༧གོང་ས་མཆོག་གིས་ཟླ་འདིའི་ཚེས་ ༧ ཉིན་རྡོ་རྗེ་གདན་དུ་གསུང་ཆོས་ཀྱི་སྐབས་སུ། བོད་པའི་གཏན་སློབ་ཁག་ཏུ་བོད་ཕྲུག་ཉུང་དུ་འགྲོ་བཞིན་ཡོད་པ་དང༌། སློབ་གྲྭ་དེ་དག་ཏུ་བོད་དང་ཆོས་རིག་གཅིག་པའི་ཧི་མ་ལ་ཡའི་རི་རྒྱུད་དུ་གནས་སྡོད་མི་རིགས་ཀྱི་ཕྲུ་གུ་ཚོ་སློབ་འཇུག་གནང་འོས་སྐོར་བཀའ་སློབ་ཕེབས་ཡོད་པའི་ཐད་ལ། ཕྱི་ཚེས་ ༡༣ ཉིན་བོད་ཀྱི་དུས་བབ་གསར་ཁང་གིས་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་སུ་བཀའ་འདྲི་ཞུས་པ་ཁག་གཤམ་དུ་བཀོད་ཡོད།
དུས་བབ། ༧གོང་ས་མཆོག་གིས་ཉེ་ལམ་ནས་བཀའ་སློབ་རིམ་བཞིན་ཕེབས་ཡོད་པ་དང༌། ཐེངས་འདིར་ཡང་རྡོར་གདན་གྱི་གསུང་ཆོས་སྐབས་སུ་ཐུགས་འཚབ་ཆེན་པོའི་ངང་ནས། ད་སྐབས་གཏན་སློབ་ཁག་ཏུ་བོད་པའི་སློབ་ཕྲུག་ཉུང་དུ་ཕྱིན་ཡོད་པ་དང༌། ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཚོ་སློབ་གྲྭ་འདི་དག་གི་ནང་འཛུལ་ཞུགས་བྱ་རྒྱུའི་ལམ་སྟོན་གནང་ཡོད་པ་དེར་དགོངས་ཚུལ་ག་རེ་ཡོད་དམ།
ཤེས་རིག་དྲུང་ཆེ།༽ ༧གོང་ས་མཆོག་ནས་དེ་སྐོར་བཀའ་སློབ་སྔ་རྗེས་རིམ་སྩལ་ཡོད་པ་དེར་འཕྲལ་ཕུགས་གཉིས་དང་འབྲེལ་བའི་དགོས་པ་དང་རྒྱུ་མཚན་ཁྱད་པར་ཅན་ཞིག་ཡོད་པ་དེ་རང་ཅག་ཚང་མས་ཕྱིན་ཅི་མ་ལོག་པར་གོ་རྟོགས་ཐུབ་པ་བྱ་རྒྱུ་དང༌། བཀའ་སློབ་དགོངས་དོན་ཇི་བཞིན་ལག་ལེན་དོན་འཁྱོལ་ཐུབ་པ་བྱ་རྒྱུ་གལ་ཆེན་རེད་སྙམ་པ་བྱུང༌། ༧གོང་ས་མཆོག་ཐུགས་འཚབ་གནང་ཡུལ་ལྟེ་བ་ནི་སློབ་གྲྭར་འཛུལ་ཞུགས་བྱེད་མཁན་བོད་ཕྲུག་ཉུང་དུ་འགྲོ་བའི་རང་བཞིན་གྱི་གནས་ཚུལ་དེ་མིན་པར། བོད་ཀྱི་ཆོས་དང་རིག་གཞུང་མ་ཉམས་རྒྱུན་འཛིན་གྱི་སླད་དུ་སྐུ་ངལ་ཆེན་པོས་ཆེད་འཛུགས་གནང་བའི་སློབ་གྲྭ་དེ་དག་རིམ་བཞིན་བེད་མེད་དུ་གྱུར་ན་ཤིན་ཏུ་ཕངས་པོ་རེད་དགོངས་པ་དེ་ཡིན་སྙམ། བཀའ་སློབ་འདིས་བཙན་བྱོལ་དུ་བོད་པའི་སློབ་གྲྭ་མང་པོ་ཆེད་འཛུགས་གནང་བའི་དགོས་དོན་སྙིང་པོ་གཅིག་གང་ཡིན་པའང་གསལ་པོར་བསྟན་འདུག་སྙམ་པ་བྱུང༌།
དུས་བབ།༽ གཏན་སློབ་ཁག་ཏུ་ལོ་རེ་བཞིན་བོད་པའི་སློབ་ཕྲུག་བརྒྱ་ཆ་ག་ཚད་ཅིག་ཉུང་དུ་འགྲོ་བཞིན་ཡོད་དམ།
ཤེས་རིག་དྲུང་ཆེ།༽ སྐབས་འདིའི་གཏན་སློབ་ཅེས་པ་རྒྱ་གར་གཞུང་གིས་འཛིན་སྐྱོང་བྱེད་པའི་གཏན་སློབ་ཁག་དྲུག་ཡོད་པ་དེ་དག་ལ་གཙོ་བོར་གོ་དགོས། ལོ་རེའི་བརྒྱ་ཆའི་ཚད་ལ་ངེས་གཏན་ཆེར་མེད། གཏན་སློབ་དེ་དག་ཏུ་ཕྱི་ལོ་ ༢༠༠༡ ནས་ ༢༠༠༩ བར་གྱི་ལོ་དགུའི་ནང་བོད་ཕྲུག་བརྒྱ་ཆ་ ༡༦་༡༤ ཉུང་དུ་སོང་ཡོད་ཅིང༌། གཏན་སློབ་བྱེ་བྲག་རེ་ཟུང་ནང་བརྒྱ་ཆ་ ༢༥ ལྷག་ཉུང་དུ་སོང་བའང་ཡོད། བོད་པའི་སློབ་གྲྭ་སྤྱི་ཡོངས་ནས་བརྗོད་ན། ཕྱི་ལོ་ ༢༠༠༡ ནས་ ༢༠༠༩ བར་གྱི་ལོ་དགུའི་ནང་བོད་ཕྲུག་བརྒྱ་ཆ་ ༡༠་༣༥ ཉུང་དུ་སོང་འདུག
དུས་བབ།༽ སློབ་ཕྲུག་ཉུང་དུ་ཕྱིན་པའི་རྒྱུ་རྐྱེན་གཙོ་བོ་གང་ཡིན་ནམ།
ཤེས་རིག་དྲུང་ཆེ།༽ རྒྱུ་རྐྱེན་གཙོ་བོ་གསུམ་ཡོད། ཤེས་ཡོན་ཅན་གྱི་ཁྱིམ་ཚང་ཁྲོད་དུ་འཛམ་གླིང་སྤྱི་འགྲོས་ལྟར་ཕྲུ་གུའི་སྐྱེ་ཚད་དམའ་རུ་ཕྱིན་པ་དང་གཅིག དཔལ་འབྱོར་གནས་སྟངས་བཟང་དུ་སོང་བའི་ཁྱིམ་ཚང་མང་པོས་ཕྲུ་གུ་རྒྱ་གར་གྱི་སྒེར་སློབ་སོགས་སུ་བཏང་བ་དང་གཉིས། བོད་མི་མང་པོ་ཨ་རི་སོགས་ཕྱི་རྒྱལ་དུ་གནས་སྤོ་བྱས་དང་བྱེད་བཞིན་ཡོད་པ་དང་གསུམ་རེད།
དུས་བབ།༽ སློབ་ཕྲུག་ཉུང་དུ་ཕྱིན་ཏེ་སློབ་གྲྭ་སྒོ་བརྒྱག་དགོས་འཁེལ་བ་དེ་འདྲ་བྱུང་ཡོད་དམ།
