པཎ་ཆེན་རྗེས་དྲན།

ཁ་སང་ཕྱི་ཚེས་ ༡༨ ཉིན་དྲོར། མཚོ་སྔོན་ཞིང་ཆེན་ནང་བསྟན་མཐུན་ཚོགས་ཀྱི་གོ་སྒྲིག་དང་བུས་མདོའི་དགོན་ཆེན་གྱི་སྒར་པ་ངག་དབང་བཟང་བོས་སྤྱིན་བདག་འོག མཚོ་སྔོན་གནའ་མཁར་ཟི་ལིང་ནས་ཀུན་གཟིགས་པཎ་ཆེན་སྐུ་ཕྲེང་བཅུ་བ་ཆོས་ཀྱི་རྒྱལ་མཚན་མཆོག་དགོངས་པ་ཆོས་དབྱིངས་སུ་ཐིམ་ཏེ། ལོ་འཁོར་ ༢༠ ལོན་པའི་རྗེས་དྲན་བཞུགས་མོལ་ཚོགས་འདུ་གཟབ་རྒྱས་ཤིག་བསྡུས་ཡོད།

རྗེས་དྲན་ཚོགས་འདུ་དེར་མཚོ་སྔོན་ཞིང་ཆེན་ཆབ་སྲིད་གྲོས་ཚོགས་ཀྱི་འགན་འཛིན་གཞོན་པ་རིན་ཆེན་རྣམ་རྒྱལ་དང་། མཚོ་སྔོན་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་ཨ་ལགས་གསེར་ཁྲི་ཚང་དང་ཚོགས་གཞོན་བིས་མདོ་དགོན་ཆེན་གྱི་སྒར་བ་ངག་དབང་བཟང་བོ། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་སངས་རྒྱས། མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་སངས་རྒྱས་རྒྱལ། རྭ་རྒྱ་ཤེས་རིག་ནོར་བུའི་གླིང་གི་སློབ་གཙོ་འཇིགས་མེད་རྒྱལ་མཚན་སོགས་ཞུགས་ཡོད་ཅིང་། དེ་མིན་འབྲེལ་ཡོད་ལས་ཁུངས་ཁག་གི་མགོ་ཁྲིད་དང་། སློབ་གྲྭ་དང་དགོན་སྡེ་ཁག་གི་སྐུ་ཚབ་བཅས་ཀྱང་ཞུགས་ཡོད་འདུག  

ཚོགས་ཐོག་ཏུ་ཀུན་གཟིགས་པཎ་ཆེན་སྐུ་ཕྲེང་བཅུ་བའི་༼ རྒྱལ་གཅེས་ཆོས་གཅེས་ཀྱི་དགོངས་པ་ ༽ དང་། ༼ མི་རིགས་སྐད་ཡིག་གོང་སྤེལ་གྱི་བརྩེ་སེམས་ ༽ ༼ རིག་གནས་སློབ་གསོ་དར་རྒྱས་ཀྱི་སྙིང་སྟོབས་ ༽ ༼ སྤྱི་ཚོགས་དཔལ་འབྱོར་འཛུགས་སྐྲུན་གྱི་ཆོད་སེམས་ ༽ ཟེར་བ་བཅས་ཀྱི་གལ་ཆེའི་དགོངས་དོན་བཞི་ལ་སློབ་སྦྱོང་དང་། རྒྱུན་འཛིན་དར་རྒྱས་སུ་གཏོང་དགོས་པའི་སྐོར་ལ་བགྲོ་གླེང་བྱས་ཡོད་འདུག