག་ནི་ཞི་འཇམ་དང་། གནས་ལུགས། བསམ་བློའི་རིན་ཐང་ལྡན་པའི་བརྩམས་ཆོས་འབའ་ཞིག་རེད། ཁོང་ཉིད་ལྟ་བུའི་ཤེས་ལྡན་པར་ཡང་ཉེས་ཁྲིམས་གཅོད་དགོས་ན། ང་རང་ཉིད་ཚུད་པའི་ཤེས་ལྡན་པ་དག་དང་ཐིག་བརྒྱད་ལོའི་རྩ་འཛིན་ཡིག་ཆར་མིང་རྟགས་འགོད་མཁན་ཚང་མར་དུས་མཉམ་དུ་ཉེས་ཁྲིམས་གཅོད་དགོས་པ་དང་། ལིག་ཞོ་པོ་ལ་ཁྲིམས་ཐག་གཅོད་པའི་དུས་བཀག་དེ་ནུབ་ཕྱོགས་རྒྱལ་ཁབ་ཁག་ཏུ་གཙུགས་ཆེར་འཛིན་པའི་ཡི་ཤུའི་འཁྲུངས་སྐར་དང་སྐབས་འཁེལ་བཟོས་པ་དེ་ནི་ནུབ་ཕྱོགས་མི་དམངས་ཀྱིས་དོ་སྣང་ཆེན་པོ་མི་ཡོང་བའི་ཆེད་དུ་ཡིན་པའི་སྐོར་འགྲེལ་བརྗོད་བྱས་ཡོད།

དེ་མིན་གཞན། ལིག་ཞོ་པའོ་ལ་ཐུགས་ཁུར་དང་ཁོང་གི་ཆུང་མ་ལིག་ཞ་ལ་སེམས་གསོ་མཚོན་ཆེད་དུ། ཧོང་ཀོང་གསར་འགོད་མཐུན་ཚོགས་དང་རྒྱ་ནག་འགྲོ་བ་མིའི་ཐོབ་ཐང་སྲུང་སྐྱོབ་ཁྲིམས་རྩོད་ཚོགས་པ་བཅས་ཚོགས་ཁག་བཅུ་ལྷག་གིས་གཟའ་ཉི་མའི་ཉིན་ཞང་ཧོང་ཀོང་གྲོང་ཁྱེར་གྱི་སྲང་ལམ་ཁག་ཏུ་མི་དམངས་ཀྱིས་ཡི་ཤུའི་འཁྲུངས་སྐར་ལ་སྐུ་ཞབས་ལིག་ཞོ་པོར་ཕུལ་བའི་ཤིས་ཚིག་ཤོག་བྱང་དག་བསྡུ་རུབ་ཀྱིས་ཕྱི་ཚེས་ ༢༤ ཉིན་གྱི་ཕྱི་དྲོ་པེ་ཅིན་དུ་ཡོད་པའི་ཁོའི་ཆུང་མ་ལིག་ཞ་ལ་བསྐུར་ཡོད་པ་དང་། ཕྱི་ཟླ་ ༡༢ པའི་ཚེས་ ༢༨ ཉིན་ཏེ། སྐུ་ཞབས་ལིག་ཞོ་པའོ་ཡི་སྐྱེས་སྐར་གྱི་ཉིན་མོར་ཁོང་གི་ཕྱག་ལ་འབུལ་ཐུབ་པའི་རེ་བ་བཅིངས་ཡོད་པ་རེད། དེ་བཞིན། སྐུ་ཞབས་ལིག་ཞོ་པའོ་ཡིས་ཀྱང་ཁྲིམས་ཁང་ནས་རང་ཉེས་དག་འབུལ་ཞུ་སྐབས། འདས་པའི་ལོ་ངོ་ ༢༠ ནང་དུ་ང་ལ་རྒྱབ་སྐྱོར་གནང་མཁན་དང་། ང་ལ་སྟོབས་ཤུགས་ཀྱི་ནུས་པ་བསྩོལ་མཁན་གཙོ་བོ་ནི་ལིག་ཞ་ཡིས་ངའི་ཡོད་ཚད་ལ་བཅངས་བའི་བརྩེ་དུང་དེ་ཡིན་ཞེས་བརྗོད་ཡོད་འདུག