ཤེས་རིག་དྲུང་ཆེ།༽ སློབ་ཕྲུག་ཉུང་དུ་ཕྱིན་པ་ལ་བརྟེན་ནས་སློབ་གྲ་སྒོ་བརྒྱག་དགོས་བྱུང་བ་དེ་འདྲ་འགའ་ཤས་བྱུང་ཡོད། འོན་ཀྱང་ད་ཕན་གཏན་སློབ་ཆེ་གྲས་སྒོ་བརྒྱག་དགོས་པ་དེ་འདྲ་བྱུང་མེད།
དུས་བབ།༽ སློབ་གྲྭ་སྒོ་བརྒྱབས་པ་དེ་ཚོ་ས་གནས་གང་གི་སློབ་གྲྭ་གང་གང་ཡིན་ནམ། སྒོ་བརྒྱབས་པའི་སློབ་གྲྭ་དེ་དག་གི་དགེ་ལས་དང་སློབ་ཕྲུག་དེ་ཚོ་སློབ་གྲྭ་གང་དུ་གོ་སྒྲིག་བྱས་ཡོད་དམ།
ཤེས་རིག་དྲུང་ཆེ།ས༽ ཕྱི་ལོ་ ༡༩༨༩ ནས་ ༢༠༠༩ བར་གྱི་ལོ་ཉི་ཤུའི་ནང་སློབ་ཕྲུག་ཉུང་བའི་རྐྱེན་གྱིས་སློབ་གྲྭ་སྒོ་བརྒྱབས་དགོས་པ་གྲངས་ ༡༦ བྱུང་འདུག་ཅིང༌། དེ་དག་ནི་རྒྱ་གར་དུ་ཁར་ཤངས་དང༌། མི་རིག གུམས། ཁ་ར་པ་ཐར། ཀམ་རའོ། ས་རྟོན། བཀྲ་ཤིས་ལྗོངས། ལ་ཁན་ཝ་ལ། ནེ་ནི་ཏལ། སྤོན་ཌོ། སུན་དར་ན་གར། སྤི་ཐུབ་བཅས་དང༌། བལ་ཡུལ་དུ་རྡོར་པ་ཊན། འབྲུག་ཡུལ་དུ་དཀར་ཆེ་དང༌། ཁ་ས་ཁ། ལྷོང་མཚོ་བཅས་སུ་ཡོད་པའི་དམའ་རིམ་སློབ་གྲྭ་རྣམས་རེད། སློབ་གྲྭ་དེ་དག་གི་སློབ་ཕྲུག་ལྷག་མ་དང་དགེ་ལས་རྣམས་འབྲེལ་ཁུངས་སློབ་གྲྭ་གཞན་དུ་གནས་སྤོར་བྱས་ཡོད་པ་རེད།
དུས་བབ།༽ སློབ་གྲྭ་སྒོ་བརྒྱབས་ཟིན་པའི་ས་གནས་དེ་དག་གི་ཕྲུ་གུ་ཚོར་ད་ལྟ་སློབ་གྲྭར་འགྲོ་རྒྱུའི་དཀའ་ངལ་ཡོད་དམ། རྗེས་ཕྱོགས་གནས་ཚུལ་དེ་འདྲ་མི་ཡོང་བའི་ཐབས་ལམ་ཤེས་རིག་ལས་ཁུངས་ཀྱི་ངོས་ནས་ག་རེ་གནང་གི་ཡོད་དམ།
ཤེས་རིག་དྲུང་ཆེ།༽ གོང་གསལ་ས་གནས་ཁག་གི་ཕྲུ་གུ་ཚོར་ད་ལྟ་སློབ་གྲྭ་འགྲོ་ས་མེད་པའི་དཀའ་ངལ་རྩ་བའི་ཆ་ནས་མེད་ཀྱང༌། སོ་སོའི་སྡོད་གནས་རང་དུ་བོད་པའི་སློབ་གྲྭ་མེད་པའི་དཀའ་ངལ་ཡོད། སྤྱིར་མིའི་སྤྱི་ཚོགས་དང་བྱེ་བྲག་སྐྱབས་བཅོལ་བའི་སྤྱི་ཚོགས་ནང་ཚོད་དཔག་མི་ཐུབ་པའི་འགྱུར་ལྡོག་མང་པོ་ཡོང་སྲིད་པ་ཞིག་ཡིན་གཤིས། སྔོན་ཡོད་སློབ་གྲྭ་ཞིག་སྒོ་བརྒྱབས་པ་ཙམ་གྱིས་མ་འགྲིགས་པར་བྱས་པར་ངོས་འཛིན་བྱེད་མི་ཐུབ་པས། སླད་གནས་ཚུལ་དེ་འདྲ་མི་ཡོང་བའི་ཐབས་ལམ་ཞེས་པར་ལན་འདེབས་ཞུ་གལ་མ་མཐོང༌། ད་སྐབས་སློབ་གྲྭ་གསར་རྒྱག་གི་ལས་འཆར་ཁག་ལ་ཐོག་མར་དགོས་གལ་ཡོད་མེད་དང༌། བར་དུ་འཛིན་སྐྱོང་ཐུབ་མིན། མཐར་རྒྱུན་གནས་ཐུབ་མིན་སོགས་ཞིབ་འཇུག་གཟབ་ནན་བྱེད་བཞིན་པ་དང༌། ཕྱི་ལོ་ ༢༠༠༡ ཙམ་ནས་སློབ་གྲྭ་གསར་རྒྱག་དང་རྒྱ་བསྐྱེད་ཀྱི་ལས་གཞི་ཁག་ལ་ཤེས་རིག་ལས་ཁུངས་ནས་རྒྱབ་གཉེར་མི་དགོས་པར་གཙོ་འདོན་ཞུ་བཞིན་ཡོད།
དུས་བབ།༽ སློབ་ཕྲུག་ཉུང་དུ་ཕྱིན་པ་བཞིན་དགེ་ལས་ཀྱི་གྲངས་འབོར་ཡང་ཉུང་དུ་འགྲོ་བཞིན་ཡོད་དམ།
ཤེས་རིག་དྲུང་ཆེ།༽ སློབ་ཕྲུག་ཉུང་དུ་ཕྱིན་པ་བཞིན་དགེ་རྒན་ལས་ཀྱི་གྲངས་འབོར་ཉུང་དུ་ཕྱིན་མེད། གཅིག་བྱས་ན་ཕྲན་བུས་མང་དུ་སོང་ཡོད་སྲིད། དེ་ནི་སྔོན་མེད་དགོས་གལ་གསར་པ་མི་ཉུང་བ་ཞིག་འཐོན་བཞིན་ཡོད་པས་ཡིན།
དུས་བབ།༽ ཉེ་ཆར་དུས་བབ་དྲ་རྒྱའི་སྟེང་བསམ་ཤོག་བསྡུས་སྐབས་ཕལ་ཆེ་བས་སོ་སོའི་བུ་ཕྲུག་གཏན་སློབ་ཁག་ལས་བོད་ཁྱིམ་སློབ་གྲྭར་འཇུག་འདོད་ཡོད་པ་བཤད་འདུག་པ་དེའི་ཐད་བསམ་ཚུལ་གང་འདྲ་ཡོད་དམ།
ཤེས་རིག་དྲུང་ཆེ།༽ དུས་བབ་དྲ་རྒྱའི་སྟེང་བསམ་ཤོག་བསྡུས་པའི་གྲུབ་དོན་ལྟར། ཕ་མ་ཕལ་ཆེ་བས་སོ་སོའི་ཕྲུ་གུ་གཏན་སློབ་ཁག་ལས་བོད་ཁྱིམ་སློབ་གྲྭར་འཇུག་འདོད་བྱས་དང་བྱེད་བཞིན་ཡོད་པ་བདེན་པ་རེད། གཞིས་ཆགས་ཀྱི་སློབ་གྲྭ་མང་པོར་སློབ་ཕྲུག་ཉུང་དུ་འགྲོ་བཞིན་ཡོད་པའི་རྒྱུ་རྐྱེན་གཅིག་ཀྱང་དེ་རེད། ཕ་མ་སུ་ཡིན་རུང་སོ་སོའི་ཕྲུ་གུ་མཐུན་རྐྱེན་དང་ལྟ་རྟོག་བཟང་སའི་སློབ་གྲྭ་ཞིག་ལ་གཏོང་འདོད་བྱ་རྒྱུ་དེ་རང་བཞིན་ཡིན་པས། དེར་བསམ་ཚུལ་དམིགས་བསལ་གང་ཡང་མེད། འོན་ཀྱང་གནས་ཚུལ་དེ་གཞིས་ཆགས་སྲ་བརྟན་གྱི་སྲིད་བྱུས་དང་དོན་འགལ་འགྲོ་
གཞི་ཡོད་མེད་བརྟག་དགོས་པ་ཞིག་རེད་སྙམ།
དུས་བབ།༽ ཤེས་རིག་ལས་ཁུངས་ཀྱི་ངོས་ནས་འདིར་ཁ་གསབ་དང་ཉམས་པ་སླར་གསོ་གང་འདྲ་བྱེད་ཀྱིན་ཡོད།
ཤེས་རིག་དྲུང་ཆེ།༽ ཕྲུ་གུ་ཉུང་དུ་འགྲོ་བའི་རང་བཞིན་གྱི་རྒྱུ་རྐྱེན་ཁག་ལ་ཤེས་རིག་ལས་ཁུངས་ཀྱི་ངོས་ནས་ཁ་གསབ་དང་སླར་གསོ་གང་ཡང་གནང་ཐབས་མེད། ད་ཡོད་སློབ་གྲྭ་ཁག་གཅིག་གི་ཕྱི་ནང་གི་མཐུན་རྐྱེན་བཟང་དུ་གཏོང་རྒྱུ་སོགས་ཀྱི་སྒོ་ནས་རྒྱ་བལ་འབྲུག་གསུམ་དུ་བོད་ཕྲུག་གང་ཡོད་པ་རྣམས་བོད་པའི་སློབ་གྲྭ་ཁག་ཏུ་སློབ་འཇུག་ཡོང་ཐབས་འབད་བརྩོན་སྔར་མུས་བཞིན་བྱ་རྒྱུ་ཡིན། འདིའི་ཐད་ཤེས་རིག་ལས་ཁུངས་གཅིག་པུ་མིན་པར་ཕྲུ་གུའི་བདག་པོ་ཁྱིམ་ཚང་སོ་སོའི་ངོས་ནས་ཀྱང་༧གོང་ས་མཆོག་གི་ཐུགས་དགོངས་ལྟར་ཕྲུ་གུ་རྣམས་བོད་ཀྱི་སྐད་ཡིག་
དང་རིག་གཞུང་གི་ཤེས་ཡོན་དང་མ་འབྲལ་བ་ཞིག་དགོས་ན་ཁོང་ཚོ་སློབ་གྲྭ་གཏོང་ཡུལ་མ་ནོར་བ་ངེས་པར་གནང་དགོས་སྙམ། གོང་བརྗོད་གཏན་སློབ་ཁག་ཏུ་ཧི་མ་ལ་ཡའི་རི་རྒྱུད་མི་རིགས་ཀྱི་ཕྲུ་གུ་གསར་འཇུག་བྱ་རྒྱུའི་སྐོར་རྒྱ་གར་གཞུང་གི་འབྲེལ་ཡོད་ལས་ཁུངས་ལ་འབྲེལ་བསྡུར་ཞུ་མུས་ཡིན་ཞིང༌། ད་ལྟ་བོད་སློབ་ཁག་ཏུ་ཧི་མ་ལ་ཡའི་རི་རྒྱུད་ཀྱི་ཕྲུ་གུ་གྲངས་ ༡༤༥༠ ལྷག་ཙམ་ཡོད་མུས་ཡིན།
ཧི་མ་ལའི་ནང་པའི་བསྟན་པ་ནི་གལ་གནད་ཤིན་ཏུ་ཆེ་བ་ནི།
དེང་གི་ཆར་ཡང་ཁུ་ནུ་༸བླ་མ་བསྟན་འཛིན་རྒྱལ་མཚན་དང་བ་ཀུ་ལ་རིན་པོ་ཆེ་མཆོག ༸སྐྱབས་རྗེ་དགའ་ལྡན་ཁྲི་ཐོག་པ་འདི་དང་ལོ་ཙཱ་བ་རིན་ཆེན་བཟང་པོ་མཆོག ༸སྐྱབས་རྗེ་སེར་ཀོང་སྤྲུལ་སྐུ་དང་བདག་གི་དགེ་བའི་བཤེས་གཉེན་ཆེན་མོ་༸རྒན་བློ་བཟང་རྒྱ་མཚོའི་ཡང་སྲིད་མཆོག་སྤྲུལ་མར་སྤྲུལ་བསྟན་འཛིན་ཚེ་བརྟན་ལ་སོགས་པའི་སྐྱེས་ཆེན་དམ་པ་མང་པོའི་འཁྲུངས་ཡུལ་ཡིན་པས་ནང་བསྟན་དར་ཤིང་རྒྱས་ལ་ཡུན་རིང་དུ་གནས་པའི་སྨོན་ཡིག་ཏུ། །
སངས་རྒྱས་བསྟན་པ་རྟག་ཏུ་རྒྱས་འགྱུར་ཅིག །
ཉེ་སྔོན་ཕྲན་ས་ཆ་གང་མང་ཞིག་ཏུ་སོང་ནས་ཚུར་འབྱོར་འཕྲལ་རྒས་གསོ་ཁང་དུ་འཁྱུག་ཙམ་ཕྱིན་ནས་ཚུར་གཞིས་གྲོང་གསུམ་པའི་སུམ་མདོར་སླེབས་སྐབས་གཞིས་ཆགས་ཀྱི་མི་ཞིག་གིས་ཕྲན་ལ་ང་སྐུ་ངོས་ཁྱེད་ཀྱི་མདུན་ལ་ཞིག་བཅར་དགོས་ཡོད་ན་དུས་ཚོད་ཅིག་སྤྲད་རོགས་གནང། ཞུ་ཡ་ཞིག་ཡོད་ཟེར། ཕྲན་གྱིས་མང་པོ་གསུང་ཡ་ཡོད་དམ། ཁྱེད་རང་དགའ་ལྡན་བར་དུ་ཕེབས་རྒྱུ་དཀའ་ལས་རེད། ངེད་གཉིས་ལམ་ཟུར་དུ་ཕར་འགྲོ་ལ་ད་ལྟ་གསུངས་དང་འགྲིགས་ས་རེད། ཞུས་པར་ཁོང་གིས་ཕྲན་ལ་འདི་ནས་ཞུས་ན་མ་གུས་པའི་བཟོ་འདྲ་ཞིག་འདུག་ཟེར། ཕྲན་གྱིས་ཉེན་ཁ་གང་ཡང་མི་འདུག་གསུངས་རོགས་གནང། ཞུས་པར། ཁོང་གིས་ཕྲན་ལ་ངའི་ཕྲུ་གུའི་འདི་ལོའི་ཡིག་ཚད་སྐབས་བརྒྱ་ཆ་གཅིག་གིས་མ་འདང་ནས་འདི་ལོའི་ཡིག་ཚད་མ་འཕྲོད་པ་ཆགས་འདུག བརྒྱ་ཆ་རེ་ཟུང་དམིགས་བསལ་གྱིས་སྤྲད་ཆོག་པའི་དབང་ཚད་རྒྱ་གར་སློབ་སྤྱི་ལ་ཡོད་པར་བརྟེན་ང་ཚོ་སོང་ནས་རྒྱ་གར་སློབ་སྤྱིར་ཞུས་ཀྱང་ངོས་ལེན་བྱེད་ཀྱིན་མི་འདུག་ན་སྐུ་མཁྱེན། སྐུ་ངོས་ཁྱེད་ཀྱིས་རྒྱ་གར་སློབ་སྤྱི་ལ་ཕྲུ་གུ་དེར་བརྒྱ་ཆ་གཅིག་སྤྲད་རོགས་ཞེས་གསུངས་རོགས་གནང་ཟེར། དེར་ཕྲན་གྱིས་ངས་སློབ་སྤྱི་ལ་བོད་པའི་སློབ་ཕྲུག་ཚོས་ཡིག་ཚད་མ་འཕྲོད་ཀྱང་བརྒྱ་ཆ་སྤྲད་དགོས། ཞེས་ཞུ་བདེ་བོ་མི་འདུག མ་གཞི་སློབ་སྤྱི་ལ་བརྒྱ་ཆ་ཁ་ཤས་རེ་དམིགས་བསལ་གྱིས་སློབ་ཕྲུག་ཚོར་སྤྲད་ཆོག་པའི་དབང་ཚད་ཡོད་མེད་ཧ་གོ་གི་མེད། གལ་སྲིད་སློབ་སྤྱི་ལ་དེ་ལྟའི་དབང་ཚད་ཡོད་ན་ཁྱོད་རང་གིས་ད་དུང་ཞུ་བ་འཐེན་ན་ཡག་པོ་ཡོད་པ་ལས་ཕྲན་གྱིས་ཞུ་རྒྱུ་སྟབས་བདེ་བོ་ཡོད་མ་རེད། གལ་སྲིད་ངས་དེ་འདྲ་ཞུས་ན་སང་ཁོང་ཚོས་བོད་མི་མང་སྤྱི་འཐུས་འདི་གར་ཡོང་ནས་ཁོང་ཚོར་དབང་ཡོད་བཤད་ཀྱིན་འདུག་དགོངས་ངེས་རེད། ཅེས་བཤད་པར་མི་དེས་ཕྲན་ལ་མ་དགའ་མདོག་མདོག་གིས་ཕྱིན་སོང།
དངོས་གནས་ང་ཚོའི་བུ་ཕྲུག་ཚོའི་ཕ་མ་འདིའི་རིགས་ཀྱིས་དང་པོ་ནས་སོ་སོའི་བུ་ཕྲུག་ལ་སློབ་སྦྱོང་ཚད་ལྡན་བྱེད་མ་བཅུག་པར་སང་ཉིན་ཡིག་ཚད་མ་འཕྲོད་སྐབས་སྔ་ཕྱི་ལ་བསམ་བློ་མ་བཏང་བར་འདྲ་མིན་འཁྲབ་ཡོང་གིན་འདུག སྤྱི་འཐུས་ཁྱེད་རང་སོང་ལ་ཡིག་ཚད་མ་འཕྲོད་པའི་སློབ་ཕྲུག་ཚོར་བརྒྱ་ཆ་དམིགས་བསལ་སྤྲད་བཅུག་ནས་ཡིག་ཚད་འཕྲོད་པ་བྱེད་དགོས་ཡོད། གསུང་གིན་ཡོད་པ་རེད། དེ་འདྲ་ཡོང་ཐབས་ཡོད་དམ།
གཏན་སློབ་ཁག་ཏུ་བོད་ཕྲུག་ཡག་པོ་དགོས་ན་འཛིན་སྐྱོང་བཟོ་མཁན་ནམ་དབུ་འཛིན་གཙོ་བྱེད་པའི་བོད་དགེ་རྣམས་རང་གི་མི་རིགས་ལ་ཤ་ཞེན་དང་སེམས་ཤུགས་ཡོད་མཁན་དགོས་པ་ལས་ཉི་མ་གང་ཁྱོག་བྱས་མཁན་ཤག་སྟག་བཞག་ན་སྒོ་བརྒྱབ་རྒྱུ་རང་རེད་དྲན་གྱིན།མ་ཟད་ཕ་མས་ཀྱང་སོ་སོའི་ཕྲུ་གུ་ལ་ལག་འཁྱེར་ཁ་པར་དང་སྒོར་མོ་མང་པོ་ལག་ཏུ་བཞག་ཡག་ཐད་བསམ་བློ་གཏང་དགོས།
དཔེ་ན།ད་ལོའི་སིམ་ལ་གཏན་སློབ་ཀྱི་འཛིན་གྲྭ་དགུ་པའི་ཡིག་རྒྱུགས་ཡག་པོ་ཆགས་མེད་ཙང་བསྐྱར་རྒྱུགས་གཏང་དགོས་པ་རེད་ཟེར།ད་དུང་དེ་ཡི་ག་ལ་ཚོད་འཛིན་གྲྭ་གཞན་རྣམས་ཀྱང་དགེ་རྒན་གྱི་རོགས་པ་མ་བྱས་ན་ཡིག་རྒྱུགས་ཡག་པོ་མི་ཡོང་བ་སིམ་ལ་མི་མང་པོ་ཞིག་གིས་བཤད་ཀྱིན་ཡོད་པ་རེད།དེ་ལྟར་རོགས་བྱས་དགོས་ན་ཡིད་སྐྱོ་བ་ཞིག་མ་རེད་དམ།